ក្រុមអ្នកជំនាញផ្នែកសន្តិសុខអ៊ីនធើរណេតមកពីតំបន់អាស៊ាន អឺរ៉ុប និងសហរដ្ឋអាមេរិកបានបង្ហាញថា ក្រុមអ្នកទិញទំនិញតាមអនឡាញ គឺជាក្រុមត្រូវគេលួចយកទិន្នន័យផ្ទាល់ខ្លួនច្រើនបំផុត ។

គេរកឃើញថា កម្មវិធីទិញទំនិញតាមអនឡាញមួយចំនួនមិនបានប្រើប្រាស់ប្រព័ន្ធការពារសុវត្ថិភាពទិន្នន័យទេ ដែលធ្វើឱ្យមេរោគផ្សេងៗចូលមកក្នុងទូរស័ព្ទស្មាតហ្វូន ដោយមិនបានទទួលការអនុញ្ញាតពីម្ចាស់ទូរស័ព្ទ ។ ហេតុនេះ វាធ្វើឱ្យពួកជនខិលខូចដែលបញ្ចេញមេរោគទាំងនេះអាចប្រមូលព័ត៌មានទាំងអស់ពីទូរស័ព្ទស្មាតហ្វូនរបស់យើង ហើយនៅពេលមេរោគទាំងនេះចូលក្នុងទូរស័ព្ទហើយ គេពិបាកនឹងកម្ចាត់វាណាស់ ។

ជាក់ស្តែង សូម្បីតែវែបសាយផ្សាយពាណិជ្ជកម្មអនឡាយមួយរបស់ចិន ដែលមានអ្នកប្រើប្រាស់រហូតដល់៧៥០លាននាក់ ហើយក្រុមហ៊ុនផ្សាយពាណិជ្ជកម្មនេះបានចំណាយប្រាក់ជាច្រើនលើប្រព័ន្ធការពារការលួចទិន្នន័យតាមអ៊ីនធើរណេត ក៏នៅតែជួបបញ្ហាត្រូវគេលួចយកទិន្នន័យដែរ ។

ដំណោះស្រាយសម្រាប់អ្នកប្រើប្រាស់ អ្នកជំនាញបានណែនាំថា ចូរយើងកុំចុចនៅលើ link ប្លែកៗ ឬដោនឡូតកម្មវិធីណាដែលធ្លាប់មិនស្គាល់ឱ្យសោះ ជាពិសេស អ្នកប្រើប្រាស់ប្រព័ន្ធ Android ។ ទោះយ៉ាងណា ដំណោះស្រាយល្អ គឺត្រូវការអ្នកឯកទេសដោះស្រាយបញ្ហានេះយ៉ាងយកចិត្តទុកដាក់ ជាជាងការឱ្យអ្នកប្រើប្រាស់ប្រុងប្រយ័ត្នដោយខ្លួនឯង ៕ ប្រភព ៖ Mono News

មនុស្សកាលពីសម័យមុនជឿជាក់ថាឋាននរកស្ថិតនៅខាងក្រោមដី ហើយពីឋានមនុស្សទៅឋាននរកសុទ្ធតែមានជ្រកចូល ដូច្នេះហើយបានជាមនុស្សជាច្រើនមានជំនឿទៅកាន់កន្លែងទាំងនោះនៅលើពិភពលោក ថាជាកន្លែងដែលអាចធ្វើដំណើរទៅកាន់ឋាននរកបាន ដែលកន្លែងទាំង៤នោះមានដូចជា៖

១.ប្រសាទ Hierapolis ប្រទេសទួរគី៖ Hierapolis គឺជាប្រាសាទដ៏ចំណាស់មួយ ដែលត្រូវបានគេរកឃើញវិញនៅឆ្នាំ១៩៦៥ នៅត្រង់ប្រាសាទមួយនេះមានភាយចេញនៅឧស្ម័នចម្លែកមួយដែលមានកម្តៅក្តៅនិងមានជាតិពុលផងដែរ។ មានអ្នកស្រាវជ្រាវមួយក្រុម បានចូលទៅក្នុងរូងប្រាសាទនេះ ដើម្បីឱ្យដឹងថាផ្សែងពុលមួយនេះមានប្រភពមកពីណា។ អស់រយះ៧ថ្ងៃដែលគាត់បានចូលទៅ គេមិនបានឃើញគាត់ត្រឡប់មកវិញនោះទេ ដូច្នេះហើយគេសន្មត់ថាគាត់បានស្លាប់នៅក្នុងឋាននរកបាត់ទៅហើយ។

