បុរាណវិទូមួយចំនួនបានអះអាងថា រូបចម្លាក់នៅលើប្រាសាទតាព្រហ្ម គឺជាពពួកសត្វដាយណូស៊រមួយប្រភេទ មានឈ្មោះថា វស្តេហ្គូស័រូស (Stegosaurus)។ ពួកគេជឿជាក់ថារូបចម្លាក់នេះ អាចប្រើជាភស្តុតាងមួយបញ្ជាក់ឱ្យដឹងថា ជនជាតិខ្មែរសម័យនោះ ពិតជាបានរស់នៅជាមួយនឹងពពួកសត្វដាយណូស័រ។

បុរាណវិទូបានសន្មតថា អាកាសធាតុនិងព្រៃឈើកាលពីសម័យនោះ បានផ្ដល់ជាជម្រកដ៏ល្អប្រសើរមួយសម្រាប់ការរស់នៅរបស់ពពួកសត្វដាយណូស័រ ហើយវាអាចមានជីវិតរស់នៅរហូតដល់ទៅ២០០ឆ្នាំ ឬ៣០០ឆ្នាំមុនយ៉ាងតិច។

ផ្ទុយមកវិញ បុរាណវិទូមួយចំនួនទៀតយល់ថា រូបចម្លាក់នេះគឺជាសត្វរមាស ឬជាសត្វជ្រូកព្រៃជាមួយនឹងដើមដូងនៅខាងក្រោយ ចំណែកឯអ្នកខ្លះទៀតគិតថា រូបចម្លាក់់នេះត្រូវបានបង្កើតឡើងតាមរយៈការឆ្នៃប្រតិដ្ឋប៉ុណ្ណោះ។

គួរបញ្ជាក់ផងដែរថា ប្រាសាទតាព្រហ្មមានទីតាំងស្ថិតក្នុងតំបន់អង្គរ ខេត្តសៀមរាប ប្រទេសកម្ពុជា សាងសង់ឡើងដោយព្រះបាទជ័យវរ្ម័នទី៧ នៅចុងឆ្នាំ១១០០។ ប្រាសាទនេះត្រូវបានបញ្ចូលទៅក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ នៅក្នុងឆ្នាំ១៩៩២ និងជាប្រាសាទមួយក្នុងចំណោមប្រាសាទដ៏ល្បីល្បាញជាច្រើនទៀតនៅតំបន់អង្គរ។ ចំនួនភ្ញៀវទេសចរណ៍ក៏មានការកើនឡើងផងដែរ បន្ទាប់ពីភាពយន្តរឿងថូមរ៉ៃឌឺ (Tomb Raider) បានប្រើប្រាស់ប្រាសាទនេះជាទីតាំងសម្រាប់ថត៕

ភ្នំពេញ៖ ដើម្បីងាយស្រួលដល់អាជ្ញាធរអាចជួយអន្តរាគមន៍បានទាន់ពេលវេលាក្នុងករណីមានអគ្គិភ័យកើតឡើងណាមួយ ប្រជាពលរដ្ឋនៅក្រុងព្រះសីហនុបានសហការជាមួយអាជ្ញាធរស្ម័គ្រចិត្តវាយកម្ទេចផ្ទះរបស់ខ្លួន ដើម្បីបើកផ្លូវឱ្យបានទូលំទូលាយងាយស្រួលធ្វើដំណើរ។

បើតាមលោកអភិបាលក្រុងព្រះសីហនុ បានបញ្ជាក់ថា ប្រជាពលរដ្ឋរស់នៅតាមបណ្តោយផ្លូវគឺម្តុំក្រោយសាលាសង្កាត់លេខ៤ ដែលស្ថិតនៅភូមិ៥ សង្កាត់លេខ៤ បានចូលរួមសហការ និងផ្តល់ភាពងាយស្រួលដល់អាជ្ញាធរក្រុងព្រះសីហនុ ដើម្បីបើកផ្លូវតាមប្លង់ជាលក្ខណៈប្រព័ន្ធ សម្រួលដល់ការធ្វើដំណើរ ទៅមក និងសង្គ្រោះបន្ទាន់ករណីមានអគ្គិភ័យ ឬឧបទ្ទវហេតុផ្សេងៗក្នុងតំបន់នោះ។

