ប្រទេសចិន ៖ ខេត្តហៃណាន គឺជាខេត្តមួយដែលបានដាំដុះផ្លែជម្ពូដ៏សំខាន់របស់ចិន ហើយក្រៅពីពូជជម្ពូដែលចិនបានដាំពីមុនដូចជា ពូជ Black King Kong, ពូជ Black Pearl និងពូជ Milk wax apple នោះ ផ្ទៃដីដាំដុះនៅតំបន់សាន់យ៉ា ខេត្តហៃណានបានទទួលជោគជ័យក្នុងការអភិវឌ្ឍពូជជម្ពូថ្មីមួយទៀតឈ្មោះថា ពូជ Nanlu លេខ១ ។ ពួកគេបានដាំជម្ពូ Nanlu និងទទួលបានទិន្នផលជាច្រើនកាលពីឆ្នាំ២០២២ កន្លងមក ។

ក្នុងរយៈពេល១០ថ្ងៃដំបូងរបស់ខែមីនា ឆ្នាំ២០២៣នេះ ប្រទេសចិនបាននាំចេញជម្ពូ Nanlu ទៅក្រៅប្រទេសជាលើកដំបូង និងបញ្ជូនទៅប្រទេសកាណាដាតាមផ្លូវអាកាស ។ បរិមាណការនាំចេញជម្ពូពីតំបន់សាន់យ៉ាក្នុងពេលបច្ចុប្បន្ន គឺស្មើនឹង១៥០ឡាំង/១សប្តាហ៍ ហើយមកដល់ខែមីនានេះ ចិនបាននាំចេញជម្ពូទៅទីផ្សារក្រៅប្រទេសចំនួន៣លើក ហើយចិននឹងនាំចេញជាបន្តបន្ទាប់រហូតដល់ខែកក្កដា ឆ្នាំ២០២៣ ជាពេលដែលជម្ពូឈប់ចេញផ្លែ ។

ជម្ពូរបស់ចិនពូជ Nanlu លេខ១ មានផ្លែធំៗ ដោយជម្ពូ១ផ្លែ មានទម្ងន់ប្រមាណ១៥០ក្រាម និងមានទំហំធំជាង២ដងនៃជម្ពូពូជ Black King Kong ។ ជម្ពូ Nanlu មានរសជាតិជូរអែម និងគ្មានរសជាតិចត់ទេ ។ វាមានសម្បកក្រាសជាងពូជ Black King Kong ដូច្នេះ ធ្វើឱ្យជម្ពូ Nanlu ងាយស្រួលប្រមូលផលទុកដាក់ ។ លើសពីនេះ វាមានប្រៀបក្នុងការប្រកួតប្រជែងលើទីផ្សារក្រៅប្រទេសផងដែរ ។

ផ្លែជម្ពូដែលដាក់លក់នៅលើទីផ្សារក្រៅប្រទេសភាគច្រើន គឺជាជម្ពូរបស់វៀតណាម ថៃ និងតៃវ៉ាន់ ។ បច្ចុប្បន្ន តម្លៃជម្ពូ Nanlu របស់ចិន ដែលលក់នៅប្រទេសកាណាដា គឺស្មើប្រមាណ៦០ដុល្លារអាមេរិក/១ប្រអប់ ដែលតម្លៃនេះខ្ពស់ជាងពូជជម្ពូផ្សេងៗរហូតដល់២០% ។ ម្យ៉ាងទៀត ដោយសារមានតម្រូវការជម្ពូលើទីផ្សារក្រៅប្រទេស ចិនបានពង្រីកការនាំចេញជម្ពូរបស់ខ្លួនទៅកាន់ទីក្រុងឌូបៃ ។

