រដ្ឋធានីកៀវ៖ ស្របពេលសង្គ្រាមវាយប្រយុទ្ធគ្នាយ៉ាងសាហាវ រវាងកងទ័ពរបស់ក្រុងកៀវ និង ទាហានរបស់ក្រុងមូស្គូ កំពុងតែបន្ដស្លាប់គ្នាទៅវិញទៅមក រកទីបញ្ចប់មិនទាន់ឃើញនោះ ឥឡូវ ក៏មានសេចក្ដីរាយការណ៍ជាថ្មី ដោយរុស្ស៊ី បានចោទប្រកាន់ទៅលើអ៊ុយក្រែន អំពីការវាយប្រហារ ទៅលើមជ្ឈមណ្ឌលជ្រើសរើសកងទ័ពរបស់រុស្ស៊ី តាមរយៈប្រើប្រាស់យុទ្ធសាស្រ្ដប្លែកៗ។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃពុធ ទី៩ ខែសីហា ថា រដ្ឋាភិបាលក្រុងមូស្គូ កំពុងតែស្ដីបន្ទាសដល់អាជ្ញាធរអ៊ុយក្រែន អំពីការវាយប្រហារបំផ្លិចបំផ្លាញ ទៅលើមជ្ឈមណ្ឌលជ្រើសរើសកងទ័ពរបស់រុស្ស៊ី ដោយបានចោទប្រកាន់ ថា ក្រុមអ្នកហៅទូរស័ព្ទរបស់អ៊ុយក្រែន កំពុងតែបោកបញ្ឆោត ដល់បុរសវ័យចំណាស់ៗរបស់ជនជាតិរុស្ស៊ី ជំរុញឱ្យប្រព្រឹត្តបទឧក្រិដ្ឋផ្សេងៗ។ ប៉ុន្ដែការអះអាងរបស់រុស្ស៊ី មិនមានភស្ដុតាង បញ្ជាក់នោះឡើយ។

ការិយាល័យអគ្គរដ្ឋអាជ្ញាធររុស្ស៊ី បានចោទប្រកាន់ ថា បណ្ដាញទីភ្នាក់ងារចារកម្មនានារបស់អ៊ុយក្រែន កំពុងតែក្លែងខ្លួន ដើរតួនាទីធ្វើជាប៉ូលិស ឬ ធ្វើជាម្ចាស់បំណុល ហៅទូរស័ព្ទ ឬ ញុះញង់ជំរុញឲ្យជនជាតិរុស្ស៊ី វាយប្រហារប្រឆាំងនឹងមជ្ឈមណ្ឌលជ្រើសរើសទាហានរបស់ក្រុងមូស្គូ ជាថ្នូរនឹងការសន្យា ដោះស្រាយបំណុលរបស់ពួកគេ។ ជនជាតិរុស្ស៊ី ខ្លះ ក៏ត្រូវបានចោទប្រកាន់ ជុំវិញការសន្យាយកប្រាក់សន្សំរបស់ពួកគេ ត្រឡប់មកវិញ ផងដែរ។

ជនរងគ្រោះ ត្រូវបានគេប្រាប់ នៅក្នុងការឆបោកនោះ ថា ក្រុមឧក្រិដ្ឋជន បានចូលទៅកាន់កាប់ប្រាក់សន្សំរបស់ពួកគេ ប៉ុន្តែជនរងគ្រោះ នឹងទទួលបានប្រាក់ទាំងនោះ ត្រឡប់មកវិញ ប្រសិនបើជនរងគ្រោះទាំងនោះ ហ៊ានវាយប្រហារ ទៅលើមជ្ឈមណ្ឌលជ្រើសរើសបុគ្គលិកទាហានរបស់ក្រុងមូស្គូ។ ជួនកាល ជនរងគ្រោះខ្លះ ក៏ទទួលបានការធានា ថា ការវាយប្រហារបែបនេះ នឹងអាចជួយ ចាប់ក្រុមបណ្ដាញឧក្រិដ្ឋជន ផងដែរ។

