ប្រទេសកម្ពុជា ៖ សារព័ត៌មានប្រទេសថៃបានចុះផ្សាយថា ការដាក់ពិន្ទុក្នុងការប្រកួតកីឡាស៊ីហ្គេមនៅប្រទេសកម្ពុជាមិនយុត្តិធម៌ទេ ដែលបានធ្វើឱ្យកីឡាករថៃចុះចាញ់ ខណៈក្រុមកីឡាករថៃបានត្រៀមខ្លួនហ្វឹកហាត់យ៉ាងខ្លាំង និងត្រៀមខ្លួនអស់រយៈពេលយូរណាស់ ប៉ុន្តែបែរជាមកចុះចាញ់កីឡាករខ្មែរជាម្ចាស់ផ្ទះទៅវិញ ។

កីឡាករថៃឈ្មោះ ផានុវ៉ាត់ ឌីយ៉ាតាម ជាម្ចាស់ពានរង្វាន់ជើងឯកអាស៊ីចុងក្រោយបង្អស់បាននិយាយទាំងស្រក់ទឹកភ្នែក ក្រោយពីរូបគេជាមួយកីឡាករដៃគូម្នាក់ទៀតឈ្មោះ ណាវិន កកែវ បានចាញ់ពិន្ទុកីឡាករខ្មែរ ហើយកីឡាករថៃទាំងពីររូបនេះទទួលបានត្រឹមតែមេដាយប្រាក់ប៉ុណ្ណោះ ហើយកីឡាករខ្មែរជាម្ចាស់ផ្ទះទទួលបានមេដាយមាស ។

កីឡាករ ណាវិន កកែវ និយាយថា ៖ «ខ្ញុំបានប្រឹងប្រែងអស់ពីសមត្ថភាពហើយ ប៉ុន្តែបញ្ហាមកពីគណៈកម្មការដាក់ពិន្ទុ ។ បើទោះជាពេលនេះ វាជាការចូលរួមប្រកួតកីឡាស៊ីហ្គេមលើកដំបូងរបស់ពួកយើង ប៉ុន្តែពួកយើងបានដាក់ក្តីសង្ឃឹមខ្ពស់ណាស់» ។

ចំណែកកីឡាករ ផានុវ៉ាត់ ឌីយ៉ាតាម បាននិយាយទាំងស្រក់ទឹកភ្នែកថា ៖ «កីឡាករដែលចូលរួមប្រកួត យើងដឹងទាំងអស់ព្រោះធ្លាប់ជួបមកអស់ហើយ រួមទាំងកីឡាកររបស់ម្ចាស់ផ្ទះកម្ពុជាផងដែរ ដែលទើបជួបគ្នាក្នុងការប្រកួតដណ្តើមជើងឯកអាស៊ីលើកចុងក្រោយ ។ ដូច្នេះ យើងទទួលបានជ័យជម្នះរាល់លើកក្នុងការប្រកួត ប៉ុន្តែការដាក់ពិន្ទុលើកនេះមិនយុត្តិធម៌ទេ ហើយនឹងធ្វើកីឡាករអស់កម្លាំងចិត្ត ព្រោះយើងបានត្រៀមខ្លួនហ្វឹកហាត់ខ្លាំងក្លា និងប្រើពេលយូរណាស់ ហើយក៏មិនបានត្រឡប់ទៅផ្ទះរកម៉ែ និងមិនបានជួបអ្នកណាឡើយ ។ ខ្ញុំមានអារម្មណ៍ច្របូកច្របល់ណាស់ដែលចាញ់ម្ចាស់ផ្ទះនៅពេលនេះ ប៉ុន្តែយើងត្រូវប្រកួតបន្តទៀត ហើយការប្រកួតកីឡាស៊ីហ្គេមលើកក្រោយ ខ្ញុំនឹងយកឈ្នះវិញជាមិនខាន» ។

