ប្រទេសថៃ ៖ កាលពីថ្ងៃទី១ ខែសីហា ឆ្នាំ២០២៣ អ្នកនាង Traisulee Traisoranakul អ្នកនាំពាក្យរងប្រចាំការិយាល័យនាយករដ្ឋមន្ត្រី លើកឡើងថា ក្នុងអំឡុងពេលសេដ្ឋកិច្ចងើបឡើងវិញក្រោយជំងឺកូវីដ-១៩ ឆ្លងរាតត្បាតនៅប្រទេសថៃ រដ្ឋាភិបាលបានតាមដានស្ថានភាពការងារនៅទូទាំងប្រទេសឃើញថា អត្រាមានការងារធ្វើរបស់ពលរដ្ឋថៃបានកើនឡើងជាបន្តបន្ទាប់ ស្របតាមស្ថានភាពសេដ្ឋកិច្ច ។

ការិយាល័យស្ថិតិជាតិបានជូនដំណឹងពីការស្ទង់មតិស្ថានភាពមានការងារធ្វើរបស់ពលរដ្ឋថៃ នៅក្នុងត្រីមាសទី២ (ចាប់ពីខែមេសា ដល់ខែមិថុនា ឆ្នាំ២០២៣) ថា ចំនួនអ្នកមានការងារធ្វើ និងអ្នកធ្វើការពេញម៉ោងបានកើនឡើង ។

នៅត្រីមាសទី២ ឆ្នាំ២០២៣ ពលរដ្ឋថៃមានការងារធ្វើស្មើចំនួន៣៩,៧លាននាក់ កើនឡើង៦,៦សែននាក់ បើធៀបជាមួយត្រីមាសទី២ ឆ្នាំ២០២២ ខណៈម៉ោងធ្វើការ ក៏កើនឡើងផងដែរ ។ វាបានឆ្លុះបញ្ចាំងពីបរិមាណការងារក្នុងប្រព័ន្ធកាន់តែច្រើន ហើយការិយាល័យស្ថិតិជាតិសង្កេតឃើញថា អ្នកធ្វើការពេញម៉ោង ឬធ្វើការចាប់ពី៣៥ម៉ោង ដល់៤៩ម៉ោងក្នុង១សប្តាហ៍ បានកើនឡើងប្រមាណ៥,៦សែននាក់ បើធៀបជាមួយរយៈពេលដូចគ្នានៅឆ្នាំ២០២២ ។ ចំណែកអ្នកធ្វើការចាប់ពី៥០ម៉ោងឡើងទៅក្នុង១សប្តាហ៍ បានកើនឡើងប្រមាណ៣,៥សែននាក់ ខណៈអ្នកធ្វើការតិចជាង៣៥ម៉ោងក្នុង១សប្តាហ៍ បានធ្លាក់ចុះប្រមាណ២,៤សែននាក់ ។

អ្នកនាង Traisulee Traisoranakul លើកឡើងថា ចំណែកពលរដ្ឋគ្មានការងារធ្វើវិញ គឺនៅត្រីមាសទី២ ឆ្នាំ២០២៣ អ្នកគ្មានការងារធ្វើជាមធ្យមស្មើចំនួន៤,៣សែននាក់ ស្មើនឹង១,១% ។ ចំនួននេះបានធ្លាក់ចុះ បើធៀបនឹងរយៈពេលដូចគ្នានៅឆ្នាំ២០២២ ដែលពលរដ្ឋថៃគ្មានការងារធ្វើ ស្មើចំនួន៥,៥សែននាក់ ឬ១,៤% ។ ប៉ុន្តែវាមានតុល្យភាព បើធៀបនឹងត្រីមាសទី១ ឆ្នាំ២០២៣ ដែលពលរដ្ឋថៃគ្មានការងារធ្វើស្មើចំនួន៤,២សែននាក់ ស្មើនឹង១,១% ។

