នៅថ្ងៃទី៨ សីហា នេះបុរសដែលគប់ទឹកកកដាក់តារាចម្រៀង ជី ដេវីត ឈ្មោះថា ឃី ឆាយឡេង បានចេញមកសូមទោសជាលើកទី២អមជាមួយលិខិតស្នាមលាយលក្ខណ៍អក្សរបញ្ជាក់ទៅកាន់តារាចម្រៀងរូបនេះនិងអ្នកគាំទ្ររបស់គេ ដោយសន្យាថានឹងឈប់ប្រព្រឹត្តអំពើអសីលធម៌ដែលប្រាសចាកសេចក្តីថ្លៃថ្នូរជះឥទ្ធិពលអាក្រក់ដល់សង្គមជាតិប្រសិនបើក្នុងករណីមានទង្វើបែបនេះកើតឡើងបន្តទៀតរូបគេនឹងទទួលខុសត្រូវចំពោះមុខច្បាប់ជាធរមាន។

នៅលើបណ្តាញសង្គមឈ្មោះ Chhayleng KHY បានសរសេរយ៉ាងដូច្នេះថា «ខ្ញុំបាទ ឃី ឆាយឡេង ជាម្ចាស់គណនីហ្វេសបុក ( Facebook) ឈ្មោះ Chhayleng KHY សូមធ្វើការទទួលនូវកំហុសគ្រប់យ៉ាងដែលខ្ញុំបាទបានប្រព្រឹត្តទៅលើលោក ងួន ចាន់ដាវីត (Dit Way) និងធ្វើការសុំទោសជាសាធារណៈតាមរយះលិខិតលាយលក្ខណ៍អក្សរនេះដល់លោក ងួន ចាន់ដាវីត (Dit Way) និងអ្នកគាំទ្ររបស់លោក ព្រមទាំងសិល្បករ សិល្បការិនី នៅក្នុងវិស័យសិល្បៈទាំងមូល។ ខ្ញុំបាទសូមធ្វើការអះអាង និងសន្យាថា ខ្ញុំបាទនឹងឈប់ប្រព្រឹត្តអំពើអសីលធម៌ដែលប្រាសចាកសេចក្តីថ្លៃថ្នូរទាំងឡាយដែលជះឥទ្ធិពលអាក្រក់ដល់សង្គមជាតិទោះក្នុងកាលៈទេសៈណាក៏ដោយ ប្រសិនបើក្នុងករណីមានទង្វើបែបនេះកើតឡើងបន្តទៀត ខ្ញុំបាទនឹងទទួលខុសត្រូវចំពោះមុខច្បាប់ជាធរមាន ហើយលិខិតនេះត្រូវបានធ្វើឡើងដោយឆន្ទៈ និងស្មារតីទទួលកំហុសរបស់ខ្ញុំបាទផ្ទាល់ ដោយគ្មានការបង្ខិតបង្ខំនិងគំរាមកំហែងពីអ្នកណាឡើយ។ ខ្ញុំអរគុណដល់ លោកដាវីដ អ្នកនាងបូព្រឹក្ស និងក្រុមការងាររបស់គាត់ដែលបានអនុគ្រោះដល់រូបខ្ញុំបាទ »។

នៅក្នុងលិខិតស្នាមនោះ ក៏បានបញ្ជាក់ដែរថាការដែលលោកបានគប់ទឹកកកដាក់តារាចម្រៀង ជី ដេវីត អំឡុងពេលសម្តែងនៅក្នុងក្លិបកម្សាន្តនៅខេត្តព្រះសីហនុនោះដោយសារតែរូបគេស្រវឹងខ្វះសមត្ថភាពក្នុងការពិចារណា និងគ្រប់គ្រងខ្លួនឯង។ បុរសរូបនេះបន្ថែមថា លិខិតនេះត្រូវបានធ្វើឡើងដោយឆន្ទៈ និងស្មារតីទទួលកំហុសរបស់រូបគេផ្ទាល់ ដោយគ្មានការបង្ខិតបង្ខំ និងគំរាមកំហែងពីអ្នកណាឡើយ៕  

មានការចែកចាយយ៉ាងច្រើននៅលើបណ្តាញសង្គមទិកតុក និងមានពាក្យខ្សឹបខ្សៀវគ្នាថា ចំណងស្នេហា ខាត់ វៃហាំង និង ស៊ីន យូប៊ីន ហាក់មានភាពរង្គោះរង្គើហើយបន្ទាប់ពីរយៈចុងក្រោយនេះអ្នកទាំងពីរសុទ្ធតែបង្ហាញអារម្មណ៍សេដដូចគ្នា ខណៈពួកគេបានចូលរួមក្នុងកម្មវិធីសប្ដាហ៍ផ្លាស់ប្តូរវប្បធម៌ និងភាពយន្តកម្ពុជា ចិន ជាមួយគ្នាពិតមែនប៉ុន្តែមិនបង្ហាញភាពស្និទ្ធស្នាលយកចិត្តទុកដាក់ជាមួយគ្នាដូចមុនឡើយ។

