អាមេរិក៖ បុរសម្នាក់អាយុ ៦០ ឆ្នាំបានទទួលរងគ្រោះយ៉ាងធ្ងន់ធ្ងរដោយសារត្រូវសត្វឃ្មុំទិចចំនួន ១០០០ ក្បាល។
លោក John Fischer អាយុ ៦០ ឆ្នាំមកពីរដ្ឋ Arizona ប្រទេសអាមេរិក បានអង្គុយខាងក្រៅផ្ទះជាមួយឆ្កែនៅក្រោមដើមឈើរបស់គាត់ មួយសន្ទុះក្រោយមកហ្វូងឃ្មុំក៏បានមកវាយប្រហារ។ នៅពេលនោះដែរក្រុមគ្រួសាររបស់លោក Fischer ក៏បានបញ្ជូនទៅមន្ទីពេទ្យភ្លាមៗ ដោយគ្រូពេទ្យបានរកឃើញសត្វឃ្មុំជាង ២៥០ ក្បាលនៅក្នុងខ្លួនរបស់គាត់។

យោងតាមប្រភពសារព័ត៌មាន Live Science កាលពីថ្ងៃទី ៣១ ខែឧសភា បានរាយការណ៍ថា ពេលនេះគាត់បានជាសះស្បើយ ហើយក៏បានចេញពីមន្ទីពេទ្យផងដែរ ។
គួរបញ្ជាក់ដែរថាលោក Fischer មិនមែនជាមនុស្សដំបូងដែលយកឈ្នះលើគ្រោះថ្នាក់នេះទេ។ ក្នុងឆ្នាំ ២០១៤ កម្មករម្នាក់នៅរដ្ឋតិចសាស់ត្រូវបានឃ្មុំទិចប្រហែល ២,០០០ក្បាល ហើយបានរួចជីវិត។ ក្នុងឆ្នាំដដែលនោះ ស្ត្រីអាយុ ៧១ ឆ្នាំម្នាក់ក៏ត្រូវបានវាយប្រហារដោយហ្វូងឃ្មុំពិឃាតចំនួន ៨,០០០ ក្បាល ហើយបានរួចរស់ជីវិតបន្ទាប់ពីរងការឈឺចាប់អស់រយៈពេល ១ សប្តាហ៍។
ទោះជាយ៉ាងណាក៏ដោយ មនុស្សមួយចំនួនមិនអាចយកឈ្នះលើការវាយប្រហារស្រដៀងគ្នានេះបានទេ។ កាលពីឆ្នាំមុន អ្នកថ្មើរជើងអាយុ ២៣ ឆ្នាំម្នាក់បានស្លាប់ដោយសារឃ្មុំពិឃាតទិចចំនួន ១,០០០ក្បាល ក្នុងរដ្ឋ Arizona ប្រទេសអាមេរិក។

ឃ្មុំពិឃាត ឬត្រូវបានគេស្គាល់ថាជាឃ្មុំកូនកាត់អាហ្វ្រិក ធ្វើចំណាកស្រុកពីប្រទេសប្រេស៊ី ទៅកាន់សហរដ្ឋអាមេរិក។ ប៉ុន្មានឆ្នាំមកនេះ អាកប្បកិរិយាឈ្លានពាន និងទំនោរក្នុងការប្រមូលផ្តុំគ្នាជាក្រុមបានធ្វើឱ្យពួកគេក្លាយជា “ឃ្មុំឃាតករ” ដ៏ល្បីឈ្មោះ។
ជារៀងរាល់ឆ្នាំសត្វឃ្មុំពិឃាតប្រហែល ៣% បានប្រមូលផ្តុំគ្នាជាក្រុមដើម្បីទិចមនុស្ស នេះជាប្រតិកម្មធ្ងន់ធ្ងរដែលអាចគំរាមកំហែងដល់អាយុជីវិត។ យោងតាមការស្ទង់មតិរបស់ You Gov ថ្មីៗនេះ ប្រជាជនអាមេរិករហូតដល់ ៧៥% ត្រូវបានសត្វឃ្មុំទិច ជាលទ្ធផល ការបាត់បង់ជីវិតដោយសារឃ្មុំទិចគឺកម្រណាស់៕ ប្រភព៖vnexpress