ចំណែកទីផ្សារក្នុងស្រុកវិញ ជម្ពូ Nanlu លេខ១ ទទួលបានការពេញនិយមពីអតិថិជនក្នុងរយៈពេលប៉ុន្មានឆ្នាំកន្លងមកនេះ ប៉ុន្តែបរិមាណដាំដុះតិចបានធ្វើឱ្យចិនខ្វះខាតជម្ពូលក់នៅលើទីផ្សារ ហើយតម្លៃវិញ ក៏ខ្ពស់ជាងជម្ពូផ្សេងៗដែរ ។ ប៉ុន្តែសម្រាប់ឆ្នាំ២០២៣នេះ ចិនបានបង្កើនផ្ទៃដីដាំដុះជម្ពូលើសមុន២ដង និងលក់បានថ្លៃជាងឆ្នាំ២០២២ បន្តិច ។ រីឯរដូវប្រមូលផលជម្ពូ Nanlu គឺចាប់ពីខែមីនា រហូតដល់ខែកក្កដា ។

បើតាមសេចក្តីរាយការណ៍ថា ខេត្តហៃណានបានដាំផ្លែឈើផ្សេងទៀតដូចជា ម្នាស់ពណ៌មាស ចេក និងផ្លែគូលែន ។ ក្រៅពីនេះ គឺផ្លែមៀន និងស្វាយពូជ Kui Fei ដែលចិនកំពុងបង្កើនការនាំចេញទៅកាន់ទីផ្សារក្រៅប្រទេសដូចគ្នា ៕ ប្រភព ៖ The durian times

រដ្ឋធានីកៀវ៖ ក្រោយពេលលោក ពូទីន បានទៅកាន់តំបន់វាយដណ្ដើមកាន់កាប់របស់ទាហានរុស្ស៊ី នៅទីក្រុងម៉ារីយ៉ូប៉ូល (Mariupol) មិនបានប៉ុន្មានថ្ងៃផង ប្រធានាធិបតីអ៊ុយក្រែន លោក ហ្សេឡែនស្គី បានទៅសួរសុខទុក្ខ និង លើកទឹកចិត្តដល់កងកម្លាំងរបស់ខ្លួន នៅសមរភូមិក្ដៅ ដែលកំពុងតែវាយប្រយុទ្ធ រវាងកងទ័ពក្រុងកៀវ និង ក្រុងមូស្គូ។

សារព័ត៌មាន CNA បានចេញផ្សាយ កាលពីព្រឹក ថ្ងៃព្រហស្បតិ៍ ទី២៣ ខែមីនា ឆ្នាំ២០២៣ ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានអះអាង កាលពីថ្ងៃពុធ (ទី២២ ខែមីនា) ថា គាត់បានទៅធ្វើដំណើរទៅសួរសុខទុក្ខ និង លើកទឹកចិត្ដដល់កងទ័ព នៅលើទីតាំងឈរជើង នៅជិតសមរភូមិទីក្រុងបាកមូត (Bakhmut) នាភាគខាងកើត ប្រទេសអ៊ុយក្រែន ខណៈកម្លាំងទាហានរុស្ស៊ី កំពុងតែវាយប្រហារយ៉ាងខ្លាំង ទៅលើសំណង់អគារ ហើយបានបង្កឲ្យមានមនុស្ស រងរបួសជាច្រើននាក់។

លោកប្រធានាធិបតី ហ្សេឡែនស៊ី បានទទួលស្គាល់ នៅក្នុងអំឡុងពេលទៅសួរសុខទុក្ខ និងលើកទឹកចិត្ដដល់កងទ័ព នៅលើសមរភូមិ ជិតទីក្រុងបាកមូត ដែលជាសមរភូមិដ៏វែងបំផុត និង ជាសមរភូមិជាវាយប្រយុទ្ធគ្នាយ៉ាងបង្ហូឈាម ជាមួយរុស្ស៊ី ថា «កងទ័ពការពារទឹកដីរបស់អ៊ុយក្រែន កំពុងតែតស៊ូពុះពារយ៉ាងលំបាកបំផុត។ ដូច្នេះខ្ញុំមានកិត្តិយសខ្លាំងណាស់ បានមកកាន់ទីនេះ នៅថ្ងៃនេះ ដើម្បីផ្តល់រង្វាន់ ជូនដល់វីរបុរសរបស់យើង។ ខ្ញុំបានចាប់ដៃ និង អរគុណពួកគាត់ សម្រាប់ការការពារអធិបតេយ្យភាព នៃប្រទេសជាតិរបស់យើង»។

