ជុំវិញបញ្ហាលក់ទំនិញថ្លៃកប់ពពករបស់ហាង 7-Eleven សាខានៅកម្ពុជា តើពិតដូចជាការលើកឡើងរបស់បណ្តាញសង្គមថៃ ដោយបង្ហាញអត្ថន័យនៅខាងក្រោមដែរឬទេ? ខណៈលក្ខខណ្ឌទំនិញមានគុណភាព បរិមាណ ការវេចខ្ចប់ដូចគ្នាទាំងស្រុង និងម្ចាស់តែមួយ គ្រាន់តែខុសប្រទេសខ្មែរ និងថៃ តែបើយោងតាមការលើកឡើង ថ្លៃទូទាត់ទំនិញខុសគ្នាច្រើនដងគួរឱ្យបារម្ភ ព្រោះជនជាតិខ្មែរជាអ្នកខាតបង់ថវិកា ចំណាយច្រើនលើសកម្រិត តែបានទំនិញតិចជាងនៅថៃ ។

ជុំវិញបញ្ហានៃការលើកឡើងរបស់អ្នកលេងបណ្តាញសង្គមថៃ សារព័ត៌មាន KBN NEWS រង់ចាំការបកស្រាយបំភ្លឺពីភាគី 7-Eleven អំពីលក្ខខណ្ឌដែលនាំឱ្យកំណត់ថ្លៃទំនិញលើសទីផ្សារលក់ផលិតផលនៅថៃ ដូចការលើកឡើងរបស់បងប្អូនជនជាតិថៃ ។

ជាការពិត ការធ្វើអាជីវកម្ម គឺត្រូវការស្វែងរកប្រាក់ចំណេញ តែបើចំណេញលើសហួសហេតុ ប្រជាជនកម្ពុជាអាចនឹងស្វែងរកគូប្រជែងថ្មីផ្សេងៗទៀត ព្រោះអតិថិជនមានជម្រើសច្រើន ហើយបើចំណាយលើទីផ្សារ 7-Eleven ថ្លៃហួសហេតុដូចការលើកឡើងរបស់ភាគីថៃមែននោះ ប្រាកដណាស់មិនយូរទេ គូប្រជែងនឹងមានឱកាសចាប់យកអតិថិជនកម្ពុជា បើទោះបីជាផលិតផលនៅទីនោះល្អយ៉ាងណាក៏ដោយចុះ ។ ជាការសម្រង់ខ្លឹមសារផ្សាយដែលទាក់ទងនឹងហាងលក់ទំនិញ 7-Eleven លក់ទំនិញថ្លៃជាងនៅថៃទ្វេដង អ្នកលេងបណ្តាញសង្គមបានលើកឡើង និងបង្ហាញនូវភស្តុតាងដូចខាងក្រោម ៖

ពីប្រទេសថៃ ៖ ទំព័រហ្វេសប៊ុករបស់ថៃបានចុះផ្សាយថា ក្រុមហ៊ុន CP All បានទទួលសិទ្ធិដំណើរការហាងលក់ទំនិញ 7-Eleven នៅប្រទេសកម្ពុជា រយៈពេល៣០ឆ្នាំ ហើយនៅកម្ពុជា មានហាង 7-Eleven សាខាដំបូងគេនៅជ្រោយចង្វារ រាជធានីភ្នំពេញ ។ លើសពីនេះ ហាង 7-Eleven មានគោលដៅពង្រីកសាខានៅទូទាំងប្រទេសកម្ពុជាបន្ថែមទៀត ។ នេះចាត់ទុកថា ជារឿងល្អមួយ ព្រោះនឹងមានការជួលបុគ្គលិក និងជាការបើកឱកាសឱ្យពលរដ្ឋខ្មែរមានការងារធ្វើបន្ថែមផងដែរ ។ បើហាង 7-Eleven ទៅបើកនៅទីណា គឺបង្ហាញថា នៅទីនោះរីកចម្រើន ព្រោះ 7-Eleven សម្រាប់វាស់ភាពរីកចម្រើនក្នុងទីក្រុងនោះ ។ មុននឹងបើកហាងនីមួយៗ គេត្រូវវិភាគពីកត្តាជាច្រើនថា តើការបើកហាងរួចនឹងចំណេញដែរឬទេ និងវិភាគពីអត្រាការលូតលាស់ ឬអត្រាការទិញ ។

