រដ្ឋធានីវ៉ាស៊ីនតោន៖ កប៉ាល់ដឹកអ្នកដំណើរដ៏ល្បីល្បាញរបស់ចក្រភពអង់គ្លេស ទីតានិក (Titanic) បានបុកផ្ទាំងទឹកកកលិច នៅក្នុងមហាសមុទ្រអាត្លង់ទិកខាងជើង ដោយបានសម្លាប់មនុស្ស ជាង១៥០០នាក់ ហើយឥឡូវនេះ មហាសេដ្ឋីជាច្រើននាក់ ធ្វើទេសចរណ៍តាមនាវាមុជទឹក ទៅលេងខ្មោចកប៉ាល់នោះ កំពុងតែបាត់ខ្លួន ធ្វើឲ្យអាជ្ញាធរសហរដ្ឋអាមរិក និង កាណាដា កំពុងតែពង្រីកនូវការរុករករបស់ខ្លួន ចូលនៅក្នុងទឹកជ្រៅ នៅឆ្នេរសមុទ្ររបស់កាណាដា។

សារព័ត៌មាន Alarabiya News បានចេញផ្សាយ នៅថ្ងៃពុធ ទី២១ ខែមិថុនា ថា កងឆ្មាំឆ្នេរសមុទ្ររបស់សហរដ្ឋអាមេរិក បានអះអាង កាលពីល្ងាច ថ្ងៃអង្គារ ថា អាជ្ញាធរកំពុងតែពង្រីកនូវការរុករករបស់ខ្លួន ចូលនៅក្នុងសមុទ្រទឹកជ្រៅ ដើម្បីស្វែងរកនាវាមុជទឹកដែលបានបាត់ ខណៈកំពុងតែដឹកអ្នកទេសចរ ជាមហាសេដ្ឋី ធ្វើដំណើរទៅទស្សនាខ្មោចកប៉ាល់ទីតានិក នៅឆ្នេរសមុទ្ររបស់កាណាដា។

លោកឧត្ដមនាវី ចន មោហ្គើរ (John Mauger) មេបញ្ជាការឆ្មាំសមុទ្រសហរដ្ឋអាមេរិក បានបញ្ជាក់ នៅក្នុងការផ្ដល់បទសម្ភាសន៍មួយ ដល់បណ្ដាញទូរទស្សន៍សហរដ្ឋអាមេរិក CNN ថា«យើងកំពុងតែបន្ដស្វែងរកនាវាមុជទឹក ដែលបានបាត់នោះ… ហើយយើងបានធ្វើការពេញមួយយប់ ជាមួយដៃគូរបស់យើង ស្វែងរកនៅលើផ្ទៃទឹក។ ប៉ុន្ដែឥឡូវនេះ យើងកំពុងតែពង្រីកនូវការរុករក នៅក្រោមផ្ទៃទឹក នៅក្នុងតំបន់នោះ»។

កងឆ្មាំឆ្នេរសមុទ្ររបស់សហរដ្ឋអាមេរិក បានបញ្ជាក់ ថា មនុស្សនៅក្នុងនាវាមុជទឹកដែលបានបាត់នោះ មានអ្នកបើកម្នាក់ និង អ្នកដំណើរ ចំនួន៤នាក់។ នាវាមុជទឹកនោះ មានសមត្ថភាពអាចមុជទឹក នៅក្នុងរយៈពេល៩៦ម៉ោង។ ប៉ុន្តែគេនៅតែមិនទាន់ច្បាស់ ថាតើនាវានោះ កំពុងតែស្ថិតនៅក្រោមទឹក ឬ ងើបឡើងមកលើផ្ទៃទឹក ហើយឥឡូវ គេនៅតែមិនទាន់អាចទំនាក់ទំនងបានដដែល។

កងទ័ពរបស់សហរដ្ឋអាមរិក និង កាណាដា បានបញ្ចេញនូវនាវា និង យន្ដហោះជាច្រើនគ្រឿង ស្វែងរកនាវាមុជទឹក ដែលបានបាត់ អស់រយៈពេលជាង១ថ្ងៃកន្លងមកនេះ។ កងយន្ដហោះ និង នាវារបស់សហរដ្ឋអាមរិក និង កាណាដា ទាំងនោះ ក៏កំពុងតែពង្រីកនូវការរុករក នៅក្នុងចម្ងាយ ប្រហែល ១ ៤៥០គីឡូម៉ែត្រ ហើយស្វែងរក នៅក្នុងជម្រៅទឹក រហូតដល់ ៣ ៩៦២ម៉ែត្រ។

