ប្រទេសវេណេស៊ុយអេឡា ៖ នៅតំបន់ Catatumbo lightning ក្នុងប្រទេសវេណេស៊ុយអេឡា គឺជាតំបន់មួយដែលសម្បូររន្ទះបាញ់ច្រើនបំផុតនៅលើពិភពលោក ។ តំបន់នេះស្ថិតនៅបរិវេណមាត់ទន្លេ Catatumbo ក្នុងទ្វីបអាមេរិកខាងត្បូង និងមានប្រវែង៣៣៨គីឡូម៉ែត្រ ។

គេសង្កេតឃើញថា ពន្លឺភ្លើងដែលកើតឡើងដោយសាររន្ទះបាញ់កំពុងហូរចូលទៅក្នុងបឹង Maracaibo ។ ក្នុង១ឆ្នាំៗ នៅតំបន់នេះនឹងមានរន្ទះបាញ់ចាប់ពី១៤០ថ្ងៃ ទៅ១៦០ថ្ងៃ ហើយមានប្រេកង់រហូតដល់២៨ដងក្នុង១នាទី ។

ចំពោះមូលហេតុបណ្តាលឱ្យកើតរន្ទះបាញ់ជាច្រើនលើកក្នុងតំបន់ Catatumbo ដោយសារនៅតាមដងទន្លេនេះបាននាំយកសារធាតុសរីរាង្គជិតរលួយជាច្រើនមកកាន់មាត់ទន្លេ ។ ហេតុនេះ វាបានផលិតជាឧស្ម័នមេតានសាយភាយទៅលើបរិយាកាស ហើយប្រមូលផ្តុំគ្នាដូចដុំពពក ។ នៅមានខ្យល់បក់ខ្លាំង វាបណ្តាលឱ្យកកិតគ្នា និងប្រមូលផ្តុំនូវចរន្តអគ្គិសនី រហូតក្លាយជាបាតុភូតរន្ទះបាញ់ ។

រន្ទះបាញ់តែងកើតឡើងនៅពេលអាកាសធាតុក្តៅ ចាប់ពីខែមករា រហូតដល់ខែកុម្ភៈ ហើយក្នុងអំឡុងពេលអាកាសធាតុសើមនៅខែតុលា នឹងមានរន្ទះបាញ់ច្រើនបំផុត ៕ ប្រភព ៖ chiangmai news

ក្រសួងកសិកម្ម រុក្ខាប្រមាញ់និងនេសាទ នៅយប់ថ្ងៃទី៧ ខែកក្កដា បានជូនដំណឹងថាកូនផ្សោតទី៥ក្នុងឆ្នាំ២០២៣ បានប្រទះឃើញនៅចំណុចអន្ទង់វៀននៃអន្លង់កាំពី ដែលកូនផ្សោតនេះមានអាយុប្រមាណ១០ថ្ងៃ។

ក្រុមស្រាវជ្រាវនៃខណ្ឌរដ្ឋបាលជលផលខេត្តក្រចេះ និងស្ទឹងត្រែង រដ្ឋបាលជលផល និងអង្គការ WWF បានកត់ត្រាកូនផ្សោតថ្មីមួយទៀត នៅអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។ ក្រុមការងារបានទទួលព័ត៌មានពីក្រុមសហគមន៍អ្នកចម្លងទូកទេសចរណ៍ និងក្រុមឆ្នាំទន្លេប្រចាំអន្លង់កាំពី បានចុះថតបានកូនផ្សោតនៅម៉ោង១១:៣០នាទីព្រឹក នាថ្ងៃទី០៧ ខែកក្កដា ឆ្នាំ២០២៣នេះ នៅចំណុចអន្ទង់វៀន នៃអន្លង់កាំពី។ តាមការអង្កេត កូនផ្សោតទើបកើតថ្មីនេះមានអាយុប្រមាណ១០ថ្ងៃកំពុងហែលជាមួយផ្សោតពេញវ័យចំនួន០៩ក្បាលទៀត។

