ប្រទេសចិន៖ ប្រទេសចិនបានចាប់ផ្តើមសាងសង់កប៉ាល់រុករកវត្ថុបុរាណ និងវិទ្យាសាស្ត្រក្នុងជម្រៅទឹកដ៏ជ្រៅបំផុតរបស់ខ្លួននៅទីក្រុង Guangzhou ខេត្ត Guangdong កាលពីថ្ងៃទី ២៥ ខែមិថុនា។
យោងតាមសារព័ត៌មាន CGTN របស់ចិនបានឱ្យដឹងថា ការសាងសង់កប៉ាល់រុករកវត្ថុបុរាណក្នុងទឹកនេះ ត្រូវបានធ្វើឡើងដោយក្រុមហ៊ុន Guangzhou International Shipyard (GSI)។ កប៉ាល់ថ្មីនេះដែលមានប្រវែងរចនាប្រហែល ១០៣ ម៉ែត្រ និងមានទម្ងន់ ៩,២០០ តោន អាចផ្ទុកមនុស្សបានចំនួន ៨០ នាក់ និងធ្វើដំណើរក្នុងល្បឿនប្រហែល ៣០ គីឡូម៉ែត្រក្នុងមួយម៉ោង ជាមួយនឹងការគ្របដណ្តប់ក្នុងជម្រៅទឹកចម្ងាយ ២៧,៧៨០ គីឡូម៉ែត្រ។

គោលបំណងនៃការសាងសង់កប៉ាល់ថ្មីនេះ គឺដើម្បីរុករកវត្ថុបុរាណក្នុងជម្រៅទឹកដ៏ជ្រៅបំផុត នឹងជាយានជំនិះថ្មីអាចធ្វើដំណើរក្នុងសមុទ្រ ផ្តល់ការគាំទ្រប្រតិបត្តិការដ៏ទូលំទូលាយ និងដឹកជញ្ជូនទំនិញធ្ងន់ៗដោយសុវត្ថិភាព រួមជាមួយសមត្ថភាពបំបែកទឹកកកនៅតំបន់ប៉ូលក្នុងរដូវក្តៅផងដែរ។

អ្នកជំនាញរំពឹងថា កប៉ាល់នឹងនាំយកមកវិញនូវសំណាកគំរូ និងទិន្នន័យបរិស្ថានដែលត្រូវការដើម្បីសិក្សាពីបញ្ហាទាក់ទងនឹងភូគព្ភសាស្ត្រសមុទ្រជ្រៅ វិទ្យាសាស្ត្រជីវិត និងគាំទ្រប្រតិបត្តិការក្រោមទឹកសម្រាប់បុរាណវិទ្យាទឹកជ្រៅ។គួរបញ្ជាក់ដែរថា ការស្រាវជ្រាវថ្មីនេះពិតជាមានសារសំខាន់ក្នុងការពង្រឹងអំណាចរបស់ប្រទេសចិនក្នុងសកម្មភាពនៅសមុទ្រជ្រៅ ដូចជាការស្រាវជ្រាវផ្នែកបុរាណវិទ្យា និងការមុជទឹកជ្រៅដោយគ្មាន mannequin ជាដើម ហើយត្រូវបានគេរំពឹង នឹងចាប់ផ្តើមដំណើរការដំបូងក្នុងសមុទ្រនៅឆ្នាំ ២០២៥ ផងដែរ៕ ប្រភព៖vnexpress

ប្រទេសហ្វាំងឡង់ ៖ អ្នកណាចង់នៅស្ងៀមស្ងាត់ ហើយអាចសម្រាកលំហែកាយដោយមិនចាំបាច់ខ្លាចថា មានការងារផ្ញើមកឱ្យធ្វើនៅថ្ងៃឈប់សម្រាក ពួកគេអាចមកកម្សាន្តនៅកោះមួយឈ្មោះ Ulko-Tammio ស្ថិតនៅឈូងសមុទ្រខាងលិចនៃឧទ្យានជាតិប្រទេសហ្វាំងឡង់ ។ ភ្ញៀវទេសចរមកកម្សាន្តនៅកោះនេះនឹងបានសម្រាកលំហែកាយជាមួយធម្មជាតិពិតៗ និងគ្មានសំឡេងរំខាន ។

