កីឡាករប្រដាល់ដ៏ល្បីប្រចាំប្រទេសភូមា Dave Leduc ត្រូវបានអជ្ញាធរប្រទេសថៃហាមមិនឱ្យចូលប្រទេសគេទៀតនោះទេ ដោយរូបគេនឹងត្រូវចាប់ខ្លួន ប្រសិនបើហ៊ានឈានជើងចូលទឹកដីថៃ។

កីឡាកររូបនេះ បានបកស្រាយនៅលើបណ្តាញទំនាក់សង្គមថា៖ “សួស្តីអ្នកទាំងអស់គ្នា ខ្ញុំមិនបាននិយាយលេងសើចទេ នៅពេលដែលខ្ញុំបាននិយាយថា ខ្ញុំត្រូវបានគេហាមមិនឱ្យចូលប្រទេសថៃ! ហាហាហា

ដឹង​អត់​ថា​នេះ​អាក្រក់​ប៉ុណ្ណា? ខ្ញុំមិនដឹងថាអត្តពលិក ឬមនុស្សផ្សេងទៀតនៅក្នុងពិភពលោកដែលបានរំខានដល់ឧស្សាហកម្មមួយយ៉ាងខ្លាំងដោយហេតុថាពួកគេត្រូវបានហាមឃាត់ដោយប្រទេសទាំងមូលនោះទេ។ ឆ្កួតហើយ! បើ​ខ្ញុំ​ទៅ​ថៃ គេ​នឹង​ចាប់​ខ្ញុំ​ដាក់​គុក ដោយសារតែ​ខ្ញុំ​ជា​មនុស្ស​តែ​ម្នាក់​គត់​ក្នុង​ពិភពលោក​ដែល​មានរឿងរញ៉េរញៃ​ដើម្បី​ហៅ​ថៃ​ពី​រឿង​ឃោសនា​ក្លែងក្លាយ​របស់គេ។ រឿងនិទាននិយាយអំពី ណៃ ខាណុំទុម (Nai Khanomtom) មិនត្រឹមតែជារឿងស្រមើស្រមៃដោយគ្មានការពិតក្នុងប្រវត្តិសាស្ត្រប៉ុណ្ណោះទេ ប៉ុន្តែវាភាគច្រើនជារឿងមិនគោរពដល់ប្រវត្តិសាស្រ្ត Lethwei មីយ៉ាន់ម៉ា ហើយវានៅតែត្រូវបានប្រជាជនថៃប្រារព្ធជារៀងរាល់ឆ្នាំ!

បន្ទាប់ពីហៅរឿងទាំងនេះជាការកុហក ប្រធានការិយាល័យគណៈកម្មការកីឡាប្រដាល់ថៃបានបង្ហើបថា “គាត់នឹងប្តឹងលោក Dave Ledak ពីបទប្រមាថកិត្តិយស និងសេចក្តីថ្លៃថ្នូររបស់ Muay Thai ដែលមិនធ្លាប់មានពីមុនមក”។ គាត់និយាយត្រូវ ដោយសារវាមិនដែលកើតឡើងពីមុនមកទេ ព្រោះមនុស្សខ្លាចខ្លាំងពេក មិនហ៊ាននិយាយការពិត ព្រោះតែរបបរាជានិយមជិះជាន់។ បើ​អ្នក​ធ្វើ​ដំណើរ ឬ​ពលរដ្ឋ​ថៃ​ហ៊ាន​ចោទ​សួរ​ប្រវត្តិសាស្ត្រ ឬ​បញ្ចេញ​មតិ​ផ្ទុយ​នឹង​រដ្ឋាភិបាល នោះ​នឹង​គេនឹងជាប់​គុក។ ប្រជាជនថៃជាច្រើនបានទាក់ទងមកខ្ញុំ ហើយប្រាប់ខ្ញុំថាពួកគេរស់នៅក្នុងភាពភ័យខ្លាច។ក្រសួង​វប្បធម៌​ថៃ​ក៏​បាន​ដាក់​បញ្ចូល​ក្នុង​បញ្ជី​ខ្មៅ​ដែល​ហាម​មិន​ឲ្យ​លោក Dave Ledak ចូល​ប្រទេស​ថៃ​ផង​ដែរ។

អ្វីដែលគួរឱ្យអស់សំណើចនោះគឺពួកគេបានធ្វើការហាមឃាត់ក្រោមឈ្មោះ “Ledak” មិនមែន Leduc ទេ ដូច្នេះប្រហែលជាខ្ញុំនឹងអាចចូលទៅអន្តោប្រវេសន៍ដោយគ្មានមន្រ្តីណាស្គាល់ខ្ញុំនោះទេ? ហាហា

វាច្បាស់ណាស់ថា ប្រទេសថៃនៅតែឆ្កួត ពួកគេបានចាញ់សង្រ្គាមភូមា-សៀម ឆ្នាំ 1767 ដោយភូមាបានបំផ្លាញរាជធានី ដូច្នេះពួកគេត្រូវតែបង្កើតរឿងក្លែងក្លាយដើម្បីឱ្យពួកគេមានអារម្មណ៍ធូរស្រាល។ ប៉ុន្តែ​តើ​អ្នក​ឃើញ​មី​យ៉ាន់​ម៉ា​អបអរ​ជ័យជម្នះ​ទេ? អត់ទេ។ រឿង “ណៃ ខាណុំទុម (Nai Khanomtom)” នាំយើងត្រឡប់ទៅសម័យសង្រ្គាម ការសម្លាប់ និងការរំលោភ។ សូម​ឈប់​នឹក​ឃើញ​គ្រា​ដ៏​អាក្រក់​ទាំង​នេះ។

