ប្រទេសស៊ុយអែត ៖ ស៊ុយអែតជាប្រទេសមួយដែលមានអត្រាការជក់បារីទាបបំផុតនៅតំបន់អឺរ៉ុប ខណៈពលរដ្ឋរស់នៅក្នុងប្រទេសនេះបានជក់បារីតិចជាង៥% ។ បើតាមមន្ត្រីជំនាញជំងឺមហារីកប្រចាំប្រទេសនេះលើកឡើងថា ប្រទេសស៊ុយអែតនឹងរឹតបន្តឹងការលក់បារីនៅតាមទីផ្សារនានា និងដំឡើងពន្ធបារីសម្រាប់ក្រុមហ៊ុនអាជីវកម្មផងដែរ ។

លោកស្រី Ulrika Arehed អគ្គលេខាធិការនៃសមាគមជំងឺមហារីកប្រចាំប្រទេសស៊ុយអែតលើកឡើងថា ៖ «យើងចាប់ផ្តើមដាក់កំណត់លើការជក់បារីនៅតាមកន្លែងសាធារណៈនានា ដូចជា កន្លែងក្មេងលេងតាមសាលារៀន ភោជនីយដ្ឋាន ហាងកាហ្វេ និងស្ថានីយដឹកជញ្ជូនអ្នកដំណើរផ្សេងៗ» ។ លោកស្រីបន្តថា ជាមួយគ្នានេះ ការយកពន្ធបារី និងការរឹតបន្តឹងខ្លាំងនៅលើទីផ្សារសម្រាប់ផលិតផលទាំងនេះមានតួនាទីសំខាន់ផងដែរ ។

ចាប់តាំងពីឆ្នាំ២០១៩ មក ប្រទេសស៊ុយអែតបានហាមឃាត់ការជក់បារីនៅតាមកន្លែងអង្គុយលេងសាធារណៈ ។ លោកស្រី Tove Marina Sohlberg អ្នកស្រាវជ្រាវមកពីនាយកដ្ឋានវិទ្យាសាស្ត្រសុខាភិបាលសាធារណៈនៃសាកលវិទ្យាល័យ Stockholm លើកឡើងថា គោលនយោបាយប្រឆាំងនឹងការជក់បារីរបស់ប្រទេសស៊ុយអែត គឺក្នុងគោលបំណងជំរុញឱ្យអ្នកជក់បារីទាំងអស់ចាកចេញពីកន្លែងសាធារណៈទៅកាន់បរិវេណខាងក្រោយផ្ទះ និងទៅកន្លែងជក់បារីដែលគេបានកំណត់ប៉ុណ្ណោះ ។

លោកស្រី Tove Marina Sohlberg អ្នកស្រាវជ្រាវមកពីនាយកដ្ឋានវិទ្យាសាស្ត្រសុខាភិបាលសាធារណៈបន្ថែមថា ៖ «យើងកំពុងតែបង្ហាញទៅកាន់អ្នកជក់បារីថា សង្គមរបស់យើងពុំបានទទួលស្គាល់ការជក់បារីរបស់ពួកគេទេ» ៕

សហរដ្ឋអាមេរិក ៖ តាមការស្រាវជ្រាវថ្មីបង្ហាញថា មានយុវវ័យរាប់លាននាក់នៅអាមេរិកកើតជំងឺធាត់ ហើយពួកគេបានជ្រើសយកវិធីវះកាត់ដើម្បីសម្រកទម្ងន់កាន់តែច្រើន ។ ការវះកាត់ព្យាបាលជំងឺធាត់ក្នុងចំណោមយុវវ័យអាមេរិកមានអាយុចាប់ពី១០ឆ្នាំ ទៅ១៩ឆ្នាំ បានកើនឡើងជាបន្តបន្ទាប់តាំងពីឆ្នាំ២០១៦ ហើយការវះកាត់របស់យុវវ័យបានកើនកើនឡើងយ៉ាងខ្លាំងចាប់ពីឆ្នាំ២០២០ ដល់ឆ្នាំ២០២១ ជាអំឡុងពេលការឆ្លងរាតត្បាតនៃជំងឺកូវីដ-១៩ ស្មើនឹង១៩% ខណៈការវះកាត់សម្រកទម្ងន់របស់ពលរដ្ឋវ័យកណ្តាលធ្លាក់ចុះ ។

