បរទេស៖ ក្រុមហ៊ុន Microsoft បាននិយាយថា ប្រាក់ចំណូល និងប្រាក់ចំណេញរបស់ខ្លួននៅក្នុងត្រីមាសទី 1 កើនលើសពីការព្យាករណ៍របស់អ្នកវិភាគ ដោយសារផលិតផលដែលរួមបញ្ចូលជាមួយបញ្ញាសិប្បនិម្មិត (AI) ។
នៅថ្ងៃទី 25 ខែមេសា ក្រុមហ៊ុន Microsoft បានប្រកាសថា ប្រាក់ចំណូលក្នុងត្រីមាសទីមួយរបស់ខ្លួនបានកើនឡើង 7% ដល់ជិត 53 ពាន់លានដុល្លារ។ តួលេខនេះគឺខ្ពស់ជាងការព្យាករណ៍របស់អ្នកវិភាគក្នុងការស្ទង់មតិដោយក្រុមហ៊ុនស្រាវជ្រាវ Refinitiv ជាង 51 ពាន់លានដុល្លារ។ ប្រាក់ចំណូលក្នុងមួយហ៊ុន (EPS) បានមកនៅ $ 2.45 ដែរលើសពីការព្យាករណ៍ចំនួន $ 2.23 ។ អាជីវកម្មកុំព្យូទ័រលើពពក Azure បានកើនឡើង 27% នៅក្នុងត្រីមាសទីមួយ។ ផ្នែកដែលរួមមានកម្មវិធី Office និងប្រាក់ចំណូលពីការផ្សាយពាណិជ្ជកម្មនៅលើបណ្តាញសង្គម LinkedIn ក៏បាននាំមកនូវប្រាក់ចំណូលលើសពីការព្យាករណ៍ជាមួយនឹង 17.5 ពាន់លានដុល្លារអាមេរិក។ ប្រាក់ចំណូលភាគច្រើនរបស់ Microsoft បានមកពីការលក់កម្មវិធី និងសេវាកម្ម cloud computing ដល់អតិថិជន។ ក្រុមហ៊ុន Microsoft នៅឆ្នាំនេះបានទាក់ទាញការចាប់អារម្មណ៍នៅពេលដែលសហការជាមួយ OpenAI ដែលជាក្រុមហ៊ុនបង្កើត ChatGPT និងរួមបញ្ចូលបច្ចេកវិទ្យាបញ្ញាសិប្បនិម្មិតទៅក្នុងម៉ាស៊ីនស្វែងរក Bing ។

នាយកប្រតិបត្តិ Satya Nadella បាននិយាយថាក្រុមហ៊ុនបច្ចុប្បន្នមានអតិថិជនជាង 2,500 នាក់ដែលប្រើប្រាស់សេវាកម្មរបស់ Azure OpenAI ។ AI ក៏ត្រូវបានដាក់បញ្ចូលទៅក្នុងជួរនៃផលិតផលរបស់ខ្លួនផងដែរ។ ឥឡូវនេះ Bing មានអ្នកប្រើប្រាស់ប្រចាំថ្ងៃចំនួន 100 លាននាក់ ហើយបានកត់ត្រាការកើនឡើងនៃការទាញយកបន្ទាប់ពីបានបន្ថែមមុខងារ AI ។ ក្រុមហ៊ុនជឿជាក់ថាប្រាក់ចំណូលនៅក្នុងផ្នែកសំខាន់ៗក្នុងត្រីមាសនេះនឹងបន្តបំពេញតាម ឬលើសពីការព្យាករណ៍របស់ Wall Street ។ក្រៅពីក្រុមហ៊ុន Microsoft ក្រុមហ៊ុន Alphabet ក៏មានអាជីវកម្មកុំព្យូទ័រលើពពកដែលកំពុងរីកចម្រើនផងដែរ។ នៅក្នុងរបាយការណ៍ហិរញ្ញវត្ថុរបស់ខ្លួនដែលបានចេញផ្សាយនៅថ្ងៃទី 25 ខែមេសា ក្រុមហ៊ុនដ៏ធំរបស់ Google បានកត់ត្រាប្រាក់ចំណេញជាលើកដំបូងក្នុងរយៈពេល 3 ឆ្នាំជាមួយនឹងប្រាក់ចំណេញប្រតិបត្តិការចំនួន 191 លានដុល្លារ និងប្រាក់ចំណូលចំនួន 7.45 ពាន់លានដុល្លារ ផងដែរ៕
ប្រភព៖vnexpress