លោកបន្តថា ពលរដ្ឋព្រមវាយកម្ទេចផ្ទះមួយចំណែក ក្រោយពួកគេបានឈ្វេងយល់គ្រប់ៗគ្នាពីសារៈសំខាន់នៃការបើកផ្លូវដើម្បីធ្វើការអភិវឌ្ឍក្រុង បន្ទាប់ពីមានការសម្របសម្រួលពន្យល់ពីរដ្ឋបាលក្រុង រហូតធ្វើឲ្យពួកគាត់យល់ព្រមបើកផ្លូវថ្មីមួយខ្សែនេះទាំងអស់គ្នា។

លោកបានឱ្យដឹងទៀតថា ចំពោះផ្លូវថ្មីមួយខ្សែខាងលើនេះ មានប្រវែង ១៤០ម៉ែត្រ និងទទឹង ៦ម៉ែត្រ ហើយរដ្ឋបាលក្រុងនឹងធ្វើការចាក់បេតុងជូនពួកគេឲ្យបានល្អស្អាត៕

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់អភិបាលរាជធានីភ្នំពេញ ក្នុងការរៀបចំរថយន្តក្រុងដឹកអ្នកដំណើរ ជាពិសេសដឹកបងប្អូនប្រជាពលរដ្ឋទៅលេងតាមបណ្ដាខេត្តសំខាន់ៗក្នុងឱកាសបុណ្យចូលឆ្នាំខ្មែរ ដូចជាទៅលេងខេត្តសៀមរាបអង្គរជាដើម ដែលត្រូវរៀបចំព្រឹត្តិការណ៍អង្គរសង្ក្រាន្តនៅទីនោះ។

ការប្រកាសរបស់សម្ដេចបានធ្វើឡើង ក្នុងពិធីប្រគល់វិញ្ញាបនបត្រ និងសញ្ញាបត្រជូនដល់សិក្ខាកាម និងនិស្សិតវិទ្យាស្ថានខ្មែរជំនាន់ថ្មីជិត ២ពាន់នាក់ នាថ្ងៃទី៦ មីនានេះ។

ជាមួយគ្នានោះសម្តេចតេជោ ក៏បានអំពាវនាវដល់បងប្អនប្រជាពលរដ្ឋខ្មែរ រស់នៅក្រៅប្រទេស ទោះធ្លាប់ជេរប្រមាថ រិះគន់ គណបក្សប្រជាជនកម្ពុជា, រាជរដ្ឋាភិបាល និងសម្តេចក៏ដោយ សូមអញ្ជើញមកលេងស្រុកកំណើតរបស់ខ្លួនដោយមិនមានការចាប់ចង ឬធ្វើទុក្ខបុកម្នេញ ដូចការបំផុសព័ត៌មានបំពុលរបស់ក្រុមអគតិមួយចំនួននោះទេ៕

កន្លងមក ការអភិវឌ្ឍមួយក្នុងចំណោមការផ្លាស់ប្តូរផ្នែកបច្ចេកវិទ្យានៅលើពិភពលោកនេះ គឺការកើនឡើងនៃបញ្ញាសិប្បនិម្មិត Artificial intelligence (AI) ដែលវាកាន់តែមានភាពវៃឆ្លាត ហើយពេលខ្លះ វាអាចឆ្លាតហួសរហូតធ្វើឱ្យគេបារម្ភផងដែរ ជាក់ស្តែង កម្មវិធី ChatGPT អាចធ្វើឱ្យមនុស្សជាច្រើននាក់ត្រូវបាត់បង់ការងារ ។ ការបារម្ភពីបច្ចេកវិទ្យានេះ គឺជាអ្វីដែលលោក Elon Musk បិតាបច្ចេកវិទ្យាកំពុងបារម្ភដូចគ្នា ។

លោក Elon Musk ជាស្ថាបនិកក្រុមហ៊ុន Tesla និងជា CEO របស់ Twitter បានលើកឡើងក្នុងអំឡុងពេលលោកជួបជាមួយបណ្តាវិនិយោគិនរបស់ Tesla ក្នុងពិធី Investor Day ប្រចាំឆ្នាំ២០២៣ ដោយលោកទទួលស្គាល់ត្រង់ៗថា AI បានអភិវឌ្ឍន៍ខ្លួនយ៉ាងខ្លាំងក្លាជារឿងដែលធ្វើឱ្យលោកតានតឹងជាខ្លាំង ។