ប្រសិនបើប្រទេសថៃពិតជាយកចិត្តទុកដាក់ចំពោះការគោរពប្រទេសជិតខាងរបស់ពួកគេ មីយ៉ាន់ម៉ា និងកម្ពុជា ខ្ញុំកំពុងជំរុញឱ្យក្រសួងវប្បធម៌ថៃ និងគណៈកម្មការកីឡាថៃ លុបចោលការលើកឡើង និងការប្រារព្ធពិធីអំពីតួអង្គប្រឌិត «ណៃ ខាណុំទុម (Nai Khanomtom) » ក្នុងអំឡុងពេលប្រារព្ធទិវាជាតិ Muaythai ។ ចូរយើងឈប់ប្រារព្ធរឿងប្រឌិត។ពុំមានរឿងរ៉ាវនិយាយពី ណៃ ខាណុំទុម (Nai Khanomtom) នៅក្នុងឯកសារ ឬប្រភពប្រវត្តិសាស្ត្រណាមួយឡើយ រហូតដល់មុនសង្គ្រាមលោកលើកទីពីរ នៅពេលដែលស្ថាប័នវប្បធម៌ថៃចាប់ផ្តើមសរសេរប្រវត្តិសាស្ត្រឡើងវិញ។

យូរៗទៅតាមរយៈសៀវភៅ ភាពយន្ត រឿង រឿងនេះត្រូវបានផ្សព្វផ្សាយជាផ្នែកនៃប្រវត្តិសាស្ត្រប្រទេសថៃ។ និយាយឱ្យខ្លី រឿងមិនពិត ហើយបិតារបស់ Muay Thai គឺជាករណីមួយក្នុងចំណោមករណីជាច្រើនស្តីពីការកសាងវប្បធម៌នៃប្រវត្តិសាស្រ្តផ្ទាល់ខ្លួនរបស់គាត់”។

ខ្លឹមសារនៃការបង្ហោះនេះ ត្រូវបាន Dave Leduc បង្ហោះនៅលើបណ្តាញសង្គមភ្លាមៗ បន្ទាប់ពីសារព័ត៌មានថៃជាច្រើន បានចុះផ្សាយអំពីកីឡាកររូបនេះត្រូវបានដាក់ចូលបញ្ជីខ្មែរនៃសហព័ន្ធប្រដាល់ថៃ ហើយថែមទាំងនៅក្នុងបញ្ជីខ្មៅរបស់រដ្ឋាភិបាលថៃផងដែរ។

សូមជម្រាបជូនផងដែរថា Dave Leduc ត្រូវបានគេរំពឹងថានឹងត្រូវជួបកីឡាករគុនខ្មែរ ព្រំ សំណាង ឆាប់ៗនេះផងដែរ៕

ប្រភព៖ Dave Leduc

អ្នកគ្រប់គ្រងផ្នែកបញ្ញាសិប្បនិម្មិត Artificial intelligence (AI) ដូចជា លោក Elon Musk, លោក Steve Wozniak និងអ្នកគ្រប់គ្រងបច្ចេកវិទ្យាជាច្រើននាក់ទៀតបានរួមគ្នាចុះហត្ថលេខាលើសំណើមួយដើម្បីផ្អាកការអភិវឌ្ឍបញ្ញាសិប្បនិម្មិត ដែលផ្តួចផ្តើមដោយវិទ្យាស្ថាន Future of Life Institute ។ ការផ្អាកនេះក្នុងគោលបំណងឱ្យមន្ទីរពិសោធន៍ AI បញ្ឈប់ការអភិវឌ្ឍប្រព័ន្ធ AI ដែលខ្លាំងជាង GPT-4 សម្រាប់រយៈពេលយ៉ាងតិច៦ខែ ។

នៅក្នុងសំណើនេះបានសរសេរថា ប្រព័ន្ធ AI មានភាពវ័យឆ្លាតអាចប្រកួតប្រជែងជាមួយមនុស្ស ព្រមទាំងបង្កគ្រោះថ្នាក់ធ្ងន់ធ្ងរដល់សង្គម និងមនុស្សជាតិបាន ។ លើសពីនេះ AI អាចក្លាយជាអ្នកផ្លាស់ប្តូរប្រវត្តិសាស្ត្ររបស់ជីវិតនៅលើផែនដីបាន ហេតុនេះ យើងគួរតែដាក់ផែនការផ្អាកការអភិវឌ្ឍប្រព័ន្ធនេះ ។

សំណើផ្អាកការអភិវឌ្ឍបច្ចេកវិទ្យា AI រយៈពេល៦ខែ គឺដើម្បីកំណត់ច្បាប់ផ្សេងៗសម្រាប់ឱ្យការប្រើប្រាស់ AI មានសុវត្ថិភាព និងកាន់តែគួរឱ្យទុកចិត្ត ។ ការផ្អាកវាជាបណ្តោះអាសន្ននេះ គួរតែត្រូវបង្ហាញជាសាធារណៈ និងអាចពិនិត្យមើលបាន ។ បើមិនអាចប្រកាសឈប់ប្រើប្រាស់ជាបណ្តោះអាសន្នទេ រដ្ឋាភិបាលប្រទេសនានាគួរតែគ្រប់គ្រងបញ្ហានេះ ។

