បរទេស៖ ក្រុមអ្នកជំនាញជនជាតិអាល្លឺម៉ង់បានរកឃើញច្រកចូលរូងភ្នំ ដែលធ្លាប់មានមនុស្សរស់នៅក្នុងសម័យទឹកកកកាលពី ១៦,០០០ ឆ្នាំមុន។
យោងតាមប្រភពព័ត៌មាន Newsweek ដែលបានចុះផ្សាយនៅថ្ងៃទី៣ ខែសីហា ថា ក្នុងអំឡុងពេលស្រាវជ្រាវនៃការជីកកកាយនៅទីក្រុង Engen ស្រុក Konstanz ភាគខាងត្បូងប្រទេសអាល្លឺម៉ង់ ក្រុមវេជ្ជបណ្ឌិត Yvonne Tafelmaier នៅសាកលវិទ្យាល័យ Tübingen បានរកឃើញច្រកចូលរូងភ្នំមួយដែលធ្លាប់មានមនុស្សរស់នៅក្នុងសម័យ Magdalenian ប្រហែល ១៤,០០០ – ១៦,០០០ ឆ្នាំមុន។ ថ្វីត្បិតតែល្អាងនេះត្រូវបានអ្នកបុរាណវិទូស្គាល់ជាយូរមកហើយក៏ដោយ ក៏ពួកគេទើបតែបានរកឃើញច្រកចូលរូងភ្នំទឹកកកថ្មីៗនេះទេ។

ក្រុមវេជ្ជបណ្ឌិត Yvonne Tafelmaier បាននិយាយថា ការរកឃើញបែបនេះគឺកម្រមានណាស់នៅក្នុងការស្រាវជ្រាវ Paleolithic ដែលផ្តល់ឱកាសដើម្បីឆ្លើយសំណួរសំខាន់ៗអំពីអាកប្បកិរិយាអ្នកប្រមាញ់ទឹកកកនាសម័យនោះ។ នៅខែមេសាឆ្នាំនេះ ក្រុមអ្នកវិទ្យាសាស្ត្របានបន្តសិក្សារូងភ្នំ ដោយពួកគេបានកំណត់ទីតាំងនៃរន្ធ ២០ ម៉ែត្រនឹងប្រើការវិភាគរូបភាព។ បន្ទាប់មកនៅថ្ងៃទី២ ខែសីហា ពួកគេបានជីកកកាយផ្លូវចូលក្នុងរូងភ្នំទឹកកកដ៏កម្រនេះ ទោះជាយ៉ាងណាក៏ដោយ ច្រកចូលត្រូវបានរារាំងទាំងស្រុងដោយដីល្បាប់។

Tafelmaier បាននិយាយថា ខណៈពេលកំពុងជីកកកាយតំបន់នោះ ក្រុមក៏បានរកឃើញឧបករណ៍ថ្ម និងឆ្អឹងសត្វពីសម័យទឹកកកផងដែរ ហើយពួកយើងនឹងបន្តធ្វើកំណាយនៅកន្លែងនោះនៅឆ្នាំក្រោយ។
ច្រកចូលរូងភ្នំបុរាណគឺជាសំណល់មួយនៃយុគសម័យទឹកកកដែលក្រុមអ្នកវិទ្យាសាស្ត្រទើបតែបានរកឃើញនាពេលថ្មីៗនេះ។ កាលពីខែកក្កដា បំណែកភ្លុកដំរីដែលបានចម្លាក់កាលពី ៣៥,០០០ ឆ្នាំមុន ក្នុងសម័យទឹកកក ក៏ត្រូវបានគេរកឃើញនៅរូងភ្នំ Hohle Fels ក្នុងទីក្រុង Schelklingen ប្រទេសអាល្លឺម៉ង់ផងដែរ៕ ប្រភព៖vnexpress

ប្រទេសថៃ ៖ សម្រាប់អ្នកចង់នាំក្រុមគ្រួសារទៅកម្សាន្តនៅតំបន់ដែលមានបរិយាកាសធម្មជាតិស្រស់បំព្រង និងសម្បូរទៅដោយម្ហូបអាហារជាច្រើនមុខ គួរតែទៅកម្សាន្តនៅផ្សារបណ្តែតទឹកប្រទេសថៃ ព្រោះកន្លែងនេះអាចបំពេញតម្រូវការ និងចំណង់ចំណូលចិត្តរបស់ភ្ញៀវទេសចរ ។ ភ្ញៀវទេសចរទាំងឡាយអាចបណ្តែតអារម្មណ៍យ៉ាងសប្បាយរីករាយ ខណៈពួកគេបានអង្គុយមើលខ្សែទឹកហូរតាមកម្លាំងខ្យល់ ព្រមទាំងបរិភោគអាហារឆ្ងាញ់ៗ ។

