កាហ្វេត្រូវបានគេចាត់ទុកជាភេសជ្ជៈមួយសម្រាប់សុខភាព ប៉ុន្តែប្រសិនបើអ្នកទទួលទានមិនបានត្រឹមត្រូវអាចធ្វើអោយអ្នកខូចសុខភាពបានយ៉ាងងាយ។ ដូច្នេះអ្នកគួរចៀសវាងការធ្វើខុសដូចខាងក្រោម៖

១.ផឹកច្រើនពេក
កាហ្វេមានជាតិកាហ្វេអ៊ីន ដែលជួយបង្កើនកម្រិតថាមពល និងការផ្តោតអារម្មណ៍។ ទោះជាយ៉ាងណាក៏ដោយ ការទទួលទានជាតិកាហ្វេអ៊ីនច្រើនពេកអាចបង្កើនហានិភ័យនៃការគេងមិនលក់ សម្ពាធឈាមខ្ពស់ និងបញ្ហាសរសៃឈាមបេះដូង។
២.ផឹកទឹកមិនគ្រប់គ្រាន់
ដោយសារកាហ្វេមានមុខងារបញ្ចុះទឹកនោម វាអាចធ្វើឱ្យអ្នកខ្សោះជាតិទឹក ប្រសិនបើអ្នកមិនផឹកទឹកគ្រប់គ្រាន់។ ការខ្វះជាតិទឹកត្រូវបានផ្សារភ្ជាប់ទៅនឹងផលប៉ះពាល់អវិជ្ជមានជាច្រើនដល់សុខភាពដូចជា អស់កម្លាំង ឈឺក្បាល និងចុះខ្សោយមុខងារនៃការយល់ដឹង។
៣.ប្រើកាហ្វេដែលមានគុណភាពអន់
មិនមែនកាហ្វេទាំងអស់សុទ្ធតែដូចគ្នាទេ បើអ្នកផឹកកាហ្វេគ្មានគុណភាព វាមិនត្រឹមតែប៉ះពាល់ដល់រសជាតិប៉ុណ្ណោះទេ ថែមទាំងប៉ះពាល់ដល់សុខភាពទៀតផង។ ប្រសិនបើអ្នករកឃើញថាគ្រាប់កាហ្វេមានផ្សិត ផុតកំណត់ ឬមានលក្ខណៈមិនធម្មតា យកល្អគួរតែបោះវាចោល។
៤.ក្រែម whipped ច្រើនពេក
មានមនុស្សជាច្រើនដែលចូលចិត្តបន្ថែមក្រែម whipped ទៅកាហ្វេរបស់ពួកគេដើម្បីបង្កើនរសជាតិ។ ប៉ុន្តែប្រសិនបើអ្នកផឹកកាហ្វេជាមួយក្រែមស្រស់ច្រើនពេក វានឹងធ្វើឱ្យអ្នកឡើងទម្ងន់ នាំឱ្យមានបញ្ហាសុខភាពជាច្រើនទៀត។
៥.បន្ថែមជាតិស្ករច្រើនពេក
ស្ករក៏ជាគ្រឿងផ្សំធម្មតាដែលមនុស្សជាច្រើនដាក់ក្នុង កាហ្វេ។ ការបន្ថែមជាតិស្ករច្រើនពេកនឹងបណ្តាលឱ្យមានការប្រមូលផ្តុំជាតិខ្លាញ់នៅក្នុងខ្លួន ដែលអាចវិវត្តទៅជាជំងឺខ្លាញ់រុំថ្លើម បង្កើនហានិភ័យនៃជំងឺទឹកនោមផ្អែម និងជំងឺបេះដូង។
៦.ផឹកកាហ្វេក្តៅពេក
ការសិក្សាថ្មីមួយដែលត្រូវបានចេញផ្សាយនៅក្នុង PubMed បានរកឃើញថាការផឹកភេសជ្ជៈក្តៅខ្លាំងបង្កើនហានិភ័យនៃការវិវត្តទៅជាជំងឺមហារីកបំពង់អាហារ។ ភេសជ្ជៈក្តៅពេកអាចបង្កើនហានិភ័យនៃការវិវត្តទៅជាជំងឺមហារីកបីដង។
៧.ផឹកកាហ្វេមុនពេលចូលគេង
ការផឹកកាហ្វេមុនពេលចូលគេងអាចធ្វើអោយអ្នកភ្ញាក់ពីដំណេក និងបង្កបញ្ហាក្នុងការគេងមិនលក់។ ការគេងមិនលក់យូរអាចនាំឱ្យមានរោគសញ្ញាដូចជាឈឺក្បាល ថប់អារម្មណ៍ និងអារម្មណ៍ប្រែប្រួល៕ ប្រភព៖ phuntoday.com