អ្នកចុះហត្ថលេខាលើសំណើផ្អាកការអភិវឌ្ឍ AI រួមមាន ៖
-លោក Elon Musk ជា CEO របស់ SpaceX, Tesla និង Twitter
-លោក Stuart Russell ជាសាស្ត្រាចារ្យផ្នែកវិទ្យាសាស្ត្រកុំព្យូទ័រនៃសាកលវិទ្យាល័យ California Berkeley និងជានាយកមជ្ឈមណ្ឌលប្រព័ន្ធឆ្លាតវៃ (Center for Intelligent Systems) និងជាអ្នកចូលរួមនិពន្ធសៀវភៅសិក្សា «Artificial Intelligence: a Modern Approach» (បញ្ញាសិប្បនិម្មិត ៖ វិធីសាស្ត្រទំនើប)
-លោក Evan Sharp ជាសហស្ថាបនិក Pinterest
-លោកស្រី Rachel Bronson ជា CEO របស់អង្គការ Bulletin of the Atomic Scientists
-លោក Steve Wozniak ជាសហស្ថាបនិកក្រុមហ៊ុន Apple និង
-Yuval Noah Harari អ្នកនិពន្ធ និងជាសាស្ត្រាចារ្យនៃសាកលវិទ្យាល័យ Hebrew ទីក្រុងយេរូសាឡឹម
ប្រភព ៖ beartai

រដ្ឋធានីកៀវ៖ ស្របពេលប្រធានាធិបតីចិន កំពុងតែស្ថិតក្នុងរដ្ឋធានីមូស្គូ ជួបពិភាក្សា និង ចុះហត្ថលេខាលើភពជាដៃគូយុទ្ធសាស្រ្ដ ជាមួយនឹងសមភាគីរុស្ស៊ី លោក វ៉្លាឌីមៀ ពូទីន នោះ លោកនាយករដ្ឋមន្រ្ដីជប៉ុន បានធ្វើដំណើរទៅជួបមេដឹកនាំអ៊ុយក្រែន ដោយការបំភាន់យន្ដហោះធ្វើដំណើរ និង ទិសដៅ មុននឹងធ្វើដំណើរតាមរថភ្លើង ទៅដល់រដ្ឋធានីកៀវ។

សារព័ត៌មាន The Japan Times បានចេញផ្សាយ កាលពីព្រឹក ថ្ងៃពុធ ទី២២ ខែមីនា ឆ្នាំ២០២៣ ថា ក្រោយពេលលោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានចាកចេញពីប្រទេសឥណ្ឌា នោះមក យន្ដហោះរបស់គាត់ បានចុះចតយន្ដហោះ នៅក្នុងប្រទេសប៉ូឡូញ មុននឹងបន្ដដំណើរតាមរថភ្លើង ទៅដល់រដ្ឋធានីកៀវ នៅរសៀល ថ្ងៃអង្គារ វេលានៅក្នុងតំបន់ ដើម្បីជួបជាមួយនឹងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelenskyy)។ ដំណើរបំពេញទស្សនកិច្ចដ៏កម្រ និង មិនបានប្រកាសជាមុននេះរបស់លោក គីស៊ីដា បានគូសបញ្ជាក់ អំពីការគាំទ្ររបស់ជប៉ុន ដល់ប្រទេសអឺរ៉ុបមួយនេះ ដែលកំពុងតែប្រឈមមុខនឹងការបន្ដលុកលុយរបស់រុស្ស៊ី។

នៅក្នុងជំនួប នៅកណ្ដាលរដ្ឋធានីកៀវ មេដឹកនាំអ៊ុយក្រែន បានហៅគាត់ «ជាអ្នកការពារសណ្តាប់ធ្នាប់អន្តរជាតិដ៏មានឥទ្ធិពលយ៉ាងពិតប្រាកដ និង ជាមិត្តដ៏យូរលង់»របស់ប្រទេសអ៊ុយក្រែន។ លោកនាយករដ្ឋមន្រ្ដីជប៉ុន បានក្លាយជាមេដឹកនាំចុងក្រោយរបស់ក្រុមប្រទេស G7 បានធ្វើដំណើរទៅកាន់ជួបប្រធានាធិបតីអ៊ុយក្រែន ហើយលោក ហ្សេឡែនស្គី បានអះអាង ថា  គាត់នឹងចូលកិច្ចប្រជុំកំពូលរបស់ G7 នៅក្នុងខែឧសភា នៅក្នុងទីក្រុងហ៊ីរ៉ូស៊ីម៉ា (Hiroshima) តាមវីដេអូលីង ក្រោយពេលលោក គីស៊ីដា បានអញ្ជើញ ខណៈជប៉ុន ធ្វើជាប្រធាន G7 នៅឆ្នាំ២០២៣នេះ។

លោកនាយករដ្ឋមន្រ្ដីជប៉ុន បានបញ្ជាក់ ថា ទឹកប្រាក់ចំនួន ៣០លានដុល្លារ នឹងត្រូវផ្ដល់ជំនួយយោធាមិនមានគ្រោះថ្នាក់ ដល់អ៊ុយក្រែន តាមរយៈមូលនិធិរបស់អង្គការណាតូ។ ជាមួយគ្នានេះ ជប៉ុន ដែលមានគោលការណ៍ណែនាំយ៉ាងតឹងរ៉ឹង ហាមឃាត់នូវការនាំចេញអាវុធយ៉ាងមានប្រសិទ្ធភាព បានផ្តល់ជំនួយដល់អ៊ុយក្រែន នៅក្នុងទម្រង់ជាយន្តហោះគ្មានមនុស្សបើក  ដ្រូន អាវកាក់ការពារគ្រាប់កាំភ្លើង មួកសុវត្ថិភាព តង់ និង ការផ្គត់ផ្គង់ផែ្នកវេជ្ជសាស្រ្ត។

