រដ្ឋធានីសេអ៊ូល៖ ដំណើរទស្សនកិច្ចរបស់មេដឹកកូរ៉េខាងជើង នៅក្នុងប្រទេសរុស្ស៊ី បានបង្កឲ្យមានការព្រួយបារម្ភយ៉ាងខ្លាំងពីលោកខាងលិច និង សម្ពន្ធមិត្ត ខណៈកូរ៉េខាងត្បូង បានព្រមាន អំពីរដ្ឋាភិបាលរបស់គាត់ នឹងមិននៅស្ងៀម ប្រសិនបើក្រុងព្យុងយ៉ាងលក់អាវុធទៅឲ្យរុស្ស៊ី ព្រោះវានឹងបង្កការគំរាមកំហែងយ៉ាងធ្ងន់ធ្ងរបំផុត ហើយរំលោភលើដំណោះស្រាយរបស់អង្គការសហប្រជាជាតិ

សារព័ត៌មាន CNA បានចេញផ្សាយ កាលពីព្រឹក ថ្ងៃសុក្រ ទី២២ ខែកញ្ញា ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចេញបញ្ជាឲ្យបង្កើនទំនាក់ទំនងការទូតបន្ថែមទៀត ជាមួយនឹងរុស្ស៊ី ក្រោយដំណើរទស្សនកិច្ចរបស់គាត់ កាន់រដ្ឋធានីមូស្គូ នៃប្រទេសមហាអំណាចនុយក្លេអ៊ែរកំពូលរបស់ពិភពលោក។ សកម្មភាពរបស់លោក គីម បានកើតឡើង ស្របពេលសហរដ្ឋអាមេរិក និង កូរ៉េខាងត្បូង ជាសម្ពន្ធមិត្ដដ៏ជិតស្និទ្ធមួយនៅអាស៊ីបូព៌ារបស់ក្រុងវ៉ាស៊ីនតោន បានព្រមាន ថា រាល់កិច្ចសហប្រតិបត្ដិការយោធាណាមួយ នឹងនាំមកនូវគ្រោះថ្នាក់ និង មានផលវិបាកដ៏ធ្ងន់ធ្ងរ។

បើតាមទីភ្នាក់ងារសារព័ត៌មាន គ្រប់គ្រង ដោយរដ្ឋ កូរ៉េខាងជើង KCNA បានរាយការណ៍ កាលពីថ្ងៃសុក្រ (ទី២២ ខែកញ្ញា) ថា នៅក្នុងកិច្ចប្រជុំ នៃការិយាល័យនយោបាយ កាលពីថ្ងៃពុធ (ទី២០ ខែកញ្ញា) លោកប្រធាន គីម បានរៀបចំការងារ អភិវឌ្ឍទំនាក់ទំនងទ្វេភាគី ដល់កម្រិតខ្ពស់ជាថ្មីបន្ថែមទៀត ដើម្បីបង្កើនជោគជ័យ សម្រាប់ដំណើរទស្សនកិច្ចរបស់គាត់ កាលពីពេលថ្មីៗនេះ។

លោក យូន ស៊ុក-យូល (Yoon Suk-Yeol) ប្រធានាធិបតីកូរ៉េខាងត្បូង បានថ្លែង នៅចំពោះមុខមហាសន្និបាតអង្គការសហប្រជាជាតិ កាលពីថ្ងៃពុធ (ទី២០ ខែកញ្ញា) ថា សកម្មភាពណាមួយរបស់សមាជិក នៃក្រុមប្រឹក្សាសន្តិសុខ អង្គការសហប្រជាជាតិ គេចចេញពីបទដ្ឋានអន្តរជាតិ នឹងនាំមកនូវគ្រោះថ្នាក់។ ក្រុងសេអូល និង សម្ពន្ធមិត្តរបស់ខ្លួន នឹងមិនអង្គុយនៅស្ងៀម ជុំវិញកិច្ចព្រមព្រៀងលក់គ្រឿងសព្វាវុធ រវាងក្រុងព្យុងយ៉ាង និង ក្រុងមូស្គូ នោះឡើយ។ បញ្ហានេះ នឹងបង្កនូវការគំរាមកំហែងយ៉ាងខ្លាំង មិនត្រឹមតែអ៊ុយក្រែន ប៉ុណ្ណោះទេ ប៉ុន្ដែថែមទាំងបង្កការគំរាមកំហែង មកលើប្រទេសកូរ៉េខាងត្បូង ផងដែរ។

