ក្រុមហ៊ុន Adidas បានបង្ខំចិត្តលក់ស្បែកជើងម៉ាក Yeezy បន្តទៀត ដោយសារក្រុមហ៊ុនទទួលបានការបញ្ជាទិញស្បែកជើងប្រភេទនេះច្រើនពីអតិថិជន គឺស្មើនឹងទឹកប្រាក់ប្រមាណ៥០៨លានអឺរ៉ូ ហើយការបញ្ជាទិញនេះខ្ពស់ជាងក្រុមហ៊ុនរំពឹងទុកទៅទៀត ។ តម្រូវការខ្ពស់បានធ្វើឱ្យក្រុមហ៊ុន Adidas មានចំនួនលក់ស្បែកជើងកើនឡើង និងគ្មានសល់ស្បែកជើងរាប់លានគូនៅក្នុងស្តុកទេ ។

Yeezy គឺជាម៉ាកស្បែកជើងដែលក្រុមហ៊ុន Adidas បានសហការជាមួយលោក Kanye West ជាតារាចម្រៀងរ៉េប និងអ្នករចនាម៉ូដដ៏ល្បីល្បាញម្នាក់ ប៉ុន្តែក្រោយពីកើតបញ្ហាផ្ទៃក្នុងមក ដោយសារលោក Kanye West បានរិះគន់ និងនិយាយមិនល្អពីក្រុមហ៊ុន Adidas ជាច្រើនលើក ។ ហេតុនេះ ក្រុមហ៊ុន Adidas បានប្រកាសផ្តាច់ទំនាក់ទំនងជាមួយអ្នកចម្រៀងរូបនេះ ដោយសារវាអាចធ្វើឱ្យប៉ះពាល់ដល់មុខមាត់ក្រុមហ៊ុន ។

ចាប់តាំងពីមានជម្លោះជាមួយគ្នាកាលពីចុងឆ្នាំ២០២២ មក ក្រុមហ៊ុន Adidas ក៏ប្រកាសឈប់លក់ស្បែកជើងម៉ាក Yeezy ហើយធ្វើឱ្យស្បែកជើងនេះជាប់នៅក្នុងស្តុករាប់លានគូ ។ លើសពីនេះ វាបានធ្វើឱ្យក្រុមហ៊ុនទទួលបានប្រាក់ចំណេញធ្លាក់ចុះយ៉ាងខ្លាំង ព្រោះស្បែកជើង Yeezy ជាផលិតផលដែលរកប្រាក់ចំណូលចូលក្រុមហ៊ុនបានច្រើនគួរសមដែរ ។

ទោះយ៉ាងណា តម្រូវការទិញស្បែកជើង Yeezy មិនបានធ្លាក់ចុះទេ ហើយវានៅតែជាស្បែកជើងដែលមនុស្សនៅទូទាំងពិភពលោកស្វែងរកទិញ ។ ហេតុនេះ ក្រុមហ៊ុន Adidas ត្រូវលេបទឹកមាត់ខ្លួនឯង ហើយបញ្ចេញស្បែកជើង Yeezy លក់ឡើងវិញ នៅខែឧសភា ឆ្នាំ២០២៣ កន្លងមក ។ ជាលទ្ធផលបង្ហាញថា ស្បែកជើងនេះមានតម្រូវការច្រើនពីអតិថិជន ហើយវាបានជួយក្រុមហ៊ុន Adidas កុំឱ្យខាតបង់ច្រើនជាងនេះ ។ ជំហានបន្ទាប់ គឺត្រូវកាត់បន្ថយភាគហ៊ុននៅសល់របស់ Yeezy បន្តិចម្តងៗ ហើយនៅថ្ងៃអនាគត Adidas នឹងលក់ភាគហ៊ុន Yeezy នៅសល់ផងដែរ ។

