រូបគំនូរម៉ូណាលីសា (Mona Lisa) គឺជារតនសម្បត្តិដ៏មានតម្លៃមួយក្នុងសម័យរ៉ឺណេស្សង់ (Renaissance) ហើយទោះកន្លងទៅអស់រយៈពេលជាង ៥០០ ឆ្នាំទៅហើយក្ដី ក៏រូបគំនូរដ៏ល្អវិចិត្រនេះនៅតែទទួលបានភាពល្បីល្បាញយ៉ាងខ្លាំងនាពេលបច្ចុប្បន្ន។ ដូច្នេះហើយតើគំនូរម៉ូណាលីហ្សាត្រូវបានគូរឡើងនៅឆ្នាំណា ដោយវិចិត្រកររូបណា?

វិចិត្រករដែលមានសមត្ថភាពអាចគូរគំនូរម៉ូណាលីហ្សាដ៏ល្អប្រណីតនេះ គឺមានឈ្មោះថា លេអូណាដូ ដាវិនស៊ី (Leonardo DaVinci)។ លោកកើតនៅគ្រិស្ដសករាជឆ្នាំ ១៤៥២ ក្នុងបុរីរដ្ឋហ្វ្លរ៉ង់ (Republic of Florence)។ ដាវិនស៊ី ចូលចិត្តគូររូបតាំងពីកុមារភាពមកម្លេះ ហើយគំនូរដែលលោកគូរ ភាគច្រើនសុទ្ធតែដូចរូបពិតៗតែម្តង។ ទេពកោសល្យនេះបានជួយឱ្យលោកបានក្លាយជាបុគ្គលដ៏សំខាន់មួយរូប ក្នុងការកសាងវឌ្ឍនភាពជូនសង្គមក្នុងសតវត្សទី ១៤-១៧។

លោកបានចាប់ផ្ដើមការងារគូរគំនូរម៉ូណាលីសា ក្នុងគ្រិស្ដសករាជឆ្នាំ ១៥០៣ ដោយរូបគំនូរនេះត្រូវបានគេចាត់ទុកថាជាគំនូរដ៏ល្បីល្បាញបំផុតក្នុងចំណោមស្នាដៃទាំងអស់របស់លោក ដាវិនស៊ី ដោយលោកបានចំណាយពេលដល់ទៅបួនឆ្នាំ ក្នុងការគូរគំនូរដ៏ល្អវិចិត្រមួយនេះ មានន័យថា រហូតដល់គ្រិស្ដសករាជ ១៥០៧ ទើបលោកបានបញ្ចប់ការគូរគំនូរនេះ។
គួរបញ្ជាក់ដែរថា រូបគំនូរម៉ូណាលីសា គឺជាគំនូរដែលមានទ្រង់ទ្រាយ ការតុបតែងប្រកបដោយភាពប៉ិនប្រសប់គួរឱ្យស្ងើចសរសើរក្រៃលែង។ ភាពអស្ចារ្យមួយទៀតរបស់គំនូរនេះ គឺបានបង្កប់នូវអាថ៌កំបាំងជាច្រើន សូម្បីតែអ្នកស្រាវជ្រាវបច្ចុប្បន្នក៏មិនទាន់ដោះប្រស្នានោះបានដែរ៕

យើងគ្រប់គ្នាប្រហែលជាធ្លាប់ដឹងមកហើយថា កីឡាករបាល់ទាត់បុរសដែលមានជាងគេបំផុតលើលោកនោះគឺ Ronaldo, Messi និង Neymar…ជាដើម។ ចុះចំណែកបាល់ទាត់នារីវិញ តើលោកអ្នកដឹងទេ? កីឡាបាល់ទាត់នារីរូបណាខ្លះ ដែលមានជាងគេបំផុតលើពិភពលោកប្រចាំឆ្នាំ២០២៣?

១.Marta Vieira Da Silva៖ វីរនារីរបស់ប្រេស៊ីលរូបនេះ រកចំណូលបាន ៤០ ម៉ឺនដុល្លារ ក្នុងមួយឆ្នាំ ជាមួយនឹងទ្រព្យសម្បត្តិ ១៣ លានដុល្លារ គឺជាកីឡាករស្រីដែលមានជាងគេបំផុតនៅលើពិភពលោក។ Marta ត្រូវបានគេប្រដូចទៅនឹង “មហាក្សត្រយានី” ក្នុងកីឡាបាល់ទាត់នារី ដោយបានឈ្នះ Ballon d’Or ចំនួន ៦ ដង។ នាងក៏ត្រូវបានគេចាត់ទុកជាកីឡាការិនីដែលមានជំនាញបច្ចេកទេសខ្ពស់បំផុតក្នុងការស៊ុតបញ្ចូលទីចំនួន ១១៥ គ្រាប់ និងលេងបាន ១៧៤ ប្រកួត។ ប៉ុន្តែសមិទ្ធផលដ៏ល្អបំផុតរបស់ខ្សែប្រយុទ្ធរូបនេះ គឺតំណែងជើងឯករងនៃព្រឹត្តិការណ៍ World Cup ឆ្នាំ ២០០៧។

