ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន បានចេញសេចក្តីប្រកាសបន្ទាន់ដល់ ប្រជាពលរដ្ឋខ្មែរទាំងអស់ដែលកំពុងរស់នៅ ធ្វើការ និងសិក្សានៅប្រទេសជប៉ុនថា ទីភ្នាក់ងារជាតិ ឧតុនិយមជប៉ុនបានចេញសេចក្តីព្រមានអំពីព្យុះត្រូពិចខាន់ណុ (Khanun) ដែលកំពុងរំកិលខ្លួន មកកាន់ទិសខាងជើង ហើយអាចបង្កផលប៉ះពាល់ដល់ផ្នែកនិរតីនៃប្រទេសជប៉ុន ជាពិសេសតំបន់ Kyushu និងតំបន់ Shikoku ។

ឥទ្ធិពលព្យុះនេះបានធ្វើអោយមានភ្លៀងធ្លាក់ខ្លាំងនៅផ្នែកខ្លះនៃតំបន់ Kyushu និង Shikoku ហើយនឹងអាចបណ្តាលឱ្យមានភ្លៀងធ្លាក់នៅផ្នែកជាប់មហាសមុទ្រប៉ាស៊ីហ្វិកផងដែរ ។ អាជ្ញាធរបានចេញ សេចក្តីព្រមានពាក់ព័ន្ធនឹងការរអិលបាក់ដី ទឹកជំនន់ ខ្យល់កន្ត្រាក់ និងទឹករលកខ្ពស់ៗ ។

សូមបងប្អូនពលរដ្ឋខ្មែរ ដែលកំពុងរស់នៅតំបន់ខាងលើ មានការប្រុងប្រយ័ត្នខ្ពស់ ហើយតាមដាន និងស្តាប់តាមការណែនាំរបស់អាជ្ញាធរ ។ ក្នុងករណីបងប្អូនបានទទួលព័ត៌មានអំពីពលរដ្ឋខ្មែរយើងដែល រងផលប៉ះពាល់ សូមមេត្តាជូនដំណឹងមកស្ថានទូតជាបន្ទាន់តាមរយៈហ្វេសប៊ុកស្ថានទូត Royal Embassy of Cambodia in Japan ឬ ០៨០ ៤៦៨៩ ៩៣៧៤៕

ប្រទេសចិន ៖ បច្ចុប្បន្ន យុវវ័យចិនដែលមានសុខភាពរឹងមាំ ហើយមិនមែនជាជនពិការ បាននាំគ្នាជិះរទេះរុញអគ្គិសនីធ្វើជាយានជំនិះសម្រាប់ធ្វើដំណើរទៅកាន់ទីកន្លែងផ្សេងៗ ។ គេសង្កេតឃើញថា អ្នកដែលនិយមជិះរទេះរុញអគ្គិសនី មិនមែនមានចំនួនតិចតួចទេ ប៉ុន្តែពួកគេបានជិះជាក្បួនតែម្តងនៅតាមផ្លូវនានាក្នុងទីក្រុងក្វាងចូវ ។ ហេតុនេះ សម្រាប់កង់អាគុយវិញ មិនទទួលបានការពេញនិយមសម្រាប់ពួកគេទៀតទេ ។

យុវវ័យជាច្រើននាក់បាននិយមជិះរទេះរុញអគ្គិសនី ដោយសារនៅទីក្រុងក្វាងចូវបានចេញបទប្បញ្ញត្តិថ្មីពាក់ព័ន្ធនឹងការប្រើប្រាស់កង់អាគុយក្នុងទីក្រុងនេះ ដូចជា ការហាមឃាត់កែច្នៃកង់អាគុយ, កំណត់រយៈពេលការប្រើប្រាស់ ព្រមទាំងកំណត់ល្បឿន និងចំណុចផ្សេងទៀត ។ ដូច្នេះ ការចេញបទប្បញ្ញត្តិដ៏តឹងរ៉ឹងនេះបានធ្វើឱ្យអ្នកជិះកង់អាគុយមិនសូវជាពេញចិត្ត ។