បរទេស៖ រដ្ឋាភិបាលរបស់រដ្ឋផ្លរីដាបានចាប់ផ្តើមទទួលការចុះឈ្មោះសម្រាប់ការប្រកួតប្រជែងក្នុងវិញ្ញាសាបរបាញ់សត្វពស់ថ្លាន់ Python Challenge នៅឆ្នាំនេះ ជាមួយនឹងប្រាក់រង្វាន់សរុបរហូតដល់ ៣០,០០០ ដុល្លារ។

យោងតាមប្រភពព័ត៌មាន Business Insider កាលពីថ្ងៃទី៣១ ខែឧសភា បានឱ្យដឹងថា ការប្រកួតមានរយៈពេល ១០ ថ្ងៃ ដែលចាប់ផ្តើមពីថ្ងៃទី ៤ ដល់ថ្ងៃទី ១៤ ខែសីហា ឆ្នាំ២០២៣ ដោយបើកចំហសម្រាប់អ្នកប្រមាញ់អាជីព និងអ្នកស្ម័គ្រចិត្ត។ កម្មវិធីនេះត្រូវបានធ្វើជារៀងរាល់ឆ្នាំ ដោយរង្វាន់ដ៏ធំបំផុតចំនួន ៣០,០០០ ដុល្លារ នឹងត្រូវបានផ្តល់ទៅឱ្យអ្នកប្រមាញ់ដែលបានសម្លាប់ពស់ថ្លាន់ច្រើនជាងគេបំផុត រួមជាមួយនឹងរង្វាន់តូចៗជាច្រើនទៀត។

គួរបញ្ជាក់ដែរថា អ្នកប្រមាញ់ដែលបានចូលរួមក្នុងការប្រកួតកាលពីឆ្នាំមុនបានសម្លាប់ពស់ថ្លាន់ចំនួន ២៣១ ក្បាលនៅក្នុងព្រៃ Everglades ។ មនុស្សជិត ១,០០០ នាក់ដែលមកពីរដ្ឋ កាណាដា និងឡាតវី ក៏បានចុះឈ្មោះចូលរួមផងដែរ។ លើសពីនេះគណៈកម្មការអភិរក្សត្រី និងសត្វព្រៃរដ្ឋផ្លរីដា (FWC) ក៏បានលើកទឹកចិត្តឱ្យមនុស្សបរបាញ់ និងសម្លាប់ពស់ថ្លាន់នៅពេលណាដែលអាចធ្វើទៅបាន។

ប្រភេទសត្វដែលឈ្លានពាននេះភាគច្រើនរស់នៅក្នុងប្រព័ន្ធអេកូ Everglades នៅរដ្ឋ Florida ភាគខាងត្បូង។ ពស់ថ្លាន់មួយក្បាលអាចពងបាន ៥០-១០០ ពងក្នុងមួយក្បាល។ យោងតាម គណៈកម្មការអភិរក្សត្រី និងសត្វព្រៃរដ្ឋផ្លរីដា (FWC) បានឱ្យដឹងថា ចាប់តាំងពីឆ្នាំ ២០០០ ពស់ថ្លាន់ជាង ១៨,០០០ ក្បាលត្រូវបានសម្លាប់ចោល៕ ប្រភព៖vnexpress