ជុំវិញការលើកឡើងរបស់កីឡាករថៃនេះ អ្នកលេងបណ្តាញសង្គមខ្មែរបានបញ្ចេញមតិថា ការដាក់ពិន្ទុការប្រកួតកីឡាស៊ីហ្គេមនៅប្រទេសកម្ពុជាមានភាពយុត្តិធម៌បំផុតហើយ ហើយកីឡាករថៃត្រូវតែទទួលស្គាល់ការពិត ។ អ្នកលេងបណ្តាញសង្គមខ្មែរម្នាក់និយាយថា ការប្រកួតមានចាញ់ មានឈ្នះ នៅពេលកម្ពុជាចាញ់ហ្វីលីពីន កម្ពុជាមិនបានស្រែកថា មិនសុក្រិតនោះទេ ។ យើងត្រូវទទួលស្គាល់ពីសមត្ថភាព និងការពិត ហើយសូមឱ្យសារព័ត៌មានថៃសរសេរពីការពិតច្បាស់លាស់នៃការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះប្រកបដោយវិជ្ជាជីវៈ និងថ្លៃថ្នូរផង ។ រីឯពលរដ្ឋខ្មែរម្នាក់ទៀតថា រៀនទទួលស្គាល់ការពិតទៅ ពេលឈ្នះ ស្រែកថាយុត្តិធម៌ ហើយពេលចាញ់ ស្រែកថាអយុត្តិធម៌ ។

ដូចគ្នានេះ អ្នកលេងបណ្តាញសង្គមខ្មែរម្នាក់ទៀតថា ជនជាតិសៀម ពេលចាញ់ មិនចេះទទួលយកការពិតទេ ហើយយកលេសមិនចេះអស់មកនិយាយ ។ ប្រជាជនថៃមើលទៅខ្វះការរៀនសូត្រ និងសីលធម៌ក្នុងការរស់នៅណាស់ ព្រោះមើលងាយជាតិសាសន៍ដទៃ ។ ចំណែកពលរដ្ឋខ្មែរម្នាក់ទៀតថា គោលបំណងនៃការបង្កើតការប្រកួតកីឡាស៊ីហ្គេមនេះ គឺដើម្បីបង្កើតនូវចំណងមិត្តភាពរវាងប្រទេសអាស៊ានទាំងអស់ មិនមែនព្យាយាមបង្កើតសត្រូវទេ ហើយសៀមនៅតែជាសៀមមែន ។ ដូចគ្នានេះ ពលរដ្ឋខ្មែរម្នាក់ទៀតថា ទទួលស្គាល់ការពិតខ្លះទៅ ដើម្បីក្លាយជាប្រទេសមួយថ្លៃថ្នូរនៅលើពិភពលោក មិនមែនឃើញសមត្ថភាពគូប្រជែងល្អជាង បែរជាស្រែកថា គេប្រើល្បិច ហើយកុំជ្រុលនិយមហួសព្រំដែនពេក ។

ទោះយ៉ាងណា គេសង្កេតឃើញថា ប្រទេសថៃ និងពលរដ្ឋថៃតែងបង្កើតបញ្ហាមិនចេះចប់ជាមួយកម្ពុជា ហើយពេលកីឡាករថៃមកប្រកួតកីឡាស៊ីហ្គេមនៅកម្ពុជា ពួកគេតែងថតរូបភាពពីកម្ពុជាយកទៅផ្សព្វផ្សាយទៅកាន់ពិភពលោក និងនិយាយថា កម្ពុជាខ្វះខាតចំណុចនេះ ខ្វះខាតចំណុចនោះ មិនល្អ មិនយុត្តិធម៌ និងគ្មានរបៀបរៀបរយ ។ ប៉ុន្តែចង់សួរថា តើនៅប្រទេសថៃពិតជាល្អគ្រប់ដប់ទាំងអស់ឬ ? ប្រទេសថៃក៏មានលូទឹកស្អុយ គំនរសំរាម និងគ្មានសណ្តាប់ធ្នាប់ច្រើនណាស់ ប៉ុន្តែពេលទៅប្រទេសថៃ ពលរដ្ឋខ្មែរយើងមិនដែលថតទិដ្ឋភាពទាំងនេះមកផ្សព្វផ្សាយទេ ដែលខុសពីចរិតកូនថៃមួយចំនួន ៕

