ប្រទេសឥណ្ឌា ៖ នៅខែកក្កដា ឆ្នាំ២០២៣ ហាង McDonald’s និងហាងលក់ម្ហូបអាហារជាច្រើនកន្លែងនៅប្រទេសឥណ្ឌាបានកាត់បន្ថយមុខម្ហូបដាក់ផ្លែប៉េងប៉ោះបណ្តោះអាសន្ន បន្ទាប់ពីតម្លៃប៉េងប៉ោះកើនឡើងខ្ពស់ជាបន្តបន្ទាប់នៅទូទាំងប្រទេស ។ រយៈពេលចុងក្រោយនេះ តម្លៃប៉េងប៉ោះបានកើនឡើងរហូតដល់១៤០រូពីក្នុង១គីឡូក្រាម ខណៈការលក់ដុំបានកើនឡើងដល់២៨៨% បើធៀបនឹងខែមិថុនា ។

ជាធម្មតា ប៉េងប៉ោះនៅឥណ្ឌានឹងមានតម្លៃកើនឡើងក្នុងអំឡុងពេលវាផ្តល់ទិន្នផលតិច គឺនៅខែមិថុនា និងខែកក្កដា ប៉ុន្តែផលប៉ះពាល់នៅឆ្នាំនេះចាត់ទុកថា ខ្លាំងក្លាយ៉ាងខ្លាំង ដោយសារអាកាសធាតុមិនអំណោយផលដល់ការដាំដុះ ខណៈខ្យល់មូសុងនៅឆ្នាំនេះមកយឺតជាងធម្មតា ។ ដូច្នេះ វាបណ្តាលឱ្យមានភ្លៀងធ្លាក់នៅចម្ការប៉េងប៉ោះមួយចំនួន ។ លើសពីនេះ សីតុណ្ហភាពកើនឡើងខុសធម្មតាកាលពីខែមិថុនា បានធ្វើឱ្យឥណ្ឌាប្រឈមនឹងបាតុភូត El Nino ឬអាកាសធាតុហួតហែង ។

តម្លៃប៉េងប៉ោះកើនឡើង គឺជាបញ្ហាថ្នាក់ជាតិនៅឥណ្ឌា ដោយសារប៉េងប៉ោះ និងខ្ទឹមបារាំង គឺជាបន្លែសំខាន់ក្នុងម្ហូបឥណ្ឌា ។ ដូច្នេះ តម្លៃបន្លែទាំងនេះកើនឡើងបានធ្វើឱ្យតម្លៃម្ហូបនៅឥណ្ឌា ក៏កើនឡើងតាមដែរ ។ ពលរដ្ឋឥណ្ឌាចាប់ផ្តើមមិនពេញចិត្តជាមួយរដ្ឋាភិបាល និងគណបក្សនយោបាយផ្សេងៗដែលនៅស្ងាត់ស្ងៀមមិនព្រមដោះស្រាយបញ្ហានេះ ។

សេចក្តីថ្លែងការណ៍របស់រដ្ឋាភិបាលបញ្ជាក់ថា តម្លៃប៉េងប៉ោះបានកើនឡើងជាបន្តបន្ទាប់ដោយសារបម្រែបម្រួលអាកាសធាតុ ដែលធ្វើឱ្យទិន្នផលកសិកម្មមិនសម្រេចតាមគោលដៅ ។ ដូចគ្នានេះ ភ្លៀងមូសុងក៏ធ្វើឱ្យប៉ះពាល់ដល់ការដឹកជញ្ជូន និងការលក់ដូរផងដែរ ។

ហាង McDonald’s នៅឥណ្ឌាបានបិទប្រកាសនៅមុខហាងថា៖ «ពួកយើងបានព្យាយាមអស់ពីសមត្ថភាពហើយ ប៉ុន្តែយើងមិនអាចស្វែងរកប៉េងប៉ោះមានគុណភាពល្អគ្រប់គ្រាន់ទេ ។ ដូច្នេះ ហាងយើងសូមផ្អាកលក់ម្ហូបផ្សំពីប៉េងប៉ោះបណ្តោះអាសន្នសិន» ។ ហាងលក់ម្ហូបនៅឥណ្ឌាពី១០% ទៅ១៥% បានប្រកាសស្រដៀងគ្នានេះដែរ ដោយសារពួកគេមិនអាចរកទិញប៉េងប៉ោះបាន ។