នេះជាផ្សារបណ្តែតទឹកចំនួន៥កន្លែង ដែលបានទាក់ទាញភ្ញៀវទេសចរជាតិ និងអន្តរជាតិ រួមមាន ៖
១-ផ្សារបណ្តែតទឹក អយុធ្យា (Ayothaya) ៖
ផ្សារនេះមានទីតាំងស្ថិតនៅទីក្រុងចាស់ ហើយគេបង្កើតឡើងសម្រាប់ធ្វើជាកន្លែងទេសចរណ៍អភិរក្សសិល្បៈ និងវប្បធម៌ថៃ ដែលមានតាំងពីសម័យក្រុងអយុធ្យា ជារាជធានី ដោយគេបានបង្ហាញពីស្ថាបត្យកម្ម ការតុបតែងខ្លួន រួមទាំងម្ហូបអាហារបុរាណផងដែរ ។ ភ្ញៀវទេសចរអាចដើរកម្សាន្តនៅបរិវេណជុំវិញយ៉ាងងាយស្រួល ខណៈផ្សារបណ្តែតទឹកនេះបើកទទួលភ្ញៀវទេសចររៀងរាល់ថ្ងៃ ។

២-ផ្សារបណ្តែតទឹក ឃ្លងឡាត ម៉ាយ៉ម (Khlong Lat Mayom) ៖
ផ្សារបណ្តែតទឹកនេះមានទីតាំងនៅមាត់ប្រឡាយ Lat Mayom ក្នុងតំបន់តាលីងឆាន់ ទីក្រុងបាងកក ។ កាលពីសម័យមុន អ្នកស្រុករស់នៅទីនេះបានធ្វើដំណើរតាមទឹកភាគច្រើន ប៉ុន្តែការធ្វើដំណើរតាមទឹកក៏បានបាត់បង់ ដោយសារការធ្វើដំណើរតាមផ្លូវផ្សេងមានភាពងាយស្រួលជាង ។ ក្រោយមក ផ្សារបណ្តែតទឹកនេះត្រឡប់មកល្បីល្បាញម្តងទៀត ខណៈអ្នកស្រុកចង់រកប្រាក់ចំណូលបន្ថែម ព្រោះជាទូទៅ ពួកគេប្រកបរបរកសិកម្ម ។ ហេតុនេះ អ្នកស្រុកក៏បានយករបស់របរមកលក់ក្នុងផ្សារនេះ រហូតដល់មានគេស្គាល់ច្រើន ។

លើសពីនេះ ផ្សារបណ្តែតទឹក Khlong Lat Mayom បានរៀបចំកម្មវិធីជាច្រើនដូចជា ការជ្រើសរើសទិញទំនិញ និងម្ហូបអាហារផ្សេងៗ, អង្គុយលើទូកគយគន់មើលជីវភាពរស់នៅរបស់អ្នកស្រុកនៅតាមប្រឡាយ, រៀនសូត្រពីកសិកម្មចម្រុះ និងទស្សនាសារមន្ទីរកប៉ាល់គំរូ ។ ផ្សារបណ្តែតទឹកនេះបើកទទួលភ្ញៀវទេសចរនៅរៀងរាល់ថ្ងៃសៅរ៍ និងអាទិត្យ និងថ្ងៃឈប់សម្រាកផ្សេងៗ ។

៣-ផ្សារបណ្តែតទឹក អាំផាវ៉ា (Amphawa) ៖
ផ្សារបណ្តែតទឹកនេះបានបង្ហាញពីជីវភាពរស់នៅរបស់ពលរដ្ឋថៃនៅតាមប្រឡាយ និងជាកន្លែងជំរុញវិស័យទេសចរណ៍ប្រកបដោយនិរន្តរភាព ។ ផ្សារនេះមានទីតាំងស្ថិតនៅខេត្តសមុទ្រសង់ក្រាម និងបើកនៅរៀងរាល់ល្ងាចថ្ងៃសុក្រ រហូតដល់ថ្ងៃអាទិត្យ ។ ផ្សារនេះមានហាងលក់ទំនិញបែបស្ថាបត្យកម្មបុរាណនៅតាមមាត់ប្រឡាយ ហើយពេលល្ងាច គេនឹងបានឃើញអ្នកស្រុកអុំទូកដឹកម្ហូបអាហារ និងបង្អែម នំចំណីជាច្រើនមុខមកលក់ឱ្យភ្ញៀវទេសចរ ។

