បរទេស៖ យោងតាមសារព័ត៌មាន South China Morning Post (SCMP) បានឱ្យដឹងថា ប្រទេសចិនគ្រោងបាញ់បង្ហោះផ្កាយរណបដោយបំពាក់ខួរក្បាលបញ្ញាសិប្បនិមិត្ត (AI) ក្នុងគោលបំណងនៃការបង្កើតយានអវកាសដែលអាចគ្រប់គ្រងដោយខ្លួនឯងបាន និងជួយឆ្លើយតបទៅនឹងភាពអាសន្នដែលអនុញ្ញាតឱ្យផ្កាយរណបជូនដំណឹងភ្លាមៗដល់អ្នកអវកាសនិកអំពីគ្រោះមហន្តរាយដូចជាការរអិលបាក់ដី ការដួលរលំផ្លូវ ឬតំបន់ដែលរងផលប៉ះពាល់ដោយព្យុះនៅក្នុងលំហ។

លោក Wang Chunhui ដែលជាសហស្ថាបនិក និងជាប្រធានផ្នែកបច្ចេកវិទ្យារបស់ក្រុមហ៊ុនបាននិយាយថា គម្រោងបំពាក់ខួរក្បាល AI (WJ-1A) គឺជាផ្កាយរណបដំបូងរបស់ប្រទេសចិនដែលមានប្រព័ន្ធប្រតិបត្តិការដ៏ឆ្លាតវៃបំផុត នឹងត្រូវបានដាក់ឱ្យដំណើរការក្នុងពេលឆាប់ៗនេះ ។ លោក Wang បានបន្តទៀតថា WJ-1A មានសមត្ថភាពពិសេសក្នុងការគ្រប់គ្រងទិន្នន័យបានភ្លាមៗដើម្បីវិភាគ និងណែនាំ នៅពេលដែលផ្កាយរណបស្ថិតក្នុងគន្លងតារាវិថី។

យោងតាមការបញ្ជាក់របស់ក្រុមហ៊ុន ផ្កាយរណប AI អាចវិភាគលើផ្ទៃដី ១០,០០០ គីឡូម៉ែត្រការ៉េ និងធ្វើការតាមដានវត្ថុថាមវន្តក្នុងរយៈពេលតែប៉ុន្មានម៉ោងប៉ុណ្ណោះ ខណៈដែលផ្កាយរណបប្រពៃណីជាធម្មតាត្រូវការប្រហែល ១៨០ ថ្ងៃសម្រាប់កិច្ចការស្រដៀងគ្នា។ ដូចនេះបច្ចុប្បន្ន ក្រុមហ៊ុនកំពុងធ្វើការជាមួយដៃគូរួមទាំងទីភ្នាក់ងារអវកាស Rwandan និងសាកលវិទ្យាល័យ Sultan Qaboos ក្នុងប្រទេស Oman ដើម្បីស្វែងយល់ពីលទ្ធភាពថ្មីៗនៅក្នុងក្បួនដោះស្រាយដែលបានអនុវត្ត និងជួយពួកគេបណ្តុះបណ្តាលទេពកោសល្យក្នុងវិស័យ AI ។
ក្រុមហ៊ុនក៏មានគម្រោងពង្រីកបណ្តាញ WonderJourney ដល់ផ្កាយរណបចំនួន ២០ នៅចុងឆ្នាំ ២០២៤ ដោយសហការជាមួយដៃគូរបស់ក្រុមហ៊ុន ដើម្បីបង្កើនការគ្របដណ្តប់ និងប្រសិទ្ធភាពទំនាក់ទំនងសាកល៕ ប្រភព៖cafef.com