បច្ចុប្បន្ន កសិករដាំប៉េងប៉ោះកំពុងប្រឈមនឹងបញ្ហាអាកាសធាតុអាក្រក់ ហើយតម្លៃប៉េងប៉ោះកើនឡើងបានធ្វើឱ្យពួកគេប្រឈមនឹងបញ្ហាថ្មីមួយទៀត ។ លើសពីនេះ សារព័ត៌មានឥណ្ឌារាយការណ៍ថា ចោរបានលួចប៉េងប៉ោះរបស់កសិករនៅរដ្ឋ Karnataka ស្មើនឹងទឹកប្រាក់ប្រមាណ១៥ម៉ឺនរូពី ។

ទោះយ៉ាងណា តម្លៃប៉េងប៉ោះកើនឡើងមិនបានធ្វើឱ្យប៉ះពាល់ដល់មនុស្សគ្រប់គ្នាទេ ក្រុមហ៊ុនអាជីវកម្ម Tata នៅឥណ្ឌាបានឃោសនាតាមអនឡាញក្នុងកម្មវិធី BigBasket ដោយពួកគេណែនាំឱ្យពលរដ្ឋដែលកំពុងជួបបញ្ហាប៉េងប៉ោះឡើងថ្លៃ ងាកមកធ្វើម្ហូបដោយប្រើទឹកប៉េងប៉ោះខាប់ជំនួសវិញ ៕ ប្រភព ៖ beartai BRIEF

បរទេស៖ ក្រុមអ្នកបុរាណវិទ្យាបានរកឃើញទីក្រុងបុរាណមួយ Ulastret ដែលធ្លាប់មានអ្នករស់នៅរហូតដល់ ៦,០០០ នាក់។
យោងតាមប្រភពព័ត៌មាន Newsweek កាលពីថ្ងៃទី ៧ ខែកក្កដា បានឱ្យដឹងថា ទីក្រុង Ulastret មានអាយុកាលជាង ២,០០០ ឆ្នាំមុន នៃសតវត្សទី ២ មុនគ្រឹស្តសករាជ ហើយត្រូវបានគេបោះបង់ចោលនៅសតវត្សទី ៦ មុនគ្រឹស្តសករាជ។ ថ្មីៗនេះ ក្រុមអ្នកបុរាណវិទ្យា ក៏បានរកឃើញច្រកទ្វារដ៏ធំដែលជាបឹងរីងស្ងួតជាង ១០០ ឆ្នាំមុននៅក្នុងប្រទេសអេស្ប៉ាញ។

ក្រុមអ្នកបុរាណវិទ្យា Catalonia បាននិយាយថា ច្រកចូលនៃទីក្រុងនេះមានផ្លូវស្របគ្នា ដែលនីមួយៗមានទទឹង ២.៣ ម៉ែត្រ សាងសង់ពីដុំថ្មធំៗដែលកែច្នៃយ៉ាងល្អ រៀបចំកាត់កែងទៅនឹងជញ្ជាំងជុំវិញតំបន់ខាងលិចនៃទីក្រុង។ ជញ្ជាំងទាំងនេះរត់ជុំវិញច្រករបៀងទទឹង ៤ ម៉ែត្រ ដែលបម្រើជាចំណុចចាប់ផ្តើមនៃផ្លូវសំខាន់ៗរបស់ទីក្រុង។
ទីក្រុងបុរាណនេះត្រូវបានសាងសង់ដោយកុលសម្ព័ន្ធ Indigete និងជាទីក្រុងធំបំផុតនៅ Catalonia នាពេលនោះ។ អ្នកជំនាញក៏បានរកឃើញ ផ្ទះសម្បែង ហាងលក់គ្រាប់ធញ្ញជាតិ និងប្រាសាទនានា នៅជុំវិញទីក្រុងនោះផងដែរ។