២.Wendie Renard៖ កីឡាករសញ្ជាតិបារាំង វ័យ ៣២ ឆ្នាំ រូបនេះរកចំណូលបាន ៤០ ម៉ឺនដុល្លារ ក្នុងមួយឆ្នាំ ជាមួយនឹងទ្រព្យសម្បត្តិសុទ្ធ ១០ លានដុល្លារ ។ ក្នុងកម្រិតជម្រើសជាតិ នាងលេងបាន ១៤៥ ប្រកួត និងស៊ុតបាន ៣៤ គ្រាប់ ហើយបច្ចុប្បន្នជាប្រធានក្រុមជម្រើសជាតិបារាំង។

៣.Amandine Henry៖ កីឡាករបារាំងម្នាក់ទៀត វ័យ ៣៤ ឆ្នាំ រកចំណូលបាន ៣៩ ម៉ឺនដុល្លារ ក្នុងមួយឆ្នាំ ជាមួយនឹងទ្រព្យសម្បត្តិសរុបប្រហែល ៧ លានដុល្លារ។ Henry បាន
ឈ្នះពាន Women’s World Cup ជាលើកដំបូងនៅប្រទេសអូស្ត្រាលី និងនូវែលសេឡង់ ដែលជាការប្រកួតចុងក្រោយក្នុងអាជីពរបស់នាង។

៤. Alex Morgan៖ កីឡាបាល់ទាត់នារី វ័យ ៣៤ ឆ្នាំ មានទ្រព្យសម្បត្តិសុទ្ធប្រហែល ៤ លានដុល្លារ។ នាងគឺជាកីឡាករស្រីដ៏ល្បីបំផុតនៅលើពិភពលោក ដោយសារសមត្ថភាពស៊ុតបញ្ចូលទីដ៏ល្អ និងរូបរាងដ៏ស្រស់ស្អាតរបស់គាត់។ បច្ចុប្បន្ន Morgan គឺស្ថិតនៅលំដាប់ទី ១០ ក្នុងការបង្ហាញខ្លួន (២០៦) និងជាគ្រាប់បាល់ទី ៥ ក្នុងការស៊ុតបញ្ចូលទី (១២១) ក្នុងប្រវត្តិសាស្ត្ររបស់ក្រុមនារីអាមេរិក។

៥. Megan Rapinoe៖ កីឡាបាល់ទាត់នារីរបស់អាមេរិក វ័យ ៣៨ ឆ្នាំ មានទ្រព្យសម្បត្តិសុទ្ធប្រហែល ៣.៧ លានដុល្លារ។ Rapinoe គឺជារូបតំណាងក្នុងកីឡាបាល់ទាត់នារី ដោយឈ្នះមេដាយមាសអូឡាំពិកឆ្នាំ ២០១២ ឈ្នះពានរង្វាន់បាល់ទាត់ពិភពលោកឆ្នាំ ២០១៥ និង ២០១៩ រួមជាមួយបាល់មាសនារីផងដែរ។ Rapinoe បានប្រកាសចូលនិវត្តន៍របស់នាងបន្ទាប់ពីការប្រកួតបាល់ទាត់ពិភពលោកឆ្នាំ ២០២៣ បានបញ្ចប់ ហើយមកទល់នឹងពេលនេះ ខ្សែបម្រើដែលកើតក្នុងឆ្នាំ ១៩៨៥ លេងបាន ១៩៩ ប្រកួត ស៊ុតបញ្ចូលទីបាន ៦៣ គ្រាប់ឱ្យក្រុមនារីអាមេរិក៕ ប្រភព៖vnexpress

ប្រទេសដាណឺម៉ាក ៖ «Lithla Diman» គឺជាឈ្មោះកោះមួយមានទំហំតូចបំផុតក្នុងចំណោមកោះចំនួន១៨ នៅប្រជុំកោះ Faro ហើយវាស្ថិតនៅភាគខាងជើងនៃប្រទេសដាណឺម៉ាក ។ អ្វីដែលធ្វើឱ្យកោះនេះល្បីល្បាញជាងកោះផ្សេងទៀត គឺមានដុំពពកអណ្តែតនៅលើកំពូលកោះ និងមានរូបរាងដូចក្រែមដាក់លើនំខេក ។

