ប្រទេសអាល្លឺម៉ង់ ៖ កាលពីថ្ងៃទី១៦ ខែមេសា ប្រធានាធិបតីឥណ្ឌូណេស៊ី លោក Joko Widodo បានសហការជាមួយនាយករដ្ឋមន្ត្រីអាល្លឺម៉ង់ លោក Olaf Scholz បើកការតាំងពិព័រណ៍ពាណិជ្ជកម្មឈ្មោះថា «Hannover» លើកទី៧៥ ។ ការតាំងពិព័រណ៍នេះ គឺជាការតាំងពិព័រណ៍ដ៏ធំបំផុតក្នុងពិភពលោក ហើយប្រទេសទាំងពីរបានយកឱកាសនេះប្រកាសពង្រីកកិច្ចសហការផ្នែកសេដ្ឋកិច្ចរួមគ្នានាថ្ងៃអនាគត ។

នាយករដ្ឋមន្ត្រីអាល្លឺម៉ង់ លោក Olaf Scholz បានថ្លែងថា ពេលតំបន់អាស៊ានបានដើរតួនាទីសំខាន់នៅលើពិភពលោក ប្រទេសឥណ្ឌូណេស៊ីក៏បានដើរតួនាទីសំខាន់នៅលើពិភពលោកកាន់តែខ្លាំង ។ ប្រទេសអាល្លឺម៉ង់មានគោលដៅផ្តល់ជំនួយដល់ក្រុមប្រទេសមានរ៉ែសំខាន់ៗដូចជា Chile, Namibia ក្នុងនោះរួមទាំងឥណ្ឌូណេស៊ីផងដែរ ដើម្បីជួយឱ្យប្រទេសទាំងនេះមានហេដ្ឋារចនាសម្ព័ន្ធល្អប្រសើរ ហើយពុំចាំបាច់ទទួលជំនួយពីប្រទេសចិន ។

មេដឹកនាំអាល្លឺម៉ង់ គឺជាមេដឹកនាំម្នាក់ក្នុងចំណោមមេដឹកនាំដែលគាំទ្រកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប និងឥណ្ឌូណេស៊ី ។ ប្រទេសអាល្លឺម៉ង់ និងឥណ្ឌូណេស៊ីបានចរចារឿងនេះជាមួយគ្នាតាំងពីឆ្នាំ២០១៦ មកម៉្លេះ ។ ហេតុនេះ មេដឹកនាំអាល្លឺម៉ង់បានសន្យាថា កិច្ចព្រមព្រៀងនេះនឹងទទួលបានជោគជ័យ ។

ការពិព័រណ៍ពាណិជ្ជកម្ម «Hannover» ប្រចាំឆ្នាំ២០២៣ បានរៀបចំឡើងនៅក្រោមគំនិត «ការផ្លាស់ប្តូរផ្នែកឧស្សាហកម្ម និងបង្កើតភាពខុសប្លែកគ្នា» ដោយមានក្រុមហ៊ុនវិស្វកម្ម, ឧស្សាហកម្មអគ្គិសនី និងឌីជីថល រួមទាំងឧស្សាហកម្មថាមពលប្រមាណ៤.០០០ក្រុមហ៊ុនបានមកចូលរួមការតាំងបង្ហាញនូវបច្ចេកវិទ្យាថ្មីៗ ។ ចំណែកប្រធានបទសំខាន់ៗក្នុងឆ្នាំ២០២៣នេះ រួមមាន កាត់បន្ថយការបញ្ចេញកាបូន, សុវត្ថិភាពបច្ចេកវិទ្យា, បញ្ញាសិប្បនិម្មិត និងកម្មវិធីសិក្សាដោយខ្លួនឯង ៕ ប្រភព ៖ TNN World

