ប្រទេសឥណ្ឌា ៖ ក្រុមហ៊ុន Tesla បានពិភាក្សាជាមួយរដ្ឋាភិបាលឥណ្ឌា ដើម្បីសាងសង់រោងចក្រផលិតរថយន្តអគ្គិសនី ។ រោងចក្រនេះនឹងផលិតរថយន្តអគ្គិសនីឱ្យបានចំនួន៥សែនគ្រឿងក្នុង១ឆ្នាំ ហើយក្រុមហ៊ុន Tesla នឹងយកប្រទេសឥណ្ឌាធ្វើជាទីតាំងនាំចេញរថយន្តទៅកាន់ប្រទេសផ្សេងៗក្នុងតំបន់ឥណ្ឌូប៉ាស៊ីហ្វិកផងដែរ ។

សារព័ត៌មាន Times India បានចុះផ្សាយយោងតាមប្រភពពីរដ្ឋាភិបាលឥណ្ឌាថា ក្រុមហ៊ុន Tesla បានពិភាក្សាជាមួយរដ្ឋាភិបាលឥណ្ឌា ដើម្បីសាងសង់រោងចក្រដែលអាចផលិតរថយន្តបានចំនួន៥សែនគ្រឿងក្នុង១ឆ្នាំ ។ ហេតុនេះ តម្លៃរថយន្តអាចចាប់ផ្តើមពី២លានរូពីឡើងទៅ ប៉ុន្តែតម្លៃនេះច្រើនជាងតម្លៃរថយន្តអគ្គិសនីយីហោ MG Comet នៅឥណ្ឌា ដែលថោកជាង២ដង ហើយវាថ្លៃជាងរថយន្ត Tata Nexon EV ដែលមានតម្លៃប្រមាណ៦៦ម៉ឺនរូពី ដែលជារថយន្តអគ្គិសនីលក់ដាច់បំផុតនៅឥណ្ឌា ។

ក្រៅពីនេះ ក្រុមហ៊ុន Tesla របស់លោក Elon Musk កំពុងតែពិចារណាយកប្រទេសឥណ្ឌាធ្វើជាទីតាំងនាំចេញរថយន្តអគ្គិសនីទៅកាន់ប្រទេសផ្សេងៗក្នុងតំបន់ឥណ្ឌូប៉ាស៊ីហ្វិកផងដែរ ។ កាលពីឆ្នាំ២០២២ ផែនការដំណើរការអាជីវកម្មនៅប្រទេសឥណ្ឌារបស់ក្រុមហ៊ុន Tesla ទើបតែចាប់ផ្តើម ក្រោយពីរដ្ឋាភិបាលឥណ្ឌាបដិសេធមិនកាត់បន្ថយពន្ធនាំចូលរថយន្ត Tesla ហើយឥណ្ឌាបានទាមទារប្រមូលពន្ធនាំចូលរថយន្ត រហូតដល់១០០% ឯណោះ ៕ ប្រភព ៖ Bangkok biznews

ប្រទេសថៃ ៖ សារព័ត៌មានបរទេសបានចុះផ្សាយថា លោក Pita Limjaroenrat ជាបេក្ខជននាយករដ្ឋមន្ត្រីថៃ បានទទួលបរាជ័យក្នុងការបោះឆ្នោតជ្រើសរើសនាយករដ្ឋមន្ត្រីប្រទេសថៃ ដែលជាអំឡុងពេលសំខាន់មួយដើម្បីបង្ហាញពីប្រជាធិបតេយ្យនៅប្រទេសថៃ ។