កម្លាំងអ៊ុយក្រែន និង ទាហានរុស្ស៊ី បានចំណាយកម្លាំងទាហានយ៉ាងធ្ងន់ធ្ងរបំផុត នៅលើសមរភូមិបាកមូត បើទោះជាក្រុមអ្នកវិភាគ បានអះអាង ថា ទីក្រុងមួយនេះ មានតម្លៃ សម្រាប់យុទ្ធសាស្ត្រតិចតួចយ៉ាងណាក៏ដោយ។ ទីក្រុងបាកមូត មានប្រជាជន ប្រហែល ៨០ ០០០នាក់ រស់នៅមុនពេលសង្គ្រាមផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២។ ប៉ុន្ដែឥឡូវនេះ មានប្រជាជនតិចតួចណាស់ នៅតែបន្ដរស់នៅ។

ដោយឡែក រដ្ឋាភិបាលក្រុងកៀវ បានអះអាង ថា ការវាយប្រយុទ្ធគ្នា សម្រាប់ទីក្រុងឧស្សាហកម្មមួយនេះ មានសារៈសំខាន់យ៉ាងខ្លាំង ត្រូវតែបណ្ដេញទាហានរុស្ស៊ី ចេញពីសមរភូមិទាំងអស់ នៅតំបន់ភាគខាងកើត។

ជាមួយការវាយប្រយុទ្ធគ្នាយ៉ាងក្រាញននៀលរៀងៗខ្លួន រវាងកងទ័ពរបស់អ៊ុយក្រែន និង ទាហានរបស់រុស្ស៊ី កំពុងតែបន្ដ នៅតំបន់ភាគខាងកើត ប្រទេសនោះ តុលាការឧក្រិដ្ឋកម្មអន្ដរជាតិ (ICC) បានចេញដីកាចាប់ខ្លួនប្រធានាធិបតី វ្ល៉ាឌីមៀ ពូទីន ពីបទឧក្រិដ្ឋកម្មសង្គ្រាម។ បើទោះជាយ៉ាងណាក៏ដោយ ICC មិនមានកម្លាំង សម្រាប់ចុះទៅចាប់លោក ពូទីន នោះដែរ ហើយការអនុវត្ដដីកានេះ លុះត្រាតែមានកិច្ចសហប្រតិបត្ដិការជាអន្ដរជាតិ មកពីបណ្ដាប្រទេសជាសមាជិក។

ការធ្វើដំណើរទៅលើកទឹកចិត្តដល់កងទ័ពរបស់លោក ហ្សេឡែនស្គី បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពេលលោក វ៉្លាឌីមៀ ពូទីន ប្រធានាធិបតីរុស្ស៊ី បានទៅកាន់ទីក្រុងម៉ារីយ៉ូប៉ូល ដែលទាហានរបស់ក្រុងមូស្គូ បានដណ្ដើមកាន់កាប់ ពីអ៊ុយក្រែន កាលពីអំឡុងខែឧសភា ឆ្នាំ២០២២៕

ប្រទេសរុស្ស៊ី ៖ ចាប់ពីថ្ងៃទី២០ ដល់ថ្ងៃទី២២ ខែមីនា កន្លងមក ប្រធានាធិបតីប្រទេសចិន លោក ស៊ី ជិនពីង បានធ្វើដំណើរមកកាន់ប្រទេសរុស្ស៊ីជាផ្លូវការ ដោយបានជួបពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ។ គេចាត់ទុកថា នេះជាការជួបគ្នាលើកដំបូងរបស់មេដឹកនាំប្រទេសទាំងពីររូបក្នុងរយៈពេល៤ឆ្នាំ ចាប់តាំងពីកើតសង្គ្រាមនៅប្រទេសអ៊ុយក្រែន ។