លោកឧត្ដមនាវី ចន មោហ្គើរ មេបញ្ជាការឆ្មាំសមុទ្រសហរដ្ឋអាមេរិក បានបញ្ជាក់ ថា «យើងកំពុងតែដាក់ពង្រាយទ្រព្យសម្បត្តិទាំងអស់របស់យើង ដើម្បីធ្វើឲ្យប្រាកដ ថា យើងអាចកំណត់ទីតាំងនាវាមុជទឹកនោះ ហើយជួយសង្គ្រោះមនុស្ស នៅក្នុងនាវា។ ប៉ុន្ដែរហូតមកដល់ល្ងាចអង្គារ យើងនៅតែបន្តហោះហើរយន្តហោះ និង ផ្លាស់ទីនាវាបន្ថែមទៀត។ បន្ថែមពីលើនេះ ក្រុមមន្រ្ដីរបស់យើង កំពុងតែទាក់ទងទៅកាន់នាវាពាណិជ្ជកម្ម សុំឲ្យពួកគេជួយផងដែរ។

ក្រុមហ៊ុនឯកជន ធ្វើប្រតិបត្ដិការលើនាវាមុជទឹក ក៏បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃចន្ទ ថា ក្រុមហ៊ុន កំពុងតែប្រមែប្រមូលជម្រើសទាំងអស់ ជួយសង្គ្រោះ ដល់មនុស្ស នៅក្នុងនាវាមុជទឹក។

បើតាមបណ្ដាញផ្សព្វផ្សាយសង្គម បង្ហោះដោយសាច់ញាតិ បានឲ្យដឹង ថា លោក ហាមីស ហាឌីង (Hamish Harding) ជាមហាសេដ្ឋីជនជាតិអង់គ្លេស ក៏ស្ថិតក្នុងចំណោមអ្នកទេសចរ នៅក្នុងនាវាមុជទឹកដែលបានបាត់នោះដែរ។

ក្រុមគ្រួសាររបស់ជនរងគ្រោះ បានបញ្ជាក់ នៅក្នុងសេចក្ដីថ្លែងការណ៍មួយ ថា «លោក សាហ្សាដា ដាវូដ (Shahzada Dawood) ជាមហាសេដ្ឋី ជនជាតិប៉ាគីស្ថាន និង កូនប្រុសរបស់គាត់ គឺលោក ស៊ូឡេម៉ាន់ (Suleman) ក៏ស្ថិតក្នុងនាវាមុជទឹកដែលកំពុងបាត់នោះដែរ។ យើងខ្ញុំសូមថ្លែងអំណរគុណយ៉ាងជ្រាលជ្រៅ ចំពោះការព្រួយបារម្ភ ត្រូវបានបង្ហាញ ដោយសហការី និង មិត្តភក្តិរបស់យើង ហើយយើងចង់ស្នើសុំឱ្យអស់លោកទាំងអស់គ្នា អធិស្ឋាន និង បួងសួង សុំឲ្យពួកគេមានសុវត្ថិភាព»។

មន្រ្ដីឆ្មាំឆ្នេរសមុទ្ររបស់សហរដ្ឋអាមេរិក បានសរសេរ នៅលើបណ្ដាញសង្គម Twitter ថា នាវាមុជទឹកមួយគ្រឿង នៅលើផ្ទៃទឹក Polar Prince (ប៉ូឡាប្រាំងស៍) ហើយវាបានបាត់ទំនាក់ទំនងជាមួយនាវាមុជទឹក ឈ្មោះ Titan (ទីតាន) ប្រហែលមួយម៉ោង និង ៤៥នាទី ក្រោយពេលនាវានោះ បានចាប់ផ្តើមមុជទឹក កាលពីព្រឹកថ្ងៃអាទិត្យ ឆ្ពោះទៅរកកន្លែងលិចរបស់កប៉ាល់ទីតានិក (Titanic) ។

កូនប្រសាប្រុសរបស់លោក ហាឌីង មហាសេដ្ឋីជនជាតិអង់គ្លេស បានសរសេរ នៅលើបណ្ដាញសង្គមហ្វេសប៊ុក ថា «ឪពុកក្មេករបស់គាត់ បានបាត់ខ្លួន នៅក្នុងនាវាមុជទឹក ហើយគាត់សូមបួងសួង និង អធិស្ឋាន ឲ្យឪពុកមានសុវត្ថិភាព»។

បើតាមគេហទំព័ររបស់ OceanGate (អូសៀនហ្គេត) បានឲ្យដឹង ថា បេសកកម្ម ទៅកាន់កប៉ាល់ទីតានិក គឺមនុស្សម្នាក់ ត្រូវចំណាយលុយ ចំនួន ២៥០ ០០០ដុល្លារ ដោយចាប់ផ្ដើមចេញដំណើរពី St. John (សេនស៍ ចន) កោះញូវហ្វោនឡែនដ៍ (Newfoundland ) ដោយធ្វើដំណើរ នៅក្នុងចម្ងាយប្រហែល៦៤០គីឡូម៉ែត្រ ចូលទៅក្នុងមហាសមុទ្រអាត្លង់ទិក ឆ្ពោះទៅកាន់កន្លែងដែលកប៉ាល់ទីតានិកនោះបានលិច។

