ស្ថានីយទូរទស្សន៍ CNN បានបង្ហាញពីការស្រាវជ្រាវចុងក្រោយរបស់ Pew Research Center ថា នៅឆ្នាំ២០២២ កន្លងមក ស្ត្រីអាមេរិកជាមធ្យមទទួលបានប្រាក់ចំណូលប្រមាណ៨២សេន ឯបុរសទទួលបាន១ដុល្លារ ។ នេះបើតាមការវិភាគប្រាក់ចំណូលជាមធ្យមក្នុង១ម៉ោងរបស់បុគ្គលិកពេញម៉ោង និងក្រៅម៉ោង ។ គេចាត់ទុកថា ប្រាក់ឈ្នួលបានកើនឡើងតិចតួច ខណៈស្ត្រីទទួលបានប្រាក់ឈ្នួលត្រឹមតែ៦៥សេននៅឆ្នាំ១៩៨២ ។

ការវិភាគរបស់ Pew បញ្ជាក់ថា ការរៀនចប់មហាវិទ្យាល័យ ការបម្រើការងារមានប្រាក់ខែខ្ពស់ និងបទពិសោធន៍ក្នុងការងារច្រើនអាចជួយឱ្យស្ត្រីកាត់បន្ថយគម្លាតយេនឌ័រតាំងពីឆ្នាំ១៩៨២ ។ ប៉ុន្តែករណីស្ត្រីរៀនបានខ្ពស់ជាងបុរស ប្រាក់ចំណូលរបស់ស្រ្តីនិងបុរស បែរជាមិនផ្លាស់ប្តូរទៅវិញ ។ ការវិភាគបង្ហាញទៀតថា ក្នុងចំណោមស្ត្រីគ្នាឯង ក៏លម្អៀងរឿងប្រាក់ឈ្នួលផងដែរ ។ លើសពីនេះ ជាតិសាសន៍ និងអាយុ តែងតែជះឥទ្ធិពលដល់អត្រាប្រាក់ឈ្នួលដែលស្ត្រីទទួលបាន ជាក់ស្តែង ស្រ្តីអាមេរិកមានដើមកំណើតអាហ្វ្រិក ឬអេស្ប៉ាញ នឹងទទួលប្រាក់ឈ្នួលតិច ហើយស្ត្រីមានអាយុច្រើនក៏ទទួលប្រាក់ឈ្នួលតិចផងដែរ ។

ក្រៅពីនេះ ការមានផ្ទៃពោះ ក៏ជាមូលហេតុសំខាន់សម្រាប់ប្រាក់ឈ្នួលស្ត្រីដែរ ខណៈពេលមានកូន ស្ត្រីត្រូវយកពេលវេលាមកថែទាំកូន ធ្វើឱ្យពេលវេលាធ្វើការរបស់ពួកគេធ្លាក់ចុះ ដែលផ្ទុយពីបុរសមានកូន ។

គម្លាតប្រាក់ឈ្នួលខុសគ្នាទៅតាមជាតិសាសន៍ និងពណ៌សម្បុរ ខណៈនៅឆ្នាំ២០២២ ស្ត្រីសម្បុរខ្មៅមានប្រាក់ឈ្នួល៧០% បើធៀបនឹងបុរសសម្បុរស ។ ស្ត្រីអេស្ប៉ាញមានប្រាក់ឈ្នួលត្រឹមតែ៦៥% ខណៈស្ត្រីស្បែកសទទួលបានដល់៨៣% ។ លើសពីនេះ មានភស្តុតាងថ្មីបង្ហាញថា មានការបែងចែកក្នុងការបំពេញការងារចំពោះជាតិសាសន៍ផ្សេងៗ រួមទាំងការរើសអើងប្រឆាំងនឹងក្រុមជនពិការ ដោយដកហូតឱកាសរបស់ពួកគេ ។

កត្តាចុងក្រោយដែលប៉ះពាល់ដល់ប្រាក់ឈ្នួល គឺប្រភេទការងារដូចជា ការថែទាំ និងផ្នែកសេវាកម្ម គឺជាការងាររបស់ស្ត្រីភាគច្រើន ។ រីឯការងារផ្នែកគ្រប់គ្រង វិទ្យាសាស្ត្រ បច្ចេកវិទ្យា វិស្វកម្ម និងគណិតសាស្ត្រវិញ មិនថាភេទណាទេ បើពួកគេអាចបំពេញការងារបាន គឺនឹងទទួលប្រាក់ឈ្នួលផ្អែកតាមការសិក្សា មុខតំណែង ច្រើនជាងគិតលើភេទ ៕