លោក ហ៊្វូមីអូ គីស៊ីដា នាយករដ្ឋមន្រ្ដីជប៉ុន បានថ្លែង ខណៈកំពុងតែធ្វើដំណើរ នៅក្នុងទីក្រុងប៊ូចា ជាទីដែលមានការសម្លាប់យ៉ាងរង្គាលនោះ ថា «ខ្ញុំសូមចូលរួមរំលែកទុក្ខដល់ជនរងគ្រោះទាំងអស់ និង អ្នករបួស នៅក្នុងនាមប្រជាជនជប៉ុន។ ប្រទេសជប៉ុន នឹងបន្តជួយដល់ប្រទេសអ៊ុយក្រែន ជាមួយនឹងការខិតខំប្រឹងប្រែងដ៏ធំធេងបំផុត សម្រាប់ទទួលបាននូវសន្តិភាព ត្រឡប់មកវិញ»។

ក្រសួងការបរទេសជប៉ុន បានបញ្ជាក់ កាលពីព្រឹក ថ្ងៃអង្គារ ថា លោកនាយករដ្ឋមន្រ្ដី ហ៊្វូមីអូ គីស៊ីដា នឹងបង្ហាញ អំពីសាមគ្គីភាព និង ការគាំទ្រឥតងាករេរបស់ជប៉ុន សម្រាប់អ៊ុយក្រែន។ ជាមួយគ្នានេះ បណ្ដាប្រទេសជាសមាជិក G7 រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក បានប្រឆាំងយ៉ាងដាច់ខាត ចំពោះការឈ្លានពានរបស់រុស្ស៊ី និង ការប៉ុនប៉ងឯកតោភាគី នៅក្នុងការផ្លាស់ប្តូរស្ថានភាពបច្ចុប្បន្ន ដោយការប្រើប្រាស់កម្លាំងយោធា។

បណ្ដាញទូរទស្សន៍អន្ដរជាតិរបស់ជប៉ុន  NHK (អ៊ិនហាសកា) បានរាយការណ៍ ថា លោកនាយករដ្ឋមន្រ្ដីជប៉ុន ក្រោយពេលទៅបំពេញទស្សនា នៅប្រទេសឥណ្ឌា ក៏បានធ្វើតាមយន្ដហោះជួលដ៏សម្ងាត់ ជំនួសឱ្យយន្តហោះតាមស្តង់ដាររបស់រដ្ឋាភិបាល ហើយបានចុះចត នៅក្នុងប្រទេសប៉ូឡូញ មុននឹងធ្វើដំណើរទៅដល់ប្រទេសអ៊ុយក្រែន។

យន្តហោះជួលនោះ បានចាកចេញ ពីអាកាសយានដ្ឋានហាណេដា (Haneda) ទីក្រុងតូក្យូ ប្រទេសជប៉ុន កាលពីវេលាម៉ោងប្រហែល៨យប់ ថ្ងៃអាទិត្យ គឺប្រហែលជា មានរយៈពេល៣ម៉ោង មុនពេលយន្តហោះរបស់រដ្ឋាភិបាល ដឹកលោក គីស៊ីដា ចេញដំណើរទៅកាន់ប្រទេសឥណ្ឌា។ ប៉ុន្ដែក្រោយពេលបញ្ចប់នូវព្រឹត្តិការណ៍តាមការគ្រោងទុក នៅក្នុងប្រទេសឥណ្ឌា រួចហើយ លោកនាយករដ្ឋមន្ត្រី ក៏បានឡើងជិះយន្តហោះជួល ដែលរង់ចាំយ៉ាងសម្ងាត់ នៅព្រឹកព្រលឹម ថ្ងៃអង្គារ វេលានៅប្រទេសជប៉ុន។ ចំណែកយន្ដហោះនោះ មានកៅអីប្រហែល ត្រឹមតែ សម្រាប់មនុស្ស១០នាក់ជិះ ដោយវាមានលក្ខណៈដូចគ្នាទៅនឹងម៉ូដែលយន្ដហោះ ធ្លាប់ប្រើប្រាស់ដោយតារា Baseball របស់ជប៉ុន គឺលោក ស៊ូហេ អូតានិ (Shohei Ohtani) ធ្វើដំណើរចាកចេញពីសហរដ្ឋអាមេរិក មកកាន់ប្រទេសជប៉ុន កាលពីដើមខែមីនា។

ក្រសួងការបរទេសជប៉ុន បានបញ្ជាក់ ថា លោកនាយករដ្ឋមន្រ្ដី គីស៊ីដា នឹងត្រូវវិលត្រឡប់ទៅកាន់ប្រទេសប៉ូឡូញវិញ នៅថ្ងៃពុធ ក្រោយពេលជួបពិភាក្សាជាមួយនឹងប្រធានាធិបតីអ៊ុយក្រែន លោក ហ្សេឡែនស្គី។ លោក គីស៊ីដា នឹងជួបជាមួយមន្ត្រី មកពីប្រទេសផ្សេងៗទៀត ដើម្បី ពង្រឹងនូវកិច្ចសហប្រតិបត្តិការទ្វេភាគី និង កិច្ចសហប្រតិបត្ដិការជាលក្ខណៈអន្ដរជាតិ។

ដំណើរទស្សនកិច្ចរបស់លោក គីស៊ីដា បានកើតឡើង រយៈពេលជិត១ខែ ក្រោយពេលប្រធានាធិបតីសហរដ្ឋអាមេរិក លោក ចូ បៃដិន បានធ្វើដំណើរទៅកាន់ក្រុងកៀវ ដោយស្ងាត់ៗ  ដើម្បីជួបជាមួយនឹងប្រធានាធិបតីអ៊ុយក្រែន។ លោកប្រធានាធិបតី បៃដិន បានជិះយន្ដហោះ Air Force One ចាកចេញពីសហរដ្ឋអាមេរិក មកចុះចាក់សាំង នៅក្នុងប្រទេសអាល្លឺម៉ង់ ហើយបន្ដដំណើរមកកាន់ប្រទេសប៉ូឡូញ មុននឹងធ្វើដំណើរតាមរថភ្លើង រយៈពេល១០ម៉ោង ទម្រាំទៅដល់រដ្ឋធានីកៀវ៕

