បរទេស៖ នៅថ្ងៃទី ៦ ខែសីហា លោក Elon Musk បានរៀបរាប់ពីផែនការនៃការប្រកួតក្បាច់គុនក្នុងទ្រុងរបស់ខ្លួននៅលើបណ្តាញសង្គម X ដែលជាអតីត Twitter ហើយគាត់បានប្រកាសថានឹងប្រើប្រាស់ប្រាក់ចំណូលទាំងអស់ពីកម្មវិធី X ដើម្បីបរិច្ចាកសប្បុរសធម៌សម្រាប់អតីតយុទ្ធជន។

មហាសេដ្ឋីដើមកំណើតអាហ្វ្រិកខាងត្បូងរូបនេះបាននិយាយថា ជារៀងរាល់ថ្ងៃគាត់បាន លើសទម្ងន់ ដោយសារគាត់មិនមានពេលហាត់ប្រាណ ដូចនេះគាត់ក៏បានលើសទម្ងន់ និងណែនាំអ្នកប្រើប្រាស់ឱ្យធ្វើតាមនៅក្នុងវគ្គសាកល្បងនៃមុខងារផ្សាយផ្ទាល់របស់ X។

មិនយូរប៉ុន្មាននាយកប្រតិបត្តិ Meta លោក Mark Zuckerberg ក៏បានឆ្លើយតបនៅលើបណ្តាញសង្គម Threads ថាគាត់ “បានត្រៀមខ្លួនរួចរាល់ហើយ” ។ លោក Mark ក៏បានបន្តទៀតថា ពួកយើងនឹងរៀបចំការប្រកួតជាផ្លូវការនៅថ្ងៃទី ២៦ ខែសីហា ឆ្នាំ២០២៣ ដែលនេះនឹងក្លាយជាកាលបរិច្ឆេទនៃការប្រយុទ្ធដ៏ធំបំផុតក្នុងប្រវត្តិសាស្ត្ររបស់ពិភពលោក។ គោលបំណងនៃការប្រកួតក្នុងទ្រុងរបស់មហាសេដ្ឋីទាំងពីររូបនេះ គឺដើម្បីធ្វើការបរិច្ចាគសប្បុរសធម៌។

យោងតាមលោក Dana White ប្រធានអង្គការក្បាច់គុន UFC បានឱ្យដឹងថា ការប្រយុទ្ធគ្នារវាងមហាសេដ្ឋីទាំងពីរនេះត្រូវបានប៉ាន់ប្រមាណថានឹងនាំមកនូវប្រាក់ចំណូលលើសពីមួយពាន់លានដុល្លារ៕ ប្រភព៖vnexpress

រាជធានីបាងកក៖ ប្រទេសថៃ បានជាប់គាំទ្រខាងនយោបាយ ចាប់តាំងពីការបោះឆ្នោតសកល កាលពីថ្ងៃទី១៤ ខែឧសភា រហូតមក ដោយមិនអាចបង្កើតរដ្ឋាភិបាលថ្មីបាន ព្រោះតែសមាជិកសភា និង ព្រឹទ្ធសភា ប្រឆាំងនឹងបេក្ខជននាយករដ្ឋមន្រ្ដី មកពីគណបក្សឆ្ពោះទៅមុខ (Move Forward Party) ហៅកាត់ MFP ហើយឥឡូវនេះ សមាជិកសភាមកពីគណបក្សឈ្នះឆ្នោតមួយនេះ បានព្រមានដល់គណបក្សភឿថៃ អំពីការចាញ់បញ្ឆោតរបស់គេ ស្របពេលគណបក្សជាដៃគូដំបូងមួយនេះ ចង់ទៅចងសម្ពន្ធភាពជាមួយនឹងគណបក្សផ្សេងៗទៀត ដែលមេដឹកនាំរបស់ពួកគេ មានតំណែងខ្ពង់ខ្ពស់ នៅក្នុងជួរគណៈរដ្ឋមន្រ្ដី នៃរដ្ឋាភិបាលរបស់លោកនាយករដ្ឋមន្រ្ដី លោក ប្រាយុទ្ធ ចាន់-អូ-ចា (Prayut Chan-o-cha) ។

សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃអាទិត្យ ទី៦ ខែសីហា ថា សមាជិកសភា មកពីគណបក្សឆ្ពោះទៅមុខ (Move Forward Party ហៅកាត់ MFP កំពុងតែជំរុញឲ្យគណបក្សភឿថៃ (PT) ពិចារណាឡើងវិញ ចំពោះការបញ្ចប់នូវសម្ពន្ធភាពនយោបាយដំបូងរបស់ខ្លួន ដែលមានគោលបំណងរួបរួមគ្នា បង្កើតរដ្ឋាភិបាលចម្រុះថ្មី។

លោក វីរ៉ូ ឡាក់ខាណាអាឌីសន (Wiroj Lakkhanaadisorn) សមាជិកសភាមួយរូប មកពីគណបក្ស MFP បានសរសេរសារ នៅលើបណ្ដាញសង្គមហ្វេសប៊ុក ដោយនិយាយសំដៅទៅលើគណបក្សភឿថៃ ថា «មិត្តអើយ! សូមកុំឡើងរថយន្ដ ជាមួយនឹងពួកគេអី ។ ពួកគេបញ្ឆោតអ្នកឱ្យធ្វើដំណើរឡើងទៅលើកំពូលភ្នំ រួចហើយនៅទីបំផុត រុញទម្លាក់អ្នកមកវិញទេ។ អ្នកបានខិតខំរត់ទៅឆ្ងាយពីក្រុមអភិរក្សនិយមរួចហើយ បែរជាត្រឡប់ មកឡើងកប៉ាល់របស់គេវិញយ៉ាងលឿន។ យើងកំពុងតែរង់ចាំអ្នកនៅទីនេះ។ ដំបូងឡើយ គណបក្ស MFP និង គណបក្សភឿថៃ បានខិតខំព្យាយាមរួបរួមគ្នា ចងសម្ពន្ធភាពចម្រុះ ចំនួន៨គណបក្ស ដោយមានសមាជិកសភា សរុប៣១២នាក់ កាន់នៅក្នុងដៃ ស្របពេលក្រុមអភិរក្សនិយម មានសមាជិកសភា ត្រឹមតែ១៨៨នាក់ប៉ុណ្ណោះ នៅក្នុងសភាជាន់ទាប»។

សមាជិកសភា មកពីគណបក្សឆ្ពោះទៅមុខ រូបនេះ បានបន្ដ ថា បើរាប់ត្រឹមតែសមាជិកសភា មកពីគណបក្សឆ្ពោះទៅមុខ និង គណបក្សភឿថៃ ទាំង២តែ២គណបក្សប៉ុណ្ណោះ ក៏មានអាសនៈ នៅក្នុងរដ្ឋសភា រហូតដល់ចំនួន២៩២នាក់ផងដែរ។ ដូច្នេះ គណបក្សទាំង២នេះ នឹងមានឱកាសល្អ យកឈ្នះលើក្រុមអភិរក្សនិយម គ្រប់ពេលវេលា។ បើទោះជាបច្ចុប្បន្ន គណបក្ស MFP និង បក្សភឿថៃ ទាំង២នេះ ពិបាកនឹងយកឈ្នះ នៅក្នុងការបោះឆ្នោតជ្រើសរើសនាយករដ្ឋមន្ត្រី ក៏ដោយ ព្រោះត្រូវការសំឡេងគាំទ្រ ភាគច្រើន មកពីសមាជិកព្រឹទ្ធសភា ដែលលើកបន្ដុបដោយពួកយោធា ប៉ុន្ដែគណបក្សធំទាំងពីរនេះ នឹងនៅតែមានកម្លាំងពិសេស សម្រាប់ប្រយុទ្ធជាមួយនឹងក្រុមអភិរក្សនិយម នៅក្នុងសភា ប្រសិនបើគណបក្សទាំង២ នៅតែបន្ដរួបរួមគ្នាយ៉ាងរឹងមាំ។