ដូចនេះយោងតាមអ្នកជំនាញ បានឱ្យដឹងថា មូលហេតុដែលប្រជាជនទាំង ៦ពាន់នាក់ ចាកចេញពីទីក្រុងនេះគឺដោយសារសង្គ្រាម។ ទោះជាយ៉ាងណាក៏ដោយ ក្រុមអ្នកបុរាណ វិទូសង្ឃឹមថានឹងបន្តការសិក្សាបន្ថែមទៀតដើម្បីស្វែងយល់អំពីជីវិតរស់នៅរបស់មនុស្សនាសម័យនោះ៕ ប្រភព៖vnexpress

ប្រទេសវៀតណាម ៖ អង្គការមូលនិធិរូបិយវត្ថុអន្តរជាតិ (IMF) លើកឡើងថា សេដ្ឋកិច្ចវៀតណាមនឹងត្រឡប់ទៅរកអត្រាកំណើនខ្ពស់ក្នុងរយៈពេលមធ្យម ដោយសារកំណែទម្រង់រចនាសម្ព័ន្ធផ្សេងៗ ។ គេរំពឹងថា ការរីកលូតលាស់ផ្នែកសេដ្ឋកិច្ចវៀតណាមនឹងងើបឡើងវិញនៅឆមាសទី២ ឆ្នាំ២០២៣ ស្មើនឹងអត្រា៤,៧% ។ ការងើបឡើងវិញនេះ ដោយសារការនាំចេញងើបឡើងវិញ និងការកំណត់គោលនយោបាយក្នុងប្រទេស ខណៈអតិផរណានឹងស្ថិតក្រោមការកំណត់របស់ធនាគារកណ្តាល ដែលស្មើប្រមាណ៤,៥% ។

ចំណែកសេដ្ឋកិច្ចពិភពលោក អង្គការមូលនិធិរូបិយវត្ថុអន្តរជាតិប៉ាន់ស្មានថា នឹងប្រឈមជាមួយស្ថានការណ៍លំបាកផ្សេងៗនៅឆ្នាំ២០២៤ ហើយសេដ្ឋកិច្ចពិភពលោកនឹងងើបឡើងវិញនៅឆ្នាំ២០២៥ ។ វិធានការនានាដែលធនាគារកណ្តាល និងរដ្ឋាភិបាលបានយកមកប្រើប្រាស់ រួមមាន ការកាត់បន្ថយអត្រាការប្រាក់, ការកាត់បន្ថយពន្ធ, ការវិនិយោគផ្នែករដ្ឋ និងបន្ថែមការចំណាយ ។ ដូច្នេះ វានឹងជួយកាត់បន្ថយផលប៉ះពាល់របស់ឧបសគ្គផ្សេងៗនៅក្នុងប្រទេសវៀតណាម និងក្រៅប្រទេស ។

ក្រៅពីនេះ អង្គការមូលនិធិរូបិយវត្ថុអន្តរជាតិបញ្ជាក់ថា រដ្ឋាភិបាលវៀតណាមត្រូវតែរក្សាការព្យាយាមធ្វើកំណែទម្រង់រយៈពេលមធ្យម ដើម្បីសម្រេចបានគោលដៅរយៈពេលមធ្យម និងរយៈពេលវែង ព្រមទាំងក្លាយជាប្រទេសអភិវឌ្ឍន៍នៅឆ្នាំ២០៤៥ ។ លើសពីនេះ ប្រទេសវៀតណាមត្រូវធានាថា ការបំភាយឧស្ម័នផ្ទះកញ្ចក់នឹងធ្លាក់ចុះក្នុងកម្រិតទាបបំផុតនៅឆ្នាំ២០២៥ ។