គួរបញ្ជាក់ផងដែរថា តាំងពីខែមករា ដល់ខែកក្កដា ឆ្នាំ២០២៣ កម្ពុជាបានកត់ត្រាកូនផ្សោតចំនួន៥ហើយ ខណៈក្នុងឆ្នាំ២០២១ និង ២០២២ ក្រុមការងារបានកត់ត្រាកូនផ្សោតបានចំនួន៦ក្បាលដូចគ្នា៕

ប្រទេសចិន ៖ ប្រទេសចិននឹងហាមឃាត់ការនាំចូលម្ហូបអាហារពីជប៉ុន ដោយសារបារម្ភពីសុវត្ថិភាពអាហារទាំងនេះ ខណៈប្រទេសជប៉ុនត្រៀមបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរទៅក្នុងសមុទ្រ ។ International Atomic Energy Agency (IAEA) បានបញ្ជាក់ថា គម្រោងបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរ Fukushima Daiichi ចូលក្នុងសមុទ្រ នឹងធ្វើតាមស្តង់ដារសកល ។

មន្ត្រីគយចិនលើកឡើងថា ពួកគេនឹងបង្កើនការត្រួតពិនិត្យ និងប្រុងប្រយ័ត្នចំពោះសារធាតុវិទ្យុសកម្មជាបន្តបន្ទាប់ ដើម្បីធានាសុវត្ថិភាពរបស់ម្ហូបអាហារនាំចូលពីជប៉ុន ក្នុងនោះចិននឹងហាមនាំចូលអាហារពីខេត្តចំនួន១០ របស់ជប៉ុន ។ ចិន គឺជាប្រទេសនាំចូលគ្រឿងសមុទ្រដ៏ច្រើនបំផុតរបស់ជប៉ុន បញ្ជាក់ថា ចិននឹងពិចារណាលើឯកសារសុំនាំចូលម្ហូបអាហារឱ្យតឹងរ៉ឹង ជាពិសេស គ្រឿងសមុទ្រមកពីតំបន់ផ្សេងៗរបស់ជប៉ុន ។

ប្រទេសចិនបញ្ជាក់ថា ការហាមឃាត់នេះ ដើម្បីការពារមិនឱ្យអាហារមានជាតិវិទ្យុសកម្មរបស់ជប៉ុនចូលមកប្រទេសចិន និងការពារសុវត្ថិភាពពលរដ្ឋចិនផងដែរ ។ ភ្នាក់ងារ IAEA បានបើកភ្លើងខៀវឱ្យជប៉ុនចាប់ផ្តើមបង្ហូរទឹកកខ្វក់ចេញពីរោងចក្រថាមពុលនុយក្លេអ៊ែរ Fukushima ចូលក្នុងសមុទ្រ បើទោះមានការប្រឆាំងពីប្រទេសចិនក្តី ។

កាលពីខែមេសា ឆ្នាំ២០២១ រដ្ឋាភិបាលជប៉ុនបានអនុញ្ញាតឱ្យគេបង្ហូរទឹកមានជាតិវិទ្យុសកម្មចេញពីរោងចក្រថាមពលនុយក្លេអ៊ែរចូលក្នុងសមុទ្រ ។ រដ្ឋាភិបាលជប៉ុនបានបញ្ជាក់នាពេលនោះថា ការបង្ហូរទឹកចេញពីរោងចក្រចូលក្នុងសមុទ្រ នឹងចាប់ដំណើរការក្នុងរយៈពេល២ឆ្នាំទៀត ។

ប្រព័ន្ធបង្កើតភាពត្រជាក់សម្រាប់ម៉ាស៊ីនក្នុងរោងចក្រថាមពលនុយក្លេអ៊ែរ បានរងផលប៉ះពាល់ដោយសារគ្រោះរញ្ជួយដី និងរលកយក្សស៊ូណាមិ កាលពីឆ្នាំ២០១១ ។ នេះចាត់ទុកថា វាជាគ្រោះថ្នាក់នុយក្លេអ៊ែរដ៏អាក្រក់បំផុត ចាប់តាំងពីគ្រោះមហន្តរាយនៅរោងចក្រថាមពល Chernobyl ។ គេបានធ្វើការរុះរើរោងចក្រថាមពល Fukushima ហើយគេសង្ឃឹមថា នឹងចំណាយពេលប្រមាណ៤០ឆ្នាំ ៕ ប្រភព ៖ Bangkok biznews