សារព័ត៌មាន Al Jazeera រាយការណ៍ថា លោក Pita Limjaroenrat ជាបេក្ខជននាយករដ្ឋមន្ត្រីមកពីគណបក្សកាវក្លៃ មិនទទួលបានសំឡេងគាំទ្រពីសមាជិកព្រឹទ្ធសភាដើម្បីធ្វើជានាយករដ្ឋមន្ត្រីទេ ក្នុងកិច្ចប្រជុំរួមគ្នារបស់សមាជិកសភាតំណាងរាស្ត្រ និងព្រឹទ្ធសភា កាលពីថ្ងៃទី១៣ ខែកក្កដា ឆ្នាំ២០២៣ ។ ការបរាជ័យលើកនេះ គឺជាឧបសគ្គចុងក្រោយបង្អស់របស់លោក Pita និងគណបក្សកាវក្លៃ ក្រោយពីតុលាការធម្មនុញ្ញ (Constitutional Court of Thailand) បានទទួលយកញត្តិនៃផែនការរបស់គណបក្សកាវក្លៃ ក្នុងការធ្វើវិសោធនកម្មច្បាប់មាត្រា១១២ និងញត្តិបង្ហាញពីគុណសម្បត្តិជាសមាជិកសភាតំណាងរាស្ត្ររបស់លោក Pita ពាក់ព័ន្ធនឹងរឿងលោកកាន់ភាគហ៊ុន ។

ក្រៅពីនេះ សារព័ត៌មាន News Asia និង Nikkei Asia បានចុះផ្សាយដូចគ្នាដែរថា លោក Pita បានទទួលបរាជ័យក្នុងការបោះឆ្នោតជ្រើសរើសនាយករដ្ឋមន្ត្រីលើកទី១ ហើយលោក Pita ព្រមទទួលស្គាល់លទ្ធផលបោះឆ្នោត ប៉ុន្តែលោកមិនព្រមចុះចាញ់ទេ ។ លោក Pita លើកឡើងថា លោកនឹងតែបន្តឆ្ពោះទៅមុខក្នុងការរួបរួមសំឡេងគាំទ្រសម្រាប់ការបោះឆ្នោតជ្រើសរើសនាយករដ្ឋមន្ត្រីលើកក្រោយ ។

ចំណែកសារព័ត៌មាន CNN រាយការណ៍ថា លោក Pita ជាបេក្ខជននាយករដ្ឋមន្ត្រីថៃតែម្នាក់គត់ ដែលទទួលបានសំឡេងគាំទ្រក្នុងរដ្ឋសភាមិនគ្រប់គ្រាន់ដើម្បីបង្កើតរដ្ឋាភិបាល ។ ហេតុនេះ វាជាការដើរថយក្រោយសម្រាប់អនាគតប្រជាធិបតេយ្យនៅប្រទេសថៃ បន្ទាប់ពីប្រទេសនេះស្ថិតនៅក្រោមការគ្រប់គ្រងរបស់កងទ័ពអស់រយៈពេលជិត១០ឆ្នាំ ។

រីឯសារព័ត៌មាន Reuters រាយការណ៍ថា លទ្ធផលបោះឆ្នោតលើកនេះ គឺជាការធ្វើតេស្តដ៏សំខាន់មួយអំពីឥទ្ធិពលនយោបាយរបស់លោក Pita និងជាការវាស់ស្ទង់ពីសំឡេងគាំទ្រលើគោលនយោបាយគណបក្សកាវក្លៃ រួមមាន ការបំបែកកងទ័ពចេញពីនយោបាយ, កម្ចាត់ការធ្វើអាជីវកម្មផ្តាច់មុខ និងការធ្វើវិសោធនកម្មមាត្រា១១២ ៕ ប្រភព ៖ Nation World News

បរទេស៖ YouTube ទើបតែបានប្រកាសថ្មីៗនេះនៅថ្ងៃទី១៤ ខែកក្កដា ថាខ្លួននឹងបញ្ចេញមុខងារថ្មីជាបន្តបន្ទាប់សម្រាប់អ្នកប្រើលើប្រព័ន្ធប្រតិបត្តិការ Windows នៅចុងខែកក្កដានេះ ដែលមុខងារថ្មីៗទាំងនោះមានដូចជា កែលម្អគុណភាពវីដេអូ, បន្ថែមមុខងារបង្វិលថ្មី, និង កែសម្រួល Dark Mode ឱ្យប្រសើរឡើង។