ប្រទេសកម្ពុជា ៖ វានៅតែជាប្រធានបទមានការជជែកវែកញែកគ្នាក្នុងការប្រកួតកីឡាស៊ីហ្គេម ប្រចាំឆ្នាំ២០២៣ ខណៈប្រទេសកម្ពុជាធ្វើជាម្ចាស់ផ្ទះបានបង្ហាញថា នឹងរៀបចំការប្រកួត «គុនខ្មែរ» ដែលចាត់ទុកជាកីឡាប្រចាំជាតិ ជំនួសការប្រើឈ្មោះ «Muay Thai» ដែលថៃអះអាងថា មានការទទួលស្គាល់ពីទូទាំងពិភពលោក ។

ការដាក់ឈ្មោះនេះបានធ្វើឱ្យអ្នកគាំទ្រ «Muay Thai» បង្ហាញការមិនពេញចិត្ត រួមទាំងសហព័ន្ធ Muay Thai ស្ម័គ្រចិត្តអន្តរជាតិ (IFMA) ក៏បានចេញមកប្រឆាំងផងដែរ ហើយបានប្រកាសហាមឃាត់គ្រប់ប្រទេស បើប្រទេសណាមួយចូលរួមក្នុងការប្រកួតនេះ នឹងខុសច្បាប់របស់សហព័ន្ធ ។

សម្តេច ហ៊ុន សែន នាយករដ្ឋមន្ត្រីកម្ពុជា បានអំពាវនាវឱ្យប្រទេសទាំងពីរបញ្ចប់ជម្លោះរឿងនេះ ដោយសម្តេចមានប្រសាសន៍ថា វាជាបញ្ហាដែលកីឡានេះមានប្រភពពីវប្បធម៌ខ្មែរ ខណៈប្រទេសថៃក៏អះអាងដែរថា ជារបស់ថៃដូចគ្នា ។

ទោះយ៉ាងណា លោកនាយករដ្ឋមន្ត្រីកម្ពុជាចង្អុលបង្ហាញថា ប្រទេសជិតខាងទាំងពីរមិនគួរមានជម្លោះគ្នាក្នុងរឿងនេះទេ ដោយសម្តេចបានមានប្រសាសន៍ទៅកាន់សារព័ត៌មានថា ៖ «ពួកយើងគួរសាមគ្គីគ្នា បើស៊ីហ្គេមរៀបចំនៅប្រទេសកម្ពុជា ប្រដាល់សេរីត្រូវហៅថា គុនខ្មែរ ហើយបើរៀបចំនៅថៃ ត្រូវហៅថា Muay Thai» ។

ក្រៅពីនេះ លោកនាយករដ្ឋមន្ត្រីកម្ពុជា បានបង្ហាញផែនការនាថ្ងៃអនាគតថា ប្រទេសទាំងពីរគួរងាកមកជជែកគ្នាដើម្បីរួមបញ្ចូលកីឡាទាំងពីរនេះ និងស្នើទៅកាន់អង្គការយូណេស្កូ (Unesco) ទទួលស្គាល់កីឡាប្រដាល់សេរីឱ្យក្លាយជាសម្បត្តិវប្បធម៌អរូបីរួមគ្នា ។ សម្តេចថ្លែងថា ៖ «ខ្ញុំចង់ផ្តល់យោបល់អំពីរឿងនេះ វានឹងក្លាយជាជម្លោះមិនចប់ ។ យើងដឹងថា មានរូបសិល្បៈការពារខ្លួនពិតប្រាកដនៅអង្គរវត្តរបស់យើង តែក្នុងចំណុចនេះ យើងចង់ចរចាជាមួយប្រទេសពាក់ព័ន្ធនានាដើម្បីរកវិធីចុះបញ្ជីរួមគ្នាជាសម្បត្តិបេតិកភណ្ឌពិភពលោក និងចុះឈ្មោះចូលរួមប្រកួតកីឡាអូឡាំពិក» ។