ក្នុងអំឡុងពេលគេយកស្បែកជើង Yeezy មកលក់ឡើងវិញនៅខែឧសភា ក្រុមហ៊ុន Adidas ប្រាប់ថា នឹងបរិច្ចាគប្រាក់ចំណូលមួយចំនួនដែលបានពីការលក់ស្បែកជើងជួយដល់អង្គការការពារក្រុមប្រឆាំងនឹងពួកយូដា និងការរើសអើងជាតិសាសន៍ ដើម្បីកែកំហុសដែលអ្នកចម្រៀងឈ្មោះ Kanye West ធ្លាប់បង្ហាញអាកប្បកិរិយារបស់ខ្លួន និងជាមូលហេតុធ្វើឱ្យ Adidas ឈប់សហការជាមួយគាត់ ៕ ប្រភព ៖ beartai BRIEF

ប្រទេសចិន៖ សហរដ្ឋអាមេរិកនាំមុខចិនក្នុងទិដ្ឋភាពអវកាសជាច្រើន ខណៈដែលចិនក៏បាននាំមុខសហរដ្ឋអាមេរិក ក្នុងការបាញ់បង្ហោះផ្កាយរណបលឿនបំផុតរបស់ពិភពលោកផងដែរ។

យោងតាមប្រភពព័ត៌មាន SCMP ដែលបានរាយការណ៍កាលពីថ្ងៃទី ២៤ ខែកក្កដា ថា ប្រទេសចិនអាចនឹងវ៉ាដាច់សហរដ្ឋអាមេរិក ក្នុងសមត្ថភាពនៃការបាញ់បង្ហោះ និងជំនួសផ្កាយរណបបានយ៉ាងឆាប់រហ័ស ក្នុងករណីមានជម្លោះ ឬឧបទ្ទវហេតុណាមួយកើតឡើង។ តាមរយៈការអភិវឌ្ឍរ៉ុក្កែតតូច ចល័ត និងឥន្ធនៈរឹង ដែលអាចបាញ់ចេញពីទូរស័ព្ទចល័ត ជំនួសឱ្យឧបករណ៍បាញ់បង្ហោះថេរ ប្រទេសចិនក៏បានបង្កើនសមត្ថភាពបាញ់បង្ហោះអវកាសលឿនជាយុទ្ធសាស្ត្រ (TRSL) របស់អាមេរិកក្នុងទសវត្សរ៍កន្លងមក។លោក Sam Bresnick សហអ្នកនិពន្ធនៃការសិក្សានៅ CSET បាននិយាយថា “ប្រទេសទាំងពីរបានសាងសង់គ្រឿងបរិក្ខារទំហំអវកាសជាមួយនឹងកម្មវិធីសេដ្ឋកិច្ច វិទ្យាសាស្ត្រ និងយោធាដ៏ធំទូលាយ។ ការជំនួសផ្កាយរណបដែលបានបំផ្លាញ ឬខូចខាតយ៉ាងឆាប់រហ័ស គឺជាកត្តាសំខាន់ក្នុងភាពធន់នឹងលំហ។
ទោះជាយ៉ាងណាក៏ដោយ បច្ចុប្បន្នសហរដ្ឋអាមេរិកនៅតែនាំមុខចិនក្នុងទិដ្ឋភាពអវកាស ការស្រាវជ្រាវលំហ ការសិក្សានៅគន្លងនៃភពក្រៅ និងជាច្រើនទៀត លើកលែងតែការបាញ់បង្ហោះផ្កាយរណបលឿនតែប៉ុណ្ណោះ៕ ប្រភព៖vnexpress

រាជធានីបាងកក៖ ក្រោយពេលមានបណ្ដឹងតវ៉ា ជុំវិញការជំទាស់នឹងការតែងតាំងជាថ្មីរបស់មេដឹកនាំគណបក្សប្រឆាំងឈ្នះឆ្នោត ក្រោយការខកខានមិនទទួលបានសំឡេងគាំទ្រភាគច្រើន ពីសមាជិកសភាទាំង២រួចមក ឥឡូវនេះ សភាថៃ បានសម្រេចពន្យារពេលបោះឆ្នោត ដោយគ្មានការកំណត់ ហើយរង់ចាំរហូតដល់មានការសម្រេច ពីតុលាការធម្មនុញ្ញ។

