គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (CAMSOC-CAMAPGOC) បានជូនដំណឹងពីការបោះពុម្ភបណ្ណថ្មី សម្រាប់ប្រើប្រាស់ក្នុងពិធីបិទផ្លូវការ នៃព្រឹត្តិការណ៍កីឡាស៊ីហ្គេម លើកទី៣២ នាល្ងាចថ្ងៃទី១៧ ខែឧសភាខាងមុខ នៅវិមានពហុកីឡដ្ឋាន នៃពហុកីឡដ្ឋានជាតិមរតកតេជោ ជំនួសបណ្ណចាស់ដែលត្រូវបានទុកជាមោឃៈ ។

យោងតាមសេចក្ដីជូនដំណឹងនៅរសៀលថ្ងៃទី១១ ខែឧសភានេះ បានបញ្ជាក់ថា
«ដើម្បីធានាបានសន្ដិសុខ សុវត្ថិភាព និងសណ្ដាប់ធ្នាប់ ក្នុងពិធីបិទព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលនឹងប្រព្រឹត្តទៅនាថ្ងៃទី១៧ ខែឧសភា ឆ្នាំ២០២៣ ខាងមុខ ជាពិសេសរក្សាបាននូវកន្លែងអង្គុយសមស្របតាមចំនួនកៅអីនៃពហុកីឡដ្ឋានជាតិមរតកតេជោ គណៈកម្មាធិការជាតិ CAMSOC-CAMAPGOC បានសម្រេចបោះពុម្ភសារជាថ្មីនូវបណ្ណចូលទស្សនា និងបណ្ណរថយន្ដ សម្រាប់ប្រើប្រាសស់ក្នុងពិធីបិទជាផ្លូវការ ព្រឹត្តិការណ៍កីឡាស៊ីហ្គេម លើកទី៣២ ដើម្បីប្រើប្រាស់ជំនួសបណ្ណចាស់ដែលត្រូវបានទុកជាមោឃៈ» ។

សូមរម្លឹកថា សម្រាប់ពិធីបើកព្រឹត្តិការណ៍ស៊ីហ្គេម លើកទី៣២ កាលពីថ្ងៃទី០៥ ខែឧសភាកន្លងទៅ មានថ្នាក់ដឹកនាំ ប្រជាពលរដ្ឋ និងភ្ញៀវអន្ដរជាតិរាប់ម៉ឺននាក់ បានចូលរួមទស្សនាផ្ទាល់ នៅពហុកីឡដ្ឋានជាតិមរតកតេជោ ជាមួយការកោតស្ញប់ស្ញែងជាខ្លាំង នូវការរៀបចំនូវទស្សនីយភាពដ៏អស្ចារ្យជាច្រើន រហូតទទួលបានការកោតសរសើរ និងល្បីល្បាញលើឆាកអន្ដរជាតិ ៕

កីឡាករបាល់ទាត់ ស៊ិន សុវណ្ណមករា បានប្រកាសនៅលើបណ្តាញសង្គមថា ទឹកប្រាក់ដែលទទួលបានឧបត្ថម្ភ១ម៉ឺនដុល្លារពីឯកឧត្តមឧបនាយករដ្ឋមន្រ្តី ហោ ណាំហុង នឹងយកទឹកប្រាក់ជូនទៅដល់ក្រុមជំរើសជាតិកម្ពុជាទាំងមូល។

កីឡាករបាល់ទាត់ពាក់អាវលេខ១៤ បានបង្ហោះនៅរសៀលថ្ងៃទី១១ ខែឧសភា នេះថា «ខ្ញុំបាទស៊ិន សុវណ្ណមករា សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមឧបនាយករដ្ឋមន្រ្តី ហោ ណាំហុង ដែលបានធ្វើការឧបត្ថម្ភទឹកប្រាក់ចំនួន 10000$ (មួយម៉ឺនដុល្លារ សហរដ្ឋអាម៉េរិក) ជូនចំពោះខ្ញុំបាទ ស៊ិនសុវណ្ណមករា ហើយខ្ញុំបាទសុំយកទឹកប្រាក់ឧបត្ថម្ភ ចំនួន 10000$ (មួយម៉ឺនដុល្លារ សហរដ្ឋអាម៉េរិក)នេះ មកធ្វើជាទឹកប្រាក់ឧបត្ថម្ភជូនទៅដល់ក្រុមជំរើសជាតិកម្ពុជាទាំងមូល ជាចុងក្រោយខ្ញុំបាទស៊ិន សុវណ្ណមករា សូមលំអោនកាយគោរពជូនពរ ឯកឧត្តមឧបនាយករដ្ឋមន្រ្តី ហោ ណាំហុង អោយជួបប្រទះតែពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ» ។

