ប្រទេសថៃ ៖ កាលពីចុងខែមេសា ឆ្នាំ២០២៣ គេហទំព័រសម្រាប់ការធ្វើដំណើរឈ្មោះ The Boutique Adventurer បានចាត់ចំណាត់ថ្នាក់អាកាសយានដ្ឋានមានគ្រោះថ្នាក់បំផុតនៅលើពិភពលោក ក្នុងចំណោមនោះអាកាសយានដ្ឋានដនមឿង ប្រទេសថៃ ក៏បានជាប់ចំណាត់ថ្នាក់ជាអាកាសយានដ្ឋានមានគ្រោះថ្នាក់ផងដែរ ។

អាកាសយានដ្ឋានមានគ្រោះថ្នាក់ទាំងនេះស្ថិតនៅក្នុងប្រទេសកំពុងអភិវឌ្ឍន៍ និងប្រទេសបានអភិវឌ្ឍន៍រួចហើយ ដូចជា សហរដ្ឋអាមេរិក បារាំង ជប៉ុន និងន័រវេស ។ មូលហេតុ និងការចាត់ចំណាត់ថ្នាក់គ្រោះថ្នាក់របស់អាកាសយានដ្ឋាន គឺគេបានបែងចែកតាមប្រភេទដូចជា កម្ពស់ ប្រវែងផ្លូវរត់ ទីតាំងផ្លូវរត់ និងកត្តាផ្សេងៗដូចជា សង្គម ស្ថានការណ៍នយោបាយ និងហេតុការណ៍ចលាចល ។

អាកាសយានដ្ឋានមានគ្រោះថ្នាក់លំដាប់ទី១ គឺអាកាសយានដ្ឋានអន្តរជាតិ Kansai នៅប្រទេសជប៉ុន ពីព្រោះទីតាំងរបស់វាប្រឈមនឹងកើតគ្រោះធម្មជាតិ ជាពិសេស រញ្ជួយដី និងមានខ្យល់ព្យុះញឹកញាប់ជារៀងរាល់ឆ្នាំ ។ ចំណែកមូលហេតុចម្បងដែលធ្វើឱ្យអាកាសយានដ្ឋានដនមឿងរបស់ថៃ មានគ្រោះថ្នាក់បំផុតលើពិភពលោកដែរនោះ ដោយសារទីតាំង Runway របស់អាកាសយានដ្ឋាននេះអមដោយទីលានវាយកូនហ្គោល ដែលធ្វើឱ្យគ្មានសុវត្ថិភាព ។ ក្រៅពីនេះ ភ្នាក់ងារអាកាសចរណ៍ស៊ីវិលអន្តរជាតិ (ICAO) បានដាក់ទង់ក្រហមថា អាកាសចរណ៍ស៊ីវិលថៃគ្មានសុវត្ថិភាព និងគ្មានស្តង់ដារ មុនពេលដកទង់ក្រហមចេញវិញនៅឆ្នាំ២០២០ ។

អាកាសយានដ្ឋានមានគ្រោះថ្នាក់បំផុតនៅលើពិភពលោក រួមមាន ៖
1. អាកាសយានដ្ឋានអន្តរជាតិ Kansai ប្រទេសជប៉ុន
2. អាកាសយានដ្ឋាន Barra International Airport (ប្រទេសស្កុតឡេន)
3. Wellington International Airport (ប្រទេសនូវែលសេឡង់)
4. Princess Juliana International Airport (Saint Martin)
5. Lukla Airport (ប្រទេសនេប៉ាល់)
6. Paro Airport (ប្រទេសប៊ូតាន)
7. Santos Dumont Airport (ប្រទេសប្រេស៊ីល)
8. McMurdo Station (Antarctica)
9. Svalbard Airport (ប្រទេសន័រវេស)
10. Gustaf III Airport (ប្រទេសការ៉ាប៊ីន)
11. Saba Airport (Dutch Caribbean)
12. Gisborne Airport (New Zealand)
13. Madeira Airport (Portugal)
14. Narsarsuaq Airport (Greenland)
15. Gibraltar International Airport (Gibraltar)
16. San Diego International Airport (California, USA)
17. Toncontín International Airport (Honduras)
18. Aspen/Pitkin County Airport (Colorado, USA)
19. Alejandro Velasco Astete Cusco International Airport (Peru)
20. Kai Tak Airport (Hong Kong)
21. Agatti Aerodrome/Airport (India)
22. Cleveland Hopkins International (Cleveland, USA)
23. Telluride Regional Airport (Colorado, USA)
24. Congonhas-São Paulo Airport (Brazil)
25. Courchevel Airport (France)
26. Don Mueang International Airport (Thailand)
27. Tioman Island Airport (Malaysia)
28. Shimla Airport (India)
29. Damascus International Airport (Syria)