សារព័ត៌មានរបស់ថៃ Bangkok Post បានចេញផ្សាយ នៅថ្ងៃពុធ ទី២៦ ខែកក្កដា ថា លោកប្រធានសភា វ៉ាន់ មូហាម៉ាត់ ណ័រ ម៉ាថា (Wan Muhamad Noor Matha) បានសម្រេចពន្យារពេល ដោយគ្មានការកំណត់ ចំពោះគម្រោងបោះឆ្នោតជ្រើសរើសនាយករដ្ឋមន្រ្ដី នៅថ្ងៃព្រហស្បតិ៍ ទី២៧ ខែកក្កដា ដោយរង់ចាំ រហូតដល់តុលាការធម្មនុញ្ញ សម្រេច លើករណីបដិសេធតែងតាំងជាថ្មីរបស់សភា សម្រាប់ប្រធានគណបក្សឆ្ពោះទៅមុខ (Move Forward Party) ហៅកាត់ MFP លោក ភីថា លីមចារឿនរ៉ាត (Pita Limjaroenrat) ឈរឈ្មោះជានាយករដ្ឋមន្រ្ដីទី៣០របស់ប្រទេសថៃ។

លោក វ៉ាន់ មូហាម៉ាត់ ណ័រ ម៉ាថា បានបញ្ជាក់ កាលពីថ្ងៃអង្គារ ថា គាត់បានសម្រេចចិត្តពន្យារការប្រជុំរួមរបស់សភាទាំង២ ដោយគ្មានការកំណត់ រហូតដល់មានការសម្រេចចិត្តរបស់តុលាការ។ សកម្មភាពបែបនេះ បានកើតឡើង ក្រោយពេលគាត់មានការពិគ្រោះយោបល់ជាមួយនឹងក្រុមមន្រ្ដីច្បាប់របស់រដ្ឋសភា និង ក្រុមទីប្រឹក្សារបស់គាត់។លោក វ៉ាន់ មូហាម៉ាត់ ណ័រ ម៉ាថា ប្រធានសភា និង អតីតប្រធានសភា បានបញ្ជាក់ ថា ពួកគេមានទស្សនៈយល់ឃើញ ថា ប្រសិនបើការបោះឆ្នោតនាយករដ្ឋមន្ត្រី នឹងនៅតែបន្តធ្វើ តាមការគ្រោងទុក នៅថ្ងៃព្រហស្បតិ៍ (ទី២៧ ខែកក្កដា) ខាងមុខនោះ វាអាចនឹងនាំឱ្យមានបញ្ហា ក្រោយពេលតុលាការធម្មនុញ្ញ ធ្វើសេចក្តីសម្រេចរបស់ខ្លួន នាពេលក្រោយ។ ដូច្នេះការពន្យារពេលកិច្ចប្រជុំ នៅថ្ងៃព្រហស្បតិ៍ នឹងធ្វើឲ្យកិច្ចប្រជុំជាច្រើន ដែលមានគ្រោងនឹងធ្វើ នៅថ្ងៃពុធ ជាមួយនឹងសម្ពន្ធភាពចម្រុះ គណបក្សនយោបាយផ្សេងៗទៀត និង សមាជិកព្រឹទ្ធសភា នាពេលឥឡូវនេះ វាមិនមែនជាការចាំបាច់នោះដែរ។