ក្រុមរដ្ឋអាជ្ញាធររបស់រុស្ស៊ី បានបន្ថែម ថា ការហៅតាមទូរស័ព្ទបែបនេះ ត្រូវបានគេធ្វើឡើង ជាលក្ខណៈទ្រង់ទ្រាយធំ ស្របពេលជាមួយនឹងទាហានរុស្ស៊ី វាយរុលទៅមុខ នៅលើសមរភូមិរបស់អ៊ុយក្រែន។ ទន្ទឹមគ្នានេះ ក្រសួងមហាផ្ទៃរុស្ស៊ី ក៏បានសង្កត់ធ្ងន់ ថា ការវាយប្រហារ ប្រឆាំងនឹងមជ្ឈមណ្ឌលជ្រើសរើសយោធា នឹងត្រូវផ្តន្ទាទោស ដាក់ពន្ធនាគារ រហូតដល់រយៈពេល២០ឆ្នាំ។

លោក អាឡិកសាន់ដឺរ ស្លីចធឺរ (Alexander Schlichter) អ្នកឯកទេសរបស់ទូរទស្សន៍ BBC នៅតំបន់អឺរ៉ុប បានបញ្ជាក់ ថា ប្រសិនបើការចោទប្រកាន់របស់រុស្ស៊ី ក្លាយជាការពិតមែននោះ ករណីនេះពិតជាគួរឲ្យកោតសរសើរដ៏ខ្លាំងបំផុត ដល់សមត្ថភាពរបស់បណ្ដាញទីភ្នាក់ងារចារកម្មរបស់អ៊ុយក្រែន។

ដោយឡែក អាជ្ញាធរអ៊ុយក្រែន វិញ នៅតែរក្សាភាពស្ងៀមស្ងាត់ ហើយក៏មិនបានឆ្លើយតបទៅនឹងការចោទប្រកាន់របស់រុស្ស៊ី ចាប់តាំងពីមេដឹកនាំវិមានក្រឹមឡាំង បានបញ្ជាឲ្យកម្លាំងទាហានរបស់ខ្លួន វាយលុកទ្រង់ទ្រាយធំ ចូលទៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ រហូតមក។ អ៊ុយក្រែន កាលពីពេលថ្មីៗនេះ ក៏បានចាប់ផ្ដើមវាយប្រហារបំផ្លិចបំផ្លាញបែបនេះ នៅក្នុងប្រទេសរុស្ស៊ី វិញដែរ។ ទន្ទឹមគ្នានេះ កាលពីប៉ុន្មានសប្ដាហ៍កន្លងទៅថ្មីៗនេះ កងទ័ពអ៊ុយក្រែន កំពុងតែបង្កើននូវការវាយប្រហារយ៉ាងខ្លាំង ខណៈក្រុងមូស្គូ បើកយុទ្ធនាការជ្រើសរើសទាហានទ្រង់ទ្រាយធំ។

សារព័ត៌មានប្រចាំថ្ងៃរបស់រុស្ស៊ី Vedomosti (វេដូមូស្ទី) បានដកស្រង់សម្ដីរបស់លោក សេហ្គេ មីរ៉ូណូវ( Segei Mironov) ជាសមាជិកសភាជាតិនិយមជ្រុលរបស់រុស្ស៊ី បានអះអាង អំពីការវាយប្រហារ ប្រឆាំងនឹងមជ្ឈមណ្ឌលនានារបស់រុស្ស៊ី ត្រូវបានអ៊ុយក្រែនប៉ុនប៉ង ចាប់តាំងពីថ្ងៃទី១-២ ខែសីហា មកម៉្លេះ។