ក្រោយពីការចេញបទប្បញ្ញត្តិថ្មីមក បានធ្វើឱ្យអ្នកជិះកង់អាគុយប្តូរមកជិះរទេះរុញអគ្គិសនីជំនួសវិញ ពីព្រោះគេមិនទាន់បានចេញបទប្បញ្ញត្តិពីការប្រើប្រាស់រទេះរុញអគ្គិសនី និងការដាក់កំណត់ណាមួយគួរឱ្យបារម្ភនៅឡើយទេ ។ រទេះរុញអគ្គិសនី១គ្រឿងត្រូវបានគេដាក់លក់ក្នុងតម្លៃ៣.០០០យាន់ ហើយវាពេញនិយមបំផុតក្នុងចំណោមយុវវ័យចិន ។ ក្នុងរយៈពេល៦ខែនៃឆ្នាំ២០២៣ ចំនួនការបញ្ជាទិញរទេះរុញអគ្គិសនី បានកើនឡើងរហូតដល់៦០% ។

ទោះយ៉ាងណា គ្មានការបញ្ជាក់ពីសុវត្ថិភាពនៃការប្រើប្រាស់រទេះរុញអគ្គិសនីទេ ហើយប្រសិនបើវាក្លាយជាយានជំនិះសម្រាប់ការធ្វើដំណើរជាចម្បងនោះ ប្រាកដណាស់ថា វាអាចនឹងប៉ះពាល់ដល់ការធ្វើចរាចរនៅតាមផ្លូវបាន ៕ ប្រភព ៖ LIVE style

បរទេស៖ អ្នកវិទ្យាសាស្ត្រអង់គ្លេសបានផលិតឧបករណ៍មួយដើម្បីរុករកដីដែលមានជម្រៅជិត ១០០០ ម៉ែត្រក្នុងអណ្តូងរ៉ែ Yorkshire ។

យោងតាមប្រភពព័ត៌មាន The Guardian ដែលចេញផ្សាយកាលពីថ្ងៃទី៨ ខែសីហា បានឱ្យថា ឧបករណ៍រុករកថ្មីនេះត្រូវបានសាងសង់នៅក្នុងទីក្រុង Boulby រដ្ឋ North Yorkshire ដែលជាកន្លែងអ្នកវិទ្យាសាស្ត្របានបង្កើតមជ្ឈមណ្ឌលស្រាវជ្រាវក្រោមដីមួយ។ មូលហេតុនៃការផលិតឧបករណ៍រុករកនេះ គឺដើម្បីធ្វើការពិសោធន៍ជាបន្តបន្ទាប់លើសម្ភារៈ បរិស្ថាន និងប្រធានបទជាច្រើនទៀតនៅក្រោមដី។ ការប៉ុនប៉ងដំបូងមួយចំនួនដើម្បីរកឃើញភាគល្អិតនៃសារធាតុងងឹតក៏ត្រូវបានធ្វើឡើងនៅទីនេះផងដែរ។

សាស្ត្រាចារ្យ Chamkaur Ghag រូបវិទ្យានៅសាកលវិទ្យាល័យ University College London មានប្រសាសន៍ថា ឧបករណ៍រុករកនឹងផ្តល់ឱកាសដើម្បីបញ្ជាក់ពីប្រភពដើមនៃអាថ៌កំបាំងដ៏អស្ចារ្យបំផុតរបស់ចក្រវាឡដែលជាបញ្ហាងងឹត។ ដូច្នេះអ្នកស្រាវជ្រាវក៏បានបង្កើតឧបករណ៍រុករកភាពងងឹតនៅក្រោមដី ដែលឧបករណ៍នេះគឺជាពន្លឺនឹងអាចត្រូវបានបញ្ចេញនៅពេលដែលភាគល្អិត Wimp បុកជាមួយស្នូលនៃអាតូម xenon ។

