រដ្ឋធានីកៀវ៖ ថ្វីបើការវាយបកទ្រង់ទ្រាយធំរបស់រដ្ឋាភិបាលក្រុងកៀវ នៅតែមិនទាន់ចូលមកដល់ក៏ពិតមែន ប៉ុន្ដែការតេស្ដសាកល្បងវាយលុក ទៅលើកម្លាំងទាហានរុស្ស៊ី ចាប់តាំងពីថ្ងៃទី៤ ខែមិថុនា រហូតមកដល់ពេលនេះ កងទ័ពអ៊ុយក្រែន បានរំដោះទឹកដីរបស់ខ្លួន ប្រហែល១១៣គីឡូម៉ែត្រការ៉េ ខណៈលោកស្រី អនុរដ្ឋមន្រ្ដីក្រសួងការពារជាតិអ៊ុយក្រែន បានអះអាងអំពីការប្រយុទ្ធដ៏ស្វិតស្វាញបំផុត រវាងភាគីជម្លោះទាំង២នេះ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី២០ ខែមិថុនា ឆ្នាំ២០២៣ ថា លោកស្រី ហានណា ម៉ាលីយ៉ា (Hanna Maliar) អនុរដ្ឋមន្រ្ដី ក្រសួងការពារជាតិអ៊ុយក្រែន បានបញ្ជាក់ ថា ការវាយលុកទ្រង់ទ្រាយធំបំផុត នៅក្នុងយុទ្ធនាការវាយបករបស់រដ្ឋាភិបាលក្រុងកៀវ ប្រឆាំងនឹងកម្លាំងទាហានរុស្ស៊ី នៅមិនទាន់មកដល់នោះទេ។ ប៉ុន្ដែលោកស្រី បានទទួលស្គាល់ ថា ប្រតិបត្ដិការយោធា នាពេលនេះ ពិតជាមានការលំបាកខ្លាំងណាស់ ព្រោះរដ្ឋាភិបាលក្រុងមូស្គូ កំពុងតែធ្វើអ្វីគ្រប់យ៉ាង នៅលើសមរភូមិ ដើម្បីរារាំងដល់កងទ័ពអ៊ុយក្រែន ពីការវាយរុលទៅមុខ។

កងទ័ពអ៊ុយក្រែន កាលពីពីរសប្តាហ៍មុន បានចាប់ផ្តើមដំណាក់កាលដំបូង នៃការវាយបកតាមពាក្យចចាមអារ៉ាម អស់រយៈពេលជាយូរមកហើយ ដើម្បីរំដោះទឹកដីរបស់ខ្លួន ចេញពីការកាន់កាប់របស់កងកម្លាំងរុស្ស៊ី។ ប៉ុន្តែស្របពេលមានសេចក្តីរាយការណ៍ អំពីកងទ័ពអ៊ុយក្រែន បានវាយបក រុលទៅមុខយឺតៗ ហើយការទប់ទល់នឹងការវាយសន្ធាប់យ៉ាងខ្លាំងក្លា ពីទាហានរុស្ស៊ី នោះ ធ្វើឲ្យក្រុមមន្ត្រីរដ្ឋាភិបាលក្រុងម៉ូស្គូ បានចេញមុខ មកអះអាងថា ការវាយបករបស់ក្រុងកៀវ កំពុងតែរងនូវបរាជ័យ។

បើទោះជាយ៉ាងណាក៏ដោយ រហូតមកដល់ពេលនេះ កងទ័ពអ៊ុយក្រែន នៅតែរក្សាភាពស្ងៀមស្ងាត់បំផុត អំពីយុទ្ធនាការវាយបកជាធម្មតារបស់ខ្លួន។ ប៉ុន្ដែក្រុងកៀវ កាលពីថ្ងៃចន្ទ បានប្រកាស ថា កងទ័ពអ៊ុយក្រែន បានទទួលជ័យជម្នះដ៏តិចតួច ដោយរំដោះបានភូមិចំនួន៨ មានផ្ទៃដីទំហំ១១៣គីឡូម៉ែត្រការ៉េ។

លោកស្រី ហានណា ម៉ាលីយ៉ា អនុរដ្ឋមន្រ្ដីក្រសួងការពារជាតិអ៊ុយក្រែន បានសរសេរ នៅលើបណ្ដាញសង្គមតេឡេក្រាម ថា «ប្រតិបត្ដិការយោធា កំពុងតែបន្ដ នៅតាមទិសដៅផ្សេងៗគ្នា ហើយកងទ័ពអ៊ុយក្រែន កំពុងតែបំពេញភារកិច្ចទាំងនេះ។ ចំណែកកម្លាំងទាហានរុស្ស៊ី នឹងមិនងាយបោះបង់ចោលនូវទីតាំងឈរជើងរបស់ពួកគេនោះឡើយ ហើយយើងត្រូវតែរៀបចំខ្លួន សម្រាប់ការវាយលុកដ៏ស្វិតស្វាយនេះ។ នេះជាអ្វីដែលកំពុងតែកើនឡើង នៅពេលឥឡូវនេះ»។

ដោយឡែក លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានអះអាង កាលពីសប្ដាហ៍មុន ថា ការវាយបករបស់អ៊ុយក្រែន នឹងមិនជោគជ័យនោះទេ។ ប៉ុន្តែអ្នកសរសេរប្លុកយោធារុស្ស៊ីខ្លះ បានរាយការណ៍ ថា រដ្ឋាភិបាលក្រុងកៀវ បានទទួលជោគជ័យតិចតួច ព្រោះពួកគេមានការខាតបង់ដ៏ធំសម្បើម លើកម្លាំងទ័ព និង គ្រឿងយុទ្ធោបករណ៍។

ថ្វីបើមិនមានប្រភពឯករាជ្យ បញ្ជាក់អំពីប្រតិបត្ដិការយោធា ដែលកំពុងតែបន្ដ នៅលើសមរភូមិនេះយ៉ាងណាក្ដី ប៉ុន្ដែទីភ្នាក់ងារសារព័ត៌មាន Reuters អាចអះអាងបាន ថា កងទ័ពអ៊ុយក្រែន កំពុងតែវាយលុករុលទៅមុខ នៅក្នុងដំណាក់កាល វាយបកជាលើកដំបូងរបស់ពួកគេ។

វិទ្យាស្ថានសិក្សាពីសង្គ្រាម think tank មានមូលដ្ឋាន នៅក្នុងរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃអាទិត្យ កន្លងទៅថ្មីៗនេះ បានដកស្រង់ប្រភពជាច្រើន អះអាង ថា កងទ័ពអ៊ុយក្រែន ទំនងជាផ្អាកប្រតិបត្ដិការវាយបកមួយរយៈពេលខ្លីសិន ដើម្បីវាយតម្លៃឡើងវិញ អំពីយុទ្ធសាស្រ្ដសង្គ្រាមរបស់ខ្លួន សម្រាប់ការបើកប្រតិបត្ដិការទ្រង់ទ្រាយធំ នៅពេលខាងមុខ។

វិទ្យាស្ថានសិក្សាពីសង្គ្រាម ហៅកាត់ ISW ក៏បានថ្លែងជាដដែល ថា យុទ្ធនាការវាយបកទ្រង់ទ្រាយធំរបស់អ៊ុយក្រែន នៅមិនទាន់ ចាប់ផ្ដើមនៅឡើយ។

វិទ្យាស្ថានសិក្សាពីសង្គ្រាម បានបញ្ជាក់ នៅក្នុងការវិភាគស្ថានការណ៍ប្រចាំថ្ងៃរបស់ខ្លួន ថា « ISW បានកត់សម្គាល់ពីមុន ថា អ៊ុយក្រែន នៅតែមិនទាន់បានប្រាប់ អំពីចំនួនកងកម្លាំងរបស់ខ្លួន សម្រាប់ប្រតិបត្តិការវាយលុក ហើយក៏នៅតែមិនទាន់បានចាប់ផ្តើមនូវកិច្ចខិតខំប្រឹងប្រែងដ៏ចម្បងរបស់ខ្លួននៅឡើយ។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានថ្លែងនៅក្នុងសុន្ទរកថាជាវីដេអូ ប្រចាំរាត្រីរបស់គាត់ ថា ការវាយបកដោយយោធា ស្ថិតក្នុងស្ថានភាពនៃសម្ពាធ។ ប៉ុន្តែកងកម្លាំងអ៊ុយក្រែន នឹងមិនអនុញ្ញាតឱ្យមានសម្ពាធធ្លាក់ចុះ ចំពោះការផ្តោតលើកងកម្លាំងរុស្ស៊ី នោះទេ។

លោកប្រធានាធិបតីអ៊ុយក្រែន បានសង្កត់ធ្ងន់ ថា «នៅតាមតំបន់ខ្លះ អ្នកចម្បាំងរបស់យើង កំពុងតែវាយបករុលទៅមុខ ខណៈសមរភូមិផ្សេងៗទៀត កងទ័ពរបស់យើង កំពុងតែការពារទីតាំងឈរជើងរបស់ខ្លួន ហើយទប់ទល់នឹងការវាយបក និង ការប្រហារដ៏ខ្លាំងក្លា ពីអ្នកឈ្លានពាន។ យើងមិនបានបាត់បង់ទីតាំងឈរជើងនោះទេ ហើយយើងមានតែរំដោះដែនដីរបស់យើង ត្រឡប់មកវិញថែមទៀតផង ខណៈកម្លាំងសត្រូវ មានតែការបាត់បង់»។

ដោយឡែក ក្រុមមន្រ្ដី មកពីបណ្ដាប្រទេស ជាសមាជិករបស់អង្គការណាតូ បានបញ្ជាក់ ថា ក្រុងមូស្គូ កំពុងតែដាក់ពង្រាយកម្លាំងទាហានរុស្ស៊ី ឡើងវិញ ខណៈកំពុងស្វែងរកការប្រមើលមើល ពីមូលដ្ឋានកងទ័ពរបស់ខ្លួន អាចនឹងត្រូវរងការវាយប្រហារ ពីកងទ័ពអ៊ុយក្រែន។

លោក វ៉ាឡេរី ហ្សាលូស្នី (Valerii Zaluzhnyi) នាយអគ្គសេនាធិការកងទ័ពអ៊ុយក្រែន បានសរសេរ នៅលើបណ្ដាញសង្គមតេឡេក្រាម កាលពីថ្ងៃចន្ទ ថា ការវាយលុករុលទៅមុខរបស់កងទ័ពអ៊ុយក្រែន នៅតំបន់ភាគខាងត្បូង ប្រទេស ត្រូវបានរារាំង ដោយបន្ទាយជាច្រើន អណ្តូងរ៉ែ និង កងទ័ពជំនួយដ៏ច្រើន ប៉ុន្តែប្រតិបត្តិការនេះ នឹងនៅតែប្រព្រឹត្ដទៅ តាមការគ្រោងទុក៕

ប្រទេសចិន៖ យោងតាមប្រភពព័ត៌មាន SCMP របស់ចិនកាលពីថ្ងៃទី១៥ ខែមិថុនា បានឱ្យដឹងថា ក្បាលរថភ្លើងអ៊ីដ្រូសែន Ningdong ដំបូងគេរបស់ប្រទេសចិនត្រូវបានគេសរសើរថាជាក្បាលរថភ្លើងដើរដោយថាមពលអ៊ីដ្រូសែនខ្លាំងបំផុតរបស់ពិភពលោក នឹងមានសក្ដានុពលក្នុងការជំនួសឱ្យម៉ាស៊ីនដែលដើរដោយឥន្ធនៈហ្វូស៊ីលដែលកំពុងប្រើប្រាស់សព្វថ្ងៃ។ ដោយ Ningdong អាចផ្ទុកអ៊ីដ្រូសែនបាន ២៧០ គីឡូក្រាម និងដំណើរការបន្តរហូតដល់ ១៩០ ម៉ោង។

គោលបំណងនៃការបង្កើតក្បាលរថភ្លើងអ៊ីដ្រូសែន Ningdong នេះ គឺដើម្បីការកាត់បន្ថយការបំភាយឧស្ម័នពុល និងជំនួសឱ្យម៉ាស៊ីនដែលដើរដោយឥន្ធនៈហ្វូស៊ីល ព្រោះឥន្ធនៈហ្វូស៊ីល គឺមានការបំភាយឧស្ម័នពុលយ៉ាងច្រើនសន្ធឹកសន្ធាប់ ដែលធ្វើឱ្យប៉ះពាល់ដល់បរិស្ថានរបស់ពិភពលោកយ៉ាងខ្លាំង។

គួរបញ្ជាក់ដែរថា ក្បាលរថភ្លើងអ៊ីដ្រូសែនដំបូងគេរបស់ពិភពលោកបានចាប់ផ្តើមប្រតិបត្តិការពាណិជ្ជកម្មក្នុងប្រទេសអាឡឺម៉ង់ក្នុងឆ្នាំ ២០១៨ ហើយបានធ្វើដំណើរជាង ២២០,០០០ គីឡូម៉ែត្រក្នុងប្រទេសអឺរ៉ុបចំនួនប្រាំបីគិតត្រឹមខែមករានេះបើយោងតាមក្រុមហ៊ុនផលិតរថភ្លើងគឺក្រុមហ៊ុនបារាំង Alstom ។

ដូច្នេះហើយ បច្ចុប្បន្នប្រទេសចិនគ្រោងនឹងពន្លឿនការអភិវឌ្ឍន៍យានជំនិះដែលប្រើដោយថាមពលអ៊ីដ្រូសែនដូចទៅនឹងអឺរ៉ុបផងដែរ នឹងមានបំណងបង្កើតរថយន្តកោសិកាឥន្ធនៈចំនួន ៥០,០០០ គ្រឿងនៅឆ្នាំ ២០២៥ នេះបើយោងតាមផែនការដែលចេញផ្សាយដោយគណៈកម្មាធិការកំណែទម្រង់ និងអភិវឌ្ឍន៍ជាតិរបស់ប្រទេសចិនក្នុងខែមីនា ឆ្នាំ ២០២២។ ប្រទេសនេះដែរក៏មានគោលដៅសាងសង់ស្ថានីយចាក់ប្រេងអ៊ីដ្រូសែន និងផលិតអ៊ីដ្រូសែនបៃតងពី ១០០,០០០ ទៅ ២០០,០០០ តោនក្នុងឆ្នាំ ២០២៥ ផងដែរ៕ ប្រភព៖vnexpress

ប្រទេសនេប៉ាល់ ៖ អាជ្ញាធរប្រទេសនេប៉ាល់បានប្រកាសថា មានគ្រោះទឹកជំនន់ភ្លាមៗនៅរដ្ឋកូស៊ី ដែលស្ថិតនៅភាគខាងកើតប្រទេសនេប៉ាល់ ក្រោយពីរដ្ឋនេះមានភ្លៀងធ្លាក់ខ្លាំងជាប់ៗគ្នាអស់រយៈពេល១សប្តាហ៍ ។ តាមការរាយការណ៍ចុងក្រោយឱ្យដឹងថា មានពលរដ្ឋស្លា.ប់យ៉ាងតិច៥នាក់ ហើយចំនួននេះនឹងកើនឡើងបន្តទៀត ដោយសារមានអ្នកបា.ត់ខ្លួន២៨នាក់ទៀត ។

អ្នកបា.ត់ខ្លួនក្នុងហេតុការណ៍គ្រោះទឹកជំនន់នេះ ភាគច្រើនគឺជាកម្មករសំណង់ធ្វើការនៅរោងចក្រវារីអគ្គិសនីក្នុងតំបន់សាន់គូ វ៉ាសផា ដែលរោងចក្រនេះមានទីតាំងស្ថិតនៅក្បែរទន្លេ ។ ចំណែកអ្នកបាត់ខ្លួនផ្សេងទៀត គឺជាអ្នករស់នៅតំបន់ថាប់លេជុង និងតំបន់ប៉ាន់ចាថា ដែលនៅជាប់ព្រំដែនប្រទេសឥណ្ឌា ។

ចាប់តាំងពីថ្ងៃទី១៨ ខែមិថុនា កន្លងមក ប៉ូលិស និងទាហាននេប៉ាល់ ព្រមទាំងក្រុមអ្នកស្ម័គ្រចិត្តជាច្រើននាក់បានរួមគ្នាស្វែងរកកម្មករបាត់ខ្លួន ប៉ុន្តែនៅតែមិនប្រទះឃើញ ដោយសារតែអាកាសធាតុមិនអំណោយផល ។ ចំណែកសាច់ញាតិរបស់អ្នកបាត់ខ្លួនសង្ឃឹមថា អាជ្ញាធរនឹងអាចស្វែងរកអ្នកបាត់ខ្លួនឃើញនាពេលឆាប់ៗនេះ ហើយពួកគេនៅរស់រានមានជីវិតផងដែរ ៕ ប្រភព ៖ TNN World

រដ្ឋធានីប៉េកាំង៖ ដោយសារតែពិភពលោក កំពុងតែព្រួយបារម្ភ អំពីការប៉ះទង្គិចគ្នា ដោយកម្លាំងយោធា ជុំវិញបញ្ហាកោះតៃវ៉ាន់ និង សមុទ្រចិនខាងត្បូង នោះ ប្រមុខការទូតរបស់សហរដ្ឋអាមេរិក បានធ្វើដំណើរទៅកាន់រដ្ឋធានីប៉េកាំង ហើយបានជួបពិភាក្សាគ្នា ជាមួយនឹងមេដឹកនាំចិន ដោះស្រាយបញ្ហាតានតឹងខាងការទូត រវាងរដ្ឋាភិបាលក្រុងវ៉ាស៊ីនតោន និង ក្រុងប៉េកាំង។

សារព័ត៌មាន BBC បានចេញផ្សាយ កាលពីព្រឹក ថ្ងៃអង្គារ ទី២០ ខែមិថុនា ថា នៅក្នុងដំណើរទស្សនកិច្ចរយៈពេល២ថ្ងៃរបស់លោករដ្ឋមន្រ្ដីការបរទេស អេនតូនី ប្ល៊ីនខេន (Antony Blinken) ទៅកាន់រដ្ឋធានីប៉េកាំង នោះ សហរដ្ឋអាមេរិក និង ចិន បានសន្យា ធ្វើឲ្យមានស្ថិរភាព ចំពោះទំនាក់ទំនងដ៏តានតឹង រវាងក្រុងវ៉ាស៊ីនតោន និង ក្រុងប៉េកាំង។លោក អេនតូនី ប្ល៊ីនខេន ប្រមុខការទូតសហរដ្ឋអាមេរិក កាលពីថ្ងៃចន្ទ បានជួបចរចាគ្នា ជាមួយនឹងលោក ស៊ី ជិនពីង (Xi Jinping) ប្រធានាធិបតីចិន។ ដំណើរទស្សនកិច្ចនេះ ក៏ជាការចាប់ផ្ដើមទំនាក់ទំនងកម្រិតកំពូលឡើងវិញ រវាងប្រទេសមហាអំណាចលោកខាងលិច និង មហាយក្សចិន ដែលជាគូប្រជែងនឹងគ្នា។

លោក ស៊ី ជិនពីង មេដឹកនាំចិន បានបញ្ជាក់ ថា ចិន និង សហរដ្ឋអាមេរិក កំពុងតែធ្វើឲ្យមានការរីកច្រើនទៅមុខ សម្រាប់ទំនាក់ទំនងការទូត រវាងប្រទេសទាំង២។ ស្របគ្នានេះដែរ លោក អេនតូនី ប៊ីលខេន ក៏បានបង្ហាញ ថា ភាគីទាំង២ បានបើកចំហនូវកិច្ចចរចាបន្ថែមទៀត។ ប៉ុន្ដែប្រមុខការទូតសហរដ្ឋអាមេរិក រូបនេះ បានប្រកាសយ៉ាងច្បាស់ ថា ការខ្វែងគំនិតគ្នាធំៗជាច្រើន នៅតែមានដដែល។

លោក អេនតូនី ប្ល៊ីនខេន រដ្ឋមន្រ្ដីក្រសួងការបរទេសសហរដ្ឋអាមេរិក បានថ្លែងទៅកាន់ក្រុមអ្នកសារព័ត៌មាន ក្រោយជំនួបរយៈពេល៣៥នាទី នៅឯមហាសាលប្រជាជន នៅវាលធានអានមេន (Tiananmen) ថា «ខ្ញុំបានសង្កត់ធ្ងន់ ថា… ការប្រាស្រ័យទាក់ទង ប្រកបដោយនិរន្តរភាព នៅក្នុងកម្រិតខ្ពស់ ព្រោះវាជាមធ្យោបាយដ៏ល្អបំផុត សម្រាប់ការគ្រប់គ្រងនូវការខ្វែងគំនិតគ្នា ប្រកបដោយការទទួលខុសត្រូវ។ បញ្ហាទំនាក់ទំនងគ្នានេះ នឹងធានា ថា ការប្រកួតប្រជែង មិនមែនក្លាយជាជម្លោះនោះឡើយ។ ខ្ញុំក៏បានឮពាក្យដូចគ្នានេះដែរ ពីសមភាគីចិនរបស់ខ្ញុំ។ យើងទាំង២ បានព្រព្រៀងគ្នា លើតម្រូវការ សម្រាប់ការធ្វើឲ្យមានស្ថិរភាពនូវទំនាក់ទំនងរបស់យើង»។

បើទោះជាយ៉ាងណាក៏ដោយ លោកប្រមុខការទូតសហរដ្ឋអាមេរិក វ័យ៦១ឆ្នាំ រូបនេះ បានសង្កត់ធ្ងន់ ថា «ខ្ញុំបានយល់កាន់តែច្បាស់ អំពីប្រទេសចិន ហើយវានៅតែមានបញ្ហាជាច្រើនទៀត ដែលយើងនៅតែមិនទាន់ឯកភាពគ្នា»។

ទំនាក់ទំនងការទូត រវាងរដ្ឋាភិបាលក្រុងប៉េកាំង និង ក្រុងវ៉ាស៊ីនតោន បានធ្លាក់ចុះយ៉ាងខ្លាំង ក្រោយពេលការផ្ទុះឡើងនូវសង្គ្រាមពាណិជ្ជកម្ម នៅក្នុងសម័យប្រធានាធិបតីរបស់សហរដ្ឋអាមេរិក លោក ដូណាល់ ត្រាំ (Donald Trump), ការអះអាងរបស់ក្រុងប៉េកាំង ចំពោះដែនអធិបតេយ្យភាពរបស់ចិន នៅលើកោះតៃវ៉ាន់ និង ការបាញ់ទម្លាក់បាឡុងរបស់ចិន កាលពីដើមឆ្នាំ២០២៣ ក្រោមការចោទប្រកាន់របស់សហរដ្ឋអាមេរិក ថា វាជាបាឡុងចារកម្ម ហោះឈ្លបយកការណ៍ ពីលើដែនអាកាស នៃតំបន់ដ៏រសើបបំផុតរបស់សហរដ្ឋអាមេរិក។

ក្រសួងការបរទេសសហរដ្ឋអាមេរិក បានបញ្ជាក់ ថា ការពិភាក្សាគ្នា រវាងប្រមុខការទូតសហរដ្ឋអាមេរិក និង មេដឹកនាំចិន លោក ស៊ី ជិនពីង បានក្ដោបលើបញ្ហាជាច្រើន ដោយរាប់បញ្ចូលទាំង បញ្ហាសង្គ្រាមរបស់រុស្ស៊ី នៅក្នុងប្រទេសអ៊ុយក្រែន និង វិបត្តិហ្វេតានីលរបស់សហរដ្ឋអាមេរិក (Fentanyl ជាថ្នាំអាភៀនសំយោគដ៏ខ្លាំងក្លា ត្រូវបានអនុម័តដោយរដ្ឋបាលចំណីអាហារ និង ឱសថ សម្រាប់ប្រើជាថ្នាំស្ពឹក ឬបំបាត់ការឈឺចាប់ និងថ្នាំស្ពឹក) រហូតដល់បញ្ហាកោះតៃវ៉ាន់ កូរ៉េខាងជើង និង ការចោទប្រកាន់អំពីការរំលោភបំពានសិទ្ធិមនុស្ស នៅក្នុងប្រទេសចិន។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក និង ក្រុមមន្រ្ដីរបស់រដ្ឋាភិបាលក្រុងវ៉ាស៊ីនតោន បានបញ្ជាក់ ថា សហរដ្ឋអាមេរិក ចាត់ទុកចិន ជាដៃគូប្រជែង និង ជាអ្នកប្រកួតប្រជែងដ៏សំខាន់បំផុត ប៉ុន្ដែចិនមិនមែនជាសត្រូវនោះឡើយ។ បើទោះជាយ៉ាងណាក៏ដោយ កិច្ចពិភាក្សាគ្នានេះក្លាយជាមាគ៌ាដ៏ល្អមួយ សម្រាប់ដំណើរឆ្ពោះទៅមុខ ខណៈប្រទេសមហាអំណាចទាំង២នេះ កំពុងតែប្រកួតប្រជែងគ្នា កាន់តែក្ដៅគគុក ទាំងផ្នែកយោធា និង សេដ្ឋកិច្ច។

ដោយឡែក កោះតៃវ៉ាន់ ក្លាយជាតំបន់ជម្លោះដ៏ធំបំផុត រវាងប្រទេសមហាអំណាចសេដ្ឋកិច្ចរបស់ពិភពលោក ទាំង២នេះ ហើយវាជាតំបន់ដ៏មានសក្ដានុពលខ្ពស់បំផុត។ ចំណែកចិន មើលឃើញ ថា តៃវ៉ាន់ គ្រប់គ្រងដោយខ្លួនឯង ក្លាយជាខេត្តបំបែកខ្លួន។ បន្ថែមពីលើនេះ លោក ស៊ី ជិនពីង ប្រធានាធិបតីចិន បានបង្ហាញអំពីគោលបំណងរបស់គាត់ ចង់រឹបអូសយកកោះតៃវ៉ាន់ មកដាក់នៅក្រោមការគ្រប់គ្រងរបស់ក្រុងប៉េកាំង នៅក្នុងអំឡុងពេលកាន់តំណែងរបស់គាត់។

ក្រុងតៃប៉ិ មើលឃើញ ថា ខ្លួនឯង មានភាពខុសគ្នា ពីចិនដីគោក ព្រោះតៃវ៉ាន់ មានរដ្ឋធម្មនុញ្ញ និង មេដឹកនាំរបស់ខ្លួន។ ជាមួយគ្នានេះដែរ លោក ចូ បៃដិន ប្រធានាធិបតីសហរដ្ឋអាមេរិក កាលពីឆ្នាំ២០២២ បានបញ្ជាក់យ៉ាងច្បាស់ ថា ក្រុងវ៉ាស៊ីនតោន នឹងការពារកោះតៃវ៉ាន់ នៅក្នុងព្រឹត្តិការណ៍វាយលុករបស់ចិន មកលើកោះតៃវ៉ាន់។ ការលើកឡើងរបស់លោកប្រធានាធិបតី បៃដិន បាននាំឲ្យមានការថ្កោលទោសយ៉ាងខ្លាំង ពីរដ្ឋាភិបាលក្រុងប៉េកាំង ផងដែរ៕

ប្រទេសថៃ ៖ កាលពីថ្ងៃទី១៩ ខែមិថុនា កន្លងមក លោក Nitipon Pewmoh បេក្ខជនតំណាងរាស្ត្រមកពីគណបក្សកាវក្លៃបានបង្ហោះសារនៅក្នុងហ្វេសប៊ុកថា ប្រទេសថៃនឹងធ្វើប័ណ្ណសម្គាល់ឱ្យសត្វឆ្មា និងឆ្កែ ដើម្បីដឹងពីចំនួនច្បាស់លាស់សម្រាប់សត្វមានម្ចាស់ និងសត្វគ្មានម្ចាស់ ។ ការធ្វើប័ណ្ណសម្គាល់ឱ្យសត្វនេះ នឹងជាទិន្នន័យសំខាន់សម្រាប់ការៀបចំគោលនយោបាយ និងការផ្តល់ថវិកាសម្រាប់ថែទាំសត្វ ។

លោក Nitipon Pewmoh បន្តថា ៖ «បច្ចុប្បន្ននេះ គឺជាអំឡុងពេលប្រមូលទិន្នន័យ ហើយខ្ញុំនឹងផ្តល់ដំណឹងឱ្យពលរដ្ឋបានជ្រាប បើការប្រមូលព័ត៌មានបញ្ចប់ ។ យើងនឹងអនុវត្តនៅទីក្រុងបាងកកមុនគេ ហើយបើទទួលបានជោគជ័យនោះ យើងនឹងដំណើរការនៅតាមតំបន់ផ្សេងទៀត ។ បើទោះជាការបង្កើតរដ្ឋាភិបាលរបស់ថៃមានឧបសគ្គច្រើនក្តី ប៉ុន្តែការងារនេះត្រូវតែមានការសហការពីក្រុមការងារ និងពលរដ្ឋភាគច្រើនផងដែរ ហើយយើងនឹងដំណើរការទៅមុខតាមអ្វីដែលយើងធ្លាប់បានសន្យានៅមុនការបោះឆ្នោត» ។

គោលនយោបាយចេញប័ណ្ណសម្គាល់សត្វឆ្មា និងឆ្កែនេះ ដោយសារគណបក្សកាវក្លៃសម្លឹងឃើញថា បច្ចុប្បន្ន ពលរដ្ឋថៃភាគច្រើននិយមចិញ្ចឹមឆ្មា និងឆ្កែ ហើយប្រទេសថៃក៏មានបញ្ហាច្រើនផងដែរ ដោយសារមានសត្វឆ្មា និងឆ្កែជាច្រើនក្បាលទៀតគ្មានម្ចាស់ចិញ្ចឹម ។ លើសពីនេះ កំណើនចំនួនសត្វឆ្មា និងឆ្កែយ៉ាងឆាប់រហ័សបានធ្វើឱ្យប៉ះពាល់ដល់អនាម័យនៅក្នុងទីក្រុង ហើយមានការឆ្លងជំងឺពីសត្វអនាថាមកលើសត្វចិញ្ចឹម ឬឆ្លងជំងឺពីសត្វអនាថាទៅកាន់មនុស្សផងដែរ ។

សំណើមួយក្នុងចំណោមសំណើទាំងអស់ គឺការបង្កើតប្រព័ន្ធចុះបញ្ជីសត្វឆ្មា និងឆ្កែនៅតាមលំនៅឋានពលរដ្ឋ និងការចុះបញ្ជីសត្វឆ្មា-ឆ្កែនៅតាមទីប្រជុំជននានា ដើម្បីត្រួតពិនិត្យ និងកត់ត្រាចំនួនសត្វឱ្យបានច្បាស់លាស់ ។ ការធ្វើប័ណ្ណសម្គាល់នេះដើម្បីឱ្យដឹងថា តើសត្វចំនួនប៉ុន្មានក្បាលដែលមានម្ចាស់ទទួលខុសត្រូវ និងមានសត្វប៉ុន្មានក្បាលរស់នៅតាមតំបន់នីមួយៗដែលគ្មានម្ចាស់ចិញ្ចឹម ដើម្បីរដ្ឋាភិបាលអាចរៀបចំថវិកាសម្រាប់ថែទាំសត្វទាំងនេះ ៕ ប្រភព ៖ environman