ប្រទេសចិន៖ អ្នកវិទ្យាសាស្ត្រចិនបានចាប់ផ្តើមខួងរន្ធចូលទៅក្នុងដីជម្រៅប្រវែង ១០,០០០ ម៉ែត្រ (ស្មើនឹង ៣២,៨០៨ ហ្វីត) ចូលទៅក្នុងសំបកផែនដីដើម្បីស្រាវជ្រាវ ខណៈដែលប្រទេសសេដ្ឋកិច្ចធំទីពីររបស់ពិភពលោករុករកព្រំដែនថ្មីទាំងខាងលើ និងខាងក្រោមនៃផ្ទៃភពផែនដី។

យោងតាមទីភ្នាក់ងារសារព័ត៌មានចិនស៊ីនហួរ កាលពីថ្ងៃទី៣០ ខែឧសភា បានឱ្យដឹងថា ការខួងយករ៉ែដែលត្រូវបានកំណត់ថាជាអណ្តូងជ្រៅបំផុតមិនធ្លាប់មានរបស់ប្រទេសចិនបានចាប់ផ្តើមនៅក្នុងតំបន់ស៊ីនជាំងដែលជាតំបន់សម្បូរប្រេងច្រើនជាងគេបំផុតរបស់ប្រទេសចិន។ នៅព្រឹកថ្ងៃដដែលនោះ ប្រទេសចិនក៏បានបញ្ជូនអវកាសយានិកស៊ីវិលដំបូងរបស់ខ្លួនទៅកាន់ទីអវកាសពីវាលខ្សាច់ Gobi ផងដែរ។

យោងតាមរបាយការណ៍បានឱ្យដឹងថា ការខួងចូលទៅក្នុងដីនឹងជ្រាបចូលទៅក្នុងស្រទាប់ថ្មច្រើនជាង ១០ ហើយឈានដល់ស្រទាប់ cretaceous នៅក្នុងសំបកផែនដី ដែលមានលក្ខណៈពិសេសរបស់ថ្មដែលមានអាយុកាលប្រហែល ១៤៥ លានឆ្នាំ ។លោក Sun Jinsheng អ្នកវិទ្យាសាស្ត្រនៅបណ្ឌិតសភាវិស្វកម្មចិនបានប្រាប់ Xinhua ថា “ភាពលំបាកក្នុងការសាងសង់នៃគម្រោងខួងអាចប្រៀបធៀបទៅនឹងឡានដឹកទំនិញធំដែលបើកបរលើខ្សែដែកស្តើងពីរ” ។

កាលពីឆ្នាំ ២០២១ ប្រធានាធិបតីចិនលោក ស៊ី ជីនពីង ធ្លាប់បានអំពាវនាវឱ្យមានវឌ្ឍនភាពកាន់តែច្រើនក្នុងការរុករកផែនដីក្នុងជម្រៅដ៏ជ្រៅ ដែលលោកបានថ្លែងទៅកាន់អ្នកវិទ្យាសាស្ត្រឈានមុខគេមួយចំនួនរបស់ប្រទេស។ ការងារបែបនេះអាចកំណត់អត្តសញ្ញាណធនធានរ៉ែ និងថាមពល និងជួយវាយតម្លៃហានិភ័យនៃគ្រោះមហន្តរាយបរិស្ថាន ដូចជាការរញ្ជួយដី និងការផ្ទុះភ្នំភ្លើងជាដើម៕ ប្រភព៖vnexpress

ទីបំផុតកម្ពុជាត្រូវបានអនុញ្ញាតឱ្យផលិតផលជលផលធម្មជាតិសំខាន់ៗរបស់កម្ពុជា ចំនួន១២ប្រភេទមានដូចជា បង្គា ត្រី អន្ទង់ និងខ្យងជាដើមឈានចូលទីផ្សារចិនហើយ។ នេះបើតាមការឱ្យដឹងពីផេកស្ថាតទូតចិនប្រចាំនៅកម្ពុជា នាថ្ងៃទី១ ខែមិថុនា ។