លោក Elon Musk ថ្លែងថា ៖ «ខ្ញុំបារម្ភពីបញ្ញាសិប្បនិម្មិត (AI) កំពុងតែរីកលូតលាស់យ៉ាងខ្លាំង ហើយគេចាត់ទុកថា វាជាបច្ចេកវិទ្យាមួយមានគ្រោះថ្នាក់ ហើយខ្ញុំខ្លាចថា ពួកយើងកំពុងអភិវឌ្ឍន៍វាខ្លាំងពេក តែទោះយ៉ាងណា ក្រុមហ៊ុន Tesla ក៏បានប្រើប្រយោជន៍ពីវាដែរ ដូចជា ការប្រើប្រព័ន្ធបើកបរដោយខ្លួនឯង ។ ដូច្នេះ ខ្ញុំជឿថា AI មិនទាន់គ្រប់គ្រងពិភពលោកនៅពេលនេះទេ ហើយវាក៏មិនទាន់អាចបង្កើតរថយន្តដោយខ្លួនឯងបានដែរ តែនៅថ្ងៃអនាគត ពេលវាបានអភិវឌ្ឍន៍កាន់តែខ្លាំងក្លាជាងនេះ ពួកយើងជាមនុស្សនឹងគ្មានប្រយោជន៍ទៀតទេ» ។

ក្រៅពីនេះ លោក Elon Musk ក៏បានបបួលវិនិយោគិនជជែករឿងកម្មវិធី ChatGPT ផងដែរ ដោយលោកសម្លឹងឃើញថា បច្ចុប្បន្ននេះ ការបង្កើត Chatbots ផ្ទាល់ខ្លួនកំពុងរីកចម្រើនរាល់ថ្ងៃ ហើយពេលខ្លះ គេបានផ្តោតលើការរកប្រាក់ចំណេញតែម្យ៉ាងប៉ុណ្ណោះ ។ ចំណែករូបលោកផ្ទាល់ មុននេះ ក៏ទើបបានប្រកាសថា កំពុងស្វែងរកក្រុមការងារធ្វើ Chatbots ដូចគ្នា ហើយការបង្កើតកម្មវិធីនេះឡើង គឹដើម្បីប្រកួតប្រជែងជាមួយ ChatGPT ។ ដូច្នេះ គេនឹងរង់ចាំមើលថា តើលោក Elon Musk នឹងធ្វើបែបណាបន្តទៀត ៕

ប្រភព ៖ beartaiBRIEF

ប្រទេសចិន ៖ ចិនបានដាក់គោលដៅការរីកលូតលាស់នៃសេដ្ឋកិច្ចប្រចាំឆ្នាំ២០២៣ ស្មើ៥% ធ្លាក់ចុះតិចតួចពីឆ្នាំ២០២២ ដែលស្មើ៥,៥% ។ លោកនាយករដ្ឋមន្ត្រី Li Keqiang បានផ្សព្វផ្សាយរបាយការណ៍ស្តីពីការងាររបស់រដ្ឋាភិបាល ក្នុងកិច្ចប្រជុំសភាតំណាងរាស្ត្រថ្នាក់ជាតិ (NPC) របស់ចិន ។

របាយការណ៍ការងាររបស់រដ្ឋាភិបាលបានផ្សព្វផ្សាយកាលពីថ្ងៃទី៥ ខែមីនា ជាថ្ងៃបើកកិច្ចប្រជុំសភាតំណាងរាស្ត្រថ្នាក់ជាតិនៅសាលប្រជុំក្នុងក្រុងប៉េកាំង ។ របាយការណ៍បញ្ជាក់ថា សេដ្ឋកិច្ចបានងើបឡើងវិញបន្ទាប់ពីចិនប្រើវិធានការទប់ស្កាត់ជំងឺកូវីដ-១៩ អស់រយៈពេល៣ឆ្នាំ ហើយរដ្ឋាភិបាលបានកំណត់គោលដៅឱនភាពថវិកាឆ្នាំ២០២៣ ស្មើ៣% និងកំណត់គោលដៅសន្ទស្សន៍តម្លៃអ្នកប្រើប្រាស់ស្មើ៣% ខណៈស្ថានភាពសេដ្ឋកិច្ចកាលពីឆ្នាំ២០២២ កើនឡើង៣% ខុសពីគោលដៅដែលបានកំណត់ទុកស្មើ៥,៥% ហើយគេចាត់ទុកជាការពង្រីកសេដ្ឋកិច្ចក្នុងអត្រាទាបបំផុតសម្រាប់រយៈពេលជិតពាក់កណ្តាលសតវត្សរ៍ ។