ក្រៅពីនេះ នៅផ្សារទឹក Amphawa ក៏មានសេវាកម្មឱ្យភ្ញៀវទេសចរជិះទូកកម្សាន្តមើលអំពិលអំពែកពេលយប់ផងដែរ ។ ការជិះទូកកម្សាន្ត គឺជាសកម្មភាពមួយដែលល្បីល្បាញនៅទីនេះ ហើយបើភ្ញៀវទេសចរណាខ្លាចថា ការមកកម្សាន្តនៅទីនេះយប់ងងិតខ្លាំងពេក ហើយធ្វើដំណើរលំបាកនោះ ពួកគេអាចសម្រាកនៅទីនេះបាន ព្រោះផ្សារនេះមានបន្ទប់ស្នាក់នៅជាច្រើនបែបសម្រាប់ភ្ញៀវទេសចរផងដែរ ។

៤-ផ្សារបណ្តែតទឹក ដាំណឺន សាឌួក (Damnoen Saduak) ៖
ផ្សារបណ្តែតទឹក Damnoen Saduak ស្ថិតនៅខេត្តរាជបុរី ហើយជាផ្សារទឹកដែលរក្សាបាននូវរបៀបរស់នៅបែបប្រពៃណីជាយូរមកហើយ ។ រៀងរាល់ព្រឹក អ្នកស្រុកបានអុំទូកដឹកផលិតផលកសិកម្មរបស់ខ្លួនមកលក់ដូរតាមបែបសម័យបុរាណ ។ សកម្មភាពនេះបានទាក់ទាញភ្ញៀវទេសចរជាច្រើននាក់ ដែលចង់មកមើលឃើញដោយផ្ទាល់ភ្នែកពីការរស់នៅរបស់ពលរដ្ឋថៃមានផ្ទះនៅមាត់ទឹក ។ ផ្សារបណ្តែតទឹកនេះបើកទទួលភ្ញៀវទេសចរនៅពេលព្រឹក ហើយក្រៅពីមានផ្លែឈើ និងម្ហូបអាហារផ្សងៗលក់ហើយ នៅទីនេះក៏មានតំបន់ប្រជុំជនផ្សេងទៀតឱ្យភ្ញៀវទេសចររៀនសូត្រផងដែរ ដូចជា ការផលិតស្ករដូង ឬការជិះទូកកម្សាន្ត ហើយភ្ញៀវទេសចរអាចមកកម្សាន្តនៅទីនេះរៀងរាល់ថ្ងៃ ។

៥-ផ្សារបណ្តែតទឹក ក្វាងចូវ (Guangzhou) ៖
ផ្សារបណ្តែតទឹក Guangzhou គឺជាផ្សារស្ថិតនៅលើទឹកជ្រោះដំបូងគេក្នុងខេត្តពេជ្របុរី ប្រទេសថៃ ។ ផ្សារនេះមានទីតាំងនៅកណ្តាលព្រៃ និងមានបរិយាកាសត្រជាក់ត្រជុំ ។ កាលពីមុន នៅបរិវេណនេះមានទឹកជ្រោះធ្លាក់ ប៉ុន្តែត្រូវបានបំផ្លាញដោយប្រព័ន្ធអេកូឡូស៊ី ហើយធ្វើឱ្យតំបន់នេះកើតភាពរាំងស្ងួតយ៉ាងខ្លាំង ។ ក្រោយមក មានក្រុមនិស្សិតថៃចាប់អារម្មណ៍ពីការអភិវឌ្ឍតាមគម្រោងរបស់ព្រះមហាក្សត្រថៃ ហើយពួកគេក៏ចាប់ផ្តើមអភិវឌ្ឍន៍ទីនេះឱ្យក្លាយជាព្រៃខៀវស្រងាត់ឡើងវិញក្នុងរយៈពេលមិនយូរប៉ុន្មាន ។

