បរទេស៖ យោងតាមទិន្នន័យដែលបានចេញផ្សាយថ្មីកាលពីថ្ងៃទី២៣ ខែកក្កដា បានឱ្យដឹងថា អតិផរណាស្នូលរបស់ប្រទេសជប៉ុន ក្នុងខែមិថុនា បានកើនឡើង ០.១% បើធៀបនឹងខែឧសភា គឺ ៣.៣%។ មូលហេតុចម្បងគឺដោយសារតម្លៃអគ្គិសនីកើនឡើងខ្លាំង ដែលការកើនឡើងនេះនៅតែទាបជាងការព្យាករណ៍ (៣.៥%) របស់ធនាគារកណ្តាលជប៉ុន (BOJ)។ ទន្ទឹមនឹងនេះ អតិផរណារបស់សហរដ្ឋអាមេរិកមានត្រឹមតែ ៣% នៅក្នុងខែមិថុនា។ ដូច្នេះហើយ អតិផរណារបស់ជប៉ុនបានលើសសហរដ្ឋអាមេរិកជាលើកដំបូងក្នុងរយៈពេល ៨ ឆ្នាំ ។

នៅថ្ងៃទី ២០ ខែកក្កដា រដ្ឋាភិបាលជប៉ុនបានព្យាករណ៍ថា អតិផរណានៅឆ្នាំនេះអាចឈានដល់ ២.៦% ខ្ពស់ជាង ២% ដែលស្នើឡើងដោយ BOJ ។ ខណៈពេលដែលកាត់បន្ថយគោលដៅកំណើនពី ១.៥% ទៅ ១.៣% ។ នៅសប្តាហ៍នេះ ទេសាភិបាលធនាគារកណ្តាលជប៉ុន លោក Kazuo Ueda បានផ្តល់សញ្ញាថា វិធានការបន្ធូរបន្ថយ នឹងត្រូវរក្សានៅកិច្ចប្រជុំនៅសប្តាហ៍ក្រោយ។ ការផ្លាស់ប្តូរនេះដោយលោក Ueda បានបណ្តាលឱ្យ ប្រាក់យ៉េនធ្លាក់ចុះធៀបនឹង USD ទោះបីជាមានសញ្ញាកើនឡើងក្នុងសប្តាហ៍មុនក៏ដោយ។

លោក Yoshiki Shinke ប្រធានសេដ្ឋវិទូនៅវិទ្យាស្ថានស្រាវជ្រាវ Dai-ichi Life បាននិយាយថា អតិផរណានៅកម្រិត ៣-៤% គឺ “មិនទាបទៀតទេ” ។ លោកបានអត្ថាធិប្បាយថា “អាជ្ញាធរចាំបាច់ត្រូវចាត់វិធានការដោយប្រុងប្រយ័ត្នពីព្រោះក្រុមហ៊ុនមានឆន្ទៈក្នុងការបញ្ជូនបន្ទុកលើអ្នកប្រើប្រាស់” ។
បច្ចុប្បន្ននេះ ប្រទេសជប៉ុនគឺជាប្រទេសតែមួយគត់ក្នុងពិភពលោកដែលមានអត្រាការប្រាក់អវិជ្ជមាន។ ទោះជាយ៉ាងណាក៏ដោយ ការរក្សាបាននូវអត្រាការប្រាក់ទាបកំពុងធ្វើឱ្យគោលនយោបាយរបស់ពួកគេប្រឆាំងនឹងរលកនៃការរឹតបន្តឹងជាសកល។ នៅក្នុងបរិបទបច្ចុប្បន្ន ទិន្នន័យអតិផរណាកំពុងបង្កើនប្រូបាប៊ីលីតេដែល BOJ នឹងកែសម្រួលគោលនយោបាយរូបិយវត្ថុ ហើយដូច្នេះអាចបណ្តាលឱ្យមានផលប៉ះពាល់មួយចំនួនលើហិរញ្ញវត្ថុសកល៕ ប្រភព៖vnexpress