ទំព័រហ្វេសប៊ុក TOURLONG និយាយថា សូមដាស់តឿនពលរដ្ឋខ្មែរជាមុនថា បើអ្នកណាបានទៅប្រើប្រាស់សេវាកម្មនៅហាង 7-Eleven ពួកគេនឹងដឹងថា ទំនិញដែលដាក់លក់នៅហាងនេះ សុទ្ធតែនាំចូលពីប្រទេសថៃទាំងអស់ ។ វាជាទំនិញមានគុណភាពល្អ និងជាទំនិញដែលពលរដ្ឋខ្មែរនិយមចូលចិត្តផងដែរ មិនថាគ្រឿងសម្អាង និងម្ហូបអាហារផ្សេងៗ ។ កន្លងមក មានណេតអាយដលជនជាតិថៃល្បីឈ្មោះម្នាក់បានចូលក្នុងហាង 7-Eleven នៅកម្ពុជា និងថតវីដេអូបង្ហាញពីទំនិញផ្សេងៗឃើញថា ទំនិញដាក់លក់នៅកម្ពុជាទាំងអស់សុទ្ធតែថ្លៃជាងថៃទ្វេដង ។

ទំព័រហ្វេសប៊ុកនេះបន្តថា ណេតអាយដលជនជាតិថៃរូបនេះប្រាប់ថា ហាង 7-Eleven នៅកម្ពុជា គឺដូចគ្នានឹងហាងនៅប្រទេសថៃដែរ ព្រោះរាល់ទំនិញទាំងអស់មានសរសេរជាអក្សរថៃ និងមានអ្នកនិយាយភាសាថៃ ។ TOURLONG បានរៀបរាប់អំពីទំនិញនីមួយៗថា ៖
-បាយឆាបង្គានៅហាង 7-Eleven កម្ពុជា លក់ក្នុងតម្លៃ២ដុល្លារអាមេរិក (ស្មើ៧២បាត) ខណៈថៃលក់ត្រឹមតែ៣៧បាត
-មីកញ្ចប់នៅកម្ពុជា តម្លៃ២,៩ដុល្លារ (ស្មើ១០៤បាត) ខណៈថៃលក់ត្រឹមតែ៦៨បាត
-ការ៉ែមកីនៅកម្ពុជា តម្លៃ១,៥៣ដុល្លារ (ស្មើ៥៥បាត) ខណៈថៃលក់ត្រឹមតែ៤៥បាត
-នំប៉័ងនៅកម្ពុជា តម្លៃ១,៩ដុល្លារអាមេរិក (ស្មើ៦៨បាត) ខណៈថៃលក់ត្រឹមតែ២២បាតប៉ុណ្ណោះ

ទំព័រហ្វេសប៊ុកនេះបន្ថែមថា ទំនិញដាក់លក់នៅហាង 7-Eleven កម្ពុជា ខុសគ្នាពីនៅថៃ រហូតដល់៣ដងឯណោះ ។ ប៉ុន្តែបើទោះជាទំនិញទាំងនេះមានតម្លៃថ្លៃ ក៏នៅតែលក់ដាច់ដែរនៅកម្ពុជា ព្រោះវាជាទំនិញពេញនិយម ។ ក្រៅពីនេះ ក៏មានអាជីវកម្មផ្សេងទៀតរបស់ថៃបានល្បីល្បាញដល់កម្ពុជាផងដែរ ដូចជា ផ្សារម៉ាក្រូនៅរាជធានីភ្នំពេញ, ផ្សារទំនើប Big C សាខាដំបូងនៅក្រុងប៉ោយប៉ែត, mini Big C សាខានៅភ្នំពេញ និងកាហ្វេ Amazon ដែលបច្ចុប្បន្ន កាហ្វេនេះបានពង្រីកសាខានៅទូទាំងប្រទេសកម្ពុជា ចំនួន១៥០សាខា ។