សង្គ្រាមនៅអ៊ុយក្រែនបានអូសបន្លាយអស់រយៈពេលជាង១ឆ្នាំ ដែលបានធ្វើឱ្យមានភាពចលាចលក្នុងទីផ្សារថាមពលលើពិភពលោក និងធ្វើឱ្យប្រទេសចិនក្លាយជាអតិថិជនសំខាន់មួយដែលបានជួយទិញប្រេង ឧស្ម័នធម្មជាតិ និងធ្យូងថ្មរបស់រុស្ស៊ី ហើយការទិញផលិតផលពីរុស្ស៊ីបានកើនឡើងយ៉ាងឆាប់រហ័ស ។

សារព័ត៌មាន Bloomberg រាយការណ៍ថា យោងតាមទិន្នន័យរបស់នាយកដ្ឋានគយប្រទេសចិនថា ចិនបាននាំចូលប្រេងឆៅ, ផលិតផលថាមពល, ធ្យូងថ្ម និងឧស្ម័នធម្មជាតិ ស្មើនឹងទឹកប្រាក់៨៨.០០០លានដុល្លារអាមេរិក គិតចាប់តាំងពីកើតសង្គ្រាមនៅអ៊ុយក្រែន រហូតដល់ចុងខែកុម្ភៈ ឆ្នាំ២០២៣ នេះ ។

នាយកដ្ឋានគយប្រទេសចិនបន្តថា ចិនបានជួយទិញផលិតផលនានាពីរុស្ស៊ីកើនឡើងរហូតដល់៣ដង បើធៀបនឹងកាលពីឆ្នាំ២០២២ កន្លងមក ដែលចិនធ្លាប់បានទិញផលិតផលថាមពលពីរុស្ស៊ី ស្មើទឹកប្រាក់ត្រឹមតែ៥៧.០០០លានដុល្លារអាមេរិក ។ ចំពោះព័ត៌មានថា ចិនជាអតិថិជនសំខាន់មួយរបស់រុស្ស៊ីនេះ គឺបានចុះផ្សាយមុនពេលប្រធានាធិបតីចិន លោក ស៊ី ជិនពីង ធ្វើដំណើរមកកាន់ប្រទេសរុស្ស៊ីជាផ្លូវការ ។

ចិនជាប្រទេសមួយដែលបានផ្តល់ហិរញ្ញវត្ថុដល់រុស្ស៊ី តាមរយៈការជួយទិញប្រេង ឧស្ម័នធម្មជាតិ និងថាមពលនានា ដើម្បីឱ្យរុស្ស៊ីមានប្រភពចំណូលអាចធ្វើសង្គ្រាមជាមួយអ៊ុយក្រែនបន្តទៀត ហើយចិនក៏មិនចាប់អារម្មណ៍នឹងការដាក់ទណ្ឌកម្មលើរុស្ស៊ីពីបណ្តាប្រទេសផ្សេងដែរ ។ ប៉ុន្តែចិនប្រកាសថា ខ្លួនប្រកាន់ជំហរកណ្តាលចំពោះជម្លោះរវាងរុស្ស៊ី និងអ៊ុយក្រែន ។

គួរបញ្ជាក់ថា កាលពីឆ្នាំ២០២២ រុស្ស៊ីបានក្លាយជាប្រទេសផ្គត់ផ្គង់ប្រេងឆៅដ៏ធំបំផុតរបស់ចិន ជំនួសប្រទេសអារ៉ាប៊ីសាអូឌីត ។ លើសពីនេះ រុស្ស៊ីក៏ជាអ្នកលក់ធ្យូងថ្មទៅកាន់ទីផ្សារចិនស្ថិតក្នុងលំដាប់ទី២ បន្ទាប់ពីប្រទេសឥណ្ឌូណេស៊ី ហើយរុស្ស៊ីក៏បានលក់ឧស្ម័នធម្មជាតិរាវទៅកាន់ចិនផងដែរ បន្ទាប់ពីប្រទេសអូស្ត្រាលី និងកាតា ៕ ប្រភព ៖ The better

តាមប្រភពព័ត៌មាន US News បានឱ្យដឹងថាមានប្រទេសចំនួន១០ ដែលត្រូវបានគេចាត់ទុកថាជាប្រទេសដែលមានប្រជាជនរួសរាយច្រើនជាងគេលើពិភពលោកក្នុងឆ្នាំ២០២៣។ ដូច្នេះហើយប្រទេសដែលរួសរាយជាងគេទាំង១០នោះមានប្រទេសកម្ពុជាដែរឬទេ?