គួរបញ្ជាក់ថា អាកាសយានដ្ឋានដនមឿង (Don Mueang International Airport) មានឈ្មោះដើមហៅថា អាកាសយានដ្ឋានក្រុងថេប ដែលបានដំណើរការជាលើកដំបូង នៅថ្ងៃទី២៧ ខែមីនា ឆ្នាំ១៩១៤ ។ ក្រោយមក អាកាសយានដ្ឋាននេះបានផ្អាកជាបណ្តោះអាសន្ននៅឆ្នាំ២០០៦ ហើយផ្លាស់ប្តូរជាកន្លែងជួសជុលយន្តហោះ បណ្តុះបណ្តាលការហោះហើរ និងជាចំណតយន្តហោះផ្ទាល់ខ្លួនរបស់បុគ្គលសំខាន់ ។ អាកាសយានដ្ឋាននេះបានបើកដំណើរការឡើងវិញនៅឆ្នាំ២០១២ ដែលធ្វើឱ្យអាកាសយានដ្ឋានដនមឿងមានអាយុកាលចាស់បំផុតនៅអាស៊ី និងលើពិភពលោក ហើយនៅតែដំណើរការរហូតមកដល់ពេលបច្ចុប្បន្ន ៕ ប្រភព ៖ khaochaobaan

ប្រទេសថៃ ៖ កាលពីថ្ងៃទី២៩ ខែមិថុនា មានស្ត្រីម្នាក់ជាប់ជើងក្នុងជណ្តើរយន្តនៅអាកាសយានដ្ឋានដនមឿង ប្រទេសថៃ ខណៈរូបនាងបម្រុងធ្វើដំណើរទៅខេត្តនគរស្រ៊ីថាម៉ារ៉ាជ ហើយបណ្តាលឱ្យនាងដាច់ជើងខាងឆ្វេងភ្លាមៗ ។ ក្រោយមក ភ្នាក់ងារនៅអាកាសយានដ្ឋាននេះ ក៏បានបញ្ជូននាងទៅកាន់មន្ទីរពេទ្យ ។ នាយកគ្រប់គ្រងអាកាសយានដ្ឋានដនមឿងបានសម្តែងការសោកស្តាយយ៉ាងខ្លាំងចំពោះហេតុការណ៍នេះ ហើយសន្យាទទួលខុសត្រូវការចំណាយថ្លៃព្យាបាលនៅមន្ទីរពេទ្យទាំងអស់ ។

នាយកគ្រប់គ្រងព្រលានយន្តហោះដនមឿងលើកឡើងថា ក្រុមហ៊ុនថែទាំជណ្តើរយន្តបានត្រួតពិនិត្យជណ្តើរយន្តនេះរៀងរាល់៣ខែម្តងនៅអាកាសយានដ្ឋានដនមឿង ហើយជណ្តើរយន្តបង្កគ្រោះថ្នាក់នេះបានប្រើប្រាស់អស់រយៈពេល២៧ឆ្នាំហើយ ។ កន្លងមក ខាងអាកាសយានដ្ឋានដនមឿង ក៏ធ្លាប់បានសាកសួរទៅកាន់ក្រុមហ៊ុនថែទាំជណ្តើរយន្តដែរ ហើយពួកគេប្រាប់ថា ជណ្តើរយន្តនេះអាចប្រើប្រាស់បន្តទៀតបាន បើមានការថែទាំ និងផ្លាស់ប្តូរឧបករណ៍តាមការកំណត់ ។ ទោះយ៉ាងណា អាកាសយានដ្ឋានដនមឿងមានគម្រោងផ្លាស់ប្តូរជណ្តើរយន្តថ្មីនៅឆ្នាំ២០២៥ ។