ទំព័រហ្វេសប៊ុកនេះបន្ថែមទៀតថា មានជនជាតិថៃជាច្រើននាក់ចូលមកបញ្ចេញយោបល់ ក្នុងនោះជនជាតិថៃដំបូងគេនិយាយថា ៖ «ជាប្រទេសអ្នកមានណាស់ ដែលបរិភោគសុទ្ធតែរបស់ថ្លៃៗ» ។ ជនជាតិថៃម្នាក់ទៀតថា ៖ «ហូបរបស់ថៃ និងប្រើប្រាស់ទំនិញថៃរួចហើយ មើលទៅល្អ» ។ ជនជាតិថៃម្នាក់ទៀតថា ៖ «ប្រើទំនិញថៃតាំងពីព្រឹករហូតដល់ល្ងាច គឺភ្ញាក់ឡើង ដុសធ្មេញដោយថ្នាំដុសធ្មេញថៃ, កក់សក់ដោយសាប៊ូកក់សក់ថៃ, ងូតទឹកដោយសាប៊ូដុសខ្លួនថៃ, ផាត់មុខដោយគ្រឿងសម្អាងថៃ, បើកយានជំនិះទៅធ្វើការ ក៏ចាក់ប្រេងនៅស្ថានីយ PTT ថៃ, ផឹកកាហ្វេ Amazon ថៃ, ថ្ងៃត្រង់ ហូបម្ហូបថៃ និងពេលល្ងាច ផឹកស្រាបៀរថៃ» ។

ជនជាតិថៃម្នាក់ទៀតថា ៖ «ការចូលមកនៃហាង 7-Eleven នៅកម្ពុជា បានធ្វើឱ្យការទាមទារម្ហូបថៃ មកធ្វើជាកម្មសិទ្ធិរបស់ខ្លួនលំបាកជាងមុន ព្រោះកាលពីមុន កម្ពុជានាំចូលគ្រឿងទេសមិនផ្លូវការចូលប្រទេស ។ ប៉ុន្តែចាប់ពីពេលនេះ ពលរដ្ឋខ្មែរត្រូវទិញគ្រឿងទេសនៅហាង 7-Eleven» ។ ជនជាតិថៃម្នាក់ទៀតថា ៖ «ឃើញទំនិញ ទឹកជ្រលក់ និងគ្រឿងផ្សំគ្រប់មុខនាំចូលពីថៃ ។ ដូច្នេះ យើងប្រាកដចិត្តថា ចាប់ពីពេលនេះ លំនៅឋានពលរដ្ឋខ្មែរទាំងអស់នឹងទទួលយកវប្បធម៌ថៃ និងវិធីធ្វើម្ហូបថៃ ។ នេះហើយគេហៅថា Soft Power យ៉ាងពិតប្រាកដ» ។ ជនជាតិថៃម្នាក់ទៀតថា ៖ «ចាប់ពីពេលនេះទៅ ខ្មែរត្រូវរៀននិយាយភាសាថៃ ធ្វើជាភាសាទី២» ។