ចំណងស្នេហារយៈពេល១០ឆ្នាំមកនេះរវាងតារាសម្តែងល្បីឈ្មោះ ស៊ីន យូប៊ីន និងលោក ខាត់ វៃហាំង មានការសាទរយ៉ាងខ្លាំងក្លាពីសំណាក់អ្នកគាំទ្រនិងអ្នកក្នុងចង្កោមសិល្បៈព្រមទាំងចង់ឃើញអ្នកទាំងពីរដឹកដៃគ្នាចូលរោងការឆាប់ៗទៀតផង ខណៈកន្លងមក យូប៊ីន ក៏បាន mention វៃហាំង ផងដែរពេលគូស្នេហ៍តារាថៃសុំគ្នារៀបការ។

ទោះយ៉ាងណា ថ្មីៗមកនេះពោលគឺនៅថ្ងៃទី៧ ខែសីហា អំឡុងពេលតារាសម្តែងទាំងពីរដួងយូប៊ីន និង វៃហាំង មានកិត្តិយសពិសេសបានចូលរួមសម្តែងនៅក្នុងពិធីសប្ដាហ៍ផ្លាស់ប្តូរវប្បធម៌ និងភាពយន្តកម្ពុជា ចិន ឃើញថា អ្នកទាំងពីរពុំសូវស្និទ្ធស្នាលដូចមុន និងមានទឹកមុខមិនសូវស្រស់បស់ឡើយ។ មិនត្រឹមតែប៉ុណ្ណោះនៅលើបណ្តាញសង្គមទិកតុកអ្នកទាំងពីរសុទ្ធតែបង្ហាញអារម្មណ៍សេដរៀងៗខ្លួន។

ការបង្ហាញពីអារម្មណ៍សេដ រួមជាមួយវីដេអូដែលអ្នកទាំងពីរពុំសូវបង្ហាញការយកចិត្តទុកដាក់គ្នាធ្វើឱ្យហ្វេនបានបង្ហាញការព្រួយបារម្ភយ៉ាងខ្លាំងចំពោះចំណងស្នេហារបស់ពួកគេ និងសង្ឃឹមថាបើសិនជា ស៊ីន យូប៊ីន និង ខាត់ វៃហាំង មានបញ្ហានិងគ្នាមែននោះសង្ឃឹមអ្នកទាំងពីរដោះស្រាយគ្នាបានព្រោះហ្វេនៗពិតជាមិនចង់ឃើញការបែកបាក់របស់អ្នកទាំងពីរឡើយ។

ទន្ទឹមនឹងមានការសង្ស័យចំណងស្នេហ៍មួយគូនេះមានភាពរង្គោះរង្គើនោះហ្វេនៗខ្លះទៀតក៏បង្ហាញថាកុំអាលមានការវិនិច្ឆ័យអ្វីប្រសិនជាមិនទាន់មានអ្វីបញ្ជាក់ ខណៈអ្នកខ្លះទៀតបានលើកឡើងថាការពិតទៅជាយ៉ាងណា សូមឱ្យហ្វេនៗគោរពតាមការសម្រេចចិត្ដរបស់ ស៊ីន យូប៊ីន និង ខាត់ វៃហាំង ៕

ថ្មីៗមកនេះប្រិយមិត្តជ្រាបមកហើយថា តារាចម្រៀង ស៊ឹម ថៃណា ត្រូវបានបុគ្គលម្នាក់ប្រើពាក្យមិនសមរម្យ ប្រមាថមាក់ងាយ លើនាងអំឡុងពេលបំពេញការងារច្រៀងនៅពេលរាត្រីនៅក្នុងភោជនីយដ្ឋានមួយ។ រឿងនេះមានមហាជននិងមិត្តរួមអាជីពសិល្បៈដូចជាតារាចម្រៀងយក់ ថិត រដ្ឋា តារាចម្រៀង ហង្ស សុជាតា ក៏បានជួយលួងលោមផ្តល់កម្លាំងចិត្តដល់តារាចម្រៀង ស៊ឹម ថៃណា ដូចគ្នាដែលជួបប្រទះនូវរឿងមិនល្អក្នុងអាជីពរបស់ខ្លួន ខណៈប្រធានសមាគមសិល្បករកម្ពុជាជំទាវ ចន ច័ន្ទលក្ខណា មិននៅស្ងៀមលូកដៃជួយ ស៊ឹម ថៃណា ហើយនឹងឈានដល់ប្រព័ន្ធផ្លូវច្បាប់។