ប្រទេសថៃ ៖ កាលពីថ្ងៃទី២១ ខែសីហា ឆ្នាំ២០២៣ លោក Chaiwut Thanakmanusorn រដ្ឋមន្ត្រីក្រសួងសេដ្ឋកិច្ច និងសង្គមឌីជីថលប្រទេសថៃ លើកឡើងថា ក្រសួងនឹងដាក់ពាក្យបណ្តឹងទៅតុលាការដើម្បីស្នើឱ្យបិទការប្រើប្រាស់ហ្វេសប៊ុកនៅប្រទេសថៃ ។ ចំពោះមូលហេតុការស្នើសុំបិទហ្វេសប៊ុក ដោយសារកន្លងមក ហ្វេសប៊ុកបានទទួលប្រាក់ការផ្សាយពាណិជ្ជកម្មពីគេហទំព័រក្លែងក្លាយ ដែលពួកគេតែងបញ្ចុះបញ្ចូលឱ្យពលរដ្ឋថៃវិនិយោគទុន រហូតធ្វើឱ្យពលរដ្ឋថៃជាច្រើននាក់ខាតបង់ប្រាក់រាប់លានបាត ។ តាមស្ថិតិបង្ហាញថា ការបញ្ចុះបញ្ចូលឱ្យវិនិយោគក្នុងបណ្តាញសង្គមស្មើប្រមាណជាង៧០% គឺជាការបោកប្រាស់តាមហ្វេសប៊ុក និង៩០% គឺជាការលក់ផលិតផលតាមអនឡាញបោកប្រាស់ ។

លោក Chaiwut បន្តថា កន្លងមក ក្រុមហ៊ុនហ្វេសប៊ុកបានទទួលប្រាក់ពីគេហទំព័រក្លែងក្លាយទាំងនេះ ហើយគ្មានការត្រួតពិនិត្យថា តើគេហទំព័រទាំងនេះត្រឹមត្រូវតាមច្បាប់ ឬក្លែងក្លាយ ប៉ុន្តែហ្វេសប៊ុកបណ្តោយឱ្យគេហទំព័រក្លែងក្លាយបញ្ចុះបញ្ចូលពលរដ្ឋថៃជាច្រើននាក់ ។ បើទោះជាកន្លងមក ក្រសួងសេដ្ឋកិច្ច និងសង្គមឌីជីថលបានប្រមូល URLs ដើម្បីស្នើសុំបិទការប្រើប្រាស់ហ្វេសប៊ុក ប៉ុន្តែពួកគេបានសុំបើកគេហទំព័រឡើងវិញ ហើយវាដូចគ្នានឹងសត្វឆ្មាដេញចាប់កណ្តុរ តែមិនចេះអស់សោះ ។

លោក Chaiwut បន្ថែមថា ក្រសួងនឹងណែនាំឱ្យអ្នកដែលត្រូវគេបោកប្រាស់ទាំងអស់ដាក់ពាក្យបណ្តឹងគេហទំព័រក្លែងក្លាយទាំងរឿងរដ្ឋប្បវេណី និងព្រហ្មទណ្ឌ ហើយក្រសួងនឹងទំនាក់ទំនងទៅសមត្ថកិច្ចដើម្បីប្រមូលភស្តុតាង និងដាក់ពាក្យបណ្តឹងទៅតុលាការ ស្នើឱ្យក្រុមហ៊ុនហ្វេសប៊ុកឈប់ផ្តល់សេវាកម្មនៅប្រទេសថៃបន្តទៀត ។ វាបានរំលោភច្បាប់ឧក្រិដ្ឋកម្មកុំព្យូទ័រ ដោយសារហ្វេសប៊ុកបានសហការជាមួយជនល្មើស ហើយទទួលប្រាក់ផ្សាយពាណិជ្ជកម្មពីជនល្មើសទាំងនេះ ។