លោក Sean Paling នាយកមន្ទីរពិសោធន៍បាននិយាយថា “ឧបករណ៍រុករកជំនាន់ក្រោយនេះត្រូវបានអភិវឌ្ឍទៅជិតអ័ព្ទនឺត្រុងណូត ដែលបច្ចុប្បន្នក្រុមស្រាវជ្រាវជាច្រើនកំពុងស្វែងរកគ្រាប់ពូជ Wimp នៅក្នុងទីតាំងរួមទាំងអណ្តូងរ៉ែនៅ South Dakota ក៏ដូចជាមជ្ឈមណ្ឌលនៅក្នុងប្រទេសអ៊ីតាលី ចិន និងប្រទេសជប៉ុន៕ ប្រភព៖vnexpress

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃដិន លើកឡើងថា លោកមានគម្រោងធ្វើដំណើរទៅកាន់ប្រទេសវៀតណាម ដើម្បីជំរុញទំនាក់ទំនងរវាងប្រទេសទាំងពីរឱ្យកាន់តែស្អិតរមួត និងជាការព្យាយាមរបស់អាមេរិកផងដែរសម្រាប់ទប់ស្កាត់ឥទ្ធិពលចិន ដែលកំពុងកើនឡើងក្នុងតំបន់អាស៊ីអាគ្នេយ៍ ។ ក្នុងអំឡុងពេលថ្លែងសុន្ទរកថានៅរដ្ឋ New Mexico លោក ចូ បៃដិន លើកឡើងថា លោកនឹងធ្វើដំណើរទៅវៀតណាម ដោយសារវៀតណាមត្រូវការពង្រឹងទំនាក់ទំនងជាមួយអាមេរិក ហើយវៀតណាមចង់ឱ្យអាមេរិកធ្វើជាដៃគូសំខាន់ដូចប្រទេសចិន និងរុស្ស៊ី ។

កាលពីថ្ងៃទី២៨ ខែកក្កដា ឆ្នាំ២០២៣ លោក ចូ បៃដិន ធ្លាប់លើកឡើងថា លោកបានទទួលទូរស័ព្ទពីមេដឹកនាំវៀតណាមដែលបង្ហាញពីចេតនាថា ត្រូវការជួបជាមួយលោក ក្នុងអំឡុងពេលមេដឹកនាំវៀតណាមទៅចូលរួមប្រជុំលើកទី២០ នៅប្រទេសឥណ្ឌា ចាប់ពីថ្ងៃទី៩ ដល់ថ្ងៃទី១០ ខែកញ្ញា ឆ្នាំ២០២៣ ។ ប៉ុន្តែលោក ចូ បៃដិន មិនបានបង្ហាញថា មេដឹកនាំវៀតណាមដែលបានជជែកជាមួយលោកតាមទូរស័ព្ទនោះឈ្មោះអ្វីទេ ។ អ្នកវិភាគគិតថា មេដឹកនាំវៀតណាមរូបនោះ អាចជាលោក Nguyen Phu Trong អគ្គលេខាធិការបក្សកុម្មុយនិស្តវៀតណាម ដែលលោកធ្លាប់បានជជែកជាមួយលោក ចូ បៃដិន កាលពីខែមីនា កន្លងមក ។

ជាមួយគ្នានេះ ប្រទេសទាំងពីរបារម្ភដូចគ្នាផងដែរពាក់ព័ន្ធនឹងភាពរឹងមាំរបស់ប្រទេសចិន ដែលបានកើនឡើងជាបន្តបន្ទាប់ក្នុងតំបន់អាស៊ីអាគ្នេយ៍ ។ ហេតុនេះ អាមេរិកត្រូវស្វែងរកប្រទេសជាមិត្តនៅតំបន់នេះ ដើម្បីទប់ស្កាត់ការពង្រីកឥទ្ធិពលរបស់ចិន ។