Ulko-Tammio គឺជាកោះដំបូងគេនៅលើពិភពលោក ដែលមិនអនុញ្ញាតឱ្យភ្ញៀវទេសចរប្រើប្រាស់ទូរស័ព្ទដាច់ខាត ។ អ្នកធ្វើដំណើរមកកម្សាន្តនៅកោះនេះត្រូវបិទទូរស័ព្ទរបស់ខ្លួនជាមុនសិន ដើម្បីឱ្យការកម្សាន្តរបស់ពួកគេរីករាយជាមួយធម្មជាតិ និងអាចសម្រាកលំហែកាយដោយមិនចាំបាច់បារម្ភថា មានការបង្ហោះព័ត៌មានអ្វីក្នុងបណ្តាញសង្គម ឬមានការងារផ្ញើមកក្នុងថ្ងៃសម្រាក ។

ទោះយ៉ាងណា នៅលើកោះនេះក៏មានសេវាទូរស័ព្ទ និងអ៊ីនធើរណេតដូចកន្លែងទូទៅដែរ ប៉ុន្តែគេគ្រាន់តែចង់ឱ្យភ្ញៀវទេសចរបានទស្សនាធម្មជាតិដ៏ស្រស់ស្អាត ជាពិសេស ធម្មជាតិនៅលើកោះ Ulko-Tammio ។ ភ្ញៀវទេសចរមកកម្សាន្តនៅកោះនេះនឹងបានឃើញសត្វស្លាប និងរុក្ខជាតិកម្រមានជាច្រើនប្រភេទ ។ លើសពីនេះ នៅលើកោះមានផ្លូវសម្រាប់ដើរកម្សាន្តនៅក្នុងព្រៃ មានផ្ទះស្នាក់នៅតូចៗ និងមានទីវាលទូលាយសម្រាប់ឱ្យភ្ញៀវទេសចរបោះបង់ទៀតផង ។

អ្នកចិត្តវិទ្យាម្នាក់ឈ្មោះ Terhi Mustonen លើកឡើងថា ការមកសម្រាកលំហែកាយនៅលើកោះដោយមិនប្រើប្រាស់ទូរស័ព្ទ នឹងជួយឱ្យយើងមានសុខភាពកាយ និងចិត្តរឹងមាំ ព្រមទាំងអាចកាត់បន្ថយភាពស្ត្រេសបាន ៕ ប្រភព ៖ environman

បរទេស៖ អ្នកវិទ្យាសាស្ត្រ អ៊ីស្រាអែល បានរកឃើញមកុដដ៏ចំណាស់ជាងគេបំផុតរបស់ពិភពលោក ដែលមានអាយុ ៦,០០០ ឆ្នាំ នៅក្នុងរូងភ្នំនៃវាលខ្សាច់ Judea។
យោងតាមប្រភពព័ត៌មាន Ancient Origins កាលពីថ្ងៃទី២៥ ខែមិថុនា បានឱ្យដឹងថា ការរកឃើញមកុដដ៏កម្រនេះ គឺជាវត្ថុបុរាណដ៏អស្ចារ្យមួយក្នុងចំណោមវត្ថុបុរាណជាង ៤០០ ដែលត្រូវបានរកឃើញនៅក្នុងរូងភ្នំនៃវាលខ្សាច់ Judea ប្រទេសអ៊ីស្រាអែល។ បច្ចុប្បន្នវត្ថុបុរាណដ៏កម្រនេះបានក្លាយជាកម្មសិទ្ធរបស់សារៈមន្ទី Nahal Mishmar។