ហេតុនេះ ខាងឧទ្យានជាតិ ក៏បានរៀបចំតំបន់នេះធ្វើជាកន្លែងសម្រាប់ឱ្យពលរដ្ឋទូទៅមកសម្រាកលំហែ ។ បច្ចុប្បន្ន មានពលរដ្ឋបើកហាងលក់ម្ហូបអាហារ, កូនឈើ និងផលិតផលផ្សេងៗ ហើយចាន និងសម្ភារៈសម្រាប់ដាក់ម្ហូបអាហារឱ្យភ្ញៀវទេសចរ គឺសុទ្ធតែផលិតឡើងពីធម្មជាតិទាំងអស់ដើម្បីរក្សាបរិស្ថាន ។ ផ្សារបណ្តែតទឹក Guangzhou បើកទទួលភ្ញៀវទេសចរនៅរៀងរាល់ថ្ងៃសៅរ៍-អាទិត្យ និងថ្ងៃឈប់សម្រាកផ្សេងៗ ៕ ប្រភព ៖ lazada

ប្រទេសចិន៖ មនុស្សយន្ត QIBBOT របស់ប្រទេសចិន អាចបញ្ជាពីចម្ងាយដោយប្រើពេលត្រឹមតែ ១២ មិល្លីវិនាទី តិចជាង ១/១៥ នៃមួយប៉ព្រិចភ្នែក។
យោងតាមប្រភពព័ត៌មាន SCMP ដែលបានរាយការណ៍កាលពីថ្ងៃទី ៣ ខែសីហាថា ក្រុមហ៊ុន Qibo Robot Company នៅក្នុងខេត្ត Shandong ភាគខាងកើតប្រទេសចិន បានបង្កើត QIBBOT ដែលជាមនុស្សយន្តដៃម្ខាងបញ្ជាពីចម្ងាយ នឹងត្រូវបានរចនាឡើងដើម្បី ប្រកួតកីឡា ប្រតិបត្តិការយោធា រួមជាមួយការប្រយុទ្ធនឹងឧក្រិដ្ឋកម្មផ្សេងៗជាដើម។ ប្រតិបត្តិករ Qibbot អាចឈរនៅជិត និងគ្រប់គ្រងសកម្មភាពរបស់វា ដូចជាគ្រូបង្ហាត់នៅក្រៅសង្វៀន។ ប៉ុន្តែ ទោះជាយ៉ាងណាក៏ដោយ មនុស្សយន្ត QIBBOT មិនអាចមានសមត្ថភាពប្រើប្រាស់ល្បឿនផ្ទាល់ខ្លួនរបស់ពួកគេទេ មានន័យថា ទាល់តែមានមនុស្សបញ្ជាទើបវាអាចដំណើរការបាន។

យោងតាមលោក Geng Tao ស្ថាបនិក Qibo Robot បាននិយាយថា ជាទូទៅជាង ៩៥% នៃមនុស្សយន្តដែលគ្រប់គ្រងពីចម្ងាយរបស់ពិភពលោកត្រូវបានរចនាឡើងសម្រាប់ការងារដែលមានល្បឿនទាប ឬមធ្យម ដោយមានរយៈពេលក្នុងការឆ្លើយតបជារឿយៗលើសពី ១០០ មីលីវិនាទី។ ដូច្នេះ QIBBOT គឺជាមនុស្សយន្តគ្រប់គ្រងពីចម្ងាយដំបូងបង្អស់របស់ពិភពលោកដែលមានល្បឿនលឿនបំផុត ដោយប្រើរយៈពេលត្រឹមតែ ១២ មិល្លីវិនាទីប៉ុណ្ណោះ។

នៅលើពិភពលោកមានតែមនុស្សយន្តមួយចំនួនប៉ុណ្ណោះដែលសម្រេចបាននូវការបញ្ជាពីចម្ងាយយ៉ាងរហ័សជាមួយនឹងល្បឿនរបស់វា ប៉ុន្តែពួកវាមានទំហំតូច ហើយឧបករណ៍បញ្ជាពីចម្ងាយគឺស្មុគស្មាញណាស់។ ទន្ទឹមនឹងនេះមនុស្ស QIBBOT មានកម្ពស់រហូតដល់ ១.៩m ជាមួយនឹងដៃប្រវែង ១.៥m ហើយកំណែប្រដាប់អាវុធមួយក៏មានទម្ងន់ដល់ទៅ ១៤០ គីឡូក្រាមផងដែរ។