សម្តេចថ្លែងបន្តថា ៖ «ពិតណាស់ រឿងមួយចំនួនយើងមិនអាចយល់ព្រមបានទេ ដូចជា របាំអប្សរា ល្បុកតោ ដែលយើងបានចុះឈ្មោះជាសម្បត្តិបេតិកភណ្ឌពិភពលោករួចហើយ ហើយមិនអាចចុះឈ្មោះរួមគ្នាបានទេ តែសម្រាប់ប្រធានបទក្បាច់គុន យើងត្រូវជៀសវាងជម្លោះ ដូច្នេះ សង្ឃឹមថា កម្ពុជា ថៃ ឡាវ និងមីយ៉ាន់ម៉ា នឹងពិចារណារឿងនេះទាំងអស់គ្នា» ។

សម្តេចបន្ថែមថា ៖ «ទោះយ៉ាងណា បើប្រកួតនៅប្រទេសណាមួយ ត្រូវហៅឈ្មោះតាមប្រទេសនោះ យើងអាចស្វែងរកការសម្របសម្រួល ។ ខ្ញុំគិតថា យើងមិនចាំបាច់ត្រូវតស៊ូដើម្បីធ្វើជាកម្មសិទ្ធិរបស់ប្រទេសតែមួយទេ ។ នេះគ្រាន់តែជាគំនិតរបស់ខ្ញុំដែលចង់សម្រុះសម្រួល ចៀសវាងជម្លោះ» ។

សម្រាប់កម្ពុជាបានត្រៀមខ្លួនធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២ ចាប់ពីថ្ងៃទី៥-១៧ ខែឧសភា ឆ្នាំ២០២៣ និងចាត់ទុកជាលើកដំបូងក្នុងរយៈពេល៦៤ឆ្នាំ ដែលកម្ពុជាបានរៀបចំការប្រកួតជាអន្តរជាតិ ។ ក្នុងការប្រកួតនេះ នឹងមានកីឡាទាំងអស់ចំនួន៣៦ប្រភេទ ហើយដណ្តើមយកមេដាយមាសចំនួន៦០៨ ដែលចាត់ទុកថា ច្រើនបំផុតក្នុងប្រវត្តិសាស្ត្រកីឡាក្នុងតំបន់អាស៊ាន ៕

ប្រភព ៖ sanook

ប្រទេសឥណ្ឌូណេស៊ី ៖ ឥណ្ឌូណេស៊ីបានប្រឈមនឹងភ្លៀងធ្លាក់ខ្លាំង និងមានបាក់ដីជាច្រើនកន្លែង ជាពិសេស នៅតំបន់កោះជុំវិញជិតសមុទ្រចិនខាងត្បូង ដែលបណ្តាលឱ្យមានអ្នកស្លាប់បាត់បង់ជីវិតយ៉ាងតិច១៥នាក់ និង៥០នាក់ទៀតបាត់ខ្លួន ។

នៅពេលឥណ្ឌូណេស៊ីជួបនឹងស្ថានភាពអាកាសធាតុដ៏អាក្រក់នេះ សេវាសម្រាប់ទំនាក់ទំនងត្រូវបានកាត់ផ្តាច់ ហើយផ្លូវជាច្រើនខ្សែខូចខាតយ៉ាងដំណំ ។ លើសពីនេះ ក៏មានដីបាក់ធ្លាក់ជាបន្តបន្ទាប់ ដែលធ្វើឱ្យភ្នាក់ងារសង្គ្រោះពិបាកក្នុងការជួយសង្គ្រោះ និងស្វែងរកជនរងគ្រោះ ហើយវាកាន់តែស្មុគស្មាញផងដែរ ។

ភ្នាក់ងារជាតិផ្នែកកាត់បន្ថយគ្រោះមហន្តរាយរបស់ឥណ្ឌូណេស៊ីបានផ្សព្វផ្សាយកាលពីថ្ងៃទី៦ ខែមីនា កន្លងមកថា អាជ្ញាធរមូលដ្ឋានបានបញ្ជូនភ្នាក់ងារសង្គ្រោះចំនួន៦០នាក់មកជួយសង្គ្រោះជនរងគ្រោះនៅបរិវេណកោះខាងលើ ។ លើសពីនេះ គេបានប្រើប្រាស់ helicopter ដើម្បីបន្ថែមប្រសិទ្ធភាពក្នុងការជួយសង្គ្រោះ ។

