អាមេរិក៖ នៅពេលដែលលោក Shipp-McGhee ចាប់ផ្តើមស្វែងរកផ្ទះ អត្រាការប្រាក់កម្ចីទិញផ្ទះដំបូងមានត្រឹមតែ ២.៩% ប៉ុណ្ណោះ ប៉ុន្តែមួយឆ្នាំក្រោយមក នៅពេលដែលលោកជ្រើសរើសផ្ទះនោះអត្រាការប្រាក់បានកើនឡើង ៦.៤%។
ក្នុងប៉ុន្មានឆ្នាំថ្មីៗនេះ បញ្ហាប្រឈមសម្រាប់អ្នកទិញផ្ទះលើកដំបូងនៅអាមេរិកបានកើនឡើង ហើយឥឡូវនេះ អត្រាការប្រាក់កម្ចីបានកើនឡើងយ៉ាងខ្លាំង ដែលធ្វើឲ្យការទិញផ្ទះមានផលវិបាកយ៉ាងខ្លាំងសម្រាប់ពួកគេ។ នៅពេលដែលអត្រាការប្រាក់កម្ចីទិញផ្ទះឡើងដល់ ៧% កាលពីឆ្នាំមុន ទីភ្នាក់ងារអចលនទ្រព្យ Zillow បានប៉ាន់ប្រមាណថា ជាមួយនឹងប្រាក់ចំណូលជាមធ្យម ប្រសិនបើអ្នកសន្សំបាន ៥% ក្នុងមួយខែ វានឹងចំណាយពេល១០ឆ្នំាសម្រាប់ប្រជាជនអាមេរិកដើម្បីបង់រំលោះ។ ប្រាក់ចំណូលជាមធ្យមរបស់គ្រួសារដែលបានទិញផ្ទះជាលើកដំបូងកាលពីឆ្នាំមុនគឺ ៩០,០០០ ដុល្លារក្នុងមួយឆ្នាំ ។

ការផ្គត់ផ្គង់ក៏មិនច្រើនដែរ ចំនួនផ្ទះក្នុងក្រុងថោកបំផុតបានធ្លាក់ចុះ១.៥%ក្នុងខែមករា បើធៀបនឹងរយៈពេលដូចគ្នាកាលពីឆ្នាំមុន។ ផ្ទុយទៅវិញចំនួនអាផាតមិននៅក្នុងផ្នែកដែលថ្លៃបំផុតបានកើនឡើង ៣៧% ។ ប្តីប្រពន្ធ Rob និង Kelsey Scott បានចាប់ផ្តើមស្វែងរកទិញផ្ទះដំបូងរបស់ពួកគេនៅក្នុងទីក្រុង Seattle ដែលផ្ទះនោះមានតម្លៃសរុប ២០០,០០០ ដុល្លារ ដោយពួកគេអាចមានលទ្ធភាពកក់មុន ៧០,០០០ដុល្លារសម្រាប់១០% ដំបូង។ ទោះជាយ៉ាងណាក៏ដោយ បន្ទាប់ពីមួយឆ្នាំក្រោយមកផ្ទះរបស់អ្នកទាំងពីរបានកើនទៅដល់ ៨០០.០០០ ដុល្លារ បន្ទាប់ពីអត្រាការប្រាក់លើប្រាក់កម្ចីទិញផ្ទះឡើងថ្លៃពេក៕

ប្រភព៖vnexpress

ប្រទេសចិន ៖ មានការប៉ះទង្គិចគ្នាតិចតួចម្តងទៀតរវាងមន្ត្រីប្រចាំឆ្នេរសមុទ្រចិន និងហ្វីលីពីន ក្នុងបរិវេណជម្លោះដែនទឹកនៅសមុទ្រចិនខាងត្បូង ហើយចិនបានផ្ញើសារដាស់តឿនទៅកាន់យន្តហោះរបស់ហ្វីលីពីន ដែលបានហោះលើបរិវេណមានជម្លោះនេះ ។