គម្រោងមនុស្ស QIBBOT បានចាប់ផ្តើមដំណើរការនៅឆ្នាំ ២០១៩ ហើយក្រុមអ្នកជំនាញបានចំណាយពេល ៣ ឆ្នាំដើម្បីបង្កើតគំរូជំនាន់ទីមួយ។ បន្ទាប់មក ពួកគេបានក៏បានចំណាយពេលមួយឆ្នាំបន្ថែមទៀតនៃការកែតម្រូវមុនពេលបើកដំណើរការ QIBBOT ជាផ្លូវការនៅចុងឆ្នាំនេះ ជាមួយនឹងដៃពីរ ដែលនីមួយៗមានសន្លាក់កាន់តែច្រើន និងចលនាកាន់តែរលូន។ ពួកគេជឿថាមនុស្សយន្តដែលបញ្ជាពីចម្ងាយដែលមានចលនាលឿននេះ មានសក្តានុពលសម្រាប់ប្រើប្រាស់ក្នុងស្ថានភាពអាសន្ន និងគ្រោះថ្នាក់ជាច្រើនដូចជាការប្រយុទ្ធនឹងឧក្រិដ្ឋកម្ម ប្រតិបត្តិការយោធា ហើយអាចបង្កើនប្រសិទ្ធភាពផលិតកម្មយ៉ាងខ្លាំង៕ប្រភព៖vnexpress

បរទេស៖ ការរញ្ជួយដីមិនធម្មតាមួយបានបំផ្លាញភូមិនៅជ្រលងភ្នំ Rhône ក្នុងប្រទេសបារាំង ដែលជំរុញឱ្យអ្នកវិទ្យាសាស្ត្រស្វែងរកការពន្យល់បន្ថែម។
យោងតាមប្រភពព័ត៌មាន IFL Science ដែលបានរាយការណ៍នៅថ្ងៃទី ៤ ខែសីហា ថា ខណៈពេលដែលគ្មាននរណាម្នាក់ត្រូវបានរងរបួសនៅក្នុងព្រឹត្តិការណ៍នេះក៏ដោយ ឥទ្ធិពលនៃការរញ្ជួយដីគឺមានទំហំធំខ្លាំងណាស់ ដែលវាអាចមកពីផលប៉ះពាល់របស់មនុស្សលើអាកាសធាតុនឹងអាចមានផលវិបាកដោយប្រយោលលើសពីការរំពឹងទុក។

ជាទូទៅការរញ្ជួយដីភាគច្រើនកើតឡើងនៅតាមបណ្តោយព្រំដែននៃបន្ទះ tectonic។ ហេតុនេះ នៅពេលដែលការរញ្ជួយដីមានទ្រង់ទ្រាយធំខ្លាំង វានឹងបណ្តាលឱ្យមានការខូចខាតនៅខាងក្នុងបន្ទះ tectonic។ ទោះជាយ៉ាងណាក៏ដោយ អ្នកភូគព្ភវិទូមានការចាប់អារម្មណ៍យ៉ាងខ្លាំងចំពោះព្រឹត្តិការណ៍នៃការរញ្ជួយដីនេះ ដែលវាស្រាប់តែកើតឡើងជាលើកដំបូងក្នុងតំបន់ដែលគ្មានបន្ទះ tectonic ទៅវិញ។

ក្រុមអ្នកវិទ្យាសាស្ត្រនៅ French Geological Survey បានសាងសង់គំរូភូគព្ភសាស្ត្រ 3D នៃតំបន់ជុំវិញការរញ្ជួយដី និងរួមបញ្ចូលថ្មដែលមានអាយុកាលតាំងពីឆ្នាំ ១៨៥០។ ពួកគេបានរកឃើញថាសម្ពាធទឹកក្នុងតំបន់នេះគឺខ្ពស់បំផុតក្នុងរយៈពេល ១០ ឆ្នាំមុនការរញ្ជួយដីឈានដល់ ១ លានប៉ាស្កាល់នៅជម្រៅ ១.២ គីឡូម៉ែត្រខាងក្រោមដីនៅជិតចំណុចដែលខ្សែបន្ទាត់ទាំងពីរប្រសព្វគ្នា។ ក្រុមការងារប៉ាន់ប្រមាណថាសម្ពាធដែលបង្កើតឡើងដោយទឹកគឺធំជាងសម្ពាធដែលបញ្ចេញពីការជីកយករ៉ែ ២.៥ ដងឯណោះដែលវាគ្រប់គ្រាន់ដើម្បីបង្កឱ្យមានកំហុសរាក់នៅក្នុងតំបន់។