សារព័ត៌មាន South China Morning Post រាយការណ៍ថា រដ្ឋាភិបាលអាមេរិកព្យាយាមពង្រឹងទំនាក់ទំនងជាមួយវៀតណាមឱ្យក្លាយជាប្រទេសដៃគូយុទ្ធសាស្ត្រ បើទោះជារដ្ឋាភិបាលវៀតណាមប្រុងប្រយ័ត្នក្តី ព្រោះបារម្ភថា ទំនាក់ទំនងរវាងវៀតណាមនិងអាមេរិក នឹងធ្វើឱ្យចិន ដែលជាប្រទេសដៃគូពាណិជ្ជកម្មសំខាន់នាំចេញទំនិញទៅកាន់វៀតណាម និងរុស្ស៊ី មិនពេញចិត្ត ។

សហរដ្ឋអាមេរិកមិនបានបង្ហាញព័ត៌មានលម្អិតអំពីការធ្វើដំណើរទៅវៀតណាមរបស់លោក ចូ បៃដិន ទេ ប៉ុន្តែអ្នកជំនាញជឿថា ការធ្វើដំណើរទៅវៀតណាមលើកនេះ ប្រទេសទាំងពីរនឹងពិភាក្សាគ្នាពីការពង្រឹងកិច្ចសហការផ្នែកកងទ័ព ។ កន្លងមក ក្រុមហ៊ុនផ្នែកការពារជាតិអាមេរិក និងរដ្ឋាភិបាលអាមេរិកធ្លាប់និយាយថា ចង់ស្វែងរកអាវុធឱ្យវៀតណាមបន្ថែមទៀត ព្រោះអាវុធទាំងនេះត្រូវបានគេបញ្ជូនទៅកាន់នាវាល្បាតតាមឆ្នេរសមុទ្រ និងយន្តហោះហ្វឹកហាត់ ហើយវៀតណាមចង់បង្កើនភាពចម្រុះនៃអ្នកផ្គត់ផ្គង់អាវុធ ខណៈពេលមុន រុស្ស៊ី គឺជាប្រទេសផ្គត់ផ្គង់អាវុធចម្បងឱ្យវៀតណាម ។

ទោះយ៉ាងណា កិច្ចព្រមព្រៀងកងទ័ពជាមួយអាមេរិកអាចប្រឈមនឹងឧបសគ្គនៅខាងអាមេរិកដូចគ្នាដែរ ព្រោះអ្នកនយោបាយក្នុងសភាអាមេរិកអាចពន្យារពេលការលក់អាវុធ ដោយសំអាងលើការរំលោភសិទ្ធិមនុស្សនៅវៀតណាម ៕ ប្រភព ៖ TNN World

ប្រទេសថៃ ៖ កាលពីថ្ងៃទី៩ ខែសីហា ឆ្នាំ២០២៣ ពលរដ្ឋរស់នៅឃុំខោហ៊ិនសន ស្រុកផានុមសារ៉ាខាម ខេត្តឆាក់ឈើងឆៅ បានប្រទះឃើញព្រះសង្ឃ និងលោកនេនប្រមាណ១០អង្គ ព្រមទាំងក្មេងវត្តផងដែរ បានដើរនៅតាមផ្លូវមួយកន្លែងឆ្ពោះទៅកាន់ទីក្រុងបាងកក ។ ព្រះសង្ឃទាំងនេះបានយករបស់របរប្រើប្រាស់ផ្ទាល់ខ្លួនមកជាមួយដែរ ដូចជា បាត្រលោក និងកង្ហារ ។