តារាសម្តែងជើងចាស់ដ៏មានប្រជាប្រិយភាពលោក សាវិន ហ្វីលីព បានបង្ហោះសារមួយនៅលើហ្វេកប៊ុកទទួលបានការចាប់អារម្មណ៍យ៉ាងខ្លាំងដោយលោកបានលើកឡើងថា មុនទិញដីឡូត៍គួរពិចារណា ដោយសារម្ចាស់ដីឡូត៍មានងារជា«ឧកញ៉ា» មួយចំនួនមានគំនិតមិនស្មោះត្រង់។

ដូចមហាជនជ្រាបមកហើយថា ករណីឧកញ៉ា ជា សារ៉ន បានបោកលុយប្រជាជនស្លូតត្រង់ជិត៤០លានដុល្លារ ពេលនេះទទួលបានយុត្តិធម៌ហើយក្រោមការសម្របសម្រួលរបស់ឯកឧត្តម ម៉ៅ ធនិន អភិបាលខេត្តកំពត ខណៈឧកញ៉ា និងបក្ខពួកត្រូវបានសមត្ថកិច្ចឃាត់ខ្លួនហើយ។ ទន្ទឹមនឹងបទពិសោធរបស់ប្រជាជនរងគ្រោះទៅលើការវិយោគដីឡូត៍ទទួលបានការប្រាក់ខ្ពស់នេះ នៅថ្ងៃទី២៧ ខែមេសា ឆ្នាំ២០២៣ តារាសម្តែងជើងចាស់ដ៏ល្បីលោក សាវិន ហ្វីលីព បានបង្ហោះសារមួយយ៉ាងចាក់ដោតទៅលើវិស័យដីឡូត៍។

តារាសម្តែងខាងលើបានរៀបរាប់ថា «វិស័យដីទ្បូត៍កំពុងជួបហានិភ័យដោយសារម្ចាស់គំរោងដែលមានងារជាឧកញ៉ាមួយចំនួនមិនស្មោះត្រង់..មុនទិញគួរពិចារណា»។

ការលើកឡើងរបស់លោក សាវិន ហ្វីលីព អ្នកលេងបណ្តាញសង្គមបានគាំទ្រនូវការលើកឡើងខាងលើនេះ ដោយពួកគេបានលើកឡើងទៀតថា មានប្រជាជនច្រើនណាស់ដែលរងគ្រោះព្រោះដីឡូត៍។

គួរបញ្ជាក់ផងដែរថា លោក សាវិន ហ្វីលីព ជាតារាសម្តែងមានឆន្ទៈខ្ពស់ធ្លាប់ប្រកាសថា មិនទទួលផ្សព្វផ្សាយស្រាបៀឡើយ ខណៈតារាល្បីមួយចំនួនទទួលផ្សព្វផ្សាយស្រាបៀព្រោងព្រាត ដែលធ្វើឱ្យមហាជនកោតសរសើរលោកយ៉ាងខ្លាំង រហូតសរសើរតារាសម្តែងរូបនេះថាជា «តារាគម្រូ»៕

ប្រទេសជប៉ុន ៖ ក្រុមហ៊ុនរបស់ប្រទេសជប៉ុនឈ្មោះ Ispace បានចេញសេចក្តីថ្លែងការណ៍មួយអំពីការបញ្ជូនយានអវកាសទៅចុះចតនៅឋានព្រះច័ន្ទជាលើកដំបូងក្នុងប្រវត្តិសាស្ត្ររបស់ជប៉ុន ប៉ុន្តែត្រូវទទួលបរាជ័យក្រោយពីគេមិនអាចទំនាក់ទំនងជាមួយយានអវកាសឈ្មោះ «Hakuto-R Mission 1» ។ ប៉ុន្តែក្រុមហ៊ុនគិតថា យានអវកាសនេះអាចធ្លាក់នៅឋានព្រះច័ន្ទ ។

ការដាច់ទំនាក់ទំនងជាមួយយានអវកាស Hakuto-R Mission 1 ក្រុមហ៊ុន Ispace ជឿថា យានអវកាសនេះចុះចតនៅឋានព្រះច័ន្ទមិនសម្រេច ហើយក្រុមការងារវិស្វកររបស់ក្រុមហ៊ុននឹងពិនិត្យមើលស្ថានការណ៍នេះ ។ ក្រុមហ៊ុនបញ្ជាក់ថា បើទោះជាការចុះចតនៅឋានព្រះច័ន្ទបរាជ័យ ប៉ុន្តែក្រុមហ៊ុនមានមោទនភាពខ្លាំងណាស់ ដែលបានសម្រេចកិច្ចការជាច្រើនក្នុងបេសកកម្មលើកដំបូងនេះ ។