បើតាមវីដេអូក្នុងកាមេរ៉ាសុវត្ថិភាពបង្ហាញថា វ៉ាលីសរបស់ស្ត្រីរងគ្រោះបានប៉ះទង្គិចជាមួយជើងឆ្វេងក្នុងអំឡុងពេលនាងនៅលើជណ្តើរយន្ត ក្រោយមក នាងក៏បានដួល ហើយត្រូវបានជណ្តើរយន្តស្រូបជើងរបស់នាងចូលទៅខាងក្នុង និងបណ្តាលឱ្យដាច់ជើងឆ្វេងតែម្តង ។

គួរបញ្ជាក់ថា កាលពីថ្ងៃទី១៩ ខែមិថុនា កន្លងមក ក៏មានគ្រោះថ្នាក់ដោយសារជណ្តើរយន្តនៅអាកាសយានដ្ឋានដនមឿងដូចគ្នាដែរ ខណៈអ្នកប្រើ TikTok ម្នាក់ឈ្មោះ zjbambam បានបង្ហោះហេតុការណ៍កូនប្រុសរបស់ខ្លួនកៀបជើងក្នុងជណ្តើរយន្ត ប៉ុន្តែត្រូវបានគេជួយសង្គ្រោះទាន់ពេលវេលា និងគ្មានគ្រោះថ្នាក់ដល់ជីវិត ។

អ្នកប្រើ TikTok នេះសរសេរថា ៖ «សូមផ្តាំផ្ញើទៅកាន់អ្នកម្តាយទាំងអស់ ឬក្រុមគ្រួសារណាដែលមានកូន គឺគ្រោះថ្នាក់អាចកើតឡើងគ្រប់ពេលវេលា ។ កូនប្រុសខ្ញុំបានជាប់ជើងក្នុងជណ្តើរយន្ត ខណៈគេកំពុងចុះជណ្តើរយន្ត និងកាន់ដៃម្តាយ ។ កូនខ្ញុំអាចឈរនៅជិតជណ្តើរយន្តពេក ទើបបណ្តាលឱ្យជណ្តើរយន្តស្រូបចូលទៅ ហើយកូនខ្ញុំបានរងរបួស ប៉ុន្តែមិនគ្រោះថ្នាក់ដល់ឆ្អឹងទេ គ្រាន់តែមានរបួសជើង និងដេរអស់១១ថ្នេរ ។ ពេលនោះ ចំណាយពេលអស់៣០នាទី ទម្រាំអាចទាញជើងចេញមកក្រៅបាន» ។

យើងមិនចង់ឱ្យគ្រោះថ្នាក់នេះកើតឡើងចំពោះអ្នកណាម្នាក់ទេ ដូច្នេះ ឪពុកម្តាយគ្រប់រូបត្រូវប្រុងប្រយ័ត្នឱ្យបានខ្ពស់ចំពោះសុវត្ថិភាពកូនៗនៅពេលប្រើប្រាស់ជណ្តើរយន្ត និងបន្ទប់យន្ត ។ នៅពេលឡើងលើជណ្តើរយន្ត ឪពុកម្តាយគួរតែពរកូនរបស់ខ្លួន និងឱ្យពួកគេពាក់ស្បែកជើងឃ្លុប ឬស្បែកជើងកីឡា ពីព្រោះវានឹងអាចកាត់បន្ថយគ្រោះថ្នាក់បានខ្លះ ប៉ុន្តែបើឱ្យពួកគេពាក់ស្បែកជើងផ្ទាត់នោះ បើមានហេតុការណ៍ជាប់ជើងក្នុងជណ្តើរយន្ត វានឹងធ្វើឱ្យប្រអប់ជើងក្មេងខូចខ្ទេចមិនខាន ។ ដូចគ្នានេះដែរ ការប្រើប្រាស់បន្ទប់យន្ត ក៏បង្កគ្រោះថ្នាក់ផងដែរនាពេលកន្លងមក ។

