ប្រទេសចិន៖ អាជីវកម្មបរទេសនៅក្នុងប្រទេសចិនកំពុងប្រឈមមុខនឹងហានិភ័យដ៏ធំមួយ ខណៈដែលអ្នកប្រើប្រាស់ចិនបានប្តូរទៅទិញផលិតផលក្នុងស្រុករបស់ខ្លួនវិញ។
យោងតាមប្រភពព័ត៌មាន WSJ របស់ចិននៅថ្ងៃទី១៩ ខែមិថុនា បានឱ្យដឹងថា កាលពីប្រាំឆ្នាំមុន ទីផ្សាររបស់ប្រទេសចិនត្រូវបានគ្របដណ្តប់ដោយម៉ាកយីហោល្បីៗរបស់បរទេស ដែលនៅពេលនោះ ម៉ាកយីហោក្នុងស្រុកក៏បានជួបប្រទះនឹងការលំបាកក្នុងការប្រកួតប្រជែង ហើយជារឿយៗត្រូវប្រឈមមុខនឹងគុណភាពទាប និងទីផ្សារចុះខ្សោយផងដែរ។

ប៉ុន្តែបច្ចុប្បន្ននេះ ម៉ាកយីហោរបស់ប្រទេសចិនជាច្រើនបានក្លាយទៅជាការពេញនិយមនៅក្នុងទីផ្សារអនឡាញ និងទីផ្សាររបស់ពិភពលោក។ ជាមួយគ្នានេះដែរ កេរ្តិ៍ឈ្មោះរបស់ពួកគេសម្រាប់គុណភាព ការរចនា រួមជាមួយតម្លៃសមរម្យ និងបច្ចេកទេសលក់មានភាពប្រសើរឡើងយ៉ាងខ្លាំង ដោយចាប់យករសជាតិផ្លាស់ប្តូរយ៉ាងឆាប់រហ័សរបស់អ្នកប្រើប្រាស់។

លោក Bain អ្នកជំនាញរបស់ក្រុមហ៊ុនប្រឹក្សានៅទីក្រុងសៀងហៃ បាននិយាយថា បច្ចុប្បន្នទីផ្សាររបស់ប្រទេសចិនកើនឡើងខ្លាំង។ ដោយប្រទេសនេះត្រូវបានគេរំពឹងថានឹងវ៉ាដាច់សហរដ្ឋអាមេរិក ដើម្បីក្លាយជាទីផ្សារអ្នកប្រើប្រាស់ដ៏ធំបំផុតទីមួយរបស់ពិភពលោក។

ទោះជាយ៉ាងណាក៏ដោយ ម៉ាកយីហោបរទេសដូចជា Adidas, Procter & Gamble និង L’Oréal សុទ្ធតែរកបានភាគច្រើននៃការលក់ទូទាំងពិភពលោករបស់ពួកគេនៅក្នុងប្រទេសចិន។ ប៉ុន្តែបច្ចុប្បន្នម៉ាកយីហោល្បីៗទាំងនេះ កំពុងប្រឈមមុខនឹងស្ថានភាពដ៏លំបាកមួយ ដោយពួកគេក៏ត្រូវអនុវត្តតាមយុទ្ធសាស្ត្ររបស់ប្រទេសចិនផងដែរ ដូចជាការផ្សព្វផ្សាយបណ្តាញលក់អនឡាញ និងការរចនាផលិតផលស្របតាមវប្បធម៌ចិន។

ប្រទេសចិនគឺជាទីផ្សារដ៏ធំទីពីររបស់ P&G បន្ទាប់ពីសហរដ្ឋអាមេរិក ដែលមានចំនួនប្រហែល ១០% នៃការលក់ទូទាំងពិភពលោក។ កាលពីខែកុម្ភៈ នាយកប្រតិបត្តិក្រុមហ៊ុន P&G លោក Jon Moeller បាននិយាយថា ក្រុមហ៊ុនកំពុងសម្លឹងមើលការធ្វើឱ្យប្រសើរឡើងនូវលទ្ធភាពរបស់ខ្លួនទៅកាន់អ្នកប្រើប្រាស់ចិន ដោយការផ្លាស់ប្តូរចូលទៅក្នុងការលក់រាយតាមអ៊ីនធឺណិត ការលក់តាមរយៈការផ្សាយបន្តផ្ទាល់ និងប្រព័ន្ធផ្សព្វផ្សាយសង្គម៕ ប្រភព៖vnexpress