ទោះយ៉ាងណា បរិយាកាសការប្រកបអាជីវកម្មនៅវៀតណាមក៏ត្រូវកែទម្រង់ផងដែរ ដោយកែលម្អលើដំណើរការគ្រប់គ្រង, ការបង្កើតលក្ខខណ្ឌអំណោយផលដល់ការអភិវឌ្ឍផ្សេងៗ, ការវិនិយោគផ្នែកហេដ្ឋារចនាសម្ព័ន្ធដើម្បីធានាថាមពលកកើតឡើងវិញក្នុងរយៈពេលចាប់ពី៥ឆ្នាំ ទៅ១០ឆ្នាំ, វិនិយោគទុនក្នុងការអប់រំ និងការបណ្តុះបណ្តាលបច្ចេកវិទ្យាផងដែរ ៕ ប្រភព ៖ AEC connect

ប្រទេសចិន ៖ កាលពីថ្ងៃទី៦ ខែកក្កដា កន្លងមក ក្រុមហ៊ុនថ្មីរបស់ចិនបានបង្ហាញមនុស្សយន្ត Humanoid ក្នុងពិធីប្រជុំមួយស្តីពីបញ្ញាសិប្បនិម្មិតពិភពលោក ប្រចាំឆ្នាំ២០២៣ នៅទីក្រុងសៀងហៃ ។ ក្រុមហ៊ុនផលិតមនុស្សយន្តលើកឡើងថា វាមានភាពស្រដៀងគ្នានឹងមនុស្សយើងដែរ និងអាចប្រើប្រាស់ក្នុងផ្នែកឧស្សាហកម្មទៀតផង ។

មនុស្សយន្ត Humanoid GR-1 មានកម្ពស់១,៦៥ម៉ែត្រ និងមានទម្ងន់៥៥គីឡូក្រាម ។ វាអាចដើរដោយជើងទាំងពីរក្នុងចម្ងាយផ្លូវ៥គីឡូម៉ែត្រក្នុង១ម៉ោង និងអាចគេចពីវត្ថុនៅបាំងផ្លូវ ព្រមទាំងធ្វើដំណើរឡើង-ចុះប្រកបដោយសុវត្ថិភាព ។ វាអាចគ្រប់គ្រងចលនាដូចមនុស្ស និងលើកវត្ថុផ្សេងៗក្នុងទម្ងន់រហូតដល់៥០គីឡូក្រាម ។

ក្រៅពីនេះ មនុស្សយន្ត GR-1 ក៏អាចមានទំនាក់ទំនងជាមួយមនុស្សផងដែរ ខណៈពេលវាផ្លាស់ទី និងអាចធ្វើការផ្សេងៗទៀតផង ដោយសារគេបំពាក់នូវឧបករណ៍ឆ្លាតវៃ ដែលស្រដៀងគ្នានឹងកម្មវិធី ChatGPT ។ លើសពីនេះ គេក៏អាចយកវាទៅប្រើប្រាស់ក្នុងផ្នែកជាច្រើនដូចជា ផលិតកម្មឧស្សាហកម្ម, ការថែទាំសង្គ្រោះ, ការស្រាវជ្រាវផ្នែកវិទ្យាសាស្ត្រ និងសេវាកម្មក្នុងផ្ទះបាយជាដើម ។

Gu Jia ជាអ្នកផលិត និងប្រធានក្រុមហ៊ុន Fourierintelligence បានលើកឡើងថា ការផលិតមនុស្សយន្តលើកនេះ វាដូចគ្នានឹងការផ្លាស់ប្តូរពីកុំព្យូទ័រនៅលើតុ ទៅជាថេបប្លេតសម្រាប់ប្រើប្រាស់ផ្ទាល់ខ្លួន និងទូរស័ព្ទស្មាតហ្វូន ។ គេអាចយកមនុស្សយន្តនេះទៅប្រើប្រាស់ក្នុងការងារជាច្រើន ហើយវានឹងក្លាយជាផ្នែកសំខាន់ក្នុងឧស្សាហកម្មនាថ្ងៃអនាគត ៕ ប្រភព ៖ Thai PBS Sci & Tech

