រដ្ឋធានីហាណូយ៖ ស្របពេលពិភពលោក កំពុងតែដើរដល់សម័យបច្ចេកវិទ្យាឌីជីថលដ៏ទំនើបនោះ ប្រទេសវៀតណាម ក៏កំពុងតែអភិវឌ្ឍយ៉ាងលឿនបំផុតមួយ នៅក្នុងតំបន់អាស៊ាន ហើយការទូទាត់ដោយគ្មានសាច់ប្រាក់ តាមរយៈធនាគារ គិតជាមធ្យម ឈានដល់៤០ពាន់លានដុល្លារ ក្នុង១ថ្ងៃ។

សារព័ត៌មាន Vietnam Net បានចេញផ្សាយ នៅថ្ងៃចន្ទ ទី១៩ ខែមិថុនា ថា បើតាមលោក ផាម អាញ ទួន (Pham Anh Tuan) ប្រធាននាយកដ្ឋានទូទាត់របស់ធនាគាររដ្ឋវៀតណាម (SBV) បានឱ្យដឹងថា ការទូទាត់ដោយគ្មានសាច់ប្រាក់ កំពុងតែអភិវឌ្ឍយ៉ាងឆាប់រហ័ស នៅក្នុងប្រទេសវៀតណាម ជាពិសេស ក្រោយវិបត្ដិជំងឺរាតត្បាត បង្កឡើងដោយកូវីដ-១៩ ជាមួយនឹងប្រតិបត្តិការ តាមរយៈធនាគារ គិតជាមធ្យម ចំនួន៤០ពាន់លានដុល្លារអាមេរិក នៅក្នុងមួយថ្ងៃ។

ថ្លែងនៅក្នុងសិក្ខាសាលាមួយ កាលពីពេលថ្មីៗនេះ ដែលបានធ្វើឡើង ជាផ្នែកមួយ នៃទិវាគ្មានសាច់ប្រាក់ ២០២៣ (Cashless Day 2023) លោក ទួន បានបញ្ជាក់ ថា ធនាគារកណ្តាល បានកំណត់គោលដៅ បង្កើតគណនីទូទាត់ ដោយគ្មានសាច់ប្រាក់ សម្រាប់ពាក់កណ្តាល នៃប្រតិបត្ដិការទាំងអស់ នៅឆ្នាំ២០២៥។ ករណីនេះ នឹងផ្តល់អាទិភាព ដល់ការបង្កើតហេដ្ឋារចនាសម្ព័ន្ធ លើការទូទាត់ប្រាក់ កាន់តែទូលំទូលាយ ដោយអាចចូលទៅប្រើប្រាស់បាន និង មានសុវត្ថិភាព នៅទូទាំងប្រទេស សម្រាប់ការទូទាត់ប្រាក់ តាមប្រព័ន្ធឌីជីថល ហើយវាជាទម្រង់ប្រតិបត្តិការដ៏ពេញនិយម សម្រាប់មនុស្សទាំងអស់គ្នា។

លោកប្រធាននាយកដ្ឋានទូទាត់របស់ធនាគាររដ្ឋវៀតណាម បានបន្ថែម ថា ធនាគារកណ្តាលវៀតណាម កំពុងតែធ្វើសេចក្តីព្រាងក្រឹត្យថ្មីមួយ សម្រាប់បង្កើតក្របខ័ណ្ឌច្បាប់ ដើម្បីលើកកម្ពស់ ដល់ការទូទាត់មិនមែនសាច់ប្រាក់។

បើនាយកដ្ឋានទូទាត់របស់ធនាគាររដ្ឋវៀតណាម ហៅកាត់ SBV បានឲ្យដឹង ថា បច្ចុប្បន្ន មនុស្សពេញវ័យ នៅទូទាំងប្រទេសវៀតណាម ច្រើនជាង៧០ភាគរយ សុទ្ធតែមានគណនីធនាគារ។ ប្រតិបត្តិការទូទាត់ប្រាក់តាមប្រព័ន្ធអេឡិចត្រូនិករបស់ធនាគារអន្តរធនាគារ បានកើនឡើង ៥២,៨ភាគរយ ធៀបនឹងឆ្នាំមុន បើគិតជាបរិមាណ នៅក្នុងរយៈពេល៤ខែដំបូង។