គួរបញ្ជាក់ថា ឥណ្ឌូណេស៊ី គឺជាប្រទេសមួយងាយនឹងជួបគ្រោះធម្មជាតិធ្ងន់ធ្ងរជាញឹកញាប់ ជាពិសេស បញ្ហាបាក់ដីក្នុងរដូវភ្លៀង ។ ដូច្នេះ គ្រោះមហន្តរាយទាំងនេះបានបង្ហាញពីផលប៉ះពាល់ដោយសារការកាប់បំផ្លាញព្រៃឈើ ទាក់ទងនឹងសភាពរឹងមាំរបស់ដី និងដីមានជាតិទឹកជាប្រចាំ ។

ក្រៅពីនេះ អ្នកជំនាញផ្នែកបរិស្ថានបញ្ជាក់ថា គ្រោះមហន្តរាយធម្មជាតិរបស់ឥណ្ឌូណេស៊ីកើតឡើងកាន់តែខ្លាំងក្លានេះ គឺដោយសារបម្រែបម្រួលអាកាសធាតុនៅលើពិភពលោកនាពេលបច្ចុប្បន្ន ៕ ប្រភព ៖ The standard

ប្រទេសថៃ ៖ លោក អនុឆា ប៊ូរ៉ាផាឆៃស្រ៊ី អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា វាជារឿងគួរឱ្យរីករាយដែលថៃបានក្លាយជាប្រទេសផលិត Bioplastic (ជាផ្លាស្ទិកផលិតពីធម្មជាតិ ភាគច្រើនផលិតពីរុក្ខជាតិ ហើយវាអាចរលាយបាន និងជួយកាត់បន្ថយការបំពុលបរិស្ថាន) ស្ថិតក្នុងចំណាត់ថ្នាក់ទី២ នៅលើពិភពលោក បន្ទាប់ពីសហរដ្ឋអាមេរិក ។

វត្ថុធាតុដើមសម្រាប់ផលិត Bioplastic របស់ប្រទេសថៃ រួមមាន អំពៅ និងដំឡូងមី ខណៈប្រទេសថៃបានដាំដុះអំពៅ និងដំឡូងមីនៅលើផ្ទៃដីជាច្រើនកន្លែងសម្រាប់ការផលិតផ្លាស្ទិកប្រភេទនេះ ។ ថៃមានសមត្ថភាពផលិត Bioplastic ចំនួន៩៥.០០០តោន/១ឆ្នាំ ហើយថៃមានគម្រោងបង្កើនបរិមាណផលិតបន្ថែមទៀតចំនួន៧៥.០០០តោន/១ឆ្នាំ ។

ការផលិត Bioplastic របស់ថៃ៩០% គឺសម្រាប់ការនាំចេញ រីឯនៅសល់១០%ទៀតសម្រាប់លក់នៅក្នុងប្រទេសថៃ ។ ការផលិត Bioplastic អាចរលាយបាន គឺមិនត្រឹមតែបន្ថែមតម្លៃដល់ទិន្នផលកសិកម្មរបស់កសិករប៉ុណ្ណោះទេ ប៉ុន្តែវាបានគាំទ្រការព្យាយាមកាត់បន្ថយការបំភាយកាបូនឌីអុកស៊ីត និងជាជម្រើសមួយក្នុងការដោះស្រាយបញ្ហាកើតឡើងពីផ្លាស្ទិកប្រើប្រាស់តែម្តងបោះចោលផងដែរ ។

លោកនាយករដ្ឋមន្ត្រីថៃបានប្រកាសឱ្យ Bio-Circular-Green Economy (BCG ជាយុទ្ធសាស្ត្រអភិវឌ្ឍន៍ជាតិ និងការស្តារប្រទេសថៃឡើងវិញក្រោយជំងឺរាតត្បាត) ជារបៀបវារៈជាតិ ដោយការប្រើប្រាស់ធនធានកកើតឡើងវិញសម្រាប់ធ្វើជាវត្ថុធាតុដើម ទាំងការផលិតថាមពល ម្ហូបអាហារ រួមទាំងផលិតផលបន្ថែមតម្លៃផ្សេងទៀត ។ លើសពីនេះ គំរូសេដ្ឋកិច្ច BCG ក៏បានគាំទ្រដល់ក្រុមហ៊ុនផលិតអាចប្រើប្រាស់បច្ចេកទេសផ្សេងៗដើម្បីបន្ថែមតម្លៃផលិតផលរបស់ខ្លួន ដែលមានផលប៉ះពាល់តិចតួចបំផុត ឬគ្មានផលប៉ះពាល់ដល់បរិស្ថាន៕