ទោះយ៉ាងណា បើទោះជាការចុះចតនៅឋានព្រះច័ន្ទរបស់យានអវកាសក្រុមហ៊ុន Ispace បរាជ័យក្តី ប៉ុន្តែរដ្ឋាភិបាល និងពលរដ្ឋជប៉ុនបានជំរុញឱ្យក្រុមហ៊ុននេះព្យាយាមនៅពេលក្រោយទៀត ខណៈការព្យាយាមលើកនេះសំខាន់ក្នុងការអភិវឌ្ឍឧស្សាហកម្មអវកាសរបស់ប្រទេសជប៉ុន ។

យានអវកាសខាងលើមានគោលបំណងចុះចតនៅលើអឌ្ឍគោលខាងជើងរបស់ព្រះច័ន្ទ ដើម្បីដាក់ឧបករណ៍ស្ទង់ចំនួន២ រួមទាំងមនុស្សយន្តមានទំហំតូច១គ្រឿង ដែលផលិតដោយភ្នាក់ងាររុករកអវកាសជប៉ុន គឺក្រុមហ៊ុន Tomi ជាក្រុមហ៊ុនផលិតឧបករណ៍លេង ។ លើសពីនេះ យានអវកាសក៏មានបំណងដាក់ឧបករណ៍ស្ទង់ចំនួន៤គ្រឿងទៀតឈ្មោះថា Rashid ជារបស់សហព័ន្ធអារ៉ាប់រួមផងដែរ ៕ ប្រភព ៖ Mono News

ប្រទេសចិន ៖ កាលពីឆ្នាំ២០២២ ប្រទេសចិនបាននាំចេញរថយន្តទៅកាន់ទីផ្សារក្រៅប្រទេសស្មើនឹង៣លានគ្រឿងជាលើកដំបូង ដែលធ្វើឱ្យចិនក្លាយជាប្រទេសនាំចេញរថយន្តលំដាប់លេខ២ លើពិភពលោក បន្ទាប់ពីប្រទេសជប៉ុន ខណៈប្រទេសអាល្លឺម៉ង់នាំចេញរថយន្តលំដាប់លេខ៣ ។

កាលពីឆ្នាំ២០១២ ប្រទេសចិនបាននាំចេញរថយន្តចំនួន១លានគ្រឿងប៉ុណ្ណោះទៅក្រៅប្រទេស ក្រោយមក នៅឆ្នាំ២០២១ ចិនបាននាំចេញរថយន្តចំនួន២លានគ្រឿង ហើយនៅឆ្នាំ២០២២ ចំនួនការនាំចេញរថយន្តរបស់ចិនស្មើនឹង៣លានគ្រឿង ។

BYD ជាក្រុមហ៊ុនផលិតរថយន្តអគ្គិសនីនាំមុខមួយនៅប្រទេសចិន បាននាំចេញរថយន្តអគ្គិសនីទៅកាន់ជាង៥០ប្រទេស ។ ជំនួយការអ្នកគ្រប់គ្រងទូទៅផ្នែកទំនាក់ទំនងសាធារណៈរបស់ក្រុមហ៊ុន BYD និយាយថា ក្រុមហ៊ុននេះមានចំណែករួមក្នុងឧស្សាហកម្មយានយន្តថាមពលថ្មីអស់រយៈពេលជាង២០ឆ្នាំមកហើយ ។ ក្រុមហ៊ុនបានប្រមូលផ្តុំនូវជំនាញផ្នែកបច្ចេកវិទ្យារថយន្តទាំងថ្ម ម៉ូទ័រ និងគ្រឿងអេឡិចត្រូនិក ។

ការនាំចេញរថយន្តសរុបរបស់ចិននៅឆ្នាំ២០២២ ក្នុងនោះការនាំចេញរថយន្តអគ្គិសនីស្មើជាង៦០ម៉ឺនគ្រឿង កើនឡើង១២០% បើធៀបនឹងឆ្នាំ២០២១ ហើយតំបន់អឺរ៉ុបគឺជាទីផ្សារសំខាន់ជាងគេ ។ រថយន្តអគ្គិសនី១០គ្រឿងដែលគេនាំចូលមកកាន់តំបន់អឺរ៉ុប ក្នុងនោះរថយន្ត១គ្រឿងនាំចូលពីប្រទេសចិន ។