តាមប្រភពដដែលបានឱ្យដឹងថា ក្រុមហ៊ុនដែលទទួលបានការអនុញ្ញាតនិងចុះបញ្ជីនាំចេញផលិតផលជលផលធម្មជាតិទៅកាន់ប្រទេសចិនគឺ៖ ក្រុមហ៊ុន KIM CHOU Co., Ltd. Import Export and International Transportation បន្ទាប់ពីបញ្ចប់នីតិវិធីចុងក្រោយគេបង្អស់ក្នុងការនាំចេញទៅកាន់ប្រទេសចិន។

គួររម្លឹកដែរថា នាខែវិច្ឆិកា ឆ្នាំ២០២២ ចិននិងកម្ពុជាបានចុះហត្ថលេខារួមគ្នាលើពិធីសារស្តីពីលក្ខខណ្ឌ តម្រូវការត្រួតពិនិត្យ និងអនាម័យផលិតផលជលផលធម្មជាតិក្នុងការនាំចេញពីប្រទេសកម្ពុជាទៅកាន់ប្រទេសចិន។ នៅថ្ងៃទី ២៤ ខែឧសភា ឆ្នាំ២០២៣ ក្រុមហ៊ុននាំចេញដែលពាក់ព័ន្ធនៅក្នុងប្រទេសកម្ពុជាបានបញ្ចប់ការចុះបញ្ជីនៅក្នុងប្រព័ន្ធ”ព័ត៌មានចុះបញ្ជីក្រុមហ៊ុនផលិតអាហារនាំចូលពីបរទេស”របស់រដ្ឋបាលគយនៃប្រទេសចិន។ ផលិតផលជលផលធម្មជាតិបានក្លាយជាផលិតផលប្រភេទទី២នៃវិស័យកសិកម្មនៅក្នុងប្រទេសកម្ពុជាដែលត្រូវបានអនុញ្ញាតឱ្យនាំចេញទៅកាន់ប្រទេសចិនក្នុងឆ្នាំ២០២៣នេះ៕

ប្រទេសកូរ៉េខាងត្បូង ៖ គណៈកម្មាធិការស៊ើបការណ៍សម្ងាត់របស់សភាកូរ៉េខាងត្បូងលើកឡើងថា តាមការវាយតម្លៃរបស់បច្ចេកវិទ្យាសិប្បនិម្មិត AI បានធ្វើឱ្យគេជឿថា មេដឹកនាំកូរ៉េខាងជើង លោក គីម ជុងអ៊ុន មានទម្ងន់រហូតដល់១៤០គីឡូក្រាម និងមានបញ្ហាគេងមិនលក់ ។

ការលើកឡើងបែបនេះធ្វើឱ្យគេចាប់អារម្មណ៍ពីសុខភាពរបស់មេដឹកនាំកូរ៉េខាងជើង ព្រោះគេចាត់ទុកថា វាជារឿងលាក់ការណ៍បំផុត ខណៈកន្លងមក គេបានទស្សន៍ទាយផ្សេងៗគ្នាពាក់ព័ន្ធនឹងមេដឹកនាំរូបនេះថា លោក គីម ជុងអ៊ុន មានអាយុ៣៩ឆ្នាំ ហើយលោកបានជក់បារីច្រើនជាងមុន ។ គេទស្សន៍ទាយទៀតថា ទម្ងន់របស់លោកបានកើនឡើង ខណៈគ្រួសាររបស់លោកធ្លាប់មានជំងឺបេះដូង និងជំងឺសរសៃឈាមក្នុងបេះដូង ។