កប៉ាល់ដឹកអ្នកដំណើរដ៏ល្បីល្បាញរបស់ចក្រភពអង់គ្លេស Titanic បានលិច នៅក្នុងឆ្នាំ១៩១២ ក្នុងការធ្វើដំណើរ ជាលើកដំបូងរបស់ខ្លួន ក្រោយពេលវាបានបុកជាមួយនឹងផ្ទាំងទឹកកកដ៏ក្រាស់។ នៅក្នុងឧបទ្ទវហេតុនោះ បានសម្លាប់មនុស្ស ជាង ១ ៥០០នាក់ នៅក្នុងនាវា។ រឿងរ៉ាវទាំងនេះ ក៏ត្រូវបានអ្នកនិពន្ធ លើកយកមកប្រឌិត ធ្វើជាខ្សែភាពយន្តភាគ រឿង «Titanic» នៅឆ្នាំ១៩៩៧ ហើយទទួលបានការទស្សនាយ៉ាងច្រើនផងដែរ៕

ម៉ិកស៊ិក៖ ព្រះវិហារនៃសតវត្សទី ១៦ នៃសាវក Santiago បានផុសឡើងថ្មីៗនេះបន្ទាប់ពីគ្រោះរាំងស្ងួតយ៉ាងធ្ងន់ធ្ងរដោយទាក់ទាញអ្នកទស្សនាជាច្រើនកុះករ។

ព្រះវិហារ Apostle Santiago ត្រូវបានសាងសង់ឡើងដោយសមាជិកនៃលំដាប់ Dominican (DO) នៅសតវត្សទី ១៦ នៅពេលដែលប្រទេសម៉ិកស៊ិកស្ថិតនៅក្រោមអាណានិគមរបស់អេស្ប៉ាញក្នុងឆ្នាំ ១២១៥។ បច្ចុប្បន្នព្រះវិហារនេះ មានទីតាំងស្ថិតនៅតំបន់ Quechula ក្នុងរដ្ឋ Chiapas ភាគខាងត្បូងនៃប្រទេសម៉ិកស៊ិក បានលិចទឹកស្ទើរតែទាំងស្រុងចាប់តាំងពីឆ្នាំ ១៩៦៦ នៅពេលដែលទំនប់វារីអគ្គិសនីមួយត្រូវបានសាងសង់នៅក្នុងដៃទន្លេ Grijalva ក្បែរនោះ។ ជនជាតិដើមភាគតិចប្រហែល ១,០០០ – ២,០០០ នាក់ដែលរស់នៅក្នុងតំបន់ Quechula ត្រូវបានផ្លាស់ទីលំនៅដោយសារតែផ្ទះរបស់ពួកគេត្រូវបានជន់លិច។

ទោះជាយ៉ាងណាក៏ដោយយោងតាមប្រភពព័ត៌មាន AFP ដែលបានរាយការណ៍នៅថ្ងៃទី ១៨ ខែមិថុនា ថា ថ្មីៗនេះព្រះវិហារដែលមានកម្ពស់ ១៥ ម៉ែត្របានលាតសន្ធឹងពីអាងស្តុកទឹក Nezahualcoyotl ដោយសារតែកំដៅអូសបន្លាយ និងអវត្ដមាននៃភ្លៀងនៅតំបន់នោះ នាំឱ្យបរិមាណទឹកក្នុងអាងមានការថយចុះយ៉ាងខ្លាំង ដែលធ្វើឱ្យប៉ះពាល់ដល់រចនាសម្ព័ន្ធទាំងមូលនៅក្នុងប្រទេស។កម្រិតទឹកទាបក្នុងបឹងកំពុងប៉ះពាល់យ៉ាងធ្ងន់ធ្ងរដល់អ្នកនេសាទត្រី។ យោងតាមកសិករ Darinel Gutiérrez បាននិយាយថា ប្រហែលប្រាំខែមុន កម្រិតទឹកបានចាប់ផ្តើមធ្លាក់ចុះទាបជាងធម្មតា ដោយសារឥទ្ធិពលនៃការប្រែប្រួលអាកាសធាតុ កម្ដៅបង្កឱ្យត្រីងាប់ជាច្រើនក្បាល ប៉ះពាល់ដល់ចំណូលរបស់ប្រជាពលរដ្ឋ ។ ក្នុងពេលថ្មីៗនេះដែល មនុស្សយ៉ាងហោចណាស់ ៨ នាក់ក៏បានស្លាប់ដោយសារអាកាសធាតុក្តៅពេកក្នុងប្រទេសម៉ិកស៊ិកផងដែរ៕ ប្រភព៖vnexpress