តាមការសាកសួរទៅកាន់ព្រះសង្ឃ១អង្គព្រះនាម Noppadon Suchato មានសង្ឃដីកាថា ៖ «អាត្មាធ្វើដំណើរមកពីវត្តមួយកន្លែងស្ថិតនៅឃុំខោហ៊ិនសន ស្រុកផានុម សារ៉ាខាម ដោយសារព្រះចៅអធិការវត្តនេះបាននាំកម្លាំងសមត្ថកិច្ចមកប្រាប់ឱ្យព្រះសង្ឃចេញពីវត្ត ។ ការបណ្តេញចេញនេះ ដោយសារអាត្មានាំគ្នាតវ៉ាចៅអធិការវត្ត និងខាងព្រះសង្ឃថ្នាក់ស្រុក អំពីរឿងចៅអធិការវត្តមានអាកប្បកិរិយាមិនសមរម្យ ហើយគ្មានភាពយុត្តិធម៌សម្រាប់ព្រះសង្ឃផ្សេងទៀតដែលគង់ក្នុងវត្តនេះ ។ ដូច្នេះ ព្រះសង្ឃក៏នាំគ្នាចេញពីវត្តតាមការបណ្តេញចេញ ដោយបារម្ភថា គ្មានសុវត្ថិភាព ព្រោះចៅអធិការវត្តខាងលើមានឥទ្ធិពលខ្លាំង» ។

ព្រះសង្ឃ១អង្គទៀតមានសង្ឃដីកាថា កាលពីឆ្នាំ២០២២ ព្រះចៅអធិការវត្តបានទទួលប្រាក់ពីបុណ្យកឋិនប្រាណ៣សែនបាត ហើយចៅអធិការវត្តរូបនេះបានចេញពីវត្តអស់៧ខែ ទៅ៨ខែ ។ ក្រោយមក នៅខែកក្កដា ឆ្នាំ២០២៣ ព្រះចៅអធិការវត្តក៏ត្រឡប់មកវត្តវិញ ប៉ុន្តែព្រះសង្ឃគង់ក្នុងវត្តមិនព្រមទទួលស្គាល់ជាចៅអធិការវត្តទៀតទេ ។ ដូច្នេះ ក៏បាននាំគ្នាទៅតវ៉ាព្រះសង្ឃថ្នាក់សង្កាត់ នៅរសៀលថ្ងៃទី៩ ខែសីហា ប៉ុន្តែពេលល្ងាច ស្រាប់តែមានការបញ្ជូនលិខិត១ច្បាប់ពីព្រះសង្ឃថ្នាក់ខេត្តចុះហត្ថលេខាថា ឱ្យបណ្តេញព្រះសង្ឃ និងលោកនេនចេញពីវត្ត ។

ព្រះសង្ឃខាងលើបន្តថា ៖ «ព្រះចៅអធិការវត្តបាននាំមន្ត្រីសមត្ថកិច្ចមកដល់វត្ត ហើយសមត្ថកិច្ចប្រាប់ថា អាស្រ័យលើចៅអធិការវត្តថា នឹងឱ្យព្រះសង្ឃចេញពីវត្ត ឬនៅវត្តបន្តទៀត ប៉ុន្តែចៅអធិការវត្តបានឱ្យពួកអាត្មាចេញពីវត្ត ។ ពួកអាត្មាបានសុំពេលមួយរយៈ ព្រោះវាជាពេលចូលវស្សា ប៉ុន្តែចៅអធិការវត្តទុករយៈពេលត្រឹមថ្ងៃទី១០ ខែសីហា នៅវេលាថ្ងៃត្រង់ បើមិនដូច្នោះទេ នឹងចាត់វិធានការតាមច្បាប់ពីបទបំពាន» ។

ព្រះសង្ឃដដែលបន្ថែមថា ៖ «អាត្មាមិនយល់ថា តើពួកអាត្មាបំពានយ៉ាងម៉េចទៅ ព្រោះអាត្មាបានបួសជាព្រះសង្ឃអស់រយៈពេល៧ឆ្នាំហើយនៅវត្តនេះ គ្រាន់តែនាំគ្នាតវ៉ាសោះ ក៏ត្រូវបណ្តេញចេញពីវត្ត ។ រីឯមន្ត្រីប៉ូលិសមិនបានសាកសួរអ្វីឡើយ ហើយពួកគេគិតតែពីបណ្តេញពួកអាត្មាតែម្យ៉ាង មិនសួររកហេតុផលមួយម៉ាត់សោះ ។ ពួកគេប្រាប់ត្រឹមថា បានទទួលបញ្ជានេះពីព្រះសង្ឃថ្នាក់ខេត្ត» ។

