បរទេស៖ ក្រុមហ៊ុន FORD របស់សហរដ្ឋអាមេរិក បានប្រកាសលទ្ធផលអាជីវកម្មរថយន្តអគ្គិសនីរបស់ខ្លួនជាលើកដំបូងជាមួយនឹងការខាតបង់ចំនួនជាង ៣ ពាន់លានដុល្លារក្នុងរយៈពេលពីរឆ្នាំចុងក្រោយនេះ។
របាយការណ៍ប្រាក់ចំណូលគឺគួរឱ្យកត់សម្គាល់សម្រាប់ការខាតបង់ជាមធ្យម ៥៨,៣៣៣ ដុល្លារក្នុងមួយរថយន្តអគ្គិសនីដែលបានលក់ក្នុងរយៈពេល ៣ ខែដំបូងនៃឆ្នាំនេះ។ នៅក្នុងត្រីមាសទីមួយ ក្រុមហ៊ុន Ford បានចែកចាយរថយន្តអគ្គិសនីត្រឹមតែ ១២,០០០ គ្រឿងដល់អតិថិជន ។ ហើយអាជីវកម្មរថយន្តថ្មរកចំណូលបានត្រឹមតែ ៧០០ លានដុល្លារប៉ុណ្ណោះ បើធៀបនឹង ១.៦ ពាន់លានដុល្លារក្នុងត្រីមាសចុងក្រោយនៃឆ្នាំ ២០២២។

ក្រុមហ៊ុនរថយន្ត Ford បានពន្យល់ពីកត្តាមួយចំនួនដែលនាំទៅរកលទ្ធផលដ៏ក្រៀមក្រំ រួមទាំងការចំណាយខ្ពស់ បច្ចេកវិទ្យាដែលមានតម្លៃថ្លៃជាង និងការចំណាយពាក់ព័ន្ធ ព្រមទាំងសម្ពាធពីអតិផរណា។ ការលក់ទាបគឺដោយសារតែការផ្អាកផលិតកម្មសម្រាប់ការធ្វើឱ្យប្រសើរឡើងនៅរោងចក្រ Cuautitlan ក្នុងប្រទេសម៉ិកស៊ិកដើម្បីបង្កើនការផលិតរថយន្ត Mustang Mach-E ដែលត្រូវបានរំពឹងថានឹងកើនឡើងដល់ ២៧០,០០០ គ្រឿងនៅឆ្នាំ ២០២៣ ។

ទោះជាយ៉ាងណាក៏ដោយក្រុមហ៊ុនរថយន្តអគ្គីសនី Ford រួមគ្នាជាមួយក្រុមហ៊ុន Ford Pro និងក្រុមហ៊ុន Ford Blue ជួយឱ្យក្រុមហ៊ុនផលិតរថយន្តអាមេរិកសម្រេចបានប្រាក់ចំណេញសុទ្ធ ៤.២% ដែលជាកម្រិតខ្ពស់បំផុតក្នុងរយៈពេលជាងមួយឆ្នាំ ដែលជាកត្តាមួយសម្រាប់ក្រុមហ៊ុន Ford បន្តប្រើប្រាស់រថយន្តអគ្គិសនីរហូតដល់វាអាចរកប្រាក់ចំណេញបាន៕

ប្រភព៖vnexpress

ប្រទេសកូរ៉េខាងត្បូង ៖ សហជីពបុគ្គលិកក្រុមហ៊ុន Samsung electronics លើកឡើងថា សមាជិករបស់ខ្លួននឹងប្រមូលផ្តុំគ្នាធ្វើបាតុកម្ម ក្រោយពីពួកគេមិនអាចព្រមព្រៀងគ្នាជាមួយក្រុមហ៊ុនទាក់ទងនឹងការទាមទារដំឡើងប្រាក់ខែ ។ ដូច្នេះ វានឹងក្លាយជាហេតុការណ៍ធ្វើបាតុកម្មលើកដំបូងរបស់ក្រុមហ៊ុន ។