ការទូទាត់ប្រាក់តាមរយៈលេខកូដ QR មានកំណើនគួរឱ្យចាប់អារម្មណ៍បំផុត ជាមួយនឹងការកើនឡើង ច្រើនជាង១៦១ភាគរយ នៅក្នុងបរិមាណ និង ៣៦ភាគរយ នៅក្នុងតម្លៃ។ ដោយឡែក ការដកសាច់ប្រាក់ តាមម៉ាស៊ីន ATM បានបន្តធ្លាក់ចុះ ពី៣,៥ភាគរយ នៅក្នុងបរិមាណ និង ៥,៥ភាគរយជាតម្លៃ៕

ពិតណាស់ នារីៗភាគច្រើនតែងតែប្រាថ្នាចង់បានសម្រស់ស្រស់ស្អាតដូចជាតារាកូរ៉េ ឬតារា K-pop ជាដើម។ ដូច្នេះហើយថ្ងៃនេះ KBN News សូមលើកយកស្តង់ដាសម្រស់ដ៏អស្ចារ្យទាំង ៦ របស់កូរ៉េខាងត្បូងដូចខាងក្រោម៖

១.ទម្រង់មុខអក្សរV៖ តារាកូរ៉េភាគច្រើនតែងតែមានមុខតូចរាងអក្សរV ដូចជាKarina សមាជិក Aespa ជាដើម។ ព្រោះវាជាទម្រង់មុខដែលមើលទៅស្រស់ស្អាត និងគួរឱ្យស្រឡាញ់ ហើយក៏ជាទម្រង់មុខដែលមានការពេញនិយមខ្លាំងសម្រាប់ប្រជាជនកូរ៉េផងដែរ។

២.ស្បែកស៖ មិនថាតារា ឬប្រជាជនកូរ៉េនោះទេភាគច្រើនគឺពួកគេនិយមស្បែកស ឬសស្លេកជាដើម ព្រោះស្បែកសមើលទៅឃើញស្អាត និងទាក់ទាញ។ រីឯស្បែកខ្មៅ ឬស្រអែមមិនមែនជាស្តង់ដារបស់កូរ៉េឡើយ។

៣.ជ្រមុះស្រួចលេចធ្លោ៖ មនុស្សដែលមានខ្ទង់ច្រមុះខ្ពស់ ឬច្រមុះស្រួច គឺភាគច្រើនមានភាពឆ្លាតវៃ។ មិនថាប្រទេសណាក៏ពេញនិយមច្រមុះស្រួចដែរ ព្រោះវាជួយឱ្យផ្ទៃមុខរបស់យើងមើលទៅលេចធ្លោ។

៤.ត្របកភ្នែកពីរជាន់៖ នៅប្រទេសកូរ៉េ ត្របកភ្នែកពីរជាន់គឺជារបាំងដ៏សំខាន់បំផុតសម្រាប់ទម្រង់មុខ ដែលដើរតួជាផ្នែកមួយក្នុងការធ្វើឱ្យយើងមើលទៅស្អាត ឬត្រូវតាមស្តង់ដារសម្រស់ផងដែរ។

៥.ចិញ្ចើមត្រង់៖ ប្រជាជនកូរ៉េភាគច្រើនគឺពេញនិយមចិញ្ចើមត្រង់ ដែលមើលទៅឃើញសុភាព និងថ្លៃថ្នូរ មិនតែប៉ុណ្ណោះចិញ្ចើមត្រង់ក៏ធ្វើឱ្យយើងមុខក្មេងជាងវ័យផងដែរ។

៦.បបូរមាត់បេះដូង៖ បបូរមាត់បេះដូងគឺមានទម្រង់តូចស្តើង និងពេញ ដែលមានរាងដូចជាបេះដូង។ តារាកូរ៉េភាគច្រើនសុទ្ធតែមានបបូរមាត់បេះដូង ព្រោះវាមើលទៅទន់ភ្លន់ និងស៊ិចស៊ី៕ ប្រភព៖sanook