មន្ត្រីហ្វីលីពីនបានបើកយន្តហោះឆ្លងកាត់បរិវេណប្រជុំកោះ Spratly ដែលវាជាតំបន់មានជម្លោះនៅសមុទ្រចិនខាងត្បូង ហើយនៅលើយន្តហោះនេះមានអ្នកកាសែតជាច្រើននាក់ ត្រូវបានមន្ត្រីប្រចាំឆ្នេរសមុទ្រចិនជូនដំណឹងតាមរយៈវិទ្យុថា ត្រូវចាកចេញពីដែនទឹករបស់ចិនជាបន្ទាន់ ។ ហេតុការណ៍នេះបានកើតឡើងកាលពីថ្ងៃទី៨ ខែមីនា កន្លងមក ខណៈមន្ត្រីប្រចាំការឆ្នេរសមុទ្ររបស់ហ្វីលីពីនក៏បានជូនដំណឹងតាមវិទ្យុប្រាប់ចិនថា នាវារបស់ចិនក៏បានចូលមកក្នុងដែនទឹកដែលជាកម្មសិទ្ធិរបស់ហ្វីលីពីនដូចគ្នា ។

យន្តហោះរបស់ហ្វីលីពីនដែលចិនអះអាងថា បានហោះចូលមកក្នុងដែនទឹករបស់ខ្លួននេះ មានឈ្មោះថា Cessna Caravan បានហោះហើរចំនួន៤ម៉ោង ។ មន្ត្រីហ្វីលីពីនបញ្ជាក់ថា ហ្វីលីពីនបានប្រទះឃើញនាវារបស់ចិនប្រមាណ២០គ្រឿង ក្នុងនោះក៏មាននាវារបស់កងទ័ពចិនផងដែរ បានចូលមកកាន់ដែនទឹកមានជម្លោះជាមួយហ្វីលីពីន ។

ហេតុការណ៍នេះជាការប៉ះទង្គិចគ្នាតិចតួចប៉ុណ្ណោះរវាងមន្ត្រីប្រចាំឆ្នេរសមុទ្រចិនជាមួយហ្វីលីពីន ខណៈកាលពីពេលមុននេះ ប្រទេសទាំងពីរមានបញ្ហាជាមួយគ្នារឿងមន្ត្រីប្រចាំការឆ្នេរសមុទ្រចិនបានបញ្ចាំងពន្លឺឡាស៊ែរមកលើនាវារបស់ហ្វីលីពីន ដែលបានឆ្លងកាត់ដែនទឹកមានជម្លោះស្ថិតក្នុងសមុទ្រចិនខាងត្បូង ។

ប្រទេសចិន និងហ្វីលីពីន បានអះអាងថា ពួកគេជាម្ចាស់កម្មសិទ្ធិនៅប្រជុំកោះ Spratly ដោយហ្វីលីពីនចោទប្រកាន់ថា ចិនបានបញ្ជូនទូកនេសាទជាច្រើនគ្រឿងមកឈ្លានពាននៅបរិវេណជិតកោះរបស់ហ្វីលីពីន ដែលហ្វីលីពីនបានគ្រប់គ្រងកោះទាំងនេះតាំងពីឆ្នាំ១៩៧០ មកម៉្លេះ ខណៈចិនក៏អះអាងដែរថា មន្ត្រីប្រចាំឆ្នេរសមុទ្រចិនបានបំពេញតួនាទីដើម្បីការពារដែនទឹករបស់ចិន ។

គួរបញ្ជាក់ថា ក្រៅពីប្រទេសចិន និងហ្វីលីពីន គឺនៅមានប្រទេសម៉ាឡេស៊ី, វៀតណាម, ព្រុយណេ និងតៃវ៉ាន់ ក៏បានអះអាងដែរថា បរិវេណប្រជុំកោះ Spratly គឺជាកម្មសិទ្ធិរបស់ពួកគេដូចគ្នា ៕ ប្រភព ៖ TNN World