* វិធីប្រើប្រាស់ជណ្តើរយន្តប្រកបដោយសុវត្ថិភាព ៖
-មិនគួរលេងសើចជាមួយគ្នាទេ ខណៈពេលនៅលើជណ្តើរយន្ត
-មិនគួរប្រើប្រាស់ទូរស័ព្ទដៃទេ
-សង្កេតមើលការបម្លាស់ទីរបស់ជណ្តើរយន្ត មុននឹងដាក់ជើងជាន់លើវា
-មិនត្រូវដាក់ជើងនៅលើខ្សែបន្ទាត់ពណ៌លឿងទេ ព្រោះខ្សែពណ៌លឿង គឺសម្រាប់បែងចែកជណ្តើរឱ្យដាច់ពីគ្នា ។ ការដាក់ជើងជាន់នៅលើខ្សែពណ៌លឿងនឹងធ្វើឱ្យយើងដួល
-ចងខ្សែស្បែកជើងឱ្យជាប់ណែន ដើម្បីការពារមិនឱ្យវាជាប់ក្នុងជណ្តើរយន្ត
-បើស្បែកជើងរបស់យើងជាប់ក្នុងជណ្តើរយន្ត ត្រូវប្រញាប់ដោះវាចេញពីជើងឱ្យបានលឿន
-បើមានរទេះ យើងគួរប្រើប្រាស់បន្ទប់យន្តជំនួសវិញ ឬជណ្តើរយន្តសម្រាប់រទេះ ព្រោះកង់រទេះអាចរអិលបណ្តាលឱ្យកើតគ្រោះថ្នាក់
-ប្រុងប្រយ័ត្ននៅពេលជាន់លើជណ្តើរយន្ត ដើម្បីការពារការដួល ឬប៉ះគ្នាជាមួយអ្នកដំណើរផ្សេងទៀត
-មិនត្រូវដាក់សម្ភារៈផ្សេងៗនៅលើជណ្តើរយន្តទេ ព្រោះសម្ភារនោះអាចចូលក្នុងរន្ធជណ្តើរ
-គួរប្រើដៃតែម្ខាងសម្រាប់កាន់សម្ភារៈ ចំណែកដៃម្ខាងទៀតទុកចាប់បង្កាន់ដៃជណ្តើរ
-នៅពេលឡើងជិតដល់គោលដៅ យើងត្រូវប្រញាប់លើកជើងឆ្លងឱ្យផុតជណ្តើរខាងចុង ៕

ប្រភព ៖ khaosod

បរទេស៖ វិស្វករជនជាតិអ៊ុយក្រែនម្នាក់គឺលោក Sergii Gordieiev ដែលជា YouTuberដ៏ល្បីល្បាញនៅក្នុងបណ្តាញសង្គម បានរចនាកង់ថ្មីមួយគួរឱ្យចាប់អារម្មណ៍ដែលផ្លាស់ទីនៅលើខ្សែសង្វាក់ជំនួសឱ្យកង់រាងជារង្វង់។
យោងតាមប្រភពព័ត៌មាន Interesting Engineering ដែលបានរាយការណ៍នៅថ្ងៃទី ២៨ ខែមិថុនា បានឱ្យដឹងថា លោក Gordielev បានចំណាយពេលជាច្រើនឆ្នាំដើម្បីបង្កើតការរចនាកង់ប្លែកៗ ដែលប្រឈមនឹងការយល់ឃើញរបស់មនុស្សចំពោះវត្ថុប្រចាំថ្ងៃ។ គំនិតច្នៃប្រឌិត និងថ្វីដៃដ៏ប៉ិនប្រសប់របស់គាត់បានបញ្ជាក់ថា សូម្បីតែវត្ថុធម្មតាបំផុតក៏អាចប្រែក្លាយទៅជារបស់ដែលពិសេសបានដែរ។