ប្រទេសថៃ ៖ ចំនួនសត្វស្វានៅខេត្តលុបបុរី ប្រទេសថៃ បានកើនឡើងយ៉ាងឆាប់រហ័ស ហើយពួកវាតែងបង្កបញ្ហាផ្សេងៗ និងរំខានដល់ការរស់នៅរបស់ពលរដ្ឋក្នុងខេត្តនេះ ។ អាជីវករលក់ដូររបស់របរផ្សេងៗនៅស្រុកមឿងលុបបុរី បានអំពាវនាវឱ្យភ្នាក់ងារពាក់ព័ន្ធប្រញាប់ដោះស្រាយបញ្ហាស្វាជាបន្ទាន់ ដោយសារ ពួកវាធ្វើឱ្យប៉ះពាល់ដល់ការរស់នៅ និងប្រាក់ចំណូលរបស់អាជីវករ ។ អាជីវករលក់ដូរម្នាក់និយាយថា ប្រាក់ចំណូលរបស់ខ្លួនបានធ្លាក់ចុះ ដោយសារអតិថិជនខ្លាចស្វាធ្វើបាប រហូតមិនហ៊ានមកទិញរបស់របរ ។

លោក Amphon Angkhapakornkul អភិបាលខេត្តលុបបុរី បានបើកកិច្ចប្រជុំមួយដើម្បីស្តាប់មតិយោបល់ផ្សេងៗ និងរកដំណោះស្រាយបញ្ហាចំនួនស្វាកើនឡើងនេះ ។ លោកអភិបាលខេត្តលុបបុរីលើកឡើងថា ខាងខេត្តបានរួមសហការជាមួយភ្នាក់ងារពាក់ព័ន្ធជាច្រើនដូចជា ភ្នាក់ងាររដ្ឋាភិបាល ផ្នែកឯកជន និងពលរដ្ឋផងដែរ ។ ជំហានដំបូង យើងត្រូវត្រួតពិនិត្យ និងគ្រប់គ្រងចំនួនស្វាទាំងនេះ ដោយការចាប់ក្រៀវ និងបញ្ជូនពួកវាទៅរស់នៅតាមព្រៃធម្មជាតិវិញ ។ ប៉ុន្តែភ្នាក់ងារពាក់ព័ន្ធក៏ត្រូវស្តាប់មតិយោបល់របស់ពលរដ្ឋរស់នៅក្នុងតំបន់ផងដែរ មុននឹងចាត់វិធានការលើស្វា ។

កាលពីឆ្នាំ២០២០ មានស្វាសរុបចំនួន៩.៣២៤ក្បាលបានរស់នៅតាមស្រុកផ្សេងៗក្នុងខេត្តលុបបុរី ដូចជា ស្រុកមឿងលុបបុរី, ស្រុកថាវ៉ុង, ស្រុកណងមួង, ស្រុកជ័យបាដាល, ស្រុកបានមី និងស្រុកផាត់តាណានិឃម ហើយភាគច្រើនជាស្វាមានទំហំមធ្យម ៕ ប្រភព ៖ Mono News

រដ្ឋធានីកៀវ៖ នៅក្នុងយុទ្ធនាការវាយបកដ៏ខ្លាំងក្លារបស់ក្រុងកៀវ ក៏មានសេចក្ដីរាយការណ៍ អំពីកងទ័ពការពារទឹកដីរបស់អ៊ុយក្រែន បានវាយប្រហារកម្ទេចឃ្លាំងគ្រាប់រំសេវដ៏ធំបំផុតមួយរបស់កងកម្លាំងទាហានរុស្ស៊ី ស្ថិតក្នុងតំបន់កាន់កាប់របស់ក្រុងមូស្គូ នៅខឺរសុន (Kherson)។

សារព័ត៌មានអារ៉ាប់អន្ដរជាតិ បានចេញផ្សាយ នៅថ្ងៃចន្ទ ទី១៩ ខែមិថុនា ថា លោក ស៊ើរហ៊ី ប្រាតឈូក (Serhiy Bratchuk) អ្នកនាំពាក្យ អាជ្ញាធរយោធាទីក្រុងអូដេសា (Odesa) ប្រទេសអ៊ុយក្រែន បានបញ្ជាក់ កាលពីថ្ងៃអាទិត្យ ថា កងទ័ពការពារទឹកដីរបស់ក្រុងកៀវ បានវាយប្រហារកម្ទេចឃ្លាំងគ្រាប់រំសេវដ៏ធំមួយ នៅជិតកំពង់ផែ ទីក្រុងហេនីឆេសខ៍ (Henichesk) នៅភាគខាងត្បូង ទីក្រុងខឺរសុន ស្ថិតក្រោមការកាន់កាប់របស់រុស្ស៊ី។