គណៈកម្មាធិការស៊ើបការណ៍សម្ងាត់របស់សភាកូរ៉េខាងត្បូងបង្ហាញថា បើតាមការវិភាគរបស់បច្ចេកវិទ្យា AI ឱ្យដឹងថា លោក គីម ជុងអ៊ុន បានបង្ហាញខ្លួនកាលពីថ្ងៃទី១៦ ខែឧសភា កន្លងមក ដែលមើលទៅ មានសភាពនឿយហត់, ជុំវិញភ្នែកឡើងពណ៌ខ្មៅ និងមានទម្ងន់ជាង១៤០គីឡូក្រាម ។ តាមរបាយការណ៍មួយបញ្ជាក់ថា មន្ត្រីជាន់ខ្ពស់របស់កូរ៉េខាងជើងពិបាកគេងនៅពេលយប់ ហើយគេជឿថា លោក គីម ជុងអ៊ុន ក៏មានបញ្ហារឿងការគេងដូចគ្នាដែរ ។

ចំណែកសារព័ត៌មាន Yonhap នៅប្រទេសកូរ៉េខាងត្បូងរាយការណ៍ថា សារព័ត៌មានរបស់កូរ៉េខាងជើងមិនសូវចុះផ្សាយពីរឿងសុខភាពរបស់មេដឹកនាំខ្លួនទេ ប៉ុន្តែកាលពីខែមីនា ឆ្នាំ២០២៣ កន្លងមក សារព័ត៌មាន Rodon របស់កូរ៉េខាងជើងចុះផ្សាយថា លោក គីម ជុងអ៊ុន បានធ្វើការរហូតដល់ម៉ោង៥ល្ងាច ហើយលោកមានទម្លាប់ធ្វើការនៅពេលយប់ ។

គួរបញ្ជាក់ថា លោក គីម ជុងអ៊ុន ជាមេដឹកនាំប្រទេសកូរ៉េខាងជើងជំនាន់ទី៣ បន្តពីលោក គីម ជុងអ៊ីល ជាឪពុករបស់លោក ដែលបានទទួលមរ.ណ.ភាពនៅឆ្នាំ២០១១ ដោយសារជំងឺគាំងបេះដូង ។ ទោះយ៉ាងណា ភ្នាក់ងារស៊ើបការណ៍សម្ងាត់កូរ៉េខាងត្បូងបានតាមដានស្ថានការណ៍នៅកូរ៉េខាងជើងយ៉ាងដិតដល់ថា លោក គីម ជុងអ៊ុន អាចចូលចិត្តផឹកភេសជ្ជៈមានជាតិអាល់កុល និងជាតិនីកូទីនខ្លាំងជាងមុន ៕ ប្រភព ៖ TNN World

រាជធានីបាងកក៖ លទ្ធផល នៃការបោះឆ្នោតសកល នៅក្នុងប្រទេសថៃ កាលពីថ្ងៃទី១៤ ខែឧសភា បានបង្ហាញថា គណបក្សឆ្ពោះទៅមុខ (Move Forward Party) ហៅកាត់ MFP បានឈ្នះអាសនៈច្រើនជាងគេ ប៉ុន្ដែរហូតមកដល់ពេលនេះ ក៏មានបណ្ដឹងជាច្រើន ប្រឆាំងនឹងប្រធានគណបក្សប្រឆាំងមួយនេះ ហើយគេនៅតែមិនទាន់ដឹង ថា តើការបោះឆ្នោតនេះ នឹងត្រូវទុកជាមោឃៈឬយ៉ាងណានោះដែរ។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃព្រហស្បតិ៍ ទី១ ខែមិថុនា ឆ្នាំ២០២៣ ថា លោក វីសសានុ ក្រាង៉ាម (Wissanu Krea-ngam) ឧបនាយករដ្ឋមន្រ្ដី នៃរដ្ឋាភិបាលចាំផ្ទះរបស់ប្រទេសថៃ កំពុងតែឆ្លើយតប ចំពោះសំណួរនានា អំពីសេណារីយ៉ូ អាចនឹងកើតឡើង ប្រសិនបើតុលាការធម្មនុញ្ញ នៃប្រទេសអាស៊ានមួយ កាត់ក្តីប្រឆាំងនឹងលោក ភីថា លីមចារឿនរ៉ាត (Pita Limjaroenrat) អំពីចំណែកភាគហ៊ុនចំនួន ៤២ ០០០ នៅក្នុងបណ្ដាញទូរទស្សន៍ឯករាជ្យ iTV ដែលត្រូវបានបង្កើតឡើង នៅក្នុងអំឡុងទសវត្សរ៍ឆ្នាំ១៩៩០។

