ប្រទេសវៀតណាម ៖ សារព័ត៌មានវៀតណាមចុះផ្សាយថា ទីក្រុងហាណូយបានពិចារណាកែលម្អវិធីព្យាបាលអ្នកជំងឺក្នុងមន្ទីរពេទ្យឈានមុខនៅប្រទេសវៀតណាម ដើម្បីកាត់បន្ថយចំនួនអ្នកជំងឺនៅវៀតណាមធ្វើដំណើរទៅក្រៅប្រទេស និងទាក់ទាញអ្នកជំងឺបរទេសមកព្យាបាលនៅវៀតណាមឱ្យបានច្រើន ។

ក្រសួងសុខាភិបាលវៀតណាមបានធ្វើគម្រោងអភិវឌ្ឍន៍ការថែទាំសុខភាពដោយប្រើប្រាស់បច្ចេកវិទ្យាទំនើប ដើម្បីព្យាបាលអ្នកជំងឺនៅប្រទេសវៀតណាម ក៏ដូចជាទាក់ទាញអ្នកជំងឺពីបរទេស និងពលរដ្ឋវៀតណាមដែលរស់នៅក្រៅប្រទេសឱ្យធ្វើដំណើរមកវៀតណាមដើម្បីត្រួតពិនិត្យសុខភាព និងព្យាបាលជំងឺ ។ នេះបើយោងតាមការចុះផ្សាយរបស់សារព័ត៌មានវៀតណាម ។

មន្ទីរពេទ្យបង្អែកចំនួន៥ រួមទាំងមន្ទីរពេទ្យនាំមុខគេនៅប្រទេសវៀតណាមបានទទួលសំណើឱ្យធ្វើការកែលម្អមន្ទីរពេទ្យ រួមមាន មន្ទីរពេទ្យ Bach Mai, មន្ទីរពេទ្យ Viet Duc, មន្ទីរពេទ្យ 108 Central Military នៅទីក្រុងហាណូយ, មន្ទីរពេទ្យ Cho Ray នៅទីក្រុងហូជីមិញ និងមន្ទីរពេទ្យ Hue Central នៅខេត្តធឿថៀនវ៉េ ។

ប្រធាននាយកដ្ឋានពេទ្យលើកឡើងថា ចំណុចល្អមួយនៃការថែទាំសុខភាពរបស់វៀតណាម គឺអ្នកជំងឺចំណាយប្រាក់តិចជាងគេ បើធៀបនឹងប្រទេសផ្សេងៗនៅតំបន់អាស៊ីអាគ្នេយ៍ ។ សេវាកម្មផ្នែកវេជ្ជសាស្ត្រនៅវៀតណាមដូចជា ការវះកាត់ដោយកាមេរ៉ា Endoscope, ការព្យាបាលជំងឺបេះដូង និងសរសៃឈាម, ការដាក់ធ្មេញប៉សឺឡែន គឺអ្នកជំងឺអាចចំណាយប្រាក់ព្យាបាលត្រឹមតែពាក់កណ្តាលប៉ុណ្ណោះ បើធៀបនឹងការចំណាយប្រាក់ព្យាបាលនៅប្រទេសផ្សេងៗ ។

របាយការណ៍បញ្ជាក់ថា កាលពីឆ្នាំ២០១៧ ពលរដ្ឋវៀតណាមបានចំណាយប្រាក់ជាច្រើនដើម្បីធ្វើដំណើរទៅព្យាបាលជំងឺនៅក្រៅប្រទេស ហើយភាគច្រើន ពួកគេធ្វើដំណើរទៅប្រទេសសិង្ហបុរី, ថៃ និងកូរ៉េខាងត្បូង ៕ ប្រភព ៖ mgronline

ប្រទេសចិន ៖ ប្រទេសចិនបានបើកភ្លើងខៀវសម្រាប់អ្នកដំណើរចូលប្រទេសរបស់ខ្លួន គឺមិនចាំបាច់ពិនិត្យជំងឺកូវីដទៀតទេ ហើយអនុវត្តចាប់ពីថ្ងៃទី៣០ ខែសីហា ឆ្នាំ២០២៣ តទៅ ។ ការប្រកាសលុបចោលការពិនិត្យជំងឺកូវីដនេះ គឺជាការបញ្ចប់វិធានការរឹតបន្តឹងការធ្វើដំណើរដែលចិនបានអនុវត្តអស់រយៈពេលជាង៣ឆ្នាំ ។