ការពាក់មកុដគឺជានិមិត្តសញ្ញាជាក់ស្តែងនៃស្ថានភាព និងឥទ្ធិពលរបស់តួអង្គនោះនៅក្នុងសង្គម ឬជាផ្នែកមួយនៃពិធីសាសនា និងព្រឹត្តិការណ៍សំខាន់ៗ។ មកុដ គឺតំណាងឱ្យអំណាច កម្លាំង និងភាពជាអ្នកដឹកនាំ។ ធាតុនេះអាចត្រូវបានផ្សារភ្ជាប់ជាមួយនឹងបុគ្គលដែលមានឋានៈខ្ពស់ដូចជាអ្នកគ្រប់គ្រង ស្តេច ឬឥស្សរជនសាសនាជាដើម។
អ្នកជំនាញបុរាណវិទ្យាលោក Pessah Bar-Adon ជឿថាមកុដបុរាណដ៏កម្រនេះត្រូវបានដើរតួនាទីយ៉ាងសំខាន់នៅក្នុងពិធីបញ្ចុះសពរបស់មនុស្សដ៏កំពូលក្នុងសម័យនោះ។

គួរបញ្ជាក់ដែរថា សារៈមន្ទី Nahal Mishmar បច្ចុប្បន្នមានវត្ថុបុរាណសរុបចំនួន ៤៤២ រួមមាន ក្បាលមេកានិកចំនួន ២៤០ ដំបងឆក់ ១០០ មកុដ ស្នែងកាំភ្លើង ប្រដាប់ប្រដា អាវុធធ្វើពីលង្ហិន ភ្លុក និងថ្ម។ វត្ថុបុរាណផ្សេងទៀតរបស់ Nahal Mishmar ទំនងជាត្រូវបានប្រើប្រាស់នៅក្នុងពិធីសាសនាទាក់ទងនឹងការបរបាញ់ ការស៊ីស្មៅ កសិកម្ម និងការការពារ។ ទម្ងន់ និងតម្លៃដ៏អស្ចារ្យនៃវត្ថុបុរាណលង្ហិននេះបានបង្ហាញពីភាពមានតម្លៃនៃទង់ដែងនៅក្នុងសង្គមបុរាណ៕ ប្រភព៖vnexpress

រាជធានីប្រ៊ុចសែលស៍៖ រហូតមកដល់ពេលនេះ ស្ចិមលោក កំពុងតែវាយតម្លៃ អំពីស្ថានការណ៍វិវឌ្ឍចុងក្រោយបំផុត នៅរុស្ស៊ី និង បេឡារុស ក្រោយការផ្ទុះឡើងនូវព្រឹត្ដិការណ៍បះបោរប្រដាប់អាវុធរបស់កម្លាំងទាហានស៊ីឈ្នួល Wagner កាលពីថ្ងៃសៅរ៍ ទី២៤ ខែមិថុនា ហើយបណ្ដាប្រទេសជាសម្ពន្ធមិត្តរបស់អង្គការណាតូ បានចាប់យកឱកាសនេះ ផ្ដល់ជំនួយយោធាបន្ថែមទៀតជួយដល់ប្រទេសអ៊ុយក្រែន ស្របពេលមន្រ្ដីជាន់ខ្ពស់អឺរ៉ុប អះអាងពីកូនចៅបកខាំពូទីន វិញ។

សារព័ត៌មាន Alarabiya News បានចេញផ្សាយ កាលពីរាត្រី ថ្ងៃចន្ទ ទី២៦ ខែមិថុនា ថា លោក ចូសេហ្វ ប័ររ៉ែល (Josep Borrell) ប្រធានគោលនយោបាយការបរទេសសហភាពអឺរ៉ុប បានបញ្ជាក់ ថា «វាពិតជារឿងចម្លែកខ្លាំងណាស់ នៅត្រង់ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានបង្កើតក្រុមហ៊ុនទាហានស៊ីឈ្នួល Wagner នៅលើទឹកដីរបស់រុស្ស៊ី។ ប៉ុន្ដែកម្លាំងទាហាន Wagner ដឹកនាំដោយលោក យ៉ែវហ្គេនី ព្រីហ្គោហ្ស៊ីន កំពុងតែងាកមកខាំគាត់វិញ។ កម្លាំងទាហានស៊ីឈ្នួលទាំងនេះ បានធ្វើសកម្មភាព បកក្បាលប្រឆាំងនឹង ពូទីន ជាអ្នកបង្កើត»។

