ក្រសួងសុខាភិបាលច្រានចោលព័ត៌មានមានការឆ្លងជំងឺអេដស៍ផ្ទុះឡើងជាង១ពាន់នាក់

ក្រសួងសុខាភិបាលនាថ្ងៃទី៤ សីហា បានច្រានចោលទាំងស្រុងដែលមានការបង្ហោះថាមានការឆ្លងជំងឺអេដស៍ផ្ទុះឡើងជាង១ពាន់នាក់។ ទន្ទឹមនឹងការច្រានចោលព័ត៌មាននេះក្រសួងក៏បង្ហាញរបាយការណ៍ នៃអាជ្ញាធរជាតិប្រយុទ្ធនឹងជំងឺអេដស៍ ក្រសួងសុខាភិបាល/មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ (NCHADS) និង ការិយាល័យពហុប្រទេសនៃអង្គការ UNAIDS នៃប្រទេសកម្ពុជា ឡាវ និងម៉ាឡេស៊ី ដែលមានមូលដ្ឋាននៅទីក្រុងភ្នំពេញ។

របាយការណ៍នោះបានបង្ហាញទ័ន្នន័យថានៅចុងឆ្នាំ២០២២ មនុស្សប្រមាណ ៧៦ ០០០ នាក់ (៦៣០០០-៨៥ ០០០)នាក់ កំពុងផ្ទុកមេរោគអេដស៍ ហើយក្នុងនោះ ៧៤.០០០ (៦១ ០០០-៨៣ ០០០)នាក់ជាមនុស្សពេញវ័យដែលមានអាយុចាប់ ពី ១៥ ឆ្នាំឡើងទៅ និងប្រហែល ២០០០ នាក់ (១ ៦០០-២៤០០)នាក់។ កុមារ (០-១៤ ឆ្នាំ) ។ ៨៦% នៃ អ្នកផ្ទុកមេរោគអេដស៍ទាំងអស់បានដឹងពីស្ថានភាពមេរោគអេដស៍របស់ពួកគេ ហើយបានប៉ាន់ស្មានថា មនុស្ស ១១ ០០០ នាក់មិនដឹងថាពួកគេកំពុងផ្ទុកមេរោគអេដស៍នៅឡើយ។

សមិទ្ធិផលរបស់ប្រទេសកម្ពុជាត្រូវបានចាត់ទុកជាគំរូ ក្នុងការសម្រេចបានខ្ពស់បំផុតនូវអត្រាទទួលសេវាព្យាបាលនិងអត្រាកាត់បន្ថយមេរោគមកកម្រិតទាបបំផុតក្នុងចំណោមអ្នកផ្ទុកមេរោគអេដស៍។ គិតត្រឹម ខែធ្នូ ឆ្នាំ ២០២២ អ្នកផ្ទុកមេរោគអេដស៍ ៦៤ ៩៣១នាក់ បានកំពុងទទួលបានការព្យាបាលដោយឱសថប្រឆាំងមេរោគអេដស៍ ហើយវាប្រែថា ៩៩% នៃអ្នកផ្ទុកមេរោគអេដស៍ដែលដឹងពី ស្ថានភាពរបស់ពួកគេកំពុងទទួលបានការព្យាបាល ហើយ ៩៨%នៃអ្នកផ្ទុកមេរោគអេដស៍លើការព្យាបាលត្រូវបានកាត់បន្ថយមេរោគមកកម្រិតទាបបំផុត។

គេប៉ាន់ប្រមាណថាមានអ្នកឆ្លងមេរោគអេដស៍ថ្មីចំនួន ១ ៤០០នាក់ (១ ២០០-១ ៥០០)នាក់ ក្នុងឆ្នាំ ២០២២ ដែលមានន័យថាមនុស្សប្រហែល ៤នាក់បានឆ្លងមេរោគអេដស៍ជារៀងរាល់ថ្ងៃ។ ការឆ្លងមេរោគអេដស៍ថ្មីត្រូវបានកាត់បន្ថយចំនួន៩១% ចាប់តាំងពីការរីករាលដាលនៃមេរោគអេដស៍ខ្ពស់ បំផុតក្នុងឆ្នាំ១៩៩៦ ប៉ុន្តែល្បឿននៃការធ្លាក់ចុះបាននិងកំពុងធ្លាក់ចុះ ហើយមានការថយចុះតែ ៣៣% បើធៀបនឹង ឆ្នាំ២០១០។

ការប៉ាន់ស្មានមេរោគអេដស៍ថ្មីបានបង្ហាញថាការកើនឡើងសមាមាត្រនៃការ ឆ្លងមេរោគអេដស៍ថ្មីគឺស្ថិតក្នុងចំណោមបុរស និងក្មេងប្រុស ពួកគេមានចំនួន ៧៩% នៃការឆ្លងមេរោគ អេដស៍ថ្មីទាំងអស់ក្នុងឆ្នាំ២០២២។ តាមចំនួនប្រជាជន ៨៣% នៃការឆ្លងមេរោគអេដស៍ថ្មីសរុបគឺស្ថិត ក្នុងចំណោមប្រជាជនគន្លឹះ (បុគ្គលិកផ្នែកកម្សាន្តស្ត្រី បុរសរួមភេទជាមួយបុរស និងបុរសផ្សេងទៀត ដែលរួមភេទជាមួយបុរស ស្ត្រីបំប្លែងភេទ អ្នកដែលប្រើនិងចាក់ថ្នាំញៀន និងដៃគូផ្លូវភេទរបស់ពួកគេ)៕