២.ទីក្រុង Fengdu ប្រទេសចិន៖ ទីក្រុងនេះមានអាយុកាលជាង២០០០ឆ្នាំមកហើយ ដើមឡើយប្រជាជនជំនាន់មុនតែងតែយកខ្មោចទៅកប់នៅទីនោះរហូតមកដល់ពេលបច្ចុប្បន្ន។ នៅពេលសព្វថ្ងៃទីក្រុងFengduគឺសំបូរទៅដោយវត្តព្រះពុទ្ធសាសនា រឿងដែលចម្លែកនោះគឺថា មនុស្សដែលឆ្លងកាត់ទីក្រុងនេះបានជួបគ្រោះថ្នាក់ចរាចរណ៍ ហើយអត្រាគ្រោះថ្នាក់ចរាចរណ៍នៅទីក្រុងFengduហាក់ដូចជាខ្ពស់ចម្លែកខុសពីគេ ដូច្នេះហើយទើបប្រជាជននៅទីនោះ បាននិយាយថាកន្លែងនេះអាចជាច្រកទៅឋាននរក ឬជាច្រកទៅរកសេចក្តីស្លាប់ពិតមែន។

៣.ភ្នំភ្លើងMasaya៖ ប្រជាជនដែលរស់នៅក្បែតំបន់ភ្នំភ្លើងMasaya គេនិយាយថា នេះគឺជាទីលំនៅឋាននៃមនុស្សដែលចេះមន្តអាគមអូមអាមជាច្រើននាក់ ដូច្នេះហើយមិនសូវជាមានប្រជាជនចូលទៅក្បែរភ្នំភ្លើងនេះទេ។ កន្លងទៅមានអ្នកសិក្សាស្រាវជ្រាវមួយក្រុមបានទៅស្វែងរកអាថ៍កំបាំងនៅទីនោះ ដោយសារតែប្រជាជននៅទីនោះបាននិយាយថាភ្នំភ្លើងMasaya គឺជាច្រកទៅឋាននរក ប៉ុន្តែជាលិទ្ធផលអ្នកស្រាវជ្រាវមួយក្រុមនោះបានបាត់ខ្លួនដោយមិនដឹងមូលហេតុ ហើយប្រជាជននៅក្បែរតំបន់ភ្នំភ្លើងMasaya បានរកឃើញត្រឹមតែកាបូបនិងស្បែកជើងតែប៉ុណ្ណោះ។

៤.ទន្លេរ Acheron៖ Acheron គឺជាទន្លេរដែលស្ថិតនៅប្រទេសក្រិក ដែលគេជឿថាទន្លេរនេះគឺជាច្រកទៅឋាននរក ព្រោះទឹកទន្លេរនេះហូរឆ្ពោះទៅកាន់រូងមួយ ដែលគេមិនដឹងថារូងនោះមានទីបញ្ចប់ទៅកាន់ទីណានោះទេ ទើបគេសន្និដ្ឋានថាអ្នកដែលបានចូលរូងនោះសុទ្ធតែស្លាប់ និងគ្មានថ្ងៃវិលមកវិញឡើយ៕

លោកជំទាវ តាំង ហ្គិចលៀង អគ្គនាយិកាក្រុមហ៊ុន H&L គ្រុប និងជាប្រធានក្លឹបស្រ្តីកម្ពុជា ត្រូវអ្នកលេងបណ្តាញសង្គមរិះគន់យ៉ាងចាស់ដៃចំពោះការវែកញែករឿង «អ្នកមានអ្នកក្រ» រហូតថ្នាក់ដឹកនាំបានចេញសារពិសេសស្នើឱ្យបញ្ឍប់ការវាយប្រហារលើពាក្យនេះបន្តទៀត។