រដ្ឋធានីមីនស្ក៍(Minsk)៖ ក្រោយពេលអ្នកធ្វើអត្ថាធិប្បាយនយោបាយរបស់បេឡារុស បានប្រើប្រាស់សង្គ្រាមវោហារសាស្រ្ដ គំរាមកម្ទេច ដល់បណ្ដាប្រទេសជាសម្ពន្ធមិត្តរបស់អង្គការណាតូណាមួយ បង្កជម្លោះដល់ក្រុងមីនស្ក៍ នោះមក ឥឡូវនេះ ប្រេសិតរបស់រុស្ស៊ី បានអះអាង អំពីអាវុធនុយក្លេអ៊ែរ នឹងត្រូវបញ្ជូនទៅដល់ប្រទេសជាសម្ពន្ធមិត្តរបស់ក្រុងមូស្គូ បើទោះជាសហរដ្ឋអាមេរិក និង អឺរ៉ុប បានបង្ហាញនូវការព្រួយបារម្ភយ៉ាងណាក្ដី។

សារព័ត៌មាន Arab News បានចេញផ្សាយ កាលពីព្រឹក ថ្ងៃចន្ទ ទី៣ ខែមេសា ថា លោក បូរីស ហ្គ្រីស្លូវ (Boris Gryzlov) ឯកអគ្គរដ្ឋទូតរុស្ស៊ី ប្រចាំ នៅប្រទេសបេឡារុស បានបញ្ជាក់ កាលពីថ្ងៃអាទិត្យ ថា អាវុធនុយក្លេអ៊ែរតាក់ទិករបស់រុស្ស៊ី នឹងត្រូវដាក់ពង្រាយ នៅជិតព្រំដែនប្រទេសបេឡារុស ជាប់ជាមួយនឹងព្រំដែនរបស់អង្គការណាតូ។ ការលើកឡើងរបស់ប្រេសិត រុស្ស៊ី រូបនេះ បានកើតឡើង ចំពេលមានភាពតានតឹង កាន់តែខ្លាំងឡើង រវាង រុស្ស៊ី និង លោកខាងលិច ជុំវិញសង្គ្រាមរបស់ក្រុងមូស្គូ នៅលើទឹកដីរបស់ប្រទេសអ៊ុយក្រែន។

លោកឯកអគ្គរដ្ឋទូត រូបនេះ បានធ្វើអត្ថាធិប្បាយ ស្របតាមសេចក្តីថ្លែងការណ៍របស់ប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin) អំពីផែនការដាក់អាវុធនុយក្លេអ៊ែរយុទ្ធសាស្ត្រ នៅលើទឹកដីប្រទេសជិតខាង និង ជាសម្ពន្ធមិត្តរបស់រុស្ស៊ី។ សេចក្តីប្រកាសនេះបានកត់សម្គាល់ អំពីការប៉ុនប៉ងថ្មីមួយទៀតរបស់មេដឹកនាំរុស្ស៊ី ដើម្បីកាត់បន្ថយនូវការគំរាមកំហែងនុយក្លេអ៊ែរ សម្រាប់ការបំបាក់ទឹកចិត្តរបស់លោកខាងលិច មិនឱ្យគាំទ្រដល់ប្រទេសអ៊ុយក្រែន។

លោក ពូទីន បានបញ្ជាក់ ថា ការសាងសង់កន្លែងផ្ទុកអាវុធនុយក្លេអ៊ែរយុទ្ធសាស្ត្រ នៅក្នុងប្រទេសបេឡារុស នឹងបញ្ចប់ នៅត្រឹមថ្ងៃទី១ ខែកក្កដា ឆ្នាំ២០២៣។ ជាមួយគ្នានេះដែរ រុស្ស៊ី នឹងជួយធ្វើឲ្យយន្តហោះចម្បាំងរបស់បេឡារុស កាន់តែទំនើប អាចផ្ទុកអាវុធនុយក្លេអ៊ែរបាន។

រុស្ស៊ី និង បេឡារុស ជាប្រទេសជិតខាង ហើយក៏ជាសម្ពន្ធមិត្តដ៏ជិតស្និទ្ធនឹងគ្នា បានបង្កើតនូវកិច្ចព្រមព្រៀងមួយ មានទំនាក់ទំនងយ៉ាងខ្លាំង លើវិស័យសេដ្ឋកិច្ច នយោបាយ និងយោធា។ ទន្ទឹមគ្នានេះ រុស្សី បានប្រើប្រាស់ទឹកដីបេឡារុស ជាទីតាំងឈរជើង សម្រាប់ការឈ្លានពានទៅលើប្រទេសអ៊ុយក្រែន។ បច្ចុប្បន្ន រុស្ស៊ី នៅតែបន្ដរក្សាកម្លាំងទាហាន និង អាវុធ នៅក្នុងប្រទេសជាសម្ពន្ធមិត្តនឹងគ្នាមួយនេះ។