ជប៉ុន៖ អ្នកវិទ្យាសាស្ត្របានបង្កើតប្រព័ន្ធកំណត់ទីតាំងសកល ដែលអាចតាមដានចលនានៅក្រោមដី ដោយការប្រើកាំរស្មីលោហធាតុដ៏មានឥទ្ធិពល។
កាំរស្មីលោហធាតុ គឺជាភាគល្អិតថាមពលខ្ពស់ដែលមានប្រភពចេញពីលំហអាកាស រួមទាំងប្រភពដូចជាព្រះអាទិត្យ កាឡាក់ស៊ីឆ្ងាយ មហាណូវ៉ា និងរូបកាយសេឡេស្ទាលផ្សេងទៀត។

យោងតាមការចុះផ្សាយរបស់ Interesting Engineering នៅថ្ងៃទី ១៨ ខែមិថុនា បានឱ្យដឹងថា ក្រុមអ្នកស្រាវជ្រាវបានទាញយកលក្ខណៈសម្បត្តិនៃកាំរស្មីលោហធាតុ ដើម្បីគូសផែនទីកន្លែងដែលពិបាកទៅដល់ ដូចជាភ្នំភ្លើង ស្នូលរ៉េអាក់ទ័រនុយក្លេអ៊ែរ និងពីរ៉ាមីត។

លោក Hiroyuki Tanaka សាស្រ្តាចារ្យស្រាវជ្រាវរបស់សាកលវិទ្យាល័យតូក្យូ បាននិយាយថា គោលបំណងនៃការប្រើប្រាស់កាំរស្មីលោហធាតុ គឺដើម្បីតាមដានចលនានៅក្នុងដី អាចដឹងព័ត៌មាននៃការរញ្ជួយដី នឹងអនុញ្ញាតឱ្យអ្នកជំនាញមើលឃើញរចនាសម្ព័ន្ធក្រោមដី ឬលក្ខណៈភូមិសាស្ត្រក្រោមដីជាដើម។

ក្រុមអ្នកជំនាញក៏បានបង្ហាញឱ្យឃើញថា ប្រព័ន្ធកំណត់ទីតាំងសកលរបស់កាំរស្មីលោហធាតុដំបូងគេរបស់ពិភពលោកអាចគាំទ្របេសកកម្មស្វែងរកចលនានៅក្នុងដី និងអាចជួយសង្គ្រោះភពផែនដីនាពេលអនាគត និងការត្រួតពិនិត្យភ្នំភ្លើងជាដើម៕ ប្រភព៖vnexpress

ហាងលក់ទំនិញ 7-Eleven បានផ្តោតលើទីផ្សារគោលដៅចំនួន៣ប្រទេស ក្នុងនោះក្រុមហ៊ុននឹងពង្រីកសាខាថ្មីនៅប្រទេសកម្ពុជាឱ្យបាន១០០សាខា និងបើកសាខាថ្មីនៅប្រទេសថៃបន្ថែមទៀតឱ្យបាន៧០០សាខា ។ ចំណែកប្រទេសឡាវ ហាងលក់ទំនិញ 7-Eleven ទើបតែបើកសាខាដំបូង ដោយសារសម្លឹងឃើញថា ពលរដ្ឋឡាវមានលទ្ធភាពជាងមុនក្នុងការទិញទំនិញ ។

ក្នុងរយៈពេលជាច្រើនឆ្នាំកន្លងមក អាជីវកម្មទំនិញលក់រាយរបស់ថៃបានពង្រីកសាខាកាន់តែច្រើននៅក្រៅប្រទេស ជាពិសេស ក្នុងទីផ្សារប្រទេស CLMV រួមមាន កម្ពុជា, ឡាវ, មីយ៉ាន់ម៉ា និងវៀតណាម ដោយសារក្រុមហ៊ុនសម្លឹងឃើញកត្តាកំណើនសេដ្ឋកិច្ចរឹងមាំ ការទិញទំនិញកើនឡើង និងកំណើនពលរដ្ឋជាយុវវ័យផងដែរ ។ ហេតុនេះ ហាងលក់ទំនិញ 7-Eleven បានផ្តោតលើការបើកទីផ្សារថ្មីនៅក្រៅប្រទេស ។