ប្រភព ៖ thestandard

ប្រទេសជប៉ុន ៖ កាលពីថ្ងៃទី១ ខែមីនា កន្លងមក សារព័ត៌មានបរទេសរាយការណ៍ថា ពលរដ្ឋជប៉ុនបានចេញមកធ្វើបាតុកម្មនៅតាមផ្លូវក្នុងក្រុងតូក្យូ ក្រោយពីនៅថ្ងៃទី២៨ ខែកុម្ភៈ សភាតំណាងរាស្ត្រជប៉ុនបានអនុម័តថវិកាប្រចាំឆ្នាំ២០២៣ ចំនួនជាង១១៤លានលានយេន ក្នុងនោះថវិកាសម្រាប់ការពារជាតិស្មើ៦,៨២លានលានយេន ។ ការអនុម័តថវិកានេះធ្វើឱ្យមានការរិះគន់ទូទាំងប្រទេស ហើយមានមនុស្សម្នាចេញមកធ្វើបាតុកម្មដ៏ធំមួយដើម្បីសម្តែងការមិនពេញចិត្តចំពោះរដ្ឋាភិបាល និងអំពាវនាវឱ្យរដ្ឋាភិបាលអនុវត្តគោលនយោបាយដោយសន្តិវិធី ។

បាតុករម្នាក់លើកឡើងថា រដ្ឋាភិបាលជប៉ុនប្រញាប់អនុម័តថវិកាពាក់ព័ន្ធនឹងផ្នែកការពារជាតិ ហើយវាជាចំណុចផ្លាស់ប្តូរប្រវត្តិសាស្ត្រដ៏សំខាន់របស់ប្រទេស ខណៈពួកគេមិនបានរៀនសូត្រពីប្រវត្តិសាស្ត្រទេ ហើយខ្លាចរឿងនេះអាចជាចំណុចចាប់ផ្តើមកើតសង្គ្រាមម្តងទៀត ដោយរដ្ឋាភិបាលជប៉ុនកំពុងតែដើរខុសផ្លូវ ។

ក្រៅពីនេះ ក្រុមបាតុករបញ្ជាក់ថា ការបន្ថែមថវិកាក្នុងផ្នែកការពារជាតិនឹងបង្កើនបន្ទុកពន្ធដល់ពលរដ្ឋជប៉ុន ហើយអាចធ្វើឱ្យប៉ះពាល់ដល់ការកាត់បន្ថយថវិកាសម្រាប់ការចំណាយផ្សេងៗដូចជា ការចំណាយចាំបាច់ក្នុងជីវភាពរស់នៅរបស់ពលរដ្ឋ ។

ទោះយ៉ាងណា មិនត្រឹមតែពលរដ្ឋទូទៅទេដែលបានចូលរួមធ្វើបាតុកម្មប្រឆាំងនឹងរដ្ឋាភិបាល ប៉ុន្តែមានសមាជិកសភាតំណាងរាស្ត្រជាច្រើនរូបក៏បានចូលរួមធ្វើបាតុកម្មផងដែរ ដើម្បីជំទាស់នឹងការសម្រេចចិត្តនេះ ។

កាលពីខែធ្នូ ឆ្នាំ២០២២ រដ្ឋាភិបាលជប៉ុនបានអនុម័តឯកសារគោលនយោបាយសន្តិសុខចំនួន៣ច្បាប់ដូចជា យុទ្ធសាស្ត្រសន្តិសុខជាតិ, គោលការណ៍ណែនាំគម្រោងការពារជាតិ និងគម្រោងការពារប្រទេសរយៈពេលមធ្យម ។ ការអនុម័តនេះចាត់ទុកថា ជាចំណុចរបត់មួយរបស់ជប៉ុនក្នុងផ្នែកនយោបាយសន្តិសុខ និងការការពារប្រទេស បន្ទាប់ពីសង្គ្រាមលោកលើកទី២៕

