ប្រាសាទទទឹងថ្ងៃ ជាប្រាសាទមួយដែលកសាងឡើងនៅសតវត្សរ៍ទី១០ សាងឡើងអំពីថ្មភក់និងឥដ្ឋ ប៉ុន្តែបច្ចុប្បន្ននេះបានបាក់បែកស្ទើរទាំងស្រុង ដោយគេឃើញមាននៅសល់តែតួទ្វារប្រាង្គប្រាសាទប៉ុណ្ណោះ។

ប្រាសាទនេះអាចថាខុសប្លែកពីប្រាសាទដទៃនៅខេត្តសៀមរាប ដែលសម្បូរដើមឈើ តែនៅទីនេះបែរជាសំបូរដោយដើមឫស្សីទៅវិញ។  ប្រាសាទនេះមានទីតាំងស្ថិតនៅក្នុងភូមិគោកស្រុក ឃុំរលួស ស្រុកប្រាសាទបាគង ខេត្តសៀមរាប មានចម្ងាយប្រហែល ១៦គីឡូម៉ែត្រ ពីរង្វង់មូលនាគព័ន្ធ។

ទេសភាពដើម​ឫស្សី ហ៊ុមព័ទ្ធជុំវិញប្រាសាទ បង្កើតបានជាផ្ទាំងទស្សនីយភាពដ៏ស្រស់ត្រកាល អមជាមួយសំឡេងខ្យល់បក់រវិចៗ ធ្វើឱ្យយើងមានអារម្មណ៍ថា ប្រៀបបានជាកំពុងរស់នៅសម័យមហានគរដូច្នេះ។

គិតមកទល់ពេលនេះ ប្រាសាទនេះ ត្រូវបានក្សត្រខ្មែរបោះបង់ចោលនូវប្រាសាទនេះ ជាង ១០ ស.វ ដោយសារតែគ្រានោះមានសង្គ្រាមផ្ទៃក្នុង និងសង្គ្រាមឈ្លានពានពីប្រទេសជិតខាង។

ដោយហេតុថាប្រាសាទដ៏ស្រស់ស្អាតនេះត្រូវបានគេបោះបង់ចោលអស់រយៈពេលជាយូរមក និងមានការបែងបាក់ប្រាង្គប្រាសាទស្ទើរតែស្រុងផងនោះ ធ្វើឱ្យបុរាណវិទូមិនអាចកំណត់អត្តសញ្ញាណក្សត្រខ្មែរអង្គណា ដែលជាអ្នកកសាងនោះទេ។

គួរឱ្យសោកស្ដាយដែលប្រាសាទនេះមិនសូវមានភ្ញៀវទេសចរទៅដល់ទាំងទេសចរជាតិ និងអន្តរជាតិ ដោយសារតែទីតាំងឆ្ងាយពីប្រាសាទបាគង ឬដោយសារតែផ្លូវចូលបត់បែនចុះឡើងច្រើន ពិបាកក្នុងការស្វែងរក៕

ចាប់ពីថ្ងៃទី៩-១៥ ខែសីហា ឆ្នាំ២០២៣ កម្ពុជាអាចមានភ្លៀងធ្លាក់លាយឡំដោយខ្យល់កន្រ្តាក់កម្រិតខ្សោយទៅមធ្យមពេញមួយសប្តាហ៍ដោយសារទទួលឥទ្ធិពលខ្សោយពីជ្រលងសម្ពាធទាប។ នៅថ្ងៃទី១២ ខែសីហា ទទួលឥទ្ធិពល ខ្សោយពីប្រព័ន្ធសម្ពាធទាបអូសបន្លាយលើភាគខាងជើងប្រទេសមីយ៉ាន់ម៉ា ឡាវ និងប្រទេសវៀតណាមជាមួយខ្យល់មូសុងនិរតីមធ្យម។ នេះបើតាមការជូនដំណឹងពីក្រសួងធនធានទឹក និងឧត្តុនិយម ថ្ងៃទី៨ សីហា ។

លក្ខខណ្ឌទាំងនេះនឹងធ្វើឱ្យតំបន់ទំនាបកណ្តាល មានសីតុណ្ហភាពអប្បបរមាពី ២៤-២៦ °C និង សីតុណ្ហភាពអតិបរមាមានពី ៣០-៣២ °C។ អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់កម្រិតខ្សោយ។

ចំណែកឯ តំបន់ខ្ពង់រាប សីតុណ្ហភាពអប្បបរមា មានពី ២៣-២៥ °C និងសីតុណ្ហភាពអតិបរមា មានពី ៣៣-៣៦ °C អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់កម្រិតខ្សោយ។

សម្រាប់ តំបន់មាត់សមុទ្រ វិញសីតុណ្ហភាពអប្បបរមា មានពី ២៤-២៦ °C សីតុណ្ហភាពអតិបរមា មានពី ៣០-៣២ °C អាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់កម្រិតមធ្យម៕