មជ្ឈមណ្ឌលគ្រប់គ្រង និងបង្ការជំងឺរបស់អាមេរិកបញ្ជាក់ថា ជំងឺធាត់របស់កុមារ និងយុវវ័យ គឺជាបញ្ហាធ្ងន់ធ្ងរមួយនៅអាមេរិក ពីព្រោះកុមារ និងយុវវ័យមានជំងឺធាត់កាន់តែច្រើន ដោយគេសង្កេតឃើញថា មានយុវវ័យម្នាក់កើតជំងឺធាត់ក្នុងចំណោម៥នាក់ ។ បើគិតពីចំនួនពលរដ្ឋមានអាយុចន្លោះពី២ឆ្នាំ ដល់១៩ឆ្នាំ គឺមានអ្នកកើតជំងឺធាត់ចំនួន១៥លាននាក់ រីឯចំនួនអ្នកកើតជំងឺធាត់ខ្លាំង ក៏កំពុងកើនឡើងផងដែរ ។

ការវះកាត់សម្រកទម្ងន់ គឺជាការវះកាត់ផ្លាស់ប្តូរអវយវៈក្នុងខ្លួនមនុស្ស ដូចជា ក្រពះ និងពោះវៀន ហើយវាប៉ះពាល់ដល់ការស្រូបយកអាហាររបស់រាងកាយ ។ ហេតុនេះ វានឹងធ្វើឱ្យការបរិភោគអាហារផ្លាស់ប្តូរ ដូចជា ធ្វើឱ្យអ្នកដែលត្រូវគេវះកាត់មិនសូវឃ្លានចំណីអាហារ និងឆ្អែតជាងមុន ។

កាលពីមុន នៅអាមេរិកមិនសូវនិយមវះកាត់សម្រកទម្ងន់ទេ ប៉ុន្តែនៅដើមឆ្នាំ២០២៣ វិទ្យាស្ថានកុមារអាមេរិកបានផ្សព្វផ្សាយពីគោលការណ៍ថ្មីសម្រាប់ការព្យាបាលជំងឺធាត់ ហើយវាជាការផ្លាស់ប្តូរលើកដំបូងក្នុងរយៈពេល១៥ឆ្នាំ ។ គោលការណ៍ថ្មីនេះបានណែនាំឱ្យពលរដ្ឋព្យាបាលដោយចលនា និងការផ្លាស់ប្តូររបៀបរស់នៅ ព្រមទាំងណែនាំថា ឱ្យវះកាត់ និងប្រើថ្នាំសម្រាប់កុមារមួយចំនួន ជាពិសេស អ្នកមានជំងឺធាត់ខ្លាំង ។ ទោះយ៉ាងណា កុមារទាំងនេះត្រូវធ្វើរោគវិនិច្ឆ័យ និងមានការយល់ព្រមពីគ្រូពេទ្យជាមុន ។

ក្រុមអ្នកស្រាវជ្រាវជំងឺធាត់ចំពោះកុមារ និងយុវវ័យ លើកឡើងថា ៖ «ទិន្នន័យទាំងនេះបង្ហាញឱ្យយើងឃើញថា យុវវ័យ និងគ្រួសារពួកគេចាប់អារម្មណ៍នឹងការវះកាត់សម្រកទម្ងន់ បើពួកគេមានលទ្ធភាព» ។ ក្រុមអ្នកស្រាវជ្រាវបន្តថា ការសិក្សាជាច្រើនបង្ហាញថា កត្តាហានិភ័យនៃជំងឺសរសៃឈាមបេះដូងចាប់ផ្តើមកើតតាំងពីវ័យកុមារ រហូតដល់មនុស្សចាស់ ។ ដូច្នេះ ការវះកាត់ជាវិធីព្យាបាលមួយក្នុងចំណោមវិធីព្យាបាលមានសុវត្ថិភាព និងប្រសិទ្ធភាព ដែលជួយឱ្យវ័យជំទង់ក្លាយជាមនុស្សពេញវ័យមានសុខភាពល្អ ៕ ប្រភព ៖ TNN World

