ប្រទេសជប៉ុន ៖ ក្រសួងសុខាភិបាលប្រទេសជប៉ុនបានសម្រេចចិត្តចាប់ផ្តើមគម្រោងចាក់វ៉ាក់សាំងការពារជំងឺកូវីដ-១៩ នៅថ្ងៃទី៨ ខែឧសភា ឆ្នាំ២០២៣ ដោយផ្តោតទៅលើក្រុមមនុស្សចាស់ ក្រោយពីជប៉ុនទើបបានពង្រីកគម្រោងចាក់វ៉ាក់សាំងដល់ពលរដ្ឋរបស់ខ្លួនដោយមិនចាំបាច់ចំណាយប្រាក់ រហូតដល់ខែមីនា ឆ្នាំ២០២៤ ។

ក្រុមមន្ត្រីជំនាញមកពីក្រសួងសុខាភិបាលជប៉ុនបានប្រជុំពិភាក្សាគ្នារឿងពេលវេលា និងព័ត៌មានលម្អិតអំពីការចាក់វ៉ាក់សាំងនេះ ។ ក្នុងនោះវ៉ាក់សាំងដែលមានប្រសិទ្ធភាពអាចការពារជំងឺកូវីដបំលែងពីពូជអូមីក្រុង គេនឹងយកមកចាក់ឱ្យពលរដ្ឋនៅថ្ងៃទី៨ ខែឧសភា ឆ្នាំ២០២៣ ហើយក្រុមគោលដៅដំបូង គឺមនុស្សចាស់, អ្នកមានបញ្ហាសុខភាព ឬមានជំងឺប្រចាំកាយ និងមនុស្សចាស់កំពុងរស់នៅកន្លែងថែទាំមនុស្សចាស់ជរា ។ បន្ទាប់មក នឹងមានការវាយតម្លៃពីការបំលែងពូជមេរោគ និងកត្តាផ្សេងៗ ដើម្បីកំណត់ ឬជ្រើសរើសប្រភេទវ៉ាក់សាំងដែលត្រូវយកមកចាក់ឱ្យពលរដ្ឋនៅខែកញ្ញា ឆ្នាំ២០២៣ ។

សម្រាប់ពលរដ្ឋមានជំងឺធ្ងន់ធ្ងរ ពួកគេនឹងទទួលបានការចាក់វ៉ាក់សាំងចំនួន២ដង/១ឆ្នាំ ក្នុងនោះការចាក់ម្ជុលទី១ នឹងធ្វើឡើងនៅខែឧសភា ហើយម្ជុលទី២ នឹងធ្វើឡើងនៅខែកញ្ញា ខណៈក្រុមពលរដ្ឋផ្សេងទៀតអាចទៅចាក់វ៉ាក់សាំងបានចាប់ពីខែកញ្ញា តទៅ ។

ជាមួយគ្នានេះ ក្រុមមន្ត្រីជំនាញក្រសួងសុខាភិបាលនឹងចាប់ផ្តើមចាក់វ៉ាក់សាំងដុសជំរុញ ដើម្បីការពារជំងឺកូវីដបំលែងពីអូមីក្រុងទៅលើក្រុមកុមារអាយុចន្លោះពី៥ឆ្នាំ ទៅ១១ឆ្នាំ នៅថ្ងៃទី៨ ខែមីនា ប៉ុន្តែពួកគេត្រូវតែទទួលបានការចាក់វ៉ាក់សាំងលើកចុងក្រោយ យ៉ាងតិចរយៈពេល៣ខែ ៕ ប្រភព ៖ TNN World

បរទេស៖ បច្ចុប្បន្នសំណង់អគារកំពុងរីកចម្រើនខ្លាំងឡើងៗនឹងកំពុងសាងសង់ជាបន្តបន្ទាប់ ហើយអាគារដែលខ្ពស់ស្កឹមស្កៃ បានរីកដុះដាលកាន់តែច្រើនឡើងៗ ជាពិសេសនៅពាសពេញតំបន់អារ៉ាប់ និងអាស៊ី ។ ខាងក្រោមនេះ គឺជាអគារខ្ពស់ៗជាងគេទាំង១០ នៅលើពិភពលោក ៖
១.អគារ បឺច កាលីហ្វា (Burj Khalifa)។ អគារនេះ ត្រូវបានសាងសង់រួច នៅឆ្នាំ២០១០ ដែលមានកម្ពស់ «៨២៨ម៉ែត្រ» និង១៦៣ជាន់ (១ជាន់ក្រោមដី) ហើយស្ថិតនៅទីក្រុងឌូបៃ នៃប្រទេសអេមីរ៉ាត់អារ៉ាប់រួម។

