នាយ ពាក់មី និយាយបែបនេះក្រោយភរិយាចូលសង្គ្រោះបន្ទាន់ព្រោះទទួលសេវាកម្មព្យួរសេរ៉ូមឱ្យសាច់ស

នៅល្ងាចថ្ងៃទី៣ ខែសីហា ឆ្នាំ២០២៣ មានការភ្ញាក់ផ្អើលយ៉ាងខ្លាំងបន្ទាប់ពីទទួលដំណឹងថាភរិយាតារាកំប្លែងល្បីឈ្មោះលោក ចែម ចាន់រ៉ា ហៅនាយ ពាក់មី ចូលសង្រ្គោះបន្ទាន់នៅមន្ទីរពេទ្យកាល់ម៉ែត្រក្រោយពីទទួលសេវាកម្មនៅហាងកែសម្ផស្សយីហោ S88 Beauty ផ្សារថ្មីរងរបួសធ្ងន់ធ្ងរ។

ទីតាំងខាងលើនេះស្ថិតនៅផ្ទះលេខ១១០E0 តាមបណ្តោយផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ។ ក្រោយពីមានហេតុការណ៍តក់ស្លុតនេះ ហាងកែសម្ផស្សយីហោ S88 Beauty ត្រូវបានសមត្ថកិច្ចបិទហាងនេះបន្ទាប់ពីរកឃើញថាទីតាំងមួយកន្លែងនេះមិនមានអាជ្ញាប័ណ្ណត្រឹមត្រូវទេថែមទាំងធ្វើឱ្យអថិជនរងគ្រោះទៀត។
បន្ទាប់ពីមានហេតុការណ៍នេះអ្នកគាំទ្រជាច្រើនបានកើតក្តីបារម្ភទៅដល់គ្រួសារតារាកំប្លែងនាយមី និងបានផ្ញើសារជូនពរឱ្យភរិយាលោកផុតគ្រោះថ្នាក់លើកនេះផងដែរ។

នៅព្រឹកថ្ងៃទី៤ ខែសីហា នេះ តារាកំប្លែងនាយពាក់មី ពុំទាន់និយាយអ្វីច្រើនទេប្រាប់មហាជនដែលកំពុងព្រួយបារម្ភពីសុខទុក្ខលោក តែលោកបានបង្ហើបដោយខ្លីថា «ខ្ញុំមិនទាន់ផុសអីទេ ទុកឱ្យសមត្ថកិច្ច លោកធ្វើការសិន»។ លោកបង្ហោះបន្ថែមថា «ប្រពន្ធខ្ញុំសង្គ្រោះបន្ទាន់នៅបន្ទប់ICU ២ថ្ងៃហើយ បន្ទាប់ពីគាត់បានព្យួរសេរ៉ូមឱ្យសាច់ស នៅមជ្ឈមណ្ឌលកែសម្ផស្ស S88 Beauty នៅថ្ងៃពុធ ទី២ ម៉ោង១រសៀល តើម្ចាស់ S88 Beauty ទាំង១៣សាខា ជានរណា?»។

គួរបញ្ជាក់ផងដែរថា កាលពីថ្ងៃទី៤ ខែមីនា ឆ្នាំ២០២៣ ក្រសួងសុខាភិបាលក៏បានចេញសេចក្តីសម្រេចបិទមជ្ឈមណ្ឌលកែសម្ផស្សមួយកន្លែងផងដែរដែលមានយីហោឈ្មោះ អឹម២៥ ប៊ីយូធី ក្រោយពេលមានស្ត្រីម្នាក់បានដេកស្លា.ប់នៅក្នុងហាងកែសម្ផស្ស ខណៈពេលចូលទៅវះកាត់កែដើមទ្រូង៕