ទំព័រហ្វេសប៊ុកដដែលបញ្ជាក់ថា មុននេះ មានពលរដ្ឋខ្មែរមួយចំនួនប្រាប់ថា ៖ «នឹងមិនទិញទំនិញថៃទេ ព្រោះមានតម្លៃថ្លៃ ហើយនឹងទិញទំនិញនៅផ្សារល្អជាង» ។ ពិតហើយ ទំនិញថៃថ្លៃជាងបន្តិចមែន ប៉ុន្តែបើធៀបនឹងគុណភាព ស្តង់ដារ និងបានបញ្ជាក់ពីទីតាំងផលិតពិតប្រាកដ គឺអាចទុកចិត្តថា មិនមែនជាទំនិញក្លែងក្លាយទេ ។ វាចំណេញជាងទិញទំនិញគ្មានស្តង់ដារ និងគ្មានបញ្ជាក់ពីទីតាំងផលិត ហើយអ្នកបរិភោគឈឺពោះ ឬមានអ្វីកើតឡើងនោះ តើអ្នកណាទទួលខុសត្រូវ ?

TOURLONG បញ្ជាក់ថា បើពលរដ្ឋខ្មែរណានិយាយថា ទំនិញថៃថ្លៃ បង្ហាញថា គេមិនបានផលិតទំនិញនេះសម្រាប់លក់ឱ្យអ្នកទេ គឺគេផលិតមកសម្រាប់លក់ឱ្យអ្នកដែលត្រូវការមានគុណភាពជីវិតល្អ ហើយមិនចង់ទិញទំនិញក្លែងក្លាយដាក់សារធាតុគីមីការពារសត្វល្អិត និងសារធាតុគីមីផ្សេងទៀតបង្កឱ្យកើតជំងឺ ។ មុននេះ មានពលរដ្ឋខ្មែរខ្លះទៀតប្រាប់ថា ៖ «ហាង 7-Eleven មិនមែនជារបស់ថៃទេ វាជារបស់ជប៉ុន ហើយថៃអះអាងថា ជារបស់ខ្លួន» ។

TOURLONG សូមបញ្ជាក់ថា ការពិត ថៃបានទិញកម្មសិទ្ធិពីអាមេរិក ហើយជប៉ុនក៏ Take over ក្រុមហ៊ុននេះ បន្ទាប់មក នៅក្រោមកិច្ចសន្យានេះ គឺជាកម្មសិទ្ធិរបស់ថៃ និងអាមេរិក ។ ហាង 7-Eleven នៅកម្ពុជាបច្ចុប្បន្ន មានម្ចាស់ជាជនជាតិថៃ គឺក្រុមហ៊ុន CP ALL របស់ថៃបានបើកក្រុមហ៊ុននៅកម្ពុជា ។

ជាការល្អ ប្រសិនបើពិតដូចការលើកឡើងរបស់អ្នកលេងបណ្តាញសង្គមថៃមែននោះ ភាគីក្រុមហ៊ុនគួរតែពិចារណារកចំណុចល្អស្របគ្នាមួយរវាងអ្នកទិញ និងអ្នកលក់ត្បិតផលិតផលម៉ាក 7-Eleven ទាំងអស់កំពុងតែមានវត្តមាន និងទទួលបានការគាំទ្រពីអតិថិជនកម្ពុជារួចស្រេចទៅហើយ ។

ប្រភព ៖ TOURLONG

កាលពីម្សិលមិញលោក ប៊ឺត សំរេច ដែលជាអតីតកីឡាករប្រដាល់ល្បីមួយរូបរបស់កម្ពុជា បានអញ្ជើញទៅទស្សនាផ្ទះគំរូពិតផ្ទាល់នៅទីតាំងបុរី HM Lucky Home រួចរាល់ហេីយ​។

តាមប្រសាសន៍លោកប្រធានរដ្ឋបាល បានអោយដឹងទៀតថា ក្រៅពីការជូនផ្ទះវីឡាភ្លោះទំហំ៥.៧០ម៉ែត្រ​ គុណ​ ១៥ម៉ែត្រខាងក្រុ​មហ៊ុនបុរី​ HM Lucky Home មានថែមជូនគ្រែគេង​ ម៉ាស៊ីនត្រជាក់​ គ្រប់បន្ទប់​ជូន​ លោក ប៊ឺត សំរេច បន្ថែមពីលេីការរៀបចំពីធីឡើងគេហដ្ឋានជាផ្លូវការជូនលោកប៊ឹត សំរេចថែមទៀតផង។