ប្រទេសហ្វីលីពីន ៖ ធនាគារអភិវឌ្ឍន៍អាស៊ី (The Asian Development Bank: ADB) បានរំពឹងថា នៅឆ្នាំ២០២៣ ហ្វីលីពីននឹងក្លាយជាប្រទេសដែលមានសេដ្ឋកិច្ចរីកចម្រើនបំផុតនៅតំបន់អាស៊ាន ហើយផលិតផលក្នុងស្រុកសរុប (GDP) អាចនឹងកើនឡើងស្មើ៦% នៅឆ្នាំ២០២៣ ។ ចំណែកសេដ្ឋកិច្ចប្រទេសឥណ្ឌូណេស៊ីនឹងកើនឡើងស្មើ៤,៨%, ម៉ាឡេស៊ី ៤,៧%, សិង្ហបុរី ១,៥%, ថៃ ៣,៥% និងវៀតណាម ៥,៨% ។

ទោះយ៉ាងណា សេដ្ឋកិច្ចហ្វីលីពីនបានកើនឡើងស្មើ៦,៤% ក្នុងត្រីមាសទី១ ឆ្នាំ២០២៣ ដោយសារការវិនិយោគទុនដ៏រឹងមាំរបស់ក្រុមហ៊ុនឯកជន ។ ហេតុនេះ វាបានជំរុញដល់ការជួលកម្លាំងពលកម្មកាន់តែខ្ពស់, ការពង្រីកផ្នែកផលិតកម្ម និងការលក់រាយ ព្រមទាំងការសាងសង់របស់រដ្ឋ និងក្រុមហ៊ុនឯកជនផងដែរ ។

ចំណែកវិស័យទេសចរណ៍របស់ហ្វីលីពីន ក៏បានងើបឡើងវិញផងដែរ ខណៈវិស័យសេវាកម្មគ្រប់គ្រងប្រព័ន្ធអាជីវកម្ម រួមទាំងសេវាព័ត៌មានបានរក្សាកម្រិតលូតលាស់យ៉ាងរឹងមាំ ។ ហេតុនេះ ធនាគារ ADB ប៉ាន់ស្មានថា សេដ្ឋកិច្ចហ្វីលីពីននឹងរីកលូតលាស់រហូតដល់៦,២% នៅឆ្នាំ២០២៤ ។ ជាមួយគ្នានេះ គេរំពឹងថា អតិផរណានឹងឈានដល់៦,២% នៅឆ្នាំ២០២៣ ប៉ុន្តែវានឹងធ្លាក់ចុះនៅត្រឹម៤% នៅឆ្នាំ២០២៤ ។

សម្រាប់កំណើនសេដ្ឋកិច្ចនៅតំបន់អាស៊ានទាំងមូលត្រូវបានគេរំពឹងថា នឹងធ្លាក់ចុះពីអត្រា៤,៧% មកស្មើត្រឹម៤,៦% នៅឆ្នាំ២០២៣ ។ លើសពីនេះ វានឹងធ្លាក់ចុះពីអត្រា៥% មកស្មើត្រឹម៤,៧% នៅឆ្នាំ២០២៤ ដោយសារការធ្លាក់ចុះនៃតម្រូវការនាំចេញទំនិញនៅទូទាំងពិភពលោក បើទោះជាតម្រូវការនៅក្នុងស្រុកពុំទាន់មានការផ្លាស់ប្តូរ ៕ ប្រភព ៖ AEC connect

រាជធានីបាងកក៖ គណបក្សភឿថៃ កំពុងតែប្រឈមមុខនឹងសម្ពាធយ៉ាងធ្ងន់ មកពីគណបក្សមានទំនោរទៅលើយោធារាជានិយម នៅក្នុងការបង្កើតរដ្ឋាភិបាលថ្មី ហើយគណបក្សមួយនេះ នឹងសម្រេចជោគវាសនារបស់គណបក្សឆ្ពោះទៅមុខ នៅថ្ងៃអង្គារនេះ។