ប្រភព ៖ bangkokbiznews

ប្រទេសថៃ ៖ លោក Wattanasak Sueaiam មកពីអគ្គនាយកដ្ឋានពាណិជ្ជកម្មផ្ទៃក្នុងបានចុះទៅពិនិត្យមើលទិន្នផលផលិតក្រូចឆ្មា និងកន្លែងដាំដុះរបស់ក្រុមកសិករនៅស្រុកដាំណឺនសាដួក ខេត្តរាជបុរី ព្រោះកន្លែងដាំដុះនេះជាកន្លែងមួយស្ថិតក្នុងចំណោមកន្លែងផលិត ដែលអគ្គនាយកដ្ឋានបានភ្ជាប់បណ្តាញលក់ទៅឱ្យបងប្អូនប្រជាពលរដ្ឋ តាមរយៈរថយន្តចល័តពាណិជ្ជកម្ម ។

តាមការពិនិត្យឃើញថា ដើមក្រូចឆ្មារមួយចំនួនចាប់ផ្តើមចេញផ្លែជាថ្មីក្នុងបរិមាណច្រើន ហើយគេរំពឹងថា នឹងអាចប្រមូលទិន្នផលនាំចេញទៅកាន់ទីផ្សារជាបន្តបន្ទាប់ និងអាចប្រមូលផលតាមធម្មតាវិញនៅខែឧសភា ។ កន្លែងដាំដុះក្រូចឆ្មារនៅខេត្តរាជបុរី ជាកន្លែងមួយក្នុងចំណោមកន្លែងដាំដុះជាច្រើនទៀតដែលអគ្គនាយកដ្ឋានបានភ្ជាប់បណ្តាញលក់ ។

លើសពីនេះ នៅមានកន្លែងដាំដុះក្រូចឆ្មារផ្សេងទៀតក្នុងខេត្តពេជ្របុរី និងខេត្តភីឈិត ដែលអគ្គនាយកដ្ឋានបានភ្ជាប់បណ្តាញលក់ក្នុងតម្លៃថោកតាមរថយន្តចល័តពាណិជ្ជម្មផងដែរ ។ អគ្គនាយកដ្ឋានជឿជាក់ថា នឹងអាចមើលថែកសិករ និងជួយកាត់បន្ថយការចំណាយលើជីវភាពប្រចាំថ្ងៃ ដោយការទិញក្រូចឆ្មារមានតម្លៃថោកក្នុងរដូវក្តៅ ។ ចំណែកតំបន់ណាដែលក្រូចឆ្មារមានតម្លៃខ្ពស់ ឬមានក្រូចឆ្មារមិនគ្រប់គ្រាន់ អគ្គនាយកដ្ឋាននឹងភ្ជាប់បណ្តាញលក់ទៅកាន់ទីផ្សារទូទាំងប្រទេស និងខេត្តនានា ដើម្បីលក់ចែកចាយមកឱ្យពលរដ្ឋយ៉ាងឆាប់រហ័សផងដែរ ។

នៅរដូវរងាកន្លងមក ការដាំដុះក្រូចឆ្មារបានប៉ះពាល់ខ្លាំង ខណៈវាមិនអំណោយផលដល់ការលូតលាស់របស់ក្រូចឆ្មារ ព្រមទាំងមានភ្លៀងធ្លាក់ខ្លាំង និងទឹកជំនន់នៅតាមតំបន់ដាំដុះមួយចំនួន ធ្វើឱ្យទិន្នផលនៅកន្លែងដាំដុះសំខាន់ៗទទួលរងការខូចខាត ហើយមានតម្លៃកើនឡើង ។ ជាក់ស្តែង នៅក្រុងបាងកក តម្លៃក្រូចឆ្មារទំហំពីលេខ១ ទៅ២ ជាមធ្យមតម្លៃពី៥បាត ទៅ៧បាត ហើយតម្លៃបានកើនឡើងជាបន្តបន្ទាប់ ។