អ្នកនាងបន្តថា ៖ «សូចនាករទូទៅនៃស្ថានភាពការងារបានល្អប្រសើរឡើង និងគ្មានសញ្ញាគួរឱ្យបារម្ភទេ សម្រាប់ភាពអត់ការងារធ្វើរយៈពេលវែង ឬអ្នកគ្មានការងារធ្វើលើសពី១ឆ្នាំឡើងនៅត្រីមាសទី២ ឆ្នាំ២០២៣ ឃើញថា ចំនួននេះបានធ្លាក់ចុះនៅសល់ត្រឹម៧,៤ម៉ឺននាក់ បើធៀបនឹងចំនួន១,៤សែននាក់ក្នុងរយៈពេលដូចគ្នាកាលពីឆ្នាំ២០២២» ៕ ប្រភព ៖ chiangmai news

ជប៉ុន៖ គិតត្រឹមម៉ោង២រសៀល ថ្ងៃទី៣ ខែសីហា ឆ្នាំ២០២៣ នេះព្យុះទីហ្វុងបានបោកបក់មកលើកោះអូគីណាវ៉ា ប្រទេសជប៉ុន ដោយបានសម្លាប់មនុស្ស ២ នាក់ និងរបួសធ្ងន់ ៦៤ នាក់។
យោងតាមប្រភពព័ត៌មាន CNN បានឱ្យដឹងថា ក្នុងរយៈពេល ២៤ ម៉ោងកន្លងមកនេះ ទីតាំងជាច្រើននៅកោះអូគីណាវ៉ាបានទទួលទឹកភ្លៀងពី ១៧៥ ទៅ ២២០ មីលីម៉ែត្រ។ ទន្ទឹមនឹងនេះ ព្យុះទីហ្វុងបានបក់បោកក្នុងល្បឿន ២២០ គីឡូម៉ែត្រក្នុងមួយម៉ោង ស្មើនឹងព្យុះទីហ្វុងប្រភេទទី ៤ នៃអាត្លង់ទិក ខណៈដែលវាបានឆ្លងកាត់កោះអូគីណាវ៉ាភាគនិរតីរបស់ប្រទេសជប៉ុននៅព្រឹកព្រលឹមថ្ងៃទី ២ ខែសីហាកន្លងទៅ។

ក្រុមហ៊ុនអគ្គិសនីអូគីណាវ៉ាបាននិយាយថា អ្នកស្រុកប្រហែល ៧០ ម៉ឺននាក់ត្រូវបានបញ្ជាឱ្យជម្លៀសដោយរដ្ឋាភិបាលខេត្ត ហើយខ្យល់ខ្លាំងបានកាត់ផ្តាច់ខ្សែភ្លើង ធ្វើឱ្យគ្រួសារជាង ២០ ម៉ឺនគ្មានអគ្គិសនីប្រើប្រាស់។
យោងតាមការព្យាករណ៍របស់ប្រទេសជប៉ុន បានឱ្យដឹងថា ស្ថានភាពនេះបានបន្តរហូតដល់ថ្ងៃទី ៥ ខែសីហា ឆ្នាំ២០២៣ ជាមួយនឹងល្បឿនខ្យល់ជាង ២៣០ គីឡូម៉ែត្រក្នុងមួយម៉ោង។ អាស្រ័យហេតុនេះបណ្តាញទូរគមនាគមន៍នៃទីក្រុងរាប់សិបក្នុងអូគីណាវ៉ាត្រូវបានជម្លៀសនិងកាត់ផ្តាច់អគ្គិសនីជាបណ្តោះអាសន្ន។

ក្រុមហ៊ុនធំៗដូចជា Yamato Holdings និង Sagawa Express បានបញ្ឈប់ការដឹកជញ្ជូនទំនិញទាំងអស់ទៅកាន់កោះ Okinawa ពីតំបន់ផ្សេងទៀតក្នុងប្រទេសជប៉ុន ដោយសារគ្រោះទឹកជំនន់នៃព្យុះកំណាចនេះ។ ការិយាល័យរដ្ឋាភិបាលប្រចាំខេត្ត ការិយាល័យប្រៃសណីយ៍ជប៉ុន ផ្សារទំនើប San-A ហាងលក់គ្រឿងទេស និងឱសថ Aeon នៅអូគីណាវ៉ាក៏ត្រូវបានបិទផងដែរ។ ដូចនេះបច្ចុប្បន្នទីភ្នាក់ងារឧតុនិយមបានព្រមានពីភ្លៀងធ្លាក់ខ្លាំង ដោយបានដាស់តឿនប្រជាពលរដ្ឋកុំចេញក្រៅផ្ទះ និងស្នាក់នៅជាបណ្ដោះអាសន្នក្នុងតំបន់សុវត្ថិភាព៕ ប្រភព៖cafef.com