សារព័ត៌មានរបស់ថៃ បានចេញផ្សាយ កាលពីថ្ងៃចន្ទ ទី២៤ ខែកក្កដា ថា សម្ពន្ធភាពចម្រុះចំនួន៨គណបក្ស នឹងជួបប្រជុំគ្នា នៅថ្ងៃអង្គារ ដើម្បីសម្រេច ថាតើគណបក្សឆ្ពោះទៅមុខ (Move Forward Party) ហៅកាត់ MFP ដែលបានឈ្នះ នៅក្នុងការបោះឆ្នោតសកល កាលពីថ្ងៃ ទី១៤ ខែកក្កដា នឹងនៅតែចូលរួមជាមួយសម្ពន្ធភាព នៅក្នុងការបង្កើតរដ្ឋាភិបាលថ្មី ក្រោយពេលគណបក្សនយោបាយផ្សេងៗទៀត មិនគាំទ្រដល់សម្ពន្ធភាពចម្រុះទាំង៨គណបក្សនេះ នៅក្នុងការបោះឆ្នោតនាយករដ្ឋមន្រ្ដីថ្មីរបស់ប្រទេសថៃ ប្រសិនបើគណបក្សឆ្ពោះទៅមុខ នៅតែបន្ដរួបរួមជាមួយគណបក្សភឿថៃ។

គណបក្សភឿថៃ (Pheu Thai Party) ហៅកាត់ PT កំពុងតែខិតខំប្រឹងប្រែង រួមគ្នាបង្កើតរដ្ឋាភិបាលថ្មី នៅក្នុងរយៈពេលប៉ុន្មានថ្ងៃកន្លងមកនេះ បន្ទាប់ពីលោក ភីថា លីមចារឿនរ៉ាត មេដឹកនាំគណបក្ស MFP មិនបានទទួលនូវសំឡេងគាំទ្រ ភាគច្រើនគ្រប់គ្រាន់ ទៅតាមច្បាប់កំណត់ ពីសភាទាំង២របស់ប្រទេសថៃ សម្រាប់ការឈានទៅកាន់កាប់តំណែងនាយករដ្ឋមន្រ្ដី កាលពីថ្ងៃទី១៣ ខែកក្កដា ខណៈសភាបានច្រានចោលនូវការតែងតាំងជាលើកទី២ នៅថ្ងៃទី១៩ ខែកក្កដា។ ឥឡូវ គណបក្សភឿថៃ កំពុងតែស្នើឲ្យមានកិច្ចគាំទ្រ មកពីគណបក្សផ្សេងៗទៀត នៅក្នុងអំឡុងពេលបោះឆ្នោត ជាលើកទី២ គ្រោងនឹងធ្វើ នៅថ្ងៃព្រហស្បតិ៍ ទី២៧ ខែកក្កដា។

លោក ឆូលណាន់ ស្រីកែវ (Cholnan Srikaew) ប្រធានគណបក្សភឿថៃ បានបញ្ជាក់ ថា ការឆ្លើយតបជាទូទៅ គឺគណបក្សនយោបាយជាច្រើន អាចមិនព្រមធ្វើការជាមួយនឹងគណបក្សភឿថៃ ប្រសិនបើគណបក្សឆ្ពោះទៅមុខ ក្លាយជាដៃគូសម្ពន្ធភាពដ៏ធំរបស់ខ្លួន។ គណបក្សឆ្ពោះទៅមុខ នៅតែប្រកាន់គោលជំហររបស់ខ្លួន ធ្វើវិសោធនកម្ម លើមាត្រាទី១១២ នៃក្រមព្រហ្មទណ្ឌ ពាក់ព័ន្ធនឹងការប្រមាថព្រះមហាក្សត្រ។