ទោះយ៉ាងណា ដើម្បីការពារអ្នកទិញក្រូចឆ្មារកុំឱ្យគេយកប្រៀប អគ្គនាយកដ្ឋានបានបញ្ជាក់ទៅកាន់អាជីវករទាំងឡាយថា ត្រូវបិទស្លាកប្រាប់ពីតម្លៃក្រូចឆ្មារឱ្យបានច្បាស់លាស់ បើខាងមន្ត្រីពិនិត្យឃើញពួកគេមិនដាក់ស្លាកប្រាប់តម្លៃទេ មន្ត្រីនឹងដំណើរការតាមផ្លូវច្បាប់យ៉ាងហ្មត់ចត់ ។

គួរបញ្ជាក់ថា បើអាជីវករណាម្នាក់មិនលើកស្លាកប្រាប់ពីតម្លៃផលិតផលទេ ពួកគេនឹងត្រូវបានពិន័យជាប្រាក់មិនលើសពី១ម៉ឺនបាត ឬបើពួកគេលក់ផលិតផលរបស់ខ្លួនយកចំណេញខ្លាំងពេក នឹងត្រូវជាប់គុកមិនលើសពី៧ឆ្នាំ និងពិន័យជាប្រាក់មិនលើសពី១,៤សែនបាត ឬទាំងជាប់គុក ទាំងពិន័យ ។ លើសពីនេះ បើពលរដ្ឋណាបានប្រទះឃើញការលក់ផលិតផល ឬសេវាកម្មណាមួយបោកប្រាស់អ្នកទិញនោះ ពួកគេអាចទូរស័ព្ទមកប្តឹងមន្ត្រីពាក់ព័ន្ធផងដែរ តាមរយៈលេខ ១៥៦៩ ៕

ប្រភព ៖ kasetnewstv

រដ្ឋធានីវ៉ាស៊ីនតោន៖ ប្រធានសភាមុនរបស់សហរដ្ឋអាមេរិក មកពីគណបក្សប្រជាធិបតេយ្យ ធ្លាប់អុជបញ្ឆេះកំហឹងចិន ឲ្យច្រឡោតតោតតូងម្ដងរួចមកហើយ ខណៈលោកស្រី បានទៅបំពេញទស្សនកិច្ច នៅតៃវ៉ាន់ ចន្លោះពីថ្ងៃទី២-៣ ខែសីហា ឆ្នាំ២០២២ ហើយឥឡូវនេះ ប្រធានសភាថ្មី មកពីគណបក្សសាធារណរដ្ឋ ទំនងជាមានគម្រោង បញ្ឆេះកំហឹងដល់ក្រុងប៉េកាំង សាជាថ្មីទៀត។

សារព័ត៌មាន Channel News Asia បានចេញផ្សាយ កាលពីថ្ងៃអង្គារ ទី៧ ខែមីនា ឆ្នាំ២០២៣ ថា ប្រភពព័ត៌មាន ចំនួន២ បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters កាលពីថ្ងៃចន្ទ ថា លោក ខេវិន ម៉ាកកាធី (Kevin McCarthy) ប្រធានសភាសហរដ្ឋអាមេរិក មានគម្រោង ជួបជាមួយនឹងប្រធានាធិបតីតៃវ៉ាន់ លោកស្រី សៃ អ៊ីងវ៉ិន (Tsai Ing-wen) នៅក្នុងរយៈពេលប៉ុន្មានសប្ដាហ៍ខាងមុខនេះ។ សកម្មភាពបែបនេះ អាចនឹងជំនួសនូវការធ្វើដំណើរបំពេញទស្សនកិច្ចរបស់ប្រធានសភាសហរដ្ឋអាមេរិក មកពីគណបក្សសាធារណរដ្ឋ។ ប៉ុន្ដែវាជាដំណើរបំពេញទស្សនកិច្ចដ៏រសើបមួយ ទៅកាន់ដែនកោះ គ្រប់គ្រងដោយខ្លួនឯង តាមបែបលទ្ធិប្រជាធិបតេយ្យ ខណៈក្រុងប៉េកាំង តែងតែអះអាង ថា តៃវ៉ាន់ ជាដែនអធិបតេយ្យភាពរបស់ចិន។