ទីបំផុតការប្រតិកម្មពីមហាជនទៅលើតារាកំប្លែងនិងជាYoutuber ល្បីឈ្មោះលោក Nigel Ng ហៅ Uncle Roger ដែលបាននិយាយប៉ះពាល់មកលើម្ហូបខ្មែរនាំឱ្យជនបរទេសយល់ខុសមកលើម្ហូបអាហារកម្ពុជាមានប្រសិទ្ធភាពហើយ ខណៈក្រសួងទេសចរណ៍បានចេញសេចក្តីថ្លែងការណ៍ឱ្យបុគ្គលរូបនេះចេញមកសូមទោសប្រជាជនកម្ពុជានិងកែតម្រូវ វីដេអូដែលបានចុះផ្សាយនោះឡើងវិញជាបន្ទាន់នៅលើបណ្តាញសង្គមរបស់ខ្លួន។ ក្រសួងបានបញ្ជាក់ថាការវាយតម្លៃរបស់បុគ្គលរូបនេះប្រាសចាកទាំងស្រុងពីតថភាពនៃកិត្យានុភាព និងអត្តសញ្ញាណ ម្ហូបអាហារខ្មែរ។

សេចក្តីថ្លែងការណ៍នៅថ្ងៃទី៧ ខែសីហា របស់ក្រសួងទេសចរណ៍បានឱ្យដឹងថា «សូមជម្រាបជូនភ្ញៀវទេសចរជាតិ និងអន្តរជាតិ ផ្នែកឯកជនក្នុងឧស្សាហកម្មទេសចរណ៍ និងសាធារណជនទូទៅមេត្តាជ្រាបថាក្រសួងទេសចរណ៍មានការសោកស្តាយជាយ៉ាងខ្លាំងក្រោយពីបានឃើញ វីដេអូដែលវាយតម្លៃមិនល្អមកលើម្ហូបអាហារខ្មែរ នៅលើបណ្ដាញសង្គម Channel YouTube ឈ្មោះថា Nigel Ng (ណៃជែល អ៊ឹង )ចុះផ្សាយកាលពីថ្ងៃទី៣០ ខែកក្កដា ឆ្នាំ២០២៣ មានចំណងជើងថា “Uncle Roger Make Adobo”។

ការវាយតម្លៃរបស់បុគ្គលខាងលើនេះ បានប្រាសចាកទាំងស្រុងពីតថភាពនៃកិត្យានុភាព និងអត្តសញ្ញាណ ម្ហូបអាហារខ្មែរ ជាពិសេសបានធ្វើឱ្យប៉ះពាល់យ៉ាងខ្លាំងដល់ទេសចរណ៍ម្ហូបអាហារ ដែលរាជរដ្ឋាភិបាលកម្ពុជា ក៏ដូចជា ក្រសួងទេសចរណ៍ បានខិតខំជំរុញការផ្សព្វផ្សាយនៅលើឆាកអន្តរជាតិឱ្យពិភពលោកទាំងមូលបានស្គាល់ យ៉ាងទូលំទូលាយថា “កម្ពុជាមានវប្បធម៌ដ៏ល្អផូរផង់ និងមានម្ហូបអាហារដ៏សម្បូរបែប”។ ជាក់ស្ដែង កាលពីឆ្នាំ២០២២ សៀវភៅម្ហូបអាហារខ្មែរ រ “The Taste of Angkor” ដែលចងក្រងដោយក្រសួងការបរទេស និងសហប្រតិបត្តិការអន្តរជាតិកម្ពុជា បានជាប់ចំណាត់ថ្នាក់ The Best Asian Cookbook Prize នៅក្នុងកម្មវិធី The Gourmand World Cookbook Awards 2021 នៅទីក្រុងប៉ារីស។

ក្នុងន័យនេះ ក្រសួងទេសចរណ៍ កំពុងសហការជាមួយភាគីពាក់ព័ន្ធយ៉ាងជិតស្និទ្ឋ និងស្នើឱ្យបុគ្គល Nigel Ng ឬ Uncle Roger កើតថ្ងៃទី១៥ ខែមីនា ឆ្នាំ១៩៩១ ធ្វើការសុំទោសជាសាធារណៈចំពោះប្រជាជនកម្ពុជា និងកែតម្រូវ វីដេអូដែលបានចុះផ្សាយនោះឡើងវិញជាបន្ទាន់នៅលើបណ្តាញសង្គមរបស់ខ្លួន។

ជាមួយគ្នានេះដែរ ក្រសួងទេសចរណ៍ បានថ្លែងអំណរគុណចំពោះការចូលរួមផ្ដល់យោបល់កែលម្អរបស់សាធារណជន ដើម្បីលើកស្ទួយវិស័យទេសចរណ៍ជាតិ ក៏ដូចជាគាំទ្រ និងស្វាគមន៍ជានិច្ចចំពោះអ្នកលេងបណ្តាញសង្គម ឬ អ្នកមានឥទ្ឋិពលក្នុងបណ្ដាញសង្គម (Influencer) ដែលមានបំណងចូលរួមផ្សព្វផ្សាយអំពីអច្ឆរិយភាពនៃវប្បធម៌ ធម្មជាតិ និងភាពសម្បូរបែបនៃម្ហូបអាហារកម្ពុជា ដល់ទេសចរជាតិ-អន្តរជាតិជុំវិញពិភពលោក៕