លោកប្រធានសភា វ៉ាន់ មូហាម៉ាត់ ណ័រ ម៉ាថា បានសង្កត់ធ្ងន់ ថា ហេតុផលមួយផ្សេងៗទៀត សម្រាប់ការពន្យារពេលកិច្ចប្រជុំរួមគ្នារបស់សភាទាំង២នេះ ក៏ដោយសារតែសមាជិកសភាជាន់ទាបជាប់ឆ្នោត និង សមាជិកព្រឹទ្ធសភាជាច្រើនរូប មានការព្រួយបារម្ភ ថា ពួកគេនឹងមិនអាចទៅចូលរួមអបអរសារទរព្រះរាជពិធីបុណ្យចម្រើនព្រះជន្មរបស់ព្រះមហាក្សត្រ នៅក្នុងខេត្តរៀងៗខ្លួនរបស់ពួកគេ នៅថ្ងៃសុក្រ ខាងមុខនេះ ប្រសិនបើការអង្គុយប្រជុំយូរ នៅក្នុងរដ្ឋសភា។ ប៉ុន្ដែក្រោយការសម្រេចរបស់តុលាការធម្មនុញ្ញ សមាជិកសភាទាំង២របស់ប្រទេសថៃនឹងវិលត្រឡប់ មកអង្គុយប្រជុំរួមគ្នា ដើម្បីបោះឆ្នោតជ្រើសរើសនាយករដ្ឋមន្រ្ដីម្ដងទៀត។

ប្រធានសភាថៃ បានកំណត់យកថ្ងៃព្រហស្បតិ៍ ទី២៧ ខែកក្កដា សម្រាប់តំណាងរាស្រ្ដជាប់ឆ្នោត និង សមាជិកព្រឹទ្ធសភា វិលត្រឡប់មកប្រជុំរួមគ្នា បោះឆ្នោតជ្រើសរើសនាយករដ្ឋមន្ត្រីជាថ្មី ក្រោយការខកខានបោះឆ្នោតជ្រើសរើសនាយករដ្ឋមន្រ្ដី កាលពីថ្ងៃទី១៩ ខែកក្កដា រួចមក។ បើតាមគម្រោងការនោះ គឺបេក្ខជន អាចនឹងមកពីគណបក្សភឿថៃ ដែលជាគណបក្សធំលំដាប់ទី២ នៅក្នុងចំណោមសម្ពន្ធភាពចម្រុះទាំង៨គណបក្ស ដឹកនាំដោយគណបក្សឆ្ពោះទៅមុខ (MFP) របស់លោក ភីថា លីមចារឿនរ៉ាត។

លោក ភីថា និង គណបក្សឆ្ពោះទៅមុខរបស់គាត់ បានបើកផ្លូវដល់គណបក្សភឿថៃ ដើម្បីតែងតាំងបេក្ខជនរបស់ខ្លួន សម្រាប់តំណែងនាយករដ្ឋមន្ត្រី និង ការបង្កើតរដ្ឋាភិបាល ក្រោយពេលគាត់មិនអាចស្វែងរកសំឡេងគ្រប់គ្រាន់ ចំនួន៣៧៥សំឡេង ដើម្បីក្លាយជានាយករដ្ឋមន្រ្ដីថៃ។ គណបក្សភឿថៃ ក៏ប្រឈមមុខនឹងបញ្ហាជាច្រើន ដោយសារតែបណ្ដាគណបក្សនយោបាយរបស់ពួកយោធានិយម នៅខាងក្រៅប្លុកចម្រុះទាំង៨គណបក្សនេះ បានប្រឆាំងនឹងគោលនយោបាយរបស់គណបក្សឆ្ពោះទៅមុខ (MFP) ដែលគ្រោងនឹងធ្វើវិសោធនកម្ម លើមាត្រា១១២ នៃក្រមព្រហ្មទណ្ឌ ពាក់ព័ន្ធនឹងការប្រមាថដល់ព្រះមហាក្សត្រ។

ស្របគ្នានេះដែរ គណបក្សចំនួន៨ នៅក្នុងសម្ពន្ធភាពចម្រុះ ដឹកនាំដោយគណបក្សឆ្ពោះទៅមុខ គ្រោងនឹងជួបប្រជុំគ្នា នៅរសៀល ថ្ងៃអង្គារ ដើម្បីស្តាប់របាយការណ៍វឌ្ឍនភាព មកពីគណបក្សភឿថៃ។ ប៉ុន្តែកិច្ចប្រជុំនោះ បានលុបចោលទៅវិញ នៅនាទីចុងក្រោយ ក្រោយពេលគណបក្សភឿថៃ បានទទួលស្គាល់ ថា វាមានដំណើរការតិចតួច នៅក្នុងសេចក្ដីរាយការណ៍នោះ រហូតមកដល់ពេលនេះ ។