សហជីពបុគ្គលិកក្រុមហ៊ុន Samsung ដែលបានធ្វើជាតំណាងឱ្យបុគ្គលិក Samsung ជាង១ម៉ឺននាក់បាននិយាយនៅបរិវេណខាងក្រៅអគារមួយកន្លែងរបស់ Samsung នៅទីក្រុងសេអ៊ូល កាលពីថ្ងៃទី៤ ខែឧសភាថា ផ្នែកគ្រប់គ្រងក្រុមហ៊ុន Samsung បានបដិសេធការចរចាដំឡើងប្រាក់ខែ ហើយសហជីពបានអំពាវនាវឱ្យលោក Lee Jae-young ប្រធានក្រុមហ៊ុន Samsung ចូលរួមការចរចាផងដែរ ។

លោក Lee Hyun-Kook អ្នកតំណាងរបស់សហជីពបុគ្គលិកក្រុមហ៊ុន Samsung និយាយថា សមាជិករបស់ខ្លួននឹងនាំគ្នាធ្វើបាតុកម្ម ក្រោយពីសមាជិកបានពិភាក្សាគ្នារួចហើយ ។ ទោះយ៉ាងណា ការធ្វើបាតុកម្មនឹងកើតឡើងឬអត់នោះ គឺអាស្រ័យលើលោក Lee Jae-young ជាប្រធានក្រុមហ៊ុន Samsung ថា តើលោកពេញចិត្តនឹងចូលរួមការចរចាឬទេ ។ លោក Lee Hyun-Kook និយាយថា ៖ «គ្រប់យ៉ាងវាអាស្រ័យលើលោកប្រធាន Lee Jae-young ។ យើងសូមសំណូមពរឱ្យលោកប្រធានចូលរួមតុចរចាលើកនេះផង» ។

ចំណែកអ្នកនាំពាក្យក្រុមហ៊ុន Samsung និយាយថា ខាងក្រុមហ៊ុនកំពុងតាមដានស្ថានការណ៍នេះយ៉ាងដិតដល់ និងវាយតម្លៃស្ថានការណ៍ដោយប្រុងប្រយ័ត្ន ។ បើបុគ្គលិកនាំគ្នាធ្វើបាតុកម្មតាមការគំរាមរបស់សហជីពបុគ្គលិកក្រុមហ៊ុន Samsung មែននោះ គឺចាត់ទុកថា វាជាបាតុកម្មលើកដំបូងចាប់ពីក្រុមហ៊ុននេះបានបង្កើតឡើងនៅឆ្នាំ១៩៦៩ ។

ជម្លោះរឿងប្រាក់ខែរវាងក្រុមហ៊ុន Samsung និងសហជីពបុគ្គលិកបានកើតឡើងស្របពេលស្ថានភាពប្រាក់ចំណេញរបស់ក្រុមហ៊ុន Samsung មិនល្អ ។ ក្រុមហ៊ុនបានបង្ហាញពីប្រាក់ចំណេញក្នុងត្រីមាសទី១ ឆ្នាំ២០២៣ ថា បានធ្លាក់ចុះខ្លាំងបំផុតក្នុងរយៈពេល១៤ឆ្នាំ ដោយសារតម្លៃ និងតម្រូវការ Memory Chips ធ្លាក់ចុះ ។

សហជីពបុគ្គលិកក្រុមហ៊ុន Samsung បង្ហាញថា សហជីពបានស្នើឱ្យក្រុមហ៊ុន Samsung ដំឡើងប្រាក់ខែឱ្យបុគ្គលិកចំនួន៦% ប៉ុន្តែក្រុមហ៊ុន Samsung បញ្ជាក់ថា ក្រុមហ៊ុននឹងដំឡើងប្រាក់ខែបុគ្គលិកត្រឹមតែ៤% ប៉ុណ្ណោះ ៕ ប្រភព ៖ bangkokbiznews