ដូចនេះ ការរញ្ជួយដីអាចមកពីបញ្ហាទាំងនេះដែលវាកើតឡើងនៅជម្រៅប្រហែល ១ គីឡូម៉ែត្រ នឹងបណ្តាលឱ្យមានការខូចខាតយ៉ាងធ្ងន់ធ្ងរ។ សម្ពាធដែលបង្កើតឡើងដោយការទាញយកប្រេង និងឧស្ម័ន ជាពិសេសការបញ្ចេញទឹកសំណល់ជាបន្តបន្ទាប់ ក៏ត្រូវបានកើតឡើងនៅក្នុងតំបន់ជាច្រើននៃពិភពលោកផងដែរ៕ ប្រភព៖vnexpress

ប្រទេសវៀតណាម ៖ ប្រទេសវៀតណាមបានរៀបចំផែនការពង្រីកអាកាសយានដ្ឋានឱ្យបានជាង៣០កន្លែងនៅឆ្នាំ២០៣០ ។ ការពង្រីកអាកាសយានដ្ឋាននេះ គឺជាការព្យាយាមជំរុញវិស័យទេសចរណ៍ និងពាណិជ្ជកម្មនៅប្រទេសវៀតណាម ។ បច្ចុប្បន្ន វៀតណាមមានអាកាសយានដ្ឋានប្រមាណ២២កន្លែង ប៉ុន្តែរដ្ឋាភិបាលជឿជាក់ថា វៀតណាមនឹងមានអាកាសយានដ្ឋានច្រើនជាងនេះ ដើម្បីលើកកម្ពស់ឧស្សាហកម្មអាកាសចរណ៍ដែលកំពុងរីកចម្រើន ។

រដ្ឋាភិបាលវៀតណាមបានដាក់គោលដៅថា ប្រទេសវៀតណាមនឹងមានអាកាសយានដ្ឋានអន្តរជាតិសរុបចំនួន១៤កន្លែង និងអាកាសយានដ្ឋានក្នុងប្រទេស ចំនួន១៦កន្លែងទៀតនៅឆ្នាំ២០៣០ ។ ចំណែកទឹកប្រាក់សម្រាប់វិនិយោគលើអាកាសយានដ្ឋាន នឹងប្រមូលពីថវិកាជាតិ, ថវិកាមិនមែនជាថវិកាជាតិ និងថវិកាតាមច្បាប់ផ្សេងៗ ។

កាលពីឆ្នាំ២០២១ រដ្ឋាភិបាលវៀតណាមបានសម្រេចឱ្យមានការសាងសង់អាកាសយានដ្ឋានអន្តរជាតិ Long Thanh ហើយគេសង្ឃឹមថា អាកាសយានដ្ឋាននេះនឹងសាងសង់រួចរាល់នៅឆ្នាំ២០២៥ ។ អាកាសយានដ្ឋានអន្តរជាតិ Long Thanh នឹងក្លាយជាអាកាសយានដ្ឋានដ៏ធំបំផុតនៅប្រទេសវៀតណាម ហើយអាចទទួលអ្នកដំណើរបានច្រើនរហូតដល់១០០លាននាក់ក្នុង១ឆ្នាំ ។

ក្រៅពីនេះ រដ្ឋាភិបាលវៀតណាមក៏មានគម្រោងលើកកម្ពស់ និងពង្រីកអាកាសយានដ្ឋានចាស់ៗដែលមានស្រាប់ផងដែរ ។ ហេតុនេះ ការពង្រីកអាកាសយានដ្ឋាន ក៏រួមបញ្ចូលទាំងអាកាសយានដ្ឋានអន្តរជាតិ ដូចជា Noi Bai, Tan Son Nhat និង Cam Ranh ផងដែរ ។

គម្រោងពង្រីកអាកាសយានដ្ឋានឱ្យបានជាង៣០កន្លែងនៅឆ្នាំ២០៣០ គឺជាសញ្ញាមួយផ្សេងទៀតនៃការអភិវឌ្ឍឧស្សាហកម្មអាកាសចរណ៍របស់ប្រទេសវៀតណាម ។ រដ្ឋាភិបាលជឿជាក់ថា ឧស្សាហកម្មអាកាសចរណ៍នឹងដើរតួនាទីសំខាន់សម្រាប់ការអភិវឌ្ឍសេដ្ឋកិច្ចជារួម ៕ ប្រភព ៖ AEC connect