សហរដ្ឋអាមេរិក ៖ គណនី Twitter ជាផ្លូវការរបស់ការិយាល័យស៊ើបអង្កេតកណ្តាលអាមេរិក (FBI) នៅទីក្រុង Denver បានជូនដំណឹងទៅកាន់ពលរដ្ឋទាំងអស់ ចៀសវាងការប្រើប្រាស់កន្លែងសាកថ្មីហ្វ្រីនៅតាមទីកន្លែងសាធារណៈ ព្រោះអាចមានជនខិលខូចឆ្លៀតឱកាសនេះបញ្ចេញមេរោគផ្សេងៗ ឬដំឡើងកម្មវិធីចូលក្នុងទូរស័ព្ទដៃ ។ ពួកគេអាចចូលទៅកាន់ទូរស័ព្ទនានាដែលកំពុងសាកថ្ម មិនថាទូរស័ព្ទស្មាតហ្វូន ថេបប្លេត និងកុំព្យូទ័រ ។

ការដាស់តឿនរបស់ការិយាល័យស៊ើបអង្កេតកណ្តាល ដោយសារខ្លាចមានជនខិលខូចបង្កើតការប្រើប្រាស់រន្ធ USB នៅកន្លែងសាធារណៈដើម្បីបញ្ចេញមេរោគ និងដំឡើងកម្មវិធីទៅក្នុងឧបករណ៍ប្រើប្រាស់ផ្សេងៗ ។ ដូច្នេះ ការិយាល័យស៊ើបអង្កេតកណ្តាលបានដាស់តឿនថា ដើម្បីសុវត្ថិភាព អ្នកប្រើប្រាស់ឧបករណ៍ទាំងអស់គួរតែយកខ្សែ USB ដាក់តាមខ្លួន និងដោតវាជាមួយឌុយភ្លើង ជាជាងដោតវាចូលទៅក្នុងរន្ធ USB នៅតាមកន្លែងសាកថ្មសាធារណៈដូចជា ព្រលានយន្តហោះ សណ្ឋាគារ ឬហាងលក់ទំនិញនានា ។

ក្រៅពីការិយាល័យស៊ើបអង្កេតកណ្តាលបានជូនដំណឹងពីការសាកថ្មរបស់ឧបករណ៍ក្នុងបញ្ជី Twitter ហើយ នៅក្នុងវែបសាយរបស់ការិយាល័យនេះ ក៏បានណែនាំស្រដៀងគ្នាផងដែរ ក្នុងគោលបំណងហាមឃាត់អ្នកប្រើប្រាស់សាកថ្មទូរស័ព្ទហ្វ្រីនៅតាមកន្លែងសាធារណៈ ។ ទោះយ៉ាងណា ការជូនដំណឹងរបស់ការិយាល័យស៊ើបអង្កេតកណ្តាល មិនមែនដោយសារមានករណីលួចយកទិន្នន័យ ឬការដោនឡូតកម្មវិធីមេរោគណាមួយទេ ប៉ុន្តែវាគ្រាន់តែជាការណែនាំដើម្បីប្រើប្រាស់ឧបករណ៍ឱ្យមានសុវត្ថិភាពប៉ុណ្ណោះ ។

ការិយាល័យស៊ើបអង្កេតកណ្តាលអាមេរិកធ្លាប់បានដាស់តឿនស្រដៀងគ្នានេះដែរកាលពីឆ្នាំ២០២១ ដោយហៅការលួចយកទិន្នន័យតាមរយៈ USB សាធារណៈថា Juice Jacking មានន័យថា សាកថ្មឧបករណ៍ភ្លាម មេរោគចូលភ្លែត ៕ ប្រភព ៖ beartaiBRIEF

ប្រទេសថៃ ៖ កីឡាករប្រចាំសង្វៀនប្រដាល់ Thai Fight ឈ្មោះ Phatthana Gas បានបង្ហោះពាក្យពេជន៍នៅក្នុងបណ្តាញសង្គម ដែលជាការសរសេរពាក់ព័ន្ធនឹងកីឡាករប្រេស៊ីលបេះដូងខ្មែរ លោក Thiago Teixeira ថា ធ្លាប់ឡើងប្រដាល់ក្នុងកម្មវិធីជាមួយគ្នា ប៉ុន្តែបែរជាមកគាំទ្រគុនខ្មែរទៅវិញ ។