ដូច្នេះហើយ ដើម្បីបង្កើតកង់ដែលគ្មាកាំ របស់លោក Gordieiev បានប្រើចង្កឹះដែលធ្វើពីស៊ុមដែកដ៏វែងមួយដោយភ្ជាប់ទៅនិងសង្វាក់ និងបន្ថែមគម្របសំបកកង់ ដែលបង្កើតបានជាផ្នែកមួយស្រដៀងនឹងធុងទឹក។ លោក Gordieiev ក៏បានបន្ថែមខ្សែសង្វាក់មួយទៀតទៅនឹងតួដើម្បីបញ្ចូលគ្នានូវឈ្នាន់ដោយភ្ជាប់ឈ្នាន់ទៅផ្នែកខាងលើនៃអ័ក្សខាងក្រោយ ហើយអ័ក្សខាងមុខនិងខាងក្រោយត្រូវបានជួសជុលនៅចំនុចពីរដើម្បីធានាថាមុំស្រួចត្រូវបានរក្សានៅពេលបើកបរ។

បន្ទាប់ពីការសាងសង់ត្រូវបានបញ្ចប់លោក Gordieiev ក៏បានយកកង់នោះចេញទៅតាមផ្លូវដើម្បីសាកល្បង រួមជាមួយនឹងខ្សែសង្វាក់ដ៏មានប្រសិទ្ធភាព ប្រព័ន្ធជំរុញរបស់កង់មានខ្សែក្រវ៉ាត់ដ្រាយដែលដាក់នៅមុំសេសទៅនឹងស៊ុមកង់ធម្មតា។ ខណៈពេលដែលការរត់ទៅមុខហាក់ដូចជារលូនល្អ Gordieiev ក៏បានជួបប្រទះបញ្ហាមួយចំនួនផងដែរ ដោយការរចនានេះបានធ្វើឱ្យមានការលំបាកក្នុងការរត់នៅលើផ្លូវរដេបរដុប ឬឧបសគ្គទូទៅដែលអ្នកជិះកង់ជួបប្រទះជារៀងរាល់ថ្ងៃ ដូចជាប្រហោង ឬចង្អូរនៅលើផ្លូវ។ ទោះជាយ៉ាងណាលោកបានបញ្ជាក់ថាកង់គ្មានកាំរបស់លោកគ្រាន់តែជាបទពិសោធន៍ថ្មីរបស់លោក និងសម្រាប់ការកំសាន្តតែប៉ុណ្ណោះ។ ប្រភព៖vnexpress

ប្រទេសថៃ ៖ អ្នកនាង Traisulee Traisoranakul អ្នកនាំពាក្យរងប្រចាំការិយាល័យនាយករដ្ឋមន្ត្រី បានលើកឡើងថា លោក ប្រាយុទ្ធ ចាន់អូចា នាយករដ្ឋមន្ត្រី និងរដ្ឋមន្ត្រីក្រសួងការពារជាតិ រីករាយនឹងការរីកចម្រើនផ្នែកឧស្សាហកម្មរថយន្តអគ្គិសនីរបស់ថៃនាពេលបច្ចុប្បន្ន ខណៈអ្នកប្រើប្រាស់រថយន្តអគ្គិសនីនៅប្រទេសថៃ ក៏បានកើនឡើងខ្ពស់ផងដែរ ។ ដូច្នេះ ការរីកចម្រើននេះ ដោយសារតែវិធានការគាំទ្រពន្ធ និងមិនមែនពន្ធរបស់រដ្ឋាភិបាល ។