រដ្ឋធានីជីស៊ីណូ(Chișinău)៖ ស្របពេលមេដឹកនាំក្រុងកៀវ កំពុងតែបន្ដអំពាវនាវជាថ្មី ស្នើសុំឲ្យបណ្ដាប្រទេសមានព្រំដែនជាប់ជាមួយនឹងរុស្ស៊ី ក្លាយជាសមាជិកពេញលេញរបស់អង្គការណាតូ និង សហភាពអឺរ៉ុបនោះមក ប្រធានាធិបតីបតីបារាំង ក៏បានជំរុញឲ្យមានការធានា កាន់តែខ្លាំងក្លា នៅក្នុងកិច្ចប្រជុំកកំពូលរបស់អង្គការសម្ពន្ធមិត្តយោធាដ៏ខ្លាំងក្លាមួយនេះ។

សារព័ត៌មាន U.S.News បានចេញផ្សាយ កាលពីព្រឹក ថ្ងៃសុក្រ ទី២ ខែមិថុនា ថា លោក អេមម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង កាលពីថ្ងៃព្រហស្បតិ៍ បានបញ្ជាក់ ថា អ៊ុយក្រែន ត្រូវតែធ្វើឲ្យប្រាកដ និង ធានាដល់សន្ដិសុខឲ្យបានមាំមួន នៅក្នុងកិច្ចប្រជុំរបស់អង្គការណាតូ នាខែកក្កដា នៅក្នុងរដ្ឋធានីវីលនីស (Vilnius) ប្រទេសលីទុយអានី (Lithuania)។

លោកប្រធានាធិបតី ម៉ាក្រុង បានសង្កត់ធ្ងន់ ថា «រដ្ឋាភិបាលវីលនីស ត្រូវតែផ្ញើសារមួយឲ្យច្បាស់លាស់ ទៅកាន់ប្រទេសអ៊ុយក្រែន និង ប្រជាជនអ៊ុយក្រែន។ ខ្ញុំពេញចិត្ត នឹងធានាដល់សន្តិសុខឲ្យកាន់តែរឹងមាំ និង ច្បាស់លាស់»។

លោក ម៉ាក្រុង បានថ្លែងបែបនេះ ទៅកាន់ក្រុមអ្នកកាសែត ក្រោយកិច្ចប្រជុំកំពូលរបស់មេដឹកនាំអឺរ៉ុប ចំនួន៤៧ប្រទេស នៅក្នុងប្រទេសម៉ូលដាវី។ លោកប្រធានាធិបតី បានបន្ថែម ថា គាត់នឹងជួបពិភាក្សាគ្នា លើបញ្ហានេះ ជាមួយអធិការបតីអាល្លឺម៉ង់ លោក អូឡាហ្វ សូលហ្ស៍ (Olaf Scholz) នៅទីក្រុងផតស្ដាំ (Potsdam) ប្រទេសអាល្លឺម៉ង់ នៅថ្ងៃទី៧ ខែមិថុនា។

លោក វ៉ូឡូឌីមៀរ ហ្សេឡែនស្គី (Volodymr Zelenskiy) ប្រធានាធិបតីអ៊ុយក្រែន បានប្រាប់ដល់ក្រុមអ្នកកាសែត នៅមុននេះ ថា គាត់ចង់ឲ្យមានការធានាឲ្យបានច្បាស់លាស់ ប្រសិនបើក្រុងកៀវ មិនត្រូវបានផ្ដល់ ជាសមាជិកភាពរបស់អង្គការណាតូ នៅក្នុងលក្ខខណ្ឌភ្លាមៗ។ យើងត្រូវតែផ្តល់ទស្សនវិស័យ រយៈពេលវែង ដល់អ៊ុយក្រែន។ វាជាការចាំបាច់ដែលកិច្ចប្រជុំកំពូល នៅទីក្រុងវីលនីស ត្រូវផ្ដល់នូវការធានាទាំងនេះភ្លាមៗ៕

សហរដ្ឋអាមេរិក ៖ រដ្ឋាភិបាលអាមេរិកបានព្យាយាមប្រឆាំងនឹងឥទ្ធិពលរបស់បណ្តាញសង្គមចិន ដែលនាំមុខដោយកម្មវិធី TikTok ដោយសារខ្លាចបណ្តាញសង្គមទាំងនេះបញ្ជូនព័ត៌មានអ្នកប្រើប្រាស់នៅអាមេរិកទៅកាន់រដ្ឋាភិបាលក្រុងប៉េកាំង ។ ប៉ុន្តែការប្រើប្រាស់បណ្តាញសង្គមចិនរបស់ពលរដ្ឋអាមេរិកកាន់តែខ្លាំងក្លាឡើង និងគ្មានការធ្លាក់ចុះទេ ។