លោក វីរ៉ូ ឡាក់ខាណាអាឌីសន សមាជិកសភា មកពីគណបក្ស MFP ជឿ ថា គណបក្សភឿថៃ អាចនឹងត្រូវបានគេផ្តល់ជូននូវកិច្ចព្រមព្រៀង តាមការបញ្ចុះបញ្ចូល នៅមុនពេលពួកគេបានសម្រេចចិត្ត ទៅតាមផ្លូវរបស់ពួកគេ កាលពីថ្ងៃពុធមុន (ទី២ ខែសីហា)។ បច្ចុប្បន្ន គណបក្សភឿថៃ និង គណបក្សMFP បានឃ្លាតឆ្ងាយពីគ្នា។ បក្សភឿថៃ គួរតែគិតពិចារណាឡើងវិញ ថា ភឿថៃ មានសមាជិកសភា ត្រឹមតែ ១៤១នាក់ប៉ុណ្ណោះ នៅក្នុងដៃ ខណៈក្រុមអភិរក្សនិយម មានសមាជិកសភា រហូតដល់១៨៨ នាក់។ ដូច្នេះមានន័យ ថា អំណាចចរចារបស់គណបក្សភឿថៃ នឹងធ្លាក់ចុះយ៉ាងខ្លាំង សម្រាប់គណបក្សមួយនេះ ដែលកំពុងតែស្វែងរកការបង្កើតរដ្ឋាភិបាលថ្មី។

សមាជិកសភា មកពីគណបក្សឆ្ពោះទៅមុខ រូបនេះ បានបន្ថែម ថា ទ្វារនៅតែទុកចំហ រង់ចាំគណបក្សផាឡាំង ប្រាឆារ៉ាត (Palang Pracharath Party) ហៅកាត់ (PPRP) ដឹកនាំដោយលោកឧត្ដមសេនីយ៍ ប្រាវីត វង់ស៊ូវ៉ាន់ (Prawit Wongsuwan) និង គណបក្សរួបរួមជាតិថៃ (United Thai Nation) ហៅកាត់ UTN របស់លោកនាយករដ្ឋមន្រ្ដី ប្រាយុទ្ធ ចាន់-អូ-ចា នឹងក្លាយជាសម្ពន្ធភាពចម្រុះ ដឹកនាំដោយគណបក្សភឿថៃ ជាពិសេស ដោយសារតែគណបក្សគាំទ្រដោយយោធាទាំង២នេះ មានឥទ្ធិពល ទៅលើសមាជិកព្រឹទ្ធសភា ដែលត្រូវបានតែងតាំង។ ឥឡូវនេះ គណបក្សភឿថៃ ក៏កំពុងតែបាត់បង់ការគាំទ្រ ពីរណសិរ្សរណសិរ្សក្រហមដើម្បីប្រជាធិបតេយ្យ (UDD) ដែលតែងតែគាំទ្រគណបក្សនេះ អស់រយៈពេលយូរមកហើយ រហូតដល់ពួកគេចាកចេញ ពីជំរំគាំទ្រលទ្ធិប្រជាធិបតេយ្យ។

លោក វីរ៉ូ ឡាក់ខាណាអាឌីសន បានបន្ដ ថា គាត់បានកើតងឿងឆ្ងល់ ថាតើគណបក្សភឿថៃ ខ្លាចបាត់បង់យុត្តិកម្មរបស់ខ្លួន សម្រាប់ការបន្តដឹកនាំការបង្កើតរដ្ឋាភិបាលថ្មី ប្រសិនបើបរាជ័យ នៅក្នុងការគាំទ្ររបស់សមាជិកព្រឹទ្ធសភា ហើយការចាញ់ការបោះឆ្នោតជ្រើសរើសនាយករដ្ឋមន្ត្រី។ គេមិនឆ្ងល់នោះឡើយ ថា នៅលើកំពូលភ្នំដែលគេនាំទៅនោះ តាមពិតជាទីត្រូវនាំទៅប្រហារជីវិតទេឬ?

