ថ្មីៗនេះ ពេជ្រ វត្តីសារ៉ាវឌ្ឍី និង មាលា បានធ្វើឱ្យមហាជនមានការចាប់អារម្មណ៍យ៉ាងខ្លាំងនៅពេលស្លៀកឈុតចុងសម័យឧដុង្គថតរូបនៅប្រាសាទអង្គរវត្តដែលនាំឱ្យផ្អើលអស់ភ្ញៀវទេសជាតិនិងអន្តរជាតិចាប់អារម្មណ៍អ្នកទាំងពីរ។ អ្វីដែលកាន់តែពិសេស ពេជ្រ វត្តីសារ៉ាវឌ្ឍី បានបង្ហោះវីដេអូ Trend មួយដែលធ្វើឱ្យទស្សនិកជនពេញចិត្តស្តូក។
កាលពីយប់ថ្ងៃទី១១ ពេជ្រ វត្តីសារ៉ាវឌ្ឍី បានបង្ហោះវីដេអូមួយដោយភ្ជាប់មកជាមួយនឹងខ្លឹមសារថា «ឋានសួគ៌ដែលស្ថិតនៅលើដែនដីសុវណ្ណភូមិនៃប្រទេសកម្ពុជា»។ បវរកញ្ញារូបនេះបានបន្ថែមជាភាសាអង់គ្លេសដែលមានអត្ថន័យថា «ខ្ញុំមានមោទនភាពក្នុងការបង្ហាញជូនលោកអ្នកថាប្រទេសកម្ពុជាមានសុវត្ថិភាពសម្រាប់ការធ្វើដំណើរ ប្រទេសដ៏ស្រស់ស្អាតរបស់យើងត្រៀមខ្លួនជាស្រេចដើម្បីស្វាគមន៍លោកអ្នកជាមួយនឹងទីកន្លែងដ៏ស្រស់ស្អាត និងមនុស្សដែលមានចិត្តល្អ»។
នៅក្នុងវីដេអូ Trend នេះ ពេជ្រ វត្តីសារ៉ាវឌ្ឍី បានស្លៀកឈុតប្រពៃណីខ្មែរជាច្រើនទម្រង់ជាមួយនឹងទិដ្ឋភាព ផ្ទាំងគំនូរសិល្បៈដើម្បីសន្តិភាពនៅខេត្តសៀមរាបដែលបង្ហាញពីការពិតនៃភាពឈឺចាប់របស់ប្រជាពលរដ្ឋកម្ពុជាដែលរងការឈ្លានពានពីប្រទេសជិតខាង។ ជាមួយនឹងរូបភាពផ្ទាំងគំនូរដ៏មានអត្ថន័យ ពេជ្រ វត្តីសារ៉ាវឌ្ឍី បានបង្ហាញរូបភាពជាបន្តបន្ទាប់នៃប្រាសាទនិងទិដ្ឋភាពជាច្រើនទៀតនៅតំបន់អង្គរ។ 
ការចូលរួមផ្សព្វផ្សាយតំបន់ទេសចរណ៍ផ្សារភ្ជាប់ជាមួយនឹងវប្បធម៌ខ្មែរនៅលើទឹកដីដ៏អស្ចារ្យរបស់ ពេជ្រ វត្តីសារ៉ាវឌ្ឍី បានធ្វើឱ្យមហាជនពេញចិត្តយ៉ាងខ្លាំងជាមួយនឹងសំណេរកោតសរសើរជាច្រើន៕