ប្រទេសថៃ ៖ ស្ត្រីមីយ៉ាន់ម៉ាម្នាក់បានបង្ហោះវីដេអូឃ្លីបមួយ ហើយធ្វើឱ្យមានការជជែកតវ៉ាគ្នាក្នុងបណ្តាញសង្គមប្រទេសថៃ រហូតមានពលរដ្ឋថៃបណ្តេញឱ្យស្ត្រីរូបនេះចេញពីប្រទេសថៃផងដែរ ប៉ុន្តែមិនយូរប៉ុន្មាន ស្ត្រីរូបនេះបានបង្ហោះវីដេអូមួយទៀតសូមទោស ។ អ្នកជំនាញផ្នែកពលករបរទេសប្រចាំប្រទេសថៃបង្ហាញថា ពលករមីយ៉ាន់ម៉ាបាននាំគ្នាតវ៉ាក្នុងថ្ងៃទិវាពលកម្មកន្លងមក រហូតមានរឿងកើតឡើង ព្រោះពួកគេអំពាវនាវឱ្យមានប្រព័ន្ធគ្រប់គ្រងការងារត្រឹមត្រូវសម្រាប់ពលករបរទេស ។

កាលពីថ្ងៃទី១ ខែឧសភា ពលករបរទេសបានប្រមូលផ្តុំគ្នាតវ៉ានៅបរិវេណផ្លូវបំបែករ៉ាជព្រះសុង ។ ក្រោយមក មានស្ត្រីពលករមីយ៉ាន់ម៉ាម្នាក់បានបង្ហោះវីដេអូឃ្លីបទាមទារសិទ្ធិពលករបរទេសដែលធ្វើការនៅប្រទេសថៃ ដើម្បីឱ្យពួកគេមានសិទ្ធិស្មើគ្នា ។ ប៉ុន្តែនៅចុងបញ្ចប់នៃវីដេអូឃ្លីប ស្ត្រីរូបនេះបាននិយាយស្តីមិនសមរម្យ រហូតធ្វើឱ្យពលរដ្ឋថៃខ្លះដែលមើលវីដេអូរបស់នាងក្នុងតិកតុកចេញមកប្រកែក ។ បន្ទាប់មក ស្ត្រីរូបនេះបានចេញវីដេអូសូមទោស ហើយមានអ្នកចូលមកបញ្ចេញយោបល់ជាច្រើនម៉ឺននាក់ ។

លោក Siwawong Suktawee មន្ត្រីតំណាងមកពី Migrant Working Group ដែលធ្វើការផ្នែកពលករបរទេស បាននិយាយមកកាន់សារព័ត៌មានថៃរ៉ាត់ថា ការចេញមកតវ៉ារបស់ពលករមីយ៉ាន់ម៉ាជាច្រើននាក់ក្នុងថ្ងៃទិវាពលកម្ម គឺពាក់ព័ន្ធនឹងបញ្ហាការធ្វើលិខិតឆ្លងដែនដែលកំពុងជាប់គាំងនៅឡើយ ព្រោះនៅព្រំដែនខ្លះ ពលករមីយ៉ាន់ម៉ាមិនអាចឆ្លងដែនទៅធ្វើលិខិតឆ្លងដែនបានទេ ។ លើសពីនេះ មានបញ្ហានយោបាយក្នុងប្រទេសធ្វើឱ្យពលករមួយចំនួនមិនហ៊ានត្រឡប់ទៅប្រទេសរបស់ខ្លួនវិញ ព្រោះខ្លាចមិនអាចត្រឡប់មកធ្វើការនៅថៃបន្តទៀត ។ កន្លងមក ប្រទេសថៃបានលើកលែងដោយសារមានជំងឺកូវីដរាតត្បាត ប៉ុន្តែប្រទេសថៃនឹងឈប់លើកលែងចាប់ពីថ្ងៃទី១៥ ខែឧសភា ឆ្នាំ២០២៣ ។

