កីឡាគុនល្បុក្កតោ និងកីឡាគុនខ្មែរ ត្រូវបានដាក់បញ្ចូលជាផ្លូវការក្នុងធម្មនុញ្ញ នៃសហព័ន្ធកីឡាអាស៊ីអាគ្នេយ៍ ដែលនាំឱ្យកម្ពុជាមានលទ្ធភាពរៀបចំការប្រកួតកីឡាទាំងពីរក្នុងព្រឹត្តិការណ៍ស៊ីហ្គេមជាបន្ដបន្ទាប់ទៀតនៅបណ្ដាប្រទេសម្ចាស់ផ្ទះក្រោយ។ នេះបើតាមប្រសាសន៍របស់ឯកឧត្តម វ៉ាត់ ចំរើន អគ្គលេខាធិការ NOCC និងជាអគ្គលេខាធិការ CAMSOC ។
ការសម្រេចនេះបានធ្វើឡើងក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ (SEAGF) នៅថ្ងៃទី៤ ខែឧសភា ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) ដោយមានអ្នកចូលរួមពីគណៈកម្មាធិការអូឡាំពិកនៃសមាជិកអាស៊ាន។

បន្ថែមពីលើនេះ ឯកឧត្តម វ៉ាត់ ចំរើន មានប្រសាសន៍ប្រាប់អ្នកសារព័ត៌មានថា កិច្ចព្រមព្រៀងពីប្រទេសជាសមាជិកគឺឆ្លើយតបទៅនឹងកិច្ចខិតខំប្រឹងប្រែងរបស់កម្ពុជាក្នុងការរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ២០២៣ បានយ៉ាងល្អ ដែលទទួលបានការចាប់អារម្មណ៍ពីពិភពលោក ក្រោមបដា “កម្ពុជា ២០២៣” និងជាមួយពាក្យស្លោក “កីឡា៖ រស់ក្នុងសន្តិភាព”។

ជាមួយគ្នានេះ ក្នុងនាមជាប្រទេសម្ចាស់ផ្ទះដែលកម្ពុជាទើបមានឱកាសបានធ្វើជាលើកដំបូង គ្រប់ប្រតិភូកីឡាមកចូលរួមព្រឹត្តការណ៍កីឡាស៊ីហ្គេមក៏កម្ពុជា សម្រេចមិនគិតថ្លៃសេវាអាហារ និងកន្លែងស្នាក់ផងដែរ។
គូសបញ្ជាក់ថា ការប្រកួតកីឡាស៊ីហ្គេមចាប់ផ្តើមពីថ្ងៃទី០៥-១៧ ខែឧសភា ឆ្នាំ២០២៣ និង អាស៊ានប៉ារ៉ាហ្គេម ២០២៣ ចាប់ផ្តើមពីថ្ងៃទី០៣-០៩ ខែមិថុនា ឆ្នាំ២០២៣។ ការប្រកួតកីឡាស៊ីហ្គេម មានសរុបចំនួន ៣៧ប្រភេទកីឡា ត្រូវនឹងវិញ្ញាសារហូតដល់ ៥៨៦វិញ្ញាសា ដែលធ្វើឡើងនៅក្នុងរាជធានីភ្នំពេញ និងខេត្តចំនួន៤ រួមមាន៖ ព្រះសីហនុ, កែប, កំពត និងសៀមរាប៕

ការទន្ទឹងរងចាំអស់រយៈពេលជាយូរ ថ្ងៃនេះបានមកដល់ គឺព្រឹត្តិការណ៍ជាប្រវត្តិសាស្ត្រនៃប្រទេសកម្ពុជា ដោយការបើកព្រឹត្តិការណ៍សុីហ្គេមជាផ្លូវការនឹងធ្វើឡើងនៅក្នុងយប់នេះ។

ទន្ទឹមគ្នាផងដែរថា រដ្ឋបាលខេត្តជ្រផយចង្វារ បានចេញសេចក្តីប្រកាស និងអំពាវនាវដល់មហាជន ដែលបានចូលរួមទស្សនាពិធីបើក ទាំងអស់ ហាមដាច់ខាតប៉ះពាល់ឧបករណ៍ដែលបានតម្លើងក្នុងពហុកីឡាដ្ឋានមរតកតេជោ ជាពិសេសអំពូលភ្លើង (Light Stick) ព្រោះវាសម្រាប់បង្ហាញផ្ទាំងទស្សនីយភាពផ្សេងៗសម្រាប់កម្មវិធីបើក និងកម្មវិធីបិទ។

សូមបញ្ជាក់ដែរថាព្រឹត្តិការណ៍៍សុីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនេះ នឹងប្រព្រឹត្តិទៅពីថ្ងៃទី៥ ខែឧសភា ដល់ថ្ងៃទី១៧ ខែឧសភា ឆ្នាំ២០២៣៕