ប្រភព ៖ Siamsport

ប្រទេសកម្ពុជា ៖ សារព័ត៌មានមួយរបស់ប្រទេសថៃបានចុះផ្សាយថា ពិធីបើកការប្រកួតកីឡាស៊ីហ្គេម លើកទី៣២ នៅទីក្រុងភ្នំពេញ ប្រទេសកម្ពុជា មានអ្នកមកចូលរួមទស្សនាយ៉ាងច្រើនកុះករ និងរំលេចឡើងនូវពន្លឺភ្លើងពណ៌ដ៏ស្រស់ស្អាត និងអស្ចារ្យ ។ លើសពីនេះ ប្រទេសកម្ពុជាបានរៀបចំទីលានប្រកួតដ៏ធំទូលាយឱ្យសមនឹងការរង់ចាំធ្វើជាម្ចាស់ផ្ទះប្រកួតកីឡាស៊ីហ្គេមអស់រយៈពេលជាច្រើនឆ្នាំផងដែរ ។

ទោះយ៉ាងណា សារព័ត៌មានថៃចុះផ្សាយទៀតថា មានឪពុកម្តាយខ្លះបណ្តោយឱ្យកូនរបស់ខ្លួនលេងទឹកយ៉ាងសប្បាយរីករាយនៅបរិវេណខាងមុខពហុកីឡដ្ឋានមរតកតេជោ ក្នុងអំឡុងពេលពួកគេមកទស្សនាពិធីបើកការប្រកួតកីឡាស៊ីហ្គេមជាផ្លូវការនេះ ។ សារព័ត៌មានរបស់ថៃបន្តថា ដោយសារតែអាកាសធាតុក្តៅខ្លាំងពេក ទើបធ្វើឱ្យក្មេងៗនាំគ្នាលេងទឹកដើម្បីកាត់បន្ថយកំដៅ ។

ក្រោយពីសារព័ត៌មានថៃចុះផ្សាយបែបនេះ មានអ្នកលេងបណ្តាញសង្គមថៃបញ្ចេញមតិថា ហេតុអ្វីបានជាឪពុកម្តាយពួកគេមិនស្លៀកខោឱ្យកូន ពីព្រោះនៅទីនេះជាទីក្រុង មិនមែននៅតាមស្រុកស្រែទេ ។ ពលរដ្ឋថៃម្នាក់ទៀតថា វាជាការចងចាំក្នុងវ័យកុមារ និងសុំឱ្យការប្រកួតកីឡាស៊ីហ្គេមលើកនេះជាការបំផុសគំនិតឱ្យក្មេងសម័យថ្មីរបស់កម្ពុជាអភិវឌ្ឍន៍បន្តទៀត ។

ដូចគ្នានេះ ពលរដ្ឋថៃម្នាក់ទៀតនិយាយថា វាជារូបភាពមួយដ៏ស្រស់ស្អាតសម្រាប់ការប្រកួតកីឡាស៊ីហ្គេមនៅប្រទេសកម្ពុជា ។ ចំណែកនារីម្នាក់ទៀតថា គួរឱ្យអាណិតណាស់ យូរៗទើបកម្ពុជាបានធ្វើជាម្ចាស់ផ្ទះម្តង អីចឹង ក្មេងៗក៏សប្បាយនឹងការលេងទឹកបែបនេះ ៕ ប្រភព ៖ PPTV HD 36

ក្រុមហ៊ុន Samsung Electronics បានហាមឃាត់បុគ្គលិករបស់ខ្លួនប្រើប្រាស់កម្មវិធី ChatGPT រួមទាំងកម្មវិធី Google Bard និង Bing ផងដែរ ក្រោយពីវិស្វកររបស់ក្រុមហ៊ុនបានធ្វើឱ្យបែកធ្លាយទិន្នន័យសំខាន់របស់ក្រុមហ៊ុនតាម ChatGPT កាលពីខែមេសា ឆ្នាំ២០២៣ ។