ការប្រជុំសភាតំណាងរាស្ត្រថ្នាក់ជាតិលើកទី១៤ ថ្ងៃដំបូង ប្រធានាធិបតី លោក ស៊ី ជិនពីង ដែលបានកាន់តំណែងសំខាន់ពីរទៀត គឺអគ្គលេខាធិការបក្សកុម្មុយនិស្តចិន និងគណៈកម្មាធិការកណ្តាល ព្រមទាំងជាប្រធានគណៈកម្មការយោធាមជ្ឈិម ព្រមទាំងបណ្តាមេដឹកនាំផ្សេងទៀតរបស់ចិនបានចូលរួមការប្រជុំ ដូចគ្នានឹងសមាជិក NPC មកពីផ្នែកជាច្រើនទៀតចំនួន២.៩៤៨នាក់ ។

លោកនាយករដ្ឋមន្ត្រី Li Keqiang ជាអ្នករាយការណ៍ពីសកម្មភាពការងាររបស់រដ្ឋាភិបាលថា សេដ្ឋកិច្ចចិនកំពុងងើបឡើងវិញយ៉ាងរឹងមាំ និងបង្ហាញឱ្យឃើញពីសក្តានុពលរីកចម្រើនទៅមុខ បើទោះជាបរិយាកាសខាងក្រៅមានភាពមិនច្បាស់លាស់ក្តី ដូចជា អតិផរណាពិភពលោកស្ថិតក្នុងអត្រាខ្ពស់ រួមទាំងការព្យាយាមដាក់សម្ពាធមកលើចិន ។

លោកបន្តថា ក្នុងភាពជាមេដឹកនាំរឹងមាំរបស់គណៈកម្មាធិការមជ្ឈិមបក្សកុម្មុយនិស្ត រដ្ឋាភិបាលបានទប់ស្កាត់នឹងការរីករាលដាលនៃជំងឺកូវីដ ដោយជំរុញការអភិវឌ្ឍសេដ្ឋកិច្ច និងសង្គមក្នុងទិសដៅមានប្រសិទ្ធភាព និងទំនាក់ទំនងគ្នាយ៉ាងល្អ ។ លើសពីនេះ ការយកឈ្នះលើបញ្ហាប្រឈមដ៏ធំធ្វើឱ្យចិនទទួលបានជោគជ័យក្នុងការអភិវឌ្ឍសេដ្ឋកិច្ចឱ្យរីកលូតលាស់យ៉ាងមានស្ថេរភាព ។

ការប្រជុំសភាតំណាងរាស្ត្រថ្នាក់ជាតិលើកទី១៤ រៀបចំឡើងចាប់ពីថ្ងៃទី៥-១៣ ខែមីនា មានរបៀបវារៈជាច្រើន រួមទាំងពិចារណាពីលទ្ធផលការងាររបស់រដ្ឋាភិបាល, ការអនុវត្តរបស់តុលាការកំពូលប្រជាជន ការជ្រើសរើស និងតែងតាំងមុខតំណែងនយោបាយសំខាន់ៗ ៕

ប្រភព ៖ TNN World

អាហ្សង់ទីន៖ កាលពីថ្ងៃទី ២៥ ខែធ្នូ Messi បានបង្ហោះនៅលើទំព័រផ្ទាល់ខ្លួនរបស់គាត់នូវវីដេអូដែលប្រពន្ធរបស់គាត់រាំតាមតន្ត្រីក្នុងអំឡុងពេលជប់លៀងបុណ្យណូអែលជាមួយគ្រួសាររបស់គាត់នៅប្រទេសអាហ្សង់ទីន។