មួយរយៈនេះយើងឃើញថាមានមហាជនជាច្រើនបានជួយឧបត្ថម្ភដល់ លោកប៊ឺត សំរេច ក្រោយពីលោកមានរឿងចម្រូងចម្រាស់ជាមួយនឹងគ្រួសារលោកតា សុិន សុីសាមុត ដែលលោកអះអាងថាលោកជាកូនប្រុសបង្កើតរបស់អធិរាជសម្លេងមាស៕

លោកជំទាវ ហ៊ុន ស៊ីណាត បាន Live នៅលើទំព័រហ្វេកប៊ុកកាលពីម្សិលមិញនេះឆ្លើយតបទៅអ្នកគាំទ្ររបស់ចំប៉ីខ្មៅមួយចំនួនជុំវិញរឿងលោកជំទាវបានផ្តាំផ្ញើថាបុគ្គលហូបទុរេនដៀលអ្នកស្រែជំទាវ ចន ច័ន្ទ គ្មានសិទ្ធិហៅមក Live នោះទេគឺខាងក្រសួងវប្បធម៌ និងរឿងការដាក់ញត្តិជាដើម។ ប៉ុន្តែរឿងនេះក៏ត្រូវហ្វេនៗរបស់ចំប៉ីខ្មៅវាយបកទៅវិញថាមានភាពលម្អៀង។ លោកជំទាវមានប្រសាសាន៍ថាការផ្តាំផ្ញើបែបនេះព្រោះមានបំណងល្អចំពោះចំប៉ីខ្មៅ និងរឿងហែញត្តិជាដើម ក្នុងនាមជាមនុស្សចាស់ដឹងខុសត្រូវមិនចង់ឱ្យចំប៉ីខ្មៅធ្វើហួសព្រំដែនទាំងដែលខ្លួនជាធនធានខាងផ្នែកច្បាប់នោះទេ។

មហាជនមួយចំនួនដែលតាមដានរឿងចំប៉ីខ្មៅជ្រាបមកហើយថា ជុំរិញរឿងស្នើឱ្យប្រធានសមាគមសិល្បករអ្នកនាង ចន ច័ន្ទលក្ខណា ហៅបុគ្គលដៀលអ្នកស្រែឱ្យមក Liv eសូមទោសមហាជនជាសាធារណៈដូចខ្លួនកាលពីឆ្នាំ២០១៨ ត្រូវបានលោកជំទាវ ហ៊ុន ស៊ីណាត ផ្តាំផ្ញើទៅចំប៉ីខ្មៅថារឿងនេះគឺខាងក្រសួងវប្បធម៌ ក្រុមប្រឹក្សាវិន័យនិងលើកសរសើរជាអ្នកចាត់ចែង ចន ច័ន្ទលក្ខណា មិនមានសិទ្ធិនោះទេ។ រឿងដែលលោកជំទាវផ្តាំផ្ញើនេះដែរក៏ត្រូវហ្វេនៗរបស់ចំប៉ីខ្មៅបានបញ្ចេញមតិជាច្រើននៅលើសារព័ត៌មាន KBN News ថាមានភាពលំអៀង ដោយសារចំប៉ីខ្មៅគ្មានខ្សែទើបជួបរឿងអយុត្តិធម៌បែបនេះ និងការបញ្ចេញមតិជាច្រើនទៀត។