សហព័ន្ធឧស្សាហកម្មប្រទេសថៃបានរាយការណ៍ថា ក្នុងរយៈពេល៥ខែដំបូងរបស់ឆ្នាំ២០២៣ មានការចុះបញ្ជីរថយន្តអគ្គិសនីចំនួន៣៣.៣៦៥គ្រឿង គឺកើនឡើងពីរយៈពេលដូចគ្នានៅឆ្នាំ២០២២ ជិត៥ដង ។ ការចុះបញ្ជីភាគច្រើន គឺរថយន្ត ២៤.០២១គ្រឿង, ម៉ូតូ ៨.២៦២គ្រឿង, រថយន្តដឹកអ្នកដំណើរ ៨៣៦គ្រឿង, ម៉ូតូកង់៣ ចំនួន១២៣គ្រឿង, រថយន្តដឹកទំនិញ ៨១គ្រឿង និងរថយន្ត១បាំងកន្លះ ៤២គ្រឿង ។ ដូច្នេះ ចំនួនការចុះបញ្ជីចុងក្រោយនេះ បានធ្វើឱ្យចំនួនចុះបញ្ជីរថយន្តអគ្គិសនីប្រភេទ BEV នៅប្រទេសថៃ ស្មើនឹង៦៥.៣៣៣គ្រឿង នៅត្រឹមថ្ងៃទី៣១ ខែឧសភា ឆ្នាំ២០២៣ ។

អ្នកនាង Traisulee Traisoranakul លើកឡើងថា វិធានការគាំទ្ររបស់រដ្ឋាភិបាល និងកំណើនទីផ្សារក្នុងស្រុកបានធ្វើឱ្យវិនិយោគិនជឿជាក់នយោបាយរបស់ថៃ និងចាប់អារម្មណ៍បង្កើតរោងចក្រនៅថៃផងដែរ ខណៈក្រុមហ៊ុនបានវិនិយោគផលិតរថយន្តនៅប្រទេសថៃដែលមានស្រាប់ នឹងពង្រីកការផលិតបន្ថែមទៀត ។ ដូច្នេះ វិនិយោគិនចាប់អារម្មណ៍ក្នុងឧស្សាហកម្មរថយន្តអគ្គិសនីរបស់ថៃជាខ្លាំង ។

គួរបញ្ជាក់ថា ចាប់ពីថ្ងៃទី១៨ ដល់ថ្ងៃទី២៣ ខែមិថុនា អ្នកគ្រប់គ្រងរបស់ BOI បានធ្វើការបង្ហាញនៅប្រទេសអាល្លឺម៉ង់ និងបារាំង ហើយឃើញថា ពួកគេទទួលបានការឆ្លើយតបយ៉ាងល្អពីអ្នកប្រកបអាជីវកម្មផ្នែករថយន្តអគ្គិសនី និងគ្រឿងបន្លាស់រថយន្តអគ្គិសនី រួមទាំងឧស្សាហកម្មអេឡិចត្រូនិក វេជ្ជសាស្ត្រ និងសេវាកម្មសុខភាព ដោយអ្នកប្រកបអាជីវកម្មទាំងនេះចាប់អារម្មណ៍បង្កើតទីតាំងផលិតទំនិញនៅថៃ និងលក់ក្នុងតំបន់អាស៊ី ។

ចំណែកនៅថ្ងៃទី២៧ ខែមិថុនា រហូតដល់ថ្ងៃទី១ ខែកក្កដា អ្នកគ្រប់គ្រងរបស់ BOI មួយក្រុមទៀត ក៏បានធ្វើដំណើរទៅប្រទេសចិនផងដែរ ដោយសារចិនចាប់អារម្មណ៍ការវិនិយោគនៅថៃជាខ្លាំង ជាពិសេស ឧស្សាហកម្មរថយន្តអគ្គិសនី ៕ ប្រភព ៖ mgronline