ប្រទេសថៃ ៖ តាមលទ្ធផលការស្ទង់មតិរបស់គេហទំព័រមួយឈ្មោះ Travelness បង្ហាញថា ទីក្រុងបាងកក ប្រទេសថៃ បានជាប់ចំណាត់ថ្នាក់ទី១ ដែលមានភ្ញៀវទេសចរអន្តរជាតិមកកម្សាន្តច្រើនបំផុតលើពិភពលោក ក្នុងឆ្នាំ២០២៣ ។ ការចាត់ចំណាត់ថ្នាក់នេះ គឺផ្អែកលើចំនួនភ្ញៀវទេសចរអន្តរជាតិដែលបានចូលមកស្នាក់នៅ និងបានចំណាយប្រាក់លើសេវាកម្មផ្សេងៗនៅប្រទេសថៃ ។

តាមការចាត់ចំណាត់ថ្នាក់នេះបង្ហាញថា ទីក្រុងបាងកកបានជាប់ចំណាត់ថ្នាក់ទី១ ដែលមានភ្ញៀវទេសចរមកកម្សាន្តចំនួន២២,៧៨លាននាក់ ហើយទីក្រុងបាងកកបានវ៉ាដាច់ទីក្រុងប៉ារីសរបស់ប្រទេសបារាំង ដែលមានភ្ញៀវទេសចរមកកម្សាន្តត្រឹមតែ១៩,០៩លាននាក់ ។ ដូច្នេះ ទីក្រុងប៉ារីស បានជាប់ចំណាត់ថ្នាក់ទី២ នៅឆ្នាំ២០២៣ ។

ភ្ញៀវទេសចរអន្តរជាតិមកកម្សាន្តនៅប្រទេសថៃ ពួកគេនិយមទៅលេងនៅតំបន់ទេសចរណ៍វប្បធម៌ និងទិញចំណីអាហារលក់នៅតាមផ្លូវយ៉ាវរ៉ាជ និងផ្លូវខាវសាន ក្នុងទីក្រុងបាងកក ។ លើសពីនេះ ពួកគេក៏បានទៅកម្សាន្តនៅវត្តល្បីៗជាច្រើន ដូចជា វត្តអារុណ និងវត្តព្រះស្រីរតនា សាតសាដារាម (ឬវត្តព្រះកែវ) ផងដែរ ។

លើសពីនេះ ទស្សនាវដ្តីពាណិជ្ជកម្ម និងទេសចរណ៍ (Business Traveller) បានផ្តល់ចំណាត់ថ្នាក់ទី១ ឱ្យទីក្រុងបាងកក ប្រទេសថៃ គឺជាទីក្រុងគួរមកសម្រាកលំហែកាយបំផុតនៅតំបន់អាស៊ីប៉ាស៊ីហ្វិក (Best Leisure time city in Asia-Pacific) ក្នុងរយៈពេល៦ឆ្នាំជាប់ៗគ្នា ។ នេះបើតាមការស្ទង់មតិរបស់ Business Traveller Asia-Pacific Awards 2022 កាលពីថ្ងៃទី១៤ ខែសីហា ឆ្នាំ២០២៣ ៕ ប្រភព ៖ Mono News

ប្រទេសថៃ ៖ ក្រោយពីសារព័ត៌មានជប៉ុនឈ្មោះ Global News Asia ចុះផ្សាយវីដេអូនារីជនជាតិថៃម្នាក់រាំនៅលើរថភ្លើងអាកាសប្រទេសជប៉ុន បានធ្វើឱ្យអ្នកលេងបណ្តាញសង្គមថៃជាច្រើននាក់រិះគន់នារីរូបនេះថា គ្មានមារយាទក្នុងខ្លួន និងរាំមិនចេះមើលកាលៈទេសៈ ខណៈជនជាតិជប៉ុនបានអង្គុយជិះរថភ្លើងយ៉ាងស្ងៀមស្ងាត់ ហើយអ្នកខ្លះទៀតធុញទ្រាន់នឹងទង្វើរបស់នាង ។