នៅក្នុងដំណើរទស្សនកិច្ច នៅរុស្សី កាលពីប៉ុន្មានថ្ងៃមុនេះ លោក គីម ជុងអ៊ុន មេដឹកនាំកូរ៉េខាងជើង បានជួបជាមួយនឹងប្រធានាធិបតី លោក វ៉្លាឌីមៀ ពូទីន ខណៈកំពុងតែធ្វើដំណើរ ទៅកាន់តំបន់ដាច់ស្រយាល នាភាគខាងកើត ប្រទេសរុស្ស៊ី និង បានពិនិត្យមើលកន្លែងបច្ចេកវិទ្យា និង យោធារបស់រដ្ឋាភិបាលក្រុងមូស្គូ។ ភាគីទាំង២ បានលើកឡើង អំពីកិច្ចសហប្រតិបត្ដិការ លើវិស័យការពារជាតិ។ ប៉ុន្ដែទាំងរុស្ស៊ី និង កូរ៉េខាងជើង មិនបញ្ជាក់ឲ្យបានច្បាស់នោះឡើយ។

ក្រុមអ្នកសង្កេតការណ៍ បានអះអាង ថា លោក គីម អាចនឹងដឹកជញ្ជូនគ្រាប់រំសេវ ដើម្បីបំពេញឃ្លាំងអាវុធរបស់លោក ពូទីន ដែលស្ទើរតែខ្សោះ អស់ពីកន្លែងស្ដុក ដើម្បីគាំទ្រដល់កិច្ចខិតខំប្រឹងប្រែង ធ្វើសង្គ្រាមរបស់គាត់ នៅក្នុងប្រទេសអ៊ុយក្រែន ជាថ្នូរនឹងការទទួលបានមកវិញនូវបច្ចេកវិទ្យាអាវុធទំនើបៗ និង ជំនួយសេដ្ឋកិច្ច ពីក្រុងមូស្គូ ខណៈក្រុងព្យុងយ៉ាង កំពុងតែប្រឈមមុខនឹងបញ្ហាសេដ្ឋកិច្ចដ៏ធ្ងន់ធ្ងរ។

សហរដ្ឋអាមេរិក កូរ៉េខាងត្បូង និង សម្ពន្ធមិត្ត បានព្រមាន ថា រុស្ស៊ី និង កូរ៉េខាងជើង នឹងត្រូវបង់ថ្លៃការាតបង់ ប្រសិនបើប្រទេសទាំង២នេះ បន្តកិច្ចព្រមព្រៀងលក់គ្រឿងសព្វាវុធ ដោយបំពានទៅលើសេចក្តីសម្រេច នៃក្រុមប្រឹក្សាសន្តិសុខរបស់អង្គការសហប្រជាជាតិ ហាមឃាត់ការធ្វើពាណិជ្ជកម្មអាវុធ ជាមួយនឹងកូរ៉េខាងជើង ខណៈរុស្ស៊ី ជាសមាជិកអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិ ក៏បានបោះឆ្នោតគាំទ្រ លើសេចក្តីសម្រេចរបស់ UNSC ផងដែរ។

ក្រុមអ្នកជំនាញ បានប៉ាន់ប្រមាណ ថា កូរ៉េខាងជើង និង រុស្ស៊ី ទំនងជាបានពិភាក្សាគ្នា អំពីកិច្ចព្រមព្រៀងផ្ទេរគ្រឿងសព្វាវុធ ដែលត្រូវបានហាមឃាត់ និង វិធានការសហប្រតិបត្តិការផ្សេងៗទៀត នៅក្នុងអំឡុងដំណើរទស្សនកិច្ច រយៈពេល៦ថ្ងៃរបស់លោក គីម កាលពីសប្តាហ៍មុន។ ប្រទេសទាំងពីរ បានយកចិត្តទុកដាក់យ៉ាងខ្លាំង ចំពោះការបង្កើនទំនាក់ទំនង រវាងរដ្ឋាភិបាលក្រុងមូស្គូ និង ក្រុងព្យុងយ៉ាង ខណៈប្រទេសទាំង២នេះ កំពុងតែរួមគ្នា ប្រឈមមុខរៀងៗខ្លួន ជាមួយលោកខាងលិច។