ប្រភព ៖ pptvhd36

ហុងកុង ៖ នាពេលរាត្រីឈានចូលថ្ងៃទី៣ ខែមីនា មានហេតុការណ៍ភ្លើងឆេះអគារមួយកន្លែងមានកម្ពស់៤២ជាន់ ខណៈអគារនេះកំពុងស្ថិតក្នុងការសាងសង់នៅតំបន់ទិញទំនិញរបស់ហុងកុង ។ ភ្លើងបានឆេះរាលដាលទៅដល់អគារនៅក្បែរគ្នាផងដែរ ប៉ុន្តែមិនទាន់មានសេចក្តីរាយការណ៍ពីចំនួនអ្នកស្លាប់ទេ ។

ភ្លើងបានឆេះយ៉ាងសន្ធោសន្ធៅលើអគារដែលមានទីតាំងនៅផ្លូវ Midddle Road ក្នុងតំបន់ Tsim Sha Tsui ធ្វើឱ្យមានកម្ទេចកម្ទីជាច្រើនបាក់ធ្លាក់មកលើផ្លូវខាងក្រោម ។ អាជ្ញាធរហុងកុងបានប្រកាសថា ហេតុការណ៍ភ្លើងឆេះលើកនេះខ្លាំងក្លាក្នុងកម្រិត៤ ក្នុងចំណោមទាំងអស់៥កម្រិត ។

កាសែត South China Morning Post រាយការណ៍ថា ភ្នាក់ងារពន្លត់ភ្លើងត្រូវប្រើរយៈពេលរហូតដល់៩ម៉ោងឯណោះទើបអាចពន្លត់ភ្លើងបានខ្លះៗ ហើយគេបានជម្លៀសពលរដ្ឋរស់នៅក្បែរនោះចេញចំនួន១៣០នាក់ ។ លើសពីនេះ ភ្លើងបានឆេះរាលដាលទៅកាន់អគារក្បែរគ្នាជាច្រើនទៀត រួមទាំង Chungking Mansions ជាផ្ទះសំណាក់មានតម្លៃថោកនៅក្បែរនោះផងដែរ មុននឹងភ្នាក់ងារពន្លត់ភ្លើងអាចគ្រប់គ្រងស្ថានការណ៍បាន ។

សារព័ត៌មានរ៉យទ័ររាយការណ៍ថា ភ្លើងបានឆាបឆេះក្នុងបរិវេណជាច្រើនជាន់របស់អគារ ហើយគេអាចមើលឃើញពន្លឺភ្លើងនៅលើមេឃពីផ្នែកម្ខាងទៀតនៃកំពង់ផែ Victoria ខណៈអគារផ្សេងទៀតក៏ទទួលរងការខូចខាតដូចគ្នា ដោយសារឧបករណ៍សំណង់ធ្លាក់ចុះមក ។

តាមព័ត៌មានពីវែបសាយរបស់ក្រុមហ៊ុនបង្ហាញ អគារកម្ពស់៤២ជាន់នេះ គឺជាគម្រោងសាងសង់របស់ក្រុមហ៊ុន Empire Group ដើម្បីធ្វើជាទីតាំងរបស់ Mariners Club និងសណ្ឋាគារ ។ ទោះយ៉ាងណា ប៉ូលិសមិនទាន់អាចបញ្ជាក់ពីមូលហេតុដែលបណ្តាលឱ្យភ្លើងឆេះនៅឡើយទេ ៕

ប្រភព ៖ mgronline

ធ្វើរឿងទាំងនេះបាន មនុស្សប្រុសនឹងសរសើរអ្នកមិនដាច់ពីមាត់ ហើយបេះដូងមានតែម្នាក់ប៉ុណ្ណោះ។ ចង់បានបេះដូងមនុស្សប្រុសម្នាក់ ពេលខ្លះមិនពិបាកពេកនោះទេ ឲ្យតែអ្នកចេះគន្លឹះព្រមទាំងចេះស្រលាញ់ខ្លួនឯង ឲ្យតម្លៃខ្លួនឯងច្រើនៗ ។