កាលពីថ្ងៃទី២៨ ខែសីហា ឆ្នាំ២០២៣ លោក Wang Wen Bin អ្នកនាំពាក្យក្រសួងការបរទេសថ្លែងថា ចិននឹងមិនបង្ខំឱ្យអ្នកដំណើរចូលប្រទេសចិនត្រូវបង្ហាញភស្តុតាងការពិនិត្យជំងឺកូវីដមានលទ្ធផលអវិជ្ជមានទៀតទេ ។ ចិននឹងចាប់ផ្តើមលុបចោលវិធានការពិនិត្យជំងឺកូវីដមុនចូលប្រទេស ចាប់ពីថ្ងៃទី៣០ ខែសីហា តទៅ ។ ចំណែកសារព័ត៌មាន AP ចុះផ្សាយថា ការលុបចោលវិធានការបង្ហាញលទ្ធផលពិនិត្យជំងឺកូវីដលើកនេះ គឺជាជំហានដ៏សំខាន់ដើម្បីបញ្ចប់វិធានការតឹងតែងពាក់ព័ន្ធនឹងជំងឺនេះ ដែលចិនបានអនុវត្តតាំងពីឆ្នាំ២០២០ ។

ប្រទេសចិនបានលុបចោលវិធានការកូវីដស្មើសូន្យកាលពីខែធ្នូ ឆ្នាំ២០២២ ក្រោយពីចិនអនុវត្តវិធានការនេះយ៉ាងតឹងតែងអស់រយៈពេលជាច្រើនឆ្នាំ ហើយពេលខ្លះ ចិនត្រូវបិទប្រទេសទាំងស្រុង និងដាក់ឱ្យអ្នកឆ្លងជំងឺកូវីដនៅដាច់ដោយឡែករយៈពេលយូរ ។ ហេតុនេះ អ្នកធ្វើដំណើរចូលប្រទេសចិនចាំបាច់ត្រូវនៅដាច់ដោយឡែកក្នុងសណ្ឋាគារជាច្រើនសប្តាហ៍តាមការកំណត់របស់រដ្ឋាភិបាល ។

ទោះយ៉ាងណា ប្រទេសចិននៅតែអនុវត្តវិធានការតឹងតែងមួយចំនួនដូចជា ការបង្ហាញលទ្ធផលពិនិត្យជំងឺកូវីដប្រភេទ Antigen ខណៈរបាយការណ៍បញ្ជាក់ថា គោលនយោបាយកូវីដស្មើសូន្យបានធ្វើឱ្យសេដ្ឋកិច្ចចិនធ្លាក់ចុះ ។ លើសពីនេះ វិធានការខាងលើបានធ្វើឱ្យអត្រាគ្មានការងារធ្វើកើនឡើង រួមទាំងមានការធ្វើបាតុកម្មផងដែរ ៕ ប្រភព ៖ Bangkok biznews

រដ្ឋធានីវ៉ាស៊ីនតោន៖ ស្របពេលស្ថានការណ៍ នៅក្នុងតំបន់ឥណ្ឌូ-ប៉ាស៊ីហ្វិក កំពុងតែឡើងកម្ដៅយ៉ាងខ្លាំង សហរដ្ឋអាមេរិក មានផែនការដាក់ពង្រាយនូវយន្ដហោះគ្មានមនុស្សបើក ឬ ដ្រូន មានចំនួនរាប់ពាន់គ្រឿង សម្រាប់ប្រឈមមុខជាមួយនឹងកងទ័ពរំដោះប្រជាជនចិន។

គេហទំព័ររបស់បណ្ដាញទូរទស្សន៍អារ៉ាប់អន្ដជាតិ Alarabiya News បានចេញផ្សាយ កាលពីព្រឹក ថ្ងៃអង្គារ ទី២៩ ខែសីហា ថា មន្រ្ដីជាន់ខ្ពស់មួយរូប នៃក្រសួងការពារជាតិសហរដ្ឋអាមេរិក បានបញ្ជាក់ កាលពីថ្ងៃចន្ទ (ទី២៨ ខែសីហា) ថា មន្ទីរបញ្ចកោណ មានផែនការដាក់ពង្រាយដ្រូន រាប់ពាន់គ្រឿង នៅក្នុងរយៈពេល២ឆ្នាំខាងមុខនេះ សម្រាប់ត្រៀមខ្លួនទប់ទល់ ប្រឆាំងនឹងកងទ័ពរបស់ចិន។

