កំពូលតារាចម្រៀងជើងចាស់អ្នកនាង ម៉េង កែវពេជ្ជតា ពោលសរសើរតារាចម្រៀង សុខ ពិសី ថាមិនត្រឹមតែច្រៀងពីរោះហើយស្អាតទេថែមទាំងបានផ្តល់តម្លៃដល់រៀមច្បង និងម្ចាស់ដើម។ ការសរសើររបស់កំពូលតារាចម្រៀងរូបនេះធ្វើឡើងក្រោយពេល សុខ ពិសី បកស្រាយឡើងវិញនូវបទចម្រៀងមួយបទមានចំណងជើងថា «ថ្នម»។
គេចាំបានថាកន្លងមកមានតារាចម្រៀងមួយចំនួនបានបកស្រាយបទចម្រៀងរបស់ម្ចាស់ដើមពេលខ្លះមិនបានផ្តល់ Credit ឱ្យម្ចាស់ដើមធ្វើឱ្យពេលខ្លះម្ចាស់ដើមបង្ហាញអារម្មណ៍មិនសប្បាយចិត្តនិងម្ចាស់ដើមមួយចំនួនក៏មិននិយាយអ្វីច្រើនឡើយបើទោះជាអ្នកCoverរូបនេះមិនបានផ្តល់ក្រេដីតឱ្យខ្លួនយ៉ាងណា ជាក់ស្តែងដូចរឿងថ្មីៗកន្លងទៅនេះជាដើម។
យ៉ាងណាមិញនៅព្រឹកថ្ងៃទី២៣ ខែមិថុនា នេះកំពូលតារាចម្រៀង ម៉េង កែវពេជ្ជតា បានពោលសរសើរ សុខ ពិសី តារាចម្រៀងប្រចាំផលិតកម្មសាន់ដេ ថាច្រៀងពីរោះហើយស្អាតទៀតជាពិសេសគឺបានផ្តល់តម្លៃដល់រៀមច្បងនិងបទម្ចាស់ដើម។
អ្នកនាង ម៉េង កែវពេជ្ជតា បានសរសេរយ៉ាងដូច្នេះថា « ពីរោះហើយស្អាតទៀត ពិសី អរគុណប្អូនស្រីដែលផ្តល់តម្លៃដល់រៀមច្បង ម្ចាស់ដើម ជូនពរអូនកាន់តែទទួលបាននូវការស្រលាញ់គាំទ្រច្រើនៗ»។
គួរបញ្ជាក់ផងដែថា ការសរសើររបស់កំពូលតារាចម្រៀងជើងចាស់រូបនេះធ្វើឡើងក្រោយតារាចម្រៀង សុខ ពិសី បានបកស្រាយបទចម្រៀងមួយបទមានចំណងជើងថា «ថ្នម» ដោយបានបញ្ជាក់យ៉ាងច្បាស់ៗថាជាសំនៀងដើមរបស់អធិរាជសំឡេងមាស លោក ស៊ិន ស៊ីសាមុត និងបកស្រាយតាមលំនាំអ្នកនាង ម៉េង កែវពេជ្ជតា ហើយបកស្រាយឡើងវិញដោយរូបនាងផ្ទាល់ ហើយបានបង្ហោះកាលពីថ្ងៃទី១៤ ខែមិថុនា។ នៅក្នុងវីដេអូនោះ សុខ ពិសី បានតុបតែងខ្លួនជាមួយសំលៀកបំពាក់ប្រពៃណីយ៉ាងស្រស់ស្អាត ហើយអ្នកលេងបណ្តាញសង្គមក៏បានពោលសរសើរថានាងច្រៀងពីរោះណាស់ក្នុងបទចម្រៀងមួយបទនេះ៕