ការស្រាវជ្រាវជាច្រើនបានលើកឡើងពីទំនាក់ទំនងរវាងខ្យល់ពុលនៅតាមដងផ្លូវ និងបញ្ហាការចងចាំរបស់ខួរក្បាល ។ ជាទូទៅ ការទទួលបានខ្យល់បំពុលកាន់តែយូរ វានឹងធ្វើឱ្យយើងមានបញ្ហាប្រឈមកាន់តែខ្លាំង ។ ចំណែកការស្រាវជ្រាវចុងក្រោយគេបង្ហាញថា ការទទួលខ្យល់ពុលនៅតាមដងផ្លូវត្រឹមតែរយៈពេល២ម៉ោង វានឹងធ្វើឱ្យប៉ះពាល់ដល់ខួរក្បាលរបស់យើង ។

អ្នកស្រាវជ្រាវមកពីសាកលវិទ្យាល័យ British Columbia និងសាកលវិទ្យាល័យ Victoria បានចាត់ឱ្យអ្នកស្ម័គ្រចិត្តចំនួន២៥នាក់ ដែលមានអាយុចាប់ពី១៩ឆ្នាំ ដល់៤៩ឆ្នាំ ចូលទៅក្នុងបន្ទប់មួយរយៈពេល១២០នាទី ហើយបន្ទប់នេះបានរៀបចំប្រព័ន្ធខ្យល់ ។ គេបានបែងចែកបន្ទប់មានតម្រងខ្យល់ និងបន្ទប់មានខ្យល់កខ្វក់ដោយសារផ្សែងម៉ាស៊ូត ។

ក្នុងអំឡុងពេលនោះ អ្នកស្រាវជ្រាវបានឱ្យក្រុមអ្នកស្ម័គ្រចិត្តទាំងនេះជិះកង់រយៈពេល១៥នាទីដើម្បីបង្កើនកម្លាំងដកដង្ហើម ។ បន្ទាប់មក នៅពេលគ្រប់កំណត់រយៈពេល១២០នាទី ក្រុមអ្នកស្ម័គ្រចិត្តនឹងត្រូវបានស្កេនដោយប្រព័ន្ធ MRI ដើម្បីតាមដានការធ្វើការរបស់ខួរក្បាល ។ ពេលនោះ គេសង្កេតឃើញថា ការស្រូបយកផ្សែងម៉ាស៊ូតបានកាត់បន្ថយសមត្ថភាពធ្វើការរបស់ខួរក្បាល ។ ដូច្នេះ វាជាផ្នែកសំខាន់មួយដើម្បីវាស់ថា តើផ្នែកណាខ្លះនៃខួរក្បាលមានទំនាក់ទំនងគ្នា ?

ការស្រាវជ្រាវបានបង្ហាញដែរថា ខ្យល់ពុលនៅលើបរិយាកាស មិនត្រឹមតែធ្វើឱ្យប៉ះពាល់ដល់ប្រព័ន្ធសរសៃប្រសាទប៉ុណ្ណោះទេ ប៉ុន្តែវានឹងបង្កើតហានិភ័យឈានដល់ការស្លា.ប់ទៀតផង ។ ការលើកឡើងថា ការស្រូបយកផ្សែងប្រេងម៉ាស៊ូតអាចបំផ្លាញដល់ខួរក្បាលនោះ វាមិនមែនជាការរកឃើញថ្មីទេ ជាក់ស្តែង កាលពីឆ្នាំ២០០៨ អ្នកស្រាវជ្រាវជនជាតិហូឡង់បានតាមដានអ្នកស្ម័គ្រចិត្តចំនួន១០នាក់ ដោយភ្ជាប់ពួកគេនឹងម៉ាស៊ីនអេឡិចត្រូនិកផ្នែកខួរក្បាល ខណៈពួកគេបានស្រូបយកខ្យល់ពុល និងផ្សែងម៉ាស៊ូតរយៈពេល៣០នាទី ហើយសង្កេតឃើញថា ខួរក្បាលរបស់ពួកគេមានភាពតានតឹងកើនឡើង ៕ ប្រភព ៖ TNN Health