១. ខ្វល់ពីរូបរាង
សង្គមបច្ចុប្បន្ន សម្រស់ខាងក្រៅគឺជាអន្ទាក់ដ៏ឆ្នើមរបស់មនុស្សស្រី។ ត្រូវចាំថា លើលោកនេះគ្មានទេមនុស្សស្រីរូបអាក្រក់ មានតែមនុស្សស្រីខ្ជិលប៉ុណ្ណោះដែលបដិសេធនូវភាពស្រស់ស្អាត។ ដូច្នេះ បើចង់ទទួលបានមន្តស្នេហ៍ខ្លាំង អ្នកត្រូវរៀនរបៀបដែលជួយឲ្យខ្លួនឯងស្រស់ស្អាត។ មិនថាអាយុណាទេ ត្រូវតែយកចិត្តទុកដាក់លើសុខភាពស្បែក ស្លៀកពាក់ឲ្យសមរម្យ និងមានសណ្តាប់ធ្នាប់។២. កុំចំណាយពេល១០០% ជាមួយមនុស្សប្រុស
ក្នុងរឿងស្នេហា គេសង្កេតឃើញថាមនុស្សស្រីច្រើនជាភាគីដែលតឹងតែង និងចង់បានចំណាប់អារម្មណ៍ច្រើនពីមនុស្សប្រុស។ នៅពេលមនុស្សស្រីលះបង់ជ្រុលពេក មនុស្សប្រុសនឹងលែងគិតថានេះជាសំណាងទៀតហើយ តែវាជារឿងគួរឲ្យធុញទៅវិញ។ ហេតុនេះ មនុស្សស្រីមិនត្រូវចំណាយពេល១០០%ជាមួយមិត្តប្រុសទេ តែគួរយកពេលវេលាចាំបាច់មកផ្តោតលើគោលដៅនិងរឿងដែលធ្វើឲ្យខ្លួនឯងអភិវឌ្ឍន៍ទៅមុខ នេះទើបមនុស្សប្រុសសាទរចំពោះទង្វើនេះជាង។៣. រស់នៅដោយឯករាជ្យ និងចេះមើលថែខ្លួនឯង
ក្នុងសង្គមនេះ មនុស្សស្រីខ្លាំងនឹងត្រូវបានគេឲ្យតម្លៃ។ ខ្លាំងទីនេះ មិនសម្តៅលើកាច ឆ្នាសឆ្នើមកម្លាំងបាននោះទេ តែជាមនុស្សស្រីពូកែខាងផ្នែកសេដ្ឋកិច្ចដែលអាចជ្រោមជ្រែងខ្លួនឯងបាន។ មនុស្សស្រីដែលមានទេពកោសល្យ អាចរស់នៅបានល្អ ទើបមនុស្សប្រុសសរសើរ។៤.ឲ្យតម្លៃលើភាពវ័យឆ្លាត
ស្រីស្អាតនឹងធ្វើឲ្យបុរសលង់ស្នេហ៍ក្នុងមួយរយៈពេល តែស្រីឆ្លាតនឹងធ្វើឲ្យបុរសលង់ស្នេហ៍ពេញមួយជីវិត។ ដូច្នេះ កុំភ្លេចសាងភាពឆ្លាត កសាងចំណេះដឹងនិងបង្កើតភាពវាងវៃសម្រាប់ខ្លួនឯងដែលធ្វើឲ្យមនុស្សប្រុសមិនត្រឹមស្រលាញ់អ្នកទេ តែថែមទាំងសរសើរនិងមោទកភាពចំពោះអ្នកទៀតផង៕

ប្រទេសថៃ ៖ អតីតអ្នកប្រដាល់ថៃ លោក Antoine Pinto បានបង្ហោះសារនៅលើបណ្តាញសង្គមថា ៖ «ពេលនេះ គុនខ្មែរមានអ្នកមើលច្រើនណាស់ ពិតជាខ្លាំងមែនទែន» បានធ្វើឱ្យអ្នកគាំទ្រ «Muay Thai» សម្តែងការមិនពេញចិត្តនឹងការបង្ហោះរបស់លោក ព្រមទាំងរិះគន់អ្នកប្រដាល់រូបនេះផងដែរ ដែលមានម្តាយជាកូនកាត់បារាំង និងខ្មែរ ។