វីដេអូនេះត្រូវបានចែករំលែកដោយមនុស្សជាច្រើន អ្នកគាំទ្រជាច្រើនបានបញ្ចេញមតិថា AntonellaដែលជាភរិយាMessi ថាមានរាងស្អាតជាងតារាបង្ហាញម៉ូតទៅទៀត។ ម្ដាយកូនបីនាក់ត្រូវបានគេសរសើរចំពោះការជ្រើសរើសសម្លៀកបំពាក់និងការហាត់ប្រាណជាប្រចាំរបស់នាងដែលធ្វើអោយនាងមាន សុខភាពល្អ និងសកម្ម។
យោងតាម Harpers Bazaar សម្រាប់គោលបំណងនៃការហ្វឹកហ្វឺនសុខភាព និងកាយសម្បទា Antonella បានដំឡើងកន្លែងហាត់ប្រាណនៅផ្ទះ ហើយកីឡាដែលនាងចូលចិត្តបំផុតគឺការជិះកង់និងការរាំ។ពេលនៅកន្លែងហាត់ប្រាណ Antonella ចូលចិត្តបើកតន្ត្រីខ្លាំងដើម្បីបង្កើនភាពរំភើប និងអារម្មណ៍រីករាយ។ ដោយក្នុង១សប្តាហ៍នាងហាត់ប្រាណចំនួន៥ដង។ នាងមិនប្រកាន់ជ្រុលពេកទេ នាងធ្លាប់បាននិយាយថា ការអនុវត្តរបបអាហារដ៏តឹងរ៉ឹងគឺជាការ “រងទុក្ខ” សម្រាប់នាង ដូច្នេះហើយនាងមិនអាចតស៊ូបានឡើយ។ នាងប្រើអាហារសម្បូរបែបដើម្បីធ្វើឱ្យមានតុល្យភាពសារធាតុចិញ្ចឹម ជួនកាលអនុញ្ញាតឱ្យខ្លួននាង “ញ៉ាំច្រើន” តាមដែលនាងចូលចិត្ត៕

ប្រភព៖vn express

ទិវានារីអន្តរជាតិ ៨មីនា គឺជាទិវាមួយដែលនារីជុំវិញពិភពលោកប្រារព្ធពិធីដើម្បីរំលឹកអប អរសាទរ។ជាឱកាសមួយ ត្រូវអបអរ ដោយ​មាន​ពិធី​បុណ្យ​រំលឹកខួបប្រារព្ធធ្វើដោយនារីជុំវិញ ពិភពលោក។ អង្គការសហប្រជាជាតិ ក៏ប្រារព្ធពិធីអបអរសាទរទិវានេះ និងប្រទេសជាច្រើន បាន​កំណត់​ទិវានេះ ថាជាថ្ងៃបុណ្យជាតិរបស់ខ្លួនផងដែរ។

ត្រឡប់ទៅឆ្នាំ១៩០០ ជា​សម័យកាល​ដែលមាន​ការផ្ទុះ​ឡើង និង​មាន​ភាព​ច្របូក ច្របល់​ច្រើន​នូវ​សកល​ឧស្សាហូបនីយកម្ម និង​ជា​ពេលដែល​មនោគមវិជ្ជា​រ៉ាឌីកាល់​បាន​រីក រាលដាល នាំឱ្យមាន​ការតវ៉ា និង ចលនា​ជាច្រើន​ដើម្បី​ទាមទារ​សិទ្ធិ​ផ្សេងៗ​របស់​ស្ត្រី រួមទាំង​តម្លៃ​ពលកម្ម និង លក្ខន្តិកៈ​ការងារ​ប្រសើរ​ជាង​មុន។

លុះដល់ឆ្នាំ១៩០៩ ទិវាសិទ្ធនារីជាតិលើកទីមួយត្រូវបានបង្កើតឡើងនៅក្នុងសហរដ្ឋអាមេរិកនៅថ្ងៃទី២៨ ខែ​កុម្ភៈ។ គណបក្សសង្គមនិយមរបស់អាមេរិកដែលបានកំណត់នៅថ្ងៃនេះដើម្បីលើកទឹកចិត្ត​ទៅដ​ល់​កម្មករកាត់ដេរដែលបានធ្វើការតវ៉ាប្រឆាំងនឹងលក្ខខណ្ឌការងារ នៅក្នុងទីក្រុង New York។