លោកស្រី ខាធ្លីន ហ៊ីកស៍ (Kathleen Hicks) អនុរដ្ឋមន្រ្ដី ក្រសួងការពារជាតិសហរដ្ឋអាមេរិក បានបញ្ជាក់ នៅក្នុងសន្និសីទបច្ចេកវិទ្យាយោធា នៅក្នុងរដ្ឋធានីវ៉ាស៊ីនតោន ថា «អាទិភាពដ៏ចម្បងរបស់រដ្ឋាភិបាលក្រុងប៉េកាំង ផ្ដោតលើកម្លាំង រួមមាន នាវាចម្បាំង មីស៊ីល និង ចំនួនកងទ័ព ព្រមទាំងសម្ភារសឹកដ៏ច្រើនបំផុតរបស់ពួកគេ។ យើងនឹងប្រឈមមុខជាមួយនឹងកងទ័ពរំដោះប្រជាជនចិន ដោយកម្លាំងយោធារបស់យើងផ្ទាល់។ ប៉ុន្តែយើងនឹងពិបាករៀបចំផែនការ ពិបាកវាយ និង ពិបាកយកឈ្នះ»។

លោកស្រី អនុរដ្ឋមន្រ្ដី ក្រសួងការពារជាតិសហរដ្ឋអាមេរិក បានសង្កត់ធ្ងន់ ថា «គោលដៅដ៏សំខាន់ អាចទទួលលទ្ធផល គឺការដាក់ពង្រាយដ្រូនរាប់ពាន់គ្រឿង នៅក្នុងតំបន់ជាច្រើន នៅក្នុងរយៈពេល ចន្លោះពី១៨ខែទៅ២៤ខែខាងមុខនេះ។

សហរដ្ឋអាមេរិក បានអះអាង ថា ប្រទេសចិន នឹងក្លាយជាបញ្ហាប្រឈមជាបន្តបន្ទាប់របស់រដ្ឋាភិបាលក្រុងវ៉ាស៊ីនតោន ហើយកំពុងតែស្វែងរកនូវការរារាំងជម្លោះ ជាមួយរដ្ឋាភិបាលក្រុងប៉េកាំង ជាពិសេស ជុំវិញបញ្ហាកោះតៃវ៉ាន់ គ្រប់គ្រង ដោយខ្លួនឯង តាមបែបលទ្ធិប្រជាធិបតេយ្យ។

រដ្ឋាភិបាលក្រុងប៉េកាំង តែងតែអះអាង អំពីដែនអធិបតេយ្យភាពរបស់ចិន នៅលើកោះតៃវ៉ាន់។ បន្ថែមពីលើនេះ ក្រុងប៉េកាំង តែងតែចិញ្ចឹមចិត្ត អស់រយៈពេលជាយូរមកហើយ ដើម្បីប្រើប្រាស់កម្លាំងយោធា នៅថ្ងៃណាមួយ សម្រាប់ការដណ្ដើមកាន់កាប់ដែនកោះមួយនេះ យកមកដាក់ឲ្យស្ថិតនៅក្រោមការត្រួតត្រារបស់ខ្លួនវិញ ប្រសិនបើចាំបាច់។

ដោយឡែក រដ្ឋាភិបាលក្រុងតៃប៉ិរបស់លោកស្រី សៃ អ៊ីង-វ៉ិន (Tsai Ing-wen) ប្រធានាធិបតីតៃវ៉ាន់ បានច្រានចោលនូវការអះអាងរបស់ក្រុងប៉េកាំង។ ក្រុងតៃប៉ិ បានអះអាង ថា មានតែប្រជាជនតៃវ៉ាន់ ប៉ុណ្ណោះ ទើបអាចសម្រេចជោគវាសនារបស់ខ្លួនបាន។

ជាមួយនឹងការដាក់សម្ពាធ កាន់តែកើនឡើងយ៉ាងខ្លាំង ទាំងនយោបាយ ការទូត សេដ្ឋកិច្ច និង យោធា មកពីប្រទេសចិន ប្រឆាំងនឹងកោះតៃវ៉ាន់ នោះ ក្រុងតៃប៉ិ បានបង្កើននូវការទិញគ្រឿងសព្វាវុធ និង បង្កើននូវការផលិតមីស៊ីលទំនើបៗ នៅក្នុងស្រុក សម្រាប់ពង្រឹងដល់សមត្ថភាពការពាររបស់កងទ័ពតៃវ៉ាន់ ត្រូវត្រៀមខ្លួនទុកជាមុន ដើម្បីទប់ទល់ ប្រឆាំងនឹងការលុកលុយណាមួយរបស់កងទ័ពរំដោះប្រជាជនចិន។