បញ្ហាប្រឈមពេលនេះ គឺស្ថានទូតមីយ៉ាន់ម៉ានៅថៃបានកំណត់ចំនួនមនុស្សមកបន្តសុពលភាពលិខិតឆ្លងដែន ដោយសារបារម្ភពីរដ្ឋាភិបាលយោធាមីយ៉ាន់ម៉ា ខណៈថៃនឹងបោះឆ្នោតនៅថ្ងៃទី១៤ ខែឧសភា ។ ដូច្នេះ វាពិបាកដោះស្រាយបញ្ហារបស់ពលករទាំងនេះណាស់ ទើបធ្វើឱ្យពលករមីយ៉ាន់ម៉ាជាង១សែននាក់រស់នៅថៃ ត្រូវក្លាយជាពលករខុសច្បាប់ ។ បើគ្មានដំណោះស្រាយទេ វានឹងក្លាយជាបញ្ហាសំខាន់ចំពោះពលករមីយ៉ាន់ម៉ា ហើយពួកគេចេញមកតវ៉ាកាន់តែច្រើន ។

កន្លងមក ពលករមីយ៉ាន់ម៉ាបានធ្វើឯកសារធ្វើការនៅថៃ២ឆ្នាំម្តង ហើយពួកគេបានចំណាយប្រាក់ថ្លៃឯកសារមិនដល់១ម៉ឺនបាតទេ ប៉ុន្តែក្រោយមក ឈ្មួញកណ្តាលបានដំឡើងថ្លៃឈ្នួលធ្វើឯកសារ គឺធ្វើឯកសារម្តងអស់២ម៉ឺនបាត ។ ហេតុនេះ ពលករមីយ៉ាន់ម៉ាជាច្រើននាក់មានអារម្មណ៍ថា ធ្វើការស្ទើរស្លាប់នៅថៃ ហើយត្រូវយកប្រាក់យ៉ាងច្រើនមកធ្វើឯកសារតែម្យ៉ាង និងគ្មានប្រាក់សល់ជាប់ខ្លួន ពួកគេក៏រងសម្ពាធកាន់តែខ្លាំង ។ លើសពីនេះ បើឯកសារធ្វើការនៅថៃមិនត្រឹមត្រូវ ពួកគេត្រូវប្រឈមនឹងអាជ្ញាធរថៃចាប់ខ្លួន និងត្រូវបង់ប្រាក់ពិន័យទៀត ។

ក្រោយពីជំងឺកូវីដធូរស្រាល ពលករមីយ៉ាន់ម៉ាបានចូលមកប្រទេសថៃកាន់តែច្រើន អ្នកខ្លះមកថៃដោយសារបញ្ហានយោបាយក្នុងប្រទេសរបស់ខ្លួន ។ ដូច្នេះ មានអ្នកចូលមកត្រឹមត្រូវតាមច្បាប់ និងលួចចូលមកតាមច្រកធម្មជាតិ ។ ភ្នាក់ងាររដ្ឋាភិបាលថៃ គួរកុំយកប្រាក់ខ្ពស់ពេកសម្រាប់ការចុះឈ្មោះពលករបរទេស ព្រោះពួកគេមានចំណែករួមក្នុងការអភិវឌ្ឍសេដ្ឋកិច្ចថៃ ហើយពលករខ្លះក៏បានធ្វើជាឈ្មួញកណ្តាលជួយនាំផលិតផលថៃទៅលក់នៅប្រទេសរបស់ខ្លួនដែរ ។ ដូច្នេះ ប្រទេសថៃមិនអាចរីកចម្រើនតែឯងបានទេ ប៉ុន្តែត្រូវមានប្រទេសជិតខាងជួយ ៕ ប្រភព ៖ Thairath

ការប្រកួតប្រភេទកីឡាទូកក្ដោង សម្រាប់ព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ ពីតំបន់ឆ្នេរសមុទ្រដ៏ស្រស់ស្អាតនៃខេត្តព្រះសីហនុ ដែលមាន ៩ វិញ្ញាសា បញ្ចប់ទៅដោយភាពជោគជ័យហើយព្រមទាំងរកឃើញម្ចាស់មេដាសផងដែរគឺបានទៅលើអត្តពលិកប្រទេសថៃដោយមានការអញ្ជើញចូលរួមបំពាក់មេដាយដោយ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ។