ដូចនេះ ជាមួយនឹងការកែលម្អគុណភាពវីដេអូ សម្រាប់គណនីជាវ YouTube Premium អ្នកប្រើប្រាស់នឹងត្រូវបានគាំទ្រជាមួយនឹងអត្រាប៊ីតខ្ពស់ជាង ដើម្បីបង្កើនបទពិសោធន៍មើលវីដេអូនៅលើ Windows ។ ជាពិសេស ជាមួយនឹងជម្រើស ១០៨០ Premium គុណភាពនៃវីដេអូ ១០៨០p នឹងត្រូវបានកែលម្អដោយការបង្កើនអត្រាប៊ីត ដែលពីមុន YouTube គាំទ្រតែជម្រើសនេះសម្រាប់ឧបករណ៍ iOS និងតំបន់ជាក់លាក់ប៉ុណ្ណោះ។

ចំពោះ ការបន្ថែមមុខងារបង្វិលថ្មីវិញ ពីមុនអ្នកប្រើប្រាស់បានប្រើគ្រាប់ចុចព្រួញនៅលើក្តារចុចរបស់ពួកគេដើម្បីបង្វិលវីដេអូឡើងវិញរយៈពេលប្រាំវិនាទី ជាមួយនឹងឧបករណ៍ដែលអាចចុចបាន ហើយអ្នកមានជម្រើសក្នុងការចុចពីរដងនៅផ្នែកខាងឆ្វេង ឬខាងស្តាំនៃវីដេអូ ដើម្បីឆ្ពោះទៅមុខ ឬថយក្រោយ។ ប៉ុន្តែបច្ចុប្បន្ននេះ Google បានបន្ថែមមុខងារវិលថយក្រោយថ្មីទៅ YouTube ដែលអនុញ្ញាតឱ្យអ្នកប្រើប្រាស់លឿនទៅមុខ ឬថយក្រោយ ១០ វិនាទីនៅពេលមើលវីដេអូ។

សម្រាប់ ការកែសម្រួល Dark Mode ឱ្យប្រសើរឡើង បច្ចុប្បន្ននេះ នៅពេលដែលអ្នកប្រើប្រាស់បានប្តូរចំណុចប្រទាក់ You Tube ទៅជា Dark Mode នោះ ស៊ុមបង្ហាញការផ្ដល់យោបល់នៅលើរបារស្វែងរករបស់ YouTube នៅតែមិនប្តូរទៅរបៀបងងឹតបាន។ ដូចនេះ Google បាននិយាយថាការអាប់ដេតនាពេលខាងមុខនឹងដោះស្រាយបញ្ហាការបង្ហាញ មុខងារ Dark Mode នឹងត្រូវបានកែលម្អដើម្បីផ្តល់នូវបទពិសោធន៍ដែលស៊ីគ្នាជាងមុនសម្រាប់អ្នកប្រើប្រាស់៕ ប្រភព៖cafef.com

ប្រទេសថៃ ៖ កាលពីថ្ងៃទី១៣ ខែកក្កដា កន្លងមក លោក Chuvit Kamolwisit អតីតអ្នកនយោបាយបានបញ្ចេញមតិក្នុងហ្វេសប៊ុកផ្ទាល់ខ្លួនថា ៖ «ដកថយល្អជាង ថ្ងៃនេះ (ថ្ងៃទី១៣ ខែកក្កដា) ការបោះឆ្នោតជ្រើសរើសនាយករដ្ឋមន្ត្រីថៃបានដឹងលទ្ធផលហើយ ។ វាមិនខុសពីអ្វីដែលខ្ញុំធ្លាប់និយាយទេ គឺគេនឹងរារាំងលោក Pita Limjaroenrat មិនឱ្យធ្វើជានាយករដ្ឋមន្ត្រី ដោយពួកគេមានគំនិតថា បើមានគណបក្សកាវក្លៃ ត្រូវតែគ្មានសមាជិកព្រឹទ្ធសភា» ។