លោក ឆូលណាន់ ស្រីកែវ ប្រធានគណបក្សគណបក្សភឿថៃ បានបន្ដ ថា គាត់កំពុងតែនិយាយគ្នា អំពីរឿងនេះ ក្រោយចរចាជាមួយនឹងគណបក្សប៉ាឡាំងប្រាឆារ៉ាត (Palang Pracharath Party) ហៅកាត់ PPRP កាលពីថ្ងៃអាទិត្យ។ ចំណុចដ៏សំខាន់ទាំងនេះ នឹងត្រូវបានរាយការណ៍ ត្រឡប់ទៅកាន់សម្ពន្ធភាពរបស់គណបក្សភឿថៃ នៅមុនពេលការសម្រេចចិត្តបន្ថែមទៀត នឹងត្រូវធ្វើឡើង ទាក់ទងនឹងសមាសភាព នៃសម្ពន្ធភាពចម្រុះ។

គណបក្សភឿថៃ កំពុងតែផ្ដោតលើគោលបំណង ស្វែងរកការចរចាជាមួយនឹងគណបក្សនយោបាយជាច្រើនផ្សេងទៀត លើកលែងតែគណបក្សប្រជាធិបតេយ្យ ហាក់បីដូចជា នៅមិនទាន់ពិចារណានៅឡើយ សម្រាប់កិច្ចពិភាក្សា។

លោក ឆូលណាន់ ស្រីកែវ បានបន្ដ ថា «នៅមុនពេលគណបក្សភឿថៃ តែងតាំងបេក្ខជននាយករដ្ឋមន្រ្ដី គឺសម្ពន្ធភាពចម្រុះទាំង៨គណបក្សនេះ នឹងត្រូវតែសន្និដ្ឋាន អំពីវិធីសាស្រ្ដផ្សេង សម្រាប់គណបក្សភឿថៃ អាចធានាដល់ការទទួលបានសំឡេងគាំទ្រយ៉ាងតិច ចំនួន៣៧៥សំឡេង សម្រាប់ការគាំទ្រដល់បេក្ខភាពនាយករដ្ឋមន្រ្ដី។

គណបក្សភឿថៃ ក៏បានសម្រេចចិត្តបញ្ជូនលោក ស៊ូរីយ៉ា ចាំងគ្រុងគ្រាងគីត (Suriya Jungrungreangkit) អតីតរដ្ឋមន្ត្រីឧស្សាហកម្ម ដឹកនាំកិច្ចពិភាក្សានេះ ដោយចាប់ផ្តើម កាលពីពីថ្ងៃចន្ទ ជាមួយនឹងសមាជិកព្រឹទ្ធសភាមួយចំនួន។

លោក សានទី ប៊្រុមផាត (Santi Promphat) អគ្គលេខាធិការគណបក្សប៉ាឡាំងប្រាឆារ៉ាត (Palang Pracharath Party) ហៅកាត់ PPRP បានបញ្ជាក់ ថា គណបក្សរបស់គាត់ យល់ឃើញ ថា ចេតនារបស់គណបក្សឆ្ពោះទៅមុខ (MFP) ចង់ធ្វើវិសោធនកម្ម លើមាត្រា១១២ ពាក់ព័ន្ធនឹងការប្រមាថព្រះមហាក្សត្រ។ សកម្មភាពបែបនេះ ជាការមិនអាចទទួលយកបាននោះឡើយ ហើយគណបក្ស PPRP ក៏បានប្រកាសអំពីគោលជំហរយ៉ាងម៉ឺងម៉ាត់របស់ខ្លួន ប្រឆាំងនឹងគោលដៅរបស់គណបក្សឆ្ពោះទៅមុខ។

លោក សានទី ប៊្រុមផាត អគ្គលេខាធិការគណបក្សប៉ាឡាំងប្រាឆារ៉ាត បានបន្ដ ថា «គណបក្ស PPRP ក៏បានប្រាប់រួចមកហើយទៅដល់គណបក្សភឿថៃ អំពីករណីនេះ។ គោលបំណងរបស់គណបក្សឆ្ពោះទៅមុខ ត្រូវតែធ្វើវិសោធនកម្មច្បាប់ ស្តីពីការប្រមាថព្រះមហាក្សត្រ ហើយបញ្ហានេះ ក្លាយជាដើមចមដ៏សំខាន់ អាចជំរុញឲ្យគណបក្ស PPRP មិនគាំទ្រ ដល់គណបក្សភឿថៃ ព្រោះតែគណបក្សនេះ បានចូលរួមជាមួយសម្ពន្ធភាពចម្រុះថ្មីទាំង៨គណបក្សនោះ»។