នៅល្ងាចថ្ងៃទី៨ សីហា នៅលើបណ្តាញសង្គមរបស់លោកជំទាវ ចន ច័ន្ទ បានបញ្ជាក់យ៉ាងដូច្នេះថា «កាលពីយប់ថ្ងៃអាទិត្យកន្លងទៅនេះតារាចម្រៀង ស៊ឹម ថៃណា ត្រូវបានបុរសម្នាក់ជេរប្រទេចខណៈដែលគាត់កំពុងតែបំពេញការងារ (ច្រៀង) នៅឯភោជនីយដ្ឋានមួយកន្លែង។ នាងខ្ញុំបានខលទៅប្អូនស្រីដើម្បីសាកសួរព័ត៌មានជាក់លាក់ ហើយ ប្អូនស្រីបានសំណូមពរឱ្យបុគ្គលរូបនោះមកសុំទោសប្អូនស្រីនៅចំពោះមុខ (ជាលក្ខណៈ Private ក៏បាន ) ដើម្បីបញ្ចប់ទង្វើមាក់ងាយស្ត្រីដែលពួកគាត់បំពេញការងារពេលយប់ទោះអាជីពណាក៏ដោយ បើបុគ្គលនោះមិនមកសុំទោសប្អូនស្រីទេ នាងខ្ញុំ និង ប្អូនស្រីនិងស្នើទៅក្រសួងកិច្ចការនារីដើម្បីស្នើសុំជំនួយផ្នែកច្បាប់»។

គួរបញ្ជាក់ថាកាលពីថ្ងៃទី៦ សីហា តារាចម្រៀង ស៊ឹម ថៃណា បាន live រៀបរាប់ទាំងទឹកភ្នែកដោយសម្តីក្តុកក្តួលក្រោយពីមានបុគ្គលម្នាក់ប្រើពាក្យមិនសមរម្យទាល់តែសោះមកលើខ្លួននាងដែលមានអាជីពបំរើការងារនៅពេលយប់ហើយក៏ជាលើកទីមួយនៅក្នុងជីវិតដែលរងនូវពាក្យប្រមាថមាក់ងាយបែបនេះដែលមិនអាចទទួលយកបានឡើយ។ ម្ចាស់បទ «បេះដូងឆ្កួត» រូបនេះបាននិយាយថានាងប្រឡូកអាជីពសិល្បៈ២០ឆ្នាំមកហើយមិនដែលប្រព្រឹត្តទង្វើនាំឱ្យខ្លួន និងសិល្បៈអាប់ឱនកិត្តិយសនោះទេ ប្រសិនជាចេះក្រឡាច់ខ្លួនតែបន្តិចមិនមែនពេលនេះនាងស្នាក់នៅផ្ទះជួលនោះទេ៕

អ្នកគាំទ្រមានការចាប់អារម្មណ៍យ៉ាងខ្លាំងទៅលើតារាសម្តែងល្បីឈ្មោះកញ្ញា ស៊ីន យូប៊ីន និងលោក ខាត់ វៃហាំង បានចូលរួមសម្តែងនៅក្នុងកម្មវិធីសប្ដាហ៍ផ្លាស់ប្តូរវប្បធម៌ និងភាពយន្តកម្ពុជា ចិន ឆ្នាំ២០២៣ នាថ្ងៃទី៧ ខែសីហា ដែលប្រព្រឹត្តទៅស្របពេលខួបលើកទី៦៥ នៃចំណងទំនាក់ទំនងការទូតកម្ពុជា-ចិន។

នៅក្នុងពិធីខាងលើនេះមានការអញ្ជើញចូលរួមក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោកស្រី Lu Jing សមាជិកាអចិន្រ្តៃយ៍គណ:កម្មាធិការបក្ស ក្រុង ហ្វូចូវ សាធារណៈរដ្ឋប្រជាមានិតចិន រួមទាំងមានវត្តមានឯកឧត្ដមទីប្រឹក្សាស្ថានទូតចិនប្រចាំនៅកម្ពុជា ផលិតករភាពយន្ត កម្ពុជា ចិន ព្រមទាំងសិល្បករសិល្បការិនី ភ្ញៀវកិត្តយសជាតិ អន្តរជាតិជាច្រើនរូបចូលរួម។

សប្ដាហ៍ផ្លាស់ប្តូរវប្បធម៌ និងភាពយន្តកម្ពុជា ចិន ឆ្នាំ២០២៣ នេះផងដែរកញ្ញា ស៊ីន យូប៊ីន និងលោក ខាត់ វៃហាំង ទទួលបានកិត្តិយសពិសេសបានចូលរួមសម្តែងនិងបកស្រាយបទចម្រៀងមានចំណងជើងថា «ថ្នម»អមជាមួយការសម្តែងល្ខោនខោលរួមទាំងសិល្បៈផ្សេងទៀតឱ្យកាន់តែមានភាពរស់រវើក។

មិនត្រឹមតែប៉ុណ្ណោះតារាសម្តែង ស៊ីន យូប៊ីន ក៏សម្តែងបទចិនជាមួយរបាំផ្លិតយ៉ាងស្រស់ស្អាតបង្ហាញដោយភាពជឿជាក់ស័ក្តិសមជាតារាជួរមុខនៅក្នុងប្រទេសពិតមែន។

គួរបញ្ជាក់ផងដែរថា កាលពីខែកក្កដាកន្លងមកនេះអ្នកទាំងពីរក៏ទើបទទួលពានរង្វាន់តារាសម្តែងស្រី និងតារាសម្តែងប្រុសដែលមានប្រជាប្រិយភាពប្រចាំឆ្នាំ (popular actress of the year) ផ្តល់ដោយកម្មវិធី ASIA TOP AWARD 2023 នៅឯប្រទេសថៃផងដែរ៕