គួរបញ្ជាក់ថា កីឡាករ ខ្សែបម្រើការពារ ស៊ិន សុវណ្ណមករា នៅនាទី៤៥+១ បានរកបាល់មួយគ្រាប់ក្នុងជំនួបជាមួយឥណ្ឌូនេស៊ី កាលពីយប់មិញនេះ(១០ ឧសភា) ខណៈ ឧបនាយករដ្ឋមន្ត្រី ហោ ណាំហុង បានប្រកាសឧបត្ថម្ភថវិកាចំនួន ១ ម៉ឺនដុល្លារ ដល់កីឡាកររូបនេះផងដែរ៕

កំពូលតារាចម្រៀង ឱក សុគន្ធកញ្ញា បានបង្ហោះសារនៅលើបណ្តាញសង្គមចូលរួមលើកទឹកចិត្តដល់ក្រុមជម្រើសជាតិកម្ពុជាបាល់ទះក្នុងសាល ក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ខណៈរាត្រីនេះកម្ពុជា នឹងត្រូវប៉ះ វៀតណាម វេលាម៉ោង១៩:៣០នាទី នៅពហុកីឡដ្ឋានជាតិអូឡាំពិក។

ពីរប្រកួតមកហើយសម្រាប់បាត់ទះក្នុងសាល វិញ្ញាសានារី របស់កម្ពុជាក្នុងវគ្គសន្សំពិន្ទុ ត្រូវចាញ់គូប្រកួត រួមមាន ហ្វីលីពីន និង សិង្ហបុរី ក្នុងលទ្ធផលដូចគ្នាគឺ៣សិតទល់០។ ទោះជាយ៉ាងនេះអ្នកគាំទ្របានបញ្ចេញមតិយោបល់ផ្សេងៗគ្នាដោយផ្តល់ទាំងកម្លាំងចិត្ត និងឱ្យកីឡាការិនីកម្ពុជាព្យាយាមហ្វឹកហាត់បន្ថែមទៀត។ មិនត្រឹមតែអ្នកគាំទ្រតេប៉ុណ្ណោះទេ គ្រាប់ពេជ្រប្រចាំផលិតកម្មហង្សមាសវិញក៏បានបង្ហោះសារផ្តល់កម្លាំងចិត្តដល់ក្រុមបាល់ទះនារីផងដែរ។

តារាចម្រៀងរូបនេះ បានសរសេរថា «កុំភ្លេចចូលរួមទស្សនានិងផ្តល់កម្លាំងចិត្ត ដល់ក្រុមកីឡាការនីកម្ពុជាយើង ក្នុងវិញ្ញាសាបាល់ទះ នៅយប់នេះ ម៉ោង ១៩:៣០នាទី តទៅ ពហុកីឡាដ្ឋានអូឡាំពិក»។

គួរបញ្ជាក់ផងដែរថា ក្នុងជំនួបរាត្រីនេះ បាល់ទះនារីកម្ពុជា នឹងត្រូវប៉ះជាមួយវៀតណាម ដូច្នេះបងប្អូនជនរួមជាតិកុំភ្លេចផ្តល់កម្លាំងចិត្តឱ្យកីឡាការិនីកម្ពុជាយើងទាំងអស់គ្នា៕

កាលពីយប់មិញ កុមារីអាយុ១០ឆ្នាំមួយរូប ត្រូវបានស្លាប់បាត់បង់ជីវិត បន្ទាប់ពីត្រូវចរន្តអគ្គិសនីឆក់ ខណៈកំពុងហែលទឹកក្នុងអាងនៅខាងក្រៅមុខអគារអូឡាំព្យា។

តាមប្រភពនៅកន្លែងកើតហេតុបានឱ្យដឹងថា៖” ក្មេង​ស្រីរងគ្រោះ និង​មិត្ត​៣​នាក់​ទៀត​របស់នាង បាន​ទៅ​ទឹកអាងនោះ. រំពេច​នោះ​នារី​រង​គ្រោះ​បាន​ដួល​ធ្លាក់​ចូល​ទឹក ហើយក៏បានសន្លប់ ដោយមនុស្សម្នានៅទីនោះ បានបញ្ជូននាងទៅមន្ទីពេទ្យគន្ធបុប្ផា​ដើម្បី​ព្យាបាល ប៉ុន្តែ​អកុសល​បាន​ស្លាប់​ពេល​មក​ដល់មន្ទីពេទ្យបាត់ទៅហើយ។

ក្រោយមកសមត្ថកិច្ចមូលដ្ឋាន និងជំនាញកោសល្យវិច្ច័យបានចុះពិនិត្យកន្លែងកើតហេតុ។ ហើយ​បាន​រក​ឃើញ​ថា មាន​ខ្សែ​ភ្លើង​ដាច់ និងធ្វើការ​កោសល្យ​វិ​ច្ច័​យ​សន្និដ្ឋាន​ថា ក្មេង​ស្រី​រង​គ្រោះ​ស្លាប់​ដោយសារ​ឆ្លង​ចរន្តអគ្គិសនី។