ទន្ទឹមគ្នានេះ លោក ថាម៉ាណាត ប៊្រុមប៉ាវ (Thamanat Prompow) សមាជិកសភា មកពីគណបក្សប៉ាឡាំងប្រាឆារ៉ាត សម្រាប់ខេត្តផាយ៉ាវ (Phayao) បានបញ្ជាក់ ថា គណបក្ស PPRP របស់គាត់ នឹងមិនតែងតាំងលោកឧត្ដមសេនីយ៍ ប្រាវីត វង់ស៊ូវ៉ាន់ (Prawit Wongsuwon) សម្រាប់ការបោះឆ្នោតនាយករដ្ឋមន្រ្ដី នោះទេ។ បញ្ហានេះក៏ដោយសារតែគណបក្សរបស់គាត់ខកខាតមិនឈានដល់គោលដៅរបស់ខ្លួន សម្រាប់ការឈ្នះឆ្នោតសកលរបស់ប្រទេសថៃ យ៉ាងតិច ចំនួន២៥០អាសនៈ នៅក្នុងរដ្ឋសភា។

ជាមួយនឹងការទន្ទឹងរង់ចាំគណបក្សភឿថៃ បង្កើតរដ្ឋាភិបាលចម្រុះនោះ ព្រឹទ្ធសភា កាលពីថ្ងៃអាទិត្យ (ទី២៣ ខែកក្កដា) បានលើកឡើង ថា គណបក្សភឿថៃ អាចនឹងពិចារណាពន្យារពេលការបោះឆ្នោតនាយករដ្ឋមន្ត្រីថ្មី រហូតដល់ដើមខែសីហា ប្រសិនបើគណបក្សភឿថៃ នៅតែមិនទាន់ប្រមូលសំឡេងគាំទ្រឲ្យមានចំនួនគ្រប់គ្រាន់ សម្រាប់បេក្ខជនរបស់ខ្លួន និងមិនទាន់បានត្រៀមខ្លួនរួចរាល់ សម្រាប់ការបោះឆ្នោតបន្ដទៀត៕

ពិតណាស់ ប្រភេទកីឡានៅលើពិភពលោកយើងនេះគឺមានច្រើនណាស់ ដូច្នេះហើយតើអ្នកដឹងទេ? កីឡាប្រភេទណាខ្លះដែលមានអ្នកគាំទ្រច្រើន និងមានការពេញនិយមបំផុតនៅលើពិភពលោក? ខាងក្រោមនេះគឺជាបញ្ជីឈ្មោះកីឡាពេញនិយមបំផុតទាំង ១០ របស់ពិភពលោក៖

១.កីឡាបាល់ទាត់ (Football)៖ មានចំនួនអ្នកគាំទ្ររហូតដល់ ៣.៥ ពាន់លាននាក់ ដែលពេញនិយមលេងនៅទូទាំងពិភពលោក។

២.កីឡាគ្រីឃីត (Cricket)៖ មានអ្នកគាំទ្រ ២.៥ ពាន់លាននាក់ ដែលពេញនិយមនៅបណ្តាប្រទេសមួយចំនួនដូចជា អូស្រ្តាលី អាហ្រ្វិក ចក្រភពអង់គ្លេស និងទ្វីបអាស៊ី។

៣.កីឡាហុកគី (Hockey)៖ ហុកគី មានអ្នកគាំទ្រចំនួន ២ ពាន់លាននាក់ ហើយកីឡានេះត្រូវគេនិយមលេងនៅតំបន់អាស៊ី អឺរ៉ុប អាហ្រ្វិក និងនៅអូស្រ្តាលី។

៤.កីឡាតេនីស (Tennis)៖ មានអ្នកគាំទ្រប្រហែល ១ ពាន់លាននាក់ និងមានការពេញនិយមទូទាំងពិភពលោក។