អ្នកនាំពាក្យរូបនេះ បានបង្ហោះជាសារវីដេអូ កាលពីព្រឹក ថ្ងៃអាទិត្យ ថា «កងកម្លាំងប្រដាប់អាវុធរបស់យើង បានវាយលុកយ៉ាងល្អ កាលពីព្រឹកមិញ ហើយសំឡេងដ៏ខ្លាំងមួយ បានផ្ទុះឡើង នៅក្នុងភូមិរីកូវេ (Rykove) ទីក្រុងហេនីឆេសខ៍ (Henichesk) ស្ថិតនៅលើដែនដីកាន់កាប់ជាបណ្តោះអាសន្នដោយរុស្ស៊ី នៅតំបន់ខឺរសុន។ ឃ្លាំងគ្រាប់ដ៏ធំរបស់រុស្ស៊ី នៅទីនោះ ត្រូវបានវាយកម្ទេចចោល។

បើទោះជាយ៉ាងណា ទីភ្នាក់ងារសារព័ត៌មានរបស់ចក្រភពអង់គ្លេស Reuters មិនស្វែងរកព័ត៌មានឯករាជ្យណាមួយ មកបញ្ជាក់បាននោះឡើយ។ ដោយឡែក រដ្ឋាភិបាលក្រុងមូស្គូ ក៏មិនទាន់មានប្រតិកម្មភ្លាមៗ ជុំវិញសេចក្ដីរាយការណ៍ អំពីការវាយប្រហារទៅលើឃ្លាំងគ្រាប់របស់ទាហានរុស្ស៊ី នៅតំបន់ភាគខាងត្បូងរបស់ប្រទេសអ៊ុយក្រែន នោះដែរ។

ប្រព័ន្ធផ្សព្វផ្សាយរបស់អ៊ុយក្រែន បានបង្ហោះឃ្លីបវីដេអូ ដោយបានបង្ហាញ អំពីផ្សែងហុយឡើងលើមេឃយ៉ាងសន្ធោសន្ធៅ ជាមួយនឹងសំឡេងបំផ្ទុះលាន់ឮយ៉ាងខ្លាំង នៅក្នុងភូមិរីកូវេ ដែលមានចម្ងាយប្រហែល២០គីឡូម៉ែត្រ ពីទីក្រុងហេនីឆេសខ៍ (Henichesk) ដែលជាទីក្រុងកំពង់ផែ នៅតាមឆ្នេរសមុទ្រអាហ្សូវ (Azov) នាភាគខាងត្បូងរបស់ប្រទេសអ៊ុយក្រែន។ នៅទីនោះ បានធ្លាក់ទៅក្រោមការកាន់កាប់របស់កងកម្លាំង នៃវិមានក្រឹមឡាំង ចាប់តាំងពីថ្ងៃដំបូង នៃសង្គ្រាមឈ្លានពានរបស់រុស្ស៊ី ទៅលើប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក៕

វៀតណាម៖ ប្រសិនបើអ្នកបានធ្វើដំណើរទៅកាន់ប្រទេសវៀតណាម សូមកុំភ្លេចកន្លែងទេសចរដ៏មានប្រជាប្រិយភាពបំផុតនៅទីក្រុង Can Tho ដែលជាផ្ទះស្រោបមាសសុទ្ធទាំងមូលរបស់ប្រទេសវៀតណាម។

ផ្ទះស្រោបមាសសុទ្ធនេះ មានទីតាំងស្ថិតនៅទីក្រុង Can Tho ដែលមានចម្ងាយប្រហែល ១៦៥ គីឡូម៉ែត្រភាគនិរតីនៃទីក្រុងហូជីមីញ។ ផ្ទះនេះដែលត្រូវបានសាងសង់ឡើងតាំងពីឆ្នាំ ២០២០ នៅពេលដែលមហាសេដ្ឋីជំនួញលោក Nguyen Van Trung បានទិញ និងកែលម្អវាជាមួយនឹងជញ្ជាំងមាសភ្លឺចែងចាំង ជណ្តើរស្រោបមាស បង្គន់អនាម័យមាស ចម្លាក់មាស និងសូម្បីតែផ្ទះបាយក៏សុទ្ធតែស្រោបមាសទាំងអស់ រួមទាំងគ្រឿងសង្ហារិមមាសរាប់រយគ្រឿងសម្រាប់អ្នកទស្សនាគយគន់ផងដែរ។