សហរដ្ឋអាមេរិក ៖ តាមការស្ទង់មតិចុងក្រោយរបស់ Gallup ជាក្រុមហ៊ុនប្រឹក្សាយោបល់ និងការស្ទង់មតិកំពូលរបស់អាមេរិក បានបង្ហាញពីគំនិតរបស់ពលរដ្ឋអាមេរិកចំពោះប្រទេសចិនថា ពលរដ្ឋអាមេរិកភាគច្រើនមិនចូលចិត្តចិនទេ ខណៈចិនជាប្រទេសមហាអំណាចនៅលើពិភពលោក ហើយពួកគេបារម្ភថា ចិននឹងគំរាមកំហែងអាមេរិក ។

ការស្ទង់មតិបង្ហាញថា មានពលរដ្ឋអាមេរិកត្រឹមតែ១៥% ប៉ុណ្ណោះដែលចូលចិត្តប្រទេសចិន ហើយនេះជាអត្រាទាបបំផុតដែលក្រុមហ៊ុន Gallup ធ្លាប់បានស្ទង់មតិពីការគិតរបស់ពលរដ្ឋអាមេរិកចំពោះចិន តាំងពីឆ្នាំ១៩៧៩ មក ឬកាលពី៤៤ឆ្នាំមុន ហើយវាបានធ្លាក់ចុះពី៥៣% នៅឆ្នាំ២០១៨ ។ ការសម្លឹងមើលចិនក្នុងផ្លូវវិជ្ជមានរបស់ពលរដ្ឋអាមេរិក គឺបានធ្លាក់ចុះជាបន្តបន្ទាប់ ស្របពេលទំនាក់ទំនងរវាងអាមេរិក និងចិនកាន់តែតានតឹង ។ ការស្ទង់មតិចុងក្រោយនេះ កើតឡើងក្រោយពីប្រទេសទាំងពីរបានប្រឈមមុខដាក់គ្នាជាច្រើនរឿងក្នុងរយៈពេលកន្លងមក ។

ជាក់ស្តែង អាមេរិកបានប្រទះឃើញបាឡុងចិនបានហោះមកលើដែនអាកាសរបស់ខ្លួន ហើយអាមេរិកបានបាញ់វាធ្លាក់នៅខែកុម្ភៈកន្លងមក ដោយអះអាងថា ជាបាឡុងស៊ើបការណ៍របស់ចិន ហើយចិនបានប្រកែកថា វាជាបាឡុងពិនិត្យមើលអាកាសធាតុប៉ុណ្ណោះ ហើយហេតុការណ៍នេះបានធ្វើឱ្យសម្ព័ន្ធភាពរវាងប្រទេសទាំងពីរកាន់តែតានតឹងថែមទៀត ។ ក្រៅពីនេះ មន្ត្រីរដ្ឋាភិបាលអាមេរិកបានដាស់តឿនថា ហាមចិនបញ្ជូនអាវុធទៅជួយរុស្ស៊ីធ្វើសង្គ្រាមនៅអ៊ុយក្រែន ខណៈមានសេចក្តីរាយការណ៍ថា ចិនបានពិចារណាបញ្ជូនអាវុធឱ្យរុស្ស៊ី ។

ចំណែកសមាជិករដ្ឋសភាអាមេរិកមកពីគណបក្សប្រជាធិបតេយ្យ និងគណបក្សសាធារណរដ្ឋ ដែលជាគណបក្សរបស់រដ្ឋាភិបាល និងគណបក្សប្រឆាំង បាននាំគ្នានិយាយពាក់ព័ន្ធនឹងវិបត្តិផ្សេងៗជាមួយចិន ហើយរិះគន់ចិនយ៉ាងចាស់ដៃថា ការបញ្ជូនបាឡុងមកស៊ើបការណ៍អាមេរិក គឺជាការរំលោភលើអធិបតេយ្យភាពរបស់អាមេរិក និងរឿងចិនគាំទ្រប្រទេសជាសត្រូវរបស់អាមេរិក ។