ប្រទេសចិន ៖ បច្ចុប្បន្ននេះ យុវវ័យចិនបាននាំគ្នាលេងគ្រាប់ស្វាយជំនួសសត្វចិញ្ចឹម ហើយពួកគេបានចែករំលែកការកែច្នៃគ្រាប់ស្វាយធ្វើជារបស់លេងនៅលើបណ្តាញសង្គមទៀតផង ។ មុននឹងបានគ្រាប់ស្វាយលេង ពួកគេត្រូវយកវាទៅលាងទឹកឱ្យស្អាតរហូតដល់អស់សាច់ស្វាយ បន្ទាប់មក យកគ្រាប់ស្វាយទៅហាលថ្ងៃឱ្យស្ងួត ហើយយកក្រាស់មកសិតសរសៃស្វាយចុះឡើងៗ រហូតមើលទៅដូចរោមសត្វ និងមានសភាពទន់គួរឱ្យស្រឡាញ់ ។

យុវវ័យចិនបានបន្តសិតសរសៃគ្រាប់ស្វាយ និងរង់ចាំមើលការលូតលាស់របស់វា គឺពួកគេធ្វើបែបនេះដូចគ្នានឹងការចិញ្ចឹមសត្វ១ក្បាលដែរ ។ អ្នកលេងគ្រាប់ស្វាយទាំងនេះបានថតរូប និងបង្ហោះនៅក្នុងបណ្តាញសង្គម ដើម្បីអួតគ្រាប់ស្វាយគ្នាទៅវិញទៅមក រហូតក្លាយជាទម្លាប់ ។

មនុស្សជាច្រើននាក់បានស្វែងរកវិធីខុសៗគ្នាដើម្បីធ្វើឱ្យគ្រាប់ស្វាយរបស់ខ្លួនមានរោមទន់ស្អាត ខណៈអ្នកខ្លះទៀតបានយកថ្នាំពណ៌មកលាប និងតុបតែងគ្រាប់ស្វាយទៀតផង ។ ការលេងគ្រាប់ស្វាយ និងធ្វើឱ្យវាមានរោមស្អាត មិនមែនជារឿងងាយស្រួលទេ ព្រោះត្រូវផ្លុំគ្រាប់ស្វាយឱ្យស្ងួតល្អ សិតរោមវាជាប្រចាំ យកទៅហាលថ្ងៃ និងប្រមូលទុកនៅកន្លែងមានពន្លឺថ្ងៃ ដើម្បីការពារការដុះផ្សិត ។

យុវវ័យចិនជាច្រើននាក់និយាយថា ការលេងគ្រាប់ស្វាយជួយឱ្យពួកគេអាចកាត់បន្ថយភាពតានតឹង ហើយមានក្តីសុខផងដែរ ។ លើសពីនេះ ការលេងគ្រាប់ស្វាយ គឺដូចគ្នានឹងការលេងឆ្មា ឬឆ្កែក្រដាស ដែលពួកគេនិយមលេងក្នុងអំឡុងពេលជំងឺកូវីដ-១៩ ឆ្លងរាតត្បាតនៅប្រទេសចិន ។ ពេលនោះ ពួកគេបានយកក្រដាសមកតម្រៀបគ្នាធ្វើជារូបរាងសត្វផ្សេងៗជំនួសសត្វចិញ្ចឹមពិតប្រាកដដើម្បីកុំឱ្យពួកគេឯកោ និងព្យាបាលផ្លូវចិត្ត ។