លោក Chaiwut បញ្ជាក់ថា ការស្នើសុំបិទហ្វេសប៊ុកនៅប្រទេសថៃ គឺជាការធ្វើតាមតួនាទី ព្រោះកន្លងមក លោកបានប្រទះឃើញការទិញពាណិជ្ជកម្មដើម្បីបោកប្រាស់ពលរដ្ឋថៃយ៉ាងច្រើន ។ ក្រសួងនឹងដំណើរការនៅខែសីហា ឆ្នាំ២០២៣ បន្ទាប់មក តុលាការនឹងសម្រេចថា តើនឹងបិទហ្វេសប៊ុកដែរឬទេ ព្រោះនេះជាអំណាចរបស់តុលាការ ចំណែករឿងថា តើវានឹងប៉ះពាល់ដល់សិទ្ធិអ្នកប្រើប្រាស់ទូទៅដែរឬអត់នោះ គឺត្រូវឱ្យតុលាការជាអ្នកពិចារណា ។ លោកសុំបំពេញតួនាទីជារដ្ឋមន្ត្រីក្រសួងសេដ្ឋកិច្ចដំបូងគេ ដែលប្តឹងហ្វេសប៊ុក ព្រោះក្រុមហ៊ុននេះបានរួមគ្នាប្រព្រឹត្តល្មើសជាមួយជនខិលខូច ហើយវាជាការងារចុងក្រោយផងដែរ មុននឹងលោកចុះចេញពីតំណែងជារដ្ឋមន្ត្រី ៕ ប្រភព ៖ sanook

គេហទំព័ររបស់ស្ថានីយទូរទស្សន៍ CNN បានផ្សព្វផ្សាយពីលទ្ធផលការស្រាវជ្រាវថ្មីមួយ ដែលបានចុះផ្សាយក្នុងទស្សនាវដ្តី PLOS Climate បង្ហាញថា ពលរដ្ឋអាមេរិកប្រមាណ១០% ដែលមានទ្រព្យសម្បត្តិច្រើនបំផុត គឺមានចំណែកធ្វើឱ្យពិភពលោកក្តៅនៅអាមេរិក រហូតដល់៤០% ។ អ្នកមានទ្រព្យសម្បត្តិទាំងនេះ មិនត្រឹមតែធ្វើឱ្យពិភពលោកក្តៅតាមរយៈទ្រព្យសម្បត្តិដូចជា រថយន្ត ឬយន្តហោះរបស់ពួកគេប៉ុណ្ណោះទេ ប៉ុន្តែប្រេងឥន្ធនៈហ្វូស៊ីល ក៏បានធ្វើឱ្យពិភពលោកក្តៅផងដែរ ដោយសារអ្នកមានទ្រព្យសម្បត្តិច្រើនទាំងនេះវិនិយោគទុន ។

អ្នកធ្វើការស្រាវជ្រាវបានអំពាវនាវឱ្យស្ថាប័នរដ្ឋាភិបាលផ្តោតលើការប្រមូលពន្ធការវិនិយោគណាដែលបង្កឱ្យមានជាតិពុលដល់បរិយាកាស ។ Jared Starr អ្នកវិទ្យាសាស្ត្រមកពីសាកលវិទ្យាល័យ Massachusetts Amherst និងជាអ្នកស្រាវជ្រាវអត្ថបទនេះលើកឡើងថា អាកាសធាតុក្តៅអាចជារឿងធំ និងរីករាលដាលនៅពាសពេញពិភពលោក ខណៈមនុស្សទូទៅគិតថា ការដោះស្រាយបញ្ហាពិភពលោកក្តៅ គឺហួសពីសមត្ថភាព និងការគ្រប់គ្រងរបស់មនុស្ស ។ ហេតុនេះ មនុស្សទាំងអស់មានចំណែកធ្វើឱ្យពិភពលោកក្តៅ បើមិនតិច ក៏ច្រើនដែរ ។

ការសិក្សាបង្ហាញថា ១០% នៃអ្នកមានទ្រព្យសម្បត្តិច្រើនបំផុតនៅអាមេរិក ឬគ្រួសារដែលមានប្រាក់ចំណូលជាង១៧ម៉ឺន៨ពាន់ដុល្លារអាមេរិកក្នុង១ខែ គឺជាអ្នកទទួលខុសត្រូវប្រមាណ៤០% នៃការបំពុលបរិយាកាសទាំងអស់ ដែលបណ្តាលមកពីការឡើងកំដៅផែនដីដោយសារការប្រព្រឹត្តរបស់មនុស្ស ។ ចំណែកគ្រួសាររកប្រាក់ចំណូលបានជាង៥៥ម៉ឺនដុល្លារអាមេរិកក្នុង១ខែ ពួកគេមានចំណែកធ្វើឱ្យពិភពលោកក្តៅ ចាប់ពី១៥% ទៅ១៧% ។