ក្នុងការស្ទង់មតិនេះឃើញថា ពលរដ្ឋអាមេរិកជាច្រើននាក់បានរិះគន់ចិនយ៉ាងខ្លាំង ក្នុងនោះមានពលរដ្ឋតែ១៥%ប៉ុណ្ណោះបានសម្លឹងមកប្រទេសចិនក្នុងផ្លូវល្អ ។ ក្រៅពីនេះ មនុស្ស២នាក់ក្នុងចំណោម៣នាក់ បានឆ្លើយតបថា ចិនជាប្រទេសមហាអំណាចផ្នែកកងទ័ព និងសេដ្ឋកិច្ច ហើយចិននឹងគំរាមកំហែងធ្ងន់ធ្ងរដល់អាមេរិក ។ គួរបញ្ជាក់ថា ការស្ទង់មតិរបស់ក្រុមហ៊ុន Gallup នេះ បានសាកសួរទៅកាន់ពលរដ្ឋអាមេរិកចំនួន១.០០៨នាក់ ក្នុងចន្លោះពីថ្ងៃទី១-២៣ ខែកុម្ភៈ ឆ្នាំ២០២៣ កន្លងមក ៕

ប្រភព ៖ mgronline

ប្រទេសន័រវេស ៖ ន័រវេសត្រូវបានគេចាត់ចំណាត់ថ្នាក់ស្ថិតក្នុងក្រុមប្រទេសអ្នកមានបំផុតនៅលើពិភពលោក ប៉ុន្តែកុមារជាច្រើនរស់នៅប្រទេសនេះបានធំធាត់ឡើងមកជាមួយភាពក្រីក្រ ។ តាមការរាយការណ៍ចុងក្រោយបញ្ជាក់ថា ប្រទេសន័រវេសមិនទទួលបានជោគជ័យក្នុងការកាត់បន្ថយគម្លាតផ្នែកសង្គមរបស់ពលរដ្ឋទេ ។

ក្នុងរយៈពេល១០ឆ្នាំកន្លងមក គម្លាតគ្នាផ្នែកសង្គមនៅប្រទេសន័រវេសបានកើនឡើងជារឿយៗ ដោយអ្នកមានទ្រព្យសម្បត្តិស្តុកស្តម្ភកាន់តែមានទ្រព្យសម្បត្តិច្រើនថែមទៀត រីឯពលរដ្ឋក្រីក្រកាន់តែក្រីក្រលើសដើម និងបានតស៊ូក្នុងជីវិតប្រចាំថ្ងៃរបស់ពួកគេ ។ ក្នុងរយៈពេលប៉ុន្មានឆ្នាំមកនេះ មានពលរដ្ឋន័រវេសជាច្រើននាក់បានមកតម្រង់ជួររង់ចាំគេចែកម្ហូបអាហារ និងរបស់របរផ្សេងៗជាជំនួយសប្បុរសធម៌ ។

សាស្ត្រាចារ្យ Ottar Ness មកពី NTNU បានថ្លែងថា បើទោះជាប្រទេសន័រវេសបានព្យាយាមកាត់បន្ថយគម្លាតគ្នាក្នុងសង្គម លើកកម្ពស់សុខភាព និងការរស់នៅប្រចាំថ្ងៃរបស់ពលរដ្ឋក្តី ប៉ុន្តែការមិនស្មើភាពគ្នារវាងអ្នកមាន និងអ្នកក្រ បានកើនឡើងជានិច្ច ។

