នាបច្ចុប្បន្ននេះ បណ្តាប្រទេសនៅលើលោកកំពុងស្ថិតនៅឆ្នាំ២០២៣ ក៏ប៉ុន្តែនៅកូរ៉េខាងជើងទើបតែស្ថិតនៅឆ្នាំ១១២ តែប៉ុណ្ណោះ។
អ្វីដែលជំរុញឱ្យប្រទេសកូរ៉េខាងជើង ស្ថិតនៅឆ្នាំខុសពីបណ្តាប្រទេសដ៏ទៃ ក៏ព្រោះតែប្រទេសនេះ មានប្រតិទិនផ្ទាល់ខ្លួនរបស់ពួកគេ ដែលមានឈ្មោះថា JUCHE CALENDAR។
JUCHE CALENDAR គឺជាប្រតិទិន ដែលត្រូវបានបង្កើតឡើងនៅឆ្នាំ១៩១២ ជាឆ្នាំកំណើតរបស់ Kim Il Sung ដែលជាស្ថាបនិក និងជាប្រធានាធិបតីដ៏ខ្លាំងក្លារបស់កូរ៉េខាងជើង។
លុះដល់ថ្ងៃទី៩ខែកញ្ញា ឆ្នាំ១៩៩៧ ប្រតិទិន Juche ត្រូវបានប្រើប្រាស់ជាផ្លូវការនៅទូទាំងសង្គមកូរ៉េខាងជើង ដោយប្រជាជនដែលបានកើតមុនឆ្នាំ១៩៩៧ តម្រូវឱ្យផ្លាស់ប្តូរសំបុត្រកំណើត ដោយប្តូរមកប្រើឆ្នាំតាមប្រតិទិន Jucheវិញ។
ជាក់ស្តែងប្រសិនបើលោកអ្នកកើតនៅកូរ៉េខាងជើង ថ្ងៃទី១០ ខែកក្កដា ឆ្នាំ២០២៣ លោកអ្នកនឹងត្រូវសរសេរថាថ្ងៃទី១០ ខែកក្កដា ឆ្នាំ១១២។
សូមជម្រាបថា ឈ្មោះនៃប្រតិទិន Juche គឺបានមកពីមនោគមវិជ្ជានៃរដ្ឋ ‘Juche’ ស្ថិតនៅប្រទេសកូរ៉េខាងជើង ដែលបកថា៖”ការពឹងផ្អែកលើខ្លួនឯង” ដែលត្រូវបានបង្កើតឡើងដោយលោក Kim Il Sung ខ្លួនឯងតែម្តង និងកំពុងតែអនុវត្តន៍មកដល់សព្វថ្ងៃនេះ៕
ប្រភព៖ uritours