ដោយឡែកសន្តិសុខនៅទីនោះនិយាយថា ជារឿយៗពួកគេ តែងតែបណ្តេញក្មេងៗចេញពីអាងទឹកនោះ ដោយហេតុថាវាមិនមានសុវត្ថិភាពសម្រាប់ក្មេងកម្សាន្តនោះទេ វាមានខ្សែភ្លើងនិងអគ្គិសនីដំណើរការ៕

ដូចមហាជនមួយចំនួនជ្រាបមកហើយថា កីឡាករ ខ្សែបម្រើការពារ ស៊ិន សុវណ្ណមករា នៅនាទី៤៥+១ បានរកបាល់មួយគ្រាប់ក្នុងជំនួបជាមួយឥណ្ឌូនេស៊ី កាលពីយប់មិញនេះ ខណៈ ឧបនាយករដ្ឋមន្ត្រី ហោ ណាំហុង បានប្រកាសឧបត្ថម្ភថវិកាចំនួន ១ ម៉ឺនដុល្លារ ដល់កីឡាកររូបនេះផងដែរ។

ការផ្តល់ថវិកាចំនួន ១ម៉ឺនដុល្លារពីឧបនាយករដ្ឋមន្ត្រីខាងលើក៏ធ្វើឱ្យអ្នកលេងបណ្តាញសង្គមមួយចំនួនសម្តែងក្តីត្រេកអរដល់កីឡាករពាក់អាវលេខ១៤ ស៊ិន សុវណ្ណមករា និងអ្នកលេងបណ្តាញសង្គមមួយចំនួនទៀតលើកឡើងថា បាត់ទាល់គឺលេងជាក្រុមដូច្នេះគួរតែផ្តល់រង្វាន់លើកទឹកចិត្តជាក្រុមវិញទើបជាការប្រសើរ។

អ្នកលេងបណ្តាញសង្គមសរសេរថា « កត្តានេះហើយដែលធ្វើឱ្យក្រុមបាល់ទាត់កម្ពុជាមិនរីកចម្រើន ម្នាក់ៗធ្វើចរិតឡូយរៀងខ្លួន អ្នកខ្លះកំណាញ់បាល់ អ្នកខ្លះចាំតែស៊ុត អ្នកពូកែញាក់បាល់បង្អួតស្រី លេងគ្មានស្មារតីជាក្រុម ។កាលប្រកួតជាមួយមីយាន់ម៉ា អាណិតតែអ្នកចាំទីទេ, តែប៉ុណ្ណឹងលែងចែកបាល់គ្នាលេងហើយ ,បើធ្វើចឹងចប់ហើយ ព្រោះលេងក្រុមមួយគ្នាបានតែម្នាក់ ប្រកួតលើកក្រោយប្រហែលកីឡាករលេងលែងប៉ះទៀតហើយ ព្រោះចង់ស៊ុតខ្លួនឯងដើម្បីលុយ,ចូលរួមអបអរផង តែបើគំនិតខ្ញុំវិញគួរតែឱ្យទាំងអស់គ្នា ព្រោះបបើអញ្ចឹងទៅថ្ងៃមុខយើងលេងនៅតែមិនបានល្អទេ រួបរួមគ្នា សាមគ្គីភាពទើបចេញជាផ្លែផ្កា»។

អ្នកខ្លះទៀតបានលើកឡើងថា «កីឡាជាក្រុម គួរលើកទឹកចិត្តទាំងអស់គ្នា,ខ្ញុំអត់គាំទ្រទង្វើបែបហ្នឹងទេលើកទឹកចិត្ត ចែកទឹកប្រាក់ឱ្យជាក្រុមល្អជាង ធ្វើចឹងអាចធ្វើអោយកីឡាមួយចំនួនដណ្តើមគ្នាសុត ចែកបាល់គ្នាមិនកើត,ចុះ ១៩នាក់ទៀតគិតម៉េច អង្គុយលេងមែន, ធ្វើចឹងធ្វើឱ្យកីឡាករកំណាញ់បាល់លេងមិនបោះបាល់វិញទេ, អត់ស្មើភាព យល់ស្របក្នុងការអោយ តែធ្វើចឹងបានចេះតែមានតួឯក»។

គួរបញ្ជាក់ផងដែរថា ក្រុមបាល់ទាត់ជម្រើសជាតិកម្ពុជាអាយុក្រោម២២ឆ្នាំ បានហាលអាវក្នុងវគ្គសន្សំពិន្ទុកាលពីយប់ថ្ងៃទី ១០ ខែឧសភា ឆ្នាំ ២០២៣ ក្រោយចាញ់ថ្វីជើងក្រុមជម្រើសជាតិឥណ្ឌូនេស៊ី ក្នុងលទ្ធផល ២-១ ៕