សារព័ត៌មាន CNBC រាយការណ៍ថា បើទោះជាក្នុងរយៈពេលជាច្រើនឆ្នាំកន្លងមកនេះ សមាជិកសភា និងមន្ត្រីផ្នែកប្រមូលព័ត៌មានអាមេរិកបានព្យាយាមទប់ស្កាត់ការប្រើប្រាស់បណ្តាញសង្គមចិន ដូចជា TikTok របស់ក្រុមហ៊ុន ByteDance ដោយសារបារម្ភថា រដ្ឋាភិបាលចិននឹងស៊ើបអង្កេតពលរដ្ឋអាមេរិកតាមរយៈកម្មវិធីនេះ ប៉ុន្តែបណ្តាញសង្គមផ្សេងទៀតរបស់ចិនដែលអាមេរិកសង្ស័យថា បញ្ជូនព័ត៌មានអ្នកប្រើប្រាស់ទៅឱ្យរដ្ឋាភិបាលចិនដែរនោះ នៅតែមានប្រជាប្រិយភាពនៅអាមេរិក ។

មន្ត្រីផ្នែកប្រមូលព័ត៌មាន និងក្រុមសមាជិកសភាអាមេរិកបារម្ភថា រដ្ឋាភិបាលចិននឹងយកព័ត៌មានអ្នកប្រើប្រាស់ជាពលរដ្ឋអាមេរិក ដែលបានប្រើប្រាស់បណ្តាញសង្គមចិន ដូចជា អ៊ីម៉ែល, ចំណាប់អារម្មណ៍របស់អ្នកប្រើប្រាស់ និងព័ត៌មានប័ណ្ណបើកបររថយន្ត ។ ប្រទេសចិនមានច្បាប់សន្តិសុខជាតិ ដែលផ្តល់អំណាចដល់រដ្ឋាភិបាលអាចទទួលបានទិន្នន័យអាជីវកម្ម ប៉ុន្តែពលរដ្ឋអាមេរិកជាច្រើននាក់ដែលប្រើប្រាស់បណ្តាញសង្គមចិនមិនចាប់អារម្មណ៍រឿងនេះទេ ហើយបណ្តាញសង្គមចិននៅតែទទួលបានការពេញនិយមយ៉ាងខ្លាំងនៅអាមេរិក ។

Insider Intelligence បញ្ជាក់ថា Temu ជាកម្មវិធីរបស់ក្រុមហ៊ុន PDD Holdings របស់ប្រទេសចិន គឺជាកម្មវិធីមិនគិតថ្លៃ និងត្រូវបានគេដោនឡូតច្រើនបំផុតស្ថិតក្នុងលំដាប់ទី២ នៅលើ Apple Store កាលពីចុងខែឧសភា ឆ្នាំ២០២៣ និងស្ថិតក្នុងលំដាប់ទី១២ របស់ក្រុមអ្នកលក់រាយឌីជីថលក្នុងពេលវិស្សមកាលឆ្នាំ២០២២ ។ លើសពីនេះ ពលរដ្ឋអាមេរិកជាច្រើននាក់ចូលចិត្តប្រើកម្មវិធី Temu ហើយកម្មវិធីនេះបានវ៉ាដាច់ហាងនានា ដូចជា Kohl’s, Wayfair និង Nordstrom ។ ចំណែកកម្មវិធី CapCut និង TikTok របស់ក្រុមហ៊ុន ByteDance ស្ថិតក្នុងលំដាប់ទី៤ និងទី៥ នៅលើ Apple Store ។ រីឯកម្មវិធី Shein មកប្រទេសចិនដែរនោះ ស្ថិតក្នុងលំដាប់ទី១៤ ។