ការពិត ដុំពពកអណ្តែតនៅពីលើកោះនេះមានរូបរាងដូចគ្នានឹងកញ្ចក់កែវ ។ វាកើតឡើងពីខ្យល់សើមបក់ពីលើកំពូលភ្នំខ្ពស់ ហើយបណ្តាលឱ្យកើតលំហូរនៃខ្យល់សំណើម និងមានរលកជាច្រើន ។ នៅពេលសីតុណ្ហភាពធ្លាក់ចុះ វាក៏បំបែកខ្លួន និងក្លាយជាបាតុភូតនេះ ។

ដុំពពកនៅលើកំពូលកោះ Lithla Diman នឹងបង្ហាញខ្លួនបែបនេះជាញឹកញាប់ ហើយពេលខ្លះ វាមានទំហំធំរហូតដល់ប៉ះនឹងផ្ទៃសមុទ្រផងដែរ ។ បើទោះជាមានដុំពពកបង្ហាញនៅលើកំពូលកោះញឹកញាប់ក្តី ប៉ុន្តែមិនមានន័យថា មនុស្សគ្រប់គ្នានឹងមានឱកាសបានឃើញទិដ្ឋភាពបែបនេះទាំងអស់ទេ ។

គួរឱ្យសោកស្តាយ កោះនេះមិនបើកទទួលភ្ញៀវទេសចរមកកម្សាន្តទេ ហើយមូលហេតុសំខាន់ គឺនៅលើកោះមិនមានដីរាបស្មើច្រើនឡើយ ហើយវាពោរពេញទៅដោយច្រាំងថ្មចោតដែលអាចបង្កគ្រោះថ្នាក់ផ្សេងៗបាន ។ ប៉ុន្តែភ្ញៀវទេសចរទាំងឡាយអាចទៅកាន់កោះស្ថិតនៅក្បែរនោះ ដើម្បីទស្សនាពពកអណ្តែតនៅលើកំពូលកោះ Lithla Diman ដែលវាមានរាងដូចនំខេកនៅលើកំពូលភ្នំ ៕ ប្រភព ៖ Chiang Mai News

ប្រទេសចិន ៖ សហព័ន្ធគ្រឿងម៉ាស៊ីនចិនលើកឡើងថា រយៈពេល៥ខែក្នុងឆ្នាំ២០២៣ ការផលិតរបស់ឧស្សាហកម្មគ្រឿងម៉ាស៊ីននៅប្រទេសចិនបានកើនឡើងជាបន្តបន្ទាប់ ហើយសន្ទស្សន៍សំខាន់ផ្សេងៗក៏បានកើនឡើងយ៉ាងឆាប់រហ័សផងដែរ ។

តាមទិន្នន័យចុងក្រោយបង្ហាញឱ្យឃើញថា ចាប់តាំងពីខែមករា រហូតដល់ខែឧសភា ឆ្នាំ២០២៣ ឧស្សាហកម្មគ្រឿងម៉ាស៊ីននៅប្រទេសចិន ទទួលបានប្រាក់ចំណូលកើនឡើងក្នុងអត្រា១០,៦% បើធៀបនឹងឆ្នាំ២០២២ និងទទួលបានប្រាក់ចំណេញសរុបចំនួន៦១៣.៦៦០លានយន់ បើប្រៀបធៀបពីមួយឆ្នាំទៅមួយឆ្នាំបានកើនឡើង១៨,២% ។

ចាប់តាំងពីដើមឆ្នាំ២០២៣ មក ការនាំចេញរបស់ឧស្សាហកម្មគ្រឿងម៉ាស៊ីននៅចិន បានបង្ហាញឱ្យឃើញពីចំនួនបរិមាណកើនឡើង និងមានគុណភាពខ្ពស់ ។ លើសពីនេះ ការនាំចេញផលិតផលក៏បានកើនឡើងយ៉ាងឆាប់រហ័សផងដែរ ។

ចាប់ពីខែមករា រហូតដល់ខែឧសភា ឆ្នាំ២០២៣ តម្លៃការនាំចេញរបស់ឧស្សាហកម្មគ្រឿងម៉ាស៊ីនបានកើនឡើង១៨,១% បើធៀបនឹងឆ្នាំ២០២២ ក្នុងនោះការនាំចេញទៅកាន់ប្រទេសស្ថិតក្នុងគម្រោង «ខ្សែក្រវាត់១ ផ្លូវ១» បានកើនឡើង២៧,៦% ។ ចំណែកបរិមាណការនាំចេញរបស់រថយន្ត, ត្រាក់ទ័រជីកដី, ត្រាក់ទ័រចូកដី និងគ្រឿងចក្រផ្សេងៗបានកើនឡើងជាង៣០% ។