នារីថៃរូបនេះបានរាំនៅលើរថភ្លើងអាកាសប្រទេសជប៉ុន ដើម្បីយកទៅបង្ហោះក្នុង TikTok ហើយនាងមិនចាប់អារម្មណ៍នឹងក្រសែភ្នែករបស់អ្នកដំណើរជាជនជាតិជប៉ុនផ្សេងទៀត ដែលអង្គុយជិះរថភ្លើងជាមួយគ្នាទេ ។ គេសង្កេតឃើញថា ជនជាតិជប៉ុនទាំងអស់ដែលរួមដំណើរតាមរថភ្លើងជាមួយនាង ពួកគេអង្គុយយ៉ាងស្ងៀមស្ងាត់ ហើយអ្នកខ្លះទៀតសម្លឹងមើលនាងរាំទាំងក្រសែភ្នែកមិនពេញចិត្ត ។

ជាធម្មតា ការប្រើប្រាស់មធ្យោបាយសាធារណៈនានានៅប្រទេសជប៉ុន អ្នកដំណើរទាំងអស់ត្រូវគោរពតាមវិន័យត្រឹមត្រូវ ហើយនារីថៃប្រព្រឹត្តទង្វើនេះចាត់ទុកថា ខុសសីលធម៌យ៉ាងខ្លាំង ។ ក្រោយពីវីដេអូនេះត្រូវបានគេចែកចាយបន្តគ្នាក្នុងបណ្តាញសង្គម ធ្វើឱ្យអ្នកលេងបណ្តាញសង្គមថៃសម្តែងការមិនពេញចិត្ត និងរិះគន់ផងដែរ ។ ផ្ទុយទៅវិញ នារីថៃរូបនេះបានបញ្ចេញប្រតិកម្មចំពោះការរិះគន់វិញថា អ្នកជេរស្តីនាង តើពួកគេធ្លាប់ទៅលេងប្រទេសជប៉ុនដែរឬទេ ? ពួកគេត្រូវមើលពិភពលោកថា គេដើរដល់ណាហើយ ។ នាងបន្តថា វាជាសិទ្ធិរបស់បុគ្គលម្នាក់ៗ បើបុគ្គលនោះចង់រាំ គឺវាមិនពាក់ព័ន្ធជាមួយអ្នកណាទេ ។

ចំណែកជនជាតិជប៉ុនម្នាក់បានបញ្ចេញយោបល់ថា ៖ «ដោយសារពួកយើងជាជនជាតិជប៉ុន ហេតុនេះ យើងត្រូវតែរក្សាភាពស្ងប់ស្ងាត់ និងអត់ធ្មត់ចំពោះរឿងដែលកើតឡើង ។ យើងមានចរិតបែបនេះនៅគ្រប់ទីកន្លែងលើពិភពលោក» ។

ក្រោយមក នារីជនជាតិថៃក៏បានសូមទោសចំពោះទង្វើមិនសមរម្យរបស់នាង ដោយនាងទទួលស្គាល់ថា នាងធ្វើទាំងពុំបានគិត និងមិនបានសិក្សាពីច្បាប់ទម្លាប់នៅប្រទេសជប៉ុន ។ នាងបានសូមទោសក្នុងហ្វេសប៊ុកថា ៖ «ករណីការចុះផ្សាយព័ត៌មានរឿងខ្ញុំរាំនៅលើរថភ្លើងអាកាសជប៉ុន គឺខ្ញុំមិនបានសិក្សាពីច្បាប់ទម្លាប់នៃការប្រើប្រាស់ទីកន្លែងសាធារណៈឱ្យល្អ ។ ដូច្នេះ នាងខ្ញុំសូមអភ័យទោសចំពោះជនជាតិថៃ និងជប៉ុន ព្រមទាំងសូមទោសអ្នកដំណើរលើរថភ្លើងជប៉ុនទាំងអស់ ព្រោះខ្ញុំបានថតជាប់ពួកគេយកមកបង្ហោះក្នុងបណ្តាញសង្គម ខ្ញុំសូមទោសដែលរាំមិនគិតមុខ គិតក្រោយ» ។