២.អគារ មើដេកា ១១៨ (Merdeka 118)។ អគារនេះ ត្រូវគេរំពឹងថានឹងសាងសង់រួច នៅមុនដំណាច់ឆ្នាំ២០២២ នេះដែលមានកម្ពស់ «៦៧៨.៩ម៉ែត្រ» និង១១៨ជាន់ (៥ជាន់ក្រោមដី) ហើយស្ថិតនៅទីក្រុងគូឡាឡាំពួ នៃប្រទេសម៉ាឡេស៊ី។

៣.អគារ សៀងហៃថូវើ (Shanghai Tower)។ អគារនេះ ត្រូវបានសាងសង់រួច នៅឆ្នាំ២០១៥ ដែលមានកម្ពស់ «៦៣២ម៉ែត្រ» និង១២៨ជាន់ (៥ជាន់ក្រោមដី) ហើយស្ថិតនៅទីក្រុងសៀងហៃ នៃប្រទេសចិន។

៤.អគារ អាប្រាច់ អាល់បាអ៊ីត ខ្លក់ថូវើ (Abraj Al-Bait Clock Tower)។ អគារនេះត្រូវបានសងសង់រួច នៅឆ្នាំ២០១២ ដែលមានកម្ពស់ «៦០១ម៉ែត្រ» និង១២០ជាន់ (៣ជាន់ក្រោមដី) ហើយស្ថិតនៅទីក្រុងមិចកា នៃប្រទេសអារ៉ាប៊ីសាអូឌីត។

៥.អគារ ភីងអាន អ៊ីនធើណាសិនណាល់ ហ្វាយណាន់ សេនធើ (Ping An International Finance Center)។ អគារនេះត្រូវបានសាងសង់រួច នៅឆ្នាំ២០១៧ ដែលមានកម្ពស់ «៥៩៩.១ម៉ែត្រ» និង១១៥ជាន់ (៥ជាន់ក្រោមដី) ហើយស្ថិតនៅទីក្រុងសិនចិន នៃប្រទេសចិន។

៦.អគារ ឡូតតេ វើលថាវវើ (Lotte World Tower)។ អគារនេះ ត្រូវបានសាងសង់រួច នៅឆ្នាំ២០១៧ ដែលមានកម្ពស់ «៥៥៤.៥ម៉ែត្រ» និង១២៣ជាន់ (៦ជាន់ក្រោមដី) ហើយស្ថិតនៅទីក្រុងសេអ៊ូល នៃកូរ៉េខាងត្បូង។

៧. អគារ វាន់ វើល ត្រេដ សេនធើ (One World Trade Center)។ អគារនេះ ត្រូវបានសាងសង់រួច នៅឆ្នាំ២០១៤ ដែលមានកម្ពស់ «៥៤១.១ម៉ែត្រ» និង៩៤ជាន់ (៥ជាន់ក្រោមដី) ហើយស្ថិតនៅនៅទីក្រុងញូយ៉ក នៃសហរដ្ឋអាមេរិក។

៨.អគារ ក្វាងចូវ ហ្វាយណាន់ សេនធើ (Guangzhou CTF Finance Center)។ អគារនេះត្រូវបានសាងសង់រួច នៅឆ្នាំ២០១៦ ដែលមានកម្ពស់ «៥៣០ម៉ែត្រ» និង១១១ជាន់ (៥ជាន់ក្រោមដី) ហើយស្ថិតនៅទីក្រុងក្វាងចូវ នៃប្រទេសចិន។

៩.អគារ ធានជីន ហ្វាយណាន់ សេនធើ (Tianjin CTF Finance Center)។ អគារនេះ ត្រូវបានសាងសង់រួច នៅឆ្នាំ២០១៩ ដែលមានកម្ពស់ «៥៣០ម៉ែត្រ» និង៩៧ជាន់ (៤ជាន់ក្រោមដី) ហើយស្ថិតនៅទីក្រុងធានជីន នៃប្រទេសចិន។