ជុំវិញមតិរិះគន់ថាមានភាពលម្អៀងនេះដែរលោកជំទាវ ហ៊ុន ស៊ីណាត បាន Live នៅលើហ្វេកប៊ុកថ្ងៃទី៤ ខែកក្កដា ឆ្នាំ២០២៣ ផ្តាំផ្ញើទៅអ្នកគាំទ្ររបស់ចំប៉ីខ្មៅថា កុំនាំឱ្យចំប៉ីខ្មៅកាន់តែផុងជ្រៅខុសដោយមិនដឹងខ្លួនតទៅទៀត។
នៅក្នុងការ Live លោកជំទាវថា ការដែលខ្លួនបានផ្តាំផ្ញើទៅចំប៉ីខ្មៅថា ចន ច័ន្ទលក្ខណា គ្មានតួនាទីហៅបុគ្គលដៀលអ្នកស្រែមកLiveសូមទោសនោះគឺលោកជំទាវបានទាក់ទងទៅខាងក្រសួងពាក់ព័ន្ធរួចហើយតាំងរឿងកើតឡើងថ្មីៗមកម្ល៉េះ ទើបលោកជំទាវផ្តាំទៅចំប៉ីខ្មៅបែបនេះ ព្រោះតែបំណងល្អប៉ុណ្ណោះ ខាងក្រសួងដែលមានក្រុមប្រឹក្សាវិន័យ និងលើកសរសើរ គេជាអ្នកចាត់ចែងរឿងនេះ។ លោកជំទាវ ហ៊ុន ស៊ីណាត ថាគេចេះចាត់ចែងហើយនឹងធ្វើទៅតាមដំណាក់កាលរបស់គេលើកទី១ ត្រូវវិន័យយ៉ាងមិច មានលើកទី២យ៉ាងមិច គឺទៅតាមនីតិវិធីរបស់គេ មិនមែនចេះតែចង់បានតាមចិត្តចំប៉ីខ្មៅស្រែកនោះទេ។

លោកជំទាវបន្ថែមថា ចំពោះការដែលហ្វេនចំប៉ីខ្មៅថាលោកជំទាវ លម្អៀង គ្មានខ្សែគ្មានពួរទើបមិនមានយុត្តិធម៌ សូមឱ្យគិតពិចារណាម្តងទៀតព្រោះលោកជំទាវតែងតែជួយឈឺឆ្អាលព្រោះលោកជំទាវក៏ស្អប់អ្នកណាដៀលអ្នកស្រែដែរ និងបុគ្គលធ្វើឱ្យសង្គមអាប់ឱន ដូចអ្នកផលិតវីដេអូមិនសមរម្យ ជាដើមទើបទាក់ទងគ្រប់មធ្យាបាយទៅក្រសួងពាក់ព័ន្ធឱ្យជួយមើលរឿងមិនសមរម្យទាំងនេះ។ លោក ជំទាវបន្តទៀតថា អ្នកដៀលអ្នកស្រែថ្ងៃមុនក៏មិនរួចខ្លួនដែរ តែគេធ្វើតាមដំណាក់កាលរបស់គេ និងកុំឱ្យចំប៉ីខ្មៅកាន់តែផុសជ្រៅដោយមិនបានគិតពិចារណាព្រោះតែសំឡេងគាំទ្ររបស់ហ្វេនខ្លួនទើបលោកជំទាវផ្តាំផ្ញើទៅចំប៉ីខ្មៅក្នុងនាមជាមនុស្សចាស់ទុំប៉ុណ្ណោះ៕

ល្ហុងគឺជាដំណាំមួយប្រភេទងាយស្រួលដាំដុះ ឆាប់ធំលូតលាស់ និងអាចប្រមូលទិន្នផលបានរយៈពេល១ឆ្នាំ ។ យើងអាចដាំដំណាំនេះសម្រាប់ទុកហូបក្នុងគ្រួសារ និងសម្រាប់លក់ក៏បាន ។ ល្ហុងនឹងចេញផ្លែក្រោយពីបានដាំអស់រយៈពេល៨ខែ ហើយល្ហុងអាចដាំបានស្ទើរគ្រប់សណ្ឋានដីទាំងអស់ លើកលែងតែដីមានទឹកដក់ ។ បើអ្នកណាចង់ដាំដំណាំល្ហុង គួរតែអនុវត្តតាមវិធីខាងក្រោមនេះ ។