ក្រៅពីនេះ ចាប់ពីចុងខែមីនា រហូតដល់ដើមខែមេសា ឆ្នាំ២០២៣ ក្រោយពីនាយកប្រតិបត្តិរបស់ TikTok បានមកស្រាយបំភ្លឺនៅចំពោះមុខសភាអាមេរិក ស្រាប់តែមានអ្នកចូលដោនឡូតកម្មវិធី Lemon8 របស់ក្រុមហ៊ុន ByteDance ជិត១លាននាក់ ជាពិសេស នៅអាមេរិក ។ កម្មវិធីនេះស្រដៀងគ្នានឹងកម្មវិធី Pinterest និង Instagram របស់ក្រុមហ៊ុន Meta ដែរ ៕ ប្រភព ៖ Bangkok biznews

គេហទំព័រ AirlineRatings.com បានចាត់ចំណាត់ថ្នាក់ក្រុមហ៊ុនអាកាសចរណ៍ផ្សេងៗជារៀងរាល់ឆ្នាំ ហើយនៅឆ្នាំ២០២៣នេះ ក្រុមហ៊ុនសុវត្ថិភាពអាកាសចរណ៍ និងការវាយតម្លៃផលិតផលនៅប្រទេសអូស្ត្រាលី បានចាត់ចំណាត់ថ្នាក់ក្រុមហ៊ុន Air New Zealand របស់ប្រទេសនូវែលសេឡង់ គឺជាក្រុមហ៊ុនអាកាសចរណ៍ល្អបំផុតប្រចាំឆ្នាំ២០២៣ និងបានវ៉ាដាច់ក្រុមហ៊ុន Qatar Airways ជាម្ចាស់ជើងឯកចាស់ ។

ក្រៅពីភាពច្នៃប្រឌិតរបស់ក្រុមហ៊ុនអាកាសចរណ៍ Air New Zealand ក្រុមហ៊ុននេះក៏បានបំពាក់គ្រែគេងប្រណីតៗក្នុងយន្តហោះរបស់ខ្លួនផងដែរ ហើយគ្រោងផ្តល់សេវាកម្មដល់អ្នកដំណើរនៅឆ្នាំ២០២៤ ខាងមុខ ។ ចំណុចនេះហើយ គឺជាកត្តាមួយក្នុងចំណោមកត្តាសំខាន់ៗដែលធ្វើឱ្យក្រុមហ៊ុនអាកាសចរណ៍ Air New Zealand ទទួលបានចំណាត់ថ្នាក់ទី១ ។

គណៈកម្មការចំនួន៥រូបមកពីក្រុមហ៊ុនដែលមានបទពិសោធន៍ក្នុងវិស័យអាកាសចរណ៍អស់រយៈពេលជាច្រើនឆ្នាំ រួមទាំងភ្នាក់ងារសុវត្ថិភាព និងនាយកដ្ឋានត្រួតពិនិត្យរបស់រដ្ឋាភិបាលនឹងប្រកាសពានរង្វាន់ «Airline Excellence Awards » តាមរយៈការវាយតម្លៃពីគេហទំព័រ AirlineRatings.com ។ គេបានវាយតម្លៃលើចំណុចសំខាន់ៗចំនួន១២ចំណុច ដូចជា រយៈពេលការហោះហើរ, មតិយោបល់របស់អ្នកដំណើរ, សមត្ថភាពរកប្រាក់ចំណេញ, ការវិនិយោគទុន, ការបង្ហាញផលិតផល និងទំនាក់ទំនងជាមួយបុគ្គលិក ជាដើម ។

ខាងក្រោមនេះ គឺជាឈ្មោះរបស់ក្រុមហ៊ុនអាកាសចរណ៍នានា ដែលទទួលបានចំណាត់ថ្នាក់ល្អប្រចាំឆ្នាំ២០២៣ រួមមាន ៖
1-Air New Zealand
2-Qatar Airways
3-Etihad Airways
4-Korean Air
5-Singapore Airlines
6-Qantas
7-Virgin Australia/Virgin Atlantic
8-EVA Air
9-Cathay Pacific Airways
10-Emirates
11-Lufthansa/SWISS
12-SAS
13-TAP Air Portugal
14-All Nippon Airways
15-Delta Air Lines
16-Air Canada
17-British Airways
18-JetBlue
19-Japan Airlines
20-Vietnam Airlines
21-Turkish Airlines
22-Hawaiian Airlines
23-KLM
24-Alaska Airlines
25-United Airlines

ប្រភព ៖ The standard life