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃដិន បានផ្តល់សម្ភាសន៍ជាមួយសារព័ត៌មាន CNN ថា ចាប់តាំងពីប្រទេសរុស្ស៊ីបានវាយលុកអ៊ុយក្រែនមក ក្រុមហ៊ុនអាមេរិកបានដកខ្លួនចេញពីរុស្ស៊ីចំនួន៦០០ទីតាំង ហើយប្រធានាធិបតីចិន លោក ស៊ី ជិនពីង បានថ្លែងមកកាន់លោកថា សេដ្ឋកិច្ចចិនបានពឹងផ្អែកលើការវិនិយោគពីតំបន់អឺរ៉ុប និងអាមេរិក ។ លោក ចូ បៃដិន បានឆ្លើយតបទៅវិញថា ចិនត្រូវប្រុងប្រយ័ត្ន ប៉ុន្តែលោក ចូ បៃដិន បញ្ជាក់ថា នេះមិនមែនជាការគំរាមទេ វាគ្រាន់តែជាការសង្កេតប៉ុណ្ណោះ ។

នៅពេលសារព័ត៌មាន CNN សួរថា តើអាកប្បកិរិយារបស់ប្រធានាធិបតីចិន លោក ស៊ី ជិនពីង បែបណាដែរ ? ប្រធានាធិបតីអាមេរិក លោក ចូ បៃដិន ឆ្លើយតបថា មេដឹកនាំចិនព្រមទទួលស្តាល់ ហើយមិនបានប្រកែកអ្វីទេ ។ លោក ចូ បៃដិន បន្តថា លោក ស៊ី ជិនពីង មិនបានបង្កើតទំនាក់ទំនងពេញលេញជាមួយរុស្ស៊ីទេ ។ ដូច្នេះ លោកគិតថា នឹងមានផ្លូវដោះស្រាយរឿងនេះ ។

ការផ្តល់បទសម្ភាសន៍របស់មេដឹកនាំអាមេរិកលើកនេះ ក្រោយពីលោក ស៊ី ជិនពីង បានពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀ ពូទីន ចំនួន២លើក ចាប់តាំងពីខែមីនា ឆ្នាំ២០២៣ ហើយបានពិភាក្សាគ្នាលើកចុងក្រោយក្នុងកិច្ចប្រជុំពីចម្ងាយ នៅដើមខែកក្កដា ឆ្នាំ២០២៣ ។ ក្នុងការពិភាក្សាគ្នារវាងមេដឹកនាំចិន និងរុស្ស៊ី នៅខែមីនា កន្លងមក មេដឹកនាំទាំងពីររូបបានបង្កើតទំនាក់ទំនងមិត្តភាពដ៏កក់ក្តៅរវាងប្រទេសទាំងពីរ និងរួមគ្នារិះគន់ប្រទេសលោកខាងលិច ប៉ុន្តែមេដឹកនាំទាំងពីររូបមិនបានលើកឡើងពីជម្លោះនៅអ៊ុយក្រែនទេ ។

ចំណែកទំនាក់ទំនងរវាងចិន និងអាមេរិកកាន់តែមានភាពតានតឹង ដោយសារមានជម្លោះលើបញ្ហាសន្តិសុខជាតិជាច្រើន ដូចជា បញ្ហាតៃវ៉ាន់ និងការឈ្លានពានរបស់រុស្ស៊ីនៅអ៊ុយក្រែន ហើយអាមេរិកបង្កើនការហាមឃាត់នាំចេញផលិតផលបច្ចេកវិទ្យាខ្ពស់ទៅចិន ។

សហរដ្ឋអាមេរិកបានបញ្ជូន លោកស្រី Janet Yellen រដ្ឋមន្ត្រីហិរញ្ញវត្ថុ ទៅកាន់ប្រទេសចិនចំនួន៤ថ្ងៃ គឺចាប់ពីថ្ងៃទី៦ ដល់ថ្ងៃទី៩ ខែកក្កដា ឆ្នាំ២០២៣ ដោយសង្ឃឹមថា នឹងអាចកាត់បន្ថយការប្រេះឆារវាងប្រទេសទាំងពីរ៕ ប្រភព ៖ TNN World