នារីថៃដដែលបន្តថា ខ្ញុំសូមទោសផងដែរចំពោះអ្នកចូលមកបញ្ចេញយោបល់ដាស់តឿនទាំងអស់ ដែលខ្ញុំ និងមិត្តភក្តិបានឆ្លើយតបយោបល់ទាំងនេះដោយប្រើពាក្យសម្តីមិនសុភាព ដោយសារខ្ញុំខឹង ។ ខ្ញុំ និងមិត្តភក្តិទាំងអស់នឹងប្រុងប្រយ័ត្នឱ្យខ្លាំងជាងនេះ ហើយមិនឱ្យហេតុការណ៍បែបនេះកើតឡើងទៀតទេ ។ ពេលនេះ ពួកយើងព្រមស្តាប់ពាក្យដាស់តឿន និងទទួលស្គាល់កំហុស ។ អរគុណ សម្រាប់ពាក្យជេរ និងមតិកែលម្អទាំងជនជាតិថៃ និងជប៉ុន ៕ ប្រភព ៖ Mono News

នៅឆ្នាំ២០២៣ វាជារឿងគួរឱ្យភ្ញាក់ផ្អើលមួយដែលកាលពីមុនៗកម្រមានអ្នកដឹកនាំរឿងជាស្រ្តីលេចធ្លោណាស់។ ទោះយ៉ាងណាឆ្នាំនេះ អ្នកដឹកនាំជាស្រ្តីមានចំនួនតួលេខកើនឡើងនៅក្នុងបញ្ជីអាចរកប្រាក់ចំណូលបានច្រើនមិនចាញ់អ្នកដឹកនាំរឿងជាបុរសឡើយ។
ខាងក្រោមនេះ KBN NEWS នឹងលើកយកអ្នកដឹកនាំរឿងជាស្រ្តីចំនួន៩នាក់ដែលមានទ្រព្យសម្បត្តិច្រើនជាងគេនៅទូទាំងពិភពលោកក្នុងឆ្នាំ២០២៣៖

៩. លោកស្រី Greta Gerwig មានទ្រព្យសម្បត្តិសុទ្ធ ១២ លានដុល្លារ
ទ្រព្យសម្បត្តិសុទ្ធរបស់អ្នកដឹកនាំរឿងរូបនេះបានកើនឡើងឆាប់រហ័សចំនួន៣ដងនាពេលចុងក្រោយនេះពី ៤ លានដុល្លារទៅ ១២ លានដុល្លារនៅលើ Celebrity Net Worth។ទ្រព្យសម្បតិ្តដែលមានការប្រែប្រួលយ៉ាងឆាប់រហ័សនេះដោយសារតែមានជោគជ័យលើការដឹកនាំរឿង «Barbie» ។ ក្រៅពីដឹកនាំរឿងនេះ លោកស្រីបានដឹកនាំរឿងផ្សេងទៀតមានដូចជា «Lady Bird» ឆ្នាំ២០១៧ និង «Little Women» ឆ្នាំ២០១៩ ។

៨. លោកស្រី Jennifer Lee មានទ្រព្យសម្បត្តិសុទ្ធ ១២ លានដុល្លារ
លោកស្រីបានក្លាយជាស្ត្រីដំបូងគេដែលដឹកនាំរឿងរបស់ Walt Disney Animation Studios ដែលមានចំណងជើងថា Frozen រួមជាមួយអ្នកដឹកនាំរឿងលោក Chris Buck ដែលរកចំណូលបានជាង១ លានដុល្លារនៅ Box Office ។ ចាប់តាំងពីពេលនោះមក លោកស្រី Jennifer បានធ្វើជាប្រធានផ្នែកច្នៃប្រឌិតរបស់ Walt Disney Animation Studios ជាមួយនឹងទ្រព្យសម្បត្តិប៉ាន់ស្មានចំនួន ១២ លានដុល្លារ។

៧. លោកស្រី Regina King មានទ្រព្យសម្បត្តិសុទ្ធ ១៦ លានដុល្លារ
អ្នកដឹកនាំរឿងរូបនេះត្រូវបានគេស្គាល់ថាជាតារាសម្តែងម្នាក់ដែលបច្ចុប្បន្ននេះមានអាយុ ៥២ ឆ្នាំព្រមទាំងបានផលិតខ្សែភាពយន្តទូរទស្សន៍ជាច្រើនឆ្នាំហើយ។ លោកស្រីបាន ដឹកនាំរឿងដំបូងមានចំណងជើងថា One Night in Miami ឆ្នាំ២០២០ ហើយទទួលបានពានរង្វាន់ Golden Globe សម្រាប់អ្នកដឹកនាំរឿងល្អបំផុត។