ដែលស្ថិតនៅភាគខាងជើងប្រទេសជប៉ុន កំពុងតែប្រឈមនឹងបញ្ហាក្តាមយក្សចេញល្បាត ។ កំណើនក្តាមយក្សបានធ្វើឱ្យប៉ះពាល់ដល់ការនេសាទនៅក្នុងតំបន់យ៉ាងខ្លាំង ដោយសារក្តាមទាំងនេះមានចំនួនកាន់តែច្រើន ហើយពួកវាតែងជាប់ក្នុងអួន និងឧបករណ៍នេសាទផ្សេងទៀត ។

ចំនួនក្តាមយក្សនៅប្រទេសជប៉ុនបានកើនឡើងយ៉ាងខ្លាំង និងធ្វើឱ្យតម្លៃក្តាមយក្សធ្លាក់ចុះខ្លាំងផងដែរ ។ គេសង្កេតឃើញថា នៅតាមផ្សារទំនើបនានានៅទីក្រុងសាប៉ូរ៉ូ ក្តាមយក្សមានតម្លៃចាប់ពី១៥០យេន ទៅ៣០០យេនប៉ុណ្ណោះក្នុង១គីឡូក្រាម ។ អតិថិជនមកទិញក្តាមក្នុងផ្សារទំនើបម្នាក់ប្រាប់ថា ក្តាមយក្សមានរសជាតិផ្អែមឆ្ងាញ់ មិនចាញ់ក្តាមទូទៅទេ ។ រីឯមូលហេតុដែលធ្វើឱ្យក្តាមយក្សមានចំនួនកើនឡើងខុសធម្មតានោះ ដោយសារជប៉ុនបានបិទប្រទេសកាលពីពេលកន្លងមក ដើម្បីទប់ស្កាត់ការឆ្លងរាតត្បាតនៃជំងឺកូវីដ-១៩ ។

ក្តាមយក្សភាគច្រើនចូលចិត្តរស់នៅក្នុងបរិវេណទឹកត្រជាក់ខ្លាំង ហើយគេអាចឃើញវារស់នៅតាមតំបន់ឆ្នេរសមុទ្រភាគខាងលិចប្រទេសជប៉ុន ។ ក្តាមយក្សទាំងនេះមានសាច់ច្រើន ជាពិសេស ក្តាមឈ្មោល ហេតុនេះ ទើបក្តាមឈ្មោលមានតម្លៃថ្លៃជាងក្តាមញី ។ ពលរដ្ឋជប៉ុននិយមទទួលទានសាច់ក្តាមប្រភេទនេះច្រើន ពីព្រោះពួកគេអាចទទួលទានសាច់ជើងក្តាមដោយងាយ ហើយវាមានពង និងខ្លាញ់ទៀតផង ។ ចំណែកសាច់ដុំក្តាម គេនិយមយកមកធ្វើម្ហូបឈ្មោះសាស៊ិមិ ខណៈមនុស្សមួយចំនួនយកក្តាមទាំងមូលទៅដាក់ក្នុងឆ្នាំងភ្លើង ឬយកវាទៅអាំងផងដែរ ៕ ប្រភព ៖ Mono News

នៅលើពិភពលោកយើងមានទ្វីចំនួន៧ ក្នុងរួមមាន៖ ទ្វីបអាស៊ី,អាហ្វ្រិក,អូសេអានី,អឺរ៉ុប,អង់តាកទិក,អាមេរិកខាងជើង និង អាមេរិកខាងត្បូង។

ក្នុងចំណោមទ្វីបទាំង៧នេះ​ អាសុីយើងគឹជាទ្វីដែលធំជាងគេ ដោយមានផ្ទៃដី៤៤ ៥៧៩ ០០០គីឡូម៉ែត្រការ៉េ។  ត្បិតតែអាសុីជាងទ្វីបធំជាងគេមែន ក៏ប៉ុន្តែអាសុីយើងមានប្រទេសត្រឹមតែ ៤៤ប្រទេសតែប៉ុណ្ណោះ ពោលគឺតិចជាងទ្វីបអឺរ៉ុបដែលមាន ៤៧ប្រទេស និងទ្វីបដែលមានប្រទេសច្រើនជាងគេគឺអាហ្រ្វិកមាន៥៤ប្រទេស។

អាហ្រ្វិកគឺជាទ្វីបធំទី២ បន្ទាប់ពីទ្វីបអាសុី ដែលទ្វីបនេះមានផ្ទៃក្រឡា​ប្រហែល ៣០.៣ លាន​គីឡូម៉ែត្រការ៉េ បូក​រួមទាំង​បណ្ដា​កោះ​នៅ​ជុំវិញ​ផង និង​គ្របដណ្ដប់​ប្រមាណ៦ភាគរយ នៃ​ផ្ទៃផែនដី៕