អាមេរិក៖ លោក Alex Spiro ដែលជាមេធាវីផ្ទាល់ខ្លួនរបស់ Elon Musk បានផ្ញើលិខិតមួយច្បាប់គំរាមយក Mark Zuckerberg ទៅកាន់តុលាការ បន្ទាប់ពី Meta ណែនាំ Threads ជាមួយនឹងមុខងារស្រដៀងគ្នាទៅនឹង Twitter ។លោក Alex Spiro បានចោទប្រកាន់ថា Meta បានប្រើប្រាស់ “អាថ៌កំបាំងពាណិជ្ជកម្ម និងកម្មសិទ្ធិបញ្ញារបស់ Twitter” ដើម្បីបង្កើត Threads ដោយជួល “អតីតបុគ្គលិក Twitter រាប់សិបនាក់ អោយបង្កើតឧបករណ៍អេឡិចត្រូនិច” នៃបណ្តាញសង្គមនេះដោយខុសច្បាប់។ ដូច្នេះប្រសិនបើលោក Mark Zuckerberg នៅតែបន្តដំណើរការវេទិការបស់គាត់ទៀត Twitter នឹងប្តឹងនៅតុលាការ។

គួររំលឹកដែរថា កាលពីឆ្នាំមុន លោក Elon Musk បានកាត់បន្ថយបុគ្គលិក Twitter អស់ជាច្រើននាក់ ដោយលោក Musk បាននិយាយកាលពីចុងឆ្នាំមុនថា “សុំទោសចំពោះការបណ្តេញចេញទេពកោសល្យដ៏ឆ្នើមរបស់ពួកគេ ប៉ុន្តែអ្នកទាំងអស់គ្នាពិតជាមានប្រយោជន៍យ៉ាងខ្លាំងនៅកន្លែងផ្សេងទៀត”។

ទោះជាយ៉ាងណាក៏ដោយ ថ្មីៗនេះអ្នកលេងបណ្តាញសង្គម Twitter បានបង្ហោះចែកចាយ Status របស់លោក Elon Musk ដែលបាននិយាយកាលពីថ្ងៃទី៦ ខែកក្កដា ថា “ការប្រកួតប្រជែងគឺល្អ ប៉ុន្តែការបោកប្រាស់មិនល្អទេ” ។ ជាមួយគ្នានោះដែរ លោក Mark Zuckerberg ក៏បានបង្ហោះរូបភាពនៅលើ Twitter ជាលើកដំបូងបន្ទាប់ពីលោកបានផ្អាកលេង Twitter អស់រយៈពេល ១១ ឆ្នាំ ដោយលោកបានបង្ហោះរូប Spider-Man ពីររូបដែលប្រឈមមុខគ្នា នឹងភ្ជាប់ Caption ថា “មិនដឹងអ្នកណាជា Spider-Man ពិតប្រាកដនោះទេ”។

គួរបញ្ជាក់ដែរថា បច្ចុប្បន្នកម្មវិធី Threats របស់ Meta មានអ្នកប្រើប្រាស់ជាង ៣០ លាននាក់ក្នុងរយៈពេល ២៤ ម៉ោង ដោយមានតារាល្បីៗ ជាច្រើនក៏បានបង្កើតគណនីនៅលើ Threads ដូចជាមហាសេដ្ឋី Bill Gates តារាសម្តែង Ellen DeGeneres តារាចម្រៀង Shakira Jennifer Lopez និងកំពូលតារារ៉េប Wiz Khalifa…ជាដើម៕ ប្រភព៖vnexpress