៦. លោកស្រី Patty Jenkins មានទ្រព្យសម្បត្តិសុទ្ធ ២៥ លានដុល្លារ
នៅក្នុងឧស្សាហកម្មនេះអស់រយៈពេលជាងពីរទសវត្សរ៍ ហើយពេលនេះលោកស្រីមានអាយុ៥២ឆ្នាំមានទ្រព្យសម្បត្តិសុទ្ធចំនួន ២៥ លានដុល្លារ។ លោកស្រីបានបង្ហាញខ្លួនជាលើកដំបូងក្នុងរឿង Monster ក្នុងឆ្នាំ ២០០៣ ប៉ុន្តែមានភាពល្បីល្បាញខ្លាំងតាមខ្សែភាពយន្តរឿង Wonder Woman របស់ DC Comics ឆ្នាំ២០១៧ និងរឿងភាគ Wonder Woman ឆ្នាំ១៩៨៤។

៥. លោកស្រី Sofia Coppola មានទ្រព្យសម្បត្តិសុទ្ធ ៤០លានដុល្លារ
កើតក្នុងគ្រួសារជាអ្នកផលិតខ្សែភាពយន្ត លោកស្រីមានភាពរីកចម្រើនយ៉ាងខ្លាំងនៅក្នុងឧស្សាហកម្មកម្សាន្តនេះ។ លោកស្រីបានបង្ហាញខ្លួនជាអ្នកដឹកនាំដំបូងជាផ្លូវការក្នុងឆ្នាំ ១៩៩៣ ជាមួយនឹង Walt Mink សម្រាប់បទ«Shine» មុនពេលចាប់ផ្តើមដឹកនាំរឿង «Lost in Translation » ឆ្នាំ២០០៣។ ស្រ្តីវ័យ ៥២ឆ្នាំរូបនេះក៏បានធ្វើការលើយុទ្ធនាការសម្រាប់ម៉ាកយីហោល្បីៗដូជា, Dior, Chanel និង New York City Ballet ជាដើម។

៤.លោកស្រី Kathryn Bigelow មានទ្រព្យសម្បត្តិសុទ្ធ ៥០ លានដុល្លារ
អតីតភរិយារបស់អ្នកដឹកនាំរឿង Avatar លោក James Cameron ទទួលបានភាពជោគជ័យផ្ទាល់ខ្លួនជាច្រើន ដោយបានក្លាយជាស្ត្រីដំបូងគេដែលឈ្នះពានរង្វាន់អ្នកដឹកនាំរឿងល្អបំផុតក្នុងប្រវត្តិសាស្ត្រ Oscars សម្រាប់រឿងប្រភេទសង្រ្គាមរបស់ខ្លួនមានចំណងជើងថា «The Hurt Locker» ក្នុងឆ្នាំ ២០១០។ ក្រៅពីនោះបានដឹកនាំរឿងផ្សេងទៀតរួមមាន «Point Break »ឆ្នាំ១៩៩១, រឿង Zero Dark Thirty ឆ្នាំ២០១២ ជាដើម។

៣. លោកស្រី Ava DuVernay មានទ្រព្យសម្បត្តិសុទ្ធ ៦០ លានដុល្លារ
អ្នកដឹកនាំរូបនេះបានបង្កើតស្នាដៃជាច្រើនដោយខ្លួនឯង រួមទាំងក្លាយជាស្ត្រីជនជាតិស្បែកខ្មៅដំបូងគេដែលត្រូវបានតែងតាំងដោយពានរង្វាន់ Golden Globes ជាអ្នកដឹកនាំរឿងសម្រាប់ភាពយន្តរឿងសិទ្ធិស៊ីវិល Selma ។ មិនត្រឹមតែប៉ុណ្ណោះ ក៏ជាស្ត្រីដែលមានជនជាតិស្បែកខ្មៅដំបូងគេដែលដឹកនាំរឿងរកចំណូលបាន ១០០ លានដុល្លារអាម៉េរិកចំពោះខ្សែភាពយន្ត Disney ឆ្នាំ ២០១៨ មានចំណងជើងថា «A Wrinkle in Time» ។ ពិសេសជាងនេះទៅទៀតរឿង When They See Us ក្នុងកម្មវិធី Netflix របស់អ្នកដឹកនាំរូបនេះក្លាយជាស៊េរីដែលមានអ្នកមើលច្រើនជាងគេបំផុតនៅលើវេទិកានៅពេលចាក់បញ្ចាំងនៅឆ្នាំ ២០១៩ ។

