ក្នុងនាមជាគ្រូបង្វឹកម្នាក់ ពេជ្រ សោភា បានបង្ហាញអារម្មណ៍មានមោទនភាពយ៉ាងខ្លាំងចំពោះបេក្ខនារី លឹម សេរីហាន់នីកា ដែលជាកូនក្រុមរបស់ខ្លួននាំកម្ពុជាល្បីល្បាញឱ្យស្រុកគេបានស្គាល់បន្ទាប់ពីបកស្រាយបទ «ក្តាមស្រែ» ច្រើនចង្វាក់ក្នុងបទតែមួយរហូតចូលក្នុងតារាងឆាណែលយូធូប Best The Voice ។
បេក្ខនារី លឹម សេរីហាន់នីកា បានបង្ហាញខ្លួនក្នុងវគ្គ Live Show សប្តាហ៍ទី១ដោយជ្រើសបទ ក្តាមស្រែ មកបញ្ចេញសមត្ថភាពក្រោមការបង្វឹករបស់ខូចស៍ សោភា។ ទោះយ៉ាងណាក្នុងការបកស្រាយបទចម្រៀងមួយបទនេះមិនមែនជារឿងងាយស្រួលប៉ុន្មាននោះទេ ព្រោះបទនេះត្រូវបានអ្នកនាង ពេជ្រ សោភា យកមកកែច្នៃថ្មីមានលាយចង្វាក់ជាច្រើនទាំងការច្រៀងបែបមនោសញ្ចេតនាធម្មតា លាយជាមួយចង្វាក់ប្រពៃណីពីដើម រួមទាំងចង្វាក់រ៉ក និងរ៉េបទៀតផង។ ក្រោយបញ្ចេញសកម្មភាពរួចបេក្ខនារីរូបនេះបានទាញបេះដូងមហាជន និង
គ្រូបង្វឹកផ្សេងទៀតយ៉ាងខ្លាំងពីសមត្ថភាពរបស់នាងរហូត លឹម សេរីហាន់នី អាចឆ្លងផុត Live Show សប្តាហ៍ទី១បាន។
អ្វីដែលកាន់តែធ្វើឱ្យមហាជនភ្ញាក់ផ្អើល រួមទាំងសាមីខ្លួននិងគ្រូបង្វឹកផ្ទាល់ បទ ក្តាមស្រែ រសជាតិច្រើនចូលគ្នានេះត្រូវបានជ្រើសរើសចូលទៅក្នុងតារាង Best The Voice ដែលចម្រាញ់ទៅដោយបេក្ខជន បេក្ខនារីប្រលង The Voice ផ្សេងៗទូទាំងពិភពលោកដែលមានភាពលេចធ្លោជាងគេទើបអាចមកដល់តារាងក្នុងឆាណែលយូធូបនេះបាន។
ភាពអស្ចារ្យនេះបានធ្វើឱ្យគ្រូបង្វឹក ពេជ្រ សោភា មានមោទនភាពយ៉ាងខ្លាំងទៅលើកូនក្រុមរបស់ខ្លួនដែលនាំឱ្យបទ ក្តាមស្រែ ល្បីដល់ស្រុកគេ។ ជាមួយគ្នានេះ នីកា ក៏បានបង្ហាញអារម្មណ៍រំភើបដូចគ្នានិងមិនភ្លេចគុណបំណាច់គ្រូបង្វឹក និងលោកគ្រូភ្លេងដែលមានការកែច្នៃទើបរូបនាងអាចឈានដល់ចំណុចនេះ។
គួរបញ្ជាក់ថា លឹម សេរីហាន់នីកា ជាអ្នកខេត្តកំពង់ធំ មានវ័យ១៦ ឆ្នាំ។ ការប្រលងនេះនាងទទួលបានតែ១កៅអីប៉ុណ្ណោះប៉ុន្តែសមត្ថភាពរបស់នាងពិតជាមិនធម្មតាឆ្លងផុតវគ្គជាបន្តបន្ទាន់ខណៈពេលនេះនាងជាTop4នៅក្នុងក្រុម ពេជ្រ សោភា ផងដែរដែលត្រូវប្រកួតប្រជែងក្នុងវគ្គLive Show ជាបន្តទៀត៕