ប្រទេសថៃ ៖ ទំព័រហ្វេសប៊ុករបស់ថៃឈ្មោះ 7News ដែលតែងចុះផ្សាយព័ត៌មានញុះញង់ និងបង្កការស្អប់ជាតិសាសន៍ ដូចគ្នានឹងទំព័រហ្វេសប៊ុក TOURLONG ដែរនោះ និយាយថា ប្រទេសថៃបានសាក់យ័ន្តតាំងពីសម័យបុរាណមកម៉្លេះ ដោយថៃបានអភិវឌ្ឍន៍ និងអភិរក្សការសាក់យ័ន្តនេះរហូតមក ។ ទំព័រហ្វេសប៊ុក 7News បន្តថា ក្រោយពីទំព័រហ្វេសប៊ុក ASEAN បានបង្ហោះរូបសាក់យ័ន្តរបស់ថៃមក បានធ្វើឱ្យអ្នកលេងបណ្តាញសង្គមថៃ និងវៀតណាមនាំគ្នាសរសើរ និងគាំទ្រជាច្រើននាក់ ។

ទំព័រហ្វេសប៊ុក 7News បានដកស្រង់ការបញ្ចេញមតិរបស់អ្នកលេងបណ្តាញសង្គមមកចុះផ្សាយ ក្នុងនោះជនជាតិថៃម្នាក់និយាយថា ពិតជាស្រស់ស្អាត និងសាក់បានលម្អិតណាស់ ហើយខ្មែរសាក់យ័ន្តមិនទាន់ថៃទេ ។ ចំណែកពលរដ្ឋខ្មែរនិយាយថា អរគុណ ជនជាតិថៃដែលស្រឡាញ់ និងថែរក្សាអក្សររបស់កម្ពុជារហូតមក ។ ជនជាតិថៃម្នាក់ទៀតថា តើខ្មែរអានដាច់ដែរឬទេ នេះជាអក្សរខមថៃ មិនមែនជាអក្សរខ្មែរទេ ។ ចំណែកជនជាតិវៀតណាមនិយាយថា ថ្វីដៃរបស់ថៃស្រស់ស្អាត ហើយខ្មែរពិបាកនឹងរៀនសូត្រតាមណាស់ ។ រីឯជនជាតិវៀតណាមម្នាក់ទៀតថា ការសាក់យ័ន្តរបស់ថៃស្រស់ស្អាតណាស់ ។ ជនជាតិថៃម្នាក់ទៀតថា នេះជាភាសាថៃបុរាណ មិនមែនជាតួអក្សរខ្មែរទេ ព្រោះខ្មែរគ្មានតួអក្សរ ។ ពលរដ្ឋខ្មែរម្នាក់ទៀតនិយាយថា អក្សរថៃទាំងអស់ក្នុងរូបនេះបានប្រើប្រាស់តួអក្សរខ្មែរទាំងអស់ យើងទទួលស្គាល់ថា ពួកអ្នកពូកែលួចចម្លងណាស់ ប្រទេសថៃ ។ ជនជាតិថៃម្នាក់ទៀតឆ្លើយតបថា តើជនជាតិខ្មែរអានអក្សរលើយ័ន្តដាច់ដែរឬទេ ។ ពលរដ្ឋខ្មែរផ្សេងទៀតនិយាយថា នេះជាតួអក្សររបស់ខម ដែលជាបុព្វបុរសរបស់យើង ហើយសៀមកុំបោកប្រាស់ ។