សមាជិកសភា មកពីគណបក្សឆ្ពោះទៅមុខ រូបនេះ បានបន្ដទៀត ថា នៅក្នុងសេណារីយ៉ូដ៏ល្អបំផុត បើទោះជាគណបក្សភឿថៃ បានទទួលជោគជ័យ នៅក្នុងការបង្កើតសម្ពន្ធភាពថ្មីយ៉ាងណាក៏ដោយ ក៏គណបក្សភឿថៃ នឹងមិនមានអំណាចច្រើន ហើយវាដូចជាគណបក្សភឿថៃ នឹងស្ថិតនៅក្នុងកណ្ដាប់ដៃរបស់ក្រុមអភិរក្សនិយម។

ជាមួយគ្នានេះ លោក អានុសន អៀមសា-អាដ (Anusorn Iamsa-ard) សមាជិកសភា មកពីគណបក្សភឿថៃ បានអះអាង អំពីពីបច្ចុប្បន្នភាពចុងក្រោយ ពីក្រុមចរចារបស់ខ្លួន ថា គណបក្សភឿថៃ នៅតែរឹងមាំ។ ការបង្កើតរដ្ឋាភិបាលចម្រុះ គឺមិនងាយស្រួលនោះឡើយ ហើយគណបក្សភឿថៃ នឹងមិនត្រូវបានគេបង្ខំ ឱ្យទទួលយកលក្ខខណ្ឌណាមួយ ដែលគណបក្ស ពិតជាមិនអាចសម្រេចបាននោះឡើយ។

លោក អានុសន អៀមសា-អាដ បានបន្ដ ថា «គណបក្សភឿថៃ នៅតែមានគោលជំហររឹងមាំ ថា លោកឧត្តមសេនីយ៍ ប្រាយុទ្ធ ចាន់-អូ-ចា និង លោកឧត្តមសេនីយ ប្រាវីត វង់ស៊ូវ៉ាន់ មិនត្រូវក្លាយជាផ្នែកណាមួយ នៃសម្ពន្ធភាពចម្រុះថ្មី ខណៈគណបក្សភឿថៃ កំពុងតែបង្កើតឡើងនោះទេ។

ដោយឡែកការវិវឌ្ឍន៍ស្ថានការណ៍នយោបាយថ្មីមួយផ្សេងទៀត លោក រួងក្រៃ លីគីតវ៉ាតតាណា (Ruangkrai Leekitwattana ) ជាសកម្មជននយោបាយ និង ជាអតីតសមាជិកព្រឹទ្ធសភា បានអះអាង ថា គាត់នឹងដាក់ញត្តិមួយ ទៅកាន់ព្រឹទ្ធសភា ស្នើសុំឲ្យពិនិត្យមើល លើការចោទប្រកាន់ អំពីការគេចពន្ធរបស់ក្រុមហ៊ុនអភិវឌ្ឍន៍អចលនទ្រព្យ Sansiri កាលពីខែសីហា ឆ្នាំ២០២១៩ ស្របពេលលោក ស្រេតថា ថាវីស៊ីន (Srettha Thavisin) កំពុងតែស្ថិតនៅជាប្រធានក្រុមហ៊ុនអចលនទ្រព្យដ៏ធំបំផុតមួយនេះ នៅក្នុងប្រទេសថៃ។