ក្នុងប្រភេទកីឡាទូកក្ដោង អត្តពលិកមកពីប្រទេសថៃ ប្រមូលមេដាយមាសបានច្រើនជាងគេដោយទទួលបានចំនួន ៤គ្រឿង ចំណែកសិង្ហបុរី ទទួលបានមេដាយមាស ៣គ្រឿង និងម៉ាឡេស៊ី រកបានមេដាយមាស ២គ្រឿង ដោយឡែកម្ចាស់ផ្ទះកម្ពុជា ជាមួយ ហ្វីលីពីន ទទួលបានមេដាយប្រាក់ ១គ្រឿង និងសំរឹទ្ធ ២គ្រឿងដូចគ្នា។

គួរបញ្ជាក់ផងដែរថា កីឡាទូកក្តោង បានចាប់ផ្តើមប្រកួតនៅថ្ងៃទី២ ខែឧសភា វេលាម៉ោង១០ និង ៣០នាទីព្រឹក និងបានបញ្ចប់នៅថ្ងៃទី៨ ខែឧសភា ឆ្នាំ២០២៣។ ទូកក្តោងផ្នែកបុរស និងកីឡាទូកក្តោងផ្នែកនារី មានកីឡាមកពីប្រទេសចំនួន៦ ស្មើនឹង ១០១នាក់ ចូលរួមប្រកួត ក្នុងនោះរួមមាន៖៖ កម្ពុជា មានកីឡាករចូលរួមចំនួន ១៨រូប , ថៃ មានកីឡាករចូលរួមចំនួន ២៧រូប, សិង្ហបុរី មានកីឡាករចូលរួមចំនួន ១៦រូប, ម៉ាឡេស៊ី មានកីឡាករចូលរួមចំនួន ១៥រូប ហ្វីលីពីន មានកីឡាករចូលរួមចំនួន ១៤រូប , វៀតណាម មានកីឡាករចូលរួមចំនួន ១១រូប៕

ប្រទេសមីយ៉ាន់ម៉ា ៖ កាលពីដើមខែឧសភា ឆ្នាំ២០២៣ លោក Qin Kang រដ្ឋមន្ត្រីក្រសួងការបរទេសចិនបានធ្វើដំណើរទៅកាន់ប្រទេសមីយ៉ាន់ម៉ា និងចូលជួបឧត្តមសេនីយជាន់ខ្ពស់របស់មីយ៉ាន់ម៉ា លោក Min Aung Lai នៅទីក្រុងណៃពិដោ ។ ប្រទេសចិនត្រូវបានចាត់ទុកថា ជាសម្ព័ន្ធមិត្តដ៏សំខាន់មួយ និងជាប្រទេសស្វែងរកអាវុធឱ្យមីយ៉ាន់ម៉ា ខណៈប្រទេសចិនមិនបានថ្កោលទោសរដ្ឋាភិបាលយោធាដែលចូលមកគ្រប់គ្រងប្រទេសនេះទេ ។

តាមសេចក្តីថ្លែងការណ៍ពីនាយកដ្ឋានព័ត៌មានមីយ៉ាន់ម៉ាបញ្ជាក់ថា លោក Qin Kang បានថ្លែងទៅកាន់លោកឧត្តមសេនីយ Min Aung Lai ថា ប្រទេសចិននឹងឈរនៅខាងមីយ៉ាន់ម៉ាលើឆាកអន្តរជាតិ, គាំទ្រឱ្យសហគមន៍ពិភពលោកគោរពអធិបតេយ្យភាពរបស់មីយ៉ាន់ម៉ា និងចូលរួមដើរតួនាទីដើម្បីជួយឱ្យប្រទេសនេះសម្រេចបាននូវសុខសន្តិភាពផងដែរ ។ ក្រៅពីនេះ ប្រទេសចិននឹងបន្តជំរុញការអភិវឌ្ឍរបស់មីយ៉ាន់ម៉ា, ពន្លឿនគម្រោងសហការសំខាន់ៗនៅច្រករបៀងសេដ្ឋកិច្ចចិន-មីយ៉ាន់ម៉ាឱ្យបានឆាប់រហ័ស និងដំណើរការគម្រោងផ្សេងៗក្នុងផ្នែកកសិកម្ម ការអប់រំ និងសុខាភិបាល ។