កូរ៉េខាងជើង នឹងស្វែងរកជំនួយពីរុស្ស៊ី ដើម្បីបញ្ចប់នូវការអភិវឌ្ឍប្រព័ន្ធអាវុធ ប្រកបដោយបច្ចេកវិទ្យាជាន់ខ្ពស់ ដូចជា ផ្កាយរណបចារកម្ម នាវាមុជទឹក ដើរដោយថាមពលនុយក្លេអ៊ែរ និង មីស៊ីលរយៈចម្ងាយឆ្ងាយដ៏មានឥទ្ធិពល។ បញ្ហានេះ ក៏ដោយសារតែមេដឹកនាំកូរ៉េខាងជើង លោក គីម ចង់ធ្វើឲ្យឃ្លាំងអាវុធរបស់គាត់ កាន់តែទំនើប ដើម្បីទទួលបានសម្បទាន កាន់តែច្រើន ពីសហរដ្ឋអាមេរិក និង កូរ៉េខាងត្បូង នៅក្នុងការចរចាគ្នា៕

ប្រទេសថៃ ៖ វិស័យទេសចរណ៍នៅខេត្តឡាំប៉ាង ប្រទេសថៃបានត្រឡប់មកអ៊ូអរឡើងវិញ ខណៈបច្ចុប្បន្ន ភ្ញៀវទេសចរចិន និងតៃវ៉ាន់បាននាំគ្នាជិះរទេះសេះកម្សាន្តនៅជុំវិញខេត្ត ហើយធ្វើឱ្យពលរដ្ឋថៃក្នុងតំបន់ទទួលបានប្រាក់ចំណូលមិនក្រោម១.០០០បាតក្នុង១ថ្ងៃ សម្រាប់រទេះសេះ១គ្រឿង ។ លើសពីនេះ វាក៏បានជួយជំរុញដល់វិស័យទេសចរណ៍នៅខេត្តឡាំប៉ាង និងសេដ្ឋកិច្ចប្រទេសថៃផងដែរ ។

ពលរដ្ឋថៃជាច្រើននាក់រស់នៅខេត្តឡាំប៉ាងនិយាយថា ពួកគេសប្បាយចិត្តណាស់ ដោយសារភ្ញៀវទេសចរចិនចាប់ផ្តើមធ្វើដំណើរមកកាន់ប្រទេសថៃ ហើយភ្ញៀវទេសចរទាំងនេះបានធ្វើដំណើរមកកាន់បណ្តាខេត្តភាគខាងជើង រួមទាំងខេត្តឡាំប៉ាងផងដែរ ។ ក្រៅពីនេះ នៅមានភ្ញៀវទេសចរតៃវ៉ាន់ជាច្រើននាក់ទៀតបានធ្វើដំណើរមកខេត្តឡាំប៉ាង ដើម្បីជិះរទេះសេះកម្សាន្ត ។

កាលពីថ្ងៃទី១៩ ខែកញ្ញា ឆ្នាំ២០២៣ គេបានឃើញភ្ញៀវទេសចរចិន និងតៃវ៉ាន់ជិះរថយន្តទេសចរណ៍ធ្វើដំណើរពីអាកាសយានដ្ឋានខេត្តឈៀងម៉ៃ ឆ្ពោះមកកាន់ខេត្តឡាំប៉ាង ហើយពួកគេចាប់អារម្មណ៍ជិះរទេះសេះទស្សនាជុំវិញខេត្ត ។ ភ្ញៀវទេសចរចិនជាង១០០នាក់បាននាំគ្នាជិះរទេះសេះជាង៣០គ្រឿងនៅកន្លែងផ្តល់សេវាកម្មរទេះសេះ នៅបរិវេណខាងមុខសារមន្ទីរឡាំប៉ាង ។