ក្រោមកទៀតឆ្នាំ១៩១០ សង្គមវិទូអន្តរជាតិ ដែលបានជួបប្រជុំគ្នានៅទីក្រុង Copenhagen បានបង្កើតជា​ទិវា​សិទ្ធ​នារី​មួយ​ដែលមានលក្ខណៈជាអន្តរជាតិដើម្បីជំរុញចលនាសិទ្ធិនារី និងដើម្បីធ្វើការគាំទ្រ លើក​តម្កើន​សំឡេង​របស់ស្ត្រីនៅលើឆាកអន្តរជាតិ។ សំណើនេះ​ត្រូវបានទទួល​បានការសាទរ និងទទួលយកជា​ឯកច្ឆន្ទ​ដោយសន្និសីទមួយដែលមានស្រ្តីជាង១០០នាក់មកពី១៧ប្រទេស។ ក្នុងនោះក៏មាន​វត្តមាន​ស្ត្រីទាំង​៣នាក់ដែលជាសមាជិកសភាហ្វាំងឡង់។

ជាលទ្ធផលនៃការផ្ដួចផ្ដើមគំនិតពីសន្និសីទក្រុង Copenhagen ប្រទេសអូទ្រីស ប្រទេស​ដាណឺ​ម៉ាក ប្រទេសអាល្លឺម៉ង់ និងប្រទេសស្វីសបានយកថ្ងៃទី១៩ ខែមីនាដើម្បីបា្ររព្ធពិធីនេះ។ ប្រជាជន​ច្រើន​​ជាងមួយលាននាក់នៅតាមបណ្ដាប្រទេសទាំងនេះបានទាមទារសិទ្ធអោយស្ត្រីដូចជាសិទ្ធ​ក្នុង​ការ​បោះឆ្នោត សិទ្ធក្នុងការធ្វើការនៅក្នុងការរិយាល័យសាធារណៈ សិទ្ធក្នុងការទទួលបានការបង្ហាត់​ជំ​នាញ​វគ្គខ្លី និងទទូចអោយ​បញ្ចប់​ការរើសអើងស្រ្តីភេទ។

បន្ទាប់មកចន្លោះឆ្នាំ១៩១៣-១៩១៤ ទិវាសិទ្ទនារីអន្តរជាតិបានក្លាយជាកម្លាំងចលករក្នុងការប្រឆាំងនឹងសង្គ្រាមលោក​លើក​ទី១។ ការបរិច្ឆេទថ្ងៃក្នុងការប្រារព្ធទិវាសិទ្ទនារីអន្តរជាតិ គឺមានភាពខុសពីគ្នា។ ប្រទេសរុស្សីប្រារព្ធ​រាង​រាល់ថ្ងៃអាទិត្យចុងក្រោយនៃខែកុម្ភៈ ខណៈពេលដែលប្រទេសខ្លះនៅប៉ែតអឺរ៉ុបយកថ្ងៃទី៨ (ឬមុន ឬក្រោយថ្ងៃ៨បន្តិច) ដើម្បីប្រារព្ធពិធីមួយនេះ។

ឈានដល់មកដល់ឆ្នាំ១៩៩៥ សេចក្ដីថ្លែងការណ៍ក្រុង Bejing និងវិទិការសម្រាប់សកម្មភាព  គឺជាផែនទីបង្ហាញផ្លូវជាប្រវត្តិសាស្រ្ត ដែលបានចុះហត្ថលេខាដោយ១៨៩ប្រទេស ​ផ្តោត​លើបញ្ហាសំខាន់ៗចំនួន១២  និងចង់បង្កើតចក្ខុវិស័យដែលឃើញពិភពលោកមួយដែល​ស្ត្រីនិង​ក្មេង​ស្រីអាចជ្រើសរើសជម្រើសរបស់នាងបានដោយខ្លួនឯង ដូចជាការចូលរួមក្នុងឆាកនយោបាយ ទទួល​បានការអប់រំមួយ ប្រាក់ចំណូលមួយ និងរស់នៅក្នុងសង្គមមួយដែលគ្មានអំពើហឹង្សា និងការ​រើស​អើង៕

ប្រភព៖ Wikipedia