លោក ចូសេហ្វ ប័ររ៉ែល បានប្រាប់ដល់អ្នកកាសែត នៅក្នុងប្រទេសលូហ្សាំបួរ (Luxembourg) ស្របគាត់ទើបមកដល់ សម្រាប់ការចូលរួមកិច្ចប្រជុំ ជាមួយនឹងក្រុមរដ្ឋមន្រ្ដីរបស់សហភាពអឺរ៉ុប ទាំង២៧ប្រទេស ថា «ប្រព័ន្ធនយោបាយរបស់រុស្ស៊ី កំពុងតែបង្ហាញ អំពីភាពផុយស្រួយ ហើយកំពុងតែបង្ហាញ អំពីសញ្ញាប្រេះឆា។ ប៉ុន្ដែនេះជារឿងមិនល្អមើលទាល់តែសោះ ចំពោះមហាអំណាចនុយក្លេអ៊ែររបស់រុស្ស៊ី ឈានដល់ដំណាក់កាលបែបនេះ។ ប៉ុន្ដែវាជាឱកាសមួយ សម្រាប់សហភាពអឺរ៉ុប បង្កើនជំនួយបន្ថែមទៀត ជួយដល់ប្រទេសអ៊ុយក្រែន»។

នៅក្នុងដំណើរទស្សនកិច្ចទៅកាន់ប្រទេសលីទុយអានី លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការ អង្គការណាតូ បានប្រាប់ដល់ក្រុមអ្នកកាសែត ថា «ព្រឹត្តិការណ៍ កាលពីចុងសប្តាហ៍មុននេះ ជាបញ្ហាផ្ទៃក្នុងរបស់ប្រទេសរុស្ស៊ី។ ប៉ុន្ដែវាជាសញ្ញាមួយផ្សេងទៀត បង្ហាញ អំពីកំហុសឆ្គងដ៏ធំបំផុតខាងយុទ្ធសាស្រ្ត ក្រោយការសម្រេចចិត្តរបស់លោកប្រធានាធិបតី ពូទីន បានដាក់បញ្ចូលឧបសម្ព័ន្ធឧបទ្វីបគ្រីមៀ (Crimea) របស់អ៊ុយក្រែន ដោយខុសច្បាប់ ជាទឹកដីរបស់រុស្ស៊ី នៅឆ្នាំ២០១៤ និង ការធ្វើសង្រ្គាមលុកលុយទៅលើប្រទេសអ៊ុយក្រែន។ រីឯបណ្ដាប្រទេសជាសម្ពន្ធមិត្ត ក៏កំពុងតែតាមដានស្ថានការណ៍ថ្មីៗបន្ថែមទៀត នៅក្នុងប្រទេសបេឡារុស។ ស្របគ្នានេះ សម្ពន្ធមិត្តណាតូ បានធានាសម្រាប់ការផ្គត់ផ្គង់ជំនួយយោធាបន្ដទៀត ជួយដល់ប្រទេសអ៊ុយក្រែន។

លោក បែន វ៉ាលឡេស (Ben Wallace) រដ្ឋមន្រ្ដីក្រសួងការពារជាតិចក្រភពអង់គ្លេស បានថ្លែងទៅកាន់សមាជិកសភារបស់ចក្រអង់គ្លេស ថា ក្រុងឡុងដ៍ បានផ្គត់ផ្គង់មីស៊ីលបាញ់ រយៈចម្ងាយឆ្ងាយ ប្រភេទStorm Shadow (ស្ដមសាដូ) ទៅជួយដល់កងទ័ពការពារទឹកដីរបស់អ៊ុយក្រែន។ ប៉ុន្ដែមីស៊ីលទាំងនេះ កំពុងតែមានប្រសិទ្ធភាពដ៏ខ្លាំងបំផុត នៅលើសមរភូមិវាយប្រយុទ្ធគ្នា រវាងរុស្ស៊ី និង អ៊ុយក្រែន។