បន្ថែមពីលើនេះ លោក សេហ្គេ មីរ៉ូណូវ បានសរសេរលិខិត ផ្ញើជូនលោក ស៊ើរហ្គេ សយហ្គូ (Sergei Shoigu) រដ្ឋមន្រ្ដីក្រសួងការពារជាតិរុស្ស៊ី ដោយបានអះអាង ថា មជ្ឈមណ្ឌលហៅទូរស័ព្ទរបស់អ៊ុយក្រែន ត្រូវបានកំណត់អត្តសញ្ញាណ អំពីការបោកប្រាស់ ហើយឥឡូវនេះ វាកំពុងតែក្លាយជាគោលដៅ ដោយស្របច្បាប់ សម្រាប់យោធារុស្ស៊ី វាយប្រហារ។

អាជ្ញាធររុស្ស៊ី កាលពីខែមុន បានសម្រេចបង្កើនកម្រិតអាយុ ចូលធ្វើទាហាន ជាអតិបរមា រហូតដល់៣ឆ្នាំ ដោយបង្កើនអាយុរបស់បុរសជនជាតិរុស្ស៊ី អាចនឹងត្រូវអាជ្ញាធរ កោះហៅឲ្យចូលបម្រើទាហាន។ នៅមុនពេលមានការកែប្រែបែបនេះ គឺបុរស ដែលមានសុខភាពល្អទាំងអស់ រស់នៅក្នុងប្រទេសរុស្ស៊ី មានអាយុចន្លោះ ពី១៨ ដល់២៧ឆ្នាំ ត្រូវតែបំពេញកាតព្វកិច្ចយោធា រយៈពេល១ឆ្នាំ។ ប៉ុន្ដែឥឡូវនេះ អាជ្ញាធររុស្ស៊ី បានបង្កើននូវការកំណត់អាយុ ចន្លោះពី១៨ឆ្នាំ រហូតដល់៣០ឆ្នាំ។លោក ឌីមីទ្រី មេដវេដេវ (Dmitry Medvedev) អតីតប្រធានាធិបតីរុស្ស៊ី ខណៈបច្ចុប្បន្ន កំពុងតែកាន់តំណែងជាអនុប្រធានក្រុមប្រឹក្សាសន្ដិសុខសហព័ន្ធន៍រុស្ស៊ី បានបញ្ជាក់ ដោយដកស្រង់តួលេខរបស់ក្រសួងការពារជាតិរុស្ស៊ី ថា ទាហានបន្ថែម ចំនួន ២៣១ ០០០ ត្រូវបានជ្រើសរើស ឲ្យចូលបម្រើ នៅក្នុងជួរកងទ័ពរបស់រុស្ស៊ី ចន្លោះពីថ្ងៃទី១ ខែមករា ដល់ថ្ងៃទី៣ ខែសីហា។

លោក វ៉្លាឌីមៀ ពូទីន ប្រធានាធិបតីរុស្ស៊ី កាលពីខែកញ្ញា ឆ្នាំ២០២២ បានចេញក្រឹត្យមួយ ចាប់ផ្តើមកេណ្ឌកម្លាំងទ័ពបន្ថែម។ សកម្មភាពបែបនេះ បានធ្វើឱ្យប្រជាជនរុស្ស៊ី ភ្ញាក់ផ្អើលយ៉ាងខ្លាំង ហើយបានជំរុញឲ្យបុរសជនជាតិរុស្ស៊ី មានវ័យចូលបម្រើកងទ័ព រាប់ម៉ឺននាក់ រត់គេចចេញពីប្រទេសរបស់ពួកគេ ទៅស្វែងរកសិទ្ធិជ្រកកោណ នៅតាមបណ្ដាប្រទេសផ្សេងៗ ជាពិសេស នៅតំបន់អឺរ៉ុប៕