យ៉ាងណាមិញ នៅយប់ថ្ងៃទី៤ ខែមេសា នៅលើផេករបស់លោកជំទាវ តាំង ហ្គេចលៀង បានបញ្ចេញសារថ្មីមួយទៀត ដោយទទួលស្គាល់កំហុសការអធិប្បាយរបស់ខ្លួន និងស្នើឱ្យមហាជនឈប់វែកញែកបន្តទៀត ខណៈពេលនេះលោកជំទាវ បានសម្រេចចិត្តដាក់ពាក្យបណ្តឹងរួចរាល់ហើយនៅនាយកដ្ឋានប្រឆាំងបទល្មើសបច្ចេកវិទ្យាពីជនឆ្លៀតឱកាសមួយចំនួនបានលួចបន្លំគណនីផេករបស់លោកជំទាវ។

អគ្គនាយិកាក្រុមហ៊ុន H&L គ្រុប ខាងលើនេះបានរៀបរាប់ទាំងស្រុងថា «ចា៎ជំរាបសួរ បងប្អូនខ្មែរទាំងអស់ទាំងនៅក្នុងស្រុក និងនៅក្រៅស្រុក ខ្ញុំសុំអង្វរបងប្អូនទាំងអស់គ្នាថា គោលបំណងល្អរបស់ខ្ញុំត្រូវបានរលាយអស់ហើយ ដោយសារខ្ញុំខ្សោយនូវសិល្ប: និងអក្សរសាស្ត្រខ្មែរ ក្នុងការនិយាយឬនិយាយដោយឡែក គឺខ្ញុំចេះនិយាយបានតែពាក្យសាមញ្ញៗ ដែលធ្វើឱ្យមានកំហុសឆ្គងធ្ងន់ធ្ងរដោយអចេតនាបំផុត ពិសេសគឺធ្វើឱ្យសម្តេចពុក ហត់នឿយ ច្រើនណាស់ដោយសារកំហុសរបស់នាងខ្ញុំនេះ ហេតុនេះនាងខ្ញុំសុំលំអោនកាយសំពះអង្វរ បងប្អូនទាំងអស់មេត្តា ខន្តីអភ័យទោស ដល់កំហុសដោយអចេតនារបស់នាងខ្ញុំនេះផងចុះ ពិសេសសូមបងប្អូន មេត្តាគោរពនូវខ្លឹមសារនៃការបកស្រាយរបស់សម្តេចពុក (សម្តេចតេជោ)ផង»។

លោកជំទាវ តាំង ហ្គិចលៀង បន្តទៀតថា «ដោយសារប៉ុន្មានថ្ងៃនេះ មានការលួចក្លែងបន្លំផេករបស់នាងខ្ញុំ នាងខ្ញុំបានទៅដាក់ពាក្យបណ្តឹងនៅនាយកដ្ឋានប្រឆាំងបទល្មើសច្ចេកវិទ្យា នៅក្រសួងមហាផ្ទៃ រួចរាល់ហើយព្រឹកនេះ
ហេតុនេះសូមបងប្អូនមេត្តាបញ្ឈប់នូវសកម្មភាពខុសឆ្គងនេះទៅ ដើម្បីជួយរក្សានូវសណ្នាប់ធ្នាប់ សន្តិសុខសង្គម ព្រោះនាងខ្ញុំ និងបងប្អូនសុទ្ធតែជាខ្មែរដូចគ្នា កាន់ព្រះពុទ្ធសាសនាដូចគ្នា ហេតុនេះការផ្តល់នូវអភ័យឲ្យគ្នាទៅវិញទៅមក គឺជាបុណ្យកុសលធំធេងណាស់ ព្រោះលើលោកនេះគ្មានអ្នកណាដែលមិនចេះខុសនោះទេ តែសំខាន់ចេះទទួលស្គាល់កំហុសដោយសុទ្ធចិត្ត និងកែរប្រែនូវកំហុសនោះឯង…. ។
នាងខ្ញុំសូមគោរពអរគុណបងប្អូនអ្នកគាំទ្រ និងអ្នកមិនគាំទ្រខ្ញុំទាំងអស់ បងប្អូនគឺជាអ្នកដែលបានផ្តល់នូវមេរៀនល្អ ល្អ ផ្សេងៗគ្នាអោយនាងខ្ញុំ កាន់តែរឹងមាំ និងល្អប្រសើរទៅអនាគតសូមបងប្អូនទាំងអស់ មេត្តាអភ័យទោស និងសូមចូលរួមរក្សានូវសណ្តាប់ធ្នាប់សង្គម ដើម្បីរស់នៅក្រោមដំបូលសន្តិភាព និងអភិវឌ្ឍសង្គម និងក្រុមគ្រួសារយើងទាំងអស់គ្នា»។