ការបង្ហាញមុខរបស់ភ្ញៀវទេសចរចិន និងតៃវ៉ាន់ បានជំរុញឱ្យវិស័យទេសចរណ៍នៅខេត្តឡាំប៉ាងត្រឡប់មកអ៊ូអរឡើងវិញ ហើយធ្វើឱ្យពលរដ្ឋក្នុងតំបន់អាចទទួលបានប្រាក់ចំណូលមិនក្រោម១.០០០បាតក្នុង១ថ្ងៃ សម្រាប់អ្នកមានរទេះសេះ១គ្រឿង ។ ចំណែកភោជនីយដ្ឋាន, ហាងលក់វត្ថុអនុស្សាវរីយ៍ និងហាងលក់របស់របរផ្សេងៗ ក៏ចាប់ផ្តើមលក់ដាច់ដូចគ្នាដែរ ៕ ប្រភព ៖ mgronline

ប្រទេសម៉ាឡេស៊ី ៖ លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ីលើកឡើងថា រដ្ឋាភិបាលនឹងចាប់ផ្តើមអនុវត្តគោលនយោបាយហាមឃាត់ការនាំចេញរ៉ែកម្រទៅក្រៅប្រទេស ដើម្បីចៀសវាងការស្វែងរកផលប្រយោជន៍ និងការពារការបាត់បង់ធនធានធម្មជាតិ ។ គោលនយោបាយនេះធ្វើឱ្យម៉ាឡេស៊ីក្លាយជាប្រទេសចុងក្រោយគេ ដែលហាមឃាត់ការនាំចេញរ៉ែសំខាន់ បើទោះជាប្រទេសនេះពុំបានបង្ហាញថា នឹងអនុវត្តនៅពេលណាក្តី ។

តាមទិន្នន័យរបស់ការិយាល័យស្ទង់មតិភូមិសាស្ត្រអាមេរិក កាលពីឆ្នាំ២០១៩ បង្ហាញថា ប្រទេសម៉ាឡេស៊ីមានបរិមាណរ៉ែកម្រក្នុងចំនួនតិចតួចត្រឹមតែ៣ម៉ឺន Metric Tons ប៉ុណ្ណោះ ខណៈប្រទេសចិនមានបរិមាណរ៉ែកម្ររហូតដល់៤៤លានតោន ។

ទោះយ៉ាងណា ការហាមឃាត់របស់ម៉ាឡេស៊ី ដោយសារទីផ្សារពិភពលោកកំពុងស្វែងរកប្រភពរ៉ែកម្រផ្សេងទៀតក្រៅពីប្រទេសចិន ដើម្បីកាត់បន្ថយការពឹងផ្អែកលើចិនខ្លាំងពេក ខណៈចិនបានផលិតរ៉ែកម្រផ្សេងៗដ៏ធំបំផុតនៅលើពិភពលោក ។ ហេតុនេះ គេបានប្រើប្រាស់វាយ៉ាងទូលំទូលាយនៅក្នុងបន្ទះឈីប Semiconductor, រថយន្តអគ្គិសនី និងសម្ភារៈយោធា ។

លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ីបញ្ជាក់ថា រដ្ឋាភិបាលនឹងគាំទ្រការអភិវឌ្ឍឧស្សាហកម្មរ៉ែពិបាករកនៅម៉ាឡេស៊ី ។ ដូច្នេះ វានឹងផ្តល់លទ្ធផលវិជ្ជមានដល់សេដ្ឋកិច្ចក្នុងប្រទេស ហើយការហាមឃាត់ការនាំចេញរ៉ែទាំងនេះ នឹងទាញយកផលប្រយោជន៍ជាតិខ្ពស់បំផុត ។ ម៉ាឡេស៊ីរំពឹងថា ឧស្សាហកម្មរ៉ែកម្រនឹងមានចំណែកគាំទ្រផលិតផលក្នុងស្រុកសរុប (GDP) រហូតដល់២ពាន់លានដុល្លារអាមេរិកនៅឆ្នាំ២០២៥ ព្រមទាំងផ្តល់ការងារធ្វើប្រមាណ៧.០០០តួនាទី ។

តាមទិន្នន័យរបស់ការិយាល័យគយប្រទេសចិនបង្ហាញថា ការហាមនាំចេញរ៉ែរបស់ម៉ាឡេស៊ីអាចធ្វើឱ្យប៉ះពាល់ដល់ចិន ដែលចិនបាននាំចូលរ៉ែកម្រពីម៉ាឡេស៊ីប្រមាណ៨% ចាប់ពីខែមករា ដល់ខែកក្កដា ឆ្នាំ២០២៣ ។ លើសពីនេះ វានឹងប៉ះពាល់ដល់បណ្តាក្រុមហ៊ុនចិននៅម៉ាឡេស៊ីទៀតផង ។