នៅថ្ងៃអនាគត ប្រទេសចិននឹងបង្កើនភាពរឹងមាំក្នុងការអភិវឌ្ឍឧស្សាហកម្មគ្រឿងម៉ាស៊ីនឆ្លាតវៃលំដាប់ខ្ពស់ និងមិនប៉ះពាល់ដល់បរិស្ថាន ។ លើសពីនេះ ប្រទេសចិននឹងអភិវឌ្ឍន៍ឧបករណ៍សំខាន់ និងរៀបចំបច្ចេកវិទ្យាសំខាន់ៗដើម្បីលើកកម្ពស់ការអភិវឌ្ឍគុណភាពជាបន្តបន្ទាប់ ។ គេរំពឹងថា នៅឆ្នាំ២០២៣ កំណើនសេដ្ឋកិច្ចក្នុងវិស័យផ្សេងៗរបស់ឧស្សាហកម្មគ្រឿងម៉ាស៊ីននៅចិន នឹងកើនឡើងប្រមាណ៥% ៕ ប្រភព ៖ China Face

ប្រទេសថៃ ៖ ភ្ញៀវទេសចរបានស្នើឱ្យអាជ្ញាធរបង្កើនសុវត្ថិភាពនៅឆ្នេរសមុទ្រប៉ាតាយ៉ា ប្រទេសថៃ ព្រោះតាំងពីខែមិថុនា គេឃើញមានក្រុមក្មេងស្ទាវមកអុកឡុកនៅទីនេះជាប្រចាំ ។ ភ្ញៀវទេសចរលើកឡើងថា ពួកគេតែងមកអង្គុយទទួលទានអាហារជុំគ្នានៅឆ្នេរនេះ ប៉ុន្តែត្រូវបានក្មេងស្ទាវមករំខាន និងរករឿងឈ្លោះប្រកែកគ្នាជាញឹកញាប់ រហូតបណ្តាលឱ្យមានអ្នករងរបួស និងស្លា.ប់ទៀតផង ។

កាលពីថ្ងៃទី៨ ខែកក្កដា ឆ្នាំ២០២៣ ភ្ញៀវទេសចរមួយចំនួនបានត្អូញត្អែរពីពួកក្មេងស្ទាវមករំខានប្រាប់អ្នកសារព័ត៌មាន នៅពេលពួកគេមកកម្សាន្តនៅឆ្នេរប៉ាតាយ៉ា និងឆ្នេរណាចមធៀន ខណៈភ្ញៀវទេសចរទាំងនេះបានមកអង្គុយទទួលទានអាហារ និងគយគន់ទេសភាព ។ ពួកក្មេងស្ទាវបានមកអុកឡុក និងរករឿងឈ្លោះប្រកែកគ្នា តាំងពីខែមិថុនា មកម្ល៉េះ ។

គេសង្កេតឃើញថា នាថ្ងៃឈប់សម្រាក នៅឆ្នេរប៉ាតាយ៉ា និងឆ្នេរណាចមធៀន តែងមានភ្ញៀវទេសចរជាច្រើននាក់មកអង្គុយជុំគ្នាផឹកស្រាបៀរជាក្រុមតាំងពីក្បាលព្រលប់ ក្រោយពីកន្លែងកម្សាន្តបិទទ្វារ ។ ក្រៅពីនេះ ក៏មានក្រុមក្មេងស្ទាវដែលមានអាយុមិនដល់២០ឆ្នាំ ក្នុងចំណោមនោះ ក្មេងខ្លះបានស្លៀកពាក់ឯកសណ្ឋានសិស្សមកអង្គុយផឹកស្រាបៀរផងដែរ ។

បើតាមការសាកសួរភ្ញៀវទេសចរឱ្យដឹងថា ពួកគេចូលចិត្តមកហូបអី និងផឹកស្រាបៀរនៅទីនេះក្រោយពីកន្លែងកម្សាន្តបិទទ្វារ ប៉ុន្តែនៅពេលយប់បន្តិច តែងមានក្រុមក្មេងស្ទាវមករំខាន និងបង្កជម្លោះជាប្រចាំ ។ ហេតុនេះ ពួកគេសំណូមពរទៅអាជ្ញាធរប៉ូលិស និងភ្នាក់ងារពាក់ព័ន្ធចុះមកត្រួតពិនិត្យនៅតំបន់នេះឱ្យបានតឹងរ៉ឹង ដើម្បីផ្តល់សុវត្ថិភាពដល់ភ្ញៀវទេសចរដែលមកកម្សាន្តនៅប៉ាតាយ៉ា ៕ ប្រភព ៖ khaosod