ក្រុមហ៊ុន CP ទទួលបានអាជ្ញាប័ណ្ណឱ្យពង្រីកសាខាហាងលក់ទំនិញ 7-Eleven នៅប្រទេសកម្ពុជា និងឡាវ ។ ក្រុមហ៊ុនបានពង្រីកសាខាថ្មីនៅកម្ពុជា តាំងពីខែសីហា ឆ្នាំ២០២១ មកម៉្លេះ ដោយការបង្កើតក្រុមហ៊ុន CP ALL (Cambodia) និងបើកសាខាដំបូងនៅរាជធានីភ្នំពេញ បន្ទាប់មក ក្រុមហ៊ុនបានពង្រីកសាខានៅតាមបណ្តាខេត្តផងដែរ ។ នៅឆ្នាំ២០២២ ក្រុមហ៊ុនមានសាខាហាងលក់ទំនិញ 7-Eleven នៅកម្ពុជាចំនួន៤០សាខា ហើយនៅខែមេសា ឆ្នាំ២០២៣ មានចំនួន៦០សាខា ។ ក្រុមហ៊ុនសង្ឃឹមថា នៅឆ្នាំ២០២៣ នេះ នឹងមានសាខាសរុប១០០សាខានៅទូទាំងប្រទេសកម្ពុជា ។

ការបើកសាខាហាងលក់ទំនិញ 7-Eleven នៅកម្ពុជា ក្រុមហ៊ុនលើកឡើងថា ដោយសារសេដ្ឋកិច្ចកម្ពុជាកំពុងរីកចម្រើន មានកំណើនការទិញទំនិញ ព្រមទាំងមានការបណ្តាក់ទុនវិនិយោគជាបន្តបន្ទាប់នៅកម្ពុជាផងដែរ ។ លើសពីនេះ ពលរដ្ឋខ្មែរនិយមទិញផលិតផលថៃ ហើយនៅតាមបណ្តាហាងលក់ទំនិញ 7-Eleven នឹងដាក់លក់ផលិតផលថៃជាច្រើនមុខ ។

ក្រុមហ៊ុនលើកឡើងថា បើទោះជាទំហំសេដ្ឋកិច្ចកម្ពុជាតូចជាងថៃក្តី ប៉ុន្តែការរីកលូតលាស់របស់ GDP កម្ពុជានៅឆ្នាំ២០២៣ បើតាមធនាគារពិភពលោករំពឹងថា នឹងកើនឡើងដល់៥,២% ។ ដូច្នេះ កំណើននេះលើសប្រទេសថៃ ដែល GDP របស់ថៃបានកើនឡើងពី៣% ទៅ៤% ។ ក្រុមហ៊ុនបន្តថា សម្រាប់ទីតាំងហាងលក់ទំនិញ 7-Eleven គឺស្ថិតនៅក្នុងទីប្រជុំជន តំបន់ទេសចរណ៍ សាលារៀន និងស្ថានីយចាក់ប្រេងឥន្ធនៈ ។ កាលពីអំឡុងពេលកម្ពុជារៀបចំការប្រកួតកីឡាស៊ីហ្គេម ហាងលក់ទំនិញ 7-Eleven ដែលមានទីតាំងនៅក្បែរៗនោះបានលក់ទំនិញដាច់ច្រើន ហេតុនេះ ក្រុមហ៊ុនមានគម្រោងពង្រីកសាខាបន្ថែមទៀតនាថ្ងៃអនាគត ។

ក្រៅពីកម្ពុជាហើយ ក្រុមហ៊ុន CP All ក៏មានគម្រោងបើកសាខាថ្មីបន្ថែមទៀតនៅប្រទេសឡាវផងដែរ ។ ហេតុនេះ នៅឆ្នាំ២០២៣ ក្រុមហ៊ុនអាចសម្រេចផែនការពង្រីកសាខារបស់ខ្លួនទាំងនៅប្រទេសថៃ កម្ពុជា និងឡាវ ។ ចំណែកការបើកសាខាថ្មីនៅថៃ ក្នុងត្រីមាសដំបូងឆ្នាំ២០២៣ កន្លងមក ក្រុមហ៊ុនបានបើកចំនួន២០៩សាខា ហើយរហូតដល់ចុងឆ្នាំ២០២៣ ក្រុមហ៊ុននឹងបើកសាខានៅថៃបន្ថែមទៀតចំនួន៧០០សាខា ៕ ប្រភព ៖ Bangkok biznews