ក្នុងការពិភាក្សាជាមួយគ្នានេះ ភាគីទាំងពីរបានពិភាក្សាអំពីប្រធានបទសំខាន់ៗដូចជា ទំនាក់ទំនងការទូត, កិច្ចសហការមិត្តភាព, ស្ថានការណ៍បច្ចុប្បន្ននៅមីយ៉ាន់ម៉ា, ពាណិជ្ជកម្មតាមព្រំដែន, ការវិនិយោគ និងកិច្ចសហការផ្នែកថាមពល និងអគ្គិសនី ។ក្រោយពីដំណើរទស្សនកិច្ចមកកាន់ប្រទេសមីយ៉ាន់ម៉ា លោក Qin Kang បានធ្វើដំណើរបន្តទៅកាន់ប្រទេសឥណ្ឌា ដើម្បីជួបជាមួយក្រុមរដ្ឋមន្ត្រីការបរទេសមកពីប្រទេសផ្សេងៗរបស់អង្គការសហប្រតិបត្តិការសៀងហៃ ។ ចិន និងឥណ្ឌា គឺជាប្រទេសតំណាងឱ្យការពិភាក្សាលើកចុងក្រោយនៅទីក្រុងញូវដេលីរបស់ឥណ្ឌា អំពីការដោះស្រាយវិបត្តិនៅមីយ៉ាន់ម៉ា ។ ដូច្នេះ ប្រទេសថៃក៏មានចំណែករួមផងដែរ ស្របពេលមានការខកបំណងដោយសារអាស៊ានមិនអាចធ្វើឱ្យមីយ៉ាន់ម៉ាយល់ព្រមធ្វើតាមកិច្ចព្រមព្រៀងនៅឆ្នាំ២០២១ ដើម្បីស្វែងរកវិធីដោះស្រាយបញ្ហាបន្តទៀត ៕ ប្រភព ៖ AEC Connect

ប្រសិនបើយើងមើលឃើញផ្កាយដុះកន្ទុយជាច្រើនហោះឆ្លងកាត់លើផ្ទៃមេឃពេលរាត្រី ហើយហាក់ចេញមកពីចំណុចតែមួយ បាតុភូតនោះគេហៅថា “ទេពច្យុត”។

ពួកវាគឺជាបំណែកឬកម្ទេចកម្ទី ភាគច្រើនបន្សល់ទុកដោយអាចម៍ផ្កាយប្រភេទ Comet ដែលរសាត់អណ្តែតជុំវិញព្រះអាទិត្យ។ អាចម៍ផ្កាយមួយប្រភេទទៀតគឺ Asteroid។

នៅពេលផែនដីគោចរកាត់កម្ទេចកម្ទីទាំងនេះ ពួកវាក៏ត្រូវធ្លាក់ចូលក្នុងស្រទាប់បរិយាកាសភពយើង ហើយកកិតឆេះក្នុងល្បឿនយ៉ាងលឿន ដែលបង្កើតទៅជាផ្កាយដុះកន្ទុយជាច្រើននៅលើផ្ទៃមេឃ។

ឈ្មោះ “ទេពច្យុត” នីមួយៗ ត្រូវបានគេដាក់ឱ្យតាមកញ្ចុំផ្កាយលើផ្ទៃមេឃ ដែលចំណុចចាប់ផ្តើមនៃទេពច្យុតទាំងនោះហៅថា Radiant Point ស្ថិតនៅ។

គួរបញ្ជាក់ផងដែរថា តាមជំនឿមួយចំនួនគេយល់ឃើញថា ប្រសិនបើយយើងឃើញទេពច្យុតកាលណា សូមឱ្យយើងបួងសួងដើម្បីសម្រេចបំណងដែលបានប្រាថ្នា៕