លោក Chuvit Kamolwisit បន្តថា គ្មានអ្វីគួរឱ្យភ្ញាក់ផ្អើលទេ បើទោះជាលោក Pita បានបញ្ជាក់ក្រោយពីលោកទទួលបរាជ័យក្នុងការបោះឆ្នោតជ្រើសរើសនាយករដ្ឋមន្ត្រីថា ការតស៊ូនឹងមិនទាន់បញ្ចប់ទេ ហើយលោក Pita ព្រមទទួលស្គាល់លទ្ធផលបោះឆ្នោត ប៉ុន្តែលោកមិនព្រមចុះចាញ់ ។ ការបោះឆ្នោតជ្រើសរើសនាយករដ្ឋមន្ត្រីថៃលើកទី២ នឹងទទួលលទ្ធផលបរាជ័យដូចដើម ។

លោកបន្ថែមថា គណបក្សកាវក្លៃត្រូវជ្រើសរើសថា យល់ព្រមដកថយរឿងការធ្វើវិសោធនកម្មច្បាប់មាត្រា១១២ ដែលច្បាប់នេះពាក់ព័ន្ធនឹងសិទ្ធិសេរីភាពបញ្ចេញមតិរបស់ពលរដ្ឋចំពោះព្រះមហាក្សត្រថៃ ។ ការធ្វើវិសោធនកម្មច្បាប់មាត្រា១១២ គឺជាការបែងចែក ហើយវាជាកត្តាសំខាន់ដែលធ្វើឱ្យលោក Pita មិនបានធ្វើជានាយករដ្ឋមន្ត្រីប្រទេសថៃ ។ ការបង្កើតរដ្ឋាភិបាលមិនចាំបាច់ពឹងផ្អែកជាចម្បងលើកំណែទម្រង់ស្ថាប័នទេ ព្រោះនៅមានរឿងជាច្រើនទៀតដែលរដ្ឋាភិបាលត្រូវបំពេញ ។

លោកបន្ថែមទៀតថា ៖ «ខ្ញុំមានទំនុកចិត្តថា អ្នកបោះឆ្នោតគាំទ្រគណបក្សកាវក្លៃចំនួន១៤លានសំឡេង ពួកគេមិនត្រូវការឱ្យគណបក្សត្រូវតែកែទម្រង់ស្ថាប័នជាជំហានដំបូងទេ ហើយខ្ញុំសោកស្តាយជំនួសគណបក្សកាវក្លៃដែលទទួលបានសំឡេងឆ្នោតច្រើន ខណៈគណបក្សនេះលើកឡើងថា បើមានលោក ប្រាយុទ្ធ ចាន់អូចា គឺគ្មានគណបក្សកាវក្លៃ» ។

បើគណបក្សកាវក្លៃមិនរឹងរូស និងយល់ព្រមធ្វើកំណែទម្រង់គោលនយោបាយរបស់ខ្លួន ពាក់ព័ន្ធនឹងការធ្វើវិសោធនកម្មច្បាប់មាត្រា១១២ វានឹងជាឱកាសរបស់លោក Pita ទទួលបានជោគជ័យធ្វើជានាយករដ្ឋមន្ត្រីថៃ និងធ្វើការបម្រើពលរដ្ឋថៃគ្រប់រូប មិនថាពួកគេបោះឆ្នោតគាំទ្រគណបក្សកាវក្លៃ ឬក៏អត់ ។ មុននឹងហួសពេល គណបក្សកាវក្លៃត្រូវរៀនសូត្រថា តើមានអ្វីសំខាន់សម្រាប់ប្រទេសជាតិខ្លះ ? ហើយគ្មានអ្នកណាអាចធ្វើបានគ្រប់យ៉ាងទេ ជាពិសេសបំផុត វាមិនទាន់ដល់ពេលធ្វើវិសោធនកម្មច្បាប់មាត្រា១១២ ទេ ហើយវាមិនមែនរឿងតែមួយដែលកាវក្លៃបានសន្យាជាមួយពលរដ្ឋទេ ។