បើតាមប្រភពព័ត៌មាននានា សុំលក្ខខណ្ឌ មិនបង្ហាញអត្ដសញ្ញាណ បានបញ្ជាក់ ថា លោកស្រីប្រធានាធិបតីតៃវ៉ាន់ ត្រូវបានគេអញ្ជើញឱ្យថ្លែងសុន្ទរកថា នៅឯបណ្ណាល័យប្រធានាធិបតី Ronald Reagan (រ៉ូណាល់ដ៍ រីហ្គេន) នាអំឡុងពេលធ្វើដំណើរឆ្លងកាត់រដ្ឋកាលីហ្វ័រញ៉ា ដែលបានគ្រោងទុក មកកាន់អាមេរិកកណ្តាល ហើយថា លោកប្រធានសភា McCarthy ទំនងជានឹងជួបលោកស្រី នៅលើទឹកដីរបស់សហរដ្ឋអាមេរិក។

បើទោះជាយ៉ាងណា ការិយាល័យរបស់ប្រធានសភា សហរដ្ឋអាមេរិក លោក McCarthy មិនបានឆ្លើយតបភ្លាមៗ ចំពោះសំណួររបស់ Reuters ជុំវិញបញ្ហានេះ ដោយរាប់បញ្ចូលទាំងការសាកសួរ ថាតើជំនួបដែលបានគ្រោងទុកនោះ គឺជាកិច្ចខិតខំប្រឹងប្រែង ដើម្បីចៀសវាងនូវការបង្កើនភាពតានតឹង ជាមួយប្រទេសចិន ដូចអ្វីដែលក្រុងប៉េកាំង បានខឹងសម្បា ចំពោះដំណើរទស្សនកិច្ចរបស់ប្រធានសភាមុនរបស់សហរដ្ឋអាមេរិក មកពីគណបក្សប្រជាធិបតេយ្យ លោកស្រី ណានស៊ី ផេឡូស៊ី (Nancy Pelosi) បានធ្វើដំណើរទៅបំពេញទស្សនកិច្ច នៅលើទឹកដីកោះតៃវ៉ាន់ ចន្លោះពីថ្ងៃទី២-៣ ខែសីហា ឆ្នាំ២០២២។

សារព័ត៌មាន The Financial Times បានរាយការណ៍ ពីដំបូង អំពីគម្រោងជួបគ្នា នៅក្នុងរដ្ឋកាលីហ្វ័រញ៉ា សហរដ្ឋអាមេរិក។ ប៉ុន្ដែនៅក្នុងអំឡុងផ្ដល់បទសម្ភាសន៍ជាមួយនឹងបណ្ដាញទូរទស្សន៍ CNBC កាលពីព្រឹក ថ្ងៃចន្ទ លោក McCarthy ប្រធានរដ្ឋសភា បានបដិសេធឆ្លើយ ថាតើគាត់នឹងទៅបំពេញទស្សនកិច្ច នៅតៃវ៉ាន់ ឬយ៉ាងណា។ ប៉ុន្ដែលោកប្រធានសភា គ្រាន់តែបញ្ជាក់ ថា គាត់នឹងប្រកាស អំពីគម្រោងធ្វើដំណើរណាមួយ ខណៈគាត់មានផែនការធ្វើដំណើរ។

ដូចជាបណ្ដាប្រទេសដទៃទៀតអ៊ីចឹងដែរ សហរដ្ឋអាមេរិក មិនមានទំនាក់ទំនងការទូត ជាផ្លូវការជាមួយតៃវ៉ាន់ នោះឡើយ។ ប៉ុន្តែដែនកោះតៃវ៉ាន់ ត្រូវចងភ្ជាប់ ដោយច្បាប់របស់សហរដ្ឋអាមេរិក ដើម្បីផ្តល់មធ្យោបាយការពារ ដល់ដែនកោះគ្រប់គ្រង ដោយខ្លួនឯង។

ក្រុងវ៉ាស៊ីនតោន បានជាប់គាំង អស់រយៈពេលជាយូរមកហើយ ចំពោះគោលនយោបាយ «មិនច្បាស់លាស់ជាយុទ្ធសាស្ត្រ»។ នេះមានន័យថា សហរដ្ឋអាមេរិក មិនច្បាស់ ថាតើក្រុងវ៉ាស៊ីនតោន នឹងឆ្លើយតបផ្នែកយោធា ចំពោះការវាយប្រហារ ទៅលើកោះតៃវ៉ាន់ ឬយ៉ាងណានោះ។ បើទោះជាយ៉ាងណាក៏ដោយ ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ធ្លាប់បញ្ជាក់ កាលពីខែកញ្ញា ឆ្នាំ២០២២ ថា កងទ័ពរបស់សហរដ្ឋអាមេរិក នឹងការពារកោះតៃវ៉ាន់ នៅក្នុងព្រឹត្តិការណ៍ឈ្លានពាន ពីកងទ័ពរំដោះប្រជាជនចិន។ នេះជាសេចក្តីថ្លែងការណ៍យ៉ាងច្បាស់លាស់បំផុត កើតចេញពី ប្រធានាធិបតីសហរដ្ឋអាមេរិក ចំពោះបញ្ហាតៃវ៉ាន់៕