គណបក្សឆ្ពោះទៅមុខ បានទទួច ថា គណបក្ស MFP នឹងនៅតែបន្តកិច្ចខិតខំប្រឹងប្រែងរបស់ខ្លួន សម្រាប់ជំរុញដល់លោក ភីថា ត្រូវតែងតាំងជានាយករដ្ឋមន្ត្រី ថ្វីបើគាត់មិនបានឈ្នះសំឡេងភាគច្រើន ពីសមាជិកសភាទាំងពីរ នៅក្នុងការបោះឆ្នោតជ្រើសរើសនាយករដ្ឋមន្ត្រីថ្មី កាលពីនៅថ្ងៃទី១៣ ខែកក្កដា ឆ្នាំ២០២៣យ៉ាងណាក្ដី។

លោក ភីថា ត្រូវបានតែងតាំងជាថ្មី សម្រាប់តំណែងកំពូលមួយនេះ ដើម្បីឲ្យសមាជិកសភាទាំង២ បោះឆ្នោត នៅថ្ងៃទី១៩ ខែកក្កដា ម្ដងទៀត ប៉ុន្តែសភាបានបដិសេធនូវការតែងតាំងនោះ ដោយផ្អែកលើមូលដ្ឋាននីតិវិធី។ ក្រុមអ្នកប្រឆាំងបានអះអាង ថា ការតែងតែងជាថ្មីបែបនេះសម្រាប់លោក ភីថា បំពារបំពាននឹងបទប្បញ្ញត្តិរបស់សភា លើមាត្រា៤១ ដោយបានហាមមិនឲ្យមានការដាក់សំណើដែលបានទទួលបរាជ័យ នៅក្នុងសម័យប្រជុំសភាដដែល។

ដោយឡែក ក្រុមអ្នកគាំទ្ររបស់លោក ភីថា លីមចារឿនរ៉ាត និង ក្រុមអ្នកសិក្សាស្រាវជ្រាវជាច្រើន បានប្រឆាំងនឹងដំណោះស្រាយរបស់សភា។ ជាមួយគ្នានេះដែរ ពួកគេបានស្នើសុំទៅកាន់តុលាការធម្មនុញ្ញ ដើម្បីសម្រេចអំពីភាពស្របច្បាប់ នៅក្នុងការតែងតាំងជាថ្មីជូនលោក ភីថា សម្រាប់តំណែងនាយករដ្ឋមន្ត្រី៕

រដ្ឋធានីមូស្គូ៖ ក្រុមរបស់មន្រ្ដីអ៊ុយក្រែន បានរាយការណ៍ អំពីការវាយប្រហារ ដោយដ្រូនទៅលើរដ្ឋធានីមូស្គូ ក្រោយពេលលោកប្រធានាធិបតី វ៉្លាឌីមៀ ពូទីន បានប្រកាស អំពីការវាយប្រហារសងសឹក បន្ទាប់ពីការវាយប្រហារទៅលើស្ពានឧបទ្វីបគ្រីមៀ ដែលរុស្ស៊ី បានរឹបអូសយក ដោយគ្មានការបង្ហូរឈាម កាលពីអំឡុងឆ្នាំ២០១៤។