សារព័ត៌មាន Bloomberg ចុះផ្សាយថា ក្រុមហ៊ុន Samsung បានជូនដំណឹងទៅកាន់បុគ្គលិកអំពីគោលការណ៍ថ្មីថា ទិន្នន័យដែលផ្ញើតាមរយៈ AI platform ទាំងនេះត្រូវបានគេរក្សាទុកនៅ server ខាងក្រៅ ។ ដូច្នេះ ពិបាកក្នុងការលុបចោលណាស់ ហើយព័ត៌មានអាចធ្លាយទៅដល់មនុស្សខាងក្រៅបាន ។

តាមការស្ទង់មតិទៅលើបុគ្គលិកក្រុមហ៊ុន Samsung អំពីការប្រើប្រាស់ឧបករណ៍ AI ឃើញថា អ្នកឆ្លើយតប៦៥% គិតថា បច្ចេកវិទ្យានេះគ្មានសុវត្ថិភាពសម្រាប់អ្នកប្រើប្រាស់ ខណៈកាលពីខែមេសា ឆ្នាំ២០២៣ មានក្រុមវិស្វកររបស់ Samsung បានបង្ហោះកូដក្រុមហ៊ុនដោយចៃដន្យទៅក្នុងកម្មវិធី ChatGPT ។ អ្នកតំណាងក្រុមហ៊ុន Samsung បញ្ជាក់ថា ក្រុមហ៊ុនបានហាមឃាត់បុគ្គលិកប្រើប្រាស់ឧបករណ៍ generative AI គ្រប់ប្រភេទ ។

ការចាប់អារម្មណ៍ប្រើប្រាស់កម្មវិធី ChatGPT បានកើនឡើងជាលំដាប់ទាំងផ្នែកខាងក្នុង និងខាងក្រៅក្រុមហ៊ុន ។ ក្រុមហ៊ុន Samsung បានប្រាប់បុគ្គលិកថា បើទោះជាចំណាប់អារម្មណ៍នេះផ្តោតលើផលប្រយោជន៍ និងសក្តានុពលក្តី ប៉ុន្តែក៏មានការបារម្ភអំពីគ្រោះថ្នាក់ដល់សុវត្ថិភាពអ្នកប្រើប្រាស់ផងដែរ ។

ក្រុមហ៊ុន Samsung បានហាមឃាត់បុគ្គលិកប្រើប្រាស់កម្មវិធី ChatGPT ក្នុងកុំព្យូទ័រ ថេបប្លេត ទូរស័ព្ទ និងបណ្តាញខាងក្នុងរបស់ក្រុមហ៊ុន ។ ជាមួយគ្នានេះ ក្រុមហ៊ុនក៏បានស្នើឱ្យបុគ្គលិកដែលប្រើប្រាស់ ChatGPT ឬឧបករណ៍ AI ផ្សេងៗនៅក្នុងឧបករណ៍ផ្ទាល់ខ្លួន ចៀសវាងបង្ហោះព័ត៌មានក្រុមហ៊ុន ឬព័ត៌មានផ្ទាល់ខ្លួនឱ្យសោះ ហើយអ្នកល្មើសនឹងបម្រាមនេះ នឹងត្រូវបានបណ្តេញចេញពីការងារ ។

បច្ចុប្បន្ន ក្រុមហ៊ុន Samsung កំពុងបង្កើតឧបករណ៍ AI របស់ក្រុមហ៊ុនផ្ទាល់សម្រាប់ជួយក្នុងការបកប្រែ និងសង្ខេបឯកសារផ្សេងៗ ។ លើសពីនេះ ក្រុមហ៊ុនក៏បានអភិវឌ្ឍន៍ software និងស្វែងរកវិធីធ្វើយ៉ាងណា កុំឱ្យមានការបង្ហោះទិន្នន័យសំខាន់របស់ក្រុមហ៊ុនទៅក្នុង server ខាងក្រៅ ៕