លើសពីនេះ Golden House ក៏មានកាហ្វេ និងអាហារសម្រន់ដ៏ឈ្ងុយឆ្ងាញ់ថែមទៀតផង ដូច្នេះភ្ញៀវអាចសម្រាកកំសាន្តនៅខាងក្រៅជាមួយនឹងកាហ្វេ ឬអាហារសម្រន់ ខណៈពេលដែលបានគយគន់ទេសភាពធម្មជាតិនៅខាងក្រៅផ្ទះនិងរុក្ខជាតិប្លែកៗជាច្រើនទៀតផងដែរ។ Golden House មានគោលបំណងចង់ឱ្យភ្ញៀវទេសចរទទួលបានអារម្មណ៍ដ៏ប្លែកអស្ចារ្យហាក់បីដូចជារស់នៅក្នុងព្រះបរមរាជវាំង។

គួរបញ្ជាក់ដែរថា ផ្ទះស្រោបមាសសុទ្ធដ៏អស្ចារ្យរបស់វៀតណាមនេះមានបីជាន់ នឹងបើកដំណើរការជារៀងរាល់ថ្ងៃចាប់ពីម៉ោង ៦:00 ព្រឹកដល់ ៦:00 ល្ងាច សម្រាប់ថ្លៃសំបុត្រក្នុងម្នាក់ចំនួន ៤០០០០ ដុង ស្មើនឹងជិត ២ ដុល្លារអាមេរិក៕

ប្រទេសកូរ៉េខាងត្បូង ៖ សារព័ត៌មានបរទេសរាយការណ៍ថា ការិយាល័យស្ថិតិរបស់កូរ៉េខាងត្បូងលើកឡើងថា កូរ៉េខាងត្បូងនឹងក្លាយជាប្រទេសមួយក្នុងចំណោមប្រទេសដែលមានចំនួនមនុស្សចាស់ច្រើនបំផុតលើពិភពលោកនៅឆ្នាំ២០៧០ ខណៈប្រទេសនេះមានចំនួនមនុស្សចាស់កើនឡើងយ៉ាងឆាប់រហ័ស ។

សមាមាត្រពលរដ្ឋកូរ៉េខាងត្បូងដែលមានអាយុ៧៥ឆ្នាំឡើងទៅ ស្មើនឹង៧,៧% នៃចំនួនពលរដ្ឋសរុបនៅប្រទេសកូរ៉េខាងត្បូងក្នុងឆ្នាំ២០២៣ ហើយគេសង្ឃឹមថា សមាមាត្រនេះនឹងកើនឡើងដល់១៦% នៅឆ្នាំ២០៣៧ និងរហូតដល់៣០,៧% នៅឆ្នាំ២០៧០ ។

ការិយាល័យស្ថិតិបានដកស្រង់ទិន្នន័យពីរបាយការណ៍ចំនួនពលរដ្ឋលើពិភពលោករបស់អង្គការសហប្រជាជាតិ ឆ្នាំ២០២២ បញ្ជាក់ថា សមាមាត្រពលរដ្ឋមានអាយុចាប់ពី៧៥ឆ្នាំឡើងទៅរបស់កូរ៉េខាងត្បូងនៅឆ្នាំ២០៧០ នឹងខ្ពស់បំផុតក្នុងចំណោមប្រទេសសមាជិកអង្គការកិច្ចសហប្រតិបត្តិការសេដ្ឋកិច្ច និងការអភិវឌ្ឍ ។ ចំណែកសមាមាត្រពលរដ្ឋមានអាយុចាប់ពី៧៥ឆ្នាំឡើងទៅរបស់ជប៉ុន ស្មើ២៥,៦%, អេស្ប៉ាញ ស្មើ២៤,៨%, អ៊ីតាលី ស្មើ២៤,១%, ប៉ូឡូញ ស្មើ២២,៦% និងសហរដ្ឋអាមេរិក ស្មើ១៦% ។

របាយការណ៍នេះបង្ហាញទៀតថា សមាមាត្រពលរដ្ឋកូរ៉េខាងត្បូងមានអាយុ៦៥ឆ្នាំឡើងទៅ នឹងកើនឡើងពី១៨,៤% នៅឆ្នាំ២០២៣ ដល់៣១,៩% នៅឆ្នាំ២០៣៧ និងរហូតដល់៤៦,៤% នៅឆ្នាំ២០៧០ ។