គេហទំព័ររបស់បណ្ដាញទូរទស្សន៍របស់សហរដ្ឋអាមេរិក CNN បានផ្សាយ កាលពីថ្ងៃចន្ទ ទី២៤ ខែកក្កដា ថា មន្រ្ដីរដ្ឋាភិបាលក្រុងកៀវ បានប្រាប់ដល់ CNN ថា កងទ័ពការពារទឹកដីរបស់អ៊ុយក្រែន បានប្រើប្រាស់ដ្រូន វាយប្រហារទៅលើរដ្ឋធានីមូស្គូ កាលពីព្រឹក ថ្ងៃចន្ទ។ រីឯទីភ្នាក់ងារស៊ើបការណ៍សម្ងាត់របស់ក្រសួងការពារជាតិអ៊ុយក្រែន បានទទួលខុសត្រូវ ចំពោះប្រតិបត្តិការ តាមអ្វីដែលរុស្ស៊ី បានពិពណ៌នា ថា វាជាការវាយប្រហារភេរវកម្មរបស់របបក្រុងកៀវ។

បើទោះជាយ៉ាងណា មន្រ្ដីរូបនេះ បានសុំលក្ខខណ្ឌ មិនបញ្ចេញអត្ដសញ្ញាណ ព្រោះតែពួកគេមិនមានសិទ្ធិ និយាយជាសាធារណៈ ជុំវិញការវាយប្រហារនេះ។

លោក ស៊ើហ្គេ សូប៊ីយ៉ានីន (Sergei Sobyanin) អភិបាលក្រុងមូស្គូ បានសរសេរ នៅលើបណ្ដាញសង្គមតេឡេក្រាម កាលពីថ្ងៃចន្ទ ថា ឧបទ្ទវហេតុនេះ បានបង្កឡើង ដោយយន្តហោះគ្មានមនុស្សបើក ឬ ដ្រូនរបស់រដ្ឋាភិបាលក្រុងកៀវ ព្រោះអ៊ុយក្រែន កំពុងតែព្យាយាម បង្កើតសង្រ្គាម ចូលមកកាន់តែជិត ដល់ផ្ទះរបស់ប្រជាជនរុស្ស៊ី។ ប៉ុន្ដែឧបទ្ទវហេតុនោះ មិនបានបណ្តាលឱ្យមានការខូចខាត ឬ ធ្វើឲ្យមានមនុស្ស រងរបួសធ្ងន់ធ្ងរនោះឡើយ។

ក្រសួងការពារជាតិរុស្ស៊ី បានអះអាង ថា ដ្រូនចំនួន២គ្រឿង ត្រូវបានបាញ់ទម្លាក់។ រីឯរដ្ឋាភិបាលក្រុងកៀវ កាលពីព្រឹក ថ្ងៃចន្ទ បានប៉ុនប៉ង ប្រើប្រាស់ដ្រូន វាយប្រហារ ពប្រឆាំងនឹងហេដ្ឋារចនាសម្ព័ន្ធ នៅក្នុងទីក្រុងមូស្គូ។

លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំង បានប្រាប់ដល់ក្រុមអ្នកកាសែត កាលពីល្ងាច ថ្ងៃចន្ទ ថា ប្រព័ន្ធការពារដែនអាកាសរបស់រុស្ស៊ី បានដំណើរការ ប្រកបដោយជោគជ័យ។ ដ្រូនទាំងនោះ ត្រូវបានបាញ់ទម្លាក់ នៅថ្ងៃនេះ។

ក្រសួងការពារជាតិរុស្ស៊ី បានចោទប្រកាន់ដល់អ៊ុយក្រែន កាលពីថ្ងៃចន្ទ អំពីការវាយប្រហារ ដោយដ្រូន ចំនួន១៧គ្រឿង ប្រឆាំងនឹងតំបន់គ្រីមៀ (Crimea) គ្រប់គ្រងដោយរុស្ស៊ី។ ប៉ុន្ដែដ្រូនទាំងអស់នោះ ត្រូវបានប្រព័ន្ធការពាររបស់រុស្ស៊ី បាញ់ទម្លាក់ ប្រកបដោយជោគជ័យ៕