១០.អគារ ស៊ីធីក ថាយវើ ឬ ឆាយណា ហ៊្សុន (CITIC Tower/China Zun)។ អគារនេះ ត្រូវបានសាងសង់រួច នៅឆ្នាំ២០១៨ ដែលមានកម្ពស់ «៥២៧.៧ម៉ែត្រ» និង១០៩ជាន់ (៨ជាន់ក្រោមដី) ហើយស្ថិតនៅទីក្រុងប៉េកាំង នៃប្រទេសចិន។ ប្រភព៖magicbricks

ប្រទេសអូស្ត្រាលី ៖ មន្ត្រីអូស្ត្រាលីបានដាស់តឿនពីភ្លើងឆេះព្រៃនៅភាគខាងកើតប្រទេស ក្រោយពីប្រទេសនេះមានភ្លៀងធ្លាក់ខ្លាំង និងជួបគ្រោះទឹកជំនន់ម្តងហើយម្តងទៀតក្នុងរយៈពេល២ឆ្នាំកន្លងមក ។ លើសពីនេះ ប្រទេសអូស្ត្រាលីមានអាកាសធាតុក្តៅខ្លាំងបណ្តាលឱ្យសីតុណ្ហភាពនៅក្នុងតំបន់ជាច្រើន រួមទាំងទីក្រុងស៊ីដនីផងដែរបានកើនឡើងខ្ពស់ ។

New South Wales ជារដ្ឋដែលមានពលរដ្ឋរស់នៅច្រើនបំផុតនៅអូស្ត្រាលីបានជូនដំណឹងថា បច្ចុប្បន្ននេះ គេបានប្រទះឃើញមានភ្លើងឆេះព្រៃនៅទូទាំងរដ្ឋចំនួន៣៣កន្លែង ក្នុងនោះ១២កន្លែងមិនទាន់អាចគ្រប់គ្រងស្ថានការណ៍បានទេ ។ រីឯសាលារៀនរដ្ឋចំនួន៥កន្លែងត្រូវបានបិទទ្វារជាបណ្តោះអាសន្ន ដោយគេហាមដុតអ្វីផ្សេងៗនៅក្នុងបរិវេណសាលា ដើម្បីទប់ស្កាត់កុំឱ្យភ្លើងឆេះរាលដាលទៅកាន់ទីកន្លែងផ្សេងទៀត ។

ទោះយ៉ាងណា កាលពីពេលថ្មីៗនេះ អាជ្ញាធរអូស្ត្រាលីមិនបានដាស់តឿនបន្ថែមទៀតទេសម្រាប់ភ្លើងឆេះព្រៃ២កន្លែង ប៉ុន្តែក្រោយមក អាជ្ញាធរចេញមកប្រកាសថា មានភ្លើងឆេះព្រៃនៅចំណុចទាំងពីរនេះម្តងទៀត ។

មន្ត្រីឧតុនិយមអូស្ត្រាលីបានព្យាករណ៍អាកាសធាតុថា សីតុណ្ហភាពនឹងកើនឡើងរហូតដល់៣០អង្សារសេ ប៉ុន្តែអាកាសធាតុបានល្អប្រសើរឡើងចាប់ពីថ្ងៃទី៧ ខែមីនា តទៅ ។ មន្ត្រីឧតុនិយមបញ្ជាក់ថា ប្រទេសអូស្ត្រាលីមានអាកាសធាតុក្តៅ និងហួតហែង ព្រមទាំងគ្របដណ្តប់ដោយខ្យល់បក់ខ្លាំង គឺជាមូលហេតុបណ្តាលឱ្យកើតភ្លើងឆេះព្រៃ ។

ទោះយ៉ាងណា តំបន់ជាច្រើនស្ថិតនៅភាគខាងកើតអូស្ត្រាលី រួមទាំងទីក្រុងស៊ីដនីផងដែរ បានប្រឈមមុខនឹងអាកាសធាតុក្តៅបំផុតក្នុងរយៈពេល២ឆ្នាំកន្លងមក ដោយមានសីតុណ្ហភាពខ្ពស់រហូតដល់ជាង៤០អង្សារសេ ។ លើសពីនេះ នៅជាយក្រុងស៊ីដនីបានប្រឈមមុខនឹងអាកាសធាតុក្តៅខ្លាំងជាប្រវត្តិសាស្ត្រ គឺស្មើ៤០,១អង្សារសេ ដែលគេចាត់ទុកថា ជាអាកាសធាតុក្តៅបំផុត ខណៈទីក្រុងផ្សេងៗរបស់អូស្ត្រាលីក៏មានអាកាសធាតុក្តៅខ្លាំងដែរ និងមានសីតុណ្ហភាពជិតស្មើ៤១អង្សារសេ ៕