រដ្ឋធានីកៀវ៖ ក្រោយពេលប្រេសិតពិសេស មកពីប្រទេសជាច្រើន រួមមាន ចិន មេដឹកនាំអាហ្វ្រិក និង តំណាងពិសេស នៃវិមានវ៉ាទីកង់របស់ស្ដេចសង្ឃកាតូលិក បានទទួលបរាជ័យ មិនអាចបញ្ចុះបញ្ចូលដល់ក្រុងមូស្គូ និង ក្រុងកៀវ ឲ្យឈានដល់កិច្ចព្រមព្រៀង ចូលតុចរចាស្វែងរកសន្ដិភាព ដើម្បីបញ្ចប់សង្គ្រាមនោះ លោកប្រធានាធិបតីអ៊ុយក្រែន បានចេញមុខ មកអះអាង ថា នៅពេលកងទ័ពការពារទឹកដីរបស់គាត់ ចូលដល់ព្រំដែនរដ្ឋបាល នៃឧបទ្វីបគ្រីមៀ (Crimea) ទើបអាចចាប់បង្ខំលោក ពូទីន ឲ្យយល់ព្រមចូលតុចរចា។

សារព័ត៌មាន Ukrinform បានចេញផ្សាយ នៅថ្ងៃចន្ទ ទី១០ ខែកក្កដា ថា លោក វ៉ូឡូឌីមៀរ ហ្សេឡែនស្គី (Volodymyr Zelensky) ប្រធានាធិបតីអ៊ុយក្រែន បានថ្លែង នៅក្នុងបទសម្ភាសន៍មួយ ជាមួយនឹងទូរទស្សន៍របស់អូស្រ្ដាលី ABC ថា «ប្រធានាធិបតីរុស្ស៊ី លោក វ៉្លាឌីមៀ ពូទីន នឹងចង់ចរចា ជាមួយនឹងអ៊ុយក្រែន ខណៈកងទ័ពក្រុងកៀវ ចូលទៅដល់ព្រំដែនរដ្ឋបាលជាប់ជាមួយនឹងឧបទ្វីបគ្រីមៀ ដែលក្រុងមូស្គូ បានកាន់កាប់ជាបណ្ដោះអាសន្ន»។

លោកប្រធានាធិបតី ហ្សេឡែនស្គី បានសង្កត់ធ្ងន់ ថា «វាជាការពិតណាស់ វោហារសាស្ត្រសមហេតុសមផល នៅពេលនោះ នឹងកើតឡើង ខណៈកងទ័ពការពារទឹកដីរបស់អ៊ុយក្រែន នឹងចូលទៅដល់ព្រំដែនរដ្ឋបាល នៃឧបទ្វីបគ្រីមៀរបស់អ៊ុយក្រែន។ សកម្មភាពបែបនេះ នឹងចាប់បង្ខំឲ្យលោក ពូទីន ស្វែងរកការសន្ទនាគ្នា ជាមួយពិភពអរិយធម៌ មិនដូចអ្វីដែលវាបានកើតឡើង នាពេលកន្លងមកនោះឡើយ ព្រោះការវាយលុកពេញលេញ នៃទាហានរុស្ស៊ី នឹងត្រូវចុះខ្សោយ»។

នៅក្នុងការផ្ដល់បទសម្ភាសន៍មួយ ជាមួយបណ្ដាញទូរទស្សន៍របស់សហរដ្ឋអាមេរិក CNN កាលពីពេលមុននោះ លោក ហ្សេឡែនស្គី បានលើកឡើង ថា «គោលដៅចុងក្រោយរបស់អ៊ុយក្រែន ត្រូវតែរំដោះឧបទ្វីបគ្រីមៀ (Crimea) របស់ខ្លួន ត្រឡប់មកវិញ។ យើងមិនអាចស្រមៃមើល សម្រាប់អ៊ុយក្រែន ដោយគ្មានឧបទ្វីបគ្រីមៀ ខណៈស្ថិតនៅក្រោមការកាន់កាប់របស់រុស្ស៊ី នោះឡើយ។ នេះមានន័យតែមួយគត់ គឺសង្រ្គាមនៅមិនទាន់បញ្ចប់នោះឡើយ»៕