ប្រទេសថៃ ៖ សភាពាណិជ្ជកម្មថៃបានលើកឡើងថា គេចាប់ផ្តើមឃើញសញ្ញាសេដ្ឋកិច្ចប្រទេសថៃធ្លាក់ចុះ ដោយសារការបង្កើតរដ្ឋាភិបាលថ្មីអូសបន្លាយពេលយូរ ។ វាធ្វើឱ្យប៉ះពាល់ដល់កត្តាជំរុញសេដ្ឋកិច្ចឱ្យរីកចម្រើន ហើយពលរដ្ឋថៃ និងក្រុមហ៊ុនអាជីវកម្មផ្សេងៗបានកាត់បន្ថយការចំណាយ និងវិនិយោគទុនជាថ្មី ។

លោក ថាណាវ៉ាត់ ផុនវិឆ័យ (Thanawat Phonwichai) ប្រធានមជ្ឈមណ្ឌលការព្យាករសេដ្ឋកិច្ច និងអាជីវកម្ម ប្រចាំសាកលវិទ្យាល័យសភាពាណិជ្ជកម្ម លើកឡើងថា អ្វីគួរឱ្យសង្កេតនាពេលបច្ចុប្បន្ននេះ គឺសេដ្ឋកិច្ចថៃមានសញ្ញាខុសធម្មតា ហើយការទិញផលិតផលផ្សេងៗមិនច្រើនដូចពេលមុនទេ ។ ដូច្នេះ វាបង្ហាញពីសេដ្ឋកិច្ចថៃបានធ្លាក់ចុះអស់រយៈពេល២ខែហើយ ចាប់តាំងពីខែមិថុនា ដល់ខែកក្កដា ឆ្នាំ២០២៣ ។ ជាក់ស្តែង ការទិញរថយន្តបានធ្លាក់ចុះ ដោយសារអតិថិជនមិនសូវជឿជាក់ ខណៈប្រទេសថៃពុំទាន់អាចបង្កើតរដ្ឋាភិបាលថ្មីបាន និងធ្វើឱ្យសេដ្ឋកិច្ចខ្វះកម្លាំងជំរុញ ។

លោក ថាណាវ៉ាត់ ផុនវិឆ័យ បន្តថា បើភាពមិនច្បាស់លាស់ផ្នែកនយោបាយនៅតែអូសបន្លាយបែបនេះ វានឹងមិនអាចជំរុញឱ្យសេដ្ឋកិច្ចថៃឈានទៅរីកចម្រើនបានទេ ។ សភាពាណិជ្ជកម្មសង្ឃឹមថា ប្រទេសថៃនឹងអាចបង្កើតរដ្ឋាភិបាលថ្មី នៅខែសីហា ឆ្នាំ២០២៣ ឬនៅខែកញ្ញា ខាងមុខ ដើម្បីបង្កើតគោលនយោបាយជំរុញសេដ្ឋកិច្ចតាមរយៈការចំណាយថវិកាជាតិ និងបង្កើតទំនុកចិត្តដល់វិនិយោគិនបរទេស ដែលមានបំណងមកវិនិយោគនៅប្រទេសថៃ ។

លោកបញ្ជាក់ថា ចំណែកការធ្វើបាតុកម្មតវ៉ារឿងនយោបាយនាពេលបច្ចុប្បន្ន គឺមិនគួរឱ្យបារម្ភទេ ពីព្រោះវាជាការជួបជុំរយៈពេលខ្លីប៉ុណ្ណោះ ។ ម្យ៉ាងទៀត ពួកគេមិនបានធ្វើការប្រឆាំងជាបន្តបន្ទាប់ និងដេកឆ្លងយប់ដូចកាលពីមុន ដូច្នេះ វាមិនប៉ះពាល់ដល់ការវិនិយោគពីបរទេសទេ ៕ ប្រភព ៖ 3plus