លើសពីនេះ ផលប៉ះពាល់នៃអាកាសធាតុក្តៅ មិនត្រឹមតែពាក់ព័ន្ធនឹងប្រាក់ចំណូលប៉ុណ្ណោះទេ ប៉ុន្តែវាពាក់ព័ន្ធនឹងផ្នែកឧស្សាហកម្មផងដែរ ។ បើតាមរបាយការណ៍បញ្ជាក់ថា គ្រួសារមានប្រាក់ចំណូលចំនួន៩៨ម៉ឺនដុល្លារអាមេរិកក្នុង១ខែពីឧស្សាហកម្មប្រេងឥន្ធនៈហ្វូស៊ីលមួយចំនួន ត្រូវបានចាត់ទុកថា គឺជា Super-Emitter ។ ចុងក្រោយ អ្នកស្រាវជ្រាវបានស្នើឱ្យស្វែងរកវិធីថ្មីៗដើម្បីដោះស្រាយបញ្ហាវិបត្តិអាកាសធាតុ ៕ ប្រភព ៖ The standard

ឥណ្ឌា៖ អង្គការស្រាវជ្រាវអវកាសឥណ្ឌា (ISRO) បានប្រកាសថា បេសកកម្ម Chandrayaan-៣ ត្រូវបានគេរំពឹងថានឹងចុះចតលើឋានព្រះច័ន្ទនៅម៉ោង ៧:៣៤ នាទី នាថ្ងៃទី ២៣ ខែសីហានេះ។
ISRO បាននិយាយនៅថ្ងៃទី ២០ ខែសីហាថាដំណើរការចុះចតនឹងត្រូវបានផ្សាយបន្តផ្ទាល់នៅលើគេហទំព័រផ្លូវការរបស់អង្គការ ប៉ុស្តិ៍ទូរទស្សន៍ជាតិរបស់ប្រទេសឥណ្ឌា Doordarshan និងបណ្តាញទំនាក់ទំនងសង្គមជាច្រើនដូចជា Facebook និង YouTube។

ការរុករកអវកាសរបស់ឥណ្ឌាបានឈានដល់ដំណាក់កាលគួរឱ្យកត់សម្គាល់ជាមួយនឹងបេសកកម្ម Chandrayaan-៣ នាពេលខាងមុខ ដោយបានត្រៀមលក្ខណៈដើម្បីចុះចតយ៉ាងទន់ភ្លន់លើផ្ទៃព្រះច័ន្ទ។ សមិទ្ធិផលនេះនឹងបង្ហាញពីការបោះជំហានទៅមុខដ៏សំខាន់មួយសម្រាប់វិទ្យាសាស្រ្ត វិស្វកម្ម បច្ចេកវិទ្យា និងឧស្សាហកម្មនៃប្រទេសឥណ្ឌា ដែលជានិមិត្តរូបនៃភាពជឿនលឿនរបស់ប្រទេសក្នុងវិស័យរុករកអវកាស។

យានអវកាស Chandrayaan-៣ ផ្ទុកឧបករណ៍វិទ្យាសាស្ត្រចំនួនបួន រួមទាំងឧបករណ៍ស្ទង់កម្ដៅ ដែលមានសមត្ថភាពជ្រាបចូលទៅក្នុងដីប្រហែល ១០ សង់ទីម៉ែត្រ និងកត់ត្រាសីតុណ្ហភាពនៃដី និងថ្មពេញមួយថ្ងៃតាមពេលវេលា។ Chandrayaan-៣ ក៏ត្រូវបានបំពាក់ដោយឧបករណ៍ឆ្លុះបញ្ច្រាស់ដែលត្រូវបានគេរំពឹងថានឹងមានប្រសិទ្ធភាពយូរបន្ទាប់ពីអ្នកចុះចតត្រូវបានបញ្ឈប់។ ទន្ទឹមនឹងនេះ មនុស្សយន្ត Pragyan ផ្ទុកនូវ Laser Emission Spectrometer (LIBS) និង Alpha Particle X-ray Spectrometer (APXS) ដើម្បីសិក្សាពីផ្ទៃទឹកកកនៅលើឋានព្រះច័ន្ទផងដែរ៕ ប្រភព៖vnexpress

