បទចម្រៀង «ចុមអាអូនអត់ដេក» របស់ ជី ដេវីត ដែលជាបទ Diss Track ជាមួយ វណ្ណដា នៅលើឆាណែលយូធូបរបស់លោកបានវិលត្រឡប់មកវិញហើយក្រោយពីបាត់មួយរយៈដោយតារាចម្រៀងល្បីឈ្មោះរូបនេះធ្លាប់បានប្រាប់ថាបទនេះមានអ្នក Report ទៅម្ចាស់ដើម ខណៈយូធូបរកមិនឃើញកំហុស។
គេចាំបានថា កាលពីថ្ងៃទី២០ ខែមេសា កន្លងទៅនេះ តារាចម្រៀង ជី ដេវីត បានចេញមកបង្ហោះសារប្រាប់ពីមូលហេតុដែលបទចម្រៀងមួយបទមានចំណងជើងថា «ចុមអាអូនអត់ដេក» បាត់ចេញពីលើឆាណែលយូធូបដោយសារតែមានការ Report ទៅម្ចាស់ដើម ទាក់ទងទៅនឹងកម្មសិទ្ធិបញ្ញាផ្នែកខ្លះនៃ Loops ។
ទោះជាយ៉ាងណា ក្រោយពីបទចម្រៀងខាងលើបាត់ពីក្នុងឆាណែលយូធូបប្រមាណ២០ថ្ងៃ ពេលនេះបទចម្រៀង «ចុមអាអូនអត់ដេក» របស់ ជី ដេវីត បានវិលត្រឡប់មកវិញហើយ ក្រោយពីយូធូបរកមិនឃើញកំហុសទៅលើបទចម្រៀងមួយនេះ។ នេះបើតាមការចែករំលែកពីអ្នកគាំទ្ររបស់តារាចម្រៀងរូបនេះបង្ហោះនៅលើបណ្តាញសង្គមដោយ តារាចម្រៀង ជី ដេវីត ទទួលបានភាពស្អាតស្អំវិញហើយ។
គួរបញ្ជាក់ផងដែរថា បទ «ចុមអាអូនអត់ដេក» នៅលើឆាណែលយូធូបមកទល់ពេលនេះមានអ្នកស្តាប់ជាង៨លានដង ក្រោយពីទម្លាក់ជាង៦ខែ ដែលជាបទ Diss Track ក្រោយពី វណ្ណដា ទម្លាក់បទ «J+0 II » ៕