លោកឯកអគ្គរដ្ឋទូតរុស្ស៊ី គ្រីស្លូវ កាលពីថ្ងៃអាទិត្យ បានធ្វើអត្ថាធិប្បាយមួយ ត្រូវបានចាក់ផ្សាយ នៅលើកញ្ចក់ទូរទស្សន៍របស់បេឡារុស ដោយបានលើកឡើង ថា អាវុធនុយក្លេអ៊ែររបស់រុស្ស៊ី នឹងត្រូវរំកិលខ្លួនទៅជិតព្រំដែនខាងលិច នៃរដ្ឋសហភាពរបស់យើង។ សកម្មភាពបែបនេះ នឹងពង្រីកនូវសមត្ថភាពការពារជាតិរបស់យើង ហើយនឹងធ្វើឡើង ដោយមិនគិត អំពីការរិះគន់ ពីទ្វីបអឺរ៉ុប និង សហរដ្ឋអាមេរិក។

បេឡារុស មានព្រំដែនរួមគ្នា ប្រវែង ១២៥០គីឡូម៉ែត្រ ជាប់ជាមួយនឹងប្រទេសចំនួន៣ ជាសមាជិករបស់អង្គការណាតូ រួមមាន ឡាតវី (Latvia) លីទុយអានី (Lithuania) និង ប៉ូឡូញ។

អាវុធនុយក្លេអ៊ែរតាក់ទិកនេះ មានគោលបំណងបំផ្លាញកងទ័ពរបស់សត្រូវ និង គ្រឿងសព្វាវុធ នៅលើសមរភូមិ ហើយអាចបាញ់បាន រយៈចម្ងាយខ្លី។ ប៉ុន្ដែផលប៉ះពាល់របស់វា នៅមានកម្រិតទាបជាងក្បាលគ្រាប់នុយក្លេអ៊ែរ បំពាក់ជាមួយនឹងមីស៊ីលយុទ្ធសាស្ត្រ បាញ់រយៈចម្ងាយឆ្ងាយ ដោយវាមានសមត្ថភាព អាចកម្ទេចទីក្រុងទាំងមូល។ ដោយឡែក ការដាក់ពង្រាយអាវុធនុយក្លេអ៊ែរតាក់ទិករបស់រុស្ស៊ី នៅលើទឹកដីរបស់ប្រទេសបេឡារុស នឹងកាន់តែខិតជិតគោលដៅ ដែលមានសក្តានុពល នៅក្នុងអ៊ុយក្រែន និង សមាជិកណាតូ នៅអឺរ៉ុបខាងកើត និង កណ្តាល។

លោក អាឡិចសាន់ដឺរ លូកាសែនកូ (Alexander Lukashenko) មេដឹកនាំផ្ដាច់ការរបស់បេឡារុស្ស៊ី បានបញ្ជាក់ កាលពីថ្ងៃសុក្រសប្ដាហ៍មុន ថា អាវុធនុយក្លេអ៊ែរយុទ្ធសាស្ត្រមួយចំនួនរបស់រុស្ស៊ី អាចនឹងត្រូវដាក់ពង្រាយ នៅក្នុងប្រទេសបេឡារុស រួមជាមួយនឹងផ្នែកមួយ នៃឃ្លាំងអាវុធនុយក្លេអ៊ែររបស់រុស្ស៊ី ផងដែរ៕

ប្រទេសវៀតណាម ៖ ទុរេនដែលបានដាំដុះដំបូងនៅប្រទេសវៀតណាម ប្រមាណ៥០០គីឡូក្រាមត្រូវបាននាំចេញពីទីក្រុងហូជីមិញទៅកាន់អាកាសយានដ្ឋានអន្តរជាតិណាននីង វូស៊ូ និងតំបន់ស្វយ័ត Guangxi Zhuang ស្ថិតនៅក្រោមកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់ Regional Comprehensive Economic Partnership (RCEP) ។

តាំងពីកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់ (RCEP) ចាប់អនុវត្តនៅថ្ងៃទី១ ខែមករា ឆ្នាំ២០២២ ក្វាងស៊ីបានក្លាយជាមជ្ឈមណ្ឌលកណ្តាលនៃកិច្ចសហប្រតិបត្តិការរវាងប្រទេសចិន និងប្រទេសជាសមាជិកកិច្ចព្រមព្រៀង RCEP ក្នុងនោះរួមមាន ១៥ប្រទេសនៅតំបន់អាស៊ីប៉ាស៊ីហ្វិក និង១០ប្រទេសជាសមាជិកអាស៊ាន រួមទាំង៥ប្រទេសជាដៃគូពាណិជ្ជកម្មចម្បង រួមមាន ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ។

មន្ត្រីគយប្រចាំតំបន់បញ្ជាក់ថា ដំណាក់កាលត្រួតពិនិត្យរបស់ការិយាល័យគយធ្វើតាមគោលនយោបាយ «ការពិនិត្យ២ជំហាន» ដើម្បីពិនិត្យមើលថា ទំនិញទាំងអស់ទទួលបានការអនុញ្ញាតឱ្យនាំចូលឬអត់ ហើយទំនិញទទួលបានការអនុញ្ញាតឱ្យលក់ ឬចែកចាយក្នុងតំបន់ដែលគយកំណត់ឬអត់ ។

នាយកផ្នែកទីផ្សាររបស់ក្រុមហ៊ុន Guangxi Haohang E-commerce បានថ្លែងថា ការិយាល័យគយបានធ្វើការប្រកបដោយវិជ្ជាជីវៈ និងយល់ពីលក្ខខណ្ឌនៃការនាំចូល-នាំចេញអាហារស្រស់ ហើយជួយឱ្យដំណាក់កាលត្រួតពិនិត្យងាយស្រួល និងអាចបត់បែនបាន ។

ការិយាល័យគយបានបើកច្រកពិសេសសម្រាប់ការពិនិត្យការនាំចូល-នាំចេញផ្លែឈើ និងផ្តល់សេវាកម្មពេញលេញដើម្បីឱ្យប្រាកដចិត្តថា ទុរេនស្រស់របស់វៀតណាមអាចឆ្លងកាត់ការពិនិត្យរបស់ការិយាល័យគយបានយ៉ាងឆាប់រហ័ស និងរលូនផងដែរ ៕ ប្រភព ៖ agrinewsthai