រដ្ឋធានីស៊េអូល៖ មេដឹកផ្ដាច់ការកូរ៉េខាងជើង បានចុះទៅត្រួតពិនិត្យការបាញ់មីស៊ីលគ្រូស ដោយផ្ទាល់ ចំពេលកងទ័ពសហរដ្ឋអាមេរិក និង កូរ៉េខាងត្បូង កំពុងតែចាប់ផ្ដើម ធ្វើសមយុទ្ធយោធា នៅក្នុងប្រទេសអាស៊ីបូព៌ា ដែលជាសម្ពន្ធមិត្តដ៏ជិតស្និទ្ធមួយរបស់ក្រុងវ៉ាស៊ីនតោន។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃចន្ទ ទី២១ ខែសីហា ថា លោក គីម ជុងអ៊ុន (Kim Jong Un) មេដឹកនាំកូរ៉េខាងជើង បានត្រួតពិនិត្យនូវការបាញ់សាកល្បងកាំជ្រួច នាវាជាយុទ្ធសាស្ត្រ ដោយផ្ទាល់ ខណៈកូរ៉េខាងត្បូង និ ងសហរដ្ឋអាមេរិក កំពុងតែចាប់ផ្តើមធ្វើសមយុទ្ធយោធាប្រចាំឆ្នាំ អ្វីដែលរដ្ឋាភិបាលក្រុងព្យុងយ៉ាង ចោទប្រកាន់ ថា ជាការហាត់សម សម្រាប់សង្គ្រាមឈ្លានពាន។

ទីភ្នាក់ងារព័ត៌មាន គ្រប់គ្រងដោយរដ្ឋកូរ៉េខាងជើង KCNA បានរាយការណ៍ កាលពីថ្ងៃចន្ទ ថា ការធ្វើតេស្តបាញ់មីស៊ីលនេះ បានកើតឡើង ស្របពេលលោក គីម បានទៅត្រួតពិនិត្យមើលអង្គភាពកងទ័ពជើងទឹក នៅឆ្នេរសមុទ្រភាគខាងកើត ជាទីកន្លែងដែលគាត់ត្រូវបានគេថតរូបឈរនៅលើនាវា ដែលអមដោយដោយមន្ត្រីជាច្រើន។

បើទោះជាយ៉ាងណា ទីភ្នាក់ងារសារព័ត៌មាន KCNA មិនបានបញ្ជាក់ អំពីកាលបរិច្ឆេទ នៃការធ្វើដំណើររបស់មេដឹកនាំ គីម ឬ ការលម្អិតព័ត៌មាន ជុំវិញមីស៊ីលរបស់កូរ៉េខាងជើងនោះឡើយ។

សមាជិកសភាកូរ៉េខាងត្បូង កាលពីសប្តាហ៍មុន បានព្រមាន ថា រដ្ឋាភិបាលក្រុងព្យុងយ៉ាង អាចព្យាយាមបាញ់មីស៊ីលផ្លោងអន្តរទ្វីប ឬ ធ្វើសកម្មភាពយោធាផ្សេងៗទៀត ដើម្បីតវ៉ាប្រឆាំងនឹងការធ្វើសមយុទ្ធ ឬ កិច្ចប្រជុំកំពូលមិនធ្លាប់មានពីមុនមករបស់មេដឹកនាំកូរ៉េខាងត្បូង សហរដ្ឋអាមេរិក និង ជប៉ុន។

សារព័ត៌មាន Al Jazeera បានចេញផ្សាយ កាលពីថ្ងៃសៅរ៍ ទី១៩ ខែសីហា ថា ប្រធានាធិបតីសហរដ្ឋអាមេរិក និង កូរ៉េខាងត្បូង ហើយនាយករដ្ឋមន្រ្ដីជប៉ុន បានជួប្រជុំកំពូលត្រីភាគី ដោយបានប្រកាស អំពីវិធានការជាបន្តបន្ទាប់ នៅក្នុងគោលបំណងជំរុញកិច្ចសហប្រតិបត្តិការ នៅក្នុងកិច្ចប្រជុំកំពូល ជាប្រវត្តិសាស្ត្រ នៅជិតរដ្ឋធានីក្រុងវ៉ាស៊ីនតោន។