១. លោកស្រី Lana និង Lilly Wachowski មានទ្រព្យសម្បត្តិសុទ្ធ ២៥០ លានដុល្លារ
បងប្អូនស្រីត្រកូល Wachowski ទាំងពីររូបនេះបានជាប់ចំណាត់ថ្នាក់កំពូលនៅក្នុងតារាងទូទាំងពិភពលោកដែលមានទ្រព្យសម្បត្តិច្រើនជាងគេក្នុងនាមជាអ្នកដឹកនាំរឿងជាស្រ្តី។ អ្នកទាំងពីរជាម្ចាស់សិទ្ធិផ្តាច់មុខក្នុងភាពយន្ត The Matrix រួមទាំងស្នាដៃផ្សេងទៀតមានដូចជា Cloud Atlas ឆ្នាំ២០១២ , Jupiter Ascending ២០១៥ និង Sense8 ដែលជារឿងភាគទូរទស្សន៍ដែលដំណើរការពីឆ្នាំ ២០១៥-២០១៨៕

ប្រទេសឥណ្ឌូណេស៊ី ៖ យោងតាមទិន្នន័យពីក្រសួងទេសចរណ៍ចិនបង្ហាញថា ប្រទេសឥណ្ឌូណេស៊ីបានក្លាយជាគោលដៅទេសចរណ៍ដ៏ពេញនិយមមួយ និងអាចទាក់ទាញចំណាប់អារម្មណ៍របស់ជនជាតិចិនកាន់តែច្រើនជាបន្តបន្ទាប់ ។

ជនជាតិចិនបានក្លាយជាក្រុមភ្ញៀវទេសចរអន្តរជាតិដ៏ច្រើនបំផុតនៅប្រទេសឥណ្ឌូណេស៊ី និងបានបង្កើតឱកាសរីកចម្រើនផ្នែកសេដ្ឋកិច្ចដល់ប្រទេសនេះផងដែរ ។ គេសង្ឃឹមថា នឹងមានជនជាតិចិនធ្វើដំណើរមកកម្សាន្តនៅទីនេះកាន់តែច្រើន ។

អ្នកធ្វើការពាក់ព័ន្ធសម្លឹងឃើញថា នៅមានវិធីជាច្រើនទៀតដែលជួយធ្វើឱ្យតំបន់ជនបទឥណ្ឌូណេស៊ីទទួលបានប្រយោជន៍ពីការមកម្សាន្តរបស់ភ្ញៀវទេសចរចិន ខណៈពួកគេមិនទៅកម្សាន្តនៅតំបន់អឺរ៉ុប និងសហរដ្ឋអាមេរិក ។ ប៉ុន្តែពួកគេបានមកកម្សាន្តនៅតំបន់អាស៊ី ជាពិសេស ឥណ្ឌូណេស៊ី ដែលប្រទេសនេះបានផ្តល់នូវបទពិសោធន៍ដល់ពួកគេ ច្រើនជាងការសប្បាយតែម្យ៉ាង ។

តំបន់ទេសចរណ៍ធម្មជាតិមួយចំនួននៅប្រទេសឥណ្ឌូណេស៊ីមានទេសភាពស្រស់ស្អាតបំផុតលើពិភពលោក ដូចជា តំបន់ព្រៃភ្នំ ឆ្នេរសមុទ្រ និងតំបន់ព្រៃត្រូពិច ។ ក្រៅពីនេះ ឥណ្ឌូណេស៊ីមានតំបន់ទេសចរណ៍ China Town នៅទីក្រុងហ្សាកាតាផងដែរ ដែលទទួលបានការនិយមចូលចិត្តពីភ្ញៀវទេសចរចិនយ៉ាងខ្លាំង ពីព្រោះភ្ញៀវទេសចរត្រូវការទស្សនានូវភាពចម្រុះគ្នារវាងវប្បធម៌ចិន និងវប្បធម៌ក្នុងតំបន់ ។