ជាមួយគ្នានេះដែរ ក្រុមរដ្ឋមន្រ្ដីក្រសួងការបរទេសសហភាពអឺរ៉ុប បានអះអាង ថា ការបះបោរមិនជោគជ័យរបស់កម្លាំងទាហានស៊ីឈ្នួល Wagner កាលពីចុងសប្ដាហ៍មុន កំពុងតែបង្ហាញសញ្ញាអស្ថិរភាព នៅក្នុងប្រទេសរុស្ស៊ី។ ព្រឹត្ដិការណ៍ ក៏កំពុងតែធ្វើឲ្យប៉ះពាល់ដល់មុខមាត់របស់ប្រទេសមហាអំណាចយោធានុយក្លេអ៊ែរមួយនេះយ៉ាងខ្លាំង៕

រាជធានីបាងកក៖ ស្របពេលសម្ពន្ធភាពគណបក្សប្រឆាំងចំនួន៨ ដឹកនាំដោយគណបក្សឆ្ពោះទៅមុខ នៅតែមិនទាន់មានអាសនៈគ្រប់គ្រាន់ យ៉ាងតិចចំនួន ៣៧៦នាក់ ពីក្នុងចំណោមសមាជិកសភា ចំនួន៥០០នាក់ និង សមាជិកព្រឹទ្ធសភា ចំនួន២៥០នាក់នោះ បេក្ខជនជាច្រើនទៀត អាចនឹងត្រូវតែងតាំង សម្រាប់តំណែងនាយករដ្ឋមន្រ្ដីថ្មី នៅក្នុងប្រទេស។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃចន្ទ ទី២៦ ខែមិថុនា ថា លោក អាកានីត មួនសាវ៉ាដ (Akanit Muensawad) សមាជិកព្រឹទ្ធសភា បានអះអាង ថា ឈ្មោះជាច្រើនទៀត អាចនឹងតែងតាំង សម្រាប់សម័យប្រជុំសភា ជ្រើសរើសនាយករដ្ឋមន្រ្ដីថ្មីរបស់ប្រទេសថៃ ក្រៅពីលោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (Move Forward Party ហៅកាត់ MFP)។

លោកឧត្ដមសេនីយ៍ អាកានីត បានបញ្ជាក់ ថា គាត់កំពុងតែឆ្លើយតបទៅនឹងសម្ពាធ កាន់តែខ្លាំងឡើង ពីអ្នកគាំទ្ររបស់គណបក្សឆ្ពោះទៅមុខ ដើម្បីជំរុញឲ្យសមាជិកព្រឹទ្ធសភាបោះឆ្នោតគាំទ្រដល់លោក ភីថា ជានាយករដ្ឋមន្ត្រីថ្មី។ ប៉ុន្ដែបេក្ខភាពជាច្រើន អាចនឹងត្រូវតែងតាំង ហើយសមាជិកព្រឹទ្ធសភា មានសិទ្ធិបោះឆ្នោត គាំទ្រដល់អ្នកណាម្នាក់ ដែលពួកគេចាត់ទុក ថា ជាជម្រើសដ៏សមស្របបំផុត ទាំងមាត្រដ្ឋានសីលធម៌ និង សមត្ថភាព។