ភ្ជាប់ជាមួយខ្លឹមសារខាងលើ មកទល់ពេលនេះលោកជំទាវ ហ្គិចលៀង បានសម្រេចចិត្ត disable ផេកផ្លូវការរបស់ខ្លួនមួយរយៈផងដែរ៕

លោក អ៊ួន បឋម ហៅ សាយ មិនត្រឹមតែជាតារាចម្រៀងប៉ុណ្ណោះទេ តែលោកជាសិល្បករគួរឱ្យសរសើរ និងជាគំរូមួយរូបបានលះបង់ច្រើនដើម្បីកុមារកម្ពុជាដោយមានជាយុទ្ធាការរត់រៃអង្គាសប្រាក់ជួយទៅដល់មន្ទីរពេទ្យជាដើម។ ជាក់ស្តែងថ្មីៗនេះ លោក សាយ បានបញ្ចេញវីដេអូផ្សព្វផ្សាយមួយក្នុងទម្រង់បុរាណដើម្បីជូនជាដំណឹងដល់សាធារណៈជនចូលរួមក្នុង «កម្មវិធី រត់ និងជិះកង់» រហូតអ្នកក្បែរភូមិផងរបងជាមួយកម្ពុជាប្រតិកម្មពីសំលៀកបំពាក់របស់ សាយ ទៀតផង។

មិនមែនជាលើកទី១មួយទេ ដែលបុរសមានសណ្តានចិត្តល្អឯក សាយ បង្កើតយុទ្ធាការ «រត់» រៃអង្គាសប្រាក់ជួយទៅដល់មន្ទីរពេទ្យសង្គ្រោះកុមារកម្ពុជា ដែលនាពេលកន្លងមកលោកបានលះបង់យ៉ាងខ្លាំង មិនថាខ្លួនមានរបួសជង្គង់ ស្រកសាច់ យ៉ាងណានៅតែបន្តយុទ្ធាការរៃអង្គាសប្រាក់ពីសប្បុរសជនកៀងគរថវិកាជួយដល់មន្ទីរពេទ្យរាប់ម៉ឺនដុល្លារ។

ជាក់ស្តែងថ្មីៗនេះ សាយ បានបញ្ចេញវីដេអូផ្សព្វផ្សាយថ្មីមួយជាទម្រង់បុរាណ ជាមួយព្រឹត្តិការណ៍អង្គរសង្ក្រាន្ត “កម្មវិធី រត់ និងជិះកង់” របស់សហភាពសហព័ន្ធយុវជនកម្ពុជា
ដោយថវិកាទទួលបានពីកម្មវិធី នឹងបរិច្ចាគទាំងស្រុងដល់មន្ទីរពេទ្យកុមារអង្គរ។ ខណៈកម្មវិធីនេះនឹងប្រព្រឹត្តទៅនៅថ្ងៃទី ០៨ និងទី០៩ ខែមេសា នៅបរិវេណឧទ្យានអង្គរ។

អ្វីដែលធ្វើឱ្យ សាយ ហួសចិត្តនោះ គឺអ្នកជិតខាងកម្ពុជាតែម្តងគ្រាន់តែលោកស្លៀកឈុតបុរាណខ្មែរបែរជាចោទថាលួចចម្លងសំលៀកបំពាក់គេ។ តារាចម្រៀងរូបនេះបានរៀបរាប់នៅលើហ្វេកប៊ុកថា «អ្នកជិតខាងចូលមកវាយប្រហារ វីដេអូខ្ញុំ ដោយសំអាងថា ពួកយើងបានចម្លង សំលៀកបំពាក់គេ តើពុកម៉ែបងប្អូនជនរួមជាតិ គិតយ៉ាងណាដែរ? ខ្មែរជួយខ្មែរ» ។