ការប្រកាន់ភ្ជាប់របស់គណបក្សកាវក្លៃលើការធ្វើវិសោធនកម្មច្បាប់មាត្រា១១២ បើទោះគណបក្សនេះដឹងថានឹងបរាជ័យ ហើយចង់បំពេញតម្រូវការរបស់មនុស្សមួយក្រុមនោះ ហេតុអ្វីគណបក្សនេះខំប្រឹងធ្វើវាម៉្លេះ ? ទាំងដែលគណបក្សនេះអាចប្រាប់ទៅពលរដ្ឋថា គណបក្សកាវក្លៃជារដ្ឋាភិបាលចម្រុះ មិនមែនជារដ្ឋាភិបាលមានបក្សនយោបាយតែមួយទេ ។

លោកបញ្ជាក់ថា ៖ «បើគណបក្សនេះនៅតែប្រកាន់ភ្ជាប់នូវការធ្វើវិសោធនកម្មច្បាប់មាត្រា១១២ សូមឱ្យការបោះឆ្នោតលើកក្រោយ ពលរដ្ឋត្រូវជ្រើសរើសគណបក្សកាវក្លៃឱ្យបានលើសពាក់កណ្តាលនៃចំនួនសំឡេងឆ្នោតសរុប ។ ខ្ញុំនិយាយនេះ តាមបទពិសោធន៍ធ្វើនយោបាយកន្លងមក និងរកផ្លូវដើម្បីឱ្យគណបក្សកាវក្លៃទទួលបានជោគជ័យធ្វើជារដ្ឋាភិបាល មិនមែនតាមចិត្តខ្លួនឯងទេ ។ ការណែនាំរបស់ខ្ញុំ គឺគណបក្សកាវក្លៃត្រូវយល់ព្រមដកថយល្អជាង ហើយបង្ហាញថា ខ្លួននឹងបោះបង់ចោលការធ្វើវិសោធនកម្មច្បាប់មាត្រា១១២» ៕ ប្រភព ៖ khaosod

បរទេស៖ ពណ៌នៃមហាសមុទ្របានផ្លាស់ប្តូរយ៉ាងខ្លាំងក្នុងរយៈពេល ២០ ឆ្នាំកន្លងមកនេះ ដែលភាគច្រើនទំនងជាការប្រែប្រួលអាកាសធាតុដោយសារសកម្មភាពរបស់មនុស្ស។
យោងតាមប្រភពព័ត៌មាន Nature កាលពីថ្ងៃទី១២ ខែកក្កដា បានឱ្យដឹងថា ជាង ៥៦% នៃមហាសមុទ្ររបស់ពិភពលោកបានប្រែពណ៌ទៅជាពណ៌បៃតងកាន់តែច្រើនក្នុងរយៈពេលពីរទសវត្សរ៍ចុងក្រោយនេះ ដែលឆ្លុះបញ្ចាំងពីការផ្លាស់ប្តូរនៃប្រព័ន្ធអេកូឡូស៊ី។ បាតុភូតនេះមិនអាចពន្យល់បានដោយការប្រែប្រួលធម្មជាតិនោះទេ នេះបើយោងតាមក្រុមស្រាវជ្រាវដែលដឹកនាំដោយអ្នកវិទ្យាសាស្ត្រមកពីមជ្ឈមណ្ឌលមហាសមុទ្រជាតិរបស់ចក្រភពអង់គ្លេស និងវិទ្យាស្ថានបច្ចេកវិទ្យា Massachusetts សហរដ្ឋអាមេរិក។