ភ្ញៀវទេសចរចិនចូលចិត្តមកកម្សាន្តនៅឥណ្ឌូណេស៊ី ជាពិសេស ក្នុងពិធីបុណ្យចូលឆ្នាំចិន ដោយសារមានការផ្សព្វផ្សាយពីតំបន់ទេសចរណ៍នានាក្នុងបណ្តាញសង្គម ។ គេសង្កេតឃើញថា ក្រៅពីភ្ញៀវទេសចរចិនចាប់អារម្មណ៍ពីវប្បធម៌ និងតំបន់ទេសចរណ៍នានាហើយ ពួកគេក៏បានចាប់អារម្មណ៍ការមុជទឹកសមុទ្រផងដែរ ។ ដូច្នេះ វាជាសកម្មភាពមួយដែលផ្តល់ផលប្រយោជន៍ដល់សេដ្ឋកិច្ចឥណ្ឌូណេស៊ី ៕ ប្រភព ៖ Nation World

បរទេស៖ អ្នកជំនាញជនជាតិប៉ូឡូញបានរកឃើញសាកសពក្មេងអាយុ ៥-៧ ឆ្នាំដែលសង្ស័យថាជា “បិសាច” នឹងមានអាយុកាល ៤០០ឆ្នាំ។

យោងតាមប្រភពព័ត៌មាន Business Insider ដែលបានរាយការណ៍នៅថ្ងៃទី ១២ ខែសីហាថា ក្រុមអ្នកស្រាវជ្រាវបានរកឃើញអដ្ឋិធាតុរបស់ក្មេង “បិសាច” ដែលកប់មុខចុះក្រោម ហើយចងជាប់នឹងដី ដែលទំនងជាអាចទប់ទល់នឹងការភ័យខ្លាចរបស់អ្នកភូមិ និងធានាថាអ្នកស្លាប់មិនអាចត្រឡប់មកវិញបានទេ។ សាកសពរបស់កុមារអាយុប្រហែល ៥-៧ ឆ្នាំត្រូវបានគេរកឃើញនៅក្នុងទីបញ្ចុះសពអនាមិកមួយក្នុងភូមិ Pień ជិត Ostromecko ប្រទេសប៉ូឡូញ។ នៅឯទីបញ្ចុះសពនេះផងដែរ កាលពីឆ្នាំមុន ក្រុមអ្នកស្រាវជ្រាវបានរកឃើញសាកសពស្ត្រី “បិសាច” ដែលមានខ្សែចងនៅលើមេដៃ និងចងជុំវិញករបស់នាង ដែលបញ្ជាក់ថាអ្នកស្លាប់នោះនឹងមិនអាចរស់ឡើងវិញបាននោះទេ។

ក្រុមស្រាវជ្រាវរបស់ Poliński បានជីកកកាយផ្នូរប្រហែល ១០០ នៅក្នុងទីបញ្ចុះសពនោះ ដែលភាគច្រើនបង្ហាញពីការបញ្ចុះសពមិនធម្មតា រួមទាំងការរារាំងបិសាចជញ្ជក់ឈាម ដូចជាមានឈើរាងត្រីកោណពាក់នៅលើកជើងសាកសពជាដើម។ អ្នកជំនាញបានសន្មត់ថាមានហេតុផលជាច្រើនដែលមនុស្សម្នាក់ៗអាចត្រូវបានគេបញ្ចុះសពបែបនេះ។ បុគ្គលនោះអាចបង្ហាញអាកប្បកិរិយាចម្លែកនៅពេលមានជីវិត ដែលធ្វើឱ្យមនុស្សជុំវិញខ្លួនភ័យខ្លាច ឬក៏អាចស្លាប់ដោយសារជំងឺដែលបណ្តាលឱ្យរូបរាងរបស់ពួកគេមិនធម្មតា។