ព្រឹត្ដិការណ៍ នៅឯ Camp David របស់ប្រធានាធិបតីអាមេរិក កាលពីថ្ងៃសុក្រ បានកត់សម្គាល់ជាកិច្ចប្រជុំផ្លូវការលើកដំបូង រវាងលោក ចូ បៃដិន (Joe Biden) ប្រធានាធិបតីសហរដ្ឋអាមេរិក និង សមាភាគីកូរ៉េខាងត្បូង លោក យូន ស៊ូក-យូល (Yoon Suk-yeol) ហើយនាយករដ្ឋមន្រ្ដីជប៉ុន លោក ហ៊្វូមីអូ គីស៊ីដា (Fumio Kishida)។

កិច្ចប្រជុំកំពូលរបស់មេដឹកនាំសហរដ្ឋអាមេរិក និង សម្ពន្ធមិត្តដ៏ជិតស្និទ្ធ នៅតំបន់អាស៊ីបូព៌ានេះ បានកើតឡើង ចំពេលទំនាក់ទំនង រវាងកូរ៉េខាងត្បូង និង ជប៉ុន កាន់តែយ៉ាប់យ៉ឺន ហើយចំពេលប្រទេសទាំង៣ មានការព្រួយបារម្ភ កាន់តែខ្លាំងឡើង ពាក់ព័ន្ធនឹងរដ្ឋាភិបាលក្រុងប៉េកាំង កំពុងតែទាមទារយ៉ាងខ្លាំង នៅក្នុងតំបន់អាស៊ី-ប៉ាស៊ីហ្វិក ក៏ដូចជា ការបាញ់សាកល្បងកាំជ្រួចរបស់កូរ៉េខាងជើង កាលពីពេលថ្មីៗកន្លងទៅនេះ៕

ប្រទេសថៃ ៖ លើកនេះអាចជាការពិតសម្រាប់ការធ្វើដំណើរត្រឡប់មកប្រទេសថៃរបស់អតីតនាយករដ្ឋមន្ត្រីថៃ លោក Thaksin Shinawatra ក្រោយពីអ្នកនាង Paethongthan Shinawatra កូនស្រីរបស់អតីតនាយករដ្ឋមន្ត្រីថៃរូបនេះ និងជាបេក្ខជននាយករដ្ឋមន្ត្រីរបស់គណបក្សភឿថៃ បានបញ្ជាក់តាមបណ្តាញសង្គមថា អ្នកនាងត្រៀមខ្លួនទៅទទួលឪពុករបស់នាង នៅអាកាសយានដ្ឋានដនមឿង នៅថ្ងៃទី២២ ខែសីហា ឆ្នាំ២០២៣ ។

នៅថ្ងៃត្រឡប់មកកាន់មាតុប្រទេសរបស់លោក Thaksin គឺត្រូវគ្នានឹងថ្ងៃកិច្ចប្រជុំរដ្ឋសភាដើម្បីបោះឆ្នោតជ្រើសរើសនាយករដ្ឋមន្ត្រីប្រទេសថៃ ក្នុងនោះគណបក្សភឿថៃបានត្រៀមបញ្ជូនឈ្មោះលោក Srettha Thavisin ធ្វើជាបេក្ខជននាយករដ្ឋមន្ត្រីផងដែរ ។

គេមិនអាចបដិសេធបានថា ការត្រឡប់មកកាន់ប្រទេសថៃលើកនេះរបស់លោក Thaksin នឹងគ្មានឥទ្ធិពលដល់នយោបាយថៃ ព្រោះពេលមុននេះ អ្នកនាង Paethongthan ធ្លាប់លើកឡើងថា ឪពុករបស់នាងនឹងត្រឡប់មកប្រទេសថៃ នៅពេលសភាពការណ៍នយោបាយក្នុងប្រទេសស្ងប់ស្ងាត់ ។ ដូច្នេះ ការលើកឡើងបែបនេះបង្ហាញថា នយោបាយនៅប្រទេសថៃនឹងមានស្ថេរភាពស្ថិតក្រោមការគ្រប់គ្រងរបស់រដ្ឋាភិបាលគណបក្សភឿថៃ ។