កុមារី ជូរី ល្អហួស បានក្លាយជាម្ចាស់មកុដបវរកញ្ញាវ័យក្មេង Miss Preteen Cambodia ២០២៣ ដែលមានការពេញចិត្តយ៉ាងភ្លូកទឹកភ្លូកដីពីមហាជនចំពោះលទ្ធផលនេះ ខណៈ ល្អហួស បានជ្រើសប្រធានបទយ៉ាងចាក់ដោតពីការបៀតបៀននិងរំលោភកេរ្តិ៍ភេទលើកុមារ ដែលជំរុញឱ្យកុមារីអាយុ១៤ឆ្នាំរូបនេះគ្រងមកុដ ហើយនឹងតំណាងប្រទេសកម្ពុជាចូលរួមប្រកួតលើឆាកអន្តរជាតិ។

នៅយប់ថ្ងៃទី៥ សីហា កម្មវិធីប្រកួតប្រជែង Miss Preteen Cambodia ២០២៣ បានរកឃើញម្ចាស់មកុដហើយគឺបានទៅលើ ជូរី ល្អហួស ខណៈលំដាប់រងទី១បានទៅលើ ហ្រេ្វតឌ្រីកសន អេរីកាស្កាយ និងលំដាប់រងទី២បានទៅលើ សាន សំរិទ្ធិកណ្ណិកា។

អ្វីដែលកាន់តែធ្វើឱ្យមហាជនពេញចិត្តពេញថ្លើមចំពោះ ល្អហួស ដែលស័ក្តិសមជាម្ចាស់មកុដឆ្នាំ២០២៣ ដោយសារតែកុមារីដ៏ស្រស់ស្អាតរូបនេះបានសម្រេចជ្រើសយកប្រធាន «ការបៀតបៀននិងរំលោ.ភកេរ្តិ៍ភេ.ទលើកុមារ»។ ល្អហួស បានលើកឡើងថា អំពើបៀតបៀននិងការរំលោភបំពានលើកុមារជាអំពើសាហាវ ឃោរឃៅបំផុត ការបៀតបៀនគឺជាការបន្លំបំបោសអង្អែលទៅលើកុមារ ចំណែកឯការរំលោភបំពានគឺជាការបង្ខំឱ្យកុមារទៅរួមដំណេកជាមួយ រាល់ទង្វើបៀតបៀននិងការរំលោ.ភបំពានឃើញកើតមានទៅលើឪពុករំលោភកូនស្រីខ្លួនឯង ឪពុកចុងរំលោភកូនដើម ពូរំលោភក្មួយ តារំលោភចៅ និងអ្នកជិតខាងរំលោភក្មេងស្រីប្រសិនបើជាមានឱកាស។

ល្អហួស បានលើកឡើងទៀតថា អំឡុងពេលខ្លួនទៅទស្សនៈកិច្ចអង្គការAfesipដែលមានជនរងគ្រោះជាកុមារបានរងនូវអំពើបៀតបៀន។ អ្វីដែលធ្វើឱ្យ ល្អហួស មិនអាចទទួលយកបានគឺសូម្បីតែទារិកាអាយុ១៤ខែក៏រងគ្រោះអំពីការរំលោភបំពានដែរ ហើយទង្វើនេះជាស្រមោលដ៏អាក្រក់ដែលជនរងគ្រោះនៅតែដក់ជាប់នៅក្នុងអារម្មណ៍មានសម្ពាធទាំងផ្លូវកាយនិងផ្លូវចិត្ត។

មិនត្រឹមតែប៉ុណ្ណោះ ល្អហួស ក៏បានពាំនាំសម្តីក្មេងស្រីម្នាក់នៅក្នុងមណ្ឌលទាំងសម្តីក្តុកក្តួលថា សូមកុំឱ្យមជ្ឃដ្ឋានជុំវិញខ្លួនកុំមានការរើសអើងទៅលើគេអី ហើយក៏មិនចង់ឃើញឪពុករបស់ខ្លួនបំផ្លាញព្រហ្មចារីកូនខ្លួនឯងហើយជាប់ពន្ធនាគារនោះទេ ហើយគេពិតជាចង់បានគ្រួសារមួយដែលមានភាពកក់ក្តៅដូចជាគ្រួសារគេដទៃទៀត។

ការលើកយកប្រធានបទដ៏ចាក់ដោតនេះមកនិយាយក្នុងកម្មវិធី ល្អហួស ទទួលបានការកោតសរសើរយ៉ាងខ្លាំងពីសំណាក់មហាជន ខណៈគ្រាប់ពេជ្រថ្មីរូបនេះនឹងតំណាងប្រទេសកម្ពុជាចូលរួមប្រកួតនៅលើឆាកអន្តរជាតិនាពេលខាងមុខផងដែរ៕