ពលរដ្ឋកូរ៉េខាងត្បូងមានអាយុពី៦៥ឆ្នាំ ទៅ៧៤ឆ្នាំ ស្មើនឹង៥៩,៦% បានបង្ហាញនូវក្តីសង្ឃឹមកាលពីឆ្នាំ២០២២ ថា ពួកគេនឹងអាចស្វែងរកការងារធ្វើបាននាថ្ងៃអនាគត ហើយតួលេខនេះបានកើនឡើងលើសរយៈពេល១០ឆ្នាំមុន ដែលស្មើប្រមាណ១១,៩% ។ ចំណែកពលរដ្ឋកូរ៉េខាងត្បូងមានអាយុពី៧៥ឆ្នាំ ទៅ៧៩ឆ្នាំ ស្មើនឹង៣៩,៤% បានបង្ហាញនូវក្តីសង្ឃឹមដូចគ្នានេះ ខណៈរយៈពេល១០ឆ្នាំមុនស្មើប្រមាណ១១,៨% ។

កាលពីឆ្នាំ២០២១ ពលរដ្ឋកូរ៉េខាងត្បូងមានអាយុពី៦៥ឆ្នាំ ទៅ៧៤ឆ្នាំ និយាយថា ប្រាក់ចំណូលរបស់ពួកគេមិនគ្រប់គ្រាន់ទេ បើធៀបនឹងការចាយវាយប្រចាំថ្ងៃ ។ ចំណែកពលរដ្ឋអាយុ៧៥ឆ្នាំឡើងនិយាយថា ពួកគេក៏ខ្វះខាតប្រាក់ចំណូលផងដែរ ៕ ប្រភព ៖ TNN World

បរទេស៖ អ្នកវិទ្យាសាស្រ្តបានរកឃើញកប៉ាល់ដែលត្រូវបានលិចកាលពី ៣,០០០ ឆ្នាំមុននៅក្នុងឆ្នេរសមុទ្រមេឌីទែរ៉ាណេ នៃប្រទេសក្រូអាស៊ី។
យោងតាមប្រភពព័ត៌មាន Ancient Origins ដែលបានរាយការណ៍កាលពីថ្ងៃទី ១៦ ខែមិថុនា ថា កប៉ាល់ដែលចំណាស់ជាងគេបំផុតនៅក្នុងសមុទ្រមេឌីទែរ៉ាណេដែលមានអាយុកាលតាំងពីសតវត្សទី ១០ ដល់ទី ១២ មុនគ.ស ត្រូវបានគេដាក់ឈ្មោះថាកប៉ាល់ Zambratija។ កប៉ាល់នេះមានប្រវែងប្រហែល ១២ ម៉ែត្រ ធ្វើពីឈើជាច្រើនដុំ ដែលត្រូវបានដេរយ៉ាងប្រណិត រួមជាមួយនឹងខ្សែស្រឡាយដែលអាចបត់បែនបាន។

Zambratija គឺជាកប៉ាល់ដ៏កម្រមួយដែលត្រូវបានសាងសង់ឡើងដោយជនជាតិបុរាណរបស់ Istria និង Dalmatia បច្ចេកទេសដ៏អស្ចារ្យនៃការសាងសង់កប៉ាល់នេះត្រូវបានជនជាតិបុរាណដេរដោយផ្ទាល់ដៃមុនពេលម្ជុលដែកត្រូវបានបង្កើត។ នេះបើយោងតាមមជ្ឈមណ្ឌលជាតិសម្រាប់ការស្រាវជ្រាវវិទ្យាសាស្ត្រ (CNRS) របស់ប្រទេសបារាំង។

ការរកឃើញបំណែកជាច្រើននៃកប៉ាល់នេះ ក៏ត្រូវបានអ្នកវិទ្យាសាស្ត្រគ្រោងនឹងយកទៅទីក្រុង Grenoble ប្រទេសបារាំង ដើម្បីធ្វើការជួសជុលឡើងវិញ នឹងបង្កើតកប៉ាល់ឡើងវិញជា 3D។ អ្នកជំនាញក៏សង្ឃឹមទៀតថា នៅពេលដែលបានស្ដារឡើងវិញទាំងស្រុង Zambratija នឹងត្រូវបានដាក់តាំងបង្ហាញនៅក្នុងតំបន់ Pula, Istria នៅក្នុងសារមន្ទីរដែលឧទ្ទិសដល់បេតិកភណ្ឌសមុទ្រ៕ ប្រភព៖vnexpress