បើផ្អែកលើរដ្ឋធម្មនុញ្ញថៃ បានរារាំងដល់បេក្ខជនឈរឈ្មោះ ចូលរួមប្រកួតប្រជែង នៅក្នុងការបោះឆ្នោត ប្រសិនបើគេជាម្ចាស់ភាគហ៊ុន នៅក្នុងក្រុមហ៊ុនបណ្ដាញប្រព័ន្ធផ្សព្វផ្សាយ។ ដូច្នេះគណៈកម្មាធិការរៀបចំការបោះឆ្នោតថៃ (EC) បានចាប់ផ្តើមស៊ើបអង្កេត លើពាក្យបណ្តឹង ពាក់ព័ន្ធនឹងការកាន់កាប់ភាគហ៊ុន នៅក្នុងបណ្ដាញផ្សព្វផ្សាយ ប្រឆាំងនឹងលោក ភីថា ជាសមាជិកសភា នៅក្នុងបញ្ជីគណបក្ស និង ជាបេក្ខជននាយករដ្ឋមន្ត្រី។

ពាក្យបណ្ដឹងទាំងនោះ កំពុងតែលើកឡើងជាសំណួរ អំពីលក្ខខណ្ឌរបស់លោក ភីថា នៅក្នុងនាមជាសមាជិកសភា និង ជានាយករដ្ឋមន្ត្រី នាពេលអនាគត ខណៈមានការរំពឹងទុកកើនឡើង ថា សកម្មភាពបែបនេះ អាចនឹងប៉ះពាល់ដល់ជោគវាសនា នៃបេក្ខជនទាំងអស់របស់គណបក្សឆ្ពោះទៅមុខ។

លោកឧបនាយករដ្ឋមន្រ្ដីចាំផ្ទះថៃ រូបនេះ បានសង្កត់ធ្ងន់ ថា « ព័ត៌មានលម្អិត នៃពាក្យបណ្តឹងទាំងនេះ ក្លាយជាកត្តាដ៏សំខាន់ នៅក្នុងការកំណត់ ថា តើអ្វីៗនឹងទៅជាយ៉ាងណា? ប៉ុន្ដែប្រសិនបើញត្តិដាក់គោលដៅត្រឹមតែឋានៈរបស់គាត់ ជាសមាជិកសភា លោក ភីថា អាចនឹងឡើងកាន់តំណែង ជានាយករដ្ឋមន្ត្រីបាន បើទោះជាត្រូវដកហូតសិទ្ធិ ព្រោះនាយករដ្ឋមន្ត្រី មិនត្រូវបានតម្រូវឱ្យធ្វើជាសមាជិកសភាស្របច្បាប់ក៏ដោយ»។

លោក វីសសានូ ក្រាង៉ាម បានបន្ថែម ថា ប្រសិនបើពាក្យបណ្តឹងទាំងនេះ មានការពាក់ព័ន្ធនឹងគុណវុឌ្ឍិនាយករដ្ឋមន្ត្រីរបស់លោក ភីថា គាត់នៅតែអាចក្លាយជាសមាជិកសភាបាន។ ប៉ុន្ដែប្រសិនបើពាក្យបណ្តឹងទាំងនេះ ប៉ះពាល់ដល់បញ្ហាទាំងពីរ គឺតុលាការនឹងសម្រេចលើបញ្ហានេះ អាចនាំឲ្យប៉ះពាល់ដល់ការយល់ព្រមរបស់លោក ភីថា ជាបេក្ខជនឈរឈ្មោះបោះឆ្នោត នៅក្នុងការបោះឆ្នោត កាលពីថ្ងៃទី១៤ ខែឧសភា ឆ្នាំ២០២៣។ បើទោះជាយ៉ាងណាក៏ដោយ ករណីនេះ អាស្រ័យទៅលើពាក្យបណ្តឹង ហើយថាតើពាក្យបណ្ដឹងទាំងនោះ នឹងគ្របដណ្តប់លើបញ្ហាទាំងបីនេះដែរឬអត់។