ជាមួយគ្នានេះដែរ លោក តារ៉ូ អាសូ (Taro Aso) អនុប្រធានគណបក្សប្រជាធិបតេយ្យសេរី ដែលកំពុងតែកាន់អំណាច នៅក្នុងប្រទេសជប៉ុន និង ធ្លាប់ធ្វើជានាយករដ្ឋមន្រ្ដីជប៉ុន ចន្លោះពីឆ្នាំ២០០៨ដល់ឆ្នាំ២០០៩ បានបញ្ជាក់ កាលពីដើមខែសីហា ថា បរិយាកាសសន្ដិសុខ កាន់តែតានតឹង នៅច្រកសមុទ្រតៃវ៉ាន់។ បញ្ហានេះ មានន័យ ថា ជប៉ុន សហរដ្ឋអាមេរិក និង បណ្ដាសម្ពន្ធមិត្ដផ្សេងៗទៀត ត្រូវតែបង្ហាញនូវការតាំងចិត្តយ៉ាងមុតមាំ ចូលការពារតៃវ៉ាន់ ប្រសិនបើដែនកោះមួយនេះ ត្រូវរងការវាយប្រហារ មកពីប្រទេសចិន។

លោក តារ៉ូ អាសូ អតីតនាយករដ្ឋមន្រ្ដីជប៉ុន បានសង្កត់ធ្ងន់ នៅក្នុងសុន្ទរកថាមួយ នៅទីក្រុងតៃប៉ិ នៅក្នុងអំឡុងដំណើរទស្សនកិច្ចរបស់គាត់នោះ ថា «អ្វីដែលសំខាន់បំផុត នាពេលនេះ ត្រូវតែធ្វើឱ្យប្រាកដ ថា សង្រ្គាមមិនអាចផ្ទុះឡើង នៅច្រកសមុទ្រតៃវ៉ាន់។ ខ្ញុំជឿ ថា ឥឡូវនេះ ជាពេលវេលាដែលប្រទេសជប៉ុន តៃវ៉ាន់ សហរដ្ឋអាមេរិក និង បណ្ដាប្រទេសផ្សេងៗទៀត មានគំនិតដូចគ្នា ត្រូវតែរៀបចំខ្លួនត្រៀមទុកជាមុន សម្រាប់ចាត់វិធានការ ទប់ស្កាត់ដ៏ខ្លាំងបំផុត ហើយជាការតាំងចិត្ត ដើម្បីប្រយុទ្ធ»។

លោកអនុប្រធានគណបក្សប្រជាធិបតេយ្យសេរី ដែលកំពុងតែកាន់អំណាច នៅក្នុងប្រទេសជប៉ុន បានបន្ថែម ថា ការបង្ហាញយ៉ាងច្បាស់នូវសុច្ឆន្ទៈ ការពារតៃវ៉ាន់ នឹងក្លាយជាទម្រង់រារាំង ដល់សង្គ្រាម នៅច្រកសមុទ្រតៃវ៉ាន់។ ថ្វីបើគាត់មិនបានបញ្ជាក់ អំពីប្រទេសចិន ជាអ្នកឈ្លានពានយ៉ាងណាក្ដី ប៉ុន្តែគាត់បាននិយាយ ថា វាមានសារៈសំខាន់ខ្លាំងណាស់ សម្រាប់ជប៉ុន នៅក្នុងនាមជាអ្នកជិតខាងរបស់តៃវ៉ាន់ និង ប្រទេសដទៃទៀត ត្រូវតែរក្សាសណ្តាប់ធ្នាប់អន្តរជាតិ ហើយក៏ជាការផ្ញើសារមួយ ទៅកាន់ប្រទេសចិន និង សហគមន៍អន្តរជាតិផ្សេងៗទៀតផងដែរ។

លោក តារ៉ូ អាសូ ក្លាយជាមន្ត្រីនយោបាយជាន់ខ្ពស់បំផុតរបស់ប្រទេសជប៉ុន បានទៅធ្វើទស្សនកិច្ច នៅលើកោះតៃវ៉ាន់ ចាប់តាំងពីឆ្នាំ១៩៧២មកស្ថានភាពតានតឹង នៅជុំវិញកោះតៃវ៉ាន់ បានរួមចំណែកដល់ការសម្រេចចិត្តរបស់ជប៉ុន ដែលជាសម្ពន្ធមិត្តដ៏ជិតស្និទ្ធរបស់អាមេរិក កំពុងតែបង្កើននូវការចំណាយ លើវិស័យការពារជាតិរបស់ខ្លួនបន្ថែមទៀត។ លោក តារ៉ូ អាសូ កាលពីនៅកាន់តំណែងជាឧបនាយករដ្ឋមន្រ្ដីជប៉ុន កាលពីអំឡុងឆ្នាំ២០២១ បានហៅការឈ្លានពានណាមួយ ពីប្រទេសចិន ក្លាយជាការគំរាមកំហែង មកលើការរស់រានមានជីវិតរបស់ជប៉ុន។ ដូច្នេះ ជប៉ុន និង សហរដ្ឋអាមេរិក នឹងរួមគ្នាការពារតៃវ៉ាន់ ប្រសិនបើមានឧបទ្ទវហេតុឈ្លានពានកើតឡើង៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីបានដំណើរការរថភ្លើងអាកាសថ្មីនៅទីក្រុងហ្សាកាតា និងតំបន់ជុំវិញ ដែលស្មើនឹងទឹកប្រាក់ចំនួន២.១៣០លានដុល្លារអាមេរិក ។ ខ្សែរថភ្លើងថ្មីនេះ គឺជាគម្រោងដោះស្រាយបញ្ហាការកកស្ទះចរាចរណ៍ និងការបំពុលបរិយាកាសក្នុងទីក្រុង ។