ប្រភព ៖ Around the World

ប្រទេសកម្ពុជា ៖ កាលពីវេលាម៉ោង២និង៤០នាទីរសៀល ពលរដ្ឋកម្ពុជាបាននាំគ្នាធ្វើដំណើរមកកាន់ពហុកីឡដ្ឋានមរតកតេជោ ជាបន្តបន្ទាប់ ដើម្បីចូលរួមទស្សនាពិធីបើកការប្រកួតកីឡាស៊ីហ្គេម ឆ្នាំ២០២៣ ។ ពលរដ្ឋខ្មែរធ្វើដំណើរមកចូលរួមទស្សនាពិធីបើកការប្រកួតកីឡានេះ បានធ្វើឱ្យបរិយាកាសនៅបរិវេណខាងមុខទីលានប្រកួតមានសភាពអ៊ូអរ ខណៈមន្ត្រីបានរៀបចំបរិវេណនៅក្បែរទីលានប្រកួតសម្រាប់ធ្វើជាចំណតរថយន្ត និងម៉ូតូ ។

ការប្រកួតកីឡាស៊ីហ្គេម លើកទី៣២ បានចាប់ផ្តើមជាផ្លូវការនៅម៉ោង៧យប់ថ្ងៃទី៥ ខែឧសភា ក្នុងពហុកីឡដ្ឋានមរតកតេជោ នាទីក្រុងភ្នំពេញ ប្រទេសកម្ពុជា ដោយមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាធ្វើជាប្រធាន ព្រមទាំងមានពលរដ្ឋខ្មែរ និងភ្ញៀវទេសចរអន្តរជាតិជាច្រើននាក់បានមកចូលរួមទស្សនាផងដែរ ។

សារព័ត៌មានថៃឈ្មោះ PPTV HD 36 បានចុះផ្សាយថា ពិធីបើកការប្រកួតកីឡាស៊ីហ្គេមនៅប្រទេសកម្ពុជា គឺបានរំលេចទៅដោយពន្លឺភ្លើងពណ៌ដ៏ស្រស់ស្អាត និងអស្ចារ្យ ព្រមជាមួយអ្នកចូលរួមទស្សនាយ៉ាងច្រើនកុះករ ខណៈទីលានប្រកួតកីឡាមានកៅអីសម្រាប់អង្គុយទស្សនាចំនួន៧៥.០០០កៅអី ។ លោក Pipat Ratchakitprakarn រដ្ឋមន្ត្រីក្រសួងទេសចរណ៍ និងកីឡាប្រទេសថៃ បានចាត់តាំងឱ្យលោក Kongsak Yodmanee អាជ្ញាធរកីឡាប្រទេសថៃ ធ្វើជាមន្ត្រីតំណាងរដ្ឋាភិបាល ព្រមទាំងលោក Cherdkiat Atthakon ឯកអគ្គរាជទូតថៃប្រចាំទីក្រុងភ្នំពេញ មកចូលរួមក្នុងពិធីបើកការប្រកួតកីឡាស៊ីហ្គេមនៅកម្ពុជា ។

ក្នុងពិធីបើកការប្រកួតនេះ មានក្បួនដង្ហែរកីឡាករក្នុងទីលានប្រកួតចំនួន១១ប្រទេស ដូចជា ព្រុយណេ, ឥណ្ឌូណេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, ទីម័រខាងកើត, វៀតណាម និងកម្ពុជា ជាម្ចាស់ផ្ទះ ។ ក្រុមកីឡាករថៃបានដើរជាក្បួនក្នុងលេខរៀងទី៨ នាថ្ងៃបើកការប្រកួតកីឡាស៊ីហ្គេម ដោយមានលោក Chanathip Chakwan ជាក្រុមកីឡាបាល់បោះជម្រើសជាតិថៃ មានអាយុ២៦ឆ្នាំ ជាអ្នកកាន់ទង់ជាតិថៃ បានដឹកនាំក្រុមកីឡាករដើរក្នុងទីលានប្រកួត ព្រមទាំងលោក Thana Chaiprasit ជាប្រធានអត្តពលិកថៃ ៕ ប្រភព ៖ PPTV HD 36