*វិធីដាំដុះល្ហុង ៖
-ត្រៀមផ្ទៃដីដាំដុះដោយការភ្ជួរដី រួចទុកឱ្យស្ងួតចាប់ពី៥ថ្ងៃ ទៅ៧ថ្ងៃ ។ បន្ទាប់មក ត្រូវលើកដីឱ្យខ្ពស់ ដែលមានទទឹង១,៥ម៉ែត្រ និងកម្ពស់៥០សង់ទីម៉ែត្រ
-ជីករណ្តៅដាំក្នុងជម្រៅ៥០សង់ទីម៉ែត្រ និងរក្សាចម្ងាយរវាងដើម ៣x៣ម៉ែត្រ
-ដាក់ជីលាមកសត្វក្នុងរណ្តៅដី ឬជីសរីរាង្គ ឬស្លឹកឈើរលួយ
-យកកូនល្ហុងមានអាយុពី៣០ថ្ងៃ ទៅ៦០ថ្ងៃមកដាំក្នុងរណ្តៅ ដោយដាំល្ហុងចំនួន៣ដើមក្នុង១រណ្តៅ
-ក្រោយពីបានដាំល្ហុងរយៈពេលពី៣ខែ ទៅ៤ខែ វានឹងចាប់ផ្តើមចេញផ្កា ។ ដូច្នេះ យើងត្រូវកាត់ដើមល្ហុងឈ្មោលចេញពីរណ្តៅ ហើយទុកតែដើមណាដែលមានផ្កាល្អប៉ុណ្ណោះ គឺ១ដើមក្នុង១រណ្តៅ-ថែទាំដាក់ជីក្រោយដាំបានរយៈពេល១ខែ ហើយគួរប្រើប្រាស់ជីប្រភេទ 15-15-15 ចំនួន១ស្លាបព្រាបាយក្នុង១ដើម ។ លើសពីនេះ គេអាចដាក់ជីលាមកសត្វ និងជីកំប៉ុស ដោយដាក់ម្តងក្នុង១ខែ ហើយនៅពេលល្ហុងចេញផ្លែ ត្រូវដាក់ជីប្រភេទ 13-3-21 ចំនួន១-២ស្លាបព្រាបាយក្នុង១ដើម
-ល្ហុងជាដំណាំចូលចិត្តទឹក ប៉ុន្តែវាមិនចូលចិត្តទឹកដក់ទេ ។ ដូច្នេះ គួរស្រោចទឹកចំនួន២ដងក្នុង១ថ្ងៃ គឺពេលព្រឹក និងល្ងាច ។ យើងមិនគួរស្រោចទឹកច្រើនពេករហូតដល់លិចគល់របស់វាទេ ព្រោះនឹងធ្វើឱ្យដើមស្អុយ
-កម្ចាត់ស្មៅចេញពីគល់ល្ហុង
-ដោតបង្គោលដើម្បីជួយទប់ដើមល្ហុងមិនឱ្យរលំ ហើយធ្វើឱ្យល្ហុងដុះជាជួរបានល្អ និងមានរបៀប ។ ដូចនេះ ក្រោយពីបានដាំដុះល្ហុងរយៈពេលពី៦ខែ ទៅ៨ខែ វាក៏ចេញផ្លែឱ្យយើងបេះបរិភោគ ឬយកទៅលក់បានហើយ ។