រីឯសាស្ត្រាចារ្យ Dina von Heimburg មកពី NTNU បានថ្លែងដែរថា តាមការស្រាវជ្រាវបង្ហាញថា មនុស្សមួយចំនួនមានអារម្មណ៍ថា ពួកគេគ្មានតម្លៃ មិនសំខាន់ ហើយពួកគេគិតថា ខ្លួនគ្មានឱកាសមានជីវិតរស់នៅល្អប្រសើរជាងនេះទេ ។ បើយើងប្រៀបធៀបន័រវេសជាមួយប្រទេសផ្សេងៗ បើទោះមានជាភាពខុសគ្នាផ្នែកសង្គម សុខភាព និងគុណភាពជីវិតរបស់ពលរដ្ឋន័រវេសតិចជាងប្រទេសផ្សេងៗក្តី ប៉ុន្តែទោះយ៉ាងណា បើយើងសម្លឹងឱ្យបានវែងឆ្ងាយឃើញថា គម្លាតគ្នារបស់ពលរដ្ឋន័រវេសមានចន្លោះគ្នាដ៏ធំមិនគួរឱ្យជឿ ។

តាំងពីឆ្នាំ២០១០ មក ពលរដ្ឋន័រវេសដែលមានទ្រព្យសម្បត្តិច្រើនបំផុតបានកើនឡើង១០% ហើយជាមួយគ្នានេះ ពលរដ្ឋន័រវេសក្រីក្របំផុត គឺពួកគេកាន់តែក្រីក្រឡើង ហើយអ្នកក្រមានអាយុខី្លជាងអ្នកមាន ។ លើសពីនេះ យុវវ័យដែលមានឪពុកម្តាយមានបញ្ហាផ្នែកសេដ្ឋកិច្ច និងសង្គម ពួកគេត្រូវប្រឈមនឹងបញ្ហាផ្លូវចិត្តជាញឹកញាប់ ។

មូលហេតុដែលបណ្តាលឱ្យអ្នកក្រីក្រកាន់តែមានអាយុខ្លីនោះ គឺភាគច្រើនពួកគេបានរស់នៅដោយមិនសូវបានគិតគូរពីការពិនិត្យសុខភាព ដូចជា ពួកគេមានភាពតានតឹងខ្ពស់គ្រប់ពេលវេលា, តម្លៃម្ហូបអាហារថ្លៃសម្រាប់សុខភាព ហើយពួកគេគ្មានប្រាក់ទិញ បញ្ហាទាំងអស់នេះហើយធ្វើឱ្យអ្នកក្រីក្រទាំងនេះមានបញ្ហាក្នុងការបរិភោគចំណីអាហារ និងបណ្តាលឱ្យមានជំងឺផ្សេងៗ ។

គេសង្កេតឃើញថា កុមារស្ទើរតែ១២% ក្នុងចំណោមកុមារទាំងអស់នៅប្រទេសន័រវេស បានធំឡើងមកជាមួយគ្រួសារក្រីក្រ ដែលធ្វើឱ្យពួកគេគ្មានឱកាសបានរៀនសូត្រខ្ពស់ មានបញ្ហាផ្លូវចិត្ត និងត្រូវគេធ្វើបាបជាដើម៕

ប្រភព ៖ Norway posts

បរទេស៖ អ្នកស្រាវជ្រាវរបស់ក្រុមហ៊ុន Citigroup បាននិយាយថា ប្រទេសរុស្ស៊ីអាចនឹងកាត់បន្ថយការនាំចេញវត្ថុធាតុដើមសំខាន់ៗដូចជាអាលុយមីញ៉ូម និងប៉ាឡាដ្យូម ដែលបណ្តាលឱ្យតម្លៃកើនឡើងយ៉ាងខ្លាំងនៅទូទាំងពិភពលោក។ ប្រទេសរុស្ស៊ីបានរឹតបន្តឹងការនាំចេញឧស្ម័នធម្មជាតិទៅកាន់អឺរ៉ុប និងបានប្រកាសកាត់បន្ថយផលិតកម្មប្រេងជាបណ្តោះអាសន្នក្នុងខែនេះដើម្បីឆ្លើយតបទៅនឹងទណ្ឌកម្មរបស់លោកខាងលិច។