ទំព័រហ្វេសប៊ុក 7News បន្តថា អ្នកលេងបណ្តាញសង្គមម្នាក់ទៀតថា អស្ចារ្យណាស់ប្រទេសថៃ អស្ចារ្យណាស់ខាងការលួចចម្លងពីប្រទេសផ្សេង ។ ពលរដ្ឋខ្មែរម្នាក់ទៀតថា អរគុណ ដែលថៃគោរពតួអក្សររបស់ខ្មែរ ។ រីឯជនជាតិថៃបានឆ្លើយតបវិញថា មិនយកទេរបស់ខ្មែរ ជនជាតិថៃបានសាក់យ័ន្តជាភាសាខមថៃបុរាណ ចំណែកការសាក់យ័ន្តភាសាខ្មែរវិញ មានតែអ្នកស្អប់ខ្ពើមប៉ុណ្ណោះ ។ ពលរដ្ឋខ្មែរថា អរគុណសៀម ដែលបានជួយផ្សព្វផ្សាយវប្បធម៌របស់ខ្មែរ ។ ដូចគ្នានេះ ពលរដ្ឋខ្មែរម្នាក់ទៀតថា អរគុណ សៀមដែលគាំទ្រភាសាខ្មែរ ហើយសៀមឈ្លក់ស្រឡាញ់នឹងវប្បធម៌ខម ។ ចំណែកជនជាតិវៀតណាមសរសេរថា ខ្ញុំស្រឡាញ់ភាសាថៃ ហើយខ្ញុំនឹងគាំទ្រអ្នក ។ ជនជាតិវៀតណាមម្នាក់ទៀតថា កម្ពុជានឹងលួចរូបភាពនេះ រួចប្រាប់ថា ជារូបភាពរបស់ខ្លួនឯង ។ ជនជាតិថៃម្នាក់ទៀតថា អក្សរខមទាំងអស់ គឺជាអក្សរសៀមបុរាណ ។ ចំណែកពលរដ្ឋខ្មែរឆ្លើយវិញថា បើជារបស់ថៃពិតប្រាកដ កុំសរសេរអក្សរខ្មែអី បើថៃសរសេរភាសាខ្មែរ គឺចាត់ទុកថាជារបស់ខ្មែរ ហើយអ្នកកុំកុហកពួកយើង ។ ដូចគ្នានេះ ពលរដ្ឋខ្មែរម្នាក់ទៀតថា ខ្មែរស្គាល់អក្សររបស់ខ្លួនច្បាស់ណាស់ មិនដូចជនជាតិថៃទេ ដែលមិនស្គាល់អក្សររបស់ខ្លួន និងបោកប្រាស់ប្រទេសជិតខាង ។ ពលរដ្ឋខ្មែរផ្សេងទៀតថា ជនជាតិថៃស្រឡាញ់អ្វីទាំងអស់ជារបស់ខ្មែរ ហើយសូម្បីតែតួអក្សរខ្មែរ ក៏ថៃស្រឡាញ់ដែរ អរគុណ ប្រទេសថៃដែលជួយថែរក្សាវប្បធម៌ខ្មែរ ។

ទំព័រហ្វេសប៊ុករបស់ថៃឈ្មោះ 7News អះអាងថា មានអ្នកលេងបណ្តាញសង្គមវៀតណាមបានចូលមកបញ្ចេញមតិគាំទ្រ និងសរសើរការសាក់យ័ន្តរបស់ថៃ ស្តាប់ទៅមិនសមទាល់តែសោះ គ្មានជនជាតិវៀតណាមមកពីណាទេ គឺជនជាតិថៃនេះហើយជាអ្នកនិយាយខ្លួនឯង សរសើរខ្លួនឯង ហើយចង់ឱ្យប្រទេសផ្សេងទៀតមកគាំទ្រខ្លួន ។ គេសង្កេតឃើញថា ជនជាតិថៃមួយចំនួនមានគំនិតជាតិនិយមជ្រុលពេក ទើបមើលឃើញអក្សរខ្មែរនៅលើយ័ន្តថា ជាអក្សរបុរាណរបស់ថៃទៅវិញ ហើយពួកគេតែងនិយាយថា ខមមិនមែនជាបុរព្វបុរសរបស់ខ្មែរទេ ៕

ប្រភព ៖ 7News

រដ្ឋធានីកៀវ៖ ថ្វីបើការវាយបកទ្រង់ទ្រាយធំរបស់រដ្ឋាភិបាលក្រុងកៀវ នៅតែមិនទាន់ចូលមកដល់ក៏ពិតមែន ប៉ុន្ដែការតេស្ដសាកល្បងវាយលុក ទៅលើកម្លាំងទាហានរុស្ស៊ី ចាប់តាំងពីថ្ងៃទី៤ ខែមិថុនា រហូតមកដល់ពេលនេះ កងទ័ពអ៊ុយក្រែន បានរំដោះទឹកដីរបស់ខ្លួន ប្រហែល១១៣គីឡូម៉ែត្រការ៉េ ខណៈលោកស្រី អនុរដ្ឋមន្រ្ដីក្រសួងការពារជាតិអ៊ុយក្រែន បានអះអាងអំពីការប្រយុទ្ធដ៏ស្វិតស្វាញបំផុត រវាងភាគីជម្លោះទាំង២នេះ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី២០ ខែមិថុនា ឆ្នាំ២០២៣ ថា លោកស្រី ហានណា ម៉ាលីយ៉ា (Hanna Maliar) អនុរដ្ឋមន្រ្ដី ក្រសួងការពារជាតិអ៊ុយក្រែន បានបញ្ជាក់ ថា ការវាយលុកទ្រង់ទ្រាយធំបំផុត នៅក្នុងយុទ្ធនាការវាយបករបស់រដ្ឋាភិបាលក្រុងកៀវ ប្រឆាំងនឹងកម្លាំងទាហានរុស្ស៊ី នៅមិនទាន់មកដល់នោះទេ។ ប៉ុន្ដែលោកស្រី បានទទួលស្គាល់ ថា ប្រតិបត្ដិការយោធា នាពេលនេះ ពិតជាមានការលំបាកខ្លាំងណាស់ ព្រោះរដ្ឋាភិបាលក្រុងមូស្គូ កំពុងតែធ្វើអ្វីគ្រប់យ៉ាង នៅលើសមរភូមិ ដើម្បីរារាំងដល់កងទ័ពអ៊ុយក្រែន ពីការវាយរុលទៅមុខ។