រាជរដ្ឋាភិបាល​កម្ពុជា បាន​សម្រេច​ផ្តល់​ប្រាក់ឧបត្ថម្ភ ៥ម៉ឺនរៀល​ក្នុងឱកាស​ពិធីបុណ្យចូលឆ្នាំថ្មី​ប្រពៃណី​ជាតិ និង​ ៥ម៉ឺនរៀល​ ក្នុងឱកាស​ពិធីបុណ្យ​ភ្ជុំបិណ្ឌ​ ឆ្នាំ២០២៣ ជូនដល់មន្រ្តី​រាជការស៊ីវិល កងកម្លាំងប្រដាប់អាវុធ។

យោងតាមអនុក្រឹត្យ​ចុះ​ហត្ថលេខាដោយសម្តេចតេជោ ហ៊ុន សែន ឱ្យដឹងថា ការ​បើកផ្តល់​ប្រាក់ឧបត្ថម្ភ​នេះ ត្រូវ​អនុវត្ត​ឱ្យបាន​មុន​ថ្ងៃចូលឆ្នាំថ្មី​ប្រពៃណីជាតិ ពោលគឺ​ក្រសួង​សេដ្ឋកិច្ច​ និង​ហិរញ្ញវត្ថុ និង​ក្រសួង​ស្ថាប័ន​សាម៉ី ត្រូវរៀបចំ​បើកផ្តល់​ជាបុរេប្រទាន​សម្រាប់​ប្រាក់​ឧបត្ថម្ភ​នេះ ដំណាលគ្នា​ជាមួយ​នឹង​ការបើក​ផ្តល់ប្រាក់បៀវត្សប្រចាំខែមេសាតែមួយលើក​ឱ្យបានដល់សាមី​ជន​ម្នាក់ៗយ៉ាងយូរបំផុត​ត្រឹមថ្ងៃទី១៣ ខែមេសា ឆ្នាំ​២០២៣ និង​ប្រាក់​ឧបត្ថម្ភក្នុងឱកាស​បុណ្យភ្ជុំបិណ្ឌដំណាល​គ្នាជាមួយនឹងការបើកផ្តល់ប្រាក់បៀវត្សប្រចាំខែតុលាតែមួយលើក ឱ្យបានដល់សាមីជនម្នាក់ៗ​យ៉ាងយូរបំផុត​ត្រឹមថ្ងៃទី១២ ខែតុលា ឆ្នាំ​២០២៣៕

បរទេស៖ នៅក្នុងសេចក្តីថ្លែងការណ៍ថ្មីមួយ Nokia បាននិយាយថា បណ្តាញ 4G នឹងត្រូវបានដំណើរការពីស្ថានីយអង់តែនមួយ ដែលផ្ទុកនៅខាងក្នុងយាន Nova-C lunar lander ដែលរចនាដោយក្រុមហ៊ុនអាមេរិក Intuitive Machines រួមផ្សំជាមួយនឹងមនុស្សយន្តដែលដើរដោយខ្លួនឯង ដែលដំណើរការដោយថាមពលពន្លឺព្រះអាទិត្យ។ ទូរទស្សន៍ CNBC បានរាយការណ៍ នៅថ្ងៃទី ៣០ ខែមីនាថា ទាំងអស់នឹងត្រូវបានបាញ់បង្ហោះដោយគ្រាប់រ៉ុក្កែត SpaceX នៅចុងឆ្នាំ ២០២៣។ បន្ទាប់ពីចុះចត ការតភ្ជាប់ 4G LTE នឹងត្រូវបានបង្កើតឡើងរវាងអ្នកចុះចត និងយានរុករក។

ប្រព័ន្ធ 4G របស់ Nokia នឹងចុះចតនៅតំបន់ទំនាប Shackleton តាមបណ្តោយគែមខាងត្បូងនៃព្រះច័ន្ទ។ សាជីវកម្មទូរគមនាគមន៍ពហុជាតិហ្វាំងឡង់បានប្តេជ្ញាចិត្តចំពោះ NASA ថាបច្ចេកវិទ្យានេះអាចទប់ទល់នឹងលក្ខខណ្ឌធ្ងន់ធ្ងរនៅក្នុងលំហ។
ផែនការរបស់ NASA គឺប្រើប្រាស់បណ្តាញ 4G នៅក្នុងកម្មវិធី Artemis ដើម្បីបញ្ជូនអវកាសយានិកត្រឡប់ទៅឋានព្រះច័ន្ទជាលើកដំបូង ចាប់តាំងពីបេសកកម្ម Apollo ១៧ នៅឆ្នាំ ១៩៧២។

គោលដៅគឺដើម្បីបង្ហាញថាបណ្តាញរបស់ផែនដីអាចបំពេញតម្រូវការទំនាក់ទំនងនៃបេសកកម្មអវកាសនាពេលអនាគត។ Nokia បានបន្ថែមទៀតថា បណ្តាញ 4G របស់ខ្លួននឹងអនុញ្ញាតឱ្យអវកាសយានិកធ្វើការទំនាក់ទំនងគ្នាទៅវិញទៅមក និងជាមួយមជ្ឈមណ្ឌលបញ្ជា ក៏ដូចជារុករកយានអវកាសពីចម្ងាយក្នុងពេលវេលាជាក់ស្តែង និងចាក់ផ្សាយវីដេអូនិយមន័យខ្ពស់ត្រឡប់ទៅផែនដីវិញ។ ប្រភព៖vnexpress