ក្នុងសេចក្តីជូនដំណឹងដល់អតិថិជននៅថ្ងៃទី៦ ខែមីនា ក្រុមហ៊ុន Citigroup បាននិយាយថា ការកាត់បន្ថយការនាំចេញដែកទៅក្រៅប្រទេសនេះអាចធ្វើឲ្យតម្លៃទំនិញខាងលើឡើងថ្លៃ។ អ្នកវិភាគរបស់ក្រុមហ៊ុន Citi បាននិយាយបន្ថែមទៀតថា “ការរឹតបន្តឹងការនាំចេញអ្វីមួយអាចជះឥទ្ធិពលយ៉ាងសំខាន់ទៅលើទីផ្សារក្នុងរយៈពេលខ្លី”។
យោងតាមក្រុមហ៊ុន Citi ប្រហែល ១៥% នៃអាលុយមីញ៉ូមដែលត្រូវបានជួញដូរនៅលើពិភពលោកគឺមកពីប្រទេសរុស្ស៊ី។ លោហធាតុនេះត្រូវបានគេប្រើប្រាស់យ៉ាងទូលំទូលាយនៅក្នុងយន្តហោះ និងផលិតផលរាប់ចាប់ពីឧបករណ៍ប្រើប្រាស់ក្នុងផ្ទះ រហូតដល់ឧបករណ៍ផ្ទះបាយ។ ផលិតកម្ម palladium របស់រុស្ស៊ីក៏រួមចំណែកប្រហែល ២៥% នៃការផ្គត់ផ្គង់ពិភពលោកផងដែរ លោហៈនេះត្រូវបានប្រើនៅក្នុងឧបករណ៍ដែលកាត់បន្ថយការបំភាយឧស្ម័នពីរថយន្ត។

ថ្មីៗនេះ សហរដ្ឋអាមេរិកបានដាក់ពន្ធនាំចូល ២០០% លើអាលុយមីញ៉ូមរបស់រុស្ស៊ី ពន្ធនេះមានប្រសិទ្ធភាពចាប់ពីថ្ងៃនេះតទៅ។ កាលពីឆ្នាំមុន វាបានកាត់បន្ថយយ៉ាងខ្លាំងនូវការនាំចេញឧស្ម័នទៅកាន់អឺរ៉ុប ដែលជាអតិថិជនដ៏ធំបំផុតរបស់ខ្លួនមុនសង្គ្រាម នេះបានបង្ខំឱ្យរដ្ឋាភិបាលអឺរ៉ុបបង្កើនល្បឿនស្វែងរកការផ្គត់ផ្គង់ថ្មី។ រុស្សីក៏ត្រូវបានចោទប្រកាន់ពីបទប្រើប្រាស់សព្វាវុធដល់ការផ្គត់ផ្គង់ស្បៀងជាសាកល នៅពេលដែលខ្លួនបានបិទកំពង់ផែអ៊ុយក្រែននៅក្នុងសមុទ្រខ្មៅក្នុងអំឡុងពេលប៉ុន្មានខែដំបូងនៃអរិភាព ដោយធ្វើឱ្យរំខានដល់ខ្សែសង្វាក់ផ្គត់ផ្គង់គ្រាប់ធញ្ញជាតិ។ ពិភពលោកទាំងអស់ ក៏ត្រូវបានឃ្លាំមើលយ៉ាងដិតដល់ផងដែរ ព្រោះប្រទេសនេះជាប្រទេសនាំចេញឥន្ធនៈនុយក្លេអ៊ែរដ៏សំខាន់៕ ប្រភព៖ vnexpress