លោក ឈូវីត កាម៉ូលវីស៊ីត (Chuvit Kamolvisit) សកម្មជននយោបាយ បានចង្អុលបង្ហាញ កាលពីសប្តាហ៍មុន ថា ក្រុមហ៊ុនអចលនទ្រព្យ Sansiri បានបង់ពន្ធត្រឹមតែ ៥៩,២លានបាត (លុយថៃ) ស្មើនឹងប្រហែលជាង ១,៧ដុល្លារអាមេរិក ខណៈប្រតិបត្ដិការនេះ ត្រូវបង់ រហូតដល់៥២១លានបាត ឬស្មើនឹងប្រហែលជាង១៥លានដុល្លារ។ បច្ចុប្បន្ន លោក ស្រេតថា កំពុងតែក្លាយជាបេក្ខជននាយករដ្ឋមន្ត្រីរបស់គណបក្សភឿថៃ ហើយនឹងត្រូវតែងតាំង សម្រាប់ការបោះឆ្នោតជ្រើសរើសនាយករដ្ឋមន្ត្រី នៅក្នុងសភា នាពេលខាងមុខនេះ៕

សារមន្ទីរគឺជាកន្លែងដ៏អស្ចារ្យនឹងសំខាន់បំផុតក្នុងប្រវត្តិសាស្ត្រ ដែលមានទម្រង់ជាវិមាន ឬជាអតីតរាជវាំង ឬជាអគារសម្រាប់តាំងពិព័រណ៍បុរាណវត្ថុ សម្បត្តិបេតិកភណ្ឌវប្បធម៌នៃប្រទេសនីមួយៗ ក៏ដូចជាសម្បត្តិបេតិកភណ្ឌមនុស្សជាតិទូទាំងពិភពលោកជាដើម។ ដូច្នេះខាងក្រោមនេះគឺជាសារមន្ទីទាំង ១០ ដែលចំណាស់ជាងគេបំផុតនៅលើពិភពលោក នឹងមានអាយុកាលតាំងពី ២,៥០០ ឆ្នាំមុនមកម្លេះ។

១.សារមន្ទីរល្វ័រ (Louvre Museum)៖ សារមន្ទីរដែលចំណាស់ជាងគេមួយនេះស្ថិតនៅទីក្រុងប៉ារីស ប្រទេសបារាំង ដែលត្រូវបានកសាងឡើងនៅសតវត្សទី១៣ ក្នុងរជ្ជកាលព្រះចៅល្វីទី១៤ (Louis XIV)។

២.សារមន្ទីរកាពីតូលីណេ (Capitoline Museum)៖ កាពីតូលីណេគឺជាសារមន្ទីរដែលស្ថិតនៅទីក្រុងរ៉ូម ប្រទេសអ៊ីតាលី ដែលត្រូវបានស្ថាបនាឡើងនៅឆ្នាំ១៤៧១ ក្រោមស្នាព្រះហស្ដសម្ដេចប៉ាប ស៊ីក្សទូសទី៤ (Pope Sixtus IV)។ រហូតមកដល់ឆ្នាំ១៧៣៤ ទើបសារមន្ទីរកាពីតូលីណេត្រូវបានបើកឱ្យចូលទស្សនាជាសាធារណៈ។

៣.សារមន្ទីរវ៉ាទីកង់ (The Vatican Museum)៖ សារមន្ទីរមួយនេះដែរស្ថិតនៅរដ្ឋបុរីវ៉ាទីកង់ ដែលត្រូវបានកសាងឡើងនៅឆ្នាំ១៥០៦ ក្រោមស្នាព្រះហស្ដសម្ដេចប៉ាប ជូលីអ៊ូសទី២ (Pope Julius II)។

៤.សារមន្ទី អឺម៉ូរី (The Royal Armouries)៖ សារមន្ទីរអឺម៉ូរី ស្ថិតនៅទីក្រុងឡុងដ៍ ចក្រភពអង់គ្លេស ដែលត្រូវបានកសាងឡើងនៅឆ្នាំ១៦៦០។