ប្រទេសវៀតណាម ៖ វៀតណាមបានរៀបចំគម្រោងអភិវឌ្ឍន៍វិស័យទេសចរណ៍ម្ហូបអាហារ (Culinary Tourism) ឱ្យក្លាយជាផលិតផលយុទ្ធសាស្ត្រថ្មីរបស់ប្រទេស ដើម្បីរួមចំណែកជួយដល់ការអភិវឌ្ឍសមត្ថភាពប្រកួតប្រជែង និងវិស័យទេសចរណ៍ ។ ភ្ញៀវទេសចរអន្តរជាតិភាគច្រើនដែលបានមកកម្សាន្តនៅប្រទេសវៀតណាម ពួកចូលចិត្តបរិភាគអាហារវៀតណាម និងសរសើរថា មានមន្តស្នេហ៍ ។

ភ្នាក់ងារទេសចរណ៍ជាតិវៀតណាមបានលើកឡើងពាក់ព័ន្ធនឹងកិច្ចសហការយុទ្ធសាស្ត្រដើម្បីលើកកម្ពស់វិស័យទេសចរណ៍ ការធ្វើម្ហូបអាហារ និងផ្សព្វផ្សាយវប្បធម៌វៀតណាមទៅកាន់ពិភពលោកឱ្យគេបានស្គាល់ តាមរយៈគម្រោង «ការបង្ហាញវត្ថុធាតុដើមនៃគ្រឿងផ្សំ និងការធ្វើម្ហូបអាហារវៀតណាមជាច្រើនមុខ» ។ ការបង្កើតគម្រោងនេះឡើង គឺក្នុងគោលបំណងកសាងកេរ្តិ៍ឈ្មោះដល់ម្ហូបអាហារជាច្រើនមុខ និងគុណតម្លៃវប្បធម៌ផ្សេងៗរបស់ប្រទេស ។

គម្រោងនេះនឹងផ្តោតលើការប្រើប្រាស់បច្ចេកវិទ្យាព័ត៌មាន ដើម្បីឱ្យតំបន់ផ្សេងៗរបស់វៀតណាមអាចបង្ហាញព័ត៌មានអំពីផលិតផលម្ហូបអាហាររបស់ពួកគេក្នុងប្រព័ន្ធផ្សព្វផ្សាយរួមគ្នា ។ តាមរយៈវិធីនេះ គេនឹងបង្កើតផែនទីឌីជីថលសម្រាប់ទីតាំងម្ហូបអាហារ និងកន្លែងលក់អាហារនៅតាមខេត្តផ្សេងៗនៅទូទាំងប្រទេស ។

ពិធីបុណ្យអាហារអន្តរជាតិមានឈ្មោះថា «Quang Nam 2023» នឹងរៀបចំឡើងនៅថ្ងៃទី៣១ ខែសីហា ដល់ថ្ងៃទី៣ ខែកញ្ញា ឆ្នាំ២០២៣ នៅខេត្ត Quang Nam ។ គេរំពឹងថា ពិធីនេះនឹងជួយអភិរក្ស លើកកម្ពស់ និងប្រើប្រាស់ប្រយោជន៍គុណតម្លៃផ្នែកវប្បធម៌ ការធ្វើម្ហូបអាហារ និងដំណើរកម្សាន្តយ៉ាងមានប្រសិទ្ធភាព ។ ក្រៅពីនេះ នៅក្នុងពិធីក៏មានការបង្ហាញអាហារបុរាណរបស់ខេត្ត Quang Nam ចំនួន២៦មុខ ។

ចំណែកខេត្តផ្សេងៗនៅទូទាំងប្រទេសវៀតណាម ក៏បានរៀបចំកម្មវិធីលើកកម្ពស់ទេសចរណ៍គួរឱ្យចាប់អារម្មណ៍ដូចគ្នាដែរ ដើម្បីទាក់ទាញភ្ញៀវទេសចរជាតិ និងភ្ញៀវអន្តរជាតិឱ្យមកកម្សាន្តនៅវៀតណាមក្នុងរដូវក្តៅ ៕ ប្រភព ៖ AEC connect