យោងតាមទំព័រហ្វេសប៊ុករបស់ថៃឈ្មោះ MGR.SPORT មានពលរដ្ឋថៃជាច្រើននាក់បានបញ្ចេញមតិរិះគន់លោក Antoine Pinto ថា ចូរត្រឡប់ទៅរកស៊ីជាមួយគុនខ្មែរចុះ មិនបាច់មកបង្រៀនពលរដ្ឋថៃទេ ហេតុអ្វីមិនទៅបង្រៀនខ្មែរទៅ កុំមកថាឱ្យ «Muay Thai» ។ ដូចគ្នានេះដែរ ពលរដ្ឋថៃម្នាក់ទៀតថា ប្រញាប់ចេញពីប្រទេសថៃ ហើយទៅនៅខ្មែរចុះ ពលរដ្ឋថៃមិនចូលចិត្តអ្នកវាយក្រោយខ្នងទេ ខ្លួនឯងធ្វើជាអ្នកប្រដាល់ថៃ រស់នៅថៃ តែពេលបានល្អហើយនិយាយចំអន់ប្រទេសថៃ ។ រីឯម្នាក់ទៀតលើកឡើងថា មកស៊ីចុកជាមួយ «Muay Thai» តែមកជន់ពន្លិចបេះដូងពលរដ្ឋថៃទៅវិញ ។ ស្រដៀងគ្នានេះ ម្នាក់ទៀតថា ត្រឡប់ទៅប្រទេសកំណើតវិញទៅ មករស់នៅថៃយូរយាហើយ ។

បន្ទាប់ពីមានការរិះគន់ជាច្រើនពីពលរដ្ឋថៃ ក្រោយមក លោក Antoine Pinto បានបង្ហោះសារបញ្ជាក់ថា ៖ «លោកនៅតែគាំទ្រកីឡា «Muay Thai» និងនៅតែគាំទ្របន្តទៀត ហើយលោកក៏គ្មានចេតនាគាំទ្រគុនខ្មែរដែរ ប៉ុន្តែបើអ្នកណាម្នាក់ធ្វើឱ្យលោកខូចខាត លោកនឹងប្តឹងវិញជាមិនខាន» ។

អ្នកគាំទ្រ WORLD KUN KHMER Promotion បានបង្ហោះសារសរសើរអតីតអ្នកប្រដាល់រូបនេះ ខណៈលោកបានបង្ហោះថា ៖ «មានពលរដ្ឋថៃមួយចំនួនរើសអើងជាតិសាសន៍តាមរយៈការបញ្ចេញមតិ ប៉ុន្តែក៏មានពលរដ្ឋថៃជាច្រើននាក់រក្សាសេចក្តីថ្លៃថ្នូរក្នុងឋានៈជាប្រទេសនៅតំបន់អាស៊ានដូចគ្នា ប៉ុន្តែសូមឱ្យពលរដ្ឋខ្មែររក្សាសេចក្តីថ្លៃថ្នូរក្នុងឋានៈជាខ្មែរ រក្សាសីលធម៌ក្នុងការនិយាយស្តីក្នុងរឿងមួយចំនួន ហើយតម្លៃជាតិរបស់យើង ក៏មានតម្លៃជាសកល» ។

លោក Antoine Pinto បានបញ្ចេញមតិក្នុងបណ្តាញសង្គមទៀតថា ៖ «យើងត្រូវសម្តែងក្តីស្រឡាញ់រវាងគ្នានិងគ្នា អ្នកមានកីឡារបស់អ្នក ហើយពលរដ្ឋថៃក៏មាន Muay Thai យើងត្រូវតែគោរពគ្នាទៅវិញទៅមក» ។ ការបញ្ចេញមតិរបស់អតីតអ្នកប្រដាល់រូបនេះបានធ្វើឱ្យពលរដ្ឋខ្មែរជាច្រើននាក់ចុច Like និងសរសើរផងដែរ ៕

ប្រភព ៖ MGR.SPORT

បុរសម្នាក់ដែលសង្គមថៃទទួលស្គាល់ថាតែងតែរិះគន់រាជរដ្ឋាភិបាល លោក Srisuwan Janya បានធ្វើការដាក់ពាក្យបណ្តឹងទៅកាន់ប្រធានសភា លោក Chuan Leekpai ប្រឆាំងនឹងសមាជិកសភាដែលមិនស្គាល់អត្តសញ្ញាណម្នាក់លេងល្បែងសុីសងក្នុងសភា។

លោក Srisuwan Janya បានដាក់ពាក្យបណ្តឹងអមជាមួយរូបភាព និងវីដេអូ ដែលជាសមាជិកសភាថៃមួយរូប ជាមួយគ្នីគ្នា៣រូបទៀត កំពុងអង្គុយប្រជុំសភា តែបែរជានាំគ្នាលេងល្បែងទៅវិញ។