កាលពីថ្ងៃទី២៨ ខែសីហា ឆ្នាំ២០២៣ ប្រធានាធិបតីឥណ្ឌូណេស៊ី លោក Joko Widodo បានធ្វើជាប្រធានបើកសម្ពោធរថភ្លើងអាកាសគ្មានអ្នកបើកបរ ដែលរត់លើចម្ងាយផ្លូវ៤១,២គីឡូម៉ែត្រតភ្ជាប់រវាងទីក្រុងហ្សាកាតា និងទីក្រុងជុំវិញដូចជា ទីក្រុងបេកាស៊ី និងទីក្រុងតេប៉ុក ។ ជាធម្មតា ពលរដ្ឋរស់នៅទីក្រុងហ្សាកាតា និងទីក្រុងជុំវិញបានប្រើប្រាស់សេវារថភ្លើងនៅជាយក្រុង ដែលមានចម្ងាយ៤១៨គីឡូម៉ែត្រ និងអាចដឹកអ្នកដំណើរបានប្រមាណ១,២លាននាក់ក្នុង១ថ្ងៃ ។

ប្រធានាធិបតីឥណ្ឌូណេស៊ី លោក Joko Widodo បានថ្លែងក្នុងពិធីសម្ពោធថា ហ្សាកាតា គឺជាទីក្រុងមួយស្ថិតក្នុងចំណោមទីក្រុងទាំង១០ លើពិភពលោកដែលស្ទះចរាចរណ៍ខ្លាំងបំផុត ហើយក្នុង១ថ្ងៃៗ មានយានជំនិះរហូតដល់៩៩ម៉ឺន៦ពាន់គ្រឿងបើកបរចូលទីក្រុង ដូច្នេះ វាបានធ្វើឱ្យស្ទះចរាចរណ៍ និងបរិស្ថានកខ្វក់ ។ លោកប្រធានាធិបតីសង្ឃឹមថា ពលរដ្ឋនឹងងាកមកប្រើប្រាស់សេវាកម្មរថភ្លើង LRT ជំនួសការបើករថយន្តផ្ទាល់ខ្លួន ដើម្បីចៀសវាងការស្ទះចរាចរណ៍ និងបំពុលបរិស្ថាន ។

រថភ្លើងអាកាសថ្មីនឹងដំណើររថភ្លើងចំនួន៣១គ្រឿង ហើយរថភ្លើងនីមួយៗមានទូរចំនួន៦ សម្រាប់ដឹកអ្នកដំណើរ និងអាចទទួលអ្នកដំណើរបានចំនួន១.៣០០នាក់ក្នុង១ជើង ។ នៅពេលរថភ្លើងអាកាសនេះអាចដំណើរការបានពេញលេញ គឺរថភ្លើងទាំងអស់នឹងអាចរត់បានចម្ហាយជាង៤០០ជើងក្នុង១ថ្ងៃ ។ ក្រៅពីនេះ ក្រសួងគមនាគមន៍បានដាក់ផែនការទាក់ទាញអ្នកដំណើរដោយកាត់បន្ថយថ្លៃធ្វើដំណើរផងដែរ ។

គម្រោងនេះទទួលបានប្រាក់ឧបត្ថម្ភពីប្រទេសចិន ប៉ុន្តែមានបញ្ហាសាងសង់យឺតយ៉ាវនាពេលកន្លងមក ។ រថភ្លើងអាកាសថ្មីនេះជាគម្រោងរថភ្លើងអាកាសធុនស្រាលទី៣ របស់ប្រទេសឥណ្ឌូណេស៊ូ ដោយរថភ្លើងទី១ រត់លើផ្លូវចម្ងាយ២៣គីឡូម៉ែត្រនៅខេត្តស៊ូមាត្រា ក្នុងឆ្នាំ២០១៨ ។ ចំណែករថភ្លើងទី២ រត់លើផ្លូវចម្ងាយ៥,៨គីឡូម៉ែត្រនៅទីក្រុងហ្សាកាតា ក្នុងឆ្នាំ២០១៩ ៕ ប្រភព ៖ Nation World News

