សេដ្ឋីនីចិត្តធម៌ Sophea Böttcher និងស្វាមីជួយរឿងហួសចិត្តនៅកោះបាលី

ជាអ្នកមានទ្រព្យសម្បត្តិច្រើនប៉ុន្តែធ្វើខ្លួនយ៉ាងសាមញ្ញៗសេដ្ឋីនីចិត្តធម៌ Sophea Böttcher និងស្វាមី បានជួបហេតុការណ៍នឹកស្មានមិនដល់មួយនៅភោជនីដ្ឋានកោះបាលីប្រទេសឥណ្ឌូនេស៊ី។ ជាមួយនឹងការរៀបរាប់ពីរឿងដែលខ្លួនបានជួបប្រទះលោកស្រីបានលើកឡើង ថាមិនគួរវិនិច្ឆ័យមនុស្សតាមរូបរាង ឬសម្លៀកបំពាក់ខាងក្រៅឡើយ។

ប្រិយមិត្តជាច្រើនបានស្គាល់លោកស្រី Sophea Böttcher តាមរយៈសកម្មភាពសប្បុរសធម៌រហូតបានហៅលោកស្រីថាជាសេដ្ឋីនីចិត្តធម៌ទៀតផង។ បន្ទាប់ពីមកដល់ទឹកដីកម្ពុជាកាលពីប៉ុន្មានថ្ងៃមុនចូលរួមសកម្មភាពសប្បុរសធម៌ជាមួយនឹងសា្វមីជាជនជាតិអាល្លឺម៉ង់ និងបានជួបជាមួយនឹងស្រ្តីទី១នៃកម្ពុជាថ្មីៗនេះលោកស្រី Sophea Böttcher និងស្វាមី ក៏បានឆ្លៀតដំណើរកម្សាន្តនៅប្រទេសឥណ្ឌូនេស៊ីផងដែរ។ ទោះជាយ៉ាងណា លោកស្រី Sophea Böttcherស្រាប់តែជួបរឿងនឹកស្មានមិនដល់នៅឯភោជនីដ្ឋានមួយកន្លែង។

តាមរយៈវីដេអូនិងសាររៀបរាប់របស់លោកស្រី Sophea Böttcher កាលពីថ្ងៃទី១៤ មករា លោកស្រីនិងស្វាមីបានទៅញ៉ាំអាហារពេលល្ងាចនៅភោជនីយដ្ឋានមួយនៅកោះបាលី ប៉ុន្តែដំបូងអ្នកលក់មិនសូវចង់លក់ឱ្យនោះទេព្រោះស្វាមីលោកស្រីស្លៀកខោអាវធម្មតា អាវយឺតចាស់ ខោចាស់ ដោយគិតថាប្រហែលជាអ្នកទាំងពីរមានលុយមិនគ្រប់គ្រាន់។លោកស្រី Sophea Böttcher បានឱ្យដឹងទៀតថាទម្រាំខាងភោជនីដ្ឋានគេយល់ព្រមគេសួរដល់បីដង។

បទពិសោធន៍នេះ លោកស្រី បានបង្ហាញថាមិនគួរវិនិច្ឆ័យមនុស្សតាមរូបរាង ឬសម្លៀកបំពាក់ខាងក្រៅឡើយ។ បន្ទាប់ពីញ៉ាំអាហាររួច លោកស្រីនិងស្វាមីបានគិតលុយ ហើយថែមទាំងឱ្យធីបយ៉ាងច្រើនផងដែររហូតអ្នករត់តុមានអារម្មណ៍រំភើបខ្លាំងដល់ស្រក់ទឹកភ្នែក ព្រោះមិនដែលមានភ្ញៀវណាឱ្យធីបច្រើនដូចលើកនេះឡើយ។ ពេលឃើញអ្នករត់តុយំដោយក្តីរីករាយស្វាមីលោកស្រីក៏រំភើបរហូតទឹកភ្នែករលីងរលោងដែរ។

លោកស្រី Sophea Böttcher គូសបញ្ជាក់ថា «ពេលវេលាតូចមួយនេះ បានបង្រៀនយើងថា ទឹកចិត្ត និងសេចក្តីមេត្តា មានតម្លៃលើសពីរូបរាងខាងក្រៅ ហើយការធ្វើល្អពីបេះដូង អាចបង្កើតភាពរំភើប និងអនុស្សាវរីយ៍ដ៏ស្រស់ស្អាត ដែលមិនអាចភ្លេចបាន»។

គួរបញ្ជាក់ផងដែរថាក្នុងអំឡុងពេលថៃឈ្លានពានអ្នកទាំងពីរបានចូលរួមបរិច្ចាគថវិកាអស់ជាង៤លានដុល្លារហើយព្រមទាំងមានគម្រោងធ្វើរឿងជាច្រើនទៀតនាថ្ងៃខាងមុខដើម្បីជួយប្រជាជនកម្ពុជា៕