១.ប្រទេសញ៉ូហ្សីឡែន(New Zealand)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៩៤% ដែលគិតក្នុងឆ្នាំ២០២៣។
២.ប្រទេសអេស្ប៉ាញ(Spain)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៩៣% ដែលគិតក្នុងឆ្នាំ២០២៣។
៣.ប្រទេសអ៊ីតាលី(Italy)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៩១% ដែលគិតក្នុងឆ្នាំ២០២៣។
៤.ប្រទេសក្រិក(Greece)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៩០% ដែលគិតក្នុងឆ្នាំ២០២៣។
៥.ប្រទេសកាណាដា(Canada)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨៩% ដែលគិតក្នុងឆ្នាំ២០២៣។៦.ប្រទេសហូឡង់(Netherlands)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨៧% ដែលគិតក្នុងឆ្នាំ២០២៣។
៧.ប្រទេសអូស្រ្តាលី(Australia)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨៥% ដែលគិតក្នុងឆ្នាំ២០២៣។
៨.ប្រទេសន័រវែរ(Norway)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨៣% ដែលគិតក្នុងឆ្នាំ២០២៣។
៩.ប្រទេសហ្វាំងឡង់(Finland)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨២% ដែលគិតក្នុងឆ្នាំ២០២៣។
១០.ប្រទេសអៀរឡង់(Ireland)៖ ជាប្រទេសដែលមានប្រជាជនរួសរាយរាក់ទាក់ច្រើនជាងគេប្រហែល៨០% ដែលគិតក្នុងឆ្នាំ២០២៣៕

ប្រទេសបង់ក្លាដែស ៖ ពលរដ្ឋរស់នៅទីក្រុងដាកា ប្រទេសបង់ក្លាដែសបាននាំគ្នាត្អូញត្អែរថា ពួកគេត្រូវតស៊ូយ៉ាងលំបាក ដោយសារតែរងផលប៉ះពាល់ពីអតិផរណាកើនឡើងខ្ពស់ ជាពិសេស តម្លៃម្ហូបអាហារបានឡើងថ្លៃលើសដើមក្នុងអំឡុងមុនពេលពលរដ្ឋកាន់សាសនាឥស្លាមកំពុងត្រៀមខ្លួនកាន់សីល និងតមអាហារនៅខែរ៉ាម៉ាដន ។

គេសង្កេតឃើញថា មានពលរដ្ឋជាច្រើននាក់បានតម្រង់ជួរយ៉ាងវែងនៅតាមរថយន្តដឹកទំនិញផ្សេងៗ ដែលរថយន្តទាំងនោះដាក់លក់ទំនិញដែលទទួលបានការគាំទ្រពីរដ្ឋាភិបាលបង់ក្លាដែស ដូចជា អង្ករ និងម្សៅសម្រាប់ធ្វើអាហារ ។ វាជាផ្នែកមួយនៃគម្រោង Open Market Sales (OMS) សម្រាប់ជួយដល់ពលរដ្ឋបង់ក្លាដែស ដែលរងផលប៉ះពាល់ដោយសារម្ហូបអាហារឡើងថ្លៃ ។

ចំណែកអាជីវករលក់ដូរនៅតាមផ្សារផ្សេងៗ ក៏ប្រឈមមុខនឹងបញ្ហានេះដូចគ្នាដែរ ដោយសារមិនសូវមានអតិថិជនមកទិញរបស់របរដូចពេលមុនទេ ។ អាជីវករលក់គ្រាប់ធញ្ញជាតិម្នាក់រអ៊ូរទាំថា តម្លៃម្ហូបអាហារឡើងថ្លៃទាំងអស់ ខណៈប្រាក់ចំណូលរបស់ពលរដ្ឋធ្លាក់ចុះ ។