៥.កីឡាបាល់ទះ (Volleyball)៖ មានអ្នកគាំទ្រ ៩០០ លាននាក់ និងត្រូវគេនិយមលេងនៅជុំវិញពិភពលោក។

៦.កីឡាវាយប៉េងប៉ុង (Table Tennis/Ping Pong)៖ មានអ្នកគាំទ្រ ៨៥០ លាននាក់ និងមានការពេញនិយមទូទាំងពិភពលោក។

៧.កីឡាបាល់បោះ (Basketball)៖ មានអ្នកគាំទ្រ ៥០០ លាននាក់ និងមានការពេញនិយមជាសកល។

៨.កីឡាវាយកូនគោល (Golf)៖ មានអ្នកគាំទ្រប្រហែល ៤៥០ លាននាក់ កីឡាប្រភេទនេះត្រូវគេនិយមលេងនៅក្នុងតំបន់អាមេរិកខាងជើង អឺរ៉ុបខាងលិច និងអាស៊ីខាងកើត។

៩.កីឡាវាយកូនបាល់ (Baseball)៖ មានអ្នកគាំទ្រប្រមាណ ៤០០ លាននាក់ ដែលមានការនិយមលេងនៅតំបន់អាមេរិក សមុទ្រការីបង់ និងអាស៊ីខាងកើត។

១០.កីឡាបាល់ឱប (Rugby)៖ មានអ្នកគាំទ្រខ្ទង់ ៤០០ លាននាក់ ហើយមានការពេញនិយមនៅតំបន់អាហ្រ្វិក អាស៊ី អាមេរិក អឺរ៉ុប ចក្រភពអង់គ្លេស និងអូស្រ្តាលី៕

ពិតណាស់ នៅពេលដែលចំនួនប្រជាជនកើនឡើង ហើយសេដ្ឋកិច្ចកាន់តែរីកធំ កាកសំណល់ ឬសំរាមក៏កាន់តែច្រើនពាសពេញបណ្តាប្រទេសជុំវិញពិភពលោក។ គិតត្រឹមពាក់កណ្តាលឆ្នាំ២០២៣ នេះដោយយោងតាមទិន្នន័យសកលរបស់អង្គការគ្រប់គ្រងកាកសំណល់ និងធនាគាពិភពលោក បានរកឃើញថា មានប្រទេសចំនួន ៥ ដែលផលិតកាកសំណល់ច្រើនជាងគេបង្អស់នៅលើពិភពលោក ដោយប្រទេសទាំងនោះមានដូចជា៖

១.ប្រទេសកាណាដា (Canada)៖ យោងតាមការប៉ាន់ប្រមាណនៃការបង្កើតកាកសំណល់សរុបរបស់ប្រទេសកាណាដាគឺធំជាងគេបំផុតនៅក្នុងពិភពលោកទាំងមូល។ វាមានកាកសំណល់សរុបប្រចាំឆ្នាំប៉ាន់ស្មានគឺជាង ១ ពាន់លានតោន។ ដោយគិតគូរពីប្រជាជនកាណាដាចំនួន ៣៦.៧ លាននាក់ នោះកាកសំណល់ប្រចាំឆ្នាំប៉ាន់ស្មានក្នុងមនុស្សម្នាក់ផលិតសំរាមជាង ៣៦.១ តោន។

២.ប្រទេសប៊ុលហ្គារី (Bulgaria)៖ ប្រទេសប៊ុលហ្គារីមានប្រជាជនប្រមាណ ៧ លាននាក់ ដោយមនុស្សម្នាក់បង្កើតសំរាម ២៦.៧ តោន ដូចនេះចំនួនកាកសំណល់សរុបប្រចាំឆ្នាំប៉ាន់ស្មានគឺជាង ១០០ លានតោន។