តាមការពិនិត្យជាក់ស្តែងឃើញថា មានព្រះសង្ឃ៣អង្គ លោកនេន៥អង្គ និងក្មេងវត្តម្នាក់ទៀត ត្រូវបានចៅអធិការបណ្តេញចេញពីវត្ត ។ ចំណែកនៅក្នុងវត្តពេលនេះ មានតែព្រះចៅអធិការវត្ត១អង្គ និងលេខា២នាក់ប៉ុណ្ណោះ ។ បន្ទាប់ពីនេះ ព្រះសង្ឃព្រះនាម Noppadon Suchato ត្រូវស្វែងរកវត្តផ្សេងឱ្យព្រះសង្ឃគ្រប់អង្គស្នាក់នៅសិន ទើបដំណើរការទាមទាររកយុត្តិធម៌ ព្រោះបច្ចុប្បន្ន គឺជាពេលចូលវស្សា ៕ ប្រភព ៖ khaosod  

ត្រី​ហោះ ឬ ត្រី Exocoetidae មិនមែន​ទើបតែ​កកើត​ទេ ពោល​គឺ​តាម​ការ​អះអាង​របស់​អ្នក​វិទ្យាសាស្ត្រ​លើ​ការ​ស្រាវជ្រាវ​ផូស៊ីលបានឱ្យ​ដឹង​ថា អម្បូរ​ត្រី​មាន​ស្លាប​នេះ​មាន​តាំងពី​យុគសម័យ Middle Triassic ឬ​ពី​២៣៥​ទៅ​២៤២​លាន​ឆ្នាំ​មុន​ ប៉ុន្តែពួក​វា​មាន​ទ្រង់ទ្រាយ​ពុំ​ដូច​ត្រី​បច្ចុប្បន្ន​ទេ។​ត្រី​នេះ​អាច​ហោះ​បាន​ចម្ងាយ​៥០​ម៉ែត្រ ហើយ​តែងតែ​ហោះ​ចេញពី​ទឹកសមុទ្រ​ទៅ​ពួន​សម្ងំ​ដេក​ក្បែរមាត់ច្រាំង និង​ធ្វើ​ដំណើរ​បាន​ច្រើន​ជាង​៧០​គីឡូម៉ែត្រ​ក្នុង​មួយ​ម៉ោង។ ការហោះចេញពីទឹករបស់ត្រីនេះ គឺដើម្បីគេចចេញពីការតាមប្រមាញ់របស់ត្រី Tuna (ធូណា)។

លក្ខណៈពិសេសរបស់ត្រីហោះនេះ គឺភ្នែករបស់ពួកវា ផ្តល់ភាពអំណោចផលខ្លាំង បើទោះបីជាពួកវាហោះចេញពីទឹកក៏ដោយ ក៏ភ្នែករបស់ពួកវា នៅតែមើលឃើញច្បាស់ដដែល។ បច្ចុប្បន្ន អម្បូរ​ត្រី​មាន​ស្លាប​នេះ​មាន​ចំនួន ៦៤​ប្រភេទ​រស់នៅ​ក្នុង​ទឹកសមុទ្រ ដែលភាគច្រើនគេអាចរកប្រទះឃើញវានៅប្រទេសដែនកោះ Barbados (បា បា ដូស) ដែលប្រទេសនេះ ត្រូវបានគេទទួលស្គាល់ថាជា”ទឹកដីនៃត្រីហោះ”៕

ប្រភព: Wikipedia