កាលពីដើមឆ្នាំ២០២៣ ប្រទេសចិនបានប្រកាសរឹតបន្តឹងការនាំចេញលោហៈមួយចំនួន ដែលបានប្រើប្រាស់យ៉ាងទូលំទូលាយក្នុងឧស្សាហកម្ម Semiconductor ហើយត្រូវបានភាគីផ្សេងៗមើលឃើញថា វាជាវិធានការសងសឹកសម្រាប់ការដាក់កម្រិតលក់បច្ចេកវិទ្យារបស់អាមេរិកទៅឱ្យចិន ។ គេបារម្ភថា ចិននឹងដាក់កម្រិតការនាំចេញរ៉ែសំខាន់ៗផ្សេងទៀត រួមទាំងរ៉ែកម្រផងដែរ ៕ ប្រភព ៖ AEC connect

យោងតាមទិន្នន័យនៅខែឧសភា ឆ្នាំ២០២៣ របស់ World Instant Noodles Association បង្ហាញថា ចិន គឺជាប្រទេសដែលបានបរិភោគមីកញ្ចប់ច្រើនបំផុតនៅឆ្នាំ២០២២ គឺស្មើចំនួន៤៥.០៧០លានចាន ហើយវាបានកើនឡើងចំនួន១.០៨០លានចាន បើធៀបនឹងឆ្នាំ២០២១ ដែលស្មើត្រឹមតែ៤៣.៩៩០លានចាន ។ បន្ទាប់មក គឺប្រទេសឥណ្ឌូណេស៊ីបានបរិភោគមីនៅឆ្នាំ២០២២ ស្មើនឹង១៤.២៦០លានចាន ។

ប្រទេសចំនួន១០ ដែលបានបរិភោគមីច្រើនបំផុតលើពិភពលោក ប្រទេសខ្លះពាក់ព័ន្ធនឹងចំនួនពលរដ្ឋជាកត្តាសំខាន់ ហើយប្រទេសឥណ្ឌា ចិន អាមេរិក ឥណ្ឌូណេស៊ី និងប្រេស៊ីល ស្ថិតក្នុងចំណោម១០ប្រទេសដំបូង ដែលមានពលរដ្ឋច្រើនបំផុតលើពិភពលោក ។

ចំណែកប្រទេសថៃស្ថិតក្នុងលំដាប់ទី៩ ក្នុងចំណោមប្រទេសបានបរិភោគមីច្រើនបំផុតនៅឆ្នាំ២០២២ គឺស្មើចំនួន៣.៨៧០លានចាន ។ ចំនួននេះស្របនឹងទីផ្សារមីកញ្ចប់របស់ថៃនៅឆ្នាំ២០២២ ដែលមានតម្លៃប្រមាណ២ម៉ឺនលានបាត កើនឡើង១% ផ្នែកបរិមាណ និងកើនឡើងពី៦% ទៅ៧% ផ្នែកតម្លៃ បើធៀបនឹងឆ្នាំ២០២១ ។

គេរំពឹងថា ទីផ្សារមីកញ្ចប់របស់ថៃនៅឆ្នាំ២០២៣ នឹងរីកចម្រើនជាបន្តបន្ទាប់ផ្នែកតម្លៃ ។ កាលពីថ្ងៃទី២៤ ខែសីហា ឆ្នាំ២០២២ នាយកដ្ឋានពាណិជ្ជកម្មផ្ទៃក្នុងនៃក្រសួងពាណិជ្ជកម្មថៃបានអនុញ្ញាតឱ្យមីកញ្ចប់ចំនួន៣ប្រភេទ គឺម៉ាម៉ា, វ៉ៃវៃ និងយាំយាំ អាចដំឡើងថ្លៃលក់មិនលើសពី១បាតក្នុង១កញ្ចប់ ឬអាចលក់មិនលើសពី៧បាតក្នុង១កញ្ចប់ ។