ក្រោយពីផ្តួលកីឡាករិនីសិង្ហបុរី វៀតណាម និងថៃ នៅក្នុងប្រភេទកីឡា​ជូជឺតស៊ូ លើវិញ្ញាសា Ne-Waza ទម្ងន់ ៥២គីឡូក្រាម ហើយនោះ ពេលនេះកីឡាការិនី ខាន់ ចេសា  កំពុងតែសម្រាកយកកម្លាំង ត្រៀមប្រកួតដណ្តើមមេដាយមាសនៅរសៀល៤នេះ។

៣ប្រកួតរបស់ខាន់ ចេសានៅក្នុងថ្ងៃនេះ គឺបិទគូប្រកួតសូន្យពិន្ទុទាំងអស់ ដោយក្នុងនោះ ពេលប៉ះកីឡាការិនីវៀតណាម ពួកគេបានបោះបង់ចោលការប្រកួតថែមទៀត។

តែយ៉ាងណាមិញ នេះជាប៉ុន្មានប្រកួតដំបូងប៉ុណ្ណោះ យើងមានតែសង្ឃឹម និងរងចាំមើលតទៅទៀត ហើយរំពឹងថានាងនឹងធ្វើបានកាន់តែល្អទៀត នៅវេលាម៉ោង៤នេះ៕

នៅព្រឹកថ្ងៃទី០៤ ខែឧសភា ឆ្នាំ២០២៣នេះ ក្នុងជំនួបពិភាក្សាការងារជាមួយសម្ដេចតេជោ ហ៊ុន សែន នាយករដ្ឋមន្ត្រីកម្ពុជា ប្រមុខរដ្ឋឡាវ លោក ថងលុន ស៊ីសុលីត បានថ្លែងកោតសរសើរការរៀបចំព្រឹត្តិការណ៍ប្រកួតស៊ីហ្គេមលើកទី៣២ នៅកម្ពុជា និងរំពឹងថា កម្ពុជាទទួលបានមេដាយច្រើនក្នុងការប្រកួតនេះ។

នៅក្នុងជំនួបនេះ លោក ថងលុន បានថ្លែងអំណរគុណសម្ដេចតេជោ ដែលបានអញ្ជើញលោកចូលរួមក្នុងពិធីបើកកីឡាស៊ីហ្គេមនៅកម្ពុជា លោកពិតជាមានកិត្តិយសណាស់។ ជាពិសេសប្រមុខរដ្ឋឡាវរូបនេះបានគោរពថ្លែងអំណរគុណសម្ដេចតេជោ ដែលបានចូលរួមជួយការលំបាករបស់ឡាវ ទាំងវិស័យសុខាភិបាល និងវិស័យសេដ្ឋកិច្ច។

លោករំលេចដែរថា ទំនាក់ទំនងរវាងកម្ពុជា និងឡាវ កំពុងតែស្ថិតដល់ចំណុចកំពូល ហើយអ្វីដែលត្រូវធ្វើបន្ត គឺរួមគ្នាធ្វើឱ្យទំនាក់ទំនងនេះ ឈានឆ្ពោះឡើងមួយកម្រិតទៀត តាមរយៈការរួមគ្នាអនុវត្តតាមកិច្ចព្រមព្រៀងដែលមានស្រាប់ និងស្វែងរកិច្ចសហប្រតិបត្តិការផ្សេងបន្ថែមទៀត ដូចជា៖ លើវិស័យទេសចរណ៍ វិស័យវិនិយោគ វិស័យសន្តិសុខរួមគ្នាត្រៀមដោះស្រាយគ្រោះមហន្តរាយជាយថាហេតុ។

ក្នុងកិច្ចពិភាក្សានេះ នាយករដ្ឋមន្ត្រីបានស្នើសុំឱ្យភាគីទាំងពីរកម្ពុជា-ឡាវ រួមគ្នាពិនិត្យលើការរៀបចំកិច្ចព្រមព្រៀងមិនយកពន្ធត្រួតគ្នា ដើម្បីធ្វើយ៉ាងណា ជំរុញការវិនិយោគរវាងប្រទេសទាំងពីរ ឱ្យបានកាន់តែច្រើនឡើងថែមទៀត៕

ជាទូទៅ កាំជ្រួចត្រូវបានគេយកទៅប្រើប្រាស់ដើម្បីអបអរសាទរក្នុងឱកាសពិធីបុណ្យផ្សេងៗដែលនៅជុំវិញពិភពលោក។ នៅពេលបច្ចុប្បន្នកាំជ្រួច មានការវិវត្តប្រែប្រួលយ៉ាងខ្លាំងគួរឱ្យកត់សម្គាល់ ដោយដំបូងៗកាំជ្រួចមិនអាចធ្វើអ្វីផ្សេង ក្រៅពីផ្ទុះឡើយ ប៉ុន្តែក្រោយមក កាំជ្រួចអាចបង្កើតចេញជារូបរាងផ្សេងៗ មានពណ៌ចម្រុះ និងបន្លឺសំឡេងខុសៗគ្នាបានថែមទៀតផង។ ដូច្នេះហើយតើកាំជ្រួចមានប្រភពមកពីណា?