ទោះយ៉ាងណា យុវវ័យមួយចំនួនគិតថា ការលេងបែបនេះធ្វើឱ្យខាតពេលវេលា ហើយអ្នកលេងសុទ្ធតែអ្នកគ្មានការងារធ្វើ អត់ដឹងធ្វើអី្វ ក៏នាំគ្នាធ្វើរឿងគ្មានប្រយោជន៍បែបនេះ ។ ចំណែកអ្នកលេងបណ្តាញសង្គមខ្លះយល់ថា វាជារឿងគួរឱ្យចាប់អារម្មណ៍ និងចង់ធ្វើតាម ដោយសារមិនចាំបាច់ចំណាយប្រាក់ច្រើនដូចការចិញ្ចឹមឆ្មា ឬឆ្កែ និងអាចកាត់បន្ថយចំនួនសត្វអនាថា ។ ដូចគ្នានេះ មនុស្សមួយចំនួនទៀតថា មានរបស់ថ្មីលេងបែបនេះ ធ្វើឱ្យពួកគេមិនចំណាយពេលចុចទូរស័ព្ទតែម្យ៉ាង ៕ ប្រភព ៖ MGRonline Live

រដ្ឋធានីណៃពិដោ៖ ក្រោយការធ្វើរដ្ឋប្រហារយោធា កាលពីថ្ងៃទី១ ខែកុម្ភៈ ឆ្នាំ២០២១ រួចមក ពួកយោធា បានចាប់ខ្លួនលោកស្រី អ៊ោង សានស៊ូជី (Aung San Suu Kyi) និង អ្នកនយោបាយសំខាន់ៗរបស់លោកស្រី ដាក់ពន្ធនាគារ អស់រយៈពេលជាង២ឆ្នាំ ប៉ុន្ដែឥឡូវបែរជារដ្ឋាភិបាលសឹក បានបន្ធូរបន្ថយទោសទណ្ឌ ចំនួន៥បទល្មើស នៅក្នុងសំណុំរឿងចោទប្រកាន់ ចំនួន១៩ករណី ប្រឆាំងនឹងលោកស្រី ទើបអតីតទីប្រឹក្សាសេដ្ឋកិច្ចរបស់លោកស្រី បានអះអាង ថា សកម្មភាពបែបនេះ ជាកាយវិការគ្មានន័យ ព្រោះមេដឹកនាំរូបនេះ មិនសមនឹងត្រូវជាប់ទោសទណ្ឌនោះឡើយ។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី៣ ខែសីហា ថា លោក ស៊ាន ធូណែល (Sean Turnell) អតីតទីប្រឹក្សាសេដ្ឋកិច្ចរបស់លោកស្រី អ៊ោង សានស៊ូជី ទីប្រឹក្សារដ្ឋ ដែលត្រូវបានបណ្ដេញចេញពីតំណែង បានអះអាង ថា ក្រុមមេដឹកនាំរដ្ឋាភិបាលជាប់ឆ្នោត តាមបែបលទ្ធប្រជាធិបតេយ្យ មិនគួរនឹងត្រូវជាប់គុកទាល់តែសោះ។ ដោយឡែក ការបន្ធូរបន្ថយទោសនេះ ពីរដ្ឋាភិបាលសឹកមីយ៉ាន់ម៉ា ជាកាយវិការដ៏គ្មានន័យ។

រដ្ឋាភិបាលសឹកមីយ៉ាន់ម៉ា កាលពីថ្ងៃអង្គារ (ទី១ ខែសីហា) បានប្រកាស ថា រដ្ឋាភិបាល បានបន្ធូរបន្ថយទោស ដល់មន្រ្ដីសំខាន់ៗមួយចំនួនរបស់រដ្ឋាភិបាលជាប់ឆ្នោត តាមបែបលទ្ធិប្រជាធិបតេយ្យ ដែលត្រូវបានពួកយោធា ផ្ដួលរំលំ កាលពីថ្ងៃទី១ ខែកុម្ភៈ ឆ្នាំ២០២១។

លោកស្រី អ៊ោង សានស៊ូជី (Aung San Suu Kyi) ទីប្រឹក្សារដ្ឋ នៃរដ្ឋាភិបាល ដែលបានឈ្នះឆ្នោតភ្លូកទឹកភ្លូកដី នៅក្នុងខែវិច្ឆិកា ឆ្នាំ២០២០ ហើយត្រូវបានពួកយោធា បណ្ដេញចេញពីអំណាច និង ចាប់ដាក់គុក។ ប៉ុន្ដែឥឡូវ រដ្ឋាភិបាលសឹក បានបន្ធូរបន្ថយកម្រិតទោសជាប់គុក រយៈពេល៦ឆ្នាំ ពីក្នុងចំណោមទោសទណ្ឌកម្មរបស់គាត់ រយៈពេល៣៣ឆ្នាំ។ រីឯលោក វីន មីយិនត៍ (Win Myint) ប្រធានាធិបតី ដែលត្រូវបានបណ្ដេញពីអំណាច ក៏ត្រូវបានពួកយោធា បន្ថយទោសជាប់ពន្ធនាគារ រយៈពេល៤ឆ្នាំផងដែរ។ ការបន្ធូរបន្ថយកម្រិតជាប់ទោសរបស់អ្នកទោសនយោបាយផ្សេងៗទៀត ទំនងជាស្ថិតក្នុងការកាត់ទោស។