ប្រភព ៖ TNN World

អគ្គលេខាធិការនៃអង្គការសហប្រជាជាតិ (UN) លោក Antonio Guterres បានដាស់តឿនថា គោលដៅរបស់ពិភពលោកពាក់ព័ន្ធនឹងសមភាពយេនឌ័រ គឺកាន់តែឆ្ងាយទៅទៀត ហើយអាចត្រូវការពេលវេលារហូតដល់៣០០ឆ្នាំឯណោះ ទើបបុរស និងស្ត្រីមានសមភាពយេនឌ័រ ខណៈបច្ចុប្បន្ននេះ សិទ្ធិស្ត្រីនៅជុំវិញពិភពលោកបានបាត់បង់បន្តិចម្តងៗ ។

លោក Antonio Guterres បានថ្លែងក្នុងកិច្ចប្រជុំសន្និបាតទូទៅពាក់ព័ន្ធនឹងទិវាសិទ្ធិនារី ៨ មីនា ថា ៖ «គោលដៅឱ្យមានភាពស្មើគ្នាខាងផ្លូវភេទបានបាត់បង់ជាបន្តបន្ទាប់ ដោយអង្គការស្ត្រីនៃអង្គការសហប្រជាជាតិ (UN Women) បានវាយតម្លៃពីស្ថានភាពបច្ចុប្បន្នថា គេអាចត្រូវការរយៈពេល៣០០ឆ្នាំទៀតទើបបុរស និងស្ត្រីមានសមភាពយេនឌ័រ» ។

លោកបន្តថា ៖ «សិទ្ធិរបស់ស្ត្រីកំពុងត្រូវបានគេបៀតបៀន គំរាមកំហែង និងរំលោភបំពាននៅលើពិភពលោក» ។ លោក Antonio Guterres បានលើកពីហេតុការណ៍ផ្សេងៗដែលស្ត្រីត្រូវប្រឈមដូចជា ការស្លាប់របស់ស្ត្រីក្នុងអំឡុងពេលមានផ្ទៃពោះ ឬក្រោយការសម្រាលកូន (Maternal Mortality) ។ លើសពីនេះ មានក្មេងស្រីជាច្រើននាក់បានបោះបង់ការសិក្សា និងត្រូវគេបង្ខំឱ្យរៀបការទាំងវ័យក្មេង ។

ក្រៅពីនេះ លោក Antonio Guterres បានផ្តោតទៅលើស្ថានភាពដ៏សោកសៅរបស់ស្ត្រីនៅប្រទេសអាហ្វហ្គានីស្ថាន ខណៈបច្ចុប្បន្ននេះ រដ្ឋាភិបាលក្រុមតាលីបង់បានគ្រប់គ្រងប្រទេសអាហ្វហ្គានីស្ថាន ។ ពួកគេបានបំបាត់សិទ្ធិជាខ្លាំងក្នុងការរស់នៅរបស់ស្ត្រី និងក្មេងៗ ហើយមានសេចក្តីរាយការណ៍ថា ពួកគេមិនឱ្យស្ត្រីមានឱកាសបានសិក្សារៀនសូត្រទេ ខណៈប្រទេសជាច្រើនទៀតនៅលើពិភពលោក ស្ត្រីត្រូវប្រឈមនឹងការដកហូតសិទ្ធិផ្លូវភេទរបស់ពួកគេ និងសិទ្ធិបន្តពូជ ។ លើសពីនេះ នៅប្រទេសមួយចំនួនទៀត ក្មេងស្រីត្រូវបានគេចាប់ខ្លួន ឬរំលោភ ខណៈពេលពួកគេធ្វើដំណើរទៅសាលារៀន ។