ប្រទេសបរិភោគមីកញ្ចប់ច្រើនបំផុតលើពិភពលោក រួមមាន ៖
១-ចិន បរិភោគមីកញ្ចប់ចំនួន៤៥.០៧០លានចាន
២-ឥណ្ឌូណេស៊ី បរិភោគមីកញ្ចប់ចំនួន១៤.២៦០លានចាន
៣-វៀតណាម បរិភោគមីកញ្ចប់ចំនួន៨.៤៨០លានចាន
៤-ឥណ្ឌា បរិភោគមីកញ្ចប់ចំនួន៧.៥៨០លានចាន
៥-ជប៉ុន បរិភោគមីកញ្ចប់ចំនួន៥.៩៨០លានចាន
៦-អាមេរិក បរិភោគមីកញ្ចប់ចំនួន៥.១៥០លានចាន
៧-ហ្វីលីពីន បរិភោគមីកញ្ចប់ចំនួន៤.២៩០លានចាន
៨-កូរ៉េខាងត្បូង បរិភោគមីកញ្ចប់ចំនួន៣.៩៥០លានចាន
៩-ថៃ បរិភោគមីកញ្ចប់ចំនួន៣.៨៧០លានចាន
១០-ប្រេស៊ីល បរិភោគមីកញ្ចប់ចំនួន២.៨៣០លានចាន ៕

ប្រភព ៖ beartaiBRIEF

នាពេលបច្ចុប្បន្ន មានតែ៦ប្រទេសប៉ុណ្ណោះនៅលើពិភពលោក ដែលមាននាវាមុជទឹកនុយក្លេអ៊ែរ ក្នុងរួមមាន រុស្សុី ចិន ឥណ្ឌា អង់គ្លេស អាមេរិក និងបារាំង។ ក្រៅពីនេះ ក៏មានប្រទេសប្រេសុីល និងអូស្ត្រាលី ក៏កំពុងចាប់ផ្តើមគម្រោងផលិតនាវាមុជទឹកនុយក្លេអ៊ែរនេះផងដែរ។

ក្នុងចំណោ៦ប្រទេសខាងលើនេះ នាវាមុជទឹកនុយក្លេអ៊ែរ ដែលធំជាងគេបង្អស់ជារបស់ប្រទេសរុស្សុី។ នាវាជ្រមុជទឹកប្រភេទ ថាយហ្វូន (Typhoon) ដ៏ធំមហិមានេះមានចំនួន ៦គ្រឿង។ នាវានីមួយៗមានប្រវែង១៧៥ម៉ែត្រ ហើយមានសមត្ថភាពផ្ទុកមីស៊ីលនុយក្លេអ៊ែរប៉ាលីស្ទិកបានចំនួន ២០គ្រាប់។

នៅក្នុងការតេស្តសាកល្បងមួយ បានឱ្យដឹងគ្រាប់មីស៊ីលនុយក្លេអ៊ែរប៉ាលីស្ទិកនេះ អាចបាញ់ចេញពីរុស្សុី ឬទ្វីបអង់តាក់តិច ដល់ប្រទេសអាមេរិកក្នុងល្បឿនលឿននឹកស្មានមិនដល់។

រាល់ការជ្រមុជទឹកម្ដងៗ វាអាចស្ថិតនៅក្រោមសមុទ្រចំនួន ៣ខែដោយគ្មានបញ្ហា។ ថាយហ្វូន (Typhoon) ត្រូវការនាវិកចំនួន ១៦០នាក់សម្រាប់ការបញ្ជាឱ្យដំណើរការ។ នាវានេះ បានលេចវត្តមានពេញលេញ និងត្រូវដាក់ឲ្យដំណើរការនៅក្នុងឆ្នាំ១៩៨០។បន្ទាប់មករដ្ឋាភិបាលរុស្សុី ធ្លាប់មានគម្រោងធ្វើទំនើបកម្មនាវានេះ សម្រាប់ជំនាន់ទី១ ប៉ុន្តែក្រោយមកក៏ត្រូវលុបចោលវិញនៅក្នុងឆ្នាំ២០១២ ដោយសារតែតម្លៃកែខៃថ្លៃខ្លាំងពេក។