ការកាត់បន្ថយកម្រិតទោស ដល់អ្នកទោសនយោបាយ នៅក្នុងប្រទេសមីយ៉ាន់ម៉ា បានកើតឡើង ត្រឹមតែមួយថ្ងៃ ក្រោយពេលរដ្ឋាភិបាលយោធាមីយ៉ាន់ម៉ា បានពង្រីកស្ថានភាពគ្រាអាសន្នរបស់ខ្លួន ខណៈរដ្ឋាភិបាលសឹកមួយនេះ បានអះអាង ថា រដ្ឋាភិបាល នឹងគ្រប់គ្រង រយៈពេល៦ខែបន្ដទៀត។ សកម្មភាពបែបនេះ ជាការបន្ថែមស្ថានភាពគ្រាអាសន្ន ជាលើកទី៤ ដោយបំពារបំពាន ទៅលើរដ្ឋធម្មនុញ្ញរបស់មីយ៉ាន់ម៉ា ដោយកំណត់អំពីការបន្ថែមស្ថានការណ៍បែបនេះ ត្រឹមតែ២ដងប៉ុណ្ណោះ។

ការគ្រប់គ្រងរបស់ពួកយោធា អស់រយៈពេល២ឆ្នាំកន្លះកន្លងមកនេះ បានធ្វើឲ្យប្រទេសមីយ៉ាន់ម៉ា ឈានទៅរកការបំផ្លិចបំផ្លាញមិនធ្លាប់មាន, ការសម្លាប់រាប់ពាន់នាក់ និង ការផ្លាស់ទីលំនៅរបស់ប្រជាជន ប្រហែល៣លាននាក់។ ស្របគ្នានេះ ប្រទេសជិតខាងរបស់ប្រទេសអាស៊ានមួយនេះ បានទទួលជនភៀសខ្លួនជាថ្មី មកពីប្រទេសមីយ៉ាន់ម៉ា ខណៈសេដ្ឋកិច្ចរបស់ប្រទេសភូមា កំពុងតែស្ថិតក្នុងស្ថានភាពដួលរលំ ហើយប្រជាជន ភាគច្រើន ជាពិសេស នៅតំបន់ជនបទ បានកាត់បន្ថយនូវកម្រិតរបបអាហារ ដោយសារតែពួកគេ កំពុងតែប្រឈមនឹងគ្រោះអត់ឃ្លាន។

បញ្ហាជាច្រើនរបស់ប្រទេសមីយ៉ាន់ម៉ា នឹងមិនត្រូវបានដោះស្រាយ តាមរយៈការបន្ធូរបន្ថយទោស ដល់អ្នកទោសនយោបាយ ដែលមិនគួរនឹងត្រូវកាត់ទោស តាំងពីដំណាក់កាលដំបូងមកម៉្លេះ។ ការផ្លាស់ប្តូរពិតប្រាកដ អាចនឹងធ្វើទៅបាន នៅក្នុងប្រទេសមីយ៉ាន់ម៉ា។ ប៉ុន្តែវាមិនមែន កើតចេញពីការអបអរសាទរ ដល់កាយវិការ ដោយគ្មានន័យបែបនេះឡើយ៕

ប្រទេសវៀតណាម ៖ យោងតាមទិន្នន័យរបស់នាយកដ្ឋានគយវៀតណាមបញ្ជាក់ថា នៅឆមាសទី១ ឆ្នាំ២០២៣ ចំនួនការនាំចេញទុរេនរបស់វៀតណាមទៅក្រៅប្រទេស បានកើនឡើងរហូតដល់១៩ដង បើធៀបពី១ឆ្នាំទៅ១ឆ្នាំ ហើយស្មើនឹងទឹកប្រាក់ចំនួន៨៧៦លានដុល្លារអាមេរិក ។ ក្នុងចំនួននេះ ការនាំចេញទុរេនទៅប្រទេសចិនតែមួយ ស្មើនឹងទឹកប្រាក់៨៣៥លានដុល្លារអាមេរិកឯណោះ ។