សមាជិកសភា ដែលត្រូវបានគេចោទប្រកាន់នោះ ត្រូវបានគេស្គាល់ថា ទើបតែចូលធ្វើការមិនទាន់បានឆ្នាំស្រួលបួលនោះទេ ហើយនៅក្មេងអាយុ៤០ស្តើងតែប៉ុណ្ណោះ និមានផ្ទះនៅ​ខេត្ត​មួយ​ក្នុង​ចម្ងាយ១០០គីឡូម៉ែត្រ​ពី​ទីក្រុង​បាងកក។

ជុំវិញរឿងនេះ គណៈកម្មាធិការ​ក្រមសីលធម៌​របស់​សភា​ថៃ កំពុងបើកការ​ស៊ើបអង្កេត ដើម្បីស្វែងរកបុគ្គលនោះយកមកដាក់ទោសតាមច្បាប់។

តាមច្បាប់រដ្ឋធម្មនុញ្ញថៃ ការលេងល្បែងស៊ីសងខាងក្នុងសភាគឺខុសច្បាប់ និងជាការរំលោភលើក្រមសីលធម៌សម្រាប់សមាជិកសភា៕

ប្រភព៖ Nation Thailand

TikTok បានប្រកាសពីគោលការណ៍ថ្មីរបស់ខ្លួនដើម្បីទប់ស្កាត់ការញៀននឹងការលេងបណ្តាញសង្គមរបស់យុវវ័យ គឺការត្រៀមបើកឱ្យប្រើប្រាស់មុខងារថ្មី ដោយកំណត់ឱ្យអ្នកប្រើមានអាយុក្រោម១៨ឆ្នាំ អាចប្រើប្រាស់កម្មវិធីនេះត្រឹមតែ១ម៉ោងប៉ុណ្ណោះក្នុង១ថ្ងៃ ។

គេចាត់ទុកថា វាជាគោលការណ៍មួយក្នុងចំណោមគោលការណ៍ទាំងអស់របស់ TikTok ដើម្បីការពារយុវវ័យកុំឱ្យញៀននឹងការលេង TikTok ក្នុងទូរស័ព្ទដៃ ។ ក្នុងករណីពួកគេប្រើប្រាស់ TikTok លើសកំណត់ នឹងត្រូវបង្ខំឱ្យដាក់លេខសម្ងាត់ម្តងទៀតសម្រាប់បញ្ជាក់ថា នឹងប្រើប្រាស់បន្ត ។ ទោះយ៉ាងណា ដំណាក់កាលចុះឈ្មោះប្រើប្រាស់កម្មវិធី TikTok គឺត្រូវដាក់ថ្ងៃខែឆ្នាំកំណើតរបស់អ្នកប្រើប្រាស់ជាមុនសិន ។

ចំណែកអ្នកប្រើប្រាស់វ័យក្មេងមានអាយុក្រោម១៣ឆ្នាំ ត្រូវប្រើកម្មវិធី TikTok for Younger Users ដែលមានការកំណត់រយៈពេលប្រើប្រាស់ក្នុង១ថ្ងៃមិនលើសពី៦០នាទី ហើយបើពួកគេត្រូវការប្រើប្រាស់លើសពីពេលកំណត់នេះ ឪពុកម្តាយពួកគេត្រូវដាក់លេខសម្ងាត់ដើម្បីបន្តរយៈពេលប្រើប្រាស់ចំនួន៣០នាទីទៀត ។

ជាមួយគ្នានេះ TikTok ក៏មានគម្រោងបន្ថែម Features សម្រាប់ Family Pairing ផងដែរ ដែលអនុញ្ញាតឱ្យឪពុកម្តាយក្មេងអាចតភ្ជាប់គណនីរបស់កូនជាមួយគណនីរបស់ឪពុកម្តាយដើម្បីដឹងថា តើកូនរបស់ខ្លួនចូលមើលរូបភាព ឬខ្លឹមសារអ្វីខ្លះ ? ហើយដឹងថា កូនរបស់ពួកគេមើលក្នុងរយៈពេលយូរប៉ុនណាក្នុង១ថ្ងៃ ។ ឪពុកម្តាយក្មេងអាចកាត់ Content មួយចំនួនចេញ ដែលខ្លួនមិនចង់ឱ្យកូនចូលមើលផងដែរ ។ TikTok រំពឹងថា Features ទាំងនេះនឹងអាចប្រើប្រាស់ក្នុងរយៈពេលប៉ុន្មានសប្តាហ៍ខាងមុខទៀត ៕

ប្រភព ៖ The better