តាមការស្រាវជ្រាវកាលពីអំឡុង ៨០០ឆ្នាំមុន នៃគ្រិស្តសករាជ កាំជ្រួចគឺត្រូវបានបង្កើតឡើងដំបូងនៅឯប្រទេសចិនក្នុងទម្រង់ជាផាវ។ ក្រុមគីមីវិទូចិនសម័យបុរាណ គឺជាអ្នករកឃើញនឹងបង្កើតចេញជាម្សៅរំសេវដំបូងគេបង្អស់ ដែលវិធីសាស្រ្តដំបូងបំផុតនៃការបង្កើតផាវ គឺពួកគេនាំគ្នាញាត់រំសេវចូលក្នុងបំពង់ឫស្សី រួចហើយបោះវាចូលទៅក្នុងភ្នក់ភ្លើង ដែលបង្កើតឱ្យមានសំឡេងផ្ទុះយ៉ាងខ្លាំង។ ដោយជនជាតិចិននៅជំនាន់នោះមានជំនឿថា ការបំផ្ទុះផាវដែលបង្កើតចេញពីម្សៅរំសេវនេះអាចជួយការពារពួកគេពីវិញ្ញាណអាក្រក់ៗនានាបាន។

នៅសតវត្សទី១០ ជនជាតិចិនក៏បានរកឃើញថា ពួកគេអាចបង្កើតគ្រឿងផ្ទុះចេញពីរំសេវ។ ដូច្នេះពួកគេបានភ្ជាប់ផាវជាមួយនឹងគ្រាប់ព្រួញ ដែលពួកគេបាញ់ទៅលើខ្មាំងសត្រូវ។ ក្នុងអំឡុងពេល២០០ឆ្នាំក្រោយមកទៀត ផាវត្រូវបានកែច្នៃឱ្យក្លាយទៅជាកាំជ្រួចដែលអាចបាញ់ទៅលើសត្រូវដោយពុំចាំបាច់ត្រូវការគ្រាប់ព្រួញឡើយ។
កាំជ្រួចទាំងនោះក៏បានទៅដល់តំបន់អឺរ៉ុបកាលពីខ្ទង់សតវត្សទី១៣ ដោពួកគេចាប់ផ្តើមនឹកឃើញលាយឡំសារធាតុផ្សេងៗ ដើម្បីបង្កើនពន្លឺរបស់កាំជ្រួច ហើយបង្កើតចេញជារូបរាងប្លែកជាច្រើន។ ទីបំផុតពួកគេក៏អាចបង្កើតពណ៌ថ្មីសម្រាប់កាំជ្រួចបានថែមទៀត ខណៈពីដំបូងឡើយកាំជ្រួចមានតែពណ៌ទឹកក្រូចតែមួយប៉ុណ្ណោះ។
គិតមកដល់ពេលបច្ចុប្បន្ននេះប្រទេសចិនគឺអ្នកផលិតនិងនាំចេញកាំជ្រួចច្រើនជាងគេបំផុតនៅលើពិភពលោក៕

កាលពីយប់មិញសម្តេចតេជោហ៊ុនសែនបានចេញសារសំឡេងជាបន្ទាន់ភ្លាមៗទាក់ទងទៅនឹងបញ្ហាសំបុត្រចូលរួមពិធីបើក-បិទ និងការចូលរួមទស្សនាបាល់ទាត់។

សម្តេចតេជោបានមានប្រសាសន៍ថា៖” ស្តាតរបស់យើងចាស់អាចទទួលបានត្រឹមកម្រិត៣-៤មុឺននាក់ ក្នុងនោះមនុស្សដែលចង់ចូលមើល៣០មុឺន ឬ៥០មុឺននាក់។ ខ្ញុំ ព្រះករុណាខ្ញុំ សុំចិត្តបងប្អូនយោគយល់ចំពោះការលំបាកមួយនេះ ដែលរាជរដ្ឋាភិបាលគ្មានលទ្ធភាពដោះស្រាយនោះទេ។ ហើយខ្ញុំ ព្រះករុណាខ្ញុំ សូមអំពាវនាវដល់អ្នកមានសំបុត្រ ចាំបាច់ត្រូវតែទៅ ប្រសិនបើទៅមិនបានទេ សូមប្រគល់ឱ្យអ្នកផ្សេងទៀត ដែលជាមិត្តភ័ក្ត ដែលគាត់គ្មានសំបុត្រ បានទៅចូលរួម ដើម្បីចៀសវាងកុំឱ្យអ្នកបានសំបុត្រមិនទៅមើល បែរជាអ្នកចង់ទៅមើល គ្មានសំបុត្រ”។

ចុងក្រោយសម្តេចបានសង្កត់ធ្ងន់ថា៖”សង្ឃឹមថាប្រជាជន បងប្អូន ស្រលាញ់វិស័យកីឡារបស់យើង យោគយល់អធ្យាស្រ័យ ចំពោះរាជរដ្ឋាភិបាល ចំពោះគណកម្មការរៀបចំការប្រកួត ក៏ដូចជាទីកន្លែងការប្រកួតនីមួយៗ សូមយោគយល់អធ្យាស្រ័យ”៕