ប្រទេសចិន ៖ ទីក្រុងប៉េកាំងរបស់ចិនបានចាប់ផ្តើមអនុវត្តច្បាប់ថ្មី ដែលតម្រូវឱ្យពលរដ្ឋចិនចេះសន្សំសំចៃទឹកដើម្បីរក្សាធនធានទឹកឱ្យបានគ្រប់គ្រាន់ បន្ទាប់ពីទីក្រុងនេះប្រឈមនឹងបញ្ហាខ្វះខាតទឹកប្រើប្រាស់អស់រយៈពេលដ៏យូរ ។ ដូច្នេះ អាជ្ញាធរក្រុងប៉េកាំងនឹងពិន័យជាប្រាក់ទៅលើអ្នកប្រើទឹកខ្ជះខ្ជាយក្នុងទីក្រុង ។

នៅក្រុងប៉េកាំងមានពលរដ្ឋរស់នៅជាង២១លាននាក់ ហើយបានប្រឈមនឹងបញ្ហាខ្វះខាតទឹកប្រើប្រាស់ជាយូរមកហើយ ហេតុនេះ រដ្ឋាភិបាលក្រុងប៉េកាំងបានចេញច្បាប់ថ្មីមួយដើម្បីគ្រប់គ្រងការប្រើប្រាស់ទឹកទាំងអស់ក្នុងទីក្រុងនេះ និងឱ្យពលរដ្ឋប្រើប្រាស់ទឹកដោយសន្សំសំចៃ ។

សម្រាប់បុគ្គលណាប្រើប្រាស់ទឹកខ្ជះខ្ជាយ និងស្ថាប័នណាប្រើប្រាស់ទឹកពីប្រភពទឹកសាធារណៈដោយខុសច្បាប់ នឹងត្រូវបានពិន័យជាទឹកប្រាក់ខ្ពស់បំផុតចំនួន១ម៉ឺនយាន់ និង១០ម៉ឺនយន់ តាមលំដាប់ ។ ចំនួននេះចាត់ទុកថា គឺជាទឹកប្រាក់ពិន័យដ៏ច្រើន ដែលអាជ្ញាធរក្រុងប៉េកាំងបានចាត់វិធានការតឹងរ៉ឹង និងធ្វើឱ្យពលរដ្ឋរស់នៅទីក្រុងមិនហ៊ានប្រើប្រាស់ទឹកខ្ជះខ្ជាយ ។

បច្ចុប្បន្ន ពលរដ្ឋរស់នៅក្រុងប៉េកាំងភាគច្រើនបានប្រើប្រាស់ទឹកម៉ាស៊ីនដែលមានប្រភពពីភាគខាងត្បូងប្រទេសចិន ។ គម្រោងផ្គត់ផ្គង់ទឹកស្អាតពីភាគខាងត្បូងទៅកាន់ភាគខាងជើងរបស់ចិន គឺបានផ្គត់ផ្គង់ទឹកក្នុងបរិមាណជាង៨,៤ពាន់លានម៉ែត្រគូបចេញពីទន្លេធំមួយនៅភាគខាងត្បូងប្រទេសមកកាន់ទីក្រុងប៉េកាំង ដែលបណ្តាញចែកចាយទឹកនេះបានអនុវត្តតាំងពីឆ្នាំ២០១៤ មកម៉្លេះ ។

ពលរដ្ឋរស់នៅក្រុងប៉េកាំងបានជួបបញ្ហាខ្វះខាតទឹកប្រើប្រាស់ ដោយសារតែពួកគេប្រើប្រាស់ទឹកក្នុងបរិមាណច្រើន និងមិនចាប់អារម្មណ៍ពីការខ្វះខាតទឹក ដូចជា ការប្រើប្រាស់ទឹកនៅក្នុងចម្ការដំណាំ និងការស្រោចដើមឈើ ជាដើម ៕ ប្រភព ៖ Tnn earth