ប្រទេសថៃនិយាយថា កីឡាករប្រេស៊ីល Thiago ធ្លាប់បានហ្វឹកហាត់កីឡា Muay Thai តាំងពីក្មេងមក ហើយកីឡាកររូបនេះបានរស់នៅដោយសារអាជីពជាអ្នកប្រដាល់នៅលើសង្វៀនអស់រយៈពេលជាង១៧ឆ្នាំ នៅប្រទេសថៃ ប៉ុន្តែទីបំផុត កីឡាករ Thiago បែរជាទៅសរសើរកីឡាគុនខ្មែររបស់ប្រទេសកម្ពុជាទៅវិញ ។

ប្រទេសថៃនិយាយទៀតថា កីឡាករ Thiago ធ្លាប់ធ្វើដំណើរមកហ្វឹកហាត់នៅកោះសាមុយ និងបានឡើងប្រកួតលើសង្វៀនប្រដាល់ថៃជាច្រើនកន្លែងទាំងថ្នាក់តំបន់ និងថ្នាក់ប្រទេស មិនថាក្នុងកម្មវិធី Thai Fight និង Muay Thai Fighter X ប៉ុន្តែនៅទីបំផុត កីឡាកររូបនេះបែរជាប្តូរចិត្តទៅជឿលើកីឡាគុនខ្មែរថា ជាក្បាច់គុនការពារខ្លួនរបស់ប្រទេសកម្ពុជា រហូតធ្វើឱ្យពលរដ្ឋថៃជាច្រើននាក់មិនពេញចិត្ត និងរិះគន់មិនឈប់ឈរ ។

នៅទីបំផុត កីឡាករ Thiago ត្រូវបានអង្គការ Muay Thai ពិភពលោក (World Muaythai organization) ដកហូតខ្សែក្រវាត់ជើងឯក ព្រមទាំងហាមឃាត់កីឡាករវ័យ៣៥ឆ្នាំរូបនេះចូលរួមប្រកួតថ្នាក់អន្តរជាតិទាំងអស់ ដែលធ្វើឱ្យកីឡាករ Thiago សម្រេចចិត្តមិនត្រឡប់មកប្រទេសថៃទៀតឡើយ ។ កីឡាករ Thiago បានជ្រើសរើសរស់នៅក្នុងប្រទេសកម្ពុជា ក្រោយពីទទួលបានសញ្ជាតិខ្មែរ និងមានឈ្មោះជាភាសាខ្មែរថា សែន ចន្ទរិទ្ធីគុន ។

កាលពីថ្ងៃទី១៥ ខែមេសា កីឡាករថៃប្រចាំសង្វៀនប្រដាល់ Thai Fight ឈ្មោះ Phatthana Gas បានសរសេរបង្ហោះក្នុងបណ្តាញសង្គម អំពីកីឡាករប្រេស៊ីលថា ៖ «ឱ្យគាត់រស់នៅប្រទេសកម្ពុជាយ៉ាងសប្បាយចិត្តចុះ ហើយកុំមកឱ្យពលរដ្ឋថៃឃើញមុខទៀតឱ្យសោះ» ។ ការបញ្ចេញមតិបែបនេះ បានធ្វើឱ្យពលរដ្ឋថៃពេញចិត្តយ៉ាងខ្លាំង ។

គួរបញ្ជាក់ថា កីឡាករ Phatthana Gas មានឈ្មោះពិតថា Wanchalerm គឺជាកីឡាករប្រដាល់ថៃមួយរូបដែលពលរដ្ឋថៃលើកសរសើរ និងគោរព ដោយសាររូបគេគាំទ្រលើកស្ទួយកីឡា Muay Thai ជាខ្លាំង ។ Wanchalerm និយាយថា Muay Thai ធ្វើឱ្យខ្លួនគេមានជីវិតល្អប្រសើរឡើង ហើយរូបគេមិនភ្លេចគុណកីឡាប្រចាំជាតិទេ ព្រមទាំងធ្លាប់ប្រកាសថា ៖ «កីឡា Muay Thai គឺជារបស់ជនជាតិថៃ ហើយមិនឱ្យប្រទេសណាយកជាដាច់ខាត ។ ខ្ញុំស្រឡាញ់ Muay Thai ខ្លាំងបំផុតក្នុងជីវិត» ៕ ប្រភព ៖ sanook sport