*ផលប្រយោជន៍របស់ល្ហុង ៖
-ផ្លែល្ហុង ៖ ផ្លែល្ហុងខ្ចីជួយបណ្តេញសត្វល្អិតក្នុងពោះវៀន និងដោះស្រាយបញ្ហានោមទាស់ ។ ចំណែកល្ហុងទុំផ្តល់វីតាមីនចាំបាច់ដល់រាងកាយដូចជា ជាតិសរសៃ កាល់ស្យូម ប៉ូតាស្យូម បេតាការ៉ូទីន ជាតិដែក វីតាមីន A និងវីតាមីន C ។ គេនិយមយកល្ហុងទុំទៅធ្វើទឹកផ្លែឈើ យ៉ែម (ចាហួយ) ល្ហុងកំប៉ុង និងនំកញ្ចប់
-ជ័រល្ហុង ៖ គេយកជ័រល្ហុងទៅប្រើប្រាស់ក្នុងឧស្សាហកម្មផ្សេងៗដូចជា ការផលិតស្រាបៀរ និងទឹកត្រី ។ លើសពីនេះ គេអាចផលិតជាថ្នាំការពារការឆ្លងមេរោគមុខរបួស និងសម្លាប់សត្វល្អិតក្នុងពោះវៀន
-គ្រាប់ល្ហុង ៖ យកទៅហាលឱ្យស្ងួត បន្ទាប់មក លាយវាជាមួយគ្រាប់ល្ពៅ និងទឹក រួចយកវាទៅបិទលើមុខរបួសដើម្បីបន្ថយការឈឺចុកចាប់
-សម្បកល្ហុង ៖ ធ្វើជាចំណីសត្វ
-ត្រួយខ្ចី និងស្លឹកខ្ចី ៖ ធ្វើជាបន្លែបង្ការ
-ឫស ៖ យកមកស្ងោរផឹកដើម្បីព្យាបាលជំងឺនោមទាស់ និងជួយឱ្យស្រ្តីមានទឹកដោះសម្រាប់ទារក ៕

ប្រភព ៖ Kaset Go

យោងតាមគេហទំព័រ Wise Voter បានឱ្យដឹងថា នៅក្នុងឆ្នាំ២០២៣ កម្ពុជាបានហក់ឡើង១០ចំណាត់ថា្នក់ នៅក្នុងតារាងប្រទេសដែលមានអ្នកទទួលទានគ្រឿស្រវឹងច្រើនជាងគេលើពិភពលោក។

កាលពីឆ្នាំ២០២២ កម្ពុជាស្ថិតនៅលេខ៣០ ក៏ប៉ុន្តែគិតត្រឹមពាក់កណ្តាលខែ៦ កម្ពុជាបានហក់ឡើងមកលេខ២០វិញ។ បើយើងធៀបទៅប្រទេសតំបន់អាស៊ានវិញ កម្ពុជាឈរនៅលេខ១ ខណៈវៀតណាមឈរនៅលេខ២ និងលេខ៥១លើពិភពលោក។

នៅក្នុងវេបសាយនោះបានបញ្ជាក់យ៉ាងច្បាស់ថា ប្រជាជនកម្ពុជាម្នាក់ ជាមធ្យមទទួលទានស្រាបៀយ៉ាងហោចណាស់៤.១២លីត្រ។

ខាងក្រោមនេះគឺជាតារាងចំណាត់ថ្នាក់លេខ១ដល់លេខ១០៖

• សាធារណរដ្ឋ​ឆែក ៦.៧៧លីត្រ
• អូទ្រីស ៦.៣លីត្រ
• ប៉ូឡូញ ៥.៧២លីត្រ
• អាល្លឺម៉ង់ ៥.៥៧លីត្រ
• រូមេនី ៥.៣៣លីត្រ
• ហ្គាបុង ៥.៣១លីត្រ
• ប៉ាណាម៉ា ៥.២៩លីត្រ
• សាធារណរដ្ឋកុងហ្គោ ៥.១១លីត្រ
• អៀរឡង់ ៤.៩២លីត្រ
• ឡាតវី ៤.៩លីត្រ

ប្រភព៖ Wise Voter