សារព័ត៌មានបរទេសចុះផ្សាយថា ក្រុមហ៊ុន Zoom ដែលផ្តល់សេវាកម្មប្រជុំតាមអនឡាញ បានហៅបុគ្គលិករបស់ខ្លួនដែលធ្វើការនៅខាងក្រៅឱ្យត្រឡប់មកការិយាល័យវិញ យ៉ាងហោចណាស់ ចំនួន២លើកក្នុង១សប្តាហ៍ ។ គោលការណ៍ថ្មីនេះនឹងអនុវត្តនៅខែសីហា ឆ្នាំ២០២៣ ឬនៅខែកញ្ញា ឆ្នាំ២០២៣ សម្រាប់ប្រទេសមួយចំនួនដែល Zoom មានការិយាល័យនៅទីនោះ ។

បើទោះជា Zoom គឺជាក្រុមហ៊ុនទទួលបានផលប្រយោជន៍ខ្លាំងបំផុតពីការបំពេញការងារនៅក្រៅការិយាល័យ ប៉ុន្តែនាយកគ្រប់គ្រងក្រុមហ៊ុន Zoom គិតថា ប្រព័ន្ធការងារចម្រុះមានប្រសិទ្ធភាពខ្លាំង ហើយការត្រឡប់មកធ្វើការនៅការិយាល័យវិញនឹងជួយឱ្យក្រុមហ៊ុនមានស្ថានភាពល្អប្រសើរឡើង ដូចជា ភាពច្នៃប្រឌិតថ្មីៗ និងគាំទ្រការប្រើប្រាស់កម្មវិធី Zoom របស់អតិថិជននៅទូទាំងពិភពលោក ។

គំនិតនេះបានក្លាយជាគោលការណ៍ថ្មីសម្រាប់ឱ្យបុគ្គលិកចំនួន៧.៤០០នាក់របស់ក្រុមហ៊ុន Zoom ដែលពួកគេធ្វើការនៅឆ្ងាយពីក្រុមហ៊ុនប្រមាណ៨០គីឡូម៉ែត្រ ឱ្យត្រឡប់មកធ្វើការនៅក្នុងក្រុមហ៊ុន យ៉ាងហោចណាស់ ចំនួន២លើកក្នុង១សប្តាហ៍ ។

បច្ចុប្បន្ន កម្មវិធី Zoom ស្ថិតនៅក្រោមការដាក់សម្ពាធដោយសារចំនួនក្រុមហ៊ុនគូប្រជែងផ្សេងទៀតកើនឡើង ក៏ដូចជាការអភិវឌ្ឍជាបន្តបន្ទាប់របស់ក្រុមហ៊ុនបច្ចេកវិទ្យាធំ ដូចជា ក្រុមហ៊ុន Microsoft ផងដែរ ។ ហេតុនេះ Zoom ចាំបាច់ត្រូវបង្កើនការអភិវឌ្ឍកម្មវិធីរបស់ខ្លួន ដើម្បីឱ្យអតិថិជននៅតែប្រើប្រាស់កម្មវិធីនេះ ។

ទោះយ៉ាងណា គោលការណ៍របស់ក្រុមហ៊ុន Zoom នៅតែអាចបត់បែនបាន ខណៈក្រុមហ៊ុននេះបានជួលអ្នកជំនាញជាន់ខ្ពស់ជាច្រើននាក់មកពីក្រៅប្រទេស ហើយក្រុមហ៊ុនសង្ឃឹមថា ក្រុមហ៊ុនជាច្រើនក៏បានជួលបុគ្គលិកពីបរទេសផងដែរ ។ ដូច្នេះ បច្ចេកវិទ្យារបស់ Zoom នៅតែចាំបាច់សម្រាប់ការប្រើប្រាស់នៅក្នុងក្រុមហ៊ុនភាគច្រើន ដើម្បីភ្ជាប់ក្រុមការងារដែលធ្វើការដាច់ដោយឡែកពីគ្នាឱ្យពួកគេមានទំនាក់ទំនង និងអាចធ្វើការងារយ៉ាងមានប្រសិទ្ធភាព ៕ ប្រភព ៖ beartai BRIEF