សមាជិកព្រឹទ្ធសភា រូបនេះ បានបន្ថែម ថា «ជាការពិតហើយ បេក្ខភាពទាំងនោះ គួរតែប្រមូលសំឡេងគាំទ្រឲ្យបាន យ៉ាងតិច ចំនួន៣៧៦ ពីសមាជិកសភា។ បើធ្វើដូច្នេះបាន គឺមិនចាំបាច់ពឹងទៅលើព្រឹទ្ធសភា បោះឆ្នោតជ្រើសរើសឲ្យក្លាយនាយរដ្ឋមន្រ្ដីនោះដែរ។ ប៉ុន្ដែនេះក៏ដើម្បីឆ្លើយតបទៅនឹងការរំពឹងទុកលើព្រឹទ្ធសភា អាចនឹងត្រូវស្តីបន្ទោស ពីអ្នកគាំទ្ររបស់គណបក្សឆ្ពោះទៅមុខ (MFP) នៅក្នុងព្រឹត្តិការណ៍ លោក ភីថា ប្រធានគណបក្ស MFP ទទួលបានសំឡេងតិចជាង ៣៧៦។

លោកឧត្ដមសេនីយ៍ អាកានីត បានបន្ថែម ថា «អ្នកនឹងអាចបង្កើតរដ្ឋាភិបាលថ្មីបាន ប្រសិនបើអ្នកទទួលបានអាសនៈចំនួន៣៧៦សំឡេង ចាប់តាំងពីដំបូង។ តើអ្នកអាចធ្វើបានទេ ហើយវាជាកំហុសរបស់ព្រឹទ្ធសភាដែរឬទេ?»។

លោក ចាត ស៊ីរ៉ាថារ៉ាណុន (Jate Siratharanont) សមាជិកព្រឹទ្ធសភា បានអះអាង ថាសមាជិកព្រឹទ្ធសភាមួយចំនួន បានបិទទ្វារ លើកិច្ចពិភាក្សា អាចធ្វើជាមួយគណបក្សឆ្ពោះទៅមុខ ស្របពេលគណបក្សឈ្នះឆ្នោតមួយនេះ កំពុងតែស្វែងរកនូវការគាំទ្រពីព្រឹទ្ធសភា សម្រាប់លោក ភីថា ដើម្បីក្លាយជានាយករដ្ឋមន្ត្រីថ្មី។ ចំណែកបញ្ហាឧបសគ្គ នៅត្រង់ ថា គណបក្សឆ្ពោះទៅមុខ នៅតែមានចេតនា ចង់ធ្វើវិសោធនកម្ម លើមាត្រា១១២ ពាក់ព័ន្ធនឹងច្បាប់ប្រមាថព្រះមហាក្សត្រ ទើបមិនទទួលបានការគាំទ្រ មកពីសមាជិកព្រឹទ្ធសភា ដែលជាអ្នកអភិរក្សនិយម។

ស្របគ្នាជាមួយនឹងសំណួរ ចោទសួរអំពីគោលនយោបាយកំណែទម្រង់ លើកងកម្លាំងប្រដាប់អាវុធរបស់គណបក្សឆ្ពោះទៅមុខ នោះ លោកឧត្តមសេនីយ៍ អាកានីត បានបង្ហើប ថា គាត់គាំទ្រដល់កំណែទម្រង់របស់កងកម្លាំងប្រដាប់អាវុធ ដោយតម្រូវឲ្យអនុវត្ត តាមកងកម្លាំងប្រដាប់អាវុធខ្លួនឯង មិនមែនជាកំណែទម្រង់ ត្រូវបានស្នើឡើង ពីគណបក្សឆ្ពោះទៅមុខ នោះឡើយ។ បន្ថែមពីលើនេះ លោកឧត្ដមសេនីយ៍ បានចោទប្រកាន់ ដល់គណបក្សឆ្ពោះទៅមុខ ថា កំពុងតែចម្លងរចនាសម្ព័ន្ធអង្គភាពរបស់យោធាអាមេរិក មកធ្វើជាគំរូ សម្រាប់កំណែទម្រង់ ដែលបានស្នើឡើង ដោយខ្លួនឯង សម្រាប់កងកម្លាំងប្រដាប់អាវុធថៃ៕