៣.ប្រទេសអាមេរិក (United States)៖ សហរដ្ឋអាមេរិកមានប្រជាជនច្រើនជាងគេទីបីក្នុងចំណោមប្រទេសទាំងអស់នៅលើពិភពលោក យោងតាមការប៉ាន់ប្រមាណនៃការបង្កើតកាកសំណល់សរុបប្រចាំឆ្នាំរបស់ប្រទេសនេះគឺ ២៥៨ លានតោន ដោយក្នុងម្នាក់ផលិតសំរាម ៤.៥ តោន។

៤.ប្រទេសអេស្តូនី (Estonia)៖ សំណល់ប្រចាំឆ្នាំប៉ាន់ស្មានរបស់អេស្តូនីក្នុងមនុស្សម្នាក់គឺ ២៣.៥ តោន ហើយចំនួនកាកសំណល់ប្រចាំឆ្នាំប៉ាន់ស្មានរបស់វាគឺជាង ៣០ លានតោន។

៥.ប្រទេសហ្វាំងឡង់ (Finland)៖ ប្រជាជនហ្វាំងឡង់មានចំនួន ៥,៥ លាននាក់។ កាកសំណល់ប្រចាំឆ្នាំដែលបានប៉ាន់ប្រមាណក្នុងមនុស្សម្នាក់ៗគឺ ១៦.៦ តោន ហើយបរិមាណកាកសំណល់ប្រចាំឆ្នាំប៉ាន់ស្មានរបស់ប្រទេសនេះគឺជាង ៩០ លានតោន៕

នៅថ្ងៃបុណ្យចូលឆ្នាំថ្មីរបស់ជនជាតិចិន គឺជារដូវកាលដែលផ្លែឈើជាច្រើនប្រភេទទទួលបានការពេញនិយមជាខ្លាំង ពីព្រោះពួកគេជឿថា ផ្លែឈើទាំងនេះមានអត្ថន័យល្អ និងនាំមកនូវលាបសំណាង ។ បើតាមជំនឿរបស់ជនជាតិចិន ការប្រគល់ផ្លែឈើជូនគ្នាទៅវិញទៅមក គឺជាការឱ្យពរដល់អ្នកដែលបានទទួល ។

ផ្លែឈើមួយក្នុងចំណោមផ្លែឈើដែលផ្តល់នូវលាភសំណាងតាមជំនឿរបស់ជនជាតិចិន គឺផ្លែទទឹម ។ គេជឿថា ផ្លែទទឹមមានពណ៌ក្រហមជាផ្លែឈើមង្គល ហើយស្លឹក និងមែករបស់វាអាចជួយបណ្តេញពពួកបីសាច និងរឿងរ៉ាវអាក្រក់ចេញពីលំនៅឋានបាន ។

ក្រៅពីនេះ ជនជាតិចិនជឿថា ផ្លែទទឹមមានគ្រាប់ច្រើន គឺជានិមិត្តសញ្ញានៃភាពសម្បូរបែប ហើយគ្រួសារនោះនឹងមានកូនប្រុសច្រើននាក់ ដើម្បីជួយធ្វើការនៅក្នុងគ្រួសារ និងអាចបន្តវង្សត្រកូលបាន ។ ហេតុនេះ គេសង្កេតឃើញពលរដ្ឋចិនតែងទិញផ្លែទទឹមធ្វើជាអំណោយដល់កូនកំលោះ កូនក្រមុំ ក្នុងថ្ងៃអាពាហ៍ពិពាហ៍ដើម្បីឱ្យពួកគេមានកូនច្រើននាក់ ។

ជនជាតិចិនមួយចំនួននិយមដាំដើមទទឹមនៅបរិវេណជុំវិញផ្ទះ ឬបេះស្លឹកទទឹមដាក់តាមខ្លួនដើម្បីការពារគ្រោះភ័យផ្សេងៗ ។ ចំណែកអ្នកខ្លះទៀតបានបេះស្លឹកទទឹមទៅត្រាំទឹកទុកលាងមុខ និងលាងដៃ នៅពេលពួកគេត្រឡប់ពីពិធីបុណ្យសព ដើម្បីការពារកុំឱ្យខ្មាចព្រាយបីសាចដើរតាមពួកគេ ៕ ប្រភព ៖ Kaset Go