បច្ចុប្បន្ននេះ នាវាមុជទឹកនុយក្លេអ៊ែរ ទាំង៦របស់រុស្សុីនេះ មានតែមួយប៉ុណ្ណោះ ដែលកំពុងធ្វើប្រតិបត្តិការ ដោយ៥ផ្សេងទៀតត្រូវដាក់បញ្ឈរជើងចោល ទុកសម្រាប់ពេលមានស្ថានការចាំបាច់ណាមួយ៕

បរទេស៖ យោងតាមការប្រកាសដោយអង្គការទេសចរណ៍និងសេវាកម្មដែលមានមូលដ្ឋាននៅចក្រភពអង់គ្លេសកាលពីថ្ងៃទី ២០ ខែកញ្ញា បានឱ្យដឹងថា សណ្ឋាគារល្អបំផុតចំនួន ៥០ របស់ពិភពលោកក្នុងឆ្នាំ ២០២៣ ភាគច្រើនគឺស្ថិតនៅអឺរ៉ុបជាមួយនឹងសណ្ឋាគារចំនួន ២១ ដែលស្មើនឹង ៤២%។ រីឯនៅអាស៊ីវិញជាប់ចំណាត់ថ្នាក់លេខ២ មានសណ្ឋាគារចំនួន ១៨ ក្នុងនោះមានសណ្ឋាគារកិត្តិយសចំនួន ៤ នៅទីក្រុងបាងកក ដូចជា Four Seasons, Mandarin Oriental, Capella និង Siam។ ដូច្នេះហើយ បច្ចុប្បន្នទីក្រុងបាងកកគឺជាគោលដៅអាស៊ីដែលមានសណ្ឋាគារល្អបំផុត ស្មើនឹងទីក្រុងប៉ារីស និងទីក្រុងឡុងដ៍។

ចំណែកទិសដៅនៅអាស៊ីផ្សេងទៀតដែលជាប់ចំណាត់ថ្នាក់កំពូលទាំង ៥០ គឺមានហុងកុង (ចិន) ឌូបៃ (អារ៉ាប់រួម) ក្យូតូ និងតូក្យូ (ជប៉ុន) បាលី (ឥណ្ឌូនេស៊ី) អាក្រា (ឥណ្ឌា) និងស្រីលង្កា រួមជាមួយសិង្ហបុរី។
ទោះជាយ៉ាងណាក៏ដោយ ចំណាត់ថ្នាក់កំពូលនៃបញ្ជីសណ្ឋាគារល្អបំផុតរបស់ពិភពលោកក្នុងឆ្នាំនេះគឺបានទៅលើសណ្ឋាគារ Passalacqua ដែលមានទេសភាពនៃបឹង Como ប្រទេសអ៊ីតាលី ហើយនេះក៏ជាលើកដំបូងដែលសណ្ឋាគារនេះបានឈ្នះពានរង្វាន់ន់ដំបូងផងដែរ។ Passalacqua បានបើកដំណើរការនៅខែមិថុនា ឆ្នាំ ២០២២ ដោយបានតុបតែងលម្អយ៉ាងប្រណីតនៅក្នុងរចនាប័ទ្មជាហាងមួយ។

៥០ Best Hotels គឺជាចំណាត់ថ្នាក់ប្រចាំឆ្នាំដែលធ្វើឡើងដោយក្រុមហ៊ុនឈានមុខគេរបស់ពិភពលោកក្នុងការផ្តល់នូវបញ្ជីភោជនីយដ្ឋាន និងបារដែលមានបទពិសោធន៍ជាង ២០ ឆ្នាំ។ គិតត្រឹមឆ្នាំ ២០២៣ នេះគឺជាឆ្នាំទី ១៩ ហើយដែលពានរង្វាន់សណ្ឋាគារល្អបំផុតចំនួន ៥០ ត្រូវបានប្រគល់ជូន។ បញ្ជីនេះផ្តល់កិត្តិយសដល់សណ្ឋាគារដែលផ្តល់នូវបទពិសោធន៍ភ្ញៀវល្អបំផុត ដែលត្រូវបានបោះឆ្នោតជ្រើសរើសដោយក្រុមអ្នកដឹកនាំឧស្សាហកម្មសណ្ឋាគារអនាមិកចំនួន ៥៨០ អ្នកកាសែតទេសចរណ៍ និងអ្នកធ្វើដំណើរប្រណីត៕
ប្រភព៖vnexpress