បរទេស៖ តាំងពីប្រទេសឥណ្ឌាបានហាមឃាត់ការនាំចេញអង្ករកាលពីថ្ងៃទី ២០ ខែកក្កដាមក បានធ្វើឱ្យទីផ្សារអង្ករពិភពលោកកើនឡើងយ៉ាងឆាប់រហ័ស។ បច្ចុប្បន្ន តម្លៃអង្ករក្នុងប្រទេសវៀតណាមបានកើនឡើងលើសប្រទេសថៃ ១៥-៦៥ ដុល្លារក្នុងមួយតោន នេះបើយោងតាមប្រភពព័ត៌មាន vnexpress កាលពីថ្ងៃទី២៨ ខែសីហា។

លោកស្រី Phan Mai Huong សហស្ថាបនិកនៃ SSResource Media Pte.Ltd (Singapore) ដែលជាអង្គភាពជំនាញក្នុងការផ្តល់ព័ត៌មាន និងវិភាគទីផ្សារអង្ករពិភពលោក បាននិយាយថា ប្រទេសមីយ៉ាន់ម៉ាបានកំណត់ការនាំចេញអង្ករគ្រប់ប្រភេទនៅខែក្រោយ ដែលវិធានការទាំងនេះកំពុងកាត់បន្ថយការនាំចេញអង្ករពីមីយ៉ាន់ម៉ា ដោយជំរុញឱ្យតម្លៃនាំចេញចូលមានការកើនឡើងថ្មីមួយទៀត។
នៅចុងបញ្ចប់នៃវគ្គជួញដូរនៅថ្ងៃទី ២៨ ខែសីហា តម្លៃនាំចេញអង្កររបស់វៀតណាមបានបន្តកើនឡើងដល់ ៦៤៣ ដុល្លារក្នុងមួយតោន ខ្ពស់ជាងអង្ករថៃ ១៣ ដុល្លារក្នុងមួយតោន ដែលនេះគឺជាកម្រិតខ្ពស់បំផុតក្នុងរយៈពេល ១៥ ឆ្នាំ។

យោងតាមអាជីវកម្ម មូលហេតុដែលតម្លៃអង្ករនាំចេញរបស់វៀតណាមឡើងថ្លៃគឺដោយសារតែតម្រូវការពិតប្រាកដពីទីផ្សារពិភពលោកដ៏ធំ។ ទន្ទឹមនឹងនេះ តម្លៃអង្ករក្នុងស្រុកបានកើនឡើងជាបន្តបន្ទាប់ក្នុងប៉ុន្មានថ្ងៃថ្មីៗនេះ ដែលបង្ខំឱ្យអ្នកនាំចេញដេញថ្លៃតម្លៃខ្ពស់ ដើម្បីអាចបិទកិច្ចសន្យានាំចេញដោយមិនមានការខាតបង់។ បច្ចុប្បន្នតម្លៃទិញអង្ករក្នុងស្រុកមានតម្លៃថ្លៃ តម្លៃអង្ករគ្រប់ប្រភេទឡើងដល់ជិត ៨,០០០ ដុងក្នុងមួយគីឡូក្រាម (ជាង ១,៣០០ រៀល) តម្លៃនេះបើបំប្លែងទៅជាអង្ករនាំចេញគឺស្មើនឹង ៦៧០-៦៨០ ដុល្លារក្នុងមួយតោន។

ប្រធាននាយកដ្ឋានផលិតកម្មដំណាំនៃក្រសួងកសិកម្ម និងអភិវឌ្ឍន៍ជនបទ លោក Nguyen Nhu Cuong បានមានប្រសាសន៍ថា បច្ចុប្បន្នពិភពលោកកំពុងប្រឈមមុខនឹងការខ្វះខាតការផ្គត់ផ្គង់អង្ករយ៉ាងខ្លាំង ដូច្នេះទំនិញក្នុងប្រទេសនានាតែងតែត្រូវបានធានាយ៉ាងពេញលេញ ដើម្បីកុំឱ្យតម្លៃក្នុងស្រុកកើនឡើង។ ប៉ុន្តែទោះជាយ៉ាងណាក៏ដោយ តម្លៃអង្ករក្នុងប្រទេសវៀតណាមនៅតែបន្តកើនឡើងឥតឈប់ឈរ៕
ប្រភព៖vnexpress