សហរដ្ឋអាមេរិក៖ តាមរបាយការណ៍ពាក់កណ្តាលខែកុម្ភៈពី Federal Reserve Bank of New York បានរកឃើញថា ៨ នាក់ក្នុងចំណោម ១០នាក់ នៃនិស្សិតមហាវិទ្យាល័យដែលមានប្រាក់ខែខ្ពស់បន្ទាប់ពីបញ្ចប់ការសិក្សាផ្នែកវិស្វកម្ម។ យោងតាមសារព័ត៌មាន US News បានអោយដឹងថាតម្លៃនៃការសិក្សាសម្រាប់មុខវិជ្ជាដែលមានប្រាក់ខែខ្ពស់នៅសាកលវិទ្យាល័យកំពូលៗរបស់សហរដ្ឋអាមេរិកមានចាប់ពី ៣៦,០០០ដុល្លារដល់ ៦៨,០០០ ដុល្លារក្នុងមួយឆ្នាំ ។ លើសពីនេះទៀតនៅឆ្នាំ ២០៣១ ការងារដែលទាក់ទងនឹង STEM (វិទ្យាសាស្រ្ត បច្ចេកវិទ្យា វិស្វកម្ម គណិតវិទ្យា) ត្រូវបានគេរំពឹងថានឹងកើនឡើងពីរដងលឿនជាងការងារផ្សេងទៀត។ ដូចនេះហើយជំនាញកំពូលដែលឈានមុខគេក្នុងវិស័យឧស្សាហកម្មទាំង ១០គឺ៖

១.វិស្វកម្មគីមី ដែលទទួលបានប្រាក់ខែជាមធ្យម ៧៥,០០០ដុល្លារក្នុងមួយឆ្នាំ។
២. វិស្វករកុំព្យូទ័រ ដែលទទួលបានប្រាក់ខែជាមធ្យម ៧៤,០០០ ដុល្លារក្នុងមួយឆ្នាំ។
៣.វិទ្យាសាស្ត្រកុំព្យូទ័រ ដែលទទួលបានប្រាក់ខែជាមធ្យម ៧៣,០០០ ដុល្លារក្នុងមួយឆ្នាំ។
៤. វិស្វកម្មអវកាស ដែលទទួលបានប្រាក់ខែជាមធ្យម ៧២,០០០ ដុល្លារក្នុងមួយឆ្នាំ។
៥.ឧស្សាហកម្ម ដែលទទួលបានប្រាក់ខែជាមធ្យម ៧០,០០០ដុល្លារ ក្នុងមួយឆ្នាំ។
៦,វិស្វកម្មអគ្គិសនី ដែលទទួលបានប្រាក់ខែជាមធ្យម ៦៩,០០០ដុល្លារ ក្នុងមួយឆ្នាំ។
៧. វិស្វកម្មឧស្សាហកម្ម ដែលទទួលបានប្រាក់ខែជាមធ្យម ៦៨,០០០ដុល្លារ ក្នុងមួយឆ្នាំ។
៨. និងវិស្វកម្មម៉ាស៊ីន ដែលទទួលបានប្រាក់ខែជាមធ្យម ៦៧,០០០ដុល្លារ ក្នុងមួយឆ្នាំ។
៩.ការវិភាគអាជីវកម្ម ដែលទទួលបានប្រាក់ខែជាមធ្យម ៦៦,០០០ដុល្លារ ក្នុងមួយឆ្នាំ។
១០.វិស្វកម្មសំណង់ស៊ីវិល ដែលទទួលបានប្រាក់ខែជាមធ្យម ៦៥,០០០ ដុល្លារអាមេរិក ក្នុងមួយឆ្នាំ៕
ប្រភព៖ Vn express