លោកស្រី Stephanie Dutkiewicz អ្នកវិទ្យាសាស្ត្រនៅនាយកដ្ឋាន MIT នៃផែនដី និងវិទ្យាសាស្ត្របរិយាកាសភព បាននិយាយថា យើងមិនដឹងច្បាស់ថាតើប្រព័ន្ធអេកូឡូស៊ីទាំងនេះផ្លាស់ប្តូរទៅជាយ៉ាងណាទៀតទេ ខណៈពេលដែលមហាសមុទ្រនៅតែបន្តឡើងកំដៅខ្លាំង ដែលធ្វើឱ្យប៉ះពាល់ដល់សមត្ថភាពរបស់មហាសមុទ្រក្នុងការរក្សាទុកកាបូនផងដែរ។ លោកស្រីក៏បានសង្កត់ធ្ងន់ថាការប្រែប្រួលអាកាសធាតុអាក្រក់បែបនេះគឺភាគច្រើនអាចបណ្តាលមកពីសកម្មភាពរបស់មនុស្ស។

ក្រុមអ្នកស្រាវជ្រាវក៏បានតាមដានការផ្លាស់ប្តូរពណ៌ទឹកសមុទ្រពីលំហ ដោយសង្កេតមើលបរិមាណនៃពន្លឺពណ៌បៃតង ឬពណ៌ខៀវដែលឆ្លុះបញ្ចាំងពីផ្ទៃសមុទ្រ។ ពួកគេបានប្រើប្រាស់ទិន្នន័យពីផ្កាយរណប Aqua ដែលបានតាមដានការផ្លាស់ប្តូរពណ៌ទឹកសមុទ្រអស់រយៈពេលជាង ២ ទសវត្សរ៍ ហើយបានរកឃើញភាពខុសគ្នាយ៉ាងខ្លាំងនៃពណ៌ពីឆ្នាំ ២០០២ ដល់ឆ្នាំ ២០២២។ ទោះជាយ៉ាងណាក៏ដោយ ក្រុមអ្នកស្រាវជ្រាវមិនមានការភ្ញាក់ផ្អើលទេចំពោះការរកឃើញនេះ ដោយពួកគេនៅតែបន្តធ្វើការស្វែងយល់ឱ្យកាន់តែច្បាស់បន្ថែមទៀតអំពីមូលហេតុនៃការផ្លាស់ប្តូរពណ៌នៅក្នុងតំបន់មហាសមុទ្រផ្សេងៗទៀត៕ ប្រភព៖vnexpress

សហព័ន្ធបាល់ទាត់ទ្វីបអាស៊ី (Asian Football Confederation) បានធ្វើការដាក់ពិន័យបន្ថែមទៀត ទៅលើករណីហិង្សា នៅក្នុងវគ្គផ្ដាច់ព្រ័ត្រព្រឹត្តិការណ៍កីឡាស៊ីហ្គេមលើកទី៣២ ដែលបញ្ចប់ដោយឥណ្ឌូណេស៊ីយកឈ្នះថៃក្នុងលទ្ធផល ៥-២។

ការពិន័យទាំងនោះរួមមាន៖

ថៃ

• កីឡាករ ១នាក់ និងមន្ត្រីកីឡាថៃ ៣នាក់ ត្រូវបានផ្អាកមិនឱ្យប្រកួតចំនួន ៦ប្រកួត និងពិន័យជាប្រាក់ម្នាក់ ១ពាន់ដុល្លារ
• មន្ត្រីកីឡាថៃ ៤នាក់ ត្រូវបានផ្អាកមិនឱ្យប្រកួតចំនួន ៦ប្រកួត
• ពិន័យសហព័ន្ធបាល់ទាត់ថៃ ជាទឹកប្រាក់ ១មុឺនដុល្លារ

ឥណ្ឌូនេសុី

• កីឡាករ ២នាក់ និងមន្ត្រីកីឡា ២នាក់ត្រូវបានផ្អាកមិនឱ្យប្រកួតចំនួន ៦ប្រកួត និងពិន័យជាប្រាក់ម្នាក់ ១ពាន់ដុល្លារ
• កីឡាករ ១នាក់ និងបុគ្គលិក ១នាក់ត្រូវបានផ្អាកមិនឱ្យប្រកួតចំនួន ៦ប្រកួត