៥.សារមន្ទីរឃុនស្ត៍ (Kunst Museum)៖ ឃុនស្ត៍គឺជាសារមន្ទីរដែលស្ថិតនៅទីក្រុងបាសែល (Basel) ប្រទេសស្វីស នឹងត្រូវបានកសាងឡើងនៅឆ្នាំ១៦៦១។

៦.សារមន្ទីរអាស្មូលាន (The Ashmolean)៖ សារមន្ទីរនេះស្ថិតនៅទីក្រុងអុក្សហ្វឺដ (Oxford) ចក្រភពអង់គ្លេស ដែលត្រូវបានកសាងឡើងនៅឆ្នាំ១៦៨៣។

៧.សារមន្ទីរឆាលីស្តុន (Charleston Museum)៖ សារមន្ទីរឆាលីស្តុនស្ថិតនៅរដ្ឋខាឡូរីណាខាងត្បូង (South Carolina) សហរដ្ឋអាមេរិក ដែលត្រូវបានកសាងឡើងនៅឆ្នាំ១៧៧៣។

៨.សារមន្ទីប៊ែលវេឌារ (Belvedere Palace)៖ ប៊ែលវេឌារគឺជាសារមន្ទីរដែលស្ថិតនៅទីក្រុងវ្យែន (Vienna) ប្រទេសអូទ្រីស នឹងត្រូវបានកសាងឡើងនៅឆ្នាំ១៧៨១។

៩.សារមន្ទីរឥណ្ឌា (Indian Museum)៖ សារមន្ទីរអាស៊ីមួយនេះស្ថិតនៅទីក្រុងកុលកត្តៈ (Kolkata) រដ្ឋបេងហ្កាល់ខាងលិច ប្រទេសឥណ្ឌា ដែលត្រូវបានកសាងឡើងនៅឆ្នាំ១៨១៤ ពោលគឺនាសម័យអាណានិគមអង់គ្លេស ដែលកំពុងគ្រប់គ្រងត្រួតត្រាពិភពហិណ្ឌីនាពេលនោះ។

១០.សារមន្ទីរហឺរមីថេហ្គិ៍ (Hermitage Museum)៖ សារមន្ទីរដ៏ចំណាស់មួយនេះស្ថិតនៅទីក្រុងសាន់ភីតថឺស្បឺក (St.Petersburg) ប្រទេសរុស្ស៉ី ដែលកសាងឡើងនៅឆ្នាំ១៧៦៤។ រហូតមកដល់ឆ្នាំ១៨៥២ ទើបសារមន្ទីរហឺរមីថេហ្គិ៍ត្រូវបានបើកឱ្យសាធារណជនចូលទស្សនា៕

សហរដ្ឋអាមេរិក ៖ គ្រោះថ្នាក់ចរាចរណ៍ផ្សេងៗបានកើតឡើងដោយសារការល្មើសច្បាប់ ដូចជា ការបើកបរយានជំនិះក្នុងល្បឿនលឿន និងការបើកបរក្នុងពេលស្រវឹងជាដើម ហើយវាតែងកើតឡើងនៅតាមបណ្តាប្រទេសនានាលើពិភពលោក ។ ជាក់ស្តែង មានក្មេងស្រីអាមេរិកម្នាក់បានលួចយករថយន្តឪពុកម្តាយរបស់នាងមកបើកបរនៅតាមផ្លូវជាមួយមិត្តភក្តិ ហើយបង្កគ្រោះថ្នាក់បណ្តាលឱ្យរថយន្តខូចខាតធ្ងន់ធ្ងរ និងធ្វើឱ្យខូចខាតដល់រថយន្តអ្នកដទៃទៀតផង ។