នៅពេលមានសំណួរចោទសួរ ថាតើនឹងមានអ្វីកើតឡើង ប្រសិនបើញត្តិសំដៅចំពោះការយល់ព្រមរបស់លោក ភីថា លើបេក្ខជនរបស់គណបក្សឆ្ពោះទៅមុខ (MFP) នោះ លោកឧបនាយករដ្ឋមន្រ្ដីចាំផ្ទះ បានបន្ថែម ថា នៅក្នុងសេណារីយ៉ូបែបនេះ អាចនឹងមានការបោះឆ្នោតសកលជាថ្មី នៅទូទៅទូទាំងប្រទេស។

លោក វីសសានុ បានបន្ដ ថា គាត់មិនដឹង អំពីព័ត៌មានលម្អិត នៃញត្តិ ប្រឆាំងនឹងលោក ភីថា នោះទេ ហើយគាត់ក៏បានមិនណែនាំ អំពីរបៀបដែលពាក្យបណ្តឹងគួរតែត្រូវសរសេរនោះដែរ។ ប៉ុន្ដែគាត់គ្រាន់តែបានដាស់តឿន ដល់ប្រជាពលរដ្ឋ កុំឲ្យសន្មត់អ្វីទាំងអស់។ អ្នកមិនគួរមានក្ដីស្រមើស្រមៃវែងឆ្ងាយបែបនេះឡើយ ហើយត្រូវតែពិចារណាមួយជំហានម្តងៗ។ ចំណែកគណៈកម្មាធិការរៀបចំបោះឆ្នោត (EC) មិនទាន់បានចាត់វិធានការណាមួយនៅឡើយ។ ដូច្នេះកុំលោតឆ្ពោះទៅរកសេណារីយ៉ូអវិជ្ជមានណាមួយបន្ដទៀត។

លោក រួងក្រៃ លីខីតវ៉ាតតាណា (Ruangkrai Leekitwattana) ជាសកម្មជននយោបាយ ដែលបានដាក់ញត្តិទាំងនោះ បានអះអាង ថា ញត្តិរបស់គាត់ គ្របដណ្តប់គ្រប់ចំណុច រួមទាំងផលប៉ះពាល់ នៃបញ្ហាការដឹកនាំ នៃគណបក្សឆ្ពោះទៅមុខរបស់លោក ភីថា និង ការបញ្ជាក់របស់គាត់ ចំពោះបេក្ខជនរបស់គណបក្ស MFP ។

ស្របពេលមានការសាកសួរ ជុំវិញការធ្វើអត្ថាធិប្បាយរបស់លោក វីសសានុ ឧបនាយករដ្ឋមន្រ្ដីចាំផ្ទះនោះ លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ បានបញ្ជាក់ កាលពីថ្ងៃពុធ ថា គាត់មិនព្រួយបារម្ភ អំពីញត្តិទាំងនេះទេ។ រីឯគណបក្សរបស់គាត់ បានត្រៀមលក្ខណៈរួចរាល់អស់ហើយ សម្រាប់ដោះស្រាយស្ថានភាពបែបនេះ។ គាត់មានពេល សម្រាប់ឆ្លើយបំភ្លឺ អំពីការចោទប្រកាន់នេះ ហើយគាត់មិនបានឃើញព័ត៌មានលម្អិត នៃពាក្យបណ្តឹងនោះដែរ។