ការបង្កើតរដ្ឋាភិបាលរបស់គណបក្សភឿថៃ បានធ្វើឱ្យគ្រួសារត្រកូល Shinawatra មានទំនុកចិត្តយ៉ាងខ្លាំង ព្រោះកុំភ្លេចថា លោក Thaksin នឹងត្រូវជាប់ពន្ធនាគារតាមសាលក្រមរបស់តុលាការកំពូល ចំនួន៣ករណីផ្សេងៗគ្នា រួមមាន ៖
១-ករណីចេញលេខឆ្នោត២ខ្ទង់ និង៣ខ្ទង់ (ត្រូវបានតុលាការផ្តន្ទាទោសដាក់ពន្ធនាគារចំនួន២ឆ្នាំ)
២-ករណីឱ្យធនាគារសម្រាប់ការនាំចេញ និងនាំចូលប្រទេសថៃ ផ្តល់ប្រាក់កម្ចី៤.០០០លានបាតឱ្យរដ្ឋាភិបាលមីយ៉ាន់ម៉ា (ត្រូវបានតុលាការផ្តន្ទាទោសដាក់ពន្ធនាគារចំនួន៣ឆ្នាំ)
៣-ករណីកែប្រែកិច្ចសន្យាសម្បទានទូរគមនាគមន៍ធ្វើជាពន្ធអាករ ដែលផ្តល់ប្រយោជន៍ដល់អាជីវកម្ម (ត្រូវបានតុលាការផ្តន្ទាទោសដាក់ពន្ធនាគារចំនួន៥ឆ្នាំ)

សរុបមក លោក Thaksin មានទោសជាប់ពន្ធនាគាររយៈពេល១០ឆ្នាំ ។ ប៉ុន្តែគេជឿថា លោក Thaksin អាចប្រើសិទ្ធិលើកលែងមាត្រា៩៥ ដើម្បីស្នើសុំឱ្យតុលាការពិចារណាករណីនេះដោយហេតុផលសមរម្យ ព្រោះតុលាការចោទប្រកាន់លោក Thaksin ថា បានប្រព្រឹត្តខុសក្នុងអំឡុងពេលលោកធ្វើជានាយករដ្ឋមន្ត្រីថៃ ។ ហេតុនេះ ការត្រឡប់មកប្រទេសថៃរបស់លោក Thaksin គឺជាចំណុចផ្លាស់ប្តូរសំខាន់នៃនយោបាយថៃ ។

ទោះយ៉ាងណា ក្រោយពីលោក Thaksin ចាកចេញពីអាកាសយានដ្ឋានដនមឿង ពិតណាស់ថា លោកមានឋានៈជា «អ្នកទោសរត់គេចខ្លួន» ហេតុនេះ លោកត្រូវជាប់ពន្ធនាគារ លោកមិនអាចត្រឡប់ទៅផ្ទះបានទេ ហើយគ្រប់យ៉ាងត្រូវតែអនុវត្តតាមនីតិវិធីតុលាការ ។

លោក Wissanu Kruea-ngam ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌ លើកឡើងថា លោកមិនទាន់ទទួលបានការរាយការណ៍ពីក្រសួងជាផ្លូវការទេ ដូច្នេះ លោកមិនជ្រាបព័ត៌មាននេះទេ ។ ប៉ុន្តែប្រសិនបើលោក Thaksin បានធ្វើដំណើរមកដល់ប្រទេសថៃ និងចុះយន្តហោះនៅដនមឿង តុលាការនឹងដំណើរការរឿងក្តីលោកតាមធម្មតា គឺដូចគ្នានឹងជនជាប់ចោទផ្សេងទៀតដែរ ហើយលោក Thaksin នឹងត្រូវទទួលការថែទាំពិសេស ព្រមទាំងមានការត្រួតពិនិត្យសុខភាព មុននឹងបញ្ជូនទៅកាន់ពន្ធនាគារ ៕ ប្រភព ៖ mgronline