កងទ័ពអ៊ុយក្រែន កាលពីពីរសប្តាហ៍មុន បានចាប់ផ្តើមដំណាក់កាលដំបូង នៃការវាយបកតាមពាក្យចចាមអារ៉ាម អស់រយៈពេលជាយូរមកហើយ ដើម្បីរំដោះទឹកដីរបស់ខ្លួន ចេញពីការកាន់កាប់របស់កងកម្លាំងរុស្ស៊ី។ ប៉ុន្តែស្របពេលមានសេចក្តីរាយការណ៍ អំពីកងទ័ពអ៊ុយក្រែន បានវាយបក រុលទៅមុខយឺតៗ ហើយការទប់ទល់នឹងការវាយសន្ធាប់យ៉ាងខ្លាំងក្លា ពីទាហានរុស្ស៊ី នោះ ធ្វើឲ្យក្រុមមន្ត្រីរដ្ឋាភិបាលក្រុងម៉ូស្គូ បានចេញមុខ មកអះអាងថា ការវាយបករបស់ក្រុងកៀវ កំពុងតែរងនូវបរាជ័យ។

បើទោះជាយ៉ាងណាក៏ដោយ រហូតមកដល់ពេលនេះ កងទ័ពអ៊ុយក្រែន នៅតែរក្សាភាពស្ងៀមស្ងាត់បំផុត អំពីយុទ្ធនាការវាយបកជាធម្មតារបស់ខ្លួន។ ប៉ុន្ដែក្រុងកៀវ កាលពីថ្ងៃចន្ទ បានប្រកាស ថា កងទ័ពអ៊ុយក្រែន បានទទួលជ័យជម្នះដ៏តិចតួច ដោយរំដោះបានភូមិចំនួន៨ មានផ្ទៃដីទំហំ១១៣គីឡូម៉ែត្រការ៉េ។

លោកស្រី ហានណា ម៉ាលីយ៉ា អនុរដ្ឋមន្រ្ដីក្រសួងការពារជាតិអ៊ុយក្រែន បានសរសេរ នៅលើបណ្ដាញសង្គមតេឡេក្រាម ថា «ប្រតិបត្ដិការយោធា កំពុងតែបន្ដ នៅតាមទិសដៅផ្សេងៗគ្នា ហើយកងទ័ពអ៊ុយក្រែន កំពុងតែបំពេញភារកិច្ចទាំងនេះ។ ចំណែកកម្លាំងទាហានរុស្ស៊ី នឹងមិនងាយបោះបង់ចោលនូវទីតាំងឈរជើងរបស់ពួកគេនោះឡើយ ហើយយើងត្រូវតែរៀបចំខ្លួន សម្រាប់ការវាយលុកដ៏ស្វិតស្វាយនេះ។ នេះជាអ្វីដែលកំពុងតែកើនឡើង នៅពេលឥឡូវនេះ»។

ដោយឡែក លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានអះអាង កាលពីសប្ដាហ៍មុន ថា ការវាយបករបស់អ៊ុយក្រែន នឹងមិនជោគជ័យនោះទេ។ ប៉ុន្តែអ្នកសរសេរប្លុកយោធារុស្ស៊ីខ្លះ បានរាយការណ៍ ថា រដ្ឋាភិបាលក្រុងកៀវ បានទទួលជោគជ័យតិចតួច ព្រោះពួកគេមានការខាតបង់ដ៏ធំសម្បើម លើកម្លាំងទ័ព និង គ្រឿងយុទ្ធោបករណ៍។

ថ្វីបើមិនមានប្រភពឯករាជ្យ បញ្ជាក់អំពីប្រតិបត្ដិការយោធា ដែលកំពុងតែបន្ដ នៅលើសមរភូមិនេះយ៉ាងណាក្ដី ប៉ុន្ដែទីភ្នាក់ងារសារព័ត៌មាន Reuters អាចអះអាងបាន ថា កងទ័ពអ៊ុយក្រែន កំពុងតែវាយលុករុលទៅមុខ នៅក្នុងដំណាក់កាល វាយបកជាលើកដំបូងរបស់ពួកគេ។