ក្រុមហ៊ុនរថយន្តរបស់ចិនបានអភិវឌ្ឍន៍បច្ចេកវិទ្យា និងការច្នៃប្រឌិតផ្សេងៗដើម្បីពង្រីកការលក់ទៅកាន់ទីផ្សារអឺរ៉ុប ហើយក្រុមហ៊ុនមានសក្តានុពលអាចប្រកួតប្រជែងនៅក្នុងទីផ្សាររថយន្តលើពិភពលោកផងដែរ ៕

ប្រភព ៖ China Face

រដ្ឋធានីវ៉ាស៊ីនតោន៖ ប្រធានាធិបតីកូរ៉េខាងត្បូង គ្រាន់តែចុះពីលើយន្ដហោះ ដើរជាន់ទឹកដីរបស់សហរដ្ឋអាមេរិក មិនបានប៉ុន្មានផង ក៏បានស្កាត់ជួបកំពូលមហាសេដ្ឋីរបស់ប្រទេសមហាអំណាចលោកខាងលិចមួយនេះ ដើម្បីបញ្ចុះបញ្ចូលលោក អេឡុន ម៉ាស់ (Elon Musk) ឲ្យទៅបោះទុនវិនិយោគ បង្កើតរោងចក្រផលិតរថយន្ដអគ្គិសនីដ៏ធំសម្បើម នៅក្នុងប្រទេសអាស៊ីបូព៌ា ខណៈគាត់កំពុងតែចាប់អារម្មណ៍យ៉ាងខ្លាំង ទៅលើប្រទេសជាសម្ពន្ធមិត្តដ៏ជិតស្និទ្ធរបស់ក្រុងវ៉ាស៊ីនតោន នៅតំបន់អាស៊ីផងដែរ។

សារព័ត៌មាន The Korea Times បានផ្សាយ កាលពីព្រឹក ថ្ងៃព្រហស្បតិ៍ ទី២៧ ខែមេសា ឆ្នាំ២០២៣ ថា បើតាមទីប្រឹក្សារបស់លោកប្រធានាធិបតី បានឲ្យដឹង ថា លោក យូន ស៊ូក យូល (Yoon Suk Yeol) ប្រធានាធិបតីកូរ៉េខាងត្បូង បានជួបជាមួយនឹងនាយកប្រតិបត្ដិក្រុមហ៊ុនថែស្លា (Tesla) លោក អេឡុន ម៉ាស់ កាលពីថ្ងៃពុធ នៅក្នុងរដ្ឋធានីវ៉ាស៊ីនតោន នៅក្នុងដំណើរបំពេញទស្សនកិច្ចផ្លូវរដ្ឋ រយៈពេល៦ថ្ងៃរបស់គាត់ នៅសហរដ្ឋអាមេរិក។ លោកប្រធានាធិបតី បានអំពាវនាវដល់មហាសេដ្ឋីកំពូលរបស់សហរដ្ឋអាមេរិក រូបនេះ ទៅបោះទុនវិនិយោគ នៅក្នុងប្រទេសកូរ៉េខាងត្បូង។

បើតាមលោក ឆយ សាង-មូក (Choi Sang-mok) លេខាធិការជាន់ខ្ពស់ទទួលបន្ទុកកិច្ចការសេដ្ឋកិច្ចរបស់លោកប្រធានាធិបតី បានឲ្យដឹង ថា ជំនួបនេះ បានកើតឡើង តាមសំណើរបស់លោក អេឡុន ម៉ាស់ នៅក្នុងអំឡុងដំណើរទស្សនកិច្ចផ្លូវរដ្ឋរបស់លោក យូន ទៅកាន់សហរដ្ឋអាមេរិក។លោកប្រធានាធិបតី យូន បានបញ្ជាក់ ថា កូរ៉េខាងត្បូង មានមនុស្សយន្តឧស្សាហកម្ម សម្រាប់ផលិតលំដាប់ថ្នាក់ពិភពលោក និង កម្លាំងពលកម្មកម្រិតខ្ពស់ នឹងធ្វើឱ្យប្រទេសអាស៊ីបូព៌ាមួយនេះ ក្លាយជាទីតាំងដ៏ល្អសម្រាប់ដំណើរការរោងចក្រដ៏ធំសម្បើមរបស់ក្រុមហ៊ុន Tesla ។ ក្រៅពីនេះ លោកប្រធានាធិបតី ក៏នឹងផ្តល់នូវការគាំទ្រផ្សេងៗបន្ថែមទៀត រួមទាំងអត្ថប្រយោជន៍ពន្ធ សម្រាប់ទាក់ទាញរោងចក្រផលិតរបស់ក្រុមហ៊ុនផលិតអគ្គិសនី (EV) ផងដែរ។