លោកប្រធានគណបក្សឆ្ពោះទៅមុខ បានលើកឡើង ថា ការបង្កើតក្រុមការងារអន្តរកាល គឺជាការអនុវត្តតាមធម្មតា នៅក្នុងប្រទេសផ្សេងៗទៀតដែលបានប្រកាន់ខ្ជាប់តាមបែបប្រជាធិបតេយ្យ ដោយឆ្លើយតបនឹងការរិះគន់ ថា ករណីនេះ មានចេតនា ដាក់សម្ពាធលើព្រឹទ្ធសភា ឲ្យបោះឆ្នោតឲ្យគាត់ធ្វើជានាយករដ្ឋមន្ត្រី។ ក្រុមការងារអន្តរកាល និង ក្រុមការងារទាំង៧ មិនមែនជាគណៈរដ្ឋមន្ត្រីស្រមោលនោះឡើយ ហើយពួកគេនៅទីនោះ សម្រាប់ការដោះស្រាយបញ្ហា ដូចដែលមានចែង នៅក្នុងអនុស្សរណៈ នៃការយោគយល់។

លោក សិរី សុវ៉ាន់ផាណុនត៍ (Seree Suwanpanont) សមាជិកព្រឹទ្ធសភា បានអះអាង កាលពីថ្ងៃពុធ ថា គាត់ជឿ ថា ការបង្កើតក្រុមការងារទាំងនេះ គឺជាការប៉ុនប៉ងរបស់គណបក្សឆ្ពោះទៅមុខ ដើម្បីបង្កើននូវការគាំទ្រជាសាធារណៈ សម្រាប់សម្ពន្ធភាព ដឹកនាំដោយ MFP ហើយដាក់សម្ពាធ ទៅលើគណៈកម្មាធិការរៀបចំការបោះឆ្នោត និង ព្រឹទ្ធសភា។ ករណីនេះ ធ្វើឲ្យគាត់គិត ថា ពួកគេគួរតែរង់ចាំ រហូតដល់រដ្ឋាភិបាលថ្មី ត្រូវបានបង្កើតឡើង។

លោកឧត្ដមសេនីយ៍ ប្រាយុទ្ធ ចាន់-អូ-ចា (Prayut Chan-o-cha) នាយករដ្ឋមន្រ្ដីចាំផ្ទះរបស់ប្រទេសថៃ បានអះអាង កាលពីថ្ងៃពុធ ថា គ្មានទីភ្នាក់ងាររដ្ឋណាមួយ បានទាក់ទងទៅគណបក្សឆ្ពោះទៅមុខ (MFP) ដើម្បីរៀបចំកិច្ចប្រជុំ ជាមួយក្រុមការងារអន្តរកាល នៃក្រុមចម្រុះ ដឹកនាំដោយ MFP នោះឡើយ។

លោកឧត្តមសេនីយ៍ ប្រាយុទ្ធ បាននិយាយបែបនេះ ខណៈមានការសាកសួរ អំពីសុន្ទរកថារបស់លោក ភីថា បានលើកឡើង ថា មន្ត្រីរដ្ឋ បានស្នើសុំកិច្ចប្រជុំមួយ ដោយបានបន្ថែម ថា «ខ្ញុំបានសួរទៅមន្ត្រីរដ្ឋ និង បុគ្គលិករបស់ខ្ញុំហើយ ឃើញ ថា គ្មាននរណាម្នាក់ នៅក្នុងចំណោមពួកគេធ្វើដូច្នេះឡើយ»។

លោកឧត្តមសេនីយ៍ ប្រាយុទ្ធ កាលពីថ្ងៃអង្គារ ក៏បានរិះគន់ដល់ផែនការអន្តរកាលរបស់គណបក្សឆ្ពោះទៅមុខ ថា វាជាសកម្មភាពមិនសមរម្យ ព្រោះពួកគេមិនមែនជារដ្ឋាភិបាលនោះឡើយ៕