សហរដ្ឋអាមេរិក៖ យន្តហោះយោធាដ៏មានឥទ្ធិពលមួយគ្រឿងដែលគេស្គាល់ថាជា Doomsday Plane ឬ «យន្តហោះនៃថ្ងៃវិនាស» ត្រូវបានគេប្រទះឃើញថ្មីៗនេះនៅអាកាសយានដ្ឋានអន្តរជាតិឡូសអាន់ជឺឡេស (LAX) បន្ទាប់ពីបាត់ខ្លួនអស់រយៈពេល ៥១ ឆ្នាំ បង្កឱ្យមានការសង្ស័យនិងក្ដីបារម្ភយ៉ាងទូលំទូលាយ ខណៈការបង្ហាញខ្លួននេះធ្វើឡើងចំពេលដែលមានភាពតានតឹងជាសកល។

យោងតាមការចេញផ្សាយរបស់ NDTV នាថ្ងៃអាទិត្យ ទី១១ ខែមករា បានបង្ហាញថា ការបង្ហាញខ្លួនរបស់យន្តហោះ Doomsday ដែលជាប្រភេទយន្តហោះ E-4B និងមានរាងបញ្ចកោណហោះនៅលើអាកាស បានទាក់ទាញចំណាប់អារម្មណ៍សាធារណៈជនយ៉ាងឆាប់រហ័ស ដោយមនុស្សជាច្រើនចោ.ទជាសំណួរអំពីគោលបំណងរបស់វា ខណៈគេខានឃើញវាចេញប្រតិបត្តិការអស់រយៈពេល ៥១ឆ្នាំមកហើយ។

តាមទិន្នន័យដែលរៀបរាប់អំពី Doomdays គឺយន្តហោះនេះ ត្រូវបានរចនាឡើងសម្រាប់ប្រើប្រាស់ក្នុងអំឡុងពេលមានអាសន្នជាតិ ជាពិសេសស្រាប់ទប់ទល់នឹងការវា.យប្រហារនុយក្លេអ៊ែរ និងធានាបាននូវនិរន្តរភាពនៃប្រតិបត្តិការរបស់រដ្ឋាភិបាល ដូចដែលឈ្មោះហៅក្រៅរបស់វាថា «យន្តហោះនៃថ្ងៃវិនាស»។

ក្រសួងការពារជាតិអាមេរិក ក្រោយមកបានធ្វើការបញ្ជាក់ថា លោក Pete Hegseth រដ្ឋមន្ត្រីក្រសួងការពារជាតិ បានប្រើប្រាស់យន្តហោះនេះដើម្បីធ្វើដំណើរទៅកាន់ឡូសអាន់ជឺឡេស ដែលជាផ្នែកមួយនៃដំណើរទស្សនកិច្ច «Arsenal of Freedom» របស់គាត់ នេះបើយោងតាមការចុះផ្សាយរបស់កាសែត New York Post។ ទោះជាយ៉ាងណាក៏ដោយ មន្ទីរបញ្ចកោណមិនបានផ្តល់ការពន្យល់ជាផ្លូវការទាក់ទងនឹងមូលហេតុដែលយន្តហោះ E-4B នេះ ត្រូវបានគេយកមកប្រើប្រាស់ជំនួសឱ្យយន្តហោះធម្មតា ដែលស្របនឹងពិធីសាររបស់រដ្ឋាភិបាលឡើយ។

សូមជម្រាបថា Doomsday Plane មានឈ្មោះជាផ្លូវការថា Boeing E-4B Nightwatch គឺជាយន្តហោះយោធា ដែលបម្រើជាមជ្ឈមណ្ឌលប្រតិបត្តិការអាកាសចរណ៍ជាតិ (NAOC) ដែលជាប៉ុស្តិ៍បញ្ជាការហោះហើរ និងត្រូវបានរចនាឡើងដើម្បីការពារប្រធានាធិបតី និងមេដឹកនាំយោធាកំពូលៗរបស់អាមេរិក និងធានាបាននូវនិរន្តរភាពនៃប្រតិបត្តិការរបស់រដ្ឋាភិបាល ក្នុងអំឡុងពេលមានអាសន្នជាតិ ដូចជាសង្គ្រាមនុយក្លេអ៊ែរជាដើម។