នាយករដ្ឋមន្ត្រីម៉ាឡេស៊ី លោក Anwar Ibrahim បានថ្លែងថា ប្រធានាធិបតីចិន លោក ស៊ី ជិនពីង បានចាប់អារម្មណ៍ក្នុងការជជែកគ្នាពីការបង្កើតមូលនិធិរូបិយវត្ថុអាស៊ី ក្នុងអំឡុងពេលមេដឹកនាំម៉ាឡេស៊ីធ្វើដំណើរទស្សនកិច្ចទៅកាន់ប្រទេសចិន កាលពីចុងខែមីនា ឆ្នាំ២០២៣ ។

លោក Anwar stint មានគំនិតបង្កើតមូលនិធិនេះក្នុងអំឡុងពេលលោកកាន់តំណែងជារដ្ឋមន្ត្រីក្រសួងហិរញ្ញវត្ថុក្នុងទសវត្សរ៍ទី៩០ ។ ក្នុងអំឡុងពេលនោះ គំនិតបង្កើតមូលនិធិនេះមិនទាន់មានការទទួលស្គាល់ច្រើនទេ ព្រោះប្រាក់ដុល្លារអាមេរិកបានឡើងថ្លៃយ៉ាងខ្លាំង បើធៀបនឹងប្រាក់របស់ប្រទេសផ្សេងទៀតលើពិភពលោក ។

លើសពីនេះ គំនិតបង្កើតមូលនិធិរូបិយវត្ថុអាស៊ីត្រូវបានប្រទេសមួយចំនួននៅអាស៊ីតវ៉ាយ៉ាងខ្លាំង រួមទាំងក្រុមប្រទេស G7 ផងដែរ ដោយសារពួកគេបារម្ភថា ការបង្កើតមូលនិធិ AMF អាចធ្វើឱ្យមូលនិធិរូបិយវត្ថុអន្តរជាតិ (IMF) មិនស្ថិតស្ថេរ និងអាចកាត់ផ្តាច់ទំនាក់ទំនងរវាងអាមេរិកជាមួយប្រទេសក្នុងតំបន់អាស៊ាន ។

ទោះយ៉ាងណា ប្រទេសចិន និងជប៉ុនមានសេដ្ឋកិច្ចរឹងមាំកាន់តែខ្លាំង ហើយគំនិតបង្កើតមូលនិធិរូបិយវត្ថុអាស៊ី ត្រូវបានគេពិចារណាកាន់តែស៊ីជម្រៅ ។ ដូច្នេះ លោក Anwar stint លើកហេតុផលថា ប្រទេសផ្សេងៗគួរធ្វើពាណិជ្ជកម្មដោយប្រើប្រាស់ប្រាក់របស់ខ្លួន និងមិនចាំបាច់ពឹងផ្អែកលើប្រាក់ដុល្លារអាមេរិកតែមួយទេ។

ការផ្សព្វផ្សាយព័ត៌មានការបង្កើតមូលនិធិរូបិយវត្ថុអាស៊ី កើតឡើងក្រោយពីចិនបានប្រកាសវិនិយោគនៅម៉ាឡេស៊ី ក្នុងទឹកប្រាក់ប្រមាណ៣.៨៦៦ម៉ឺនលានដុល្លារអាមេរិក ដោយក្រុមហ៊ុនចិនជាច្រើននឹងត្រៀមបង្កើតគម្រោងផ្សេងៗនៅម៉ាឡេស៊ី ក្នុងរយៈពេលប៉ុន្មានខែខាងមុខ ៕ ប្រភព ៖ AEC connect