ប្រទេសថៃ ៖ បច្ចុប្បន្ន មានទំនិញចិនជាច្រើនប្រភេទបាននាំចូលមកកាន់ទីផ្សារប្រទេសថៃ ជាពិសេស សម្ភារៈអគ្គិសនី និងសម្ភារៈអេឡិចត្រូនិកមានតម្លៃថោក ហើយវាបានរីកចម្រើនយ៉ាងឆាប់រហ័សក្នុងទីផ្សារអនឡាញ ។ បញ្ហានេះមិនត្រឹមតែធ្វើឱ្យប៉ះពាល់ដល់ក្រុមហ៊ុនផលិត និងអាជីវករលក់ទំនិញនៅប្រទេសថៃប៉ុណ្ណោះទេ ប៉ុន្តែវាក៏ធ្វើឱ្យប្រទេសថៃមានឱនភាពពាណិជ្ជកម្មផងដែរ ។

លោក Kriengkrai Thiennukul ប្រធានសហព័ន្ធឧស្សាហកម្មប្រទេសថៃបានលើកឡើងថា នៅឆមាសទី១ ឆ្នាំ២០២៣ កន្លងមក ប្រទេសថៃមានឱនភាពពាណិជ្ជកម្មជាមួយប្រទេសចិន រហូតដល់៦០ម៉ឺនលានបាតឯណោះ ។

នៅពេលចិននាំចូលទំនិញមកលក់នៅថៃកាន់តែច្រើន ប៉ុន្តែការនាំចេញទំនិញរបស់ថៃទៅចិនវិញបែរជាធ្លាក់ចុះ ។ បើតាមរបាយការណ៍កាលពីថ្ងៃទី២៥ ខែសីហា ឆ្នាំ២០២៣ របស់ការិយាល័យគោលនយោបាយ និងយុទ្ធសាស្ត្រពាណិជ្ជកម្មនៃក្រសួងពាណិជ្ជកម្មថៃបង្ហាញថា ជារួម ការនាំចេញទំនិញទៅកាន់ទីផ្សារក្រៅប្រទេសសំខាន់ៗនៅតែមិនប្រាកដប្រជា ហើយនៅតែរងការដាក់សម្ពាធដោយសារសេដ្ឋកិច្ចធ្លាក់ចុះ និងពាណិជ្ជកម្មពិភពលោក ។

ចំណែកនៅទីផ្សារប្រទេសចិនវិញ ការនាំចេញទំនិញថៃបានធ្លាក់ចុះ៣,២% ហើយទំនិញសំខាន់ៗដែលធ្លាក់ចុះរួមមាន ផលិតផលកៅស៊ូ, កុំព្យូទ័រ, ឧបករណ៍ដំឡើង និងគ្រាប់ផ្លាស្ទិក ។ ចំណែកការនាំចេញទំនិញសំខាន់ៗបានកើនឡើងរួមមាន ផ្លែឈើស្រស់ ផ្លែឈើក្លាហ្សេ និងផ្លែឈើក្រៀម, ឈើ និងសម្ភារៈផលិតពីឈើ ព្រមទាំងផលិតផលអាលុយមីញ៉ូម ជាដើម ។ រីឯរយៈពេល៧ខែដំបូងនៃឆ្នាំ២០២៣ នេះ ការនាំចេញរបស់ថៃ បានធ្លាក់ចុះជាមធ្យមស្មើនឹង៣,៧% ៕ប្រភព ៖ Mono News

ទីក្រុងតៃប៉ិ៖ នៅក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលក្រុងប៉េកាំង បាន និង កំពុងតែបង្កើនសម្ពាធ កាន់តែខ្លាំងក្លាឡើង ទាំងនយោបាយ ការទូត សេដ្ឋកិច្ច និង យោធា ប្រឆាំងនឹងរដ្ឋាភិបាលក្រុងតៃប៉ិ ដើម្បីចាប់បង្ខំឲ្យទទួលយកនូវដែនអធិបតេយ្យភាពរបស់ប្រទេសចិន ហើយឥឡូវនេះ កំពុងតែបន្ដបញ្ជូនយន្ដហោះចម្បាំង និង នាវាយោធា ទៅជុំវិញដែនកោះតៃវ៉ាន់ ដែលគ្រប់គ្រងដោយខ្លួនឯង តាមបែបលទ្ធិប្រជាធិតេយ្យ។

សារព័ត៌មាន Taiwan News បានចេញផ្សាយ នៅថ្ងៃចន្ទ ទី២៨ ខែសីហា ថា ក្រសួងការពារជាតិតៃវ៉ាន់ បានបញ្ជាក់ ថា កាលពីវេលាម៉ោង៦ព្រឹក ថ្ងៃអាទិត្យ និង វេលាម៉ោង៦ ថ្ងៃចន្ទ ចិន បានបញ្ជូនយន្ដហោះយោធា ចំនួន១១គ្រឿង និង នាវាចម្បាំង ចំនួន៤គ្រឿង ធ្វើសកម្មភាព នៅជុំវិញកោះតៃវ៉ាន់។ នៅក្នុងចំណោមយន្ដហោះយោធារបស់កងទ័ពរំដោះប្រជាជនចិន ទាំងនោះ ក៏មានយន្ដហោះគ្មានមនុស្សបើក ឬ ដ្រូនឈ្លបយកការណ៍ BZK-005 ចំនួនមួយគ្រឿង ហោះ ចូលមកលើខ្សែបន្ទាត់មធ្យម នៃច្រកសមុទ្រតៃវ៉ាន់ ហើយហោះតាមបណ្ដោយផ្នែកខាងជើង នៃតំបន់កំណត់ព្រំដែនការពារដែនអាកាសរបស់តៃវ៉ាន់ (ADIZ)។