ទីភ្នាក់ងារសារព័ត៌មាន Yonhap បានរាយការណ៍ ថា លោកមហាសេដ្ឋីអាមេរិក អេឡុន ម៉ាស់ បានប្រាប់ដល់លោកប្រធានាធិបតី យូន ថា ប្រទេសកូរ៉េខាងត្បូង នៅតែជាប្រទេសកំពូលមួយ សម្រាប់ជម្រើសបង្កើតរោងចក្រដ៏ធំសម្បើមរបស់ក្រុមហ៊ុន Tesla ។ គាត់នឹងមានឱកាសណាមួយ ទៅលេងប្រទេសអាស៊ីបូព៌ាមួយនេះលោកប្រធានាធិបតីកូរ៉េខាងត្បូង ធ្លាប់ប្រាប់ទីភ្នាក់ងារសារព័ត៌មាន Reuters កាលពីខែវិច្ឆិកា ឆ្នាំ២០២២ ថា កូរ៉េខាងត្បូង នឹងផ្តល់នូវការលើកទឹកចិត្ត តាមតម្រូវការ និង កាត់បន្ថយនូវហានិភ័យណាមួយ បង្កឡើង ដោយសហជីពសកម្ម ដើម្បីលើកទឹកចិត្ត ដល់ការវិនិយោគរបស់ក្រុមហ៊ុន Tesla ។ ការលើកឡើងរបស់ប្រមុខរដ្ឋកូរ៉េខាងត្បូង បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពេលគាត់បានហៅតាមវីដេអូលីង ជួបជាមួយលោកមហាសេដ្ឋី អេឡុន ម៉ាស់ ។

លោកមហាសេដ្ឋី អេឡុន ម៉ាស់ បានប្រកាស កាលពីខែមីនា ឆ្នាំ២០២៣ ថា ក្រុមហ៊ុន Tesla នឹងសាងសង់រោងចក្រថ្មីមួយ នៅក្នុងប្រទេសម៉ិកស៊ិក។ រោងចក្រនោះ នឹងក្លាយជារោងចក្រទី១របស់ក្រុមហ៊ុន Tesla នៅខាងក្រៅទឹកដីរបស់សហរដ្ឋអាមេរិក អាល្លឺម៉ង់ និង ប្រទេសចិន។ ប្រទេសកាណាដា និង ឥណ្ឌូណេស៊ី ក៏នឹងចាត់ទុក ជាប្រទេសប្រកបដោយសក្តានុពល សម្រាប់ការសាងសង់រោងចក្រថ្មីរបស់ក្រុមហ៊ុនផលិតរថយន្ដអគ្គិសនី Tesla ផងដែរ។

បើតាមទស្សនាវដ្ដី Forbes បានឲ្យដឹង ថា បច្ចុប្បន្ន លោក អេឡុន ម៉ាស់ (Elon Musk) បានធ្លាក់មកឈរ នៅលំដាប់លេខ២ នៃមហាសេដ្ឋីកំពូលៗរបស់ពិភពលោក ដោយមានទ្រព្យសម្បត្ដិ សរុប១៩២ពាន់លានដុល្លារអាមេរិក។ លោកមហាសេដ្ឋី អេឡុន ម៉ាស់ ជានាយកប្រតិបត្ដិក្រុមហ៊ុនជាច្រើន រួមមាន ក្រុមហ៊ុន SpaceX, ក្រុមហ៊ុន angel investor, ក្រុមហ៊ុន Tesla, ក្រុមហ៊ុន Boring Company ។ ក្រៅពីនេះ លោក អេឡុន ម៉ាស់ ក៏ជាសហស្ថាបនិក ក្រុមហ៊ុន Neuralink និង OpenAI ហើយក៏ជាម្ចាស់ និង ជានាយកប្រតិបត្ដិបណ្ដាញសង្គម Twitter ថែមទៀតផង៕