ជាមួយគ្នានេះដែរ អ្នកលេងបណ្តាញសង្គមបានចូលទៅខំមិនលើការបង្ហោះរបស់ សាយដែលជាម្ចាស់បទ «ងប់ងល់» ថា «អ្នកជិតខាងនឹងកំពូលចង់បានរបស់គេយកធ្វើជារបស់ខ្លួនឯង កុំខ្វល់អីបងយើងថែរក្សា និងបង្ហាញអ្វីដែលជារបស់ដូនតាបានបន្សល់ទុកយើងដែលជាជំនាន់ក្រោយយ៉ាងអោយពិតប្រាកដហើយយើងក៏នឹងបង្ហាញអ្វីដែលជារបស់យើងដើម្បីទុក»។ អ្នកខ្លះទៀតបានលើកឡើងថា «មិនរៀនប្រវត្តិសាស្ត្រ មិនទទួលស្គាល់ប្រវត្តិសាស្រ្ត ឱ្យគេថាអីថាទៅ សំខាន់យើងដឹងថាជារបស់យើង», «របស់ពិតនៅតែជារបស់ពិតពុំអាចមានអ្វីមកបំភ្លៃបានឡើយ មាសសុទ្ធមិនខ្លាចភ្លើង»។ អ្នកខ្លះទៀតក៏បានលើកឡើងទៀតថា «ក្រុមហ្នឹងគាត់ធ្លាប់លួចរបស់គេ ដល់ពេលចឹងគាត់មិនដែលដឹងថា សំលៀកបំពាក់ដែល សាយ ស្លៀក មានដើមកំណើតចេញមកពីខ្មែរជំនាន់ដើមទេ»៕

ប្រតិភូ ដែលរួមមានមន្ត្រីដឹកនាំ គ្រូបង្វឹក គ្រូជំនួយ និងកីឡាករ-កីឡាការិនី នៃព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ សរុបមានចំនួន ១២,៤០៤ នាក់ ខណៈប្រទេសថៃឈរនៅលំដាប់ទី១ មានប្រតិភូចូលរួមសរុបចំនួន ១,៩៨៥នាក់ ចំណែកឯប្រទេសកម្ពុជាមានចំនួន ១,១៥៨ នាក់ តិចជាងប្រទេសថៃ ៥៤៣នាក់ និងប្រតិភូកីឡាព្រុយណេមានតិចជាងគេនៅក្នុងបញ្ជី។ នេះបើយោងតាមស្ថិតិពីសមាជិកចូលរួមដែលម្ចាស់ផ្ទះកម្ពុជាប្រមូលបាន។

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ដែលមានកម្ពុជាជាម្ចាស់ផ្ទះបានបង្ហាញស្ថិតិជាផ្លូវការហើយ បញ្ជីសរុបប្រតិភូកីឡាទាំង ១១ប្រទេសចូលរួមប្រកួតព្រឹត្តិការណ៍កីឡាអាស៊ីអាគ្នេយ៍ ក្នុងនោះប្រទេសថៃឈរនៅលំដាប់ទី១ក្នុងបញ្ជីមានចំនួនប្រតិភូចូលរួមចំនួន ១,៩៨៥នាក់។ ប្រតិភូកីឡាឥណ្ឌូនេស៊ីឈរនៅលំដាប់ទី២ មានចំនួន១,៨០២នាក់ ។ លំដាប់ទី៣ បានទៅលើវៀតណាមមានចំនួន ១,៦៦៣ នាក់ លំដាប់ទី៤ គឺម៉ាឡេស៊ីមានចំនួន ១, ៥៣២នាក់។ ប្រតិភូកីឡាហ្វីលីពីនមានចំនួន១,៣៤២នាក់ ប្រតិភូកីឡាសិង្ហបុរីមានចំនួន១,២២៨នាក់, កម្ពុជាមានប្រតិភូកីឡាចំនួន ១,១៥៨នាក់, ប្រទេសមីយ៉ាន់ម៉ា មានប្រតិភូកីឡាចំនួន ៦៩៤នាក់។ ប្រតិភូកីឡាប្រទេសឡាវមានចំនួន៦៥៦នាក់។ ប្រតិភូកីឡាប្រទេសទីម័រខាងកើតមានចំនួន១៧១នាក់ និងចុងក្រោយប្រតិភូកីឡាប្រទេសព្រុយណេមានចំនួន ១១៣នាក់។

សូមបញ្ជាក់ផងដែរថា ព្រឹត្តិការណ៍ស៊ីហ្គេម២០២៣ លើកទី៣២ ដែលកម្ពុជាធ្វើជាម្ចាស់ផ្ទះ នឹងប្រព្រឹត្តិទៅជាផ្លូវការនៅថ្ងៃទី៥-១៧ ខែឧសភា ឆ្នាំ២០២៣ ខាងមុខនេះ៕