ស្របគ្នានេះ យន្ដហោះទម្លាក់គ្រាប់បែកមួយគ្រឿងរបស់ចិន ប្រភេទ Xian H-6 បានហោះហើរ នៅផ្នែកខាងត្បូង នៃតំបន់កំណត់ព្រំដែនការពារដែនអាកាសរបស់ខ្លួន ខណៈយន្ដហោះចម្បាំង Shenyang J-16 ចំនួន២គ្រឿង និង យន្ដហោះប្រយុទ្ធ Chengdu J-10 ចំនួន២គ្រឿង បាននៅតំបន់ភាគនិរតី នៃកោះតៃវ៉ាន់។

ជាការឆ្លើយតបវិញនោះ តៃវ៉ាន់ បានបញ្ជូនយន្ដហោះ និង នាវាចម្បាំងរបស់ខ្លួន តាមឃ្លាំមើល ហើយប្រើប្រាស់ប្រព័ន្ធមីស៊ីលបាញ់ពីលើដីទៅអាកាស តាមដានសកម្មភាពរបស់កងទ័ពរំដោះប្រជាជនចិន។

ក្រសួងការពារជាតិតៃវ៉ាន់ បានសង្កត់ធ្ងន់ ថា រហូតមកដល់ខែសីហា នេះ ក្រុងប៉េកាំង បានបញ្ជូនយន្ដហោះយោធា ចំនួន៣៥១គ្រឿង និង នាវាចម្បាំងជាច្រើនប្រភេទ ចំនួន១៨៤គ្រឿង មកជុំវិញកោះតៃវ៉ាន់។ ចាប់តាំងពីខែកញ្ញា ឆ្នាំ២០២០ រហូតមក ប្រទេសចិន បានបង្កើននូវការប្រើប្រាស់យុទ្ធសាស្រ្ដតំបន់ប្រផេះរបស់ខ្លួន ដោយការបង្កើនចំនួនយន្ដហោះចម្បាំង និង នាវាយោធា ធ្វើប្រតិបត្ដិការ នៅជុំវិញតៃវ៉ាន់។

យុទ្ធសាស្ត្រតំបន់ប្រផេះ ត្រូវបានកំណត់ ថា វាជាកិច្ចខិតខំប្រឹងប្រែង ឬ កិច្ចព្យាយាមជាបន្ដបន្ទាប់ លើសពីការរារាំង និង ធានាស្ថិរភាព ដែលសម្រេចបាននូវគោលដៅសន្តិសុខ ដោយមិនងាកទៅរកការប្រើប្រាស់កម្លាំង ដោយផ្ទាល់ និង ទំហំធំនោះឡើយ។

ក្រុមមន្រ្ដីជំនាញយោធារបស់លោកខាងលិច ធ្លាប់អះអាង កាលពីពេលថ្មីៗនេះ ថា បច្ចុប្បន្ន ប្រទេសចិន កំពុងតែប្រឈមមុខនឹងបញ្ហាសេដ្ឋកិច្ចធ្លាក់ចុះយ៉ាងខ្លាំង។ បញ្ហានេះ មិនមែនជារឿងល្អនោះឡើយ ហើយរដ្ឋាភិបាលក្រុងប៉េកាំង អាចនឹងជ្រើសរើសជម្រើសផ្សេងៗ គឺវាយប្រហារទៅលើកោះតៃវ៉ាន់។ ប្រសិនបើមេដឹកនាំចិន លោក ស៊ី ជិនពីង ជ្រើសរើសយកជម្រើសបែបនេះមែន គឺចិន នឹងផុងខ្លួន ដូចលោក វ៉្លាឌីមៀ ពូទីន ប្រធានាធិបតីរុស្ស៊ី បានគណនាខុសជាយុទ្ធសាស្រ្ដ ធ្វើឲ្យរដ្ឋាភិបាលក្រុងមូស្គូ ជាប់ផុងយ៉ាងជ្រៅ នៅក្នុងសង្គ្រាម នៅអ៊ុយក្រែន៕