លោក Dang Phuc Nguyen លេខាធិការសមាគមបន្លែ និងផ្លែឈើវៀតណាមលើកឡើងថា ទុរេនដែលដាំនៅតំបន់ភាគខាងត្បូងប្រទេសវៀតណាម បានប្រមូលផលចាប់ខែឧសភា ដល់ខែមិថុនា ឆ្នាំ២០២៣ ហើយទុរេនដែលដាំនៅតំបន់ខ្ពង់រាបកណ្តាលនឹងដល់រដូវប្រមូលផលនៅខែសីហា ដល់ខែធ្នូ ។

កន្លងមក ទុរេនវៀតណាមអាចលក់ឱ្យបណ្តាក្រុមហ៊ុន និងឈ្មួញតូចតាចមកពីប្រទេសចិនក្នុងតម្លៃខ្ពស់ ដោយសារការដឹកជញ្ជូនទុរេនពីប្រទេសវៀតណាមទៅកាន់ចិនចំណាយពេលវេលាឆាប់រហ័ស ។ ហេតុនេះ ទើបធ្វើឱ្យផ្លែឈើនៅតែមានសភាពស្រស់ ហើយវៀតណាមមានប្រៀបក្នុងការប្រកួតប្រជែងច្រើនជាងទុរេនរបស់ថៃ ។ បច្ចុប្បន្ន ការលក់ទុរេនមានគុណភាពល្អបំផុតនៅតាមចម្ការ គឺមានតម្លៃចាប់ពី៣,៥៩ដុល្លារ ទៅ៤,២២ដុល្លារអាមេរិកក្នុង១គីឡូក្រាម ។ លើសពីនេះ នៅឆ្នាំ២០២៣ ទុរេនវៀតណាមមានគុណភាពល្អជាងឆ្នាំមុនៗ ហើយតម្រូវការក្នុងស្រុកក៏បានកើនឡើងផងដែរ ចាប់ពី១០% ទៅ១៥% ក្នុងឆមាសទី១ ឆ្នាំ២០២៣ ។

តាមទិន្នន័យរបស់នាយកដ្ឋានដាំដុះរុក្ខជាតិវៀតណាមបង្ហាញថា បច្ចុប្បន្ន មានផ្ទៃដីដាំទុរេនចំនួន១១០.៣០០ហិកតា ខណៈនៅឆ្នាំ២០១៧ មានផ្ទៃដីដាំទុរេនត្រឹមតែ៣៧.០០០ហិកតាប៉ុណ្ណោះ ។ ទិន្នផលទុរេននៅឆ្នាំ២០២៣ ស្មើនឹងប្រមាណ១លានតោន និងខ្ពស់ជាងឆ្នាំ២០២២ ក្នុងអត្រា១៥,៩% ។ វៀតណាមរំពឹងថា ខ្លួននឹងអាចនាំចេញទុរេនទៅក្រៅប្រទេស ចាប់ពី៤សែន ទៅ៥សែនតោន ខណៈប្រទេសថៃបាននាំចេញទុរេនជាង៨សែនតោន កាលពីឆ្នាំ២០២២ ។

រដ្ឋាភិបាលវៀតណាមបានចុះហត្ថលេខាលើល័ក្ខខ័ណ្ឌ និងកិច្ចព្រមព្រៀងពាណិជ្ជកម្មសេរីជាច្រើនច្បាប់ ដើម្បីជំរុញការអភិវឌ្ឍទីផ្សារបន្លែ និងផ្លែឈើរបស់វៀតណាម ។ ដូច្នេះ វាធ្វើឱ្យនៅឆមាសទី១ ឆ្នាំ២០២៣ ការនាំចេញបន្លែ និងផ្លែឈើវៀតណាមកើនឡើង៦០% បើធៀបពី១ឆ្នាំទៅ១ឆ្នាំ ៕ ប្រភព ៖ AEC connect