ទំព័រហ្វេសប៊ុករបស់ប៉ូលិសប្រចាំរដ្ឋកាលីហ្វ័រញ៉ា សហរដ្ឋអាមេរិក ឈ្មោះ Santa Rosa Police បានបង្ហោះរូបភាពរថយន្ត Tesla ១គ្រឿងបានខូចខាតទាំងស្រុង ព្រមទាំងសរសេរអំពីរឿងរ៉ាវដែលកើតឡើងថា អ្នកបង្កគ្រោះថ្នាក់លើកនេះ គឺជាយុវវ័យមានអាយុត្រឹម១៣ឆ្នាំប៉ុណ្ណោះ ។ ហេតុការណ៍នេះបានកើតឡើងកាលពីថ្ងៃទី១ ខែសីហា ឆ្នាំ២០២៣ ដោយមានរថយន្ត Tesla ១គ្រឿងពណ៌ខ្មៅបានខូចខាតយ៉ាងធ្ងន់ធ្ងរក្បែរបង្គោលភ្លើងមួយកន្លែងនៅតាមផ្លូវ King និង Howard ។ ប៉ុន្តែសំណាងល្អ យុវវ័យចំនួន៣នាក់នៅក្នុងរថយន្តរងរបួសបន្តិចបន្តួចប៉ុណ្ណោះ និងអាចដើរចេញពីរថយន្តដោយខ្លួនឯងបាន ។

ក្មេងស្រីម្នាក់អាយុ១៣ឆ្នាំ ប្រាប់ថា នាងបានយករថយន្តរបស់ឪពុកម្តាយ មកបើកបរដោយពុំទទួលបានការអនុញ្ញាត ហើយនាងក៏បាត់បង់ការគ្រប់គ្រងរថយន្ត និងមិនអាចបញ្ជារថយន្តបានទេ រហូតដល់វាជ្រុលទៅបុកបង្គោលភ្លើងនៅតាមផ្លូវ ។ លើសពីនេះ នាងក៏បានបើករថយន្តទៅបុករថយន្តចំនួន៣គ្រឿងផ្សេងទៀតដែលចតនៅក្បែរនោះ ។

ក្រោយមក អាជ្ញាធរបានបញ្ជូនខ្លួនក្មេងបង្កហេតុទាំងអស់ទៅពិនិត្យរកជាតិអាល់កុល ព្រមទាំងហៅអាណាព្យាបាលមកដោះស្រាយបញ្ហានេះ ។ អាជ្ញាធរបានសាកសួររកមូលហេតុដែលបង្កឱ្យកើតគ្រោះថ្នាក់ និងមានអ្នកដទៃពាក់ព័ន្ធជាមួយហេតុការណ៍នេះឬក៏អត់ ៕ ប្រភព ៖ khaosod

សហរដ្ឋអាមេរិក ៖ បុរសអាមេរិកម្នាក់ដែលធ្វើការជាអ្នកម៉ាស្សាបានបង្ហាញរូបភាពរៀបការរបស់ខ្លួនប្រកបដោយភាពផ្អែមល្ហែម ប៉ុន្តែអ្វីដែលមិនធម្មតានោះ គឺមានកូនក្រមុំរៀបការជាមួយលោករហូតដល់១០នាក់ ហើយពួកគេថែមទាំងស្លៀកពាក់ឈុតកូនក្រមុំដ៏សិចស៊ីទៀតផង ។

វាបានក្លាយជារឿងមួយល្បីល្បាញក្នុងបណ្តាញសង្គមអាមេរិក ក្រោយពីបុរសឈ្មោះ Emmanuel Lustin ជាអ្នកម៉ាស្សាវ័យក្មេងរស់នៅទីក្រុងញូវយ៉ក សហរដ្ឋអាមេរិក បានបង្ហោះវីដេអូពិធីរៀបការរបស់ខ្លួន ជាមួយនារីចំនួន១០នាក់នៅថ្ងៃជាមួយគ្នាក្នុងបណ្តាញសង្គម ។

