រកឃើញសំបុកក្រពើភ្នំមួយកន្លែងក្នុងជម្រកដីសើមនៃត្រពាំងពាង ស្ថិតក្នុងឧទ្យានជាតិជួរភ្នំក្រវាញខាងត្បូងខេត្តកោះកុង ក្នុងខែមិថុនាដែលសំបុកនោះមានពងចំនួន២១គ្រាប់ ដែល១៧គ្រាប់បានបង្កកំណើតនោះ ត្រូវបានផ្លាស់ទីទៅកន្លែងមានសុវត្ថិភាព និងកំពុងត្រូវបានភ្ញាស់នៅក្នុងសំបុកសិប្បនិម្មិត ដើម្បីធានាសុវត្ថិភាព ខណៈដែលពងមិនបង្កកំណើតចំនួន ៤គ្រាប់ ត្រូវបានទុកនៅក្នុងសំបុកដើម។ នេះបើតាមការឱ្យដឹងពីក្រសួងបរិស្ថាន នាល្ងាចថ្ងៃទី១២ ខែមិថុនា ឆ្នាំ២០២៣។

ការរកឃើញសំបុកសត្វកម្រនេះធ្វើឡើងរវាងក្រុមការងារអភិរក្សក្រពើភ្នំនៃអង្គការ Fauna & Flora ក្នុងកិច្ចសហការជាមួយមន្ទីរបរិស្ថានខេត្តកោះកុង រដ្ឋបាលព្រៃឈើ និងសហគមន៍មូលដ្ឋាន។ ក្នុងនោះដែរ សំបុកសិប្បនិម្មិតនោះ ត្រូវបានហ៊ុមព័ទ្ធ និងយាមពេញមួយថ្ងៃដោយសហគមន៍អភិរក្សក្រពើ ដើម្បីការពារពងពីគ្រោះថ្នាក់ផ្សេងៗ ដោយរំពឹងថាពងនឹងញាស់នៅពាក់កណ្តាលខែសីហាខាងមុខនេះ ហើយកូនក្រពើនឹងត្រូវលែងចូលទៅក្នុងធម្មជាតិវិញ ដើម្បីធានាថាពួកគេមានឱកាសរស់រានមានជីវិតខ្ពស់បំផុត។

គួរបញ្ជាក់ថា ក្រពើភ្នំ (Crocodylus siamensis) ជាប្រភេទសត្វជិតផុតពូជបំផុត និងគំរាមកំហែងដល់ការផុតពូជពីធម្មជាតិ។ ក្រពើភ្នំ ត្រូវបានរកឃើញមានវត្តមាន នៅប្រទេសកម្ពុជា ដោយការអង្កេតរបស់អង្គការ Fauna & Flora និងរដ្ឋបាលព្រៃឈើនៅតំបន់ជួរភ្នំក្រវាញក្នុងឆ្នាំ២០០០ ដែលជាទីជម្រកដ៏សំខាន់បំផុតសម្រាប់ប្រភេទនេះ។ ចំនួនក្រពើភ្នំសរុបទូទាំងពិភពលោក តាមការសិក្សាបានវាយតម្លៃថា មានចំនួនប្រហែល ១ពាន់ ក្បាល ក្នុងនោះ ប្រទេសកម្ពុជាមានវត្តមានក្រពើភ្នំជិត ៤០០ក្បាល ដូច្នេះការរកឃើញសំបុកក្នុងធម្មជាតិនេះ គឺជាព័ត៌មានដ៏គួរឱ្យរំភើបរីករាយ៕

នាពេលថ្មីៗនេះ អគ្គនាយកដ្ឋានពន្ធដារបានសង្កេតឃើញមានការផ្សព្វផ្សាយនៅតាមបណ្តាញសង្គម Facebook ថា សាលាខ្មែរ-ចិនអរសប្បាយសិក្សា (JoY SCHOOL) តម្រូវឱ្យអាណាព្យាបាលសិស្សបង់ពន្ធលើថ្លៃការសិក្សា ដោយក្នុង លិខិតជូនដំណឹងរបស់សាលាបានបញ្ជាក់ថា “សាលាខ្មែរ-ចិនអរសប្បាយសិក្សា មានកិត្តិយសសូមជម្រាបជូនដំណឹងដល់ មាតាបិតា ឬអាណាព្យបាលសិស្សទាំងអស់ឱ្យបានជ្រាបថា៖ តាមលក្ខខណ្ឌរបស់រាជរដ្ឋាភិបាល និងក្រសួងអប់រំ សិស្សានុ- សិស្សទាំងអស់ត្រូវបង់ពន្ធលើថ្លៃការសិក្សា ២០%ជូនរាជរដ្ឋាភិបាលក្នុងមួយឆ្នាំៗ ហើយសាលាបានបង់ពន្ធលើថ្លៃការសិក្សា ជំនួសមាតាបិតា ឬអាណាព្យាបាលសិស្សានុសិស្សអស់រយៈពេល ៣ ឆ្នាំ។ ចាប់ពីឆ្នាំនេះទៅ សាលាជួយបង់ពន្ធលើថ្លៃការសិក្សា ជូនរដ្ឋតែ ១០%ប៉ុណ្ណោះ រីឯនៅសល់ថ្លៃលើការសិក្សា ១០% ទៀត សូមមាតាបិតាឬអាណាព្យាបាលសិស្សត្រូវទទួលខុសត្រូវ ជួយបង់ពន្ធលើថ្លៃការសិក្សានេះ។ ដោយគិតគូរពីស្ថានភាពសេដ្ឋកិច្ច របស់សង្គមបន្ទាប់ពីការរីករាលដាលនៃជំងឺរាតត្បាត ថ្លៃ សិក្សានឹងមិនត្រូវបានដំឡើងនៅឆ្នាំនេះទេ”។

អគ្គនាយកដ្ឋានពន្ធដារសូមធ្វើការបញ្ជាក់ជូនថា អនុលោមតាមច្បាប់ស្តីពីសារពើពន្ធ ដែលប្រកាសឱ្យប្រើដោយ ព្រះរាជក្រមលេខ នសរកម/០៥២៣/០០៤ ចុះថ្ងៃទី១៦ ខែឧសភា ឆ្នាំ២០២៣ គឺមិនមាន ប្រភេទពន្ធលើថ្លៃការសិក្សា នោះ ទេ។ ដោយឡែក ពន្ធលើប្រាក់ចំណូល តាមអត្រា២០% គឺជាបន្ទុករបស់គ្រឹះស្ថានសិក្សាផ្ទាល់ មិនមែនជាបន្ទុករបស់អាណា ព្យាបាលសិស្សានុសិស្សឡើយ។ ដូច្នេះមិនមានការតម្រូវឱ្យអាណាព្យាបាលសិស្សានុសិស្សបង់ពន្ធលើថ្លៃការសិក្សា ២០% ជូន រាជរដ្ឋាភិបាលក្នុងមួយឆ្នាំ តាមការលើកឡើងរបស់ សាលាខ្មែរ-ចិនអរសប្បាយសិក្សា នោះទេ។ ទន្ទឹមនឹងនេះ សូមជម្រាបជូន ដល់សាធារណជន ជាពិសេសអាណាព្យាបាលសិស្សានុសិស្សឱ្យបានជ្រាបផងដែរថា រាជរដ្ឋាភិបាល បានយកចិត្តទុកដាក់ យ៉ាងខ្លាំង ដោយចាត់ទុកជាវិស័យអប់រំជាវិស័យអាទិភាព និងបានផ្ដល់ការអនុគ្រោះលើកទឹកចិត្តផ្នែកពន្ធដារដល់វិស័យនេះ ជារៀងរហូតមក ក្នុងនោះរាជរដ្ឋាភិបាលបានដាក់ចេញនូវវិធានការលើកទឹកចិត្តផ្នែកពន្ធដារសម្រាប់រយៈពេល ៥ឆ្នាំម្តងៗ រហូត មកដល់បច្ចុប្បន្ន។ ថ្មីៗនេះ តាមរយៈលិខិតលេខ ២៥២ សជណ អវ ចុះថ្ងៃទី២៧ ខែកុម្ភៈ ឆ្នាំ២០១៣ របស់ទីស្ដីការគណៈរដ្ឋមន្តី រាជរដ្ឋាភិបាល បានបន្ដផ្ដល់ការលើកទឹកចិត្តផ្នែកពន្ធដារដល់គ្រឹះស្ថានសិក្សារដ្ឋ និងឯកជនទូទាំងប្រទេស ឱ្យរួចផុតពីការបង ពុទ្ធលើប្រាក់ចំណូល ប្រាករំដោះពន្ធលើប្រាក់ចំណូល ពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវាកម្ម ការប្រាក់ និងភាគលោក ចាប់ពីឆ្នាំ២០២៤ រហូតដល់ដំណាច់ឆ្នាំ២០២ជី ប៉ុន្តែគ្រឹះស្ថានសិក្សាត្រូវបង់ពន្ធលើប្រាក់បៀវត្ស ពន្ធកាត់ទុកលើ ការជួលទីតាំង ពន្ធអចពីរនទ្រព្យ និងប៉ាតង់។

ជាមួយគ្នានេះ អគ្គនាយកដ្ឋានពន្ធដារនិងសហការជាមួយស្ថាប័នអប់រំ និងស្ថាប័នពាក់ព័ន្ធនានា ធ្វើការពិនិត្យ លើគ្រឹះស្ថានទាំងឡាយណាដែលអនុវត្តមិនត្រឹមត្រូវស្របតាមគោលការណ៍លើកទឹកចិត្តពន្ធដាររបស់រាជរដ្ឋាភិបាលដល់វិស័យ អប់រំ ហើយក្នុងករណីរកឃើញថាស្ថាប័នអប់រំណាមួយប្រព្រឹត្តល្មើសនឹងត្រូវទទួលរងទោសទណ្ឌស្របតាមច្បាប់និងឱក បទប្បដ្ឋានគតិយុត្តជាធរមាន។ រាល់ចម្ងល់នានាពាក់ព័ន្ធនឹងពន្ធដារ សូមធ្វើការទាក់ទងមកលេខ ១២៧៧ ដោយឥតគិតថ្លៃ រៀងរាល់ម៉ោងធ្វើការ ឬកម្មវិធីជជែកផ្ទាល់ជាមួយពន្ធដារ GDT Live Chat ឬអង្គភាពពន្ធដារដែលសហគ្រាសស្ថិតក្រោមការ គ្រប់គ្រង។

អាស្រ័យហេតុនេះ សូមសាធារណជន មេត្តាជ្រាប និងស្នើឱ្យ សាលាខ្មែរ-ចិនអរសប្បាយសិក្សា កែតម្រូវខ្លឹមសារ នៃលិខិតជូនដំណឹងរបស់ខ្លួនឡើងវិញ៕

លោក ឆន សុវណ្ណារាជ ជាតារាចម្រៀងនៅក្នុងផលិតកម្មហង្សមាស ដែលបានក្តោបតំណែងជាគ្រូបង្វឹកកម្មវិធីលំដាប់ថ្នាក់ពិភពលោក The Voice Cambodia គ្រប់រដូវកាលនិងកម្មវិធី Cambodian Idol ដូចគ្នាបន្ទាប់ពីមានបទពិសោធន៍លើវិថីនេះជាច្រើនឆ្នាំ។ បើក្រឡេកទៅលើកការតុបតែងខ្លួនរបស់តារាចម្រៀងរូបនេះឃើញថាស្ទាយ៍នៃការតុបតែងខ្លួនរបស់លោកមានភាពទាក់ទាញតាមបែបយុវវ័យ ជាពិសេសអមជាមួយគ្រឿងអលង្ការពេជ្រដ៏ស្រស់ស្អាតទៀតកាន់តែមានភាពលេចធ្លោ។

ជាក់ស្តែង នៅក្នុងរដូវកាលទី៣ នៃកម្មវិធី The Voice Cambodia វគ្គ Blind Auditions ឆន សុវណ្ណារាជ បានតុបតែងខ្លួនយ៉ាងស្រស់សង្ហា ជាមួយអាវខ្មៅខាងក្នុងនិងមានអាវកាប៊ូយពីខាងក្រៅ និងខោខ្មៅទៀត ធ្វើឱ្យតារាចម្រៀងរូបនេះនៅតែសង្ហាទោះបីជាវ័យជ្រេបន្តិចក៏ដោយ។

អ្វីដែលកាន់តែគួរឱ្យចាប់អារម្មណ៍ Coach ឆន សុវណ្ណារាជ បានលម្អខ្លួនជាមួយគ្រឿងអលង្ការពេជ្រយ៉ាងចាំងភ្នែកតែម្តងនៅលើតួខ្លួនរបស់លោក ខណៈតម្លៃគ្រឿងពេជ្រដែលតារាប្រុសរូបនេះតុបតែងខ្លួនមានតម្លៃជាង២ម៉ឺនដុល្លារឯណោះ។

តម្លៃនេះមានដូចជា ចិញ្ចៀនពេជ្រ៣វង់ មានតម្លៃដូចជា ៣ ៦៩០$ , ១ ៩៥០$ ,២១៩០$។ ខ្សែដៃមានតម្លៃ ៨ ៩០០$ និងបណ្តោងខ្សែកមានតម្លៃ ១ ៩៥០$ ដែលសរុបបញ្ចូលគ្នាគឺមានតម្លៃ ២០ ២៨០ ដុល្លារ។

គួរបញ្ជាក់ផងដែរថា តារាចម្រៀង ឆន សុវណ្ណារាជ គឺជាតារាប្រុសមួយរូបដែលនិយមចូលចិត្តគ្រឿងអលង្ការតុបតែងខ្លួនយ៉ាងខ្លាំងហើយបានឱ្យជាងប្រចាំខ្លួនច្នៃជាពិសេសមានម៉ូតខុសប្លែកគ្នាទៅតាមតម្រូវការកម្មវិធីផ្សេងៗ៕

បន្ទាប់ពី​ស្ថិត​នៅ​ក្នុង​ភាពជា​បព្វជិត​អស់ ៣១​ឆ្នាំ​មក ភិក្ខុ​វជិរប្បញ្ញោ សាន សុជា បាន​ប្រកាស​រៀបចំ​ពិធី​លាចាក​សិក្ខាបទ​ហើយ​នៅ​រសៀល​ថ្ងៃអាទិត្យ ទី២១ ខែឧសភា។

ក្រោយពីលាចាក​សិក្ខាបទ លោកគ្រូ សាន សុជា បានទៅស្នើនៅប្រទេសអូស្ត្រាលីមួយរយៈពេលខ្លី ហើយពេលនេះលោកគ្រូបានត្រឡប់មកដល់ប្រទេសកម្ពុជាយើងវិញ កាលពីថ្ងៃទី១១ ខែមិថុនាកន្លងទៅ ដោយស្នើសុំជួបសម្តេចតេជោ ហ៊ុនសែន។

យោងតាមប្រសាសន៍របស់សម្តេចតេជោហ៊ុនសែន បានឱ្យដឹងថា៖” អន្ទិតសាន សុជា ដែលពីមុននៅជាព្រះសង្ឃ គេហៅតេគុណ សាន សុជា ឥឡូវទៅជាអន្ទិត ព្រោះលាចាក​សិក្ខាបទហើយ។ ម្សិលមួយថ្ងៃបានមកដល់សៀមរាប ចុះពីលើយន្តហោះ ទាក់ទងគ្នាថាមកសុំជួបនាយករដ្ឋមន្រ្តី ហើយឱ្យរើសថ្ងៃទៅរវាងថ្ងៃទី១៣​និងទី១៤ ចឹងគ្នាក៏សុំរើសថ្ងៃទី១៣តែម្តងទៅ ហើយឥឡូវក៏ប្រហែលកំពុងធ្វើដំណើរជាមួយឯកឧត្តម ឧត្តមសេនីយ៍ទោ ខៀវ សាម៉េតទៅផ្ទះខ្ញុំ ដើម្បីមកសុំជួប”៕

តាមសេចក្តីប្រកាសពីក្រសួងធានធនធានទឹក និងឧតុនិយម បានឱ្យដឹងថា កម្ពុជានឹងទទួលរងឥទ្ធិពលពីជ្រលងសម្ពាធទាប (ITCZ) ដែលអូសបន្លាយលើភាគខាងជើងនៃប្រទេស មីយ៉ាន់ម៉ា ឡាវ និងវៀតណាម គួបផ្សំនិងខ្យល់មូសុងនិរតីក្នុងកម្រិតពីមធ្យមទៅបង្គួរ ដែលបណ្តាលឱ្យកម្ពុជាអាចមានភ្លៀងធា្លក់ លាយឡំ ដោយខ្យល់កន្រ្តាក់ពេញមួយសប្តាហ៍ចាប់ពីថ្ងៃទី១៤ ដល់ថ្ងៃទី២០ ខែមិថុនា ឆ្នាំ២០២៣។

ស្ថានភាពបែបនេះធ្វើឱ្យតំបន់ទំនាបកណ្តាល មានសីតុណ្ហភាពអប្បបរមាពី ២៥-២៧ °C និង សីតុណ្ហភាពអតិបរមាមានពី ៣៤-៣៦ °C។ ចំណែកឯ តំបន់ខ្ពង់រាប សីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ៣៣-៣៥ °C ។ សម្រាប់ តំបន់មាត់សមុទ្រ វិញសីតុណ្ហភាពអប្បបរមា មានពី ២៥-២៧ °C សីតុណ្ហភាពអតិបរមា មានពី ៣១-៣៣ °C។

គួរបញ្ជាក់ផងដែរថា តំបន់៣ខាងលើនេះ អាចមានភ្លៀងធ្លាក់ក្នុងកម្រិតពីខ្សោយទៅមធ្យម លាយឡំដោយផ្គរ រន្ទះ និងខ្យល់កន្ត្រាក់ ដែលពលរដ្ឋត្រូវមានការប្រុងប្រយ័ត្នខ្ពស់ចំពោះបាតុភូតធម្មជាតិដែលអាចកើតមានឡើងជាយថាហេតុ ៕