វិទ្យាស្ថានសិក្សាពីសង្គ្រាម think tank មានមូលដ្ឋាន នៅក្នុងរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃអាទិត្យ កន្លងទៅថ្មីៗនេះ បានដកស្រង់ប្រភពជាច្រើន អះអាង ថា កងទ័ពអ៊ុយក្រែន ទំនងជាផ្អាកប្រតិបត្ដិការវាយបកមួយរយៈពេលខ្លីសិន ដើម្បីវាយតម្លៃឡើងវិញ អំពីយុទ្ធសាស្រ្ដសង្គ្រាមរបស់ខ្លួន សម្រាប់ការបើកប្រតិបត្ដិការទ្រង់ទ្រាយធំ នៅពេលខាងមុខ។

វិទ្យាស្ថានសិក្សាពីសង្គ្រាម ហៅកាត់ ISW ក៏បានថ្លែងជាដដែល ថា យុទ្ធនាការវាយបកទ្រង់ទ្រាយធំរបស់អ៊ុយក្រែន នៅមិនទាន់ ចាប់ផ្ដើមនៅឡើយ។

វិទ្យាស្ថានសិក្សាពីសង្គ្រាម បានបញ្ជាក់ នៅក្នុងការវិភាគស្ថានការណ៍ប្រចាំថ្ងៃរបស់ខ្លួន ថា « ISW បានកត់សម្គាល់ពីមុន ថា អ៊ុយក្រែន នៅតែមិនទាន់បានប្រាប់ អំពីចំនួនកងកម្លាំងរបស់ខ្លួន សម្រាប់ប្រតិបត្តិការវាយលុក ហើយក៏នៅតែមិនទាន់បានចាប់ផ្តើមនូវកិច្ចខិតខំប្រឹងប្រែងដ៏ចម្បងរបស់ខ្លួននៅឡើយ។

លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានថ្លែងនៅក្នុងសុន្ទរកថាជាវីដេអូ ប្រចាំរាត្រីរបស់គាត់ ថា ការវាយបកដោយយោធា ស្ថិតក្នុងស្ថានភាពនៃសម្ពាធ។ ប៉ុន្តែកងកម្លាំងអ៊ុយក្រែន នឹងមិនអនុញ្ញាតឱ្យមានសម្ពាធធ្លាក់ចុះ ចំពោះការផ្តោតលើកងកម្លាំងរុស្ស៊ី នោះទេ។

លោកប្រធានាធិបតីអ៊ុយក្រែន បានសង្កត់ធ្ងន់ ថា «នៅតាមតំបន់ខ្លះ អ្នកចម្បាំងរបស់យើង កំពុងតែវាយបករុលទៅមុខ ខណៈសមរភូមិផ្សេងៗទៀត កងទ័ពរបស់យើង កំពុងតែការពារទីតាំងឈរជើងរបស់ខ្លួន ហើយទប់ទល់នឹងការវាយបក និង ការប្រហារដ៏ខ្លាំងក្លា ពីអ្នកឈ្លានពាន។ យើងមិនបានបាត់បង់ទីតាំងឈរជើងនោះទេ ហើយយើងមានតែរំដោះដែនដីរបស់យើង ត្រឡប់មកវិញថែមទៀតផង ខណៈកម្លាំងសត្រូវ មានតែការបាត់បង់»។

ដោយឡែក ក្រុមមន្រ្ដី មកពីបណ្ដាប្រទេស ជាសមាជិករបស់អង្គការណាតូ បានបញ្ជាក់ ថា ក្រុងមូស្គូ កំពុងតែដាក់ពង្រាយកម្លាំងទាហានរុស្ស៊ី ឡើងវិញ ខណៈកំពុងស្វែងរកការប្រមើលមើល ពីមូលដ្ឋានកងទ័ពរបស់ខ្លួន អាចនឹងត្រូវរងការវាយប្រហារ ពីកងទ័ពអ៊ុយក្រែន។

លោក វ៉ាឡេរី ហ្សាលូស្នី (Valerii Zaluzhnyi) នាយអគ្គសេនាធិការកងទ័ពអ៊ុយក្រែន បានសរសេរ នៅលើបណ្ដាញសង្គមតេឡេក្រាម កាលពីថ្ងៃចន្ទ ថា ការវាយលុករុលទៅមុខរបស់កងទ័ពអ៊ុយក្រែន នៅតំបន់ភាគខាងត្បូង ប្រទេស ត្រូវបានរារាំង ដោយបន្ទាយជាច្រើន អណ្តូងរ៉ែ និង កងទ័ពជំនួយដ៏ច្រើន ប៉ុន្តែប្រតិបត្តិការនេះ នឹងនៅតែប្រព្រឹត្ដទៅ តាមការគ្រោងទុក៕