បើតាមវីដេអូនេះ លោក Emmanuel បាននៅជាមួយប្រពន្ធទាំង១០នាក់របស់លោកក្នុងបរិវេណអង្គុយលេងមួយកន្លែងនៅមាត់សមុទ្រ ហើយកូនក្រមុំទាំងអស់បានស្លៀកឈុតប៊ីគីនី ពណ៌ស និងថតរូបជាមួយគ្នាយ៉ាងមានក្តីសុខ ។

លោក Emmanuel និយាយថា ៖ «ពេលនេះ ទំនាក់ទំនងរបស់លោកជាមួយពួកនាង គឺពោរពេញទៅដោយភាពចម្រុះ ដូចជា ភាសា រូបរាង និងអត្តចរិត ។ ប៉ុន្តែអ្វីដែលយើងគ្រប់គ្នាមានចំណុចរួមនោះ គឺសេចក្តីស្រឡាញ់ និងកម្លាំងវិជ្ជមាន» ។

មនុស្សជាច្រើនបានស្គាល់លោក Emmanuel នៅក្នុងបណ្តាញសង្គម OnlyFans, Twitter និង Instagram ពីព្រោះលោកតែងតែបង្ហោះវីដេអូអំពីការម៉ាស្សាឱ្យអ្នកលេងបណ្តាញសង្គមបានទស្សនាជានិច្ច ។ ហេតុនេះ លោកក៏បានបង្ហោះវីដេអូពិធីរៀបការរបស់លោក កាលពីថ្ងៃទី៣១ ខែកក្កដា ឆ្នាំ២០២៣ និងបង្ហោះវីដេអូដំណើរកម្សាន្តរបស់លោកជាមួយភរិយាម្នាក់ៗផងដែរ ៕ ប្រភព ៖ khaosod

កាលពីឆ្នាំទៅ ព្រះមហាក្សត្រនៃប្រទេសអារ៉ាប៊ីសាអូឌីត លោក Mohammed bin Salman បានបញ្ចេញគម្រោងសំណង់ដ៏មហាសាល​ ដែលមានឈ្មោះថា Neom ដោយរំពឹងថានឹងការប្រែប្រទេសអារ៉ាប៊ីសាអូឌីត ទៅជាទីក្រុងដ៏អស្ចារ្យ ដែលអាចទាក់ទាញមនុស្សមករស់នៅជាច្រើនលាននាក់។ពាក្យថា Neom មកពីពាក្យនៃប្រទេសហ្គ្រិក បានន័យថា ថ្មី (New) ដោយ ព្រះមហាក្សត្ស Mohammed bin Salman ចង់កែប្រែអារ៉ាប៊ីសាអូឌីតទៅជាទីក្រុងថ្មី និងទំនើប មានបច្ចេកវិទ្យាជឿនលឿនជាងគេលើលោក។

នៅក្នុងគម្រោងសំណង់មហាសាល​ Neom នេះ មានទីក្រុងចំនួន៤ដែលនឹងត្រូវសាងសង់ឡើង៖

• The Line
• Neom Bay
• Oxagon
• Trojena

មិនតែប៉ុណ្ណោះ ក្រោយគម្រោងនេះសាងសង់រួចរាល់ ព្រះមហាក្សត្ស Mohammed bin Salman ក៏គ្រោងនឹងសាងសង់ព្រះច័ន្ទសិប្បនិម្មិត និងមនុស្សយន្តដាយណូស័រថែមទៀតផងដែរ។

ថ្វីបើគម្រោងទាំងអស់នេះ មើលទៅអាចនាំឱ្យមនុស្សរស់នៅក្នុងភាពជឿនលឿនជាងមុន ក៏ប៉ុន្តែនៅតែមានមតិមួយចំនួនលើកឡើងថា ការធ្វើបែបនេះ អាចនឹងធ្វើឱ្យមានការប្រកាន់វណ្ណៈ ក្រោកឡើងវិញរវាងអ្នកមាន និងអ្នកក្រ៕

ប្រភព៖ Neom