អ្នកភូមិនៅសតវត្សទី ១៧ មានទំនោរខ្លាចទារកដែលកប់ដោយមិនមានពិធីបុណ្យជ្រមុជទឹកឡើយ។ យោងតាមលោក Poliński ក្រុមបុរាណវត្ថុវិទ្យាក៏បានរកឃើញឆ្អឹងជាបន្តបន្ទាប់នៅជិតផ្នូររបស់កុមារ និងសាកសពរបស់ស្ត្រីដែលមានផ្ទៃពោះប្រហែលប្រាំមួយខែនោះ។Matteo Borrini សាស្ត្រាចារ្យផ្នែកនរវិទ្យានៅសាកលវិទ្យាល័យ John Moore ទីក្រុង Liverpool បាននិយាយថា ការអនុវត្តនៃការកប់បិសាចជញ្ជក់ឈាមគឺជារឿងធម្មតានៅក្នុងទ្វីបអឺរ៉ុបចាប់តាំងពីសតវត្សទី ១៤ មកម្លេះ។ មនុស្សនៅពេលនោះជឿថាបិសាចជញ្ជក់ឈាមនឹងបរបាញ់សម្លាប់សមាជិកក្នុងគ្រួសាររបស់ពួកគេ បន្ទាប់មកទៅកាន់អ្នកជិតខាង និងអ្នកផ្សេងទៀតនៅក្នុងភូមិ៕ ប្រភព៖vnexpress

លោក Bill Gates បានលើកឡើងពីចំណុចគួរឱ្យចាប់អារម្មណ៍មួយចំនួនថា នៅពេលលោកអានសៀវភៅជាច្រើនក្បាល លោកបានផ្តោតអារម្មណ៍ និងចងចាំនូវទិន្នន័យជាច្រើន ។ ជាធម្មតា នៅថ្ងៃសម្រាកពីការងារ លោកតែងតែយកសៀវភៅដាក់តាមខ្លួនជានិច្ច ហើយលោកអង្គុយអានសៀវភៅចំនួន៣ម៉ោងក្នុង១ថ្ងៃ ។

លោកបន្តថា ការកត់ត្រា គឺជាវិធីមួយដែលលោកប្រើប្រាស់ដើម្បីសង្ខេបទិន្នន័យទាំងអស់ ។ ជាធម្មតា លោកនឹងកត់ត្រាទិន្នន័យប្រមាណ២០% នៃសៀវភៅទាំងអស់ដែលលោកបានអាន បើទោះជាវានឹងបង្កើនរយៈពេលអានសៀវភៅក៏ដោយ ហើយនេះគឺជាកូនសោរសំខាន់ដ៏សំខាន់ក្នុងការរៀនសូត្ររបស់លោក ។

លោក Bill Gates លើកឡើងថា ៖ «នៅពេលអ្នកអានសៀវភៅត្រូវប្រុងប្រយ័ត្នថា អ្នកកំពុងតែអានអំពីអ្វី ជាពិសេស បើវាជាសៀវភៅ Non-Fiction គឺត្រូវសួរខ្លួនឯងថា តើអ្នកកំពុងទទួលបានចំណេះដឹងថ្មីៗ និងភ្ជាប់គ្នាជាមួយចំណេះដឹងដែលអ្នកមានដែរឬទេ ។ ឧទាហរណ៍ ៖ បើខ្ញុំមិនយល់ស្របជាមួយអ្នកនិពន្ធ ខ្ញុំនឹងសរសេរយោបល់ និងទស្សនៈផ្ទាល់ខ្លួនចូលក្នុងកំណត់ត្រា» ។

ការស្រាវជ្រាវមួយបញ្ជាក់ថា ការសរសេរកំណត់ត្រាក្នុងសៀវភៅនឹងធ្វើឱ្យយើងអាចចងចាំនូវទិន្នន័យបានល្អជាងការកត់ត្រាក្នុងទូរស័ព្ទដៃ ឬកុំព្យូទ័រ ពីព្រោះការកត់ត្រាដោយដៃទាមទារឱ្យយើងផ្តោតអារម្មណ៍ច្រើនជាង ។ ហេតុនេះ វាពាក់ព័ន្ធនឹងការប្រមូលលទ្ធផល និងការរៀនសូត្រ ហើយវានឹងធ្វើឱ្យខួរក្បាលអាចទទួលយក ព្រមទាំងឈ្វេងយល់ពីទិន្នន័យថ្មីៗ ។ នៅពេលយើងអានសៀវភៅបានច្រើន វាធ្វើឱ្យការចងចាំទិន្នន័យ ឬព័ត៌មានកាន់តែងាយស្រួលផងដែរ ៕ ប្រភព ៖ Connext