ប្រទេសជប៉ុន ៖ តាមព័ត៌មានពីមន្ត្រីជប៉ុនបង្ហាញថា សាលារៀនប្រមាណ៤៥០កន្លែងនៅទូទាំងប្រទេសបានបិទទ្វារជាបន្តបន្ទាប់ជារៀងរាល់ឆ្នាំ ហើយចាប់ពីឆ្នាំ២០០២ ដល់ឆ្នាំ២០២០ មានសាលាជិត៩.០០០កន្លែងបានបិទទ្វារជាផ្លូវការ ។ វាជារឿងពិបាកក្នុងការទាក់ទាញឱ្យពលរដ្ឋចំណូលថ្មី ឬពលរដ្ឋមានអាយុតិចមករស់នៅក្នុងតំបន់ឆ្ងាយៗ ដោយសារអត្រាកំណើតធ្លាក់ចុះនៅប្រទេសជប៉ុនលើសពីការរំពឹងទុក ហើយការបិទទ្វារសាលារៀនកើនឡើងយ៉ាងឆាប់រហ័ស ។

នៅភូមិ Ten-ei ស្ថិតនៅលើភ្នំក្នុងខេត្តហ្វូគូស៊ីម៉ា ដែលមានពលរដ្ឋរស់នៅចំនួន៥.០០០នាក់ គឺជាភូមិមួយដែលជួបបញ្ហាការបិទទ្វារសាលារៀន ។ ជាក់ស្តែង អនុវិទ្យាល័យយូម៉ូតូនៅភូមិនេះ មានកូនសិស្សត្រឹមតែ២នាក់ប៉ុណ្ណោះ ។ ពលរដ្ឋរស់នៅក្នុងភូមិបានផ្លាស់ប្តូរទីលំនៅ ស្របពេលអត្រាកំណើតធ្លាក់ចុះ ខណៈពលរដ្ឋមានអាយុច្រើនកាន់តែកើនឡើង ។ នៅពេលគ្មានកូនសិស្សមកចុះឈ្មោះចូលរៀន សាលារៀនដែលបានដំណើរការអស់រយៈពេល៧៦ឆ្នាំក្នុងភូមិនេះ បានបិទទ្វារនៅថ្ងៃទី៣១ ខែមីនា ឆ្នាំ២០២៣ ។

បច្ចុប្បន្ន ភូមិ Ten-ei មានពលរដ្ឋអាយុក្រោម១៨ឆ្នាំត្រឹមតែ១០%ប៉ុណ្ណោះ ។ កាលពីឆ្នាំ១៩៥០ ភូមិនេះធ្លាប់មានពលរដ្ឋរស់នៅជាង១ម៉ឺននាក់ ដែលពួកគេប្រកបរបរកសិកម្ម និងធ្វើការរោងចក្រ ប៉ុន្តែការខ្វះភាពងាយស្រួល ហើយភូមិនេះស្ថិតនៅឆ្ងាយពីគេនោះបានធ្វើឱ្យពលរដ្ឋក្នុងភូមិផ្លាស់ប្តូរទីលំនៅជាបន្តបន្ទាប់ ។

ក្រៅពីនេះ ចំនួនពលរដ្ឋក្នុងភូមិបានធ្លាក់ចុះយ៉ាងឆាប់រហ័ស បន្ទាប់ពីកើតគ្រោះមហន្តរាយរលកយក្សស៊ូណាមិ កាលពីថ្ងៃទី១១ ខែមីនា ឆ្នាំ២០១១ ដែលធ្វើឱ្យរោងចក្រថាមពលនុយក្លេអ៊ែរ Fukushima មានទីតាំងស្ថិតនៅឆ្ងាយពីភូមិ១០០គីឡូម៉ែត្រជួបបញ្ហាការចម្លងរោគវិទ្យុសកម្ម ។

សារព័ត៌មាន Reuters រាយការណ៍ថា អត្រាកំណើតធ្លាក់ចុះ គឺជាបញ្ហាក្នុងតំបន់នៅអាស៊ី ខណៈការចាយវាយលើការចិញ្ចឹមកូនបានធ្វើឱ្យអត្រាកំណើតនៅប្រទេសជិតខាងដូចជា កូរ៉េខាងត្បូង និងចិនធ្លាក់ចុះផងដែរ ប៉ុន្តែនៅជប៉ុនមានសភាពធ្ងន់ធ្ងរជាងគេ ។ អត្រាកំណើតនៅជប៉ុនបានធ្លាក់ចុះនៅក្រោម៨០ម៉ឺននាក់នៅឆ្នាំ២០២២ ហើយវាជាការធ្លាក់ចុះដែលមិនធ្លាប់ជួបពីមុនមក និងលឿនជាងរដ្ឋាភិបាលរំពឹងទុករយៈពេល៨ឆ្នាំទៅទៀត ។

ចំណែកនាយករដ្ឋមន្ត្រីជប៉ុន លោក Fumio Kishida បានសន្យាថា នឹងប្រើប្រាស់វិធានការថ្មីដើម្បីបង្កើនអត្រាកំណើត រួមទាំងបង្កើនថវិកាទ្វេដងសម្រាប់គោលនយោបាយទាក់ទងនឹងកុមារផងដែរ ។ លើសពីនេះ លោក Fumio Kishida ក៏បានផ្តោតសំខាន់លើការថែរក្សាបរិស្ថានអប់រំ ប៉ុន្តែរហូតមកដល់បច្ចុប្បន្ន គោលនយោបាយនេះជួយបានតែបន្តិចបន្តួចប៉ុណ្ណោះ ៕ ប្រភព ៖ TNN World