តើអ្នកសារព័ត៌មានអាចត្រូវបានបច្ចេកវិទ្យា AI ដណ្តើមការងារដែរឬទេ ? នៅពេល Google បានសាកល្បងឱ្យបច្ចេកវិទ្យា AI សរសេរព័ត៌មានផ្សេងៗ ហើយ Google បានស្នើឱ្យប្រព័ន្ធផ្សព្វផ្សាយបរទេសជាច្រើនសាកល្បងប្រើប្រាស់កម្មវិធីនេះ ។

វាគ្មានអ្វីចម្លែកទេ ដែលបច្ចេកវិទ្យា AI បានអភិវឌ្ឍន៍ខ្លួនឈានដល់អាជីពជាអ្នកសរសេរព័ត៌មាន ហើយវាឆ្លាតលើសពីមនុស្សរំពឹងទុក ។ បើតាម The New York Times រាយការណ៍ថា Google បានអភិវឌ្ឍន៍ និងសាកល្បងប្រព័ន្ធ AI មានឈ្មោះថា Genesis ដែលវាជាកម្មវិធីមួយមានសមត្ថភាពអាចសរសេរព័ត៌មានដោយខ្លួនឯងបាន ។

គេបានបង្កើតកម្មវិធីនេះឡើង ក្នុងគោលបំណងជួយដល់អ្នកសារព័ត៌មានទាំងឡាយ ហើយគេក៏បានស្នើទៅកាន់នាយកគ្រប់គ្រងប្រព័ន្ធផ្សព្វផ្សាយធំៗជាច្រើនផងដែរ ដូចជា The New York Times, The Washington Post និង News Corp ឱ្យសាកល្បងប្រើប្រាស់កម្មវិធីថ្មីនេះ ដើម្បីជួយសរសេរព័ត៌មានឱ្យឆាប់រហ័សជាងមុន ។

លក្ខណៈពិសេសរបស់កម្មវិធី A.I. Genesis គឺវាអាចទទួលបានព័ត៌មានផ្សេងៗដូចជា ព័ត៌មានលម្អិតរបស់ហេតុការណ៍បច្ចុប្បន្ន ហើយវាយកព័ត៌មានទាំងនេះមកសរសេរជាខ្លឹមសារអត្ថបទ និងរៀបរៀងជាពាក្យពេចន៍របស់អ្នកនិយាយឱ្យក្លាយទៅជាអត្ថបទ ។

អ្នកគ្រប់គ្រងប្រព័ន្ធផ្សព្វផ្សាយមួយចំនួនបានសរសើរកម្មវិធី A.I. Genesis របស់ Google ប៉ុន្តែពួកគេបញ្ចេញយោបល់ថា កម្មវិធីនេះមិនស្ថិតស្ថេរទេ ខណៈអ្នកគ្រប់គ្រងប្រព័ន្ធផ្សព្វផ្សាយខ្លះទៀតនិយាយថា កម្មវិធីនេះបានព្យាយាមសរសេរព័ត៌មានត្រឹមត្រូវ និងមានសិល្បៈ ។ ចំណែកមនុស្សជាច្រើនទៀតសួរថា តើកម្មវិធី A.I. Genesis នឹងដណ្តើមការងារអ្នកសរសេរព័ត៌មានដែរឬទេ ?

លោកស្រី Jenn Crider អ្នកនាំពាក្យរបស់ Google ប្រាប់ថា គេផលិតកម្មវិធីនេះឡើង មិនមែនសម្រាប់ជំនួសការងាររបស់អ្នកសារព័ត៌មានទេ ។ វាមិនអាចជំនួសតួនាទីសំខាន់របស់អ្នកសារព័ត៌មានក្នុងការរាយការណ៍ព័ត៌មាន ឬសរសេរខ្លឹមសារអត្ថបទ ឬពិនិត្យព័ត៌មានពិតបានទេ ប៉ុន្តែវាអាចជួយបន្ថែមជម្រើសសម្រាប់ចំណងជើងអត្ថបទ និងណែនាំអំពីការសរសេរអត្ថបទផ្សេងទៀតប៉ុណ្ណោះ ៕ ប្រភព ៖ bangkokbiz news