នៅក្នុងកិច្ចប្រជុំ លោក Antonio Guterres បានអំពាវនាវទៅកាន់រដ្ឋាភិបាល សង្គមស៊ីវិល និងផ្នែកឯកជននៅទូទាំងពិភពលោកថា គួររួមសហការគ្នាបង្កើតប្រព័ន្ធអប់រំស្មើភាពរវាងបុរស និងស្ត្រី ព្រមទាំងអភិវឌ្ឍន៍ជំនាញសម្រាប់ពួកគេ ក៏ដូចជាបង្កើនកម្រិតការវិនិយោគដើម្បីកាត់បន្ថយការបែងចែកសមភាពយេនឌ័រ ។ លោកលើកឡើងថា អង្គការសហប្រជាជាតិនឹងគាំទ្រស្ត្រី និងក្មេងស្រីទាំងអស់នៅទូទាំងពិភពលោក ៕ ប្រភព ៖ The standard

ប្រទេសចិន ៖ កាលពីថ្ងៃទី៦ ខែមីនា កន្លងមក ប្រធានាធិបតីចិន លោក ស៊ី ជិនពីង បានចូលរួមក្នុងកិច្ចប្រជុំក្រុមប្រឹក្សានយោបាយចិន (CPPCC) នៅទីក្រុងប៉េកាំង ក្នុងនោះលោកបានពិភាក្សាក្នុងក្រុមប្រឹក្សានយោបាយសមាគមសំណង់ជាតិ សហព័ន្ធឧស្សាហកម្ម និងពាណិជ្ជកម្ម ដោយផ្តោតទៅលើការព្យាយាមអភិវឌ្ឍន៍ផ្នែកឯកជនរបស់ចិនឱ្យមានគុណភាពខ្ពស់ ។

លោក ជិនពីង ថ្លែងថា គណៈកម្មាធិការមជ្ឈិមបក្សកុម្មុយនិស្តចិនបានប្រកាន់ភ្ជាប់នូវគោលការណ៍ និងគោលនយោបាយដើម្បីបង្កើតបរិយាកាសមានស្ថេរភាព និងបើកឱកាសបន្ថែមដល់ផ្នែកឯកជន ។ លើសពីនេះ ក៏បានបន្តគាំទ្រ អភិវឌ្ឍន៍ និងធ្វើឱ្យផ្នែកឯកជនមានភាពរឹងមាំជានិច្ច ដោយអនុញ្ញាតឱ្យពួកគេអាចប្រកួតប្រជែងដោយស្មើភាពនៅក្នុងទីផ្សារ ការពារសិទ្ធិស្របច្បាប់លើទ្រព្យសម្បត្តិ និងផលប្រយោជន៍របស់អាជីវកម្ម ។

លោក ជិនពីង បានអំពាវនាវឱ្យផ្នែកឯកជនដើរតួនាទីកាន់តែខ្លាំងក្នុងការពង្រឹង និងពឹងពាក់លើខ្លួនឯងផ្នែកវិទ្យាសាស្ត្រ និងបច្ចេកវិទ្យា ព្រមទាំងជំរុញការអភិវឌ្ឍផ្នែកទាំងពីរនេះដើម្បីប្រើប្រាស់ក្នុងឧស្សាហកម្មផងដែរ ។ លើសពីនេះ លោក ជិនពីង សង្ឃឹមថា ផ្នែកឯកជននឹងមានដើមទុនកាន់តែច្រើននៅក្នុងគម្រោងវិស្វកម្មខ្នាតធំរបស់ជាតិ ក៏ដូចជាគម្រោងសំខាន់ៗផ្នែកឧស្សាហកម្ម និងការផ្គត់ផ្គង់ ហើយលោកបានសំណូមពរទៅកាន់ផ្នែកឯកជនឱ្យមានចំណែករួមកាន់តែច្រើនឡើងក្នុងការអភិវឌ្ឍប្រទេស និងជំរុញការអភិវឌ្ឍប្រកបដោយគុណភាពខ្ពស់ ។

មេដឹកនាំចិនចង្អុលបង្ហាញថា ផ្លូវទៅកាន់ភាពទំនើបទាន់សម័យរបស់ចិន គឺការស្វែងរកកិច្ចសហការរួមគ្នារវាងផ្នែកឯកជន និងរដ្ឋ ព្រមទាំងមានភាពទទួលខុសត្រូវទាំងអស់គ្នាក្នុងសង្គម ។ មេដឹកនាំចិនបានណែនាំទៅកាន់ផ្នែកឯកជនថា គួរតែមានទំនាក់ទំនងល្អជាមួយកម្មករ និងជំរុញការបង្កើតសហគមន៍សម្រាប់ជាប្រយោជន៍ដល់បុគ្គលិកទាំងអស់ ៕ ប្រភព ៖ TNN World