នៅបណ្តាក្រុមហ៊ុនអាកាសចរណ៍ទាំងអស់លើពិភពលោកមានយន្តហោះសរុបចំនួន ៤៨,០៣៨ គ្រឿងក្នុងចំណោមប្រទេសទាំង ១០១ ក្នុងនោះប្រទេសកម្ពុជាមានយន្តហោះសរុប ៤៣ គ្រឿង នេះបើយោងតាមប្រភព Millitary Factory ។ ដូច្នេះហើយតើអ្នកដឹងទេ? ប្រទេសណាខ្លះដែលមានយន្តហោះច្រើនជាងគេបំផុតនៅលើពិភពលោក?

១.ប្រទេសអាមេរិក(United States)៖ អាមេរិកជាប្រទេសដែលមានយន្តហោះច្រើនជាងគេបំផុតនៅលើពិភពលោក ជាមួយនឹងយន្តហោះសរុប ១៣,២៤៦ គ្រឿងក្នុងនោះយន្តហោះចម្បាំងមាន ២,៧៤០ គ្រឿង។

២.ប្រទេសរុស្សី(Russia)៖ រុស្សីមានយន្តហោះសរុប ៤,១៧៣ គ្រឿងដែលក្នុងនោះយន្តហោះចម្បាំងមាន ១,៥១១ គ្រឿង។

៣.ប្រទេសចិន(China)៖ ចិនមានយន្តហោះសរុប ៣,២៨៥ គ្រឿង ក្នុងនោះយន្តហោះចម្បាំងមាន ១,៥៧១ គ្រឿង។

៤.ប្រទេសឥណ្ឌា(India)៖ ឥណ្ឌាមានយន្តហោះសរុប ២,១៨២ គ្រឿងដែលក្នុងនោះយន្តហោះចម្បាំងមាន ៦៩៤ គ្រឿង។

៥.កូរ៉េខាងត្បូង(South Korea)៖ កូរ៉េខាងត្បូងជាប្រទេសដែលមានយន្តហោះច្រើនជាងគេទីប្រាំនៅលើពិភពលោក ជាមួយនឹងយន្តហោះសរុប ១,៥៩៥ គ្រឿងក្នុងនោះយន្តហោះចម្បាំងមាន ៤៩២ គ្រឿង។

៦.ប្រទេសជប៉ុន(Japan)៖ ជប៉ុនគឺជាប្រទេសដែលមានយន្តហោះសរុប ១,៤៤៩ គ្រឿង។

៧.ប្រទេសប៉ាគីស្ថាន(Pakistan)៖ ប៉ាគីស្ថានមានយន្តហោះសរុប ១,៣៨៧ គ្រឿងដែលក្នុងនោះយន្តហោះចម្បាំងមាន ៤៤៧ គ្រឿង។

៨.ប្រទេសអេហ្ស៊ីប(Egypt)៖ អេហ្ស៊ីបគឺជាប្រទេសដែលមានយន្តហោះសរុប ១,០៦២ គ្រឿង ក្នុងនោះយន្តហោះចម្បាំងមាន ៣៣៨ គ្រឿង។

៩.ប្រទេសទួគី(Turkey)៖ ប្រទេសទួគីមានយន្តហោះសរុប ១,០៥៧ គ្រឿងដែលក្នុងនោះយន្តហោះចម្បាំងមាន ១៥៧ គ្រឿង។