គួរបញ្ជាក់ថា តម្លៃម្ហូបអាហារនៅប្រទេសបង់ក្លាដែសឡើងថ្លៃ គឺជារឿងធម្មតាមុនឈានដល់ថ្ងៃកាន់សីល និងតមអាហារក្នុងខែរ៉ាម៉ាដន ប៉ុន្តែអតិផរណាកើនឡើងធ្វើឱ្យប៉ះពាល់ដល់ការផ្គត់ផ្គង់ដែលបណ្តាលមកពីវិបត្តិនៅលើពិភពលោក ដូចជា ការឆ្លងរាលដាលនៃជំងឺកូវីដ-១៩ និងសង្គ្រាមអូសបន្លាយនៅប្រទេសអ៊ុយក្រែន បានធ្វើឱ្យតម្លៃម្ហូបអាហារកើនឡើងជាបន្តបន្ទាប់នៅប្រទេសបង់ក្លាដែស ។ លើសពីនេះ ប្រទេសនេះក៏បានប្រឈមមុខនឹងការខ្វះខាតថាមពលប្រើប្រាស់ និងរូបិយប័ណ្ណធ្លាក់ថ្លៃផងដែរ ៕ ប្រភព ៖ TNN World

ប្រទេសរុស្ស៊ី ៖ លោកប្រធានាធិបតីប្រទេសរុស្ស៊ី វ៉្លាឌីមៀរ ពូទីន បានថ្លែងក្រោយពីលោកជួបពិភាក្សាជាមួយប្រធានាធិបតីចិន លោក ស៊ី ជិនពីង ដែលបានធ្វើដំណើរមកកាន់ទីក្រុងមូស្គូ ប្រទេសរុស្ស៊ី ថា ប្រទេសចិនបានស្នើដាក់ផែនការសន្តិភាព១២ចំណុច ដើម្បីបញ្ចប់សង្គ្រាមនៅប្រទេសអ៊ុយក្រែន ។ លោក ពូទីន បន្តថា សង្គ្រាមអាចបញ្ចប់ទៅបាន ដរាបណាបណ្តាប្រទេសលោកខាងលិច និងអ៊ុយក្រែនយល់ព្រមស្វែងរកសន្តិភាព ប៉ុន្តែរុស្ស៊ីមើលមិនឃើញថា ពួកគេយល់ព្រមចរចាបញ្ចប់សង្គ្រាមទេ ។

ផែនការសន្តិភាព១២ចំណុចរបស់ប្រទេសចិន គឺបានអំពាវនាវឱ្យប្រទេសពាក់ព័ន្ធយល់ព្រមចរចាគ្នារកសន្តិភាព និងស្នើសុំឱ្យភាគីទាំងអស់ត្រូវគោរពអធិបតេយ្យភាពរបស់ប្រទេសនីមួយៗទៅវិញទៅមក ។ ប្រទេសចិនបញ្ជាក់ថា ខ្លួននៅតែប្រកាន់ជំហរកណ្តាលចំពោះសង្គ្រាមនៅអ៊ុយក្រែន ហើយមានតែការចរចាប៉ុណ្ណោះ ទើបអាចដោះស្រាយបញ្ហាសង្គ្រាមដែលអូសបន្លាយនេះបាន ។

គួរបញ្ជាក់ថា ប្រទេសអ៊ុយក្រែននៅតែស្នើឱ្យរុស្ស៊ីដកកងទ័ពចេញពីទឹកដីអ៊ុយក្រែនជាមុនសិនបើត្រូវការចរចាសន្តិភាព ប៉ុន្តែរហូតមកដល់ពេលនេះ ប្រទេសរុស្ស៊ីមិនទាន់បង្ហាញសញ្ញាថា ចង់ចរចាបញ្ចប់សង្គ្រាមជាមួយអ៊ុយក្រែនទេ ។

ដូចគ្នានេះដែរ លោក Anthony Blinken រដ្ឋមន្ត្រីក្រសួងការបរទេសសហរដ្ឋអាមេរិក ក៏បានអំពាវនាវឱ្យមានការឈប់បាញ់គ្នាផងដែរ មុននឹងរុស្ស៊ីដកកងទ័ពរបស់ខ្លួនចេញពីប្រទេសអ៊ុយក្រែន ៕ ប្រភព ៖ Mono News