ប្រទេសអៀរឡង់ ៖ រដ្ឋាភិបាលអៀរឡង់បានប្រកាសថា នឹងផ្តល់ថវិកាឱ្យពលរដ្ឋណាដែលយល់ព្រមទៅរស់នៅតាមកោះប្រមាណ៣០ នៅឆ្នេរសមុទ្រភាគខាងលិចប្រទេសអៀរឡង់ និងមានលក្ខខណ្ឌកំណត់ផ្សេងៗ ។ ការប្រកាសឱ្យពលរដ្ឋទៅរស់នៅតាមកោះនេះ ដោយសាររដ្ឋាភិបាលមានបំណងអភិវឌ្ឍន៍កោះទាំងនេះឱ្យក្លាយជាទីប្រជុំជន ។

គម្រោងនេះមានឈ្មោះថា «Our Living Islands» ហើយអ្នកផ្លាស់ទីលំនៅទៅរស់នៅលើកោះ នឹងទទួលបានប្រាក់ប្រមាណ៩២.០០០ដុល្លារអាមេរិកក្នុងម្នាក់ ។ កោះទាំងនេះមានទេសភាពស្រស់ស្អាត ប៉ុន្តែមានពលរដ្ឋរស់នៅតិចតួចប៉ុណ្ណោះ ខណៈពិបាកក្នុងការធ្វើដំណើរ និងការទំនាក់ទំនងមកកាន់ទីក្រុង ពីព្រោះគ្មានស្ពានតភ្ជាប់ទីក្រុងទៅកាន់កោះនានាទេ ហើយខ្យល់ខ្លាំង ក៏ជាឧបសគ្គក្នុងការធ្វើដំណើរផងដែរ ។

ក្នុងចំណោមកោះចំនួន៣០ ស្ថិតនៅក្រោមគម្រោងនេះ មានកោះជាច្រើនគួរឱ្យចង់រស់នៅ ព្រោះមានទេសភាពស្រស់ស្អាតអាចថតខ្សែភាពយន្តបាន ខណៈកោះខ្លះទៀតជាកន្លែងសម្រាប់ការប្រកួតកីឡាផងដែរ ។ រដ្ឋាភិបាលប្រកាសថា គោលដៅរបស់គម្រោងនេះ គឺដើម្បីបង្កើនចំនួនពលរដ្ឋរស់នៅលើកោះ និងឱ្យកោះក្លាយជាទីប្រជុំជនដូចនៅទីក្រុងដែរ ហើយគម្រោងនេះនឹងចាប់ផ្តើមចុះឈ្មោះអ្នកចាប់អារម្មណ៍ ចាប់ពីថ្ងៃទី១ ខែកក្កដា ឆ្នាំ២០២៣ តទៅ ។

គោលដៅមួយទៀតរបស់គម្រោងនេះ គឺកែលម្អលំនៅឋាន និងអគារចាស់ៗនៅលើកោះដែលគ្មានការប្រើប្រាស់ផងដែរ ។ អ្នកចូលមករស់នៅថ្មីនឹងទទួលបានថវិកាឧបត្ថម្ភពីរដ្ឋាភិបាលសម្រាប់ការជួសជុល និងតុបតែងអគាររស់នៅក្នុងរយៈពេលវែង ។ រដ្ឋមន្ត្រីក្រសួងអភិវឌ្ឍន៍ជនបទ និងសហគមន៍ លោកស្រី Heather Humphrey បានថ្លែងថា ៖ «លទ្ធផលរបស់គម្រោងនេះ យើងនឹងបានឃើញពលរដ្ឋមករស់នៅលើកោះកាន់តែច្រើន ហើយពួកគេអាចធ្វើការរកប្រាក់ចំណូលលើកោះទាំងនេះ» ។

ការឧបត្ថម្ភថវិកាសម្រាប់អ្នកមករស់នៅលើកោះ គឺពួកគេត្រូវទិញដីធ្លី ឬអគារនៅលើកោះ ។ អគារនេះត្រូវសាងសង់នៅមុនឆ្នាំ១៩៩៣ ហើយជាអគារគ្មានមនុស្សរស់នៅយ៉ាងតិច២ឆ្នាំ ។ ចំណែកថវិកាទទួលបានពីរដ្ឋាភិបាល ពលរដ្ឋត្រូវយកមកជួសជុល និងតុបតែងអគារជាថ្មី ។ រីឯជនបរទេសជាម្ចាស់ដីធ្លី និងមានទ្រព្យសម្បត្តិនៅលើកោះប្រទេសអៀរឡង់ មិនមែនបញ្ជាក់ថា ពួកគេទទួលបានសិទ្ធិពេញលេញក្នុងការរស់នៅប្រទេសអៀរឡង់ទេ ៕ ប្រភព ៖ Thansettakij