១០.ប្រទេសបារាំង(France)៖ បារាំងគឺជាប្រទេសដែលមានយន្តហោះសរុប ១,០៥៥ គ្រឿង៕

សម្បកចេកអាចជួយការពារមេរោគ និងសត្វល្អិតបំផ្លាញដំណាំ ហើយវាជាវត្ថុធាតុផ្សំពីធម្មជាតិដែលផ្តល់ប្រយោជន៍ច្រើនដល់រុក្ខជាតិ ។ សម្បកចេកសម្បូរទៅដោយសារធាតុចិញ្ចឹមចាំបាច់ ដែលជួយដល់ការលូតលាស់របស់រុក្ខជាតិ ដូចជា ប៉ូតាស្យូម ម៉ាញ៉េស្យូម កាល់ស្យូម និងផូស្វ័រ ។ លើសពីនេះ សម្បកចេកក៏អាចជួយបង្កើនការលូតលាស់របស់អតិសុខុមប្រាណនៅក្នុងដី ធ្វើឱ្យដីមានជីវជាតិ ដែលជួយឱ្យរុក្ខជាតិដុះលូតលាស់ល្អ ។

នេះជាវិធីងាយៗក្នុងការធ្វើជីកសិកម្មពីសម្បកចេក ៖
វិធីទី១-យកសម្បកចេកមកហាន់ជាចំណិតតូចៗ រួចយកវាទៅកប់ក្នុងដីក្បែរដំណាំ ឬរុក្ខជាតិ ព្រោះសម្បកចេកនឹងរលាយបន្តិចម្តងៗ បន្ទាប់មក វាក៏បញ្ចេញសារធាតុចិញ្ចឹមទៅក្នុងដី ។
វិធីទី២-កិនសម្បកចេកឱ្យហ្មត់ ហើយយកវាទៅរោយពីលើដីជុំវិញដំណាំ ឬរុក្ខជាតិ ព្រោះសម្បកចេកកិនហ្មត់អាចរលាយបានលឿនជាងសម្បកចេកហាន់ជាចំណិត ។
វិធីទី៣-យកសម្បកចេកទៅស្ងោរ បន្ទាប់មក យកទឹករបស់វាមកស្រោចលើកូនរុក្ខជាតិ ព្រោះទឹកនេះសម្បូរដោយសារធាតុចិញ្ចឹមចាំបាច់ជួយដល់ការលូតលាស់របស់រុក្ខជាតិ ។ ហេតុនេះ គួរស្ងោរសម្បកចេកនៅរៀងរាល់២សប្តាហ៍ ទៅ៣សប្តាហ៍ម្តង ។

វិធីទី៤ ៖
-លាងសម្បកចេកឱ្យស្អាត
-ហាន់សម្បកចេកជាចំណិតតូចៗ
-យកសម្បកចេកទៅដាក់ក្នុងធុង
-ចាក់ទឹកចូលក្នុងធុងឱ្យលិចសម្បកចេក
-បិទគម្របធុង ហើយទុកវារយៈពេលចាប់ពី២សប្តាហ៍ ទៅ៣សប្តាហ៍
-នៅពេលសម្បកចេករលាយហើយ យើងត្រូវត្រងយកទឹករបស់វា
-យកទឹកសម្បកចេកទៅស្រោចលើដំណាំ ឬរុក្ខជាតិ នៅរៀងរាល់២សប្តាហ៍ ទៅ៣សប្តាហ៍ម្តង ។

សរុបមក សម្បកចេក គឺជាជីកសិកម្មធម្មជាតិមួយប្រភេទដែលមានសុវត្ថិភាព ប្រសិទ្ធភាព ធ្វើឱ្យរុក្ខជាតិរឹងមាំ និងដុះលូតលាស់ល្អ ។ យើងអាចប្រើប្រាស់វាសម្រាប់ធ្វើជាសារធាតុចិញ្ចឹមរុក្ខជាតិបាន ហើយមិនចាំបាច់បារម្ភពីសារធាតុគីមីប៉ះពាល់សុខភាពឡើយ ។ ម្យ៉ាងទៀត ការប្រើប្រាស់ជីសម្បកចេក អាចឱ្យយើងអាចសន្សំសំចៃថវិកាផងដែរ ៕ ប្រភព ៖ sanook