យន្តហោះនេះ មានប្រព័ន្ធការពារកម្រិតខ្ពស់ដែលអាចសំកាំងខ្លួននៅលើអាកាសបានរហូតដល់ ១២ ម៉ោង ដោយមិនចាំបាច់ចាក់ប្រេងឥន្ធនៈ ហើយត្រូវបានបំពាក់មុខងារចាក់ប្រេងលើអាកាស ដើម្បីពង្រីកពេលវេលាហោះហើររបស់វាបន្ថែមទៀត។ ដ្បិតថាមិនមែនជាយន្តហោះចម្បាំង ប៉ុន្តែយាននេះអាចអនុញ្ញាតឲ្យគេធ្វើប្រតិបត្តិការពិសេសៗចាំបាច់ជាច្រើន តាមរយៈមុខងារដែលត្រូវបានបែងចែកជាបន្ទប់ដាច់ដោយឡែកពីគ្នារួមមាន៖ តំបន់ធ្វើការបញ្ជាការ បន្ទប់សន្និសីទ បន្ទប់ប្រជុំ តំបន់ធ្វើការរបស់ក្រុមប្រតិបត្តិការ តំបន់ទំនាក់ទំនង និងកន្លែងសម្រាក។ វាត្រូវបានរចនាឡើងដើម្បីរក្សាការទំនាក់ទំនងសកល បើទោះបីជាមជ្ឈមណ្ឌលបញ្ជាការដែលមានមូលដ្ឋានលើដីត្រូវបានគំរាមកំហែងក៏ដោយ ប៉ុន្តែវានៅតែអាចបំពេញបេសកកម្មយ៉ាងមានប្រសិទ្ធភាព ក្នុងនាមជាមន្ទីរបញ្ចកោណចល័តនៅលើមេឃ។

ដូច្នេះការបង្ហាញខ្លួនរបស់វាជាលើកដំបូងក្រោយបាត់វត្តមានអស់ជាច្រើនទសវត្សន៍កន្លងមកនេះ បានជំរុញឲ្យមានករសង្ស័យយ៉ាងទូលំទូលាយពាក់ព័ន្ធនឹងសង្រ្គា.មលោកលើកទី៣ ខណៈដែលស្ថានភាពជាសកលនាពេលបច្ចុប្បន្ននេះ បន្តកើនឡើងកម្ដៅឥតឈប់ឈរ៕

ប្រទេសថៃ ៖ សារព័ត៌មានថៃ Matichon Online រាយការណ៍ថា នៅថ្ងៃទី១២ ខែមករា ឆ្នាំ២០២៦ ក្រសួងការបរទេសថៃបានចេញសេចក្តីថ្លែងការណ៍ប្តេជ្ញាចិត្តអនុវត្តបទឈប់បា.ញ់ និងដោះស្រាយបញ្ហាតានតឹងនៅតាមព្រំដែនជាមួយកម្ពុជា តាមរយៈយន្តការទ្វេភាគី និងកិច្ចប្រជុំ JBC នាពេលឆាប់ៗ ។ ការចេញសេចក្តីថ្លែងការណ៍នេះ បន្ទាប់ពីថៃបដិសេធមិនចូលរួមកិច្ចប្រជុំ JBC តាមសំណើរបស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា ម្តងហើយម្តងទៀត ក្រោមហេតុផលរង់ចាំនីតិវិធីផ្ទៃក្នុង និងទុកការងារនេះឱ្យរដ្ឋាភិបាលថ្មីក្រោយការបោះឆ្នោតនៅខែកុម្ភៈ ឆ្នាំ២០២៦ ។

ក្រសួងការបរទេសថៃបញ្ជាក់ថា បានត្រៀមខ្លួនរួចជាស្រេចក្នុងការចូលរួមកិច្ចប្រជុំ JBC ជាមួយកម្ពុជាឡើងវិញ ប៉ុន្តែប្រទេសថៃត្រូវរៀបចំការបោះឆ្នោតនៅខែកុម្ភៈ ឆ្នាំ២០២៦ ដើម្បីបង្កើតរដ្ឋាភិបាលថ្មីឱ្យរួចរាល់សិន បន្ទាប់មក ថៃនឹងជូនដំណឹងជាផ្លូវការអំពីកាលបរិច្ឆេទ និងរបៀបវារៈនៃកិច្ចប្រជុំ JBC ឱ្យកម្ពុជាបានជ្រាប ។

ការបដិសេធរបស់ថៃមិនចូលរួមកិច្ចប្រជុំ JBC ត្រូវបានគេមើលឃើញថា គ្រាន់តែជាលេសអូសបន្លាយពេលដើម្បីឱ្យកងទ័ពខ្លួនឈូសឆាយផ្ទះសម្បែង និងព័ទ្ធយកទឹកដីកម្ពុជា ដែលពួកគេទើបតែឈ្លានពានបានដោយខុសច្បាប់ក្នុងអំឡុងពេលកងទ័ពថៃធ្វើសង្គ្រាមឈ្លានពានកម្ពុជា លើកទី២ ចាប់ពីថ្ងៃទី៧ ខែធ្នូ រហូតដល់ថ្ងៃទី២៧ ខែធ្នូ ឆ្នាំ២០២៥ ។

គួរបញ្ជាក់ថា កិច្ចប្រជុំពិសេសរបស់គណៈកម្មការចម្រុះខណ្ឌសីមាព្រំដែនគោក (JBC) រវាងកម្ពុជា-ថៃ ដែលគ្រោងរៀបចំឡើងនៅសប្តាហ៍ទី១ ខែមករា ឆ្នាំ២០២៦ នៅខេត្តសៀមរាប តាមសំណើរបស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា កាលពីថ្ងៃទី២៨ ខែធ្នូ ឆ្នាំ២០២៥ ត្រូវបានភាគីថៃស្នើសុំលើកពេល ដោយលើកហេតុផលរង់ចាំនីតិវិធីផ្ទៃក្នុង ។ មន្ត្រីរដ្ឋាភិបាលចាំផ្ទះថៃថា ការពន្យារពេលកិច្ចប្រជុំ JBC ជាមួយកម្ពុជា ពីព្រោះថៃរវល់រៀបចំតំបន់ជាច្រើនកន្លែងដែលទើបឈ្លានពានពីកម្ពុជាឱ្យក្លាយជាកម្មសិទ្ធិរបស់ខ្លួន ។

បន្ទាប់មក កម្ពុជាក៏បានស្នើទៅភាគីថៃជាថ្មី តាមរយៈកំណត់ទូតចុះថ្ងៃទី៥ ខែមករា ឆ្នាំ២០២៦ ដើម្បីរៀបចំកិច្ចប្រជុំពិសេសរបស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ថៃ-កម្ពុជា នៅសប្តាហ៍ទី២ ឬសប្តាហ៍ទី៣ ខែមករា ឆ្នាំ២០២៦ នៅខេត្តសៀមរាប ក្នុងគោលបំណងពិភាក្សាដោះស្រាយបញ្ហាមួយចំនួន ។ ប៉ុន្តែរដ្ឋាភិបាលថៃបានបដិសេធម្តងទៀតមិនចូលរួមប្រជុំ ក្រោមហេតុផលទុកការងារនេះឱ្យរដ្ឋាភិបាលថ្មីក្រោយការបោះឆ្នោតនៅខែកុម្ភៈ ឆ្នាំ២០២៦ ។ ការបដិសេធរបស់ថៃគ្រាន់តែជាលេសអូសបន្លាយពេលដើម្បីឱ្យកងទ័ពខ្លួនឈូសឆាយផ្ទះ និងព័ទ្ធយកទឹកដីកម្ពុជា ដែលពួកគេទើបឈ្លានពានបានដោយខុសច្បាប់ ។

គណៈកម្មការចម្រុះខណ្ឌសីមាព្រំដែនគោក (JBC) កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានា ដែលភាគីទាំងពីរបានឯកភាពគ្នាកន្លងមក ។

គណៈកម្មការចម្រុះខណ្ឌសីមាព្រំដែនគោក (JBC) កម្ពុជានឹងបន្តអនុវត្តការងារវាស់វែង និងខណ្ឌសីមាព្រំដែនឱ្យបានឆាប់បំផុតជាមួយគណៈកម្មការចម្រុះខណ្ឌសីមាព្រំដែនគោក (JBC) ថៃ ដើម្បីសម្រេចបាននូវសន្តិភាពយូរអង្វែងនៅតាមបណ្តោយព្រំដែន និងមិនទទួលស្គាល់ការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង ៕

ប្រធានាធិបតីអាមេរិក លោក Donald Trump បានប្រកាសពីវិធានការតឹងរ៉ឹងថា នឹងគ្មានប្រេងឥន្ធនៈ ឬបញ្ជូនប្រាក់ពីវេណេស៊ុយអេឡាទៅកាន់គុយបាទៀតទេ ព្រមទាំងដាក់សម្ពាធឱ្យគុយបាប្រញាប់ពិភាក្សាជាមួយអាមេរិក និងធ្វើកិច្ចព្រមព្រៀងប្រេងវេណេស៊ុយអេឡារួមគ្នាមុនយឺតពេល ពីព្រោះប្រេងឥន្ធនៈ និងប្រាក់យ៉ាងច្រើនសន្ធឹកសន្ធាប់ ដែលគុយបាទទួលបានពីវេណេស៊ុយអេឡារហូតមកនឹងបញ្ចប់ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១១ ខែមករា ឆ្នាំ២០២៦ ។

ក្រៅនេះ លោកប្រធានាធិបតី Trump ក៏បានបង្ហោះសារក្នុងបណ្តាញសង្គម Truth Social ចង់បញ្ជូនរដ្ឋមន្ត្រីក្រសួងការបរទេសអាមេរិក លោក Marco Rubio ដែលជាជនជាតិអាមេរិកកាត់គុយបា ធ្វើជាប្រធានាធិបតីថ្មីរបស់គុយបា ហើយលោកចាត់ទុកល្អប្រសើរបំផុតសម្រាប់ខ្លួនលោកផ្ទាល់ ។

កាលពីថ្ងៃទី១១ ខែមករា លោកប្រធានាធិបតី Trump បានព្រមានប្រទេសគុយបាឱ្យប្រញាប់ធ្វើកិច្ចព្រមព្រៀងប្រេងវេណេស៊ុយអេឡាជាមួយអាមេរិកកុំឱ្យហួសពេល ពីព្រោះចាប់ពីពេលនេះ ប្រេង និងប្រាក់យ៉ាងច្រើនដែលគុយបាទទួលបានពីវេណេស៊ុយអេឡានឹងបញ្ចប់ បន្ទាប់ពីកងទ័ពពិសេសអាមេរិកចាប់ខ្លួនប្រធានាធិបតីវេណេស៊ុយអេឡា លោក Nicolas Maduro និងភរិយា កាលពីថ្ងៃទី៣ ខែមករា ប៉ុន្តែលោក Trump មិនបានបញ្ជាក់លម្អិតពីលក្ខខណ្ឌកិច្ចព្រមព្រៀង ឬផលប៉ះពាល់ដែលគុយបាត្រូវប្រឈមទេ ។

វេណេស៊ុយអេឡាជាសម្ព័ន្ធមិត្តរឹងមាំរបស់គុយបា ហើយវេណេស៊ុយអេឡាបានបញ្ជូនប្រេងទៅឱ្យគុយបា ប្រមាណ ៣ម៉ឺន ៥ពាន់បារ៉ែលក្នុង១ថ្ងៃ ប៉ុន្តែលោកប្រធានាធិបតី Trump ថា ចាប់ពីពេលនេះ គុយបានឹងមិនទទួលបានអ្វីទេ ។ រយៈពេលជាច្រើនឆ្នាំ គុយបាមានជីវិតល្អប្រសើរដោយសារប្រេង និងប្រាក់យ៉ាងច្រើនសន្ធឹកសន្ធាប់ពីវេណេស៊ុយអេឡា ដើម្បីជាថ្នូរនឹងគុយបាជួយការពារសន្តិសុខឱ្យមេដឹកនាំផ្តាច់ការវេណេស៊ុយអេឡា ២រូប ប៉ុន្តែបច្ចុប្បន្ន វេណេស៊ុយអេឡានឹងឈប់បញ្ជូនប្រេង និងប្រាក់ឱ្យគុយបាទៀតហើយ ។

គួរបញ្ជាក់ថា គុយបាបានបញ្ជូនភ្នាក់ងារសន្តិសុខមកជួយការពារសុវត្ថិភាពលោកប្រធានាធិបតីវេណេស៊ុយអេឡា Maduro អស់រយៈពេលជាច្រើនឆ្នាំ ដោយរដ្ឋាភិបាលគុយបាបញ្ជាក់ថា ជនជាតិគុយបា ចំនួន៣២នាក់ ត្រូវបានសម្លាប់ពេលកងទ័ពពិសេសអាមេរិកធ្វើប្រតិបត្តិការនៅទីក្រុង Caracas ប្រទេសវេណេស៊ុយអេឡា ខណៈលោកប្រធានាធិបតី Trump ថា វេណេស៊ុយអេឡាលែងត្រូវការការការពារសុវត្ថិភាពពីពួកជំរិតទារប្រាក់គុយបា ។ វេណេស៊ុយអេឡាមានកងទ័ពអាមេរិកដ៏មានឥទ្ធិពលបំផុតលើពិភពលោក ជួយការពារពួកគេ ហើយអាមេរិកនឹងគ្រប់គ្រងវេណេស៊ុយអេឡា ។

ទោះជារដ្ឋាភិបាលអាមេរិកមិនទាន់បញ្ជាក់ពីផែនការច្បាស់លាស់ចំពោះគុយបា ប៉ុន្តែកន្លងមក លោកប្រធានាធិបតី Trump និយាយថា អាមេរិកមិនចាំបាច់ជ្រៀតជ្រែកគុយបាដោយការប្រើប្រាស់កម្លាំងទ័ពទេ ពីព្រោះប្រទេសនេះជិតដួលរលំ ។ រីឯប្រធានាធិបតីគុយបា លោក Miguel Díaz-Canel បានឆ្លើយតបយ៉ាងម៉ឺងម៉ាត់ថា ត្រៀមការពារប្រទេស គុយបាមានអធិបតេយ្យរបស់ខ្លួន មិនស្តាប់តាមបញ្ជាអ្នកណាឡើយ ៕