មហាជនបានបង្ហាញអារម្មណ៍រំភើបរីករាយយ៉ាងខ្លាំងនៅពេលប្រទេសកម្ពុជាកាន់តែស្មើមុខស្មើមាត់ជាមួយប្រទេសដទៃនៅក្នុងកម្មវិធីជាបន្តបន្ទាប់។ ជាក់ស្តែងនៅក្នុងកម្មវិធី ប្រគល់ពានរង្វាន់ ASEAN International Film Festival Awards 2023ដែលប្រព្រឹត្តទៅនៅប្រទេសម៉ាឡេស៊ីក៏មានវត្តមានសិល្បករកម្ពុជានៅពិធីនេះរួមជាមួយតារាកូរ៉េល្បីឈ្មោះ Rain ផងដែរ។
កម្មវិធីខាងលើនេះបានប្រព្រឹត្តទៅកាលពីរាត្រីថ្ងៃទី៤ សីហា លើទឹកដី ម៉ាឡេស៊ី ដែលប្រមូលផ្តុំដោយសិល្បករ សិល្បការិនីជាច្រើនរូបចូលរួមមកពីប្រទេសផ្សេងៗគ្នា។ សម្រាប់ខាងកម្ពុជាវិញក៏មិនអន់នោះទេដោយកញ្ញា រ៉េត សារីតា បានធ្វើជាពិធីការិនីប្រកាសពានរង្វាន់នៅក្នុងកម្មវិធីជាមួយពិធិករមកពីប្រទេស វៀតណាម។ ការបង្ហាញវត្តមានរបស់ រ៉េត សារីតា ពិតជាមិនធ្វើឱ្យហ្វេនៗខកចិត្តនោះទេ នាងបានរៀបចំខ្លួនយ៉ាងស្រស់ស្អាតជាមួយសំលៀកបំពាក់ខ្មែរ អមជាមួយការប្រកាសឈ្មោះប្រទេសដែលឈ្នះពានរង្វាន់យ៉ាងជឿជាក់នៃការនិយាយជាភាសាអង់គ្លេស។
លើសពីនេះទៅទៀត មិនត្រឹមតែកញ្ញា រ៉េត សារីតា ប៉ុណ្ណោះទេដែលមានវត្តមានធ្វើជាពិធីការិនី នៅក្នុងកម្មវិធី ASEAN International Film Festival Awards 2023 កញ្ញា មាន សូនីតា និងលោក ហ៊ុយ យ៉ាឡេង ក៏មានវត្តមានដើរលើកម្រាលព្រំក្រហមនេះដូចគ្នាដោយប្រទេសកម្ពុជាបានឈ្នះពានរង្វាន់ Special Jury Award (ពានរង្វាន់ពិសេសរបស់មេប្រយោគ) តាមរយៈខ្សែភាពយន្តដ៏ល្បីគឺរឿង «ដើម្បីកូន» ឬ Father ដែលមានលោក ហ៊ុយ យ៉ាឡេង ជាតួសម្តែងនិងជាផលិតករ និងកញ្ញា មាន សូនីតា ជាតួសំខាន់ក្នុងរឿង។
ជាមួយអារម្មណ៍រំភើបរីករាយនៃការឈ្នះពានរង្វាន់នោះ តាមរយៈបណ្តាញសង្គមរបស់លោក ហ៊ុយ យ៉ាឡេង បានសរសេររៀបរាប់យ៉ាងដូច្នេះថា «ម៉ែអើយទីបំផុតខ្ញុំបានពានអន្តរជាតិមួយជូនជាតិហើយ។ អរគុណប្រទេសកម្ពុជាអរគុណបងប្អូនដែលជួយគាំទ្រខ្ញុំកន្លងមកអរគុណក្រុមការងារពេលនេះរឿង ដើម្បីកូន ទទួលបានពាន special jury award 2023»។
ការទទួលពានរង្វាន់ខាងលើនេះបណ្តាអ្នកគាំទ្រចូលរួមអបអរសាទរជាច្រើន ក្នុងនោះប្រធាននាយកដ្ឋានភាពយន្ត ក៏សម្តែងក្តីត្រេកអរដូចគ្នាដែលកម្ពុជាទទួលបានពានរង